کۆمپانیای دانە غاز، رۆژی پێنجشەممە، رایگەیاند، کە سەرجەم دامەزراوە سەرەکییەکانی بەرهەمهێنانی لە کێڵگەی کۆرمۆر لە پارێزگای سلێمانی بە شێوەیەکی کاتی راگرتووە.

وتەبێژی کۆمپانیاکە رایگەیاند: سەرجەم دامەزراوە سەرەکییەکانی بەرهەمهێنان لە کێڵگەی کۆرمۆر بە شێوەیەکی کاتی داخران، ئەمەش بەهۆی بوونی هەڕەشەی ئەمنیی باوەڕپێکراو و پەرەسەندنی گرژییەکان لە ناوچەکەدا.

روونیشیکردەوە کە کۆمپانیاکە بەردەوام دەبێت لە چاودێریکردنی دۆخەکە بە هەماهەنگی لەگەڵ دامەزراوە ئەمنییەکانی حکومەتی هەرێمی کوردستان و حکومەتی فیدراڵ، بە مەبەستی بڕیاردان لەسەر کاتی گونجاو بۆ دەستپێکردنەوەی کارەکان.

وەزارەتی کارەبای حکومەتی هەرێمی کوردستان راگەیەندراوێکی بەپەلەی بڵاوکردەوە و تێیدا کەمبوونەوەی بەرچاوی بەرهەمهێنانی کارەبای بەهۆی دروستبوونی گرفتێکی ئەمنییەوە لە کێڵگەی غازی کۆرمۆر راگەیاند.

بەپێی راگەیەندراوەکەی وەزارەت، بەهۆی ئەو گرفتە ئەمنییەوە کە لە کێڵگەی کۆرمۆر رویداوە، هەناردەکردنی غازی سروشتی بۆ وێستگەکانی بەرهەمهێنانی کارەبا کەمبووەتەوە، ئەمەش بووەتە هۆی دابەزینی ئاستی بەرهەمهێنانی کارەبا بە بڕی 2500 مێگاوات.

وەزارەتی کارەبا دڵنیایی دەداتە هاووڵاتیان و هاوبەشانی کارەبا کە ئەم دۆخە کاتییە و لە ئێستادا سەرجەم لایەنە پەیوەندیدارەکان لەسەر هێڵن و کار دەکەن بۆ چارەسەرکردنی گرفتەکە و دووبارە دەستپێکردنەوەی هەناردەکردنی غاز بە رێژەی ئاسایی خۆی بۆ وێستگەکانی بەرهەمهێنان.

بەڕێوەبەرایەتی شارەوانییەکانی سلێمانی رایگەیاند ئەمڕۆ لە زەرایەن دەست دەکرێت بە دابەشکردنی قۆناغی یەکەمی زەوی بەسەر فەرمانبەران و خانەنشیناندا.

ئەمڕۆ پێنجشەممە، بەڕێوەبەرایەتی شارەوانییەکانی سلێمانی ناوی 329 کەسیان بڵاوکردەوە کە لە قۆناغی یەکەمدا سود مەند دەبن لە دابەشکردنی زەوی لە سنوری زەرایەن.

دابەشکردنەکە  329 پارچە زەوییە و 283 پارچەیان بۆ فەرمانبەران و خانەنشینانەی سنورەکەیە.

ئاماژەی بەوەشکردوە، 46 پارچەشیان تایبەتە بە زیندانیانی سیاسی و دابەشکردنەکە بە تیروپشک و بەپێى خاڵبەندیی لە هۆڵی "شەهید قادر حەمەساڵح " بەڕێوەدەچێت

قوباد تاڵەبانی سەبارەت بە کردنەوەی ناوەندێکی کلتووری و رۆشنبیری لە کەلار رایگەیاندووە، "پیرۆزبایی لە خەڵکی خۆشەویستی کەلار دەکەم، ئەم ناوەندە دەرفەتێکی باشە بۆ گەشەپێدانی لایەنی رۆشنبیری و کلتووری گەرمیان".

قوباد تاڵەبانی لە پەیامێکدا رایگەیاندووە: کەلار چ لەڕووی ژمارەی دانیشتووان و چ لەڕووی ئابووری و خزمەتگوزارییەوە گەشەیەکی خێرای کردووە. لەم نێوانەدا ناوەندێکی کلتووری و رۆشنبیری کە لە ئاستی ئەو گەشەسەندنەدابێت و شایستەی کەلاربێت زۆر پێویست بوو.

