هەواڵەکان
رێککەوتننامەی هاوبەشی نێوان بەریتانیا و فەڕەنسا بۆ گەڕاندنەوە و ئاڵوگۆڕی کۆچبەرانی گەروی مانش گەیشتە وێستگەی کۆتایی و نوێ نەکراوەتەوە.
وەزارەتی ناوخۆی بەریتانیا رایگەیاند: پڕۆسەکە لەمەودوا کەیسی نوێ وەرناگرێت، بەڵام گەشتە ئاسمانییەکان بۆ گەڕاندنەوەی ئەو کۆچبەرانەی پێشتر ناویان تۆمارکراوە، بۆ چەند هەفتەیەکی تر بەردەوام دەبن.
ئەم رێککەوتنە لە تەممووزی 2025 لەسەر بنەمای «یەک بەرانبەر یەک» ئیمزا کرابوو؛ بەپێی رێککەوتنەکە، بەریتانیا ئەو پەنابەرانەی بە بەلەمی بچووک دەپەڕینەوە رەوانەی فەڕەنسا دەکردەوە، لە بەرانبەردا هەمان ژمارە لەو پەنابەرانەی لە فەڕەنسا داواکارییەکەیان پەسەند کرابوو، وەردەگرت.
بڕیاربوو پەیماننامەکە لە نیسانی 2026 بەسەرپچێت، بەڵام تا 1ی تشرینی یەکەم درێژکرایەوە. وەزارەتی ناوخۆی فەڕەنساش پشتڕاستی کردەوە کە ئێستا لەگەڵ لەندەن لە دانوستاندندان بۆ دیاریکردنی مەرجەکانی کۆتاییهێنان بەم بەرنامەیە.
کۆتاییهاتنی رێککەوتنەکە لە کاتێکدایە کە لە ساڵی 2026دا ژمارەی پەڕینەوەی نایاسایی بە بەلەمی بچووک زیاتر لە 40٪ کەمی کردووە. لەگەڵ ئەوەشدا، بەپێی راپۆرتێکی ئاژانسی "Ipsos"، بابەتی کۆچبەری هێشتا لە سەرووی نیگەرانییەکانی هاووڵاتیانی بەریتانیادایە و 44٪ی خەڵک وەک کێشەی سەرەکیی وڵاتەکەیان دەیناسێنن.
بەهۆی بەشداریكردنیان لە كۆنگرەی حزبێكی تردا، جەهەپە پێنج سەرۆك شارەوانیی ئیستەنبوڵ و ئەنتاڵیا لە ریزەكانی حزبەكەی دەردەكات.
میدیاكانی توركیا بڵاویانكردەوە، بە تۆمەتی بەشداریكردن لە كۆنگرەی پارتی نوێی توركیا-یێنی پارتی، ئەنجومەنی بەڕێوەبردنی ناوەندیی پارتی گەلی كۆماری-جەهەپە بڕیاریداوە، پێنج سەرۆك شارەوانی لە پارێزگاكانی ئیستەنبوڵ و ئەنتاڵیا رەوانەی لیژنەی دیسپلین بكات بە مەبەستی دەركردنیان لە ریزەكانی حزبەكە.
بەپێی زانیارییەكانی ئەو میدیایانە، ئەو سەرۆك شارەوانیانەی ئیستەنبوڵ كە دەركراون بریتیین لە سەرۆكی شارەوانییەكانی كادیكۆی، سانجاكتێپێ، ساریەر، كۆنیاڵتی و ئالانیا.
ئاماژە بەوەشكراوە، ئەو كارەی ئەو پێنج سەرۆك شارەوانیەی جەهەپە ، پێچەوانەی پەیڕەوی ناوخۆی حزبەكەیان بووە.
وەزارەتی کارەبای هەرێم، رایگەیاند کۆمپانیای دانا غاز پرۆسەی چاکسازی لە کێڵگەی کۆرمۆر دەستپیدەکات و بۆ ماوەی یەک مانگ چەند سەعاتێک پێدانی کارەبا بە هاوبەشان کەمدەبێتەوە.
