دەموچاوی ترەمپ خەریكە یاسایەكی 160 ساڵەی ئەمریكا دەگۆڕێت.

لە چوارچێوەی ئامادەكارییەكانی ئیدارەی دۆناڵد ترەمپ سەرۆكی ئەمریكا بۆ 250ـەمین ساڵیادی سەربەخۆیی ویلایەتە یەكگرتووەكانی ئەمریكا، نووسینگەی نەخشاندن و چاپكردنی وەزارەتی گەنجینەی ئەمریكا دیزانێكی سەرەتایی بۆ دراوێكی نوێی ئەمریكی كردووە كە دراوی 250 دۆلارییەوە و وێنەی ترەمپی لەناوەڕاست و یادی 250 ساڵەی سەربەخۆیی ئەمریكای لەسەر نەخشێندراوە.

دراوە نوێیەكە لەلایەن تۆماس فێنتۆن هونەرمەند و نیگاركێشی بەناوبانگی بەریتانی دیزاینكراوە و لەلایەن خودی ترەمپەوە پەسەندكراوە.

ئەم دراوە نوێیەی ئەمریكا بە وێنەی ترەمپەوە، رووبەڕووی ئاستەنگییەكی یاسایی توند بووەتەوە، كە مێژووەكەی دەگەڕێتەوە بۆ سەدەی 19هەم و بەپێی یاسای فیدراڵی ئەمریكا لە ساڵی 1866، قەدەغەیە وێنەی هیچ كەسێكی زیندوو بخرێتە سەر دراوی رەسمی، پشك و بەڵگەنامەی دارایی، ئامانج لە یاساكەش رێگریكردن بووە لە سەرۆكەكان كە دراوی وڵات بۆ بانگەشەی خۆیان بەكاربهێنن.

بۆ تێپەڕاندنی ئەو بەربەستە یاساییە، جۆو ویڵسن كۆنگرێسمانی كۆمارییەكان، پرۆژەیاساییەكی بەناوی یاسای دراوی 250 دۆلاری دۆناڵد ترەمپ ئامادەكردووە و پێشكەشی ئەنجومەنی نوێنەرانی ئەمریكای كردووە كە تێیدا ئەو یاسایەی فیدراڵی ئەمریكا هەمواردەكرێتەوە و رێگەدەدرێت بە چاپكردنی ئەو دراوە نوێیە بۆ یادی سەربەخۆیی ویلایەتە یەكگرتووەكانی ئەمریكا.

تا ئێستا لە ئەنجومەنی نوێنەرانی ئەمریكا خوێندنەوە بۆ پرۆژە یاساكەی جۆو ویڵسن نەكراوە و خودی پرۆژە یاساكەش رووبەڕووی دژایەتییەكی توندی دیموكراتەكان بووەتەوە، دیموكراتەكان پێیانوایە ئەوە پێشێلكردنی نەریتنی دیموكراسی ئەمریكایە.

سكۆت بێسێنت، وەزیری گەنجینەی ئەمریكا رایگەیاندووە، وەك دامەزراوەیەكی جێبەجێكار پابەندی یاسان و ئەگەر كۆنگرێس پرۆژەیاساكەی جۆو ویڵسن پەسەندبكات، ئەوە دراوی 250 دۆلاری بە وێنەی ترەمپەوە دێتە ناو بازاڕەوە.

لە كۆتاییدا، چاپكردنی دراوێكی نوێ لە ئەمریكا پرۆسەیەكی درێژخایەن و ئاڵۆزە، لەدوای پەسەندكردنی لەلایەن كۆنگرێس و سەرۆكی ئەمریكاوە، وەزارەتی گەنجینەی ئەمریكا بە هەماهەنگی لەگەڵ بانكی ناوەندی و دەزگای نهێنی ئەمریكا هەڵدەستێت بە چاپكردنی ئەو دراوە نوێیە و پرۆسەكە لەنێوان شەش بۆ هەشت ساڵ دەخایەنێت.

دۆناڵد ترەمپ هەڵگرتنی گەمارۆی دەریایی سەر ئێرانی راگەیاند و وتی، ئەمشەو بڕیاری كۆتایی لەبارەی ئەو وڵاتەوە دەدات، ئێرانیش لەبەرانبەر رێككەوتن لەگەڵ ئەمریكا داوای 12 ملیار دۆلار و راگرتنی شەڕ لە لوبنان  دەكات.