قوباد تاڵەبانی ئاماژەی بەوەشداوە: پیرۆزبایی لە خەڵکی خۆشەویستی کەلار دەکەم کە لە ئەمڕۆوە بوونە خاوەنی ناوەندێکی کلتووری و رۆشنبیری جوان و پێشکەوتوو. خۆشحاڵ بووم بە کردنەوەی ناوەندی کلتووری ئاران کە هۆڵێکی پێشکەوتووی سینەما، کتیبخانەیەکی دەوڵەمەند و گەلەرییەکی جوان و سەنتەری راهێنان و فێرکردنی موزیک و.. لەخۆ دەگرێت. ئەم ناوەندە بە تایبەت بۆ ئەو هەموو گەنجە خوێندەوار و بە توانا و هونەردۆست و کلتووردۆستەی دەرفەتێکی باشە بۆ گەشەپێدانی لایەنی رۆشنبیری و کلتووری گەرمیان.

دەنگی چەند تەقینەوەیەك لە ئاسمانی هەولێر بیسترا و هیچ زیانێكیان نەبووە و گەشتەكانی فڕۆكەخانەی نێودەوڵەتی هەولێریش ئاسایین.

پەیامنێری كوردسات نیوز، دەنگی چەند تەقینەوەیەكی بەهێز لە ئاسمانی هەولێر بیسترا، بەپێی زانیارییەكان دەنگەكان تەقاندنەوەی ژمارەیەك درۆن بوون لەئاسمانی هەولێر بەبێ ئەوەی زیانی گیانیان هەبێت، ئەوەش لە كاتێكدایە ماوەی چەند مانگێكە دەنگی تەقینەوەی بەو شێوەیە لە هەولێر نەبیستراوە.

لەبارەی راگرتنی گەشتەكانی فڕۆكەخانەی نێودەوڵەتی هەولێریش پەیامنێری كوردسات نیوز وتی، گەشتەكان بەردەوامن و خشتەی هاتن و چونی گەشتیاران و فڕۆكەكان ئاسایین.

وەزیری جەنگی ئەمریكا دەڵێت، لەدوای كۆتاییهاتنی ئەركی هاوپەیمانان لە عیراق، هێزی پێشمەرگە و سوپای عیراق رابەرایەتی شەڕی دژی داعش دەكەن.

پیت هێگسێت وەزیری جەنگی ئەمریكا لە كاتی كۆبوونەوەی لە عەلی زەیدی سەرۆك وەزیرانی عیراق لە واشنتۆن ئاماژەی بەوەكرد، هێزی پێشمەرگە و سوپای عیراق هێزی سەرەكی و بنەڕەتی دەبن بۆ ڕابەرایەتیكردنی شەڕی دژی تیرۆریستانی داعش لە قۆناغی داهاتوودا، بەتایبەتیش لەدوای كۆتاییهاتنی ئەركی هاوپەیمانان لە عیراق.

وتیشی، هێزی پێشمەرگە و هێزە ئەمنییەكانی هەرێمی كوردستان شانبەشانی سوپای عیراق رۆڵیان هەیە لە شەڕی دژی داعشدا.

وەزیری جەنگی ئەمریكا راشیگەیاند، هاوپەیمانان متمانەیان بە توانای مرۆیی و سەربازیی هێزی پێشمەرگە هەیە لە رووبەڕبوونەوەی تیرۆردا.

ئەمڕۆ چوارشەممە، لە میانی سەرادنەکەیدا بۆ گەرمیان، قوباد تاڵەبانی، جێگری سەرۆک وەزیرانی هەرێم لەگەڵ سەرۆکایەتی هەردوو زانکۆی گەرمیان و پۆلی تەکنیکی گەرمیان کۆبووەوە.

لە کۆبوونەوەکەدا، قوباد تاڵەبانی پیرۆزبایی لە زانکۆی پۆلیتەکنیکی گەرمیان کرد و بەبۆنەی دانپێدانانی لەلایەن وەزارەتی خوێندنی باڵای عیراقەوە و راشێگەیاند، بە تەواوەتی پشتگئیری زانکۆی گەرمیان دەکات تا کێشيکانی چارەسەر بکرێت و تا لەلایەن وەزارەتی خوێندنی باڵا و توێژینەوەی زانستی عیراقەوە دانپێدانانی رەسمیان بۆ بکرێت.

