کوردستان
بەهۆی ئاڵۆزیی رەوشی ناوچەکە و وەستانی گەشتەکان، زیاتر لە 200 عومرەکار بە سەلامەتی و لە رێگەی وشکانییەوە گەڕێندرانەوە بۆ هەرێمی کوردستان.
کاروان ستونی، وتەبێژی حەج و عومرەی کوردستان رایگەیاند، ئێوارەی ئەمڕۆ ئەو 200 عومرەکارەی لە فڕۆکەخانەی مەدینە گیریان خواردبوو، بە سەلامەتی لە رێگەی وشکانییەوە گەیشتنەوە هەرێمی کوردستان.
ئاماژەی بەوەشکرد، بەڕێوەبەرایەتی گشتی حەج و عومرە بە بەردەوامی لەسەر هێڵ بووە تا کێشەی ئەو هاووڵاتیانە چارەسەر کرا.
وتیشی، ئەگەر رەوشەکە بەم شێوەیە بمێنێتەوە، بۆ گەڕانەوەی عومرەکارانی تر رێگەی وشکانی بەکاردەهێنن.
لە کۆتاییدا وتەبێژی حەج و عومرە داوای لە هاووڵاتیان کرد تا ئاساییبوونەوەی رەوشەکە و گەشتە ئاسمانییەکان، سەفەرەکانیان بۆ عومرە دوا بخەن.
نێچيرڤان بارزانى، سهرۆكى ههرێمى كوردستان پەیامێکی سەرەخۆشی ئاڕاستەی گهل و حكوومهت و سهركردايهتيى ئێران دهكات.
دەقی پەیامەکە
پرسه و سهرهخۆشيى قووڵمان ئاراستهى گهل و حكوومهت و سهركردايهتيى ئێران دهكهين بۆ شههيدبوونى خوالێخۆشبوو ئايهتوڵڵا عهلى خامهنهيى، ڕابهرى باڵاى كۆمارى ئيسلاميى ئێران و زاناى ديارى ئايينى، هاوسۆز و هاوبهشى خهميانين. له خواى مهزن داواكارين گيانى به بهزهيى و ميهرهبانيى خۆى شاد بكات و ئارامى و دڵنهوايى به ههمووان ببهخشێت.
لهم كاته سهختهدا، جهخت لهسهر گرنگيى پاراستنى ئارامى و سهقامگيرى و چارهسهركردنى ئاشتیيانهى كێشهكان دهكهينهوه. بۆ ئهم مهبهسته داوا له كۆمهڵگهى نێودهوڵهتى دهكهين ئهركى خۆى له ڕاگرتنى شهڕ و پێكدادان و گێڕانەوەى سهقامگيرى بۆ ناوچهكه جێبهجێ بكات.
نێچيرڤان بارزانى
سهرۆكى ههرێمى كوردستان
2026/3/1
د.هەڤاڵ ئەبوبەکر لەگەڵ لایەنە لێپرسراوەکانی پارێزگای سلێمانی کۆبووەوە و تاوتوێ ڕێکاری پێویست بۆ دۆخە نائاسایی و لەناکاوەکان و چاودێریکردنی بازاڕو دەروازەکان و سوتەمەنیی و دۆخی ئاوو کارەباو تەندروستیی و خزمەتگوزارییە گشتییەکان کرد.
د.هەڤاڵ ئەبوبەکر پارێزگاری سلێمانی، لە چەند کۆبوونەوەیەکدا؛ بەئامادەبوونی بەڕێزان جێگرانی پارێزگاری سلێمانی، لەگەڵ بەڕێزان قائیمقامی قەزای مەڵبەندی سلێمانی و، قائیمقامەکانی سنوری پارێزگای سلێمانی و بەڕێوەبەری کۆچ و کۆچبەران و وەڵامدانەوەی قەیرانەکان لە پارێزگای سلێمانی، سەرۆکی شارەوانیی سلێمانی و بەڕێوەبەرە گشتیی و فەرمانگا خزمەتگوزارییە پەیوەندیدارەکان و، بەڕێوەبەرانی بەڕێوەبەرێتییەکانی ئاسایش و بەرگری شارستانیی و پۆلیس و هاتووچۆدا؛ کۆبۆوە.
لە کۆبوونەوەکەدا، ڕێکاری پێویست بۆ دۆخە نائاسیی و لەناکاوەکان و، چاودێریکردنی بازاڕو دەروازەکان و سوتەمەنیی و دۆخی ئاوو کارەباو تەندروستیی و خزمەتگوزارییە گشتییەکان دیایکران.
