شەھید شێرکۆ  لە ساڵی ١٩٦٩ لە ناحیەی ماوەت لە خانەوادەیەکی پێشمەرگە لە دایک بووە، لە ساڵی ١٩٧٤چۆتە بەر خوێندن و  قۆناغی سەرەتایی و ناوەندی لە ماوەت تەواوکردووە، شەھید شێرکۆ ساڵی ١٩٨٤ پەیوەندیکردووە بە ڕێکخستنەکانی( ی. ن .ک )وە، لە تەمەنی لاوێتیدا و لە ساڵی ١٩٨٧چەکی پێشمەرگایەتی دەکاتە شانی ولەگەڵ باوکی دەبێتە پێشمەرگە، لەگەڵ بڵێسەی ڕاپەرین ١٩٩١لەگەڵ ھێزی پێشمەرگە دەگەڕێنەوە سلێمانی و لە ئازادکردنی ئەمنە سورەکەی سلێمانی بەشداردەبن، لەساڵی ١٩٩١شەھید شێرکۆ پێشمەرگەیەکی ھاوڕێی لە دەربەندی بازیان بەھەڵە دەکەونە بۆسەی لیوای حەرەس جمھوریەوە دەستگیردەکرێن و ڕەوانەی کەرکوک دەکرێت و پاشان دەگوازرێنەوە بۆ ئەمنی عامەی بەغداد، دادگایکردنیان لە دادگای بە ناو سەورە حکومی لە سێدارەدانیان بۆ دەردەچێت، پاش ماوەیەک لە گەڵ چەند ئەفسەرێکی ڕژێمی عێراق دیل بە دیلیان پێکراو ئازاد کران. 

لە ڕۆژی ٣٠ی کانونی دووەمی ساڵی ٢٠١٥ شەھید شێرکۆ لەگەڵ شەھید (نەشئەت جەمیل بنەیی) و (دانا عباس بنەیی) و (مەریوان عبدولڕەحمان بنەیی ) و (کاوە محمد  تۆفیق) لە تەلوەرد شەھید دەکرێن.

شەوی رابردوو تەرمی ٤ کۆچبەر گەڕێندرانەوە ھەرێم، کە بەھۆی ژێرئاو کەوتنی یەختێک لە ٢٣ی کانوونی یەکەمی ٢٠٢١ لە دەریای ئیجە خنکان، دووان لە تەرمەکان منداڵبوون لەلایەن کەسوکاریانەوە برانەوە بۆ دھۆک و دایکیشیان  ھێنرایەوە بۆ سلێمانی و بەخاک سپێردران، تەرمی چوارەمیش کە ژنێک بوو لەلایەن کەسوکارییەوە برایەوە بۆ ھەڵەبجە و بەخاکسپێردرا.
 بڕیاریشە رۆژی سێ شەممەی داھاتوو بە ھاوکاری دەزگای لوتکە تەرمی پێنج کۆچبەری تر بگەڕێندرێنەوە ھەرێمی کوردستان

بە پێی پێشبینییەکانی بەڕێوەبەرایەتی گشتی کەشناسی و بومەلەرزەزانی ھەرێم، لە دوای نیوەڕۆی ئەمڕۆ ئەگەری بارینی بەفر و باران ھەیە لە ناوچە شاخاوییەکانی باکووری خۆرھەڵاتی ھەرێم.

راشیگەیاند، لە رۆژانی داھاتوو تا ڕۆژی پێنجشەممە پلەکانی گەرمی بە بەردەوامی ڕوو لە بەرزبوونەوە دەکەن و کەشی ھەرێمی کوردستان نزیکەی ٣ تا ٤ پلەی تری سیلیزی گەرم دەبێت. 