وەزارەتی کارەبای هەرێم راگەیەندراوێکی بڵاوکردوەتەوە و تێیدا هاتووە؛ هاوبەشانی كارەبا ئاگادار دەكاتەوە بۆ ماوەی یەک مانگ و لە رۆژیی 2ـی10 تا 2ـی 11 چەند سەعاتێک پێدانی کارەبا کەمدەبێتەوە.
وەزارەتی کارەبا دەڵێت؛ هۆکاری کەمبونەوەی کارەبا دەستپێکردنی پرۆسەی چاکسازییە لە كێڵگەی كۆرمۆر لەلایەن کۆمپانیای دانا غازەوە.
ئاماژە بەوەکراوە، وەزارەتی كارەبا و وەزارەتی سامانە سروشتییەكان هەماهەنگ دەبن بۆ ئەوەی پرۆسەكە كەمترین كاریگەریی لەسەر پێدانی سەحاتەکانی كارەبا هەبێت لەناو پرۆژەی روناکی.
وەزارەتی کارەبا ئاماژەی بەوەشکردوە، ساڵانە پرۆسەی چاكسازیكردن لە كێڵگەی كۆڕمۆر لەم کاتەدا ئەنجام دەدرێت، چونکە پلەكانی گەرما نزمدەبنەوە و بۆ و كەمترین كاریگەریی لەسەر پێدانی کارەبا دەبێت.
فراکسیۆنی یەکێتیی نیشتمانیی کوردستان لە بەغداد لە رۆژی سەروەریی عیراقدا راگەیەندراوێکی بڵاوکردەوە و تێیدا هاتووە؛ جەخت لەسەر سەربەخۆیی عیراق و مافی بریاردانی دەکەینەوە
فراکسیۆنی یەکێتیی نیشتمانیی کوردستان ئاماژەی بەوەکردوە، تەواوبوونی سەروەری و پاراستنی پێویستی بە کارێکی جدییە بۆ کۆنترۆڵکردنی چەک لە دەستی دەوڵەتدا و تەنها دەوڵەت خاوەنی بڕیاری جەنگ و ئاشتی بێت.
دەقی راگەیەندراوەکەی فراکسیۆنی یەکێتیی نیشتمانیی کوردستان لە بەغداد
فراکسیۆنی یەکێتیی نیشتمانیی کوردستان جەخت لەسەر سەربەخۆیی عێراق و مافی بریاردانی دەکاتەوە کە لە ئیرادەی گەلەکەیەوە سەرچاوە بگرێت؛ چونکە سەروەری گوزارشتە لە ناسنامەی دەوڵەت، هاوکات لەگەڵ تەواوبوونی کشانەوەی هێزەکانی هاوپەیمانیی نێودەوڵەتی بۆ ئەوەی هێزە ئەمنییەکانی عێراق بە هەموو جۆرەکانیەوە بەرپرسیارێتیی پاراستنی ئاسایش و سەروەریی وڵات بگرنە ئەستۆ. تەواوبوونی سەروەری و پاراستنی پێویستی بە کارێکی جدییە بۆ کۆنترۆڵکردنی چەک لە دەستی دەوڵەتدا و تەنها دەوڵەت خاوەنی بڕیاری جەنگ و ئاشتی بێت، سەرباری سەروەریی یاسا و سەربەخۆیی دارایی و ئابووری و هەمەجۆرکردنی سەرچاوەکانی داهات لەگەڵ دەستەبەرکردنی یەکسانی و دادپەروەریی ڕاستەقینە بۆ سەرجەم هاووڵاتییان؛ تاوەکو ئەو ڕێڕەوە درێژەی گەلەکەمان تەواو بێت کە تێیدا قوربانیی بەخشیوە و دەستکەوت و سەرکەوتنی بەدەستهێناوە، ئەویش پێویست دەکات هەموومان کار بکەین بۆ پاراستنیان و هەوڵدان بۆ گەڕاندنەوەی متمانەی کۆمەڵگەی نێودەوڵەتی بە عێراق تاوەکو هەنگاو بنێین بەرەو قۆناغێکی نوێ بۆ ئاوەدانکردنەوەی نیشتمان و گەشەپێدانی گشت سێکتەرەکان.