لە کۆبوونەوەکەدا، قوباد تاڵەبانی ئاماژەیدا بە گرنگی رۆڵی زانکۆکان لە گەشەپێدانی ناوچەیی و بە پێویستی زانی هەردوو زانکۆکە پلانیان هەبێت تا بەپێی پێویستییەکانی گەشەپێدانی گەرمیان هێزی کاری مرۆیی شارەزا پەروەردە بکەن و جەختیکردەوە، خۆی و حکومەتی هەرێمیش ئامادەن بۆ هەموو جۆرە پشتیوانی و هاوکارییەک.

لە سەردانەکەیدا بۆ ئیدارەی گەرمیان قوباد تاڵەبانی، جێگری سەرۆک وەزیران بە ئامادەبوونی هەر یەکە لە جەلال شێخ نوری، سەرپەرشتیاری ئیدارەی گەرمیان و بەڕێوەبەری گشتیی شارەوانییەکانی گەرمیان و بەڕێوەبەری گشتیی تۆماری خانووبەرەی گەرمیان، لەگەڵ سەرۆک شارەوانییەکانی ئیدارەی گەرمیان کۆبووەوە.

لە کۆبونەوەکەدا قوباد تاڵەبانی بڕیاریدا لەسەر دابەشکردنی زیاتر لە 17 هەزار پارچە زەوی بەسەر فەرمانبەران و کەسوکاری شەهیدانی سنوری گەرمیان.

بەپێی بڕیارەکە لە کەلار 11 هەزار و 128  پارچە زەوی، لە کفری دوو هەزار و 500  پارچە زەوی و لە رزگاریش دوو هەزار  و500  پارچە زەوی بەسەر فەرمانبەراندا دابەش دەکرێت.

جگە لەو پارچە زەویانە،  1077 پارچە زەویش بەسەر کەسوکاری شەهیدان بەبێ لەبەرچاوگرتنی ئینتیمای سیاسی و حزبی دابەش دەکرێت و پرۆسەکەش لە ئەمڕۆوە و بە ئامادەبوونی ژمارەیەک لە فەرمانبەران و کەسوکاری شەهیدان دەست بە دابەشکردنی پارچە زەوییەکان کرا

قوباد تاڵەبانی، جێگری سەرۆک وەزیران سەردانی ئیدارەی گەرمیانی کرد و لە یەکەم وێستگەی سەردانەکەیدا لەگەڵ بۆردی وەبەرهێنانی گەرمیان کۆبووەوە.

لە کۆبوونەوەکەدا کە رۆژی چوارشەممە 15ـی 7ـی 2026 بەڕێوەچوو، هەڵسەنگاندن کرا بۆ چۆنییەتی جێبەجێکردنی بڕیار و راسپاردەکانی کۆبوونەوەکەی مانگی نیسانی ئەمساڵی بۆردی وەبەرهێنانی گەرمیان لەگەڵ قوباد تاڵەبانی.

 جێگری سەرۆک وەزیران دەستخۆشی لە ئەندامانی بۆردەکە کرد کە خەمخۆرانە کاروبارەکان رادەپەڕێنن و داوایکرد بۆ گەشەپێدان و زیاتر ئاوەدانکردنەوەی گەرمیان زیاتر خۆیان ماندوو بکەن و جیاوازی لەنێوان ناوچەکانی گەرمیاندا نەکەن و بێ هیچ جۆرە جیاوازییەک لە هەر ناوچەیەک بەپێی تایبەتمەندیی ناوچەکە پڕۆژەی وەبەرهێنان جێبەجێ بکەن.  

قوباد تاڵەبانی پشتیوانی تەواوی خۆی بۆ بۆردی وەبەرهێنانی ئیدارەی گەرمیان دووپات کردەوە، وتیشی: هەموو ئەو فشارانەی لە رابردوودا کردوویەتی و ئێستاش دەیکات بەهۆی ئەو خۆشەویستییە زۆرەیەتی کە بۆ گەرمیان و گەرمیانییەکان هەیەتی و دەبێت لەپێناو خزمەتکردنی زیاتری خەڵک و گەشەپێدانی دەڤەرەکە، ئەندامانی بۆردی وەبەرهێنان وەک یەک تیم پێکەوە کار بکەن و بۆ زیاترکردنی ئاستی وەبەرهێنان ئاسانکاری تەواو پێشکەشی وەبەرهێنەران بکەن.