هاووڵاتیانی دڵنیاکرانەوە لە هەبوونی هەموو پێداویستییەکان و چاودێریکردنی نرخ و پاراستنی کوالێتیی و قەبارەی خستەڕوو، نەبوونی گرفتی هاتوچۆی بازرگانیی و قەبارەی کاڵاو پێداویستییەکان.
هەموو فەرمانگاکانی حکومەتی خۆجێی سلێمانی لە خزمەتی بەردەوامی هاووڵاتیان و پاراستنی ئاسایشی گشتیی و ئارامیی و پێشکەشکردنی خزمەگوزارییە گشتییەکان و سەقامگیریی بازارو جوڵەی بازرگانیی و ئابورییدا دەبن.
بافڵ جەلال تاڵەبانی، سەرۆکی یەکێتیی نیشتمانیی کوردستان پرسەنامەیەک ئاڕاستەی گەلی ئێران دەکات و رایگەیاندووە: لەم کاتە سەختە و مانگی پیرۆزی ڕەمەزاندا، دڵ و بیرمان لەگەڵ هەموو ئەو کەسانەدایە کە بەهۆی ململانێکانەوە زیانیان بەرکەوتووە
دەقی پرسەنامەکەی بافڵ جەلال تاڵەبانی...
بە ناوی یەکێتیی نیشتمانیی کوردستانەوە، قووڵترین سەرەخۆشیی خۆمان ئاڕاستەی گەلی ئێران و هەموو ئەوانە دەکەم کە لە ماتەمینیدان بۆ لەدەستدانی رابەری باڵا، ئایەتوڵا عەلی خامنەیی و ئەو بەرپرسە باڵایانەی تر کە لە هێرشەکانی ئەم دواییەدا شەهیدبوون. دەزانین کە ئەم رووداوانەی ئەم دواییە، خێزان و کۆمەڵگەی ئێوە و دەرەوەی ئێوەشی توشی خەم و دڵەڕاوکێی قووڵ کردووە.
لەم کاتە سەختە و مانگی پیرۆزی ڕەمەزاندا، دڵ و بیرمان لەگەڵ هەموو ئەو کەسانەدایە کە بەهۆی ململانێکانەوە زیانیان بەرکەوتووە. ئێمە بەردەوامین لە باوەڕبوونمان بەوەی کە تەنها دیالۆگ و سەرکردایەتیکردنی بەرپرسیارانە دەتوانێت رێگری لە ئازاری زیاتر بکات و ببێتە هۆی سەقامگیرییەکی بەردەوام لە ناوچەکەماندا.
هیوای سەبووری بۆ ئەو کەسانەی دەخوازین کە ئازیزانیان لەدەستداوە، هیوادارین دانایی، خۆگرتن، و پابەندبوونی پتەو بە سەقامگیرییەوە رێنمونیکەری هەموو سەرکردەکان بێت لەم کاتە هەستیارەدا.
بافڵ جەلال تاڵەبانی
سەرۆکی یەکێتیی نیشتمانیی کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان رایگەیاند، جارێکی دیکە، رووبەڕووی مەترسییەکی گەورە بووینەتەوە و ئاماژەی بەوەشکردوە، وەک هەمیشە، دڵنیام کە ئێوە بە بەهێزی، خۆڕاگر و یەکگرتوویی دەمێننەوە.
دەقی پەیامەکەی سەرۆکی یەکێتی
هاوڵاتیانی خۆشەویستی هەرێمی کوردستان،
جارێکی دیکە، ڕووبەڕووی مەترسییەکی گەورە بووینەتەوە. وەک هەمیشە، دڵنیام کە ئێوە بە بەهێزی، خۆڕاگر و یەکگرتوویی دەمێننەوە.
لە پێناو ئەم یەکگرتن و یەکڕیزییە گرنگ و پێویستە، لە پەیوەندیی بەردەوامداین لەگەڵ هەموو لایەنە عیراقی و کوردییەکان، بەتایبەتی پارتی دیموکراتی کوردستان، بۆ ئەوەی هەموو توانایەکمان بخەینەگەڕ بۆ بەرگریکردن و پاراستنی خەڵکی هەرێمی کوردستان و عیراق لەم مەترسییە.
خوای گەورە هەمووان بپارێزێت.