کامەران عوسمان، ئەندامی تیمی کوردستانی ڕێکخراوی CPTی نێودەوڵەتی رایگەیاند، بێریڤان ئەیوب چالاکوانێکی خۆپێشاندانەکانی ساڵی ٢٠٢٠ی پارێزگای دھۆکە و لە ١٣ی تشرینی یەکەمی ٢٠٢٠وە لە پارێزگای ھەولێر بە تۆمەتی تێکدانی ئاسایشی نیشتیمانی دەستگیرکراوە وتائێستا بەبێ دادگاییکردن لە زینداندا ھێڵدراوەتەوە.

وتیشی، وەک ناڕەزایەتیەک بەرامبەر بە دواخستنی دادگاییکردنی و ھێشتنەوەی لە زینداندا تا ئێستا ئەو چالاکوانە شەش جار مانگرتنی لە خواردن و خواردنەوە ڕاگەیاندووە و لەناو زینداندا توشی نەخۆشی شەکرە بووە.

ئاماژەی بۆ ئەوەشکردووە، بێریڤان تەمەنی ٣٦ ساڵە و خاوەنی پێنج منداڵە، لە دوای دەستگیرکردنی ھاوسەرەکەی لە بێریڤان جیابویەوە. ئەو ئەندامەی ڕێکخراوی CPT ئاشکراشیکرد، دوای ساڵێک لە دەستگیرکردنی و لە چوار مانگی ڕابردوودا تەنیا چەند جارێک ڕێگە بە بێریڤان دراوە چاوی بە پارێزەرەکەی بکەوێت.

کامەران عوسمان دەشڵێت، دۆسیەی بێریڤان دۆسیەی ژنێکی چالاکوانی ناڕازی خەڵکی بادینانە و پێویستە گروپەکانی پارێزگاری لە مافی مرۆڤ لە ڕۆژی دادگاییکردنی ئامادەبن.

ھەڵمەتی دابەشکردنی ھاوکارییەکانی بافڵ جەلال تاڵەبانی بۆ خوێندکارانی بەشەناوخۆییەکانی زانکۆ و پەیمانگاکان بەردەوامە و ئەمڕۆش چەندین جۆر پێداویستی ناو ژووەرەکان و پێداویستی کارەبایی بۆ خوێندکارانی بەشەناوخۆییەکانی قەزای دوکان دابینکران و نزیکەی ٤٠٠ خوێندکار لێی سودمەند دەبن.

 

بەھۆی کەمی خزمەتگوزاریی و گرانی سوتەمەنی و کێشەی ئاو ژمارەیەک لە ھاووڵاتیانی قەزای شارەزووری گردبوونەوەیەکی ناڕەزایەتیان رێکخست و داوایان لە بەرپرسانی حکومەتی ھەرێمی کوردستان کرد کێشەو گرفتەکانی قەزاکە چارەسەر بکات

ھاوڕێ مەلا ستار، سەرۆکی لیژنەی ئاوەدانکردنەوە و وەبەرھێنان و ژمارەیەک لە ئەندامانی لیژنەکە، سەردانی یەکە نیشتەجێبوونەکانی سیتەکیان لە سنووری سلێمانی کرد، لەو بارەیەوە ھاوڕێ مەلا ستار رایگەیاند، نزیکەی ١٠ ھەزار یەکەی نیشتەجێبوون لە ھەموو ھەرێمدا ھەن، کە نزیکەی نیو ملیار دیناریان تێچووە، بەڵام بەھۆی بێ پلانی و کەمتەرخەمی حکوومەت بودجەیان بۆ تەرخاننەکراوە و تەواو نەکراون، وتیشی، لە بارەی تەواوبوونی ئەو یەکە نیشتەجێبوونانە و ئەو زیانانەی بەریانکەوتووە، راپۆرتێک ئاڕاستەی ئەنجوومەنی وەزیرانی ھەرێم دەکەن و چارەسەرەکان دەخەنەڕوو.