ئەمڕۆ قوباد تاڵەبانی بە سەردانێكی رەسمی دەگاتە ئیدارەی سەربەخۆی گەرمیان و لەگەڵ لێپرسراوانی ناوچەكە لەسەر پرسی دابەشكردنی زەوی و بازرگانی و وەبەرهێنان كۆدەبێتەوە.

بڕیارە ئەمڕۆ قوباد تاڵەبانی جێگری سەرۆك وەزیرانی هەرێم سەردانێكی رەسمی بۆ ئیدارەی سەربەخۆی گەرمیان و قەزای كەلار ئەنجام بدات و لە سەرەتای سەردانەكەشیدا ئیمزای دابەشكردنی زەوی بەسەر 26 هەزار موچەخۆری ئیدارەكەدا بكات، بڕیاریشە لە قۆناغی یەكەمدا 10 هەزار موچەخۆری حكومی زەوییان پێبدرێت، زەوییەكان لەناو قەزای كەلار و قەزای كفری و ناحیەی رزگاریدان و ئەو موچەخۆرانەشی دەكەونە ناوچەكانی ماددەی 140، لە قۆناغی داهاتوودا زەوییان پێدەدرێت.

لەلایەكی ترەوە قوباد تاڵەبانی لەگەڵ لێپرسراوانی ئیدارەكە كۆدەبێتەوە بۆ دانانی رێكارێك بۆ پەرەدان بە كەرتی وەبەرهێنان و بازرگانی لە ئیدارەی گەرمیان و قەزای كەلاردا، ئەوە جگە لەوەی ئەمڕۆ بۆ یەكەمجار پڕۆژەیەكی گەورەی سینەمایی لە كەلار دەكرێتەوە.

لە گوندی سیا مەنسوری سەر بە ناحیەی لەیلان جوتیارێك بەهۆی تەقەی راستەوخۆی چەند كەسێكەوە كوژرا، كە دزیان لە دانەوێڵەی جوتیارەكە كردووە.

روداوەكە درەنگانی شەوی رابردوو لە گوندی سیا مەنسوری سەر بە ناحیەی لەیلان رویداوە لە كەركوك، چیرۆكی روداوەكە بە جۆرێك بووە، كە ماوەیەك بووە دانەوێڵەی ئەو جوتیارە دزی لێكراوە، جوتیارەكەش بڕیاری داوە بۆسە دابنێت بۆ دزەكان.

دوای ئەوەی جوتیارەكە و چەند هاوڕێیەكی بۆسە بۆ دزەكان دادەنێن، دەبینن دوو پیاو و ژنێك دانەوێڵەكە دەدزن، ئەوانیش دوایان دەوكەون و لە شوێنێكدا ئۆتۆمبێلی دزەكان لە چاڵێكدا گیر دەبێت، ئەوانیش دەچنە سەریان و لەو كاتەشدا روبەڕووبوونەوە دروست دەبێت و ستار جەباری جوتیار راستەوخۆ گیان لەدەستدەدات و هاوڕێیەكیشی كە بە نەتەوە عەرەبە بریندار دەبێت.

دواتریش دزەكان بە ئۆتۆمبێلی هاوڕێ بریندارەكەی ستار هەڵدێن.

لە ئێستاشدا هێزە ئەمنییەكان لێكۆڵینەوەی وردیان لە روداوەكە دەستپێكردووە و گەڕان بەدوای تۆمەتبارەكانیشدا بەردەوامە.

مەکتەبی سیاسیی یەکێتیی نیشتمانیی کوردستان بەبۆنەی جەژنی 'دەهوا رەبا'ـی سابیئەی مەندائی، پەیامێکی پیرۆزبایی ئاڕاستەی مەندائییەکانی عیراق و جیهان دەکات.

دەقی پەیامەکە:

بە بۆنەی جەژنی (دەهوا رەبا) سەری ساڵی سابیئەی مەندائی، گەرمترین پیرۆزبایی لە خوشك و برایانی مەندائی لە عیراق و جیهان دەكەین 

سابیئەی مەندائی وەك پێكهاتەیەكی رەسەن وخاوەن ماف لە بنیادنانی شارستانێتی  ناوچەكەدا رۆڵێكی مێژووییان هەبووە، ئومێدەوارین ئەم بۆنەیە و گشت رێورەسمی یاد و بۆنەكانی تر بەو پەڕی ئازادی و سەربەرزی بەڕێوەببەن.

مەكتەبی سیاسی 
یەكێتیی  نیشتمانیی كوردستان

قوباد تاڵەبانی، جێگری سەرۆک وەزیرانی هەرێمی کوردستان بەبۆنەی گۆڕینی ناوی فڕۆکەخانەی نێودەوڵەتیی سلێمانی بۆ فڕۆکەخانەی نێودەوڵەتیی جەلال تاڵەبانی، پەیامێکی بڵاوکردەوە و تێیدا سوپاسی هەموو ئەو کەس و لایەنانە دەکات کە لە پرۆسەکەدا بەشداربوون.

دەقی پەیامەکە: 

هەرچەندە سەرۆک مام جەلال تا خۆی لە ژیاندا بوو هەرگیز لەگەڵ ئەوەدا نەبوو هیچ شوێنێکی بەناوەوە بکرێت. بەڵام سوپاسی دامەزراوەی سەرۆک مام جەلال و هەموو ئەو کەسایەتی و لایەنە پەیوەندیدارانە لە هەرێمی کوردستان و عیراق دەکەین کە ئەرکیان کێشا وەک رێز و پێزانینێک بۆ نزیکەی 70 ساڵ خەبات و تێکۆشانی سەرۆک مام جەلال لەپێناو کوردستان و ئازادی و دیموکراسی و پێکەوەژیاندا، ناوی فڕۆکەخانەی نێودەوڵەتیی سلێمانییان گۆڕی بۆ فڕۆکەخانەی نێودەوڵەتیی جەلال تاڵەبانی. ئەو فڕۆکەخانەیەی کە هەر خۆی دامەزرێنەری بوو.

ناونانی فڕۆكەخانە نێودەوڵەتییەكان لە بەشێك لە وڵاتانی جیهان، رێزلێنانە لە خەبات و تێكۆشانی ئەو كەسایەتی و سەركردانەی رۆڵ و پێگەی كاریگەرییان لە وڵاتەكانیاندا هەبووە و لە دژی ستەم و زۆرداری و دیكتارەكان وەستاونەتەوە، گۆڕینی ناوی فڕۆكەخانەی نێودەوڵەتی سلێمانیش بۆ فڕۆكەخانەی نێودەوڵەتی جەلال تاڵەبانی، رێزلێنانە لە خەبات و تێكۆشانی سەرۆك مام جەلال هاوشێوەی سەركردەكانی تری جیهان.

لە زۆرێك لە وڵاتانی جیهان، ناونانی فڕۆكەخانە نێودەوڵەتییەكان بە ناوی سەرۆك، رابەر یان كەسایەتییە مێژوویی و نیشتمانییە ناودارەكان، بووەتە بەشێك لە كلتوری رێزلێنان لەو كەسانەی كاریگەرییان لەسەر چارەنووسی وڵاتەكانیان هەبووە، ئەو فڕۆكەخانانە تەنها ناونیشانی گواستنەوەی گەشتیاران نین، بەڵكو هەڵگری پەیامێكی مێژوویی و ناسنامەی نیشتمانین، چونكە یەكەم شوێنن كە زۆربەی میوانان و گەشتیاران لە كاتی چوونە ناو وڵاتێك پێی دەگەن.

لە هندستان، فڕۆكەخانەی نێودەوڵەتی مەهاتما غاندی بە ناوی رابەری بزووتنەوەی سەربەخۆیی هندستان ناونراوە كە بە بێ توندوتیژی، خەباتی ئاشتیخوازانەی كردە هۆكاری كۆتاییهێنان بە دەسەڵاتی داگیركاری بەریتانیا، لە ئەمریكاش فڕۆكەخانەی نێودەوڵەتی جۆن فیتزجێراڵد كێنیدی (JFK) بە ناوی 35مین سەرۆكی ئەو وڵاتەوە ناونراوە لە توركیا، فڕۆكەخانەی ئەتاتورك هەیە ساڵانێكی زۆر دەروازەی سەرەكیی ئەو وڵاتە بوو و بەناوی كەمال ئەتاتورك دامەزرێنەری كۆماری توركیاوە ناونراوە.

لە ئێرانیش، فڕۆكەخانەی نێودەوڵەتی ئیمام خومەینی بە ناوی رابەری شۆڕشی ئیسلامی ناونراوە، لە ئیسرائیل، فڕۆكەخانەی دەیڤد بن گوریۆن هەیە كە ئەویش بە ناوی دامەزرێنەر و یەكەم سەرۆك وەزیرانی ئەو وڵاتەوە ناونراوە، لە فەڕەنساش فڕۆكەخانەی شارل دیگۆل هەیە، كە سەرۆكی فەڕەنسا بووە لە ساڵانی نێوان 1959 بۆ 1969، لە باشووری ئەفریقاش فڕۆكەخانەی نێلسۆن ماندێلا هەیە كە نموونەیەكی ترە لەو نەریتی ناونانە.

ئەو هەنگاوە ئێستا لە هەرێمی كوردستانیش دەبینرێت، بەپێی بڕیارێكی رەسمی، ناوی فڕۆكەخانەی نێودەوڵەتی سلێمانی گۆڕدراوە بۆ فڕۆكەخانەی نێودەوڵەتی جەلال تاڵەبانی، ئەو گۆڕانكارییەش وەك رێزلێنانێك بۆ سەرۆك مام جەلال كە یەكەم سەرۆك كۆماری عیراق بووە لە دوای ساڵی 2003 و روخانی رژێمی بەعس و وەك سەركردەیەكی مێژوویی و كاریگەری بزووتنەوەی رزگاریخوازی كوردستان، كە ڕۆڵێكی گرنگی هەبوو لە پاراستنی هاوسەنگیی سیاسی و كۆكەرەوەی دەنگە جیاوازەكان لە عیراق و یەكێكیشە لە دیارترین كەسایەتییە سیاسییەكانی كورد و عیراق.

سەرۆك مام جەلال بە هەوڵەكانی بۆ چارەسەری كێشە سیاسییەكان، پشتیوانیكردنی گفتوگۆ و ئاشتەوایی، و نزیككردنەوەی پێكهاتە جیاوازەكانی عیراق ناسراوە، چاودێرانیش دەڵێن سەرۆك مام جەلال رۆڵی كاریگەری لە نیاتنانی دیموكراسی و دامەزراندنی پرۆسەی سیاسی عیراقی نوێ‌ هەبووە.

گۆڕینی ناوی فڕۆكەخانەی نێودەوڵەتی سلێمانی تەنها گۆڕینی ناوێك نییە، بەڵكو بەشێكە لە هەوڵی پاراستنی بیرەوەریی مێژوویی و ناساندنی میراتی كەسایەتییەكەیە كە كاریگەری لەسەر مێژووی كوردستان و عیراق هەبووە، بەو شێوەیەش، فڕۆكەخانەی نێودەوڵەتی جەلال تاڵەبانی ئێستا دەچێتە ریزی ئەو فڕۆكەخانە ناودارانەی جیهان كە بەناوی سەركردە و كەسایەتییە مێژووییەكانەوە كراون، هەر میوانێكیش كە دەگاتە سلێمانی، لە یەكەم ساتەنەوە بە ناوێكی مێژوویی و نیشتمانی پێشوازی لێدەكرێت.

مەفرەزەکانی پۆلیسی سلێمانی سێ تۆمەتباریان دەستگیرکرد کە دوای راگرتنیان، دانیان بە دزینی 12 ماتۆڕسکیلدا ناوە لە گەڕەکە جیاوازەکانی شارەکەدا.

بەڕێوەبەرایەتی پۆلیسی پارێزگای سلێمانی رایگەیاند، دوای ئەوەی هاووڵاتییەک لە نووسینگەی نەهێشتنی تاوانی بەکرەجۆ سکاڵای تۆمارکرد کە لەبەردەم ماڵەکەیدا دوو ماتۆڕسکیلی لێدزراوە، دەستبەجێ بە بڕیاری دادوەر پەڕاوی لێکۆڵینەوە بۆ روداوەکە کرایەوە.

ئاماژەی بەوەشکردووە، دوای بەدواداچوون و کۆکردنەوەی زانیاری و سوودوەرگرتن لە کامێراکانی چاودێری، مەفرەزەکانی نەهێشتنی تاوانی بەکرەجۆ توانییان هەر سێ تۆمەتبارەکە بدۆزنەوە و دەستگیریان بکەن، لە کاتی لێکۆڵینەوەکاندا جگە لەو دوو ماتۆڕسکیلە، دانیان بە دزینی 10 ماتۆڕسکیلی دیکەشدا ناوە لە گەڕەکەکانی شاری سلێمانی.

پۆلیسی سلێمانی ئاشکراشیکرد، لە ئێستادا هەر سێ تۆمەتبارەکە بە بڕیاری دادوەر و بەپێی 'مادەی 446'  لە یاسای سزادانی عیراقی راگیراون و لێکۆڵینەوە لەگەڵیاندا بەردەوامە.