بافڵ جەلال تاڵەبانی
سەرۆکی یەکێتیی نیشتمانیی کوردستانسەرۆکی یەکێتیی نیشتمانیی کوردستان
ژووری بازرگانی و پیشەسازی سلێمانی رایگەیاند، کە هیچ مەترسییەک لەسەر کەمیی خۆراک و کاڵا سەرەکییەکان لە بازاڕەکانی پارێزگاکەدا نییە و داوا لە هاووڵاتیان دەکات نەکەونە ژێر کاریگەریی دڵەڕاوکێی بارودۆخە سەربازییەکە.
ژووری بازرگانی و پیشەسازی سلێمانی لە راگەیەنراوێکدا بڵاویکردەوە، کە سەرجەم جۆرەکانی خواردەمەنی و پێداویستییە رۆژانەکان لە کۆگا و مارکێتەکاندا بە بڕێکی زۆر بەردەستن و بازرگانانی سلێمانی پێشوەختە و بەهۆی نزیکبوونەوەی مانگی رەمەزانی پیرۆز، بڕێکی یەکجار زۆر لە کاڵا و خواردەمەنییان هاوردە کردووە و ئامادەکاریی تەواویان هەیە.
ئاماژەی بەوەشکرد، دابینکردنی خۆراک تەنها پشتی بە دەروازە سنوورییەکانی ئێران نەبەستووە، بەڵکو لە رێگەی "دەروازەی ئیبراهیم خەلیل و مینای ئومقەسر"ـەوە شمەک و کاڵا هاوردە دەکرێت، سلێمانی وەک ناوەندێکی سەرەکی بۆ دابینکردنی خۆراک بۆ پارێزگاکانی تری عێراق دەمێنێتەوە و ئەو رۆڵەشی بەهێزتر دەبێت.
ژووری بازرگانی و پیشەسازی سلێمانی ئەوەشی خستەڕوو، هیچ جۆرە گرفتێک لە دابینکردنی پێداویستییەکاندا نییە و هاووڵاتیان دڵنیا دەکەنەوە کە بارودۆخی بازاڕ جێگیرە.
جێی ئاماژەیە، راگەیەنراوەکەی ژووری بازرگانی و پیشەسازی سلێمانی لە کاتێکدایە، کە بەهۆی پەرەسەندنی گرژییەکانی نێوان ئەمریکا، ئیسرائیل و ئێران، ترس لە گرانبوونی کاڵا و کەمبوونەوەی خۆراک لە ناوچەکەدا دروستبووە.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ د. هومام حەموودی، سەرۆکی ئەنجوومەنی باڵای ئیسلامی لە عیراق کۆبووەوە.
لە دیدارێکدا دوایین پەرەسەندنە مەترسیدارەکانی ناوچەکەیان تاوتوێکرد و هەردوولا نیگەرانی خۆیان لە شەڕ و رووبەڕووبوونەوە دەربڕی.
هەردوولا هەر هەوڵێکی راکێشانی عیراقیان بۆ ململانێکان رەتکردەوە و جەختیان لە گرتنەبەری هەموو رێگەیەکی دیپلۆماسی بۆ پاراستنی سەقامگیریی وڵات کردەوە.
شاناز ئیبراهیم ئەحمەد خانمی یەکەمی عیراق، پەیامێکی هاوخەمی بۆ کۆچی دوایی دکتۆر رەفیق سابیر بڵاوکردەوە.
دەقی پەیامەکە
بەبیستنی هەواڵی ماڵئاوایی یەکجارەکی نوسەر و شاعیری کورد (دکتۆر رەفیق سابیر)، زۆر غەمباربووم.
میراتی ئەدەبیی رەفیق سابیر دەبێتە ڕێ رۆشنکەرەوەی نەوەکانی ئایندە و بۆ هەتایە ناوی ئەم ئەستێرە پرشنگدارەی دنیای نوسین، لەدڵی هەموواندا بەزیندوویی دەمێنێتەوە.
پرسەو سەرەخۆشی لەخێزان و کەسوکارەکەی و گەلەکەمان ئەکەم، هاوبەشی خەم و پەژارەیانم.
خواى گەورە لەکۆچکردوو خۆش بێت، وجێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
هەناردەکردنی غازی سورشتیی بۆ وێستگەکانی کارە کەمدەبێتەوە و وەزارەتی کارەباش دەڵێت: هەوڵدەدەن کاریگەرییەکانی کەمبوونەوەی بەرهەمهێنانی کارەبا لەسەر هاوبەشان کەم بکەنەوە.
وەزارەتەکانی سامانە سروشتییەکان و کارەبا راگەیەنراوێکی هاوبەشیان لەبارەی توانای بەرهەمهێنانی کارەبا بڵاوکرەوە و ئاماژەیان بەوەکردووە، هەناردەكردنی غازی سروشتیی بۆ وێستگەكانی بەرهەمهێنانی كارەبا راگیرا.
لە راگەیەنراوەکدا ئەوەشخراوەتەڕوو، توانای بەرهەمهێنانی كارەبا بە بڕی 2500- 3000 مێگاوات كەم دەبێتەوە.
ئاشکراشیانکرد،هەوڵ دەدەن كاریگەرییەكانی كەمبوونەوەی بەرهەمهێنانی كارەبا لەسەر هاوبەشان كەم بكەنەوە.
بەئامادەبوونی شاناز ئیبراهیم ئەحمەد خانمی یەکەمی عیراق، ئێزگەی دەنگی گەلی کوردستان لەسلێمانی کەشێکی پڕ لەوەفاداری و سوپاسگوزاری بۆ مێژوویەک لەخەبات و دڵسۆزی و خزمەتەکانی خاتوو هێرۆ ئیبراهیم ئەحمەد-ی لەئامێزگرت و دیارییەکی بەهاداری پێشکەش کرد.
لەو رێورەسمەدا کتێبی دەنگیی (بەکورتی…نوسینی هێرۆ ئیبراهیم ئەحمەد) بڵاوکرایەوە کە لە حەوت تراکی دەنگی پێکهاتوە و یەکەم بەرهەمی دەنگی ئێزگەی دەنگی گەلی کوردستانە بەهاوکاری مۆزەخانەی نیشتمانی ئەمنەسورەکە.
باسکردنی رۆڵی مێژوویی دادە هێرۆ لەسەردەمی خەباتی شاخ و تۆمارکردنی نەبەردییەکانی پێشمەرگە و شۆڕش، دوای راپەڕینیش وەک سیاسەتمەدار و نوسەرێکی بوێر و دامەزرێنەری چەندین ناوەندی گرنگی میدیایی، بەشێکی تری ئەو رێورەسمە بوو کە تێیدا مەریوان مەسعود بەڕێوەبەری رادیۆی دەنگی گەلی کوردستان، بڵاوکردنەوەی ئەم کتێبە دەنگییەی بەهەنگاوێکی گرنگ وەسفکرد لەپێناو پاراستنی میراتی ئەدەبی و ئەرشیڤکردنی نووسینەکاندا.
دواتر یەکەمین کۆپی کتێبە دەنگییەکە پێشکەشی خاتوو هێرۆ ئیبراهیم ئەحمەد و خاتوو شاناز ئیبراهیم ئەحمەد کرا.
کتێبی دەنگیی (بەکورتی… نوسینی هێرۆ ئیبراهیم ئەحمەد) سەرەتا لەڕێگەی فڵاش میمۆری، دواتر لەکەناڵی یوتیوبی ڕادیۆکە، و لەقۆناغی سێیەمیشدا بە شێوەی زنجیرە و ئەڵقەی دەنگی لە شەپۆلەکانی ڕادیۆی دەنگی گەلی کوردستانەوە پەخش دەکرێت.
وەزارەتی کشتوکاڵ و سەرچاوەکانی ئاو رایگەیاند، کە کەرتی پەلەوەری یەکێکە لە کۆڵەکە گرنگەکانی ئابووری و دابینکردنی ئاسایشی خۆراک لە هەرێمی کوردستان، بەڵام بڵاوبوونەوەی هەندێک دەنگۆ سەبارەت بە بەکارهێنانی ڤاکسین و دەرمانی نایاسایی و فاکسینی قەدەغەکراو، کاریگەری نەرێنی کردووەتە سەر ئەم کەرتە.
وەزارەتی کشتوکاڵ و سەرچاوەکانی ئاو، راگەیەندراوێکی بڵاوکردوەتەوە و تێیدا هاتووە، دڵنیایی دەدەنە هاووڵاتیان کە بەرهەمی پەلەوەری ناوخۆ لەژێر چاودێرییەکی ورددایە و داوا لە دەزگاکانی راگەیاندنیش دەکات بە هەستیارییەوە مامەڵە لەگەڵ ئەم بابەتانەدا بکەن.