لە گەڕەکی خەبات لە سلێمانی، سێ ھاووڵاتی کە کوردن و ئەندامی یەک خێزانن و لە دایکێک و دوو منداڵ پێکھاتوون، بەھۆی غازی سۆپای ماڵەکەیان گیانیان لە دەستداوە، برای ئەو ژنەی گیانی لە دەستداوە، بە کوردسات نیوزی راگەیاند، خوشەکەکەی تەمەنی ٥٠ ساڵە و منداڵەکانیشی ١٠ ساڵ و ١٢ ساڵن و لە رۆژی شەممەوە پەیوەندییان بە پێوەکردووە، بەڵام وەڵامی نەبووە.

بە پێی زانیارییەکانی کوردسات نیوز، پێدەچێت ئەو خێزانە زیاتر لە ٢٤ سەعات بێت بەھۆی غازی سۆپای ماڵەکەیانەوە گیانیان لە دەست دابێت، بەڵام چونکە بە تەنھا ژیاون، کەس لە رووداوەکە ئاگادار نەبووە، تەرمەکانیان براوەتە پەیمانگای پزیشکیی دادی سلێمانی و لێکۆڵینەوە لە رووداوەکە بەردەوامە.

ھیوا عەلی بەرێوەبەری ئاسایشی کفری رایگەیاند، ھێزەکانیان باندێکی دزیکردنیان دەستگیرکردوە کە لە سێ کەس پێکھاتوون.

ئاشکراشیکرد، یەکێک لە دزەکان لە نوسینگەیەکی ئاڵوگۆڕی دراوی قەزای کفری ٣٠ ھەزار دۆلاری ئەمریکی دزیوە. 

بەرێوەبەرایەتی ھاتوچۆی سلێمانی رایگەیاندوە، ئەو شۆفێرانەی میوە و ھەرجۆرە خۆراک و کاڵایەک دەفرۆشن و بە ئۆتومبیلەکانیان قەراغی شەقامی بازنەیی"مەلیک مەحمود"یان بەربەستکردووە، خۆیان بەدوور بگرن لەو سەرپێچییە، چونکە پێویستە ئەوە بزانن شەقامەکان موڵکی گشتین و بۆ کەس نییە بۆ بەرژەوەندی خۆی قۆرخی بکات.

جەختی لەوەشکردوەتەوە، لە رۆژی دوو شەممەوە ٣١/١/٢٠٢٢ ھەر جۆرە ئۆتۆمبێلێک بۆ ئەو مەبەستە بەدی بکرێت دەستی بەسەرا دەگیرێت و رەوانەی گەراجی دەست بەسەرداگرتنی ھاتووچۆی سلێمانی دەکرێت و رێکاری یاسایی بەرامبەر بەخاوەنەکەی دەگیرێتەبەر.

لە چەند ڕۆژی ڕابردوو ڕیزبەندی پێشکەوتنی زانکۆکانی ھەرێم بڵاوکرایەوە و زانکۆی ھەڵەبجەش لە پلەکانی کۆتایی ڕیزبەندەکە بوو.

بە گوێرەی ڕاپۆرتێکی روانگەی سوری بۆ مافەکانی مرۆڤ، لە ڕۆژی ٢٠ی ئەم مانگە تا ئێستا لە ڕوداوی پەلامارەکەی تیرۆریستانی داعش بۆ سەر گرتوخانەی سناعە لە گەڕەکی غوێران لە حەسەکە، ٣٣٢ کەس کوژراون، کە ٢٤٦یان داعش بوون و ٧٩ کەسیشیان لە ھێزەکانی ئاسایش و دژەتیرۆر و پاسەوانی گرتوخانەکە بوون لەگەڵ حەوت ھاوڵاتی مەدەنیش.

ھێزەکانی سوریای دیموکرات (ھەسەدەش) لەراگەیەندراوێکدا بڵاویکردەوە، ئۆپراسیۆنی پاککردنەوەی گرتووخانەی غوێران کۆتایی ھاتووە و سەرجەم تیرۆریستانی داعش خۆیان رادەستکردوە.