لە هەمان کاتدا پشتیوانی و پشتگیریی خۆمان بۆ بەڕێز سەرۆک وەزیران و کابینەی وزاریەکەی و هەوڵەکانی لەم بوارەدا ڕادەگەیەنین لە پێناو تەواوکردنی سەروەری و سەپاندنی سەروەری یاسا و بنبڕکردنی گەندەڵی.
هەروەها، هەوڵەکانی هێزەکانی هاوپەیمانیی نێودەوڵەتی و هێزە ئەمنییە قارەمانەکانمان و هێزەکانی پێشمەرگە و حەشدی شەعبی بەرز دەنرخێنین لە کاتی ڕوبەروبونەوەی بەرامبەر باندە تیرۆریستییەکان و پاککردنەوەی عێراق لە تاریکپەرستان.
گەرمترین پیرۆزبایی ئاراستەی ڕۆڵەکانی گەلەکەمان دەکەین و بەوپەڕی ڕێز و نەوازشەوە لە ئاست گیانی پاکی شەهیدانمان دەوەستین کە هەموو شتێکی خۆیان بەخشی لە پێناو پاراستنی عێراق و گەلەکەیدا.
فراکسیۆنی یەکێتیی نیشتمانیی کوردستان
١ی تشرینی یەکەمی ٢٠٢٦
کەشناسیی هەرێم رایگەیاند، کەشوهەوا ناجێگیر دەبێت و لە چەند ناوچەيەک باران دەبارێت و هەورەبروسکەشی لەگەڵ دەبێت.
بەڕێوەبەرایەتی گشتیی کەشناسیی و بومەلەرزەزانی هەرێم پێشبینی 48 سەعاتی داهاتوی بۆ کەشوهەوا بڵاوکردوەتەوە، بە گوێرەی پێشبینییەکانیش نمەباران و بارانی مامناوەند بە شێوازی پچڕ پچر لە چەند ناوچەیەکی هەرێم دەبارێن، بە تایبەت لە ناوچە شاخاوییەکان.
کەشناسیی هەرێم ئاماژەی بەوەکردوە بەهۆی هاتنی نزمە پاڵە پەستۆی دەریای ناوەراست کەش وهەوا بە گشتی ناجێگیر دەبێت و لە هەندێک ناوچە هەورە بروسکەش رودەدات.
لەبارەی کەشی سبەینێوە، کەشناسی دەڵێت؛ پلەکانی گەرما یەک بۆ دوو پلە بەراورد بە ئەمرۆ نزمدەبنەوە و بارانبارین بە شێوازی پچڕ پچڕ بەردەوام دەبێت.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەمشێوەیە دەبێت؛
هەولێر: 29 پلەی سیلیزی
سلێمانی: 28 پلەی سیلیزی
دهۆک: 28 پلەی سیلیزی
هەڵەبجە:29 پلەی سیلیزی
سۆران : 27 پلەی سیلیزی
پیرمام: 24 پلەی سیلیزی
چەمچەماڵ: 29 پلەی سیلیزی
زاخۆ: 29 پلەی سیلیزی
ئاکرێ: 27 پلەی سیلیزی
گەرمیان: 33 پلەی سیلیزی
حاجی ئۆمەران: 20 پلەی سیلیزی
سوپای ئیسرائیل رایگەیاند لە مانگی رابردودا، هێزی ئاسمانیی وڵاتەکەیان بە هەماهەنگی لەگەڵ فەرماندەییەکانی سوپا زیاتر لە 500 ئامانجیان لە باشوری لوبنان و کەرتی غەززە کردوەتە ئامانج.
بەگوێرەی راگەیەندراوێکی سوپای ئیسرائیل، زیاتر لە 370 ئامانجی سەر بە حزبوڵا لە باشوری لوبنان و زیاتر لە 140 ئامانجیش لە کەرتی غەززە بۆردومان کراون.
