ژمارەیەک ئەندامی ئەنجومەنی پارێزگای سلێمانی سەبارەت بە کامێرای چاودێری نوسراوێک ئاڕاستەی سەرۆکایەتی ئەنجومەنی پارێزگاکە دەکەن، بۆ ئەوەی کۆبوونەوەیەکی ئاسایی ئەنجامبدرێت و دەڵێن ئەو بابەتە نارەزایەتی ھاووڵاتیانی لێکەوتۆتەوە، ھەروەھا لە رێگەوبانەکان بەھۆی خراپی و تێکچونیانەوە رۆژانە رووداوەکانی ھاتووچۆ زیادیانکردوە، دانانی کامێرا لەگەڵ رێگاوبانی نێوان شارەکان ناگونجێت.

 لەبەشێکی تری نوسراوەکەدا داوای رەتکردنەوەی دانانی کامێرای چاودێری دەکەن بە تەنیا لەسنوری سلێمانی، چونکە جگەلەوەی کارێکی نایاساییە لە ھەمانکاتدا کارێکی نەگونجاوە و بە قوربانیکردنی شارەکەیە.

ھەروەھا ئەو ئەندامانەی ئەنجوومەن ئاماژە بۆ ئەوەش دەکەن، بەپێی یاسا نابێت کامێرای چاودێری بدرێت بە کەرتی تایبەت، داواکارن لە ڕێگەی ئەنجوومەنی پارێزگای سلێمانی، بڕیارێکی گونجاو بدرێت بەڕاگرتنی کارەکانی کۆمپانیای جێبەجێکار، داوا لە وەزارەتی ناوخۆش بکرێت گرێبەستی کۆمپانیای جێبەجێکار ھەڵبوەشێنێتەوە.

بەپێی راگەیەنراوێکی وەزارەتی دارایی، لە کۆبوونەوەیەکی ھاوبەش لەگەڵ وەزارەتی بازرگانی و پیشەسازی ھەرێم و بەڕێوەبەری گشتی گومرکی ھەرێم ئەنجامدرا، بۆ گفتوگۆکردن سەبارەت بە رەوشی کارگەکان و کێشە و گرفتەکانیان لە ڕووی باج و ڕسوماتەوە، بڕیاردرا کارئاسانیان بۆ بکرێت لەپێناو پەرەپێدانی کەرتی پیشەسازی و بەرھەمھێنانی ناوخۆیی.

ھەر بەپێی راگەیەنراوەکە، لە کۆبوونەوەکەدا باس لە گرفتی کارگەکان کرا لە ھەرێمی کوردستان لەڕووی وەرگرتنی باج و ڕسومات، ئەوەش ئاستەنگی بۆ کارکردنیان دروستکردووە، بڕیاردرا لەڕێگەی دروستکردنی لیژنەیەکی ھاوبەش بەدواداچونی وردبکریت تابتوانن چارەسەربکرێن، ھاورابوون لەسەر ئەوەی کەمترین باج لە کارگەکان وەربگیرێت، میکانیزمی چۆنێتی کەمکردنەوەی باجیش دراوە بەو لیژنەیەی پێکدەھێنرێت.

وەزارەتی سامانە سروشتیەکانی ھەرێم رایگەیاند، وەزیری سامانەسروشتییەکانی ھەرێم بە وەکالەت و کونسوڵی گشتیی ئەمەریکا لە ھەرێمی کوردستان کۆبونەتەوە بۆ گفتوگۆکردن لە سەر پەرەپێدانی  سێکتەری نەوت و گاز لە ھەرێمی کوردستان.

 بەپێی راگەیەنراوەکە، کونسوڵی گشتیی ئەمەریکا ئامادەیی وڵاتەکەی بۆ نزیککردنەوەی ھەرێمی کوردستان و حکومەتی عێراق پیشانداوە بۆ چارەسەرکردنی کێشەی نەوت و گاز، ھەروەھا پاڵپشتیی وڵاتەکەی بۆ چارەسەرکردنی کێشەکان بەڕێگەی گفتوگۆ دەربڕیوە.

ھاوکات وەزیری سامانەسروشتییەکان رایگەیاندووە، لە رێگەی گازی بەرھەمھاتوو ٦٠٠ مێگاوات کارەبا دەدرێتە کەرکوک و موسڵ و دیالە، بەشێک لە نەوتی عێراقیش بە بۆریی نەوتی کوردستان ڕەوانەی دەرەوە دەکرێت، بۆیە پاراستنی دامەزراوە نەوتی و گازییەکان ئەرکی ھەمووانە.

دەقی پەیامەکە...

بەرێز مەکتەبی سیاسیی پارتی دیموکراتی کوردستان بە بۆنەی تێپەربوونی حەفتاوشەش ساڵەی  دامەزراندنی پارتی دیموکراتی کوردستان. پیرۆزبایی گەرمتان لێدەکەین و ھیوادارین ئەم یادە ببێتە دەرفەتێک بۆ پەرەپێدانی پەیوەندییەکانی نێوانمان  لە پێناو ڕەوینەوە وتێپەڕاندنی گشت ئەو لەمپەڕانەی کەلەسەر رێگەی لێکتێگەیشتمان لە کاری ھاوبەش لە کوردستان و عیراق  و بە تایبەتی  لەرێی گەشەپێدانی سیاسەتێکی دادپەروەرانەی کوردستانیی حوکمڕانی و ئابووری و خزمەتگوزاریدا دروست بوون .

 ھەر لەم یادەدا ئومێدەوارین پرس و جوڵە سیاسیەکانی جیھان و ناوچەکە و عیراق  بەھەند وەربگیرێت و گشت  ھێز و لایەنە سیاسییەکان ھەوڵەکانمان بە جۆرێک یەکبخەین کە لە قازانجی یەکریزی و پێکەوەیی گەلەکەماندا بێت، بە تایبەت لە بەغدا بە یەک پاکێجی نیشتمانی وکوردستانییەوە ڕوبەڕووی ئەوبارودۆخە نەخوازراوەی ئێستای عیراق ببینەوە بۆ دەربازکردنی ووڵات لەو دۆخەی تێیکەوتوە. 

 جارێکی تر ساڵیادی دامەزراندنی  پارتی دیموکراتی کوردستان  پیرۆز بێت  وسەرکەوتوبن                                      

مەکتەبی سیاسیی یەکێتیی نیشتمانیی کوردستان

 مەلا یاسین لێپرسراوی نوسینگەی یەکێتی نیشتمانی کوردستان لە قاھیرە پرسە و سەرەخۆشی بۆ کەسوکاری قوربانیانی کەنیسەی ئەبو سەیفین دەبڕی و ھیوای زوو چاکبوونەوەی بۆ بریندارەکان و گەڕانەوەی بۆ ناو خانەوادەکانیان خواست.

نوێنەری یەکێتی نیشتمانی کوردستان لە قاھیرە رایگەیاند، سوتانی کەنیسەی ئەبو سەیفین کارەساتێک بوو ھەموومانی خەمبارکرد. 

 مەلا یاسین سوپاسی حکومەت و لایەنە پەیوەندیدارەکانیش دەکات بۆ خێرا بەدەمەوەچوونی رووداوەکە و یارمەتیدانی بریندارەکان و کۆنتڕۆکردنی ئاگرەکە بە زووترین کات.

دەقی پەیامەکە...
بەڕێزان سەرۆک و ئەندامانی مەکتەبی سیاسی و سەرکردایەتی و کادرانی پارتی دیموکراتی کوردستان 

بەبۆنەی ساڵیادی دامەزراندنی پارتی دیموکراتی کوردستانەوە گەرمترین پیرۆزباییتان ئاراستە دەکەین و ھیوای سەرکەوتن و پێشکەوتنتان بۆ دەخوازین لەکاروانی خەباتدا بۆ خزمەتکردنی زیاتری گەلەکەمان. 

ھیوادارین ئەم ساڵیادە ببێتە ھەوێنی پێکەوەژیان و وەلانانی ناکۆکیەکان و رەخساندنی زەمینەی لەبار بۆ گفتوگۆی بنیاتنەرانە لەگەڵ لایەنە سیاسیەکانی تری سەر گۆڕەپانی سیاسی وڵاتدا بەئامانجی بەدیھێنانی مافەکان و پاراستنی بەرژەوەندییە باڵاکانی گەلی کوردستان و گەلانی عێراقدا.

دووبارە پیرۆزباییتان لێ دەکەم

قوباد تاڵەبانی 
جێگری سەرۆکی ئەنجومەنی وەزیران

بەڕێوەبەرایەتی گشتی کارەبای سلێمانی رایگەیاند، بەپێی دوایین ئاماری بەستنی پێوەری زیرەکی کارەبا لە سنوری پارێزگای سلێمانی و ئیدارەی راپەڕین ٤٤٥ ھەزار و ٤٥٥ پێوەری زیرەکی کارەبا بۆ ماڵان و شوێنە بازرگانی و کشتوکاڵییەکان دانراوە.

بە پێی ئەو ئامارەی بەڕێوەبەرایەتی گشتی کارەبای سلێمانی، زیاتر لە ٨٥%ی ماڵەکان و شوێنە بازرگانی و کشتوکاڵییەکان پێوەری زیرەکیان بۆ دانراوە و پڕۆژەکەش بەرەو قۆناغی کۆتایی دەچێت.

بڕیارە ئەمڕۆ وەفدێکی باڵای چوارچێوەی ھەماھەنگی شیعە بە سەرۆکایەتی "ھادی عامری" سەردانی سلێمانی بکەن و لە دەباشان لەگەڵ "بافڵ جەلال تاڵەبانی" سەرۆکی یەکێتی نیشتمانی کوردستان کۆدەبنەوە. لە کۆبوونەوەکە دوایین پێشھات و گۆڕانکارییە سیاسییەکان تاوتوێ دەکەن. 

ئەو وەفدی چوارچێوەی ھەماھەنگی بە سەرۆکایەتی عامری لە ئێستادا لە ھەولێرن و بۆ ھەمان مەبەست کۆبوونەوە لەگەڵ لێپرسراوان ئەنجام دەدەن. 

دوێنێش عامری لەگەڵ "محەمەد حەلبوسی" سەرۆکی ئەنجومەنی نوێنەرانی عێراق بۆ تاوتوێکردنی دوایین رەوشی سیاسی عێراق کۆبووەوە.
 

بە پێی ئاماری وەزارەتی ناوخۆی حکومەتی ھەرێمی کوردستان، لە ماوەی ھەفتەیەکدا واتە لە ٥ی ئابی ٢٠٢٢ تا ١١ی ئابی ٢٠٢٢ ، ٣٧ ھەزار و ٧٦٨ ھاووڵاتی عێراق و ھەرێمی کوردستان و ٤١ ھەزار و ٧٦١ کەسی بیانی لە ڕێگەی فڕۆکەخانەکانی ھەولێر و سلێمانی و دەروازە نێودەوڵەتییەکانی باشماخ و پەروێزخان و حاجی ئۆمەران و ئیبراھیم خەلیلەوە سەردانی ھەرێمی کوردستانیان کردووە.

ھەر بەپێی ئامارەکەی وەزارەتی ناوخۆی ھەرێم، لە ماوەی ئەو ھەفتەیەدا ٤٠ ھەزار و ١٥ ھاووڵاتی عێراق و ھەرێم لە ڕێگەی فڕۆکەخانە و دەروازە نێودەوڵەتییەکانی ھەرێمەوە گەشتی دەرەوەیان کردووە. ھەروەھا ژمارەی کەسە بیانیەکانیش کە چوونەتە دەرەوەی ھەرێم ٣٩ ھەزار و ٢٩٩ کەس بوون.

بەپێی ئامارێکی بەڕێوەبەرایەتی بەرەنگاربوونەوەی تاوانە ڕێکخراوەکانی ھەرێم، لە ماوەی ساڵەکانی ٢٠١٩ و ٢٠٢٠ و ٢٠٢١، ٣٣ تاوانی بازرگانیکردن بە ئەندامانی لەشی مرۆڤ و ٩ تاوانی بازرگانی سێکسی و ١١ تاوانی بازرگانی بەو کەسانەی تەمەنیان لە ١٨ ساڵ کەمترە، تۆمارکراوە لەگەڵ تاوانێکی بازرگانی بە منداڵ و ١٧ تاوانی کارکردن بە زۆرەملێ. ئاماژە بەوەشکراوە، ٧ تاوانی کاری بە قاچاغ بردن و ١٠ تاوانی بەکارھێنانیان وەک سواڵکەر لە ھەرێمی کوردستان تۆمارکردووە، ئەو کەسانەشی کە تۆمەتبارن بە ئەو جۆرە تاوانە رووبەرووی یاسا کراونەتەوە و سزا دراون.

لە دیدارێکدا کە شاڵاو کۆسرەت رەسوڵ و خالید شوانی، ئەندامی مەکتەبی سیاسی ئامادەبوون، دوایین پەرەسەندنە سیاسییەکان و دەستپێشخەری نوێ بۆ چارەسەرکردنی کێشەکانی بەردەم پرۆسەی سیاسیی عیراق تاوتوێکران و بیروڕایان لەبارەوە ئاڵوگۆڕکرا.

‏‎لە دیدارەکەدا جەخت لە یەکخستنی ھەوڵە نیشتمانییەکان کرایەوە لەپێناو دۆزینەوەی دەرچەی دەستووریی و یاسایی بۆ دەربازبوون لەو دۆخە نەخوازراوەی عیراقی تێکەوتووە. ھەردوولا ھاوڕابوون لەسەر بەردەوامیی گفتوگۆکان و دیالۆگی بونیادنەرانە بۆ زاڵبوون بەسەر کێشەکان.

‏‎سەرۆک بافڵ جەلال تاڵەبانی لە دیدارەکەدا جەختیکردەوە کە یەکێتی پێشوازی لە ھەر دەستپێشخەرییەک دەکات کە سەرجەم لایەنەکان کۆبکاتەوە و ئامانج لێی گەیشتن بێت بە رێککەوتنێکی نیشتمانی و دەربازکردنی وڵات لەو دۆخەی تێیکەوتووە. روونیشی کردەوە لەماوەی رابردوودا بەھەمان سیاسەتی سەرۆک مام جەلال داوای گفتوگۆی نیشتمانیمان کرد بۆ تێپەڕاندنی ئاستەنگییەکان. بۆ ئەمڕۆش ئەم دەستپێشخەرییە نوێیە کە لەگەڵ دیدگای یەکێتی یەکدەگرێتەوە و لەخزمەتی گشتی و سەقامگیری وڵاتدایە یەکێتی پشتیوانی دەکات.

"عوسمان سێدەری"بڕیاردەری لیژنەی کاروباری پێشمەرگە لە پەرلەمانی کوردستان بە کوردسات نیوزی راگەیاند، پێشمەرگە بەپێی یاسای تایبەت خانەنشین دەبێت،  دوای تەمەنی ٤٥ ساڵ و ١٥ ساڵ خزمەت خانەنشین دەکرێت.

وتیشی، پێشمەرگە دەبێت ھەمیشە ھێزێکی چالاک بێت، لەبەرئەوە بەپێی یاساکە نابێت تەمەنی پێشمەرگە لە ٤٥ ساڵ زیاتر بێت، گەیشتە ئەو تەمەنە خانەنشین دەکرێت.

جەختی لەوەش کردەوە، لە یاسای خانەنشینی پێشمەرگەدا ریزبەندی ھەیە، بەپێی ریزبەندییەکە لیوا لە تەمەنی ٦٣ ساڵی و عەمید لە تەمەنی ٥٣ ساڵی و پێشمەرگە لە تەمەنی ٤٥ ساڵی خانەنشین دەکرێت، ریزبەندییەکە لە سەرەوە بۆ خوارەوە دیاریکراوە.

ئیئتیلافی دەوڵەتی یاسا لە راگەیەندراوێکدا ئاماژەی بەوە کردوە، دواکەوتنی پێکھێنانی حکومەت و پەکخستنی کارەکانی ئەنجومەنی نوێنەرانی عێراق کاریگەری مەترسیداری لەسەر ژیانی ھاوڵاتیان و فەرمانبەران ھەیە، چونکە زۆربەی بڕیار و یاساکان پێویستیان بە کۆبوونەوەی ئەنجومەنی نوێنەرانە و حکومەتێکیش پێویستە بۆئەوەی جێبەجێیان بکات.

راشیگەیاندووە، بەرپرسیارێتی ئەو کاریگەرییە مەترسیدارە و خراپی کۆی رەوشی ئێستای عێراق لە ئەستۆی رەوتی سەدردایە، کە رێگە نادات ئەنجومەنی نوێنەران کۆببێتەوە و حکومەتی نوێی عێراقیش پێکبھێنرێت.

ھاوپەیمانی فەتحیش رایگەیاندوە، ئەنجومەنی نوێنەران موڵکی گەلە نەک تەنھا لایەنێک کە رێگە نەدات کۆبوونەوەکان بکات و کارەکانی پەکبخات، جەختیشیکردووەتەوە، پەکخستنی دامەزراوە یاساییەکانی دەوڵەت کارێکی نادەستوورییە و کاریگەری خراپی لێدەکەوێتەوە.

بە پێی میدیاکانی باکوری کوردستان، سوپای تورکیا لە بنکەکانی پۆلیسی سەر ھێڵی سنووری کۆبانێ، لە شوێنی سەربازەکان، پۆلیسی پسپۆری بەکرێگیراوی جێگیر کردوە. ھەر لەو چوارچێوەدا ٢٠٠ سەربازی لە سنووری کۆبانێ بۆ سنووری سەریکانی گواستوەتەوە. بە پێی سەرچاوە خۆجییەکان لە باکوری کوردستان، ئەفسەرێکی پلە بالڕی سوپای تورکیا راگەیاندوە، ئالۆگۆڕی سەربازی ئامادەکاریە بۆ ئۆپراسیونێ سەربازی لەسەر ئەو شارە.

شاری کۆبانێ دەکەوێتەوە نێوان ناوچەی جەرابلوس و گرێ سپی، کە لە ژێر کۆنترۆلی تورکیا و گروپە چەکدارەکانی سوریادایە و لە ژێر ھەژموونی روسیادایە. ئەم جموجۆڵە سەربازییەش دوای لێدوانەکانی رەجەب تەیب ئەردۆغان سەرۆک کۆماری تورکیا دێت کە وتبووی، بەم نزیکانە ئەڵقەکانی پشتێنەی ئەمنی یەک دەخەن بۆ پاککردنەوەی ناوچەکانی ژێر دەستی ھەسەدە.