عوسمان عەلی موختاری ناوچەی پیشەسازی یەك رایگەیاند، بەشێكی ناوچەی پیشەسازی یەك بە كەرتی تایبەت فرۆشراوە و ئێستا داوایان لێدەكرێت ئەو شوێنە چۆڵ بكەن، لەكاتێكدا ئەو ناوچەیە 28 ماڵی تێدایە كە لە 200 كەس پێكهاتوون و لە تواناشیاندا نییە شوێنی نیشتەجێبوون بۆ خۆیان دابین بكەن.

وتیشی، ئەو شوێنەیان بە پارە كڕیوەتەوە لەو هاوڵاتیانەی شاری كەركوك كە لە ساڵانی رابردوودا لە سلێمانی نیشتەجێببوون، بۆیە ئەگەر دەریان بكەن هیچ شوێنێكیان نییە روی لێبیكەن، تائێستاش هیچ لایەنێك وەڵامی نەداونەتەوە و كێشەكەیان بە هەڵپەسێردراوی ماوەتەوە، بۆیە داوا لە بافڵ جەلال تاڵەبانی و قوباد تاڵەبانی دەكەن بەدەم داواكارییەكانیانەوە بچن و ئەو كێشەیە چارەسەر بكەن.
 

وەزارەتی خوێندنی باڵا و توێژینەوەی زانستی ھەرێمی کوردستان لە راگەیەندراوێکدا ریزبەندی زانکۆ حکومی و تایبەتییەکانی لە ھەرێمی کوردستان بڵاوکردەوە، بەپێی لیستی ریزبەندی زانکۆکان، زانکۆی سلێمانی لە پلەی یەکەمدایە و زانکۆی سەڵاحەدین و دھۆک لە ریزبەندی دووەم و سێیەمدان.

بەپێی راگەیەندراوەکە زانکۆی ھەولێری پزیشکی و زانکۆی پۆلیتەکنیکی ھەولێر و زانکۆی زاخۆ پلەی چوارەم تا حەوتەمیان ھەیە، زانکۆکانی نەورۆز و جیھان و زانکۆی ئەمریکی و زانکۆی سۆران پلەی ھەشتەم تا دەیەمیان ھەیە.

ئاسۆ کەمال بەڕێوەبەری کەشناسی و بومەلەرزەزانی سلێمانی لە لێدوانێکدا بۆ کوردسات نیوز رایگەیاند، بەھۆی کاریگەری ئەو نزمە پاڵەپەستۆیەی ناوچەکەی گرتوەتەوە، شەپۆلێکی بەفر و بارانبارین ھەرێمی کوردستانیشی گرتوەتەوە، کاریگەری ئەو شەپۆلە ئەمڕۆش بەردەوام دەبێت و ئاستی بارانبارین زیاتر دەبێت لە ناوچە بەرزەکانیش بەفر دەبارێت، پلەکانی گەرماش روو لە نزمبونەوە دەکەن.

راشیگەیاند، لە ٢٤ سەعاتی رابردوودا لە سەنتەری پارێزگای سلێمانی ٣ ملیمەتر باران باریەوە، کۆی گشتی بارانبارینیش تائێستا لە سلێمانی گەیشتوەتە ٢٥٤.٦ ملیمەتر .

شەوی رابردوو شەڕەتەقە لە نێوان دوو کەس لە ھەریر روویدا، بەوھۆیەشەوە کەسێک برینداربوو، بەڕێوەبەری ناحیەی ھەریریش بە کوردسات نیوزی راگەیاند، دوو کەس کێشەیان ھەبووە، بەھۆی چارەسەرنەکردنی کێشەکەیان شەڕە تەقە لە نێوانیان دروستبووە، یەکێک لەو کەسانە برینداربووە و رەوانەی نەخۆشخانە کراوە، لە ئێستادا رەوشی تەندروستی جێگیرە.

پەیامنێری کوردسات نیوز راشیگەیاند، رەوشەکە کۆنترۆڵکراوە و ھێزەئەمنییەکان دەستیان بە لێکۆڵینەوە لە رووداوەکە کردووە، بەڵام تا ئێستا ھیچ کەسێک دەستگیرنەکراوە.