سوپای ئیسرائیل دەڵێت؛ لە بۆردومانەکاندا، سێ فەرماندەی حەماس، ئەو کەسانەی لە هێرشەکەی حەوتی ئۆکتۆبەردا بەشداربوون و بارمتەیان رفاندوە، لەگەڵ چەندین کۆگای چەک و تەقەمەنی هەبوون.
جەختیشیان کردوەتەوە، هێزی ئاسمانیی لە تەواوی بەرەکانی جەنگدا بەردەوام دەبێت لە ئەنجامدانی ئۆپراسیۆنی هێرشبەری و بەرگری بۆ لەناوبردنی هەڕەشەکان و پشتیوانیکردنی هێزە مەیدانییەکانیان.
1ـی ئۆکتۆبەر لە جیهاندا وەك رۆژی جیهانی قاوە دەستنیشان كراوە و مێژووی ئەو دیاریكردنەش بە شێوەی رەسمی بۆ ساڵی 2015 دەگەڕێتەوە و کوردستانیش بێ بەش نییە لە خواست لەسەر قاوە و مێژویەکی دورودرێژی لەگەڵ ئەو خواردنەوەدا هەیە.
ریکخراوی جیهانیی قاوە، لە ساڵی 2015 و لە ئیتاڵیا رۆژی یەکی ئۆکتۆبەری هەموو ساڵێکی وەک رۆژی جیهانیی قاوە دیاری کردوە لە جیهاندا.
قاوە یەکێکە لەو خواردنەوانەی لە جیهاندا خواستێکی زۆری لەسەرە و بەهۆی گونجاوی کەشوهەواکەیەوە، بەڕازیل خاوەنی گەورەترین كێڵگەی بەرهەمهێنانی ئەو خواردنەوەیەیە.
کوردستانیش بێبەش نییە لە خواستی خۆر لەسەر قاوە و بە گوێرەی زانیارییەکان، لە سەدەی 18 و 19 دا، لە ناوچە شاخاوییەکانی باکوری کوردستان قەزوان کۆدەکرایەوە و دەکرا بە جۆرە خواردنەوەیەکی گەرم، کە سەرەتا تەنیا تایبەت بوو بە دانیشتوانی ناوچەکە، بەڵام دواتر پەرەیسەند وهەناردەی فەڕەنسا و وڵاتانی ئەوروپا کرا و بە قاوەی کوردی ناسرا.
ئەوەی قاوەی کوردی لە جۆرەکانی تری جیادەکاتەوە، ئەوەیە کافاینی تێدا نییە، لە رابردودا پێکهاتەی سەرەکیی ئەم خواردنەوەیە بریتی بوو لە قەزوان و فستق و چەند جۆرێک لە میوە، کە لە چیاکانی دەوروبەری ئامەد، مێردین، باتمان و سەمسوور کۆدەکرانەوە و دوای برژاندنیان، لەگەڵ شیر و شەکر تێکەڵدەکران و بەگەرمی پێشکەشدەکرا، بەڵام دواتر قاوەش بۆ پێکهاتەی ئەم خواردنەوەیە زیادکرا و لە ئێستاشدا، لە براندە نوێیەکاندا قاوە بەشێکە لە پێکهاتەکەی.
عەلی زەیدی، سەرۆک وەزیرانی عیراق راگەیەندراوێکی بڵاوکردەوە و دەڵێت؛ کاردەکەن بۆ داماڵینی چەک لەو گروپانەی عیراقی نین و لە خاکی عیراقدا نیشتەجێن، بەڵێنی کڕینی سیستمی بەرگرییش دەدات.
عەلی زەیدی پیرۆزبایی ئەم رۆژە لە گەلی عیراق دەکات وجێهێشتنی هێزەکاای هاوپەیمانی بە دەستکەوتێکی گەورەی نیشتیمانی وێناکردوە.
ئاماژەی بەوەشکردوە، رۆژی 1ـی ئۆکتۆبەر دەستپێکێکی نوێ و جدییە بۆ چارەسەرکردنی پرسی چەک لە دەرەوەی کۆنتڕۆڵی دەوڵەت.