ئاماژەیان بەوەشکردوە، ئەو دەنگۆیانە لەسەر مریشکی خۆماڵی بڵاوکراونەتەوە بوونەتە هۆی دروستبوونی دڵەراوکێ لای هاووڵاتییان لە کاتی بەکارهێنانی گۆشتی مریشکدا.
بۆ ئەم مەبەستە، وەزارەت جەخت دەکاتەوە کە بەپێی رێنمایییەکانی ساڵی 2022، هەر جۆرە مامەڵەکردن و هاوردەکردنی دەرمان و ڤاکسینێک دەبێت تەنها لەژێر چاودێری و مۆڵەتی رەسمیدا بێت.
هەروەها ئاگاداری سەرجەم خاوەن پڕۆژەکان، کۆمپانیاکان و کۆگاکان دەکاتەوە، کە پابەندبن بە لیستی دەرمانە رێگەپێدراوەکان، بە پێچەوانەوە رووبەڕووی سزای یاسایی و کارگێڕی توند دەبنەوە.
لە راگەیەنداروەکەدا ئەوەش هاتووە، کە لیژنە هاوبەشەکان لەگەڵ قایمقامیەت و سەندیکا و لایەنە ئەمنییەکان راسپێردراون بۆ چڕکردنەوەی بەدواداچوونەکان و دەستبەسەرداگرتنی هەر جۆرە دەرمانێکی قەدەغەکراو.
هۆشداریش دەدات، کە هەر کەسێک بەبێ مۆڵەت مامەڵە بەم دەرمانانەوە بکات، دەستگیر دەکرێت و رووبەڕووی سزای یاسایی توند دەبێتەوە.
وەزارەتی کشتوکاڵ و سەرچاوەکانی ئاو دڵنیایی دەداتە هاووڵاتیان، کە بەرهەمی پەلەوەری ناوخۆ لەژێر چاودێرییەکی ورددایە و هیچ مەترسییەکی لەسەر نییە.
عەباس ئەکرەم، وتەبێژی وەزارەتی خوێندنی باڵا و توێژینەوەی زانستیی هەرێمی کوردستان رایگەیاند، کە بە ئیمزای د. ئارام محەمەد قادر، وەزیری خوێندنی باڵا، بڕیارێکی گرنگ لە بەرژەوەندی ئەو خوێندکارانە دەرکراوە، کە لە دەرەوەی وڵات دەخوێنن.
بەپێی بڕیارەکە، خوێندکاران دەتوانن لە رێکەوتی 10ـی 3ـی 2026 تاوەکو 28ـی 3ـی بگەڕێنەوە بۆ هەرێمی کوردستان، و ئەم ماوەیە کە 18 رۆژ دەخایەنێت، بە "ماوەی مانەوە" (إقامة) بۆیان هەژمار دەکرێت و لە کاتی یەکسانکردنی بڕوانامەکانیان تووشی هیچ کێشەیەکی یاسایی نابن.
ئاماژەی بەوەشکردوە، ئامانجی سەرەکی ئەم بڕیارە رەخساندنی دەرفەتە بۆ خوێندکاران تاوەکو لە جەژنی نەورۆز، جەژنی رەمەزانی پیرۆز و بۆنە نیشتمانییەکاندا لەگەڵ خێزانەکانیان بن و بەشداریی ئاهەنگەکان بکەن.
پەیامنێری کوردسات نیوز لە بەغداد رایگەیاند: پڕۆسەی وردبینی لە لیستی موچەی فەرمانبەرانی هەرێمی کوردستان بە کۆتا گەیشتووە و نوسراوی خەرجکردنی پارەکە گەیشتووەتە نوسینگەی تایبەتی تەیف سامی، وەزیری دارایی عیراق.
هاوکات وەزارەتی نەوتی عیراق نووسراوی رەسمی ئاراستەی وەزارەتی دارایی کردووە و تێیدا جەختی لەسەر بەردەوامبوونی هەناردەکردنی نەوتی هەرێم کردووەتەوە.
هاوکات پەیامنێری کوردسات نیوز رایگەیاند؛ لە نوسینگەی تەیف سامیەوە پێمراگەیەندراوە کە چاوەڕوانی ناردنی 120ملیار دینارەکەی حکومەتی هەرێمن بۆ ناردنی موچە.
دوای دوو ساڵ و دوو مانگ لە مانگرتن، دانیشتووانی گەڕەکی نەورۆز لە شاری کەرکوک، بە رەسمی کۆتاییهاتنی چالاکییە ناڕەزایەتییەکانیان و هەڵگرتنی خێمەکانیان راگەیاند.
دانیشتووانی گەڕەکەکە لە راگەیەندراوێکدا ئاماژەیان بەوە کرد، "دوای دەربڕینی ناڕەزایی دژی داگیرکردنی ماڵ و حاڵیان و سەپاندنی رەوشی عەسکەرتارییەت، دواجار توانرا لە رێگەی دیالۆگ و بەرپرسیاریێتییەوە کۆتایی بەو رەوشە نائاساییە بهێنرێت کە زیاتر لە دوو ساڵ بوو باڵی بەسەر گەڕەکەکەدا کێشابوو".
دانیشتووانی گەڕەکی نەورۆز دەستخۆشی و پێزانینی بێپایانیان ئاڕاستەی رێبوار تەها، پارێزگاری کەرکوک کرد و رایانگەیاند: پارێزگار بە شێوەیەکی مەیدانی هاتە ناو گەڕەکەکەمان و لە رێگەی پەیوەندییەکانی لەگەڵ سوپاسالاری عیراق، توانی مافەکانمان بپارێزێت و بیسەلمێنێت کە ئەو پارێزگاری هەموو پێکهاتەکان و پارێزەری راستەقینەی مافی هاووڵاتیانە."
لە کۆتایی راگەیەنراوەکەدا دانیشتووانی گەڕەکەکە دووپاتیانکردەوە، کە گەڕەکی نەورۆز وەک هێمایەک بۆ خۆڕاگری دەمێنێتەوە و کەرکوکیش تەنها بە یەکڕیزی، پێکەوەژیان و سەروەری یاسا ئاوەدان دەبێتەوە.
بەڕێوەبەرایەتیی پۆلیسی پارێزگای هەولێر لە روونکردنەوەیەکدا رایگەیاند، ئەمشەو لە ناحیەی رزگاری بەهۆی کێشەیەکی کۆمەڵایەتییەوە تەقەکراوە و لە ئەنجامدا دوو کەس کوژراون.
بەپێی راگەیەندراوەکەی پۆلیسی هەولێر، رووداوەکە سەعات 8:00ی ئەمشەو روویداوە و قوربانییەکان ناویان (زوهێر مستەفا بوزو) و (محەمەد یوسف مەلا فەرەخ)ە.
پۆلیسی هەولێر ئاماژەی بەوەشکردووە، دەستبەجێ تیمەکانیان گەیشتوونەتە شوێنی رووداوەکە و هەردوو تۆمەتباری سەرەکییان بە ناوەکانی (ی. م. ع) و (ع. ی. م) دەستگیرکردووە.
لە کۆتایی راگەیەندراوەکەدا هاتووە، تۆمەتبارەکان دانیان بە تاوانەکەیاندا ناوە و لێکۆڵینەوەکانیش لە رووداوەکە بەردەوامن.
بەڕێوەبەرایەتیی هاتوچۆی هەولێر لە ئاگادارییەکدا شۆفێران لە دانانی چەند کامێرایەکی گەڕۆکی تۆمارکردنی خێرایی لەسەر رێگەی نێوان کەسنەزان بۆ گۆمەسپان ئاگادار دەکاتەوە.
لە راگەیەندراوەکەی هاتوچۆی هەولێردا هاتووە، بەمەبەستی کۆنترۆڵکردنی خێرایی و پاراستنی سەلامەتیی هاووڵاتییان، کامێرای گەڕۆکی تۆمارکردنی خێرایی لە چەندین خاڵی ئەو رێگەیە جێگیر دەکرێن.
هاتوچۆی هەولێر ئاماژەی بە شوێنی جێگیرکردنی کامێراکانیش کردووە کە پێکدێن لە: 1- گوندی مام چۆغان 2- گوندی کانی شاوێردی 3- هەورازە نەفتە 4- بەردەباز 5- کانی کەوان 6- گۆمەسپان
لە کۆتایی ئاگادارییەکەشدا، بەڕێوەبەرایەتیی هاتوچۆی هەولێر داوا لە سەرجەم شۆفێران دەکات، لە پێناو سەلامەتیی خۆیان و ئەوانی دیکەشدا، پابەندی ئەو خێراییە دیاریکراوە بن کە بۆ رێگەکە دانراوە.