ھاوپەیمانی نێودەوڵەتی سەبارەت بە کۆنتڕۆڵکردنەوەی زیندانەکەی حەسەکە رایگەیاند، داعش کێشەیەکی جیھانییە و دەبێت چارەسەری بەردەوامی بۆ بدۆزرێتەوە  و روانگەی سوریا بۆ مافەکانی مرۆڤ ئاماری کوژراوانی لە ئەنجامی کۆنترۆڵکردنەوەی زیندانەکە ئاشکرا دەکات.

ھاوپەیمانی نێودەوڵەتی دژی داعش سەبارەت بە کۆنتڕۆڵکردنەوەی زیندانی سەناعە لە گەڕەکی غوێرانی حەسەکە رایگەیاند، بەردەوام پشتیوانی ھێزەکانی سوریای دیموکرات"ھەسەدە"یان کردوە، کە لە حەسەکە ئازایانە و بە بڕیار و پێداگرییەوە شەڕی یەکلاکەرەوەیان لەگەڵ داعش کرد.

ئاماژەی بۆ ئەوەشکردوە، داعش بە تەنیا کێشەی حەسەکە نییە، بەڵکو ئەوە کێشەیەکی جیھانییە و دەبێت لەسەر ئاستی وڵاتانی جیھان چارەسەرێکی بەردەوام و ھەمیشەیی بۆ ئەو کێشەیە بدۆزرێتەوە.

 ھاوکات روانگەی سوریا بۆ مافەکانی مرۆڤ ئاماژەی بۆ ئەوەکردوە، لە ئەنجامی کۆنتڕۆڵکردنەوەی زیندانەکە ٢١١ کەس کوژراون، لە ئێستاشدا ھێزەکانی "ھەسەدە" بەردەوامن لە گەڕان بە دوای ٤٠ تیرۆریستی داعشدا کە لە دەورووبەری زیندانەکە خۆیان حەشارداوە.

کازمی لە سەردانەکەیدا لەگەڵ لێپرسراوانی حکومی و فەرماندە ئەمنییەکانی پارێزگای بەسڕە کۆدەبێتەوەو رەوشی ئەمنی و خزمەتگوزارییەکان لەو پارێزگایە تاوتوێ دەکەن.

دوێنێش کازمی لەگەڵ وەزیرانی بەرگری و ناوخۆ و ژمارەیەک لە فەرماندەی ئەمنی باڵا، سەردانی سنوری نێوان عێراق و سوریای کرد و رایگەیاند، داعش شکستیھێناوە و لە عێراق جێگەی نابێتەوە.

رائید زانیار عومەر وتەبێژی بەرگری شارستانی ھەڵەبجە لە کۆنفرانسێکی رۆژنامەوانیدا سەبارەت بە روداوەکانی ساڵی رابردووی ھەڵەبجە رایگەیاند، لە ساڵی ٢٠٢١ دا ٣١٢ رووداوی جۆراوجۆر تۆمارکراوە، کە ١٧٢ یان روداوی ئاگرکەوتنەوە بون لە شاخ و دەشتەکان و ١١ روداوی ئاگرکەوتنەوەش لە بینا و دووکانەکان تۆمارکراوە، لە شوێنە گشتییەکانیش ٣٤ رووداو تۆمارکراوە. 

وتیشی، بەراوورد بە ساڵی ٢٠٢٠،، ٢٠٤ رووداو کەمتر تۆمار کراوە.

سەندیکای پارێزەرانی کوردستان کۆنووسی کۆبوونەوەی لیژنەی سەرپەرشتی کۆنگرەی شەشەمی پارێزەران بڵاوکردەوە، بۆ بڕیاردان لەسەر رێکار و وادەی ھەڵبژاردنی سەرۆک و ئەندامانی ئەنجومەنی سەندیکا دەکات.

بەپێی کۆنوسی کۆبونەوەکە، بوار بە لیستەکان دەدرێت بۆ ئەنجامدانی گۆڕانکاری لە کاندیدی سەرۆک و ئەندامانی ئەنجومەنی سەندیکا لە ٣٠ کانوونی دووەمی ٢٠٢٢ تا ٩ی شوباتی ٢٠٢٢، ھەروەھا لە ١٠ی شوبات تا ١٤ی شوبات ماوەی پێداچونەوە و پەسەندکردنی کاندید و لیستەکان دیاریکراوە.

ھەروەھا رۆژی ٢٣ی شوبات تا ٨ی ئاداری ٢٠٢٢ بۆ ھەڵمەتی ھەڵبژاردنی سەرۆک و ئەندامانی ئەنجومەنی سەندیکای پارێزەران  دیاریکراوە.

پەیامنێری کوردسات نیوز رایگەیاند، کێشەی گرانی و کەمی بەنزین لە سنوری پارێزگای دھۆک بەردەوامە و چارەسەرنەکراوە، لەئێستاشدا رۆژانە تەنیا دوو بەنزینخانە بەنزینی حکومی عێراقی دابەشدەکەن، ئەوەش قەرەباڵغی زۆری لەو بەنزینخانانە دروستکردووە کە بەنزینی حکومی دابەش دەکەن.

وتیشی، بەھۆی کەمی بەنزینخانەکانەوە ھاووڵاتیان دەچنە پارێزگای نەینەوا بۆ وەرگرتنی بەنزینی حکومی کە نرخەکەی ھەرزانترە.

سۆران عەلی سەرۆکی شارەوانی خانەقین لە لێدوانێکدا رایگەیاند، بەھۆی خەرجنەکردنی بودجەی پڕۆژەکان ژمارەیەک پرۆژەی خزمەتگوزاری لە بوارە جیاجیاکاندا ماوەی زیاتر لە پێنج ساڵە لە قەزای خانەقین راگیراوە.

وتیشی، لە ساڵی ٢٠٢٠ و ٢٠٢١ ژمارەیەک پڕۆژە لە شارەکانی ھەرێمی کوردستان بەبڕیاری حکومەتی ھەرێم بەگەڕخرانەوە، بەڵام پشکی خانەقین لەو پڕۆژانەدا نەبوو، لە ئێستاشدا داوا لە حکومەتی ھەرێم دەکات لە پلانی ئەمساڵدا پشکی شارەوانی خانەقین بۆ بەگەڕخستنەوەی پڕۆژە خزمەتگوزارییەکان دابین بکات.

وەزارەتی پێشمەرگەی ھەرێم لە ڕاگەیەندراوێکدا بڵاویکردەوە، لە چوارچێوەی پڕۆسەی چاکسازی و باشکردنی ژیان و گوزەرانی پێشمەرگە و بۆ ڕێکخستن و یەکسانکردنی تەواوی بودجە و مووچەی ھێزەکانی پێشمەرگەی کوردستان، شۆڕش ئیسماعیل وەزیری پێشمەرگە دوای ڕەزامەندی وەزارەتی دارایی و ئابووری ھەرێم بڕیاردرا بە خەرجکردن و بەستنی جیاوازی مووچەی سەرجەم پێشمەرگە و پلەدارانی یەکەی ٧٠ ھاوشێوەی یەکەی ٨٠ لە مانگی یەکی ساڵی ٢٠٢٢ەوە.

بەڕێوەبەرایەتی گشتی ھاتووچۆی ھەولێر ڕایگەیاند، لەبەر سەلامەتی شۆفێران بەھۆی بەفربارینەوە ڕێگەی ھیران کەپی گەرۆتە بۆ سەر چیای سەفین داخراوە.

ھاوکات بەڕێوەبەرایەتی گشتی ھاتووچۆی سلێمانی ڕایگەیاند، ڕێگەی چیایی گۆیژە و ئەزمڕ بەرەو سەرەوە واتە بەرەو ناوچە شاخاوییەکان داخراوە.

بەھۆی تەڕبوونی شەقامەکانی ناوشاریش ھاتووچۆی سلێمانی داوا لە شۆفێران دەکات پابەندبن بە خێراییە یاساییەکان و ماوەی سەلامەتی نێوانیانیشیان بپارێزن. ھەروەھا ڕێگەی نێوان چۆمان - حاجی ئۆمەرانیش بەھۆی بەفربارین داخراوە.

ڕاشیگەیاند، ئەم ڕووداوە پێمان دەڵێتەوە کە؛ داعش ھێشتا مەترسییەکی زیندووە و دەبێت لە ھەرێمی کوردستان و عێراقیش لێیان غافڵگیر نەبین و لە ئامادەباشیدا بین. ئەرکی ھەمووانیشە، بەرەنگاریان ببنەوە.