ترەمپ لە تۆڕی كۆمەڵایەتی تروس سۆشیاڵ رایگەیاند، دەبێت ئێران رەزامەندی بدات كە هیچ كات نابێتە خاوەنی چەكی ئەتۆمی، هەروەها دەستبەجێ گەروی هورمز بەبێ هیچ رسومات و باج وەرگرتنێك بە هەردوو ئاڕاستەدا بكاتەوە، مینە چێندراوەكانی گەرووەكەش لاببرێن و جارێكی تر جووڵەی كەشتیوانی لەو گەرووە دەستپێبكاتەوە.

ترەمپ ئەوەشی خستەڕو، یۆرانیۆمە پیتێنراوەكەی ئێران كە بووە بەژێر شاخەكانی ئەو وڵاتەوە، لەلایەن ئەمریكاوە بە هەماهەنگی چین و ئاژانسی نێودەوڵەتی وزەی ئەتۆم هەڵدەگیرێتەوە و لەناودەبرێت، هیچ پارەیەكیش لەگەڵ ئەو وڵاتە ئاڵوگۆڕ ناكەن.

هاوكات، ئاژانسی فارس لە زاری دەسەڵاتدارانی ئێرانەوە بڵاویكردەوە، ئەو نزیكبوونەوەیەی نێوان ئەمریكا و ئێران كە ترەمپ بانگەشەی بۆ دەكات دوورە لە راستییەوە، ئێران لەبەرانبەر هەر جۆرە دانووستانێك داوای 12 ملیار دۆلار و راگرتنی شەڕ لە لوبنان دەكات.

بۆ یەكەمجار روسیا بە رەسمی دەستیكرد بە تاقیكردنەوە لەسەر ڤاكسینی دژە پیریی و دەیەوەێت تا ساڵی 2028 ڤاكسینەكە بەرهەم بهێنێت.

دێنیس سیكیسینسكی، جێگری وەزیری زانستی روسیا رایگەیاند، بۆ یەكەمجار بە رەسمی لە تاقیگەدا دەستیان كردووە بە تاقیكردنەوە بۆ پەرەپێدانی ڤاكسینێك بە ناوی دژە پیریی، كە ئامانج لێی هێواشكردنەوەی پیربوونی خانەكانی جەستەیە لەڕێگەی پەكخستنی وەرگری رەیج كە لێپرسراوە لە گۆڕانكارییەكانی تەمەن.

دێنیس ئەوەشی خستووەتەڕوو، ئەنجامدانی تاقیكردنەوەكە لە چوارچێوەی ئەو پڕۆژانەدایە كە ساڵی رابردوو روسیا بودجەیەكی تایبتەتی بە بڕی 26.4 ملیار دۆلار بۆ تەرخانكردووە، كە ئامانجی سەرەكی لێیان رووبەڕوبوونەوەی قەیرانی دیمۆگرافیای دانیشتوان و زۆربوونی رێژەی بەساڵاچوونە.

هەر لەو بارەیەوە تاتیانا گۆلیكۆڤا جێگری سەرۆك وەزیرانی روسیا ئاماژەی بەوە كردووە، پلانی روسیا بەو جۆرەیە كە لەماوەی دوو ساڵی داهاتوو و لەنێوان ساڵانی 2028 بۆ 2030دا دەست بە بەرهەمهێنانی ڤاكسینەكە بكات.
 

نەتەوەیەكگرتووەكان ناوی ئیسرائیلی خستە لیستی رەشەوە بۆ توندوتیژی سێكسی لەناوچەكانی شەڕدا، نوێنەری ئیسرائیلیش بڕیارەكە بە سیاسی ناودەبات.

دانی دانۆن، باڵیۆزی ئیسرائیل لە نەتەوەیەكگرتووەكان رایگەیاند، ئەنتۆنیۆ گۆتێرێس ئەمینداری گشتی نەتەوەیەكگرتووەكان لە پەیوەندییەكی تەلەفۆنیدا پێی وتووە، كە رێكخراوی نەتەوەیەكگرتووەكان ناوی ئیسرائیلی خستووەتە لیستی رەشەوە بۆ توندوتیژی سێكسی لەناوچەكانی شەڕدا.

دانۆن وتیشی، ئەو بڕیارە سیاسییە و دابڕاوە لە راستییەكان، نوێنەرایەتی ئاستێك لە داڕمان دەكات لەناو رێكخراوی نەتەوەیەكگرتووەكان.

پێشتریش، وەزارەتی دەرەوەی ئیسرائیل رایگەیاندبوو، هەموو پەیوەندییەكانیان لەگەڵ گۆتێرێس دەپچڕێنن و بەوەش تۆمەتباریان كرد كە پێشێلی ستانداردە پیشەییەكان و دەستپاكی و راستگۆیی كردووە بەرانبەر ئیسرائیل.

ناتۆ سەرەڕۆیی روسیا سەركۆنە دەكات و بەرگرییەكانی لە رۆمانیای هاوسنووری ئۆكرانیا بەهێز دەكات.

هاوپەیمانی باكوری ئەتڵەسی 'ناتۆ' بە توندی سەركۆنەی هێرشە درۆنیەكەی سەر رۆمانیا دەكات كە بەهۆیەوە دوو كەس برینداربوون.

ئەلیسۆن هارت، وتەبێژی ناتۆ ڕایگەیاند، مارك ڕووتە، ئەمینداری گشتیی ناتۆ لەگەڵ دەسەڵاتدارانی ڕۆمانیا لە پەیوەندیدایە و جەختی كردەوە كە ناتۆ بەردەوام دەبێت لە بەهێزكردنی بەرگرییەكانی دژی سەرجەم هەڕەشەكان، بەتایبەت فڕۆكەی بێفڕۆكەوان.
 
ئەمە یەكەمجارە لە سەرەتای جەنگەوە درۆنی رووسی لە ناوچەیەكی قەرەباڵغی ڕۆمانیا بكەوێتە خوارەوە و برینداری لێبكەوێتەوە، ئەمەش مەترسییەكانی پەرەسەندنی گرژی لە باڵی ڕۆژهەڵاتی ناتۆ زیاتر دەكات.

جێگری سەرۆکی ئەمریکا دەڵێت: وڵاتەکەی و ئێران نزیژن لە ئیمزاکردنی رێککەوتنە پێشبینیکراوەکەی نێوانیان و ئەگەری ئاگربەستێکی 60 رۆژەش لە ئارادایە.

ماڵپەڕی هەواڵی ئەکسیۆس لە زاری جەی دی ڤانس، جێگری سەرۆکی ئەمریکا بڵاویکردەوە، ئەمریکا و ئێران گەیشتوونەتە رێککەوتنێک کە تێیدا کردنەوەی گەروی هورمز و دەستپێکردنەوەی دانوستانەکان لەبارەی سنوردارکردنی پرۆگرامە ئەتۆمییەکەی تاران، لەخۆدەگرێت.

ڤانس وتیشی، لەسەر هەندێک خاڵی پەیوەست بە داڕشتنی دەقەکە گفتوگۆ دەکەن و پێشکەوتنی باشیان بەدەستهێناوە، بەڵام هێشتا ناتوانن گەرەنتیی ئەوە بدەن کە دەگەنە ئەنجامی کۆتایی.

ئاماژەی بەوەشداوە، دانوستاکارانی هەردوولا رێککەوتووب لەسەر ئاگربەستێکی 60 رۆژە، بەڵام لەسەر ئیمزاکردنی دۆناڵد ترەمپ سەرۆکی ئەمریکا وەستاون.

ماڵپەرێكی ئەمریكی رێكکەوتنی نێوان ئەمریكاو ئێران رادەگەیەنێت و تا ئێستاش هیچ لێپراوێكی رەسمی ئاماژەی بە رێكەوتنەكە نەكردووە.

ماڵپەڕی ئاكسیۆسی ئەمریكی ئاشكرای كرد، كە ئەمریكا و ئێران رێكکەوتوون، بەڵام جێبەجێكردنی پڕۆسەكە تەنها پێویستی بە ڕەزامەندیی كۆتایی دۆناڵد ترەمپ هەیە.