بەرێوەبەرایەتی گشتی تەندروستی سلێمانی لە راگەیەندراوێکدا بڵاویکردووەتەوە، بەپێی ڕاپۆرتی  ڕێکخراوی تەندروستی جیھانی (WHO) ئەو ھەڵمەتە نیشتیمانییەی دیاری کرابوو بۆ پێدانی ڤاکسین، ١ - ١١ تا ٣١ - ١٢ - ٢٠٢١ پارێزگای سلێمانی لە سەر ئاستی سەرجەم پارێزگاکانی عیراق لەلایەن ڕێکخراوی تەندروستی جیھانییەوە بە پلەی یەکەم دەستنیشانکرا لە زۆری بە کارھێنانی ڕێژەی ڤاکسین بە ھاوڵاتیان.

راشیگەیاندووە، وەک ڕێکخراوەکە ئاماژەی پێ کردووە خودی بەڕێوبەرایەتی گشتی تەندروستی سلێمانی و بەرپرسیارێتی کەناڵەکانی ڕاگەیاندن و ئاستی ھۆشیاری تاک و خەمخۆری تیمەکانی پێدانی ڤاکسین بە ھاوڵاتیان دەرئەنجامی ڕێژەی وەرگرتنی ڤاکسینە لە پارێزگای سلێمانی.

تەندروستی سلێمانی ئاژەی بەوەشکردووە، لای خۆیەوە بەڕێوبەرایەتی گشتی تەندروستی سلێمانی سوپاس و دەستخۆشی ئاراستەی سەرجەم ھاوڵاتیان و بەتایبەت سنوری بەڕێوبەرایەتییەکەی دەکات ھیوا خوازە ھاوڵاتیان پارێزراو تەندروست باشبن و بەردەوام بن لە وەرگرتنی ڤاکسین تا ھەوڵبدەین کۆمەڵگایەکی تەندروست بەرھەم بھێنین و ھەمووان پارێزراو بین لە نیشانە و ھۆکار و دەرئەنجامەکانی ڤایرۆسی کۆرۆنا.

بەڕێوەبەرایەتی گشتی کەشناسی و بومەلەرزەزانی ھەرێمی کوردستان ڕایگەیاند، ئەمڕۆ ئاسمانی ھەرێم لە نێوان ھەور و نیمچە ھەور دەبێت لەگەڵ نمەبارانی کەمی پچڕ پچڕ لە ناوچە جیاجیاکاندا، لەگەڵ بارینی بەفرێکی کەم لە ناوچە شاخاوییەکان.

ئاماژەی بۆ ئەوەشکردووە، نزمترین پلەی گەرمای پێشبینیکراو ١ پلە دەبێت، مەودای بینینیش لە نێوان ٦ بۆ ٨ کیلۆمەتر دەبێت.

دەستەی کەشناسی عێراقیش ڕایگەیاندووە، ئەمڕۆ لە پارێزگاکانی خوار و ناوەڕاستی عێراق بارانبارین بە شێوەی پچڕپچڕ بەردەوام دەبێت.

فەرمانگەی میدیا و زانیاری ھەرێم ڕایگەیاند، ساڵی ڕابردوو دەزگای گشتی کاروباری مین لە ھەرێم ٦٠١ ھەزار و ١٥١ مەتر دووجا زەوی لە مین و تەقەمەنی پاککردووەتەوە، کە ٢١ کێڵگە و ٧ شەڕگە بووە، دوای پاککردنەوەشیان ڕادەستی خاوەنەکانیان کراونەتەوە و دەتوانرێت بۆ کشتوکاڵ و ئاژەڵداری و پڕۆژەی ئابووری و وەبەرھێنان بەکاربھێندرێنەوە.

ئاماژەی بۆ ئەوەشکردووە، لەو کێڵگانەدا ھەزار و ٨٩٤ مینی دژەکەسی و دژە تانک و زیاتر لە ٢٢ ھەزار و ٩١٨ پارچە تەقەمەنی پاشماوەی جەنگ ھەبووە.