لە بەشێکی راگەیەندراوەکەدا هاتووە؛ حکومەت بە پشتیوانی خودا و بەگوێرەی دەستور کار بۆ داماڵینی تەواوەتی چەکداماڵینی سەرجەم ئەو گروپە چەکدارانە دەکات، کە هێندراونەتە عیراق و لەسەر خاکی عیراق ئامادەن، بەمەش ئاسایش و سەقامگیری وڵاتەکە دەپارێزێت و سنورەکانیش مسۆگەر دەکرێت.
هەروەها جەختیشیکردوەتەوە، حکومەتی عیراق پابەندبونی دەستوری خۆی دوپات دەکاتەوە بۆ رێگریکردن لە بەکارهێنانی خاک و ئاسمانیی وڵاتەکەی بۆ هەر کارێک، کە هەڕەشە لە ئاسایشی وڵاتانی دراوسێ بکات.
عەلی زەیدی ئەوەشیخستوەتەڕوو، بۆ بەهێزکردنی توانا سەربازییەکان، هەوڵدەدەن بە کڕینی سیستمی بەرگریی ئاسمانی، پاڵپشتی دامەزراەوە ئەمنییەکان بکەن بۆ بەهێزکردنی سەروەری تەواوی عیراق.
وەزیری ئابوری ئێران وەڵامی وەزیری گەنجینەی ئەمریکا دەداتەوە و دەڵێت؛ ساڵانێکە خەیاڵی ئەوە دەکەن ئابوریی ئێران دەروخێت و خەیاڵیان خاوە، ئاماژەی بەوەشکردوە قەرەبوی زیانلێکەوتوەکانی جەنگیان کردوەتەوە.
عەلی مەدەنی زادە، وەزیری کاروباری ئابووری و دارایی ئێران، لە وەڵامی لێدوانەکانی سکۆت بێسێنت، وەزیری گەنجینەی ئەمریکا سەبارەت بە رەوشی ئابوریی ئێران رایگەیاند، ساڵانێکی زۆرە دەوترێت دوو هەفتەی تر یان مانگێکی تر ئابوریی ئێران تیادەچێت و توشی داڕمان دەبێت، بەڵام بێگومان ڕوداوێکی لەو شێوەیە رونادات
ناوبراو ئاماژەی بەوەکردوە، ئامانج لەم جۆرە لێدوانانە دروستکردنی نائارامی و سترێسە لە نێو خەڵکدا، تاوەکو روبکەنە بازاڕی دراو و بەوەش نرخی دۆلار بەرزببێتەوە، بەڵام رێگە بەوە نادەن.
سەبارەت بە زیانەکانی شەڕیش، مەدنی‌زادە ئاشکرای کردوە، لە کۆی نزیکەی 78 هەزار ملیار تۆمان زیانی خەمڵێندراو بۆ یەکە بچوک و ناوەندییەکان، تا ئێستا نزیکەی 45 هەزار ملیار تمەن دراوەتەوە بە زیانلێکەوتوان.
هەروەها ئاماژەی بەوەش کرد کە زیاتر لە 50 هەزار ملیار تمەن وەک زیانی راستەوخۆی دڵنیایی (بیمە) و زیاتر لە 80 ملیۆن دۆلاریش وەک زیانی پەیوەندیدار بە کەشتی و فڕۆکەکان کۆمەکی دارایی کراون و دراونەتەوە.
ئەم قسانەی وەزیرەکەی ئێران لە کاتێکدایە، لە ئێستدا سەرەرای قەیرانی ئابوری و گرانی شتومەک لە ئێراندا، بەهای دراوی وڵاتەکە لە نزمترین ئاستی مێژویی خۆیدایە و بەهای یەک دۆلاری ئەمریکی بەرانبەرە بە 250 هەزار تمەن.