بەپێی زانیارییەكانی ئاكسیۆس، رێككەوتنەكە جەخت لەوە دەكاتەوە كە لە 60 رۆژی یەكەمی دانوستانەكاندا دۆسیەی ئەتۆمی لە پێشینەی كارەكان بێت، لە بەرانبەریشدا ئەمریكا پابەند دەبێت بە هەڵگرتنی گەمارۆی دەریایی لەسەر ئێران و گەروی هورمز دەكاتەوە.

هەروەها رێككەوتنەكە ئێران پابەند دەكات بەوەی هیچ هەوڵێك بۆ بەدەستهێنانی چەكی ئەتۆمی نەدات و لە ماوەی 30 رۆژدا هەموو ئەو مینانە كۆبكاتەوە كە لە گەروی هورمزدا چاندوویەتی.

لەلایەكی دیكەوە، دۆناڵد ترەمپ بە نێوەندگیرەكانی راگەیاندووە، پێویستی بە چەند رۆژێكە بۆ بیركردنەوە لە وردەكارییەكان، هاوكات هۆشداری ئەوەشیداوە ئەگەر رێككەوتنەكە بە دڵی ئەو نەبێت، ئیمزای ناكات و شەڕ دەستپێدەكاتەوە.

ئەمەش دوای ئەوە دێت كە ئەمڕۆ سوپای ئەمریكا چەند درۆنێكی ئێرانی خستە خوارەوە و هێرشی كردە سەر بنكەیەكی سەربازی لە باشووری ئێران، تارانیش بە بۆردومانكردنی بنكەیەكی ئەمریكی وەڵامی دایەوە.

وەزیری دەرەوەی ئەمریكا رایدەگەیەنێت، دەیانەوێت بە هەر رێگەیەك بێت لەگەڵ ئێران بگەنە رێككەوتن، ئاماژەكانیش بۆ كۆتاییهێنان بە جەنگ ئەرێنین.

ماركۆ رۆبیۆ وەزیری دەرەوەی ئەمریكا لە كۆبوونەوەیەكدا لە كۆشی سپی رایگەیاند، دانوستان و گفتوگۆكان لەگەڵ ئێران بەباشی بەرەو پێش دەچن و ئاماژەی ئەرێنییان تێدایە بۆ گەیشتن بە رێككەوتنێكی باش كە ببێتە هۆی كۆتایی هێنان بە جەنگ و ئاڵۆزییەكانی رۆژهەڵاتی ناوەڕاست.

وتیشی، ئەمریكا دەیەوێت بە هەر رێگەیەك بێت لەگەڵ ئێران بگاتە رێككەوتن و ئاماژەكانیش بۆ كۆتاییهێنان بە جەنگ ئەرێنین كە رەنگە لە چەند سەعاتی داهاتوودا دانوستان بگاتە ئەنجام و رێككەوتن لە نێوان واشنتۆن و تاراندا ئیمزا بكرێت.

پێت هێگسێس وەزیری جەنگی ئەمریكاش دەڵێت، دۆناڵد ترەمپ سەرۆكی وڵاتەكەی هەموو جیهانی لە مەترسییەكانی چەكی ئەتۆمی ئێران پاراستووە و هەر كاتێكیش ئێران هەوڵی بەدەستهێنانی چەكی ئەتۆمی بدات، هێرشی دەكەنە سەر.

ترەمپ هۆشداری توند دەداتە عومان سەبارەت بە هەر هەوڵێك بۆ دەستبەسەرداگرتنی گەروی هورمز.

كۆشكی سپی رایگەیاند، دۆناڵد ترەمپ سەرۆكی ئەمریكا لە كۆبوونەوەی ئیدارەی حکومەتەکەیدا هۆشداری داوەتە عومان كە نابێت بە هیچ شێوەیەك دەست بەسەر گەروی هورمزدا بگرێت، چونكە ئەو رێڕەوە جیهانییە و بۆ هەمووانە.

ئاماژەی بەوەشكردووە، ئەمریكا راستەوخۆ سەرپەرشتی ئەو گەروە دەكات و دەبێت عومان وەك هەر دەوڵەتێكی تر رەفتار بكات، بە پێچەوانەوە ئەوا رووبەڕووی لەناوبردن دەبنەوە.

ئەمەش دوای ئەوە دێت كە عەلی باقری كەنی، جێگری سكرتێری ئەنجومەنی باڵای ئاسایشی نەتەوەیی ئێران ئاشكرای كرد، تاران و مەسقەت لە گفتوگۆدان بۆ دیاریكردنی سیستمێكی نوێی هاتوچۆی كەشتییەكان لە گەروی هورمز.

لە نوێترین پێشهاتی گرژییەکانی ناوچەکەدا، هێزەکانی ئەمەریکا رووبەڕووی هێرشێکی فڕۆکەی بێفڕۆکەوانی ئێران بوونەوە و پاش تێکشکاندنی چوار فڕۆکەی هێرشبەر، وێستگەیەکی هەڵدانی ئەو فڕۆکانەشیان لەسەر زەوی کردە ئامانج.

سەرچاوەیەکی ئاگادار بۆ تۆڕی "ئەکسیۆس"ی ئەمەریکی ئاشکرای کردووە، هێزەکانی ئەمەریکا توانیویانە چوار فڕۆکەی بێفڕۆکەوانی هێرشبەری ئێرانی بخەنە خوارەوە کە ئاڕاستەی کەشتییەکی جەنگیی ئەمەریکا و کەشتییەکی بازرگانی کرابوون.

بەپێی زانیارییەکان، ئەو فڕۆکە بێفڕۆکەوانانە لەلایەن ئێرانەوە بە ئاڕاستەی ئەو کەشتییانە هەڵدرابوون، بەڵام پێش گەیشتنیان، هێزەکانی ئەمەریکا لە ئاسماندا تێکیان شکاندوون.

هەروەها سەرچاوەکە ئاماژەی بەوەشداوە، سوپای ئەمەریکا لە کاردانەوەیەکدا، وێستگەیەکی هەڵدانی فڕۆکەی بێفڕۆکەوانی ئێرانی لەسەر زەوی کردووەتە ئامانج.

سەرۆكایەتی ئەركانی گشتی سوپای كووەیتیش لە راگەیەنراوێکدا ئاشکرایکرد، هێزەكانی بەرگری ئاسمانی وڵاتەكەی توانیویانە بەرپەرچی چەندین هێرشی موشەكی و فڕۆكەی بێفڕۆكەوانی ئێرانی بدەنەوە كە ئاراستەیانكرابوو.

دۆناڵد ترەمپ، سەرۆکی ئەمریکا، رایگەیاند سێ چینی سەرکردایەتی ئێران کۆتاییان پێهاتووە و نەگەنە رێککەوتن لەگەڵ تاراندا رەنگە جەنگ دزیان دەستپێبەنەوە. 

سەرۆکی ئەمریکا ئاماژەی بەوەکرد، هێزەکانی ئەمریکا توانیویانە هێزی دەریایی و ئاسمانی ئێران لەناو ببەن و لە ئێستادا دراوی ئێرانی هیچ بەهایەکی نەماوە.

لە درێژەی قسەکانیدا هۆشداری دا، کە ئەگەر نەگەنە رێککەوتنێکی نوێ، رەنگە جەنگی دژ بە ئێران دەستپێبکەنەوە، هەرگیز ئێران ناتوانێت چەکی ئەتۆمی بەدەست بهێنێت.

لەسەر ئاستی ناوخۆیی ئەمریکاش، سەرۆکی ئەمریکا تیشکی خستە سەر سەرکەوتنەکانی کابینەکەی و رایگەیاند، کە رێژەی تاوان لە وڵاتەکەدا بەراورد بە 25 ساڵی رابردوو بۆ نزمترین ئاست دابەزیوە.

سەبارەت بە دۆسیەی کۆچبەرانیش، جەختیکردەوە، کە سنوورەکانیان بە باشی داخستووە و هەر کەسێک بە نایاسایی بێتە ناو خاکی ئەمریکاوە دەری دەکەن.

چین فشار دەكات بۆ كۆتایی هێنان بە جەنگی نێوان ئەمریكا و ئێران، دەشڵێت هەر رێككەوتنێك پێویستە ئەنجومەنی ئاسایش رەزامەندی لەسەر بدات.

وانگ یی وەزیری دەرەوەی چین ، داوای لە ئەمریكا و ئێران كرد كە بەردەوام بن لە لێكتێگەیشتن و سازش بۆ یەكتر بكەن، بە مەبەستی جێگیركردنی ئەو ئاگربەستەی لە رۆژهەڵاتی ناوەڕاستدا هەیە بۆ كۆتاییهێنان بە جەنگەكە.

وەزیری دەرەوەی چین پاڵپشتی وڵاتەكەشی بۆ هەوڵە دیپلۆماسییەكان و نێوەندگیرییەكانی پاكستان دووپاتكردەوە و هیوای خواست لایەنە پەیوەندیدارەكان پەیوەست بن بە رێككەوتنەكانەوە لێكتێگەیشتنی كۆتایی ئیمزا بكەن.

هاوكات، وانگ یی لە كۆبوونەوەیەكی ئەنجومەنی ئاسایشی نێودەوڵەتیدا، رایگەیاند،  پێویستە ئەگەر هەر رێككەوتنێك لە نێوان واشنتۆن و تاراندا ئەنجامدرا پێشتر بخرێتە بەردەم ئەنجومەنی ئاسایش بۆ پەسەندكردنی، تاوەكو شەرعییەت و دەسەڵاتی نێودەوڵەتی پێببەخشرێت.

ژمارەیەك لە وڵاتان سەپاندنی باج و رسومات بەسەر بازرگانیی و گەشتیاریی دەریایی نێودەوڵەتیدا رەتدەكەنەوەز.

ئوسترالیا، هندستان، ژاپۆن و ئەمریكا لە راگەیەنراوێكی هاوبەشدا ئاماژەیان بەوەكردووە، هێرشكردنە سەر كەشتییە بازرگانی و گەشتیارییەكان و هەر رێكارێك رەتدەكەنەوە كە دژی یاساكانی دەریاوانی نێودەوڵەتی بێت.

ئەو چوار وڵاتە دژایەتی خۆشیان دەربڕیوە بۆ سەپاندنی هەر باج و رسوماتێك بەسەر تێپەڕبوونی كەشتییەكاندا لە ئاوە نێودەوڵەتییەكان، وەك ئاماژەیەك بۆ ئەو گرژیی و ئاڵۆزییانەی پەیوەستن بە جووڵەی دەریاوانی لە گەروی هورمز.

هەڵوێستەكەی ئەو وڵاتانە لە كاتێكدان، مشتومڕێكی نێودەوڵەتی توند و دانوستانی ناراستەوخۆی نێوان واشنتۆن و تاران هەیە لەبارەی وەرگرتنی باج لەلایەن ئێرانەوە لە هەر كەشتییەك كە بە گەروی هورمزدا تێپەڕێت.

ترەمپ دەڵێت، پێویستە یۆرانیۆمی پیتێندراوی ئێران لەناوببرێت یاخود بگوازرێتەوە بۆ ئەمریكا، ئێرانیش ئەو داواكارییە رەتدەكاتەوە.

دۆناڵد ترەمپ سەرۆكی ئەمریكا لەنوێترین بڵاوكراوەیدا لە تروس سۆشیال رایگەیاندووە، یۆرانیۆمی پیتێندراوی ئێران یان دەبێت بگوازرێتەوە بۆ ئەمریكا بۆئەوەی لەناوببرێت، یان لە شوێنی خۆی لە ئێران لەناودەبرێت، وتیشی، پرۆسەكە دەبێت بە ئامادەبوونی لیژنەی وزەی ئەتۆمی و لایەنە پەیوەندیدارەكان ئەنجام بدرێت.

یۆرانیۆی پیتێندراوی كۆگاكراوی ئێران بە نزیكەی 400 كیلۆگرام دەخەمڵێنرێت و یەكێكە لەو بابەتانەی لە دانوستانەكانی ئەمریكا و ئێران زۆرترین ناكۆكی لەسەرە.

ئاژانسی تەسنیمی ئێرانیش لە زاری لێپرسراوێكی باڵای وڵاتەكەیەوە رەتیكردووەتەوە تاران ئامادە بێت بۆ گواستنەوەی یۆرانیۆمە پیتێندراوەكەی بۆ دەرەوەی ئێران.

سەرچاوەیەكی باڵای ئێرانیش بە ئاژانسی رۆیتەرزی راگەیاندووە، تاران رازی نەبووە بە رادەستكردنی یۆرانیۆمی كۆگاكراوی پیتێندراو.

وەزیری دەرەوەی ئەمریکا رایگەیاند، هێشتا ئەگەری ئیمزاکردنی رێککەوتنێک بۆ کۆتاییهێنان بە گرژی و شەڕ لەگەڵ ئێران لە ئارادایە و رەنگە هەر ئەمڕۆش بێتە دی و هیوایشی خواست کە بتوانن ئەو ئامانجە بپێکن.

مارکۆ رۆبیۆ، وەزیری دەرەوەی ئەمریکا رایگەیاند،  وڵاتەکەی هەموو چانسێک بە دیپلۆماسیەت دەدات بۆ ئەوەی بگەنە ئەنجام پێش ئەوەی بیر لە بژاردەی تربکەنەوە.

رۆبیۆ لەگەڵ ئەوەی گەشبینی خۆی بە رێککەوتن نیشاندەدات هۆشداریشدەدات، کە پێویستە بگەنە رێککەوتنێکی باش، ئەگەر نا بە پێچەوانەوە ناچار دەبن بە شێوازێکی دیکە مامەڵە لەگەڵ رەوشەکەدابکەن، کە مەبەستی ‌دوبارە هێرشکردنە سەر تارانە.

هاوکات جەختیشی کردەوە، ئیسرائیل مافی تەواوی خۆیەتی بەرگری لە خۆی بکات دژی هەر هێرشێک لە هەر سنورێکەوە بکرێتە سەری.

وەزیرەکەی ئەمریکا هیواشی خواست کە پێش ئەوەی دەست بۆ بژاردەی تر ببەن، لەگەڵ ئێراندا بگەنەرێککەوتن و ئاماژەی بەوەشکرد رەنگە ئەمڕۆ ئەوە روبدات.

ئەمە لە کاتێکدایە، ئاژانسی بلومبێرگ بڵاویکردوەتەوە، بەهۆی نەبوونی پەیوەندی راستەوخۆ و بەئەستەم گەیشتن بە موجتەبا خامنەیی، رەنگە رێککەوتنی نێوان ئەمریکا و ئێران دوابکەوێت.

سەرۆکی ئەمریکا لە پەڕەی تایبەتی خۆی لەسەر پلاتفۆرمی تروس سۆشیاڵ نووسیویەتی:  ئیدارە و سیاسەتی باراک حسێن ئۆباما و رێککەوتنە ئەتۆمییەکەی لەگەڵ ئێران خراپترین رێککەوتنی ئەمریکا بووە لە مێژوودا و ئێمە ئەو مێژووە خراپەمان ئاوەژوو کردەوە.

دۆناڵد ترەمپ سەرۆکی ئەمریکا رایگەیاند، ئیدارەکەی پێچەوانەی سیاسەتەکانی ئیدارەی ئۆباما، بە هەوڵی بەردەوام توانییان رێگری لە ئێران بکەن و نەیانهێشت ببێتە خاوەنی چەکی ئەتۆمی. 
وتیشی، تائێستا دانوستانەکان زۆر بەباشی بەڕێوەدەچن، بەڵام هێشتاش نوێنەرەکانی خۆی ئاگادارکردووەتەوە کە پەلە نەکەن لە گەشتنە رێککەوتنی کۆتایی، چونکە ئەمە رێککەوتنێکی چارەنووسسازە.

ئاماژەی بەوەشدا، ئێران دەبێت لەوە تێبگات کە هەرگیز ناتوانێت ببێتە خاوەنی چەکی ئەتۆمی، بەڵام پەیوەندییەکانی داهاتوومان لەڕووی بازرگانییەوە باشتر و پێشکەوتوتر دەبن، کێ دەزانێت، لەوانەیە ئێران خۆشی بەشداری رێککەوتنی ئیبراهیمی بێت و هاوکاریان بێت.