بەپێی نوێترین ئامارەکان، بەهۆی تەقینەوەیەک لە کانێکی خەڵوز لە هەرێمی شانسی لە باکوری چین، زیاتر لە 50 کرێکار گیانیان لەدەستداوە.

روداوەکە شەوی هەینی لە کانێکی خەڵوز بە ناوی "لیوشین یو" لە ناوچەی "چین یوان" رویداوە، لەو کاتەشدا 247 کرێکار لەژێر زەویدا سەرقاڵی کارکردن بوون.

بەپێی ئاژانسی هەواڵی رەسمی چین (شینخوا)، دوای روداوەکە سەرۆکی چین "شی جینپینگ" فەرمانی بە دەزگا پەیوەندیدارەکان کردووە هەموو هەوڵێک بخەنەگەڕ بۆ دۆزینەوەی بێسەروشوێنبووان و فریاکەوتنی برینداران، هەروەها جەختی لە ئەنجامدانی لێکۆڵینەوەیەکی ورد و سزادانی توندی سەرپێچیکاران کردووەتەوە.

جێگەی ئاماژەیە، تەقینەوەکە دوێنێ رویداوە و تا بەرەبەیانی ئەمڕۆ شەممە، 201 کرێکار بە سەلامەتی ڕزگار کراون، بەڵام بەهۆی سەختی روداوەکە، ئاماری قوربانیان بۆ زیاتر لە 50 کەس بەرز بووەتەوە، ئێستاش تیمەکانی فریاگوزاری بەردەوامن لە گەڕان و لێکۆڵینەوەکان بۆ زانینی هۆکاری راستەقینەی تەقینەوەکە.

دۆناڵد ترەمپ، سەرۆكی ئەمریكا رایگەیاند، واشنتۆن بودجەیەكی سەربازیی نوێ بە بەهای یەك تریلیۆن و 500 ملیار دۆلار بۆ ساڵی 2027 پێشكەش دەكات. 
ترەمپ لە كاتی سوێندخواردنی سەرۆكی نوێی یەدەگی فیدراڵیدا جەختی كردەوە كە ڕێگە بە ئێران نادەن ببێتە خاوەنی چەكی ئەتۆمی و تاران بە توندی پەرۆشی ڕێككەوتنە لەگەڵیاندا.
ئاماژەی بەوەش كرد، ئەمریكا گورزی توند و بەهێزی لە ئێران وەشاندووە كە هیچ بژاردەیەكی تری لەبەردەمدا نەهێشتووەتەوە.
هاوكات، ڕاپۆرتە ڕۆژئاوایییەكان ئاشكرایان كردووە كە پێنتاگۆن خەریكی هەڵسەنگاندنی كۆگای موشەكە بەرگرییەكانیەتی دوای ئەوەی لە جەنگی دژ بە ئێراندا بەشێكی زۆری لێ بەكارهێنا. 
بەپێی زانیارییەكان، ئەمریكا زیاتر لە 200 موشەكی سیستمی ساد و 100 موشەكی تری ستانداردی بۆ بەرگریكردن لە ئیسرائیل تەقاندووە، ئەمەش نیگەرانیی لەبارەی ئامادەیی سوپاكەی دروستكردووە.
ئەم پێشهاتانە لەكاتێكدایە كە ترەمپ پێشتر ڕایگەیاندبوو ململانێكان لەگەڵ ئێراندا بەمزووانە كۆتاییان دێت.

تولسی گابارد بەڕێوەبەری هەواڵگری نیشتمانی ئەمریكا دەستی لەكاركێشایەوە و رۆژی 30 مانگی داهاتوو دوایین رۆژی دەبێت لە پۆستەكەی.
بەگوێرەی هەواڵێكی كەناڵی فۆكس نیوز: تولسی گابارد، بەڕێوەبەری هەواڵگری نیشتمانی ئەمڕۆ ترەمپی لە بڕیاری دەستلەكاركێشانەوەی ئاگادار كردەوە و رۆژی 30ی حوزەیران دوایین رۆژی دەبێت لە پۆستەكەی.
ئاماژەی بەوەشكردووە، گابارد دەست لەكار دەكێشێتەوە بۆ پشتگیریكردنی هاوسەرەكەی لە ململانێی لەگەڵ جۆرێكی زۆر دەگمەنی شێرپەنجە. 
گابارد پاڵپشتیكارێكی سەرسەختی ترەمپ بووە لە كەمپینی هەڵبژاردنی سەرۆكایەتی 2024 و دوای گەڕانەوەی ترەمپیش بۆ كۆشكی سپی یەكێك بووە لە كەسایەتیە بەهێزەكانی ئەمریكا كە بانگهێشتی كۆشكەكە كراوە. 
پێگەی بی بی سی رایگەیاند، لە كاتێكدا ئەمریكا هێرشی كردەسەر ئێران و فشاری دەخستە سەر كوبا و مادۆرۆی لەسەر كار لابرد گابارد ئەمساڵ تا ڕادەیەكی ونبوو لە بەرچاو.

رۆژنامەی دەیلی مەیلی بەریتانی، پێكهاتەیەكی بازنەیی و نادیار لە نزیك بنكە سەربازییە نهێنییەكەی ئەمریكا كە بە ناوچەی 51 لە ویلایەتی نیڤادا ناسراوە ئاشكرا دەكات، ئەوەش شەپۆلێكی بەرفراوانی لە گومان و لێكدانەوە لە تۆڕە كۆمەڵایەتییەكان دروست كردووە. 

ئەم دیمەنە كە لە رێگەی نەخشەكانی گوگڵەوە بینراوە، جارێكی تر پرسی بوونی تەنە فڕیوە نەناسراوەكان و چالاكییە نهێنییەكانی واشنتۆنی لەو ناوچە بیابانییەدا هێناوەتەوە بەرباس، بەتایبەت كە ئەم ناوچەیە بۆ چەندین دەیەیە وەك ناوەندی بیردۆزەكانی پیلانگێڕی و تاقیكردنەوەی تەكنەلۆژیای نادیار سەیر دەكرێت.
بەپێی راپۆرتێكی رۆژنامەی دەیلی مەیلی بەریتانی، ئەم پێكهاتە نادیارە لە دووری نزیكەی 4 میل لە باكووری رۆژهەڵاتی بنكە سەربازییەكەوە رێژراوە. 
شوێنە ئاسمانییەكان نیشانی دەدەن كە بازنەیەكی گەورەی تەواو لە ناو جەرگەی بیابانی نیڤادا هەڵكەندراوە و لە ناوەڕاستەكەشیدا تەنێكی بەرز یان گردێكی بچووك دەبینرێت. 
ئەم رەوشە وایكردووە كە شوێنەكە لە ئاسمانەوە وەك نیشانەیەكی گەورە یان سەكۆیەكی نیشتنەوەی نادیار دەربكەوێت، ئەمەش بووەتە هۆی ئەوەی بەكارهێنەران وێنەكان بە خێرایی بڵاو بكەنەوە و لێكدانەوەی جیاوازی بۆ بكەن.
لە كاتێكدا هەندێك پێیان وایە ئەمە شوێنی كەوتنی كەشتییەكی ئاسمانی یان دامەزراوەیەكی نهێنی تر بێت، شارەزایان و هەندێك لە چاودێران رەوشەكە بە شێوەیەكی تر دەبینن. 
ئەوان ئاماژە بەوە دەكەن كە ئەگەری زۆرە ئەمە تەنیا نیشانەیەكی كۆن بێت بۆ مەشقی بۆردومانكردن و راهێنانی ئاسمانی سەربازی كە مێژووەكەی بۆ سەردەمی جەنگی سارد دەگەڕێتەوە. 
ئەم جۆرە پێكهاتانە لە گۆڕەپانەكانی تاقیكردنەوەی سەربازی لە ناو بیابانی نیڤادا شتێكی باو بوون و بۆ مەبەستی جیاواز لە راهێنانەكاندا بەكار دەهاتن.
دیزاینی بازنەیی شوێنەكە و سروشتە كراوەكەی،گونجاو بێت بۆ راهێنانی فڕۆكەوانەكان و تاقیكردنەوەی سیستەمەكانی دیاریكردنی ئامانج و رادار لە ئاسمانەوە. 
جێی ئاماژەیە، هەرچەندە ئاژانسی هەواڵگری ناوەندی ئەمریكا لە ساڵی 2013دا بە رەسمی دانی بە بوونی ئەم بنكەیەدا نا، بەڵام هێشتا بەشێكی زۆری چالاكییەكانی بە نهێنی ماونەتەوە. 
ئەم نهێنیپارێزییەش بەردەوام دەبێتە هۆی فشار و دروستبوونی چیرۆكی جۆراوجۆر سەبارەت بە تاقیكردنەوە سەربازییەكان و پەیوەندییان بە بونەوەرە ئاسمانییەكانەوە ناوچەی 51 وەك یەكێك لە جێ مشتومڕترین شوێنە سەربازییەكانی جیهان دەمێنێتەوە. 
هەر دەركەوتنێكی نوێ لەو ناوچەیە، چەندە سادەش بێت، دەبێتە هۆی وروژاندنی گومانەكان سەبارەت بە بوونی بونەوەرە ئاسمانییەكان و تەكنەلۆژیا پێشكەوتووەكانی تر، چونكە لێپرسراوانی سەربازی ئەمریكا هێشتا ئامادە نین پەردە لەسەر هەموو ئەو رەوشە لابدەن كە لە پشت دیوارە بەرزەكانی ئەو بنكەیەوە روو دەدەن.

بڕیارە ترەمپ ژمارەی سەربازانی لە پۆڵەندا زیاد بکات، ئەوەش لە کاتێکدایە کە هەمووان پێچەوانەی ئەمایان پێشبینی دەکرد، بەهۆی ئەوەی پێشتر پنتاگۆن بڕیاری کەمکردنەوەی سەربازەکانی دابوو لە ئەڵمانیا.

ماڵپەڕی هەواڵی ئەکسیۆسی ئەمریکی بڵاویکردووەتەوە، دۆناڵد ترەمپ سەرۆکی ئەمریکا بەنیازە پێنج هەزار سەربازی دیکە بۆ پۆڵەندا بنێرێت و بەوەش ژمارەی سەربازەکانی لەو وڵاتە دەگاتە نزیکەی 10 هەزار سەرباز.

ئەکسیۆس روونیکردووەتەوە، بڕیارەکەی ترەمپ لەدوای ئەوە دێت کە چەند جارێک فڕۆکە بێفڕۆکەوانەکانی روسیا ئاسمانی پۆڵەندایان بەزاندبوو و وڵاتەکەیان ناچارکردبوو بیانخاتەخوارەوە.

هاوکات، لەم هەفتەیەشدا سێ کەس بە تۆمەتی سیخوڕیکردن بۆ هەواڵگریی روسیا لە پۆڵەندا دەستگیرکران.

ماڵپەڕە ئەمریکییەکە ئاماژەی بەوەشداوە، ئەم بڕیارەی ترەمپ پێچەوانەی پێشبینیی شرۆڤەکارە سیاسی و سەربازییەکان، چونکە کۆشکی سپی بڕیاریدا پێنج هەزار سەربازی ئەمریکی لە ئەڵمانیا بکشێنێتەوە، بە بەهانەی ئەوەی کاریان بەوە نەماوە ئەو ژمارە سەربازە لەو وڵاتەدا بن،

لەكاتی نمایشێكی ئاسمانی لە ویلایەتی ئایداهۆی ئەمریكا، دوو فڕۆكەی جەنگیی ئەمریكا بە بەهای 136 ملیۆن دۆلار بەیەكیاندا كێشاو تێكشان.

میدیاكانی ئەمریكا بڵاویانكردووەتەوە، سەرەڕای ئەوەی فڕۆكەكان لە ئاسمان تێكشكاون، بەڵام چوار فڕۆكەوانەكەیان بە سەلامەتی ڕزگاریان بووە.

سەرەڕای ئەوەی رووداوەكە لە 17ی ئەم مانگە روویداوە، بەڵام لێكۆڵینەوەكان دەریانخستووە كە تێچووی دارایی ئەم نمایشە سەربازییە زۆر لە قازانجە پیشەییەكەی زیاتر بووە، لەگەڵ ئەوەشدا رووداوەكە مشتومڕی زۆر لەسەر هۆكاری سەركێشیكردنی پێنتاگۆن بە فڕۆكە گرانبەهاكان و ژیانی فڕۆكەوانان لە پێناو كاتبەسەربردن دروستكردووە.

بەپێی توێژینەوەیەكی ساڵی 2012 تێچووی تیمی نمایشی ئاسمانیی هێزی دەریایی ئەمریك، نزیكەی 98 ملیار و 600 ملیۆن دۆلار بووە، لە كاتێكدا داهاتی راكێشانی گەنجان بۆ ناو سوپا تەنیا یەك ملیۆن دۆلار بووە، ئەمەش واتە زیانی دارایی بە ڕێژەی 99% بووە.
لەگەڵ ئەوەشدا، لێپرسراوانی پێشووی سوپا جەخت دەكەنەوە كە پێنتاگۆن ئەم نمایشە ئاسمانییانە بە پێویست دەزانێت بۆ نیشاندانی هێز و كارامەیی سوپا و هاندانی خەڵك بۆ خزمەتی سەربازی، سەرەڕای ئەو مەترسییە گەورانەی كە لە رابردوودا بوونەتە هۆی چەندین رووداوی كوشندە.

رۆژنامەی واشنتۆن پۆستی ئەمریکی، بە پشتبەستن بە هەڵسەنگاندنەکانی وەزارەتی بەرگریی ئەمریکا بڵاویکردوەتەوە، کە سوپای ئەمریکا بەشێکی زۆر لە کۆگاکانی موشەکی پێشکەوتووی دژەفڕینی خۆی لە میانی بەرگریکردن لە ئیسرائیل بەرانبەر هێرشەکانی ئێران بەکارهێناوە. 

بەپێی راپۆرتەکە، قەبارەی ئەو چەکانەی لەلایەن هێزەکانی ئەمریکاوە بەکارهێنراون، بەشێوەیەکی بەرچاو زیاتر بووە لەوەی کە خودی سوپای ئیسرائیل بەکاریهێناوە بۆ پاراستنی وڵاتەکەی.

واشنتۆن پۆست لە زاری، سێ بەرپرسی باڵای ئەمریکیەوە، کە ویستیان بووە  ناویان ئاشکرا نەکرێت، بە رۆژنامەکەیان راگەیاندووە، واشنتن لە میانی ئۆپراسیۆنێکدا بە ناوی "توڕەیی داستان ئاسا"، بەشێکی سەرەکیی ڕوبەڕوبونەوەی هێرشە موشەکییە بالیستییەکانی ئێرانی لەئەستۆ گرتووە.

ئاماژە بەوەش کراوە، ئەم ناهاوسەنگییە لە بەکارهێنانی چەک و تەقەمەنیدا، بووەتە هۆی دروستبوونی ئاڵنگاری و پرسیاری جدی لەسەر ئاستی ئامادەیی سەربازیی سوپای ئەمریکا و پابەندبوونی ئەمنیی ئەو وڵاتە لە ناوچە جیاجیاکانی جیهاندا.

بەپێی زانیارییەکانی ئەو بەرپرسانە، سوپای ئەمریکا لە کاتی ئەو پێکدادانانەدا، زیاتر لە 200 موشەکی تێکشکێنەری سیستمی پێشکەوتووی "تاد" (THAAD)ی بەکارهێناوە، کە ئەم بڕەش نزیکەی نیوەی تەواوی کۆگاکانی پمتاگۆنە لەم جۆرە موشەکە پێکدەهێنێت.

 جیا لەوەش، کەشتییە جەنگییەکانی ئەمریکا لە رۆژهەڵاتی دەریای ناوەڕاستدا زیاتر لە 100 موشەکی تێکشکێنەریان لە جۆرەکانی "Standard-3" و "Standard-6" بەکارهێناوە.

لە بەرانبەردا وەک بەراوردکارییەک، سوپای ئیسرائیل لەم ماوەیەدا کەمتر لە 100 موشەکی تێکشکێنەری سیستمی "پیکان" (Arrow) و نزیکەی 90 موشەکی سیستمی "قەڵغانی داوود"ی بەکارهێناوە، کە تەنانەت بەشێک لەوانەش نەک بۆ موشەکەکانی ئێران، بەڵکو بۆ روبەڕووبوونەوەی موشەکە سادەکانی ئەو گرووپانە بووە کە لە یەمەن و لوبنانەوە هێرشیان کردووە.

دۆناڵد ترەمپ، سەرۆکی ئەمریکا جەختی کردەوە کە وڵاتەکەی رێگە نادات ئێران ببێتە خاوەنی چەکی ئەتۆمی، هاوکات ئاماژەی بە بەردەوامیی ئەو دانوستانانەش کرد کە لەگەڵ تاراندا بەڕێوەدەچن بۆ گەیشتن بە رێککەوتنێک سەبارەت بە بەرنامە ئەتۆمییەکەی.

ترەمپ لە لێدوانێکی بەپەلەدا رایگەیاند: واشنتۆن لە رێگەی گەمارۆدانێکەوە کە وەک دیوارێکی پۆڵایینە، بە تەواوی کۆنترۆڵی گەروی هورمزی کردووە، هاوكات وتیشی: ویلایەتە یەکگرتووەکان 75%ی توانای مووشەکیی ئێرانی لەناوبردووە.

سەرۆکی ئەمریکا ئاماژەی بەوەش کرد کە وڵاتەکەی هەوڵدەدات گەرەنتی هاتوچۆی کەشتیوانی لە گەروی هورمز بکات بەبێ سەپاندنی هیچ جۆرە باج و رسووماتێک، جەختیشی کردەوە: ویلایەتە یەکگرتووەکان دەست بەسەر یۆرانیۆمی پیتێنراوی ئاست بەرزی ئێراندا دەگرێت و تێکی دەشکێنێت، و پێداگریشی کرد کە بە هیچ شێوەیەک رێگە نادرێت ئەو یۆرانیۆمە لەناو ئێراندا بمێنێتەوە.

ترەمپ تیشکی خستە سەر ئەوەی کە: هێزی دەریایی ئەمریکا کارێکی باش دەکات، و گەمارۆ دەریاییە سەپێنراوەکە رێگری دەکات لە گەیشتنی کەشتییەکان بۆ ئێران یان بەجێهێشتنی وڵاتەکە.

ناوبراو رونکردنەوەی زیاتری دا کە واشنتۆن بەردەوامە لە دانوستان لەگەڵ تاران و وتی: دەبینین کارەکان بە کۆێ دەگەن، بەڵام بە هەر رێگەیەک بێت ئەوەی دەمانەوێت بەدەستی دەهێنین.

لە کۆتاییدا ترەمپ ئاماژەی بەوە کرد: بەپێی خەمڵاندنەکان ئێران رۆژانە زیانی 500 ملیۆن دۆلاری بەردەکەوێت، و جارێکی تریش جەختی لەوە کردەوە کە ویلایەتە یەکگرتووەکان رێگە بە تاران نادات یۆرانیۆمی پیتێنراوی ئاست بەرز لای خۆی بهێڵێتەوە.

مارکۆ رۆبیۆ، وەزیری دەرەوەی ئەمریکا، ئەمڕۆ پێنجشەممە، رایگەیاند، بڕیارە بەرپرسانی پاکستان هەر ئەمڕۆ سەردانی تاران بکەن و ئاماژەی ئەرێنیش لەئارادان، هاوکات جەختیشی کردەوە کە: ئێمە هەموو هەوڵێکی خۆمان دەدەین بۆ گەیشتن بە رێککەوتن.

رۆبیۆ لە لێدوانێکی رۆژنامەوانیدا وتی: سەپاندنی سیستمێک بۆ کۆکردنەوەی باج و رسوومات لە گەروی هورمز، گەیشتن بە رێککەوتنی دیپلۆماسی مەحاڵ دەکات.

ناوبراو لە درێژەی قسەکانیدا وتی: هەرچی لە تواناماندا بێت دەیکەین بۆ گەیشتن بە رێککەوتن لەگەڵ ئێران، هەندێک نیشانەی باش هەن و چەند پێشکەوتنێکیشمان بەدەستهێناوە.

وەزیری دەرەوەی ئەمریکا ئاماژەی بەوەش کرد: سەرۆک ترەمپ نائومێد بوو لەوەی کە زۆربەی وڵاتانی ناتۆ  بەرپرسانی پاکستان بۆ تاران، نیشانەی ئەرێنی بەدواوەیە.

ڤلادیمێر پوتین، سەرۆکی روسیا رایگەیاند، لە سایەی پەرەسەندنی گرژییەکانی جیهان و سەرهەڵدانی هەڕەشە و مەترسییە نوێیەکاندا، پێویستە "سێیانەی ئەتۆمی"ی روسیا وەک هەمیشە بە گرەنتییەکی باوەڕپێکراو بۆ پاراستنی سەروەریی دەوڵەتی یەکگرتویی روسیا و بیلاڕووس بمێنێتەوە، بە جۆرێک کە هاوسەنگیی هێز لەسەر ئاستی جیهان بپارێزێت.

سەرۆکی روسیا ئاماژەی بەوەکردوە، بونی سێلایەنی چەکی ئەتۆمی روسیا پێکهاتەیەکی ستراتیژی رێگریکردنە، کە پێکهاتووە لە سێ سیستەمی سەرەکی گەیاندنی چەکی ئەتۆمی لەوانە؛  موشەکی بالیستیکی نێوان کیشوەرەکان کە لە زەویەوە هەڵدەدرێت، موشەکی بالیستی ستراتیژی لە رێگەی ژێردەریاییەوە هەڵدەدرێت و بۆمب هاوێژە ستراتیژییەکان  کە چەکی ئەتۆ،ین و لە رێگەی ئاسمانەوە هەڵدەدرێن.

پوتن ئاماژەی بەوەکردوە، ئەم هەمەچەشنییە توانای تۆڵەسەندنەوە و وەڵامدانەوەی وڵاتەکەی مسۆگەر دەکات.

 ئەم لێدوانەی پوتن لە کاتێکدایە کە لەگەڵ ئەلێکساندەر لوکاشینکۆ، سەرۆکی بیلاڕوس، لە رێگەی پەیوەندیی ڤیدیۆییەوە چاودێریی یەکەمین مانۆڕی سەربازیی ئەتۆمیی هاوبەشی نێوان هەردوو وڵاتیان کرد، کە لە 18ی ئەم مانگەوە لەسەر خاکی بیلاڕوس دەستیپێکردووە.

 لای خۆشییەوە، لوکاشینکۆ جەختی لەوە کردەوە، کە ئەم مانۆڕانە هەڕەشە لە کەس ناکەن و هەردوو وڵات ئامادەن بە هەموو شێوازێک بەرگریی لە نیشتمانی هاوبەشیان بکەن کە لە شاری "برێست"ی بیلاڕووسیاوە بۆ رۆژهەڵاتی روسیا درێژ دەبێتەوە.

هاوکات وەزارەتی بەرگریی ڕووسیا دیمەنی مانۆڕی هێزە ئەتۆمییە تاکتیکییەکانی بڵاوکردەوە، کە تێیدا تیمی فڕۆکە جەنگییەکانی "میگ-31" مەشقیان لەسەر پێكانی ئامانجەکان بە موشەکی بالیستیی "کینجاڵ"ی هەڵگری کڵاوەی ئەتۆمی کردووە، جیا لە ئامادەکارییەکانی تایبەت بە سیستمی موشەکیی "ئیسکەندەر-ئێم".

ئۆپراسیۆنەکەی روسیا و بیلاروس بە زیاتر لە 67 هەزار سەرباز و حەوت هەزار  و800 ئامێری سەربازی لەگەڵ 73 کەشتی 13 ژێردەریایی بەرێوە دەچێت.

فڕۆکەخانەی ئەڤالۆن لە ویلایەتی ڤیکتۆریای ئوسترالیا، ئەمڕۆ پێنجشەممە، بەشێکی چۆڵکرا و تیمی پووچەڵکردنەوەی تەقەمەنی بانگهێشت کران، ئەمەش دوای گومانکردن لە تەنێکی نامۆ لە کاتی پشکنینی ئەمنیدا، کە لە کۆتاییدا دەرکەوت تەنها ئامێرێکی لێزەری لادانی موو بووە، وەک ئەوەی «ئاژانسی هەواڵی فەرەنسی» بڵاوی کردووەتەوە.

پۆلیسی ڤیکتۆریا لە راگەیەندراوێکدا بە «ئاژانسی فەرەنسی» راگەیاندووە: تیمی پووچەڵکردنەوەی تەقەمەنی پشکنینیان بۆ تەنێکی گومانلێکراو کردووە و دەرکەوتووە کە ئامێرێکی لێزەری لادانی مووە.

پشکێنەری بەوەکالەت، نیک ئۆبرگانگ، رونی کردەوە کە تەنە گومانلێکراوەکە و دەفرێکی شوکولاتەی گەرم، لەسەر قایشی گواستنەوەی کاتەکان جێهێڵدرابوون تا ئەو کاتەی پۆلیس بانگکرا.

وتیشی: ئەو کەسەی جانتاکەی پێبوو، لە سەرەتادا هاوکارمان نەبوو، ئەمەش هۆکار بوو بۆ ئەوەی کارەکان کەمێک قورس ببن.

ئەم روداوە بووە هۆی دواکەوتن و هەڵوەشاندنەوەی چەند گەشتێکی ئاسمانی.

دواتر، هیچ تۆمەتێک ئاراستەی پیاوەکە نەکرا، و لە درەنگانی هەمان رۆژدا فڕۆکەخانەکە داخرایەوە و بەڕوی گەشتیاراندا کرایەوە.

دۆناڵد ترەمپ، سەرۆكی ئەمریكا دەڵێت، بەمزووانە لەگەڵ سەرۆكی تایوان كۆدەبێتەوە، ئەمەش لە كاتێكدایە كۆشكی سپی تاوتوێی فرۆشتنی چەكی نوێ بەو دوورگە دیموكراتە دەكات.

ترەمپ ئاماژەی بەوە كردووە هەفتەی رابردوو لە پەكین كۆبوونەوەیەكی گرنگی لەگەڵ شی جینپینگ، سەرۆكی چین هەبووە و پرسی تایوان یەكێك بووە لە بابەتە سەرەكییەكانی كارەكانی.

ترەمپ جەختی لەوەش كردەوە كە فرۆشتنی چەكی زیاتر بە تایوان پەیوەستە بە هەڵوێستی چینەوە و وەك كارتێكی بەهێزی فشار و دانوستان لەلایەن واشنتۆنەوە بەكاردەهێنرێت.

تایوان بۆ بەرپەرچدانەوەی هەر هێرشێكی ئەگەریی چین، بەشێوەیەكی سەرەكی پشت بە هاوكارییەكانی ئەمریكا دەبەستێت، لەكاتێكدا واشنتۆن هێشتا هەڵوێستێكی ناڕوونی هەیە سەبارەت بە دەستوەردانی سەربازیی ڕاستەوخۆ لە ئەگەری هەڵگیرسانی شەڕدا.

بە ئامانجی رووبەڕووبوونەوەی هەر هەڕەشەیەكی دەرەكی لە ناوچەكەدا، مۆسكۆ هەنگاوی گواستنەوەی كەرەستەی سەربازی ئەتۆمی بۆ ناو خاكی بیلاروس دەستپێكرد.

وەزارەتی بەرگری رووسیا رایگەیاندووە، لە چوارچێوەی مەشقی هێزە ئەتۆمییەكاندا، كەرەستەی ئەتۆمییان بۆ كۆگاكانی بیلاروس گواستووەتەوە.

راشیگەیاندووە، ئەم هەنگاوە مەبەست لێی پاراستنی ئاسایشی ناوچەكەیە لە هەر هێرشێكی چاوەڕواننەكراو.

ئاماژەی بەوەش كردووە، یەكەیەكی مووشەكی بیلاروس مەشقی هاویشتنی مووشەكی ئیسكەندەر- ئێم دەكەن.

هەروەها روونیكردەوە مەشقەكان بۆ باشتركردنی رەوش و ئاستی ئامادەیی هێزەكانە و تا 21ی ئایار بەردەوام دەبن.

ئەم جموجۆڵە سەربازییانەی نێوان مۆسكۆ و مینسك پەیامێكی روونە بۆ رێگریكردن لە هەر دەستدرێژییەك و نیشاندانی هێزی سەربازی رووسیا لە ناوچەكەدا.

كۆمەڵێك لە چالاكوان، نووسەر و ڕۆژنامەنووسی كورد لە كەنەدا، كەمپینێكی بەرفراوانیان بۆ پشتگیریكردن لە ئازادیی رۆژنامەگەری و ئازادكردنی بێ مەرجی رۆژنامەنووس شێروان شێروانی راگەیاند. 

لە چوارچێوەی یەكەمین چالاكیی كەمپینەكەدا، ئیمزای زیاتر لە 100 كەسایەتیی دیاری سەرجەم پارچەكانی كوردستان كۆكرایەوە و نامەیەكی رەسمی بە زمانی ئینگلیزی ئاراستەی سەرۆك وەزیران، وەزیری دەرەوە، پەرلەمانتاران و رێكخراوە مەدەنییەكانی كەنەدا كراو تێیدا داواكرا فشاری جددی بخەنە سەر حكومەتی هەرێمی كوردستان بۆ كۆتاییهێنان بە دەستبەسەركردنی شێروانی كە بە تۆمەتی ناڕاست زیندانی كراوە.

نوێنەرانی كەمپینەكە رایانگەیاند، لە رێگەی لێدوان بۆ میدیا كەنەدییەكان و كۆكردنەوەی پشتگیریی ئۆنلاین، بەردەوام دەبن لە چالاكییەكانیان بۆ داكۆكیكردن لە ئازادیی رادەربڕین و بەدیهێنانی دادپەروەری لە هەرێمی كوردستان.

رێكخراوی نەتەوەیەكگرتووەكان رایدەگەیەنێت، جەنگی دژی ئێران لەسەر جیهان گەشەی ئابوری بەرێژەیەكی زۆر كەمكردووەتەوە.

فەرمانگەی كاروباریی ئابووری و كۆمەڵایەتی نەتەوەیەكگرتووەكان رایگەیاندووە، پێشبینیان كردبوو بۆ ئەمساڵ بەرهەمی گشتیی ناوخۆیی جیهان بە رێژەی 2% زیاد بكات و لە ساڵی 2027یش بگاتە 2.8%، بەڵام بەهۆی جەنگی ئێران و ئەمریكا و داخستنی گەروی هورمز و ناجێگیریی بازاڕ، گەشەی ئابوری بە شێوەیەكی گشتی لە جیهاندا كەمیكردووە.

ئاماژەی بەوەشكردووە، ئەو كاریگەرییەی لە سەرەتای دەستپێكردنی جەنگدا لە 28ـی شوباتی ئەمساڵ لەسەر بازاڕەكانی جیهان دروستبووە، بووەتە شۆكێككی گەورە، بەڵام حكومەتەكان بە بەكارهێنانی یەدەگی سوتەمەنی دەتوانن بەشێك لەو شۆكە كۆنترۆڵ بكەن.

پێگەیەكی ئەمریكی باس لە ئەگەری ئیمزاكردنی یاداشتنامەیەك دەكات لە نێوان واشنتۆن و تاران كە كۆتایی بە جەنگ بهێنێت.

لێپرسراوێكی باڵای ئەمریكا بە پێگەی ئەكسیۆسی راگەیاند، قەتەر، پاكستان، سعودیە، توركیا و میسر كار لەسەر داڕشتنی یاداشتنامەیەكی نیازپاكی دەكەن كە بڕیارە لەلایەن واشنتۆن و تارانەوە ئیمزا بكرێت بۆ كۆتاییهێنانی رەسمی بە جەنگ و دەستپێكردنی دانوستانێك كە 30 رۆژ بخایەنێت سەبارەت بە بەرنامەی ئەتۆمیی ئێران و كردنەوەی گەروی هورمز.

ئاماژەی بەوەش كردووە، پەیوەندییەكی تەلەفۆنیی "سەخت" لە نێوان دۆناڵد ترامپ، سەرۆكی ئەمریكا و بنیامین ناتانیاهۆ، سەرۆك وەزیرانی ئیسرائیل بەڕیوەچووە و تیایدا ناتانیاهۆ گومانێكی زۆری لەسەر رێڕەوی دانوستانەكان دەربڕیوە و پاڵپشتی لە دەستپێكردنەوەی جەنگ كردووە، لە بەرامبەریشدا، ترەمپ جەختیكردووەتەوە لە ئەگەری گەیشتن بە رێككەوتن.