میدیایەکی ئەمریکی بڵاویکردوەتەوە، دوای ئەوەی لە گفتوگۆكانیاندا نەگەشتونەتە ئەنجام، وەزیری دەرەوەی ئەمریكا بە وەفدی ئێرانی راگەیاندوە، دەستبەجێ خاكی ئەمریكا جێبهێڵن، لایەنی ئێرانیش ئەم هەواڵە رەت دەکاتەوە
پێگەی ئەکسیۆسی ئەمریکی ئاشکرای کردوە، دوای نەگەشتنە ئەنجام لە دانوستانەکانی نێوانیان لە رۆژی دووشيممەی رابردوو، مارکۆ رۆبیوە، وەزیری دەرەوەی ئەمریکا دەستەبەجی فەرمانی دەرکردوە وەفدی ئێران خاکی ئەمریکا جێبهێڵن.
بە گوێرەی زانیارییەکانی ئەکسیۆس، دوای چەند سەعاتێک وەفدەکەی ئێران ئەمریکایان بەرە و قەتەر جێهێشتوە.
ئەمەش لە کاتێکدایە، دوای بڵاوبونەوەی ئەم هەواڵەی ئەکسیۆس، لایەنی ئێرانی رەتیدەکاتەوە و ئاماژەیان بەوەکردوە، وەفدەکەی ئێران بە سەرۆکایەتی عەباس عراقچی پێشتر لە پلانیدا بووە رۆژی دووشەممە، ئەمریکا جێبهێڵن.
قوباد تاڵەبانی داوا دەكات هاوكارییەكانی كۆریای باشور لە هەرێم تەنها بۆ شارە گەورەكان نەبێت، بەڵكو قەزا و ناحییەكانیش بگرێتەوە.
قوباد تاڵەبانی جێگری سەرۆك وەزیرانی هەرێم لە هەولێر پێشوازیكرد لە گیۆ شیم كونسوڵی نوێی كۆریای باشوور لە هەرێم و ئامادەیی دەربڕی بۆ هەموو جۆرە هاوكاریی و هەماهەنگییەك بە مەبەستی پتەوكردنی پەیوەندییەكانی نێوان هەرێمی كوردستان و كۆریای باشوور، داواشیكرد، هاوكارییەكانی كۆریای باشور تەنها بۆ شارە گەورەكان نەبێت، بەڵكو قەزا و ناحییەكانیش بگرێتەوە، بە تایبەتی لە چوارچێوەی پرۆژەی گەشەپێدانی ناوچەییدا هاوكاری دەزگای پەرەپێدانی راپەڕین بكرێت.
لە بەشێكی تری كۆبوونەوەكەدا، قوباد تاڵەبانی داوایكرد حكومەتی كۆریای باشور لە راهێنان و گواستنەوەی شارەزایی و ئەزموندا هاوكاری دەزگای "هەب فاوندەیشن" بكات، خۆشحاڵیشی دەربڕی لە رێكخستنی فێستیڤاڵی كلتووریی كۆریا كە بڕیارە مانگی داهاتوو لە سلێمانی لەلایەن كونسوڵخانەی كۆریای باشورەوە بەڕێوەبچێت.
دۆناڵد ترەمپ، سەرۆکی ئەمریکا لە راگەیەنراوێکدا کۆتاییهاتنی تەواوەتیی ئەرکی هێزەکانی وڵاتەکەی لە عێراق راگەیاند و بە رۆژێکی مێژوویی و سەرکەوتنێکی گەورە بۆ ئەمریکا و عیراق وەسفی کرد.
ترەمپ ئاماژەی بەوەکرد، بەشداربوونی ئەمریکا لەم جەنگە درێژخایەنەدا سەرەتا بەهۆی بڕیاری هەڵەوە بووە، بەڵام ئێستا ئەو لاپەڕەیە دەبێتە بەشێک لە مێژوو. راشیگەیاند: "ئێمە لە کاتێکدا عیراق جێدەهێڵین کە سەرۆک وەزیرانێکی نوێ و نایابی هەیە کە ئەویش عەلی زەیدییە، کە لە سەرەتاوە پشتیوانیی تەواوم کردووە و توانیی سەرکەوتنێکی چاوەڕواننەکراو بەدەستبهێنێت."
سەرۆکی ئەمریکا وتیشی، ئێمە هاتین بۆ ئەوەی شەڕی خەلافەت بکەین، ئێستا خەلافەت نەماوە و کاتی ئەوەیە ئەمریکا بگەڕێتەوە ماڵەوە."
ترەمپ جەختی لەوەکردەوە، بەپێچەوانەی کشانەوە لە ئەفغانستان، چوونەدەرەوەی هێزەکان و ئامێرە سەربازییەکانی هاوپەیمانان لە بنکەی ئاسمانیی هەولێر بە رێکخراویی و بەبێ جێهێشتنی کەلوپەلی سەربازی ئەنجامدراوە، ئەمەش کۆتایی بە گەشتێکی زۆر گرانبەها هێنا.
لە کۆتاییدا، سەرۆکی ئەمریکا جەختی کردەوە، ئەرکێکی روونی بۆ فەرماندەکان دیاریکردبوو و رێگەی نەدا ئامادەییەکی کاتی ببێتە هەمیشەیی، بەوپێیەی کاتی ئەوە هاتبوو ئەمریکا لە عیراق بکشێتەوە و ئەرکی پاراستنی ئاسایش رادەستی سەرۆک وەزیرانی نوێ بکات.
لە رۆژی کۆتاییهاتنی ئەرکی سەربازیی هاوپەیمانان لە عیراق، سەرۆکی ئاژانسی پاراستن و زانیاری / زانیاری، رایدەگەیەنێت، باوەڕی تەواویان بە توانای دامەزراوە هەواڵگری و سەربازییەکانی هەرێم و عیراق هەیە بۆ پاراستنی سەروەریی نیشتمان.
جەلال شێخ ناجی، سەرۆکی ئاژانسی پاراستن و زانیاری / زانیاری راگەیەنراوێکی بڵاوکردەوە و رایگەیاند، بەڕێزەوە لە رۆڵی هێزەکانی هاوپەیمانان دەڕوانین لە پشتگیری و هاوکاریکردنی گەلی کورد و عیراق و دامودەزگا ئەمنی و سەربازییەکان و پێزانینمان هەیە بۆ قوربانییەکانیان.
سەرۆکی ئاژانسی پاراستن و زانیاری / زانیاری، جەختیشی لە تواناکانی هێزە ناوخۆییەکان کردەوە و ئاشکرایکرد، باوەڕمان بە توانای بەهێزی دامەزراوە هەواڵگری و سەربازییەکانی هەرێم و عیراق هەیە کە دەتوانن سەروەریی خاکەکەمان بپارێزن.
ئەوەشی خستەڕوو، لەم رۆژەدا جەخت لە پێویستیی هەماهەنگی و هاریکاریی بەردەوامی سەرجەم دامەزراوە هەواڵگری و سەربازییەکانی هەرێم و عیراق دەکەینەوە لەپێناو پاراستنی ئاسایشی نیشتمانیی وڵاتەکەمان.
لە رۆژی کۆتاییهاتنی ئەرکی سەربازیی هاوپەیمانی نێودەوڵەتی و کشانەوەی هێزەکانیان لە عیراق و هەرێمی کوردستان، قوباد تاڵەبانی پەیامێکی بڵاوکردەوە و تێیدا رایگەیاند، بە سوپاس و پێزانینەوە لە هەموو هاوکارییەکانی هاوپەیمانان دەڕوانین بۆ هێزەکانی پێشمەرگە و سوپای عیراق لە شەڕی بەرەنگاربوونەوەی تێرۆر و پاراستنی ئاسایش و سەقامگیری.
قوباد تاڵەبانی جێگری سەرۆک وەزیرانی هەرێم لە رۆژی کۆتاییهاتنی ئەرکی هاوپەیمانان و کشانەوەی هێزەکانیان لە عیراق و هەرێمی کوردستان پەیامێکی بڵاوکردەوە و رایگەیاند، بە سوپاس و پێزانینەوە لە هەموو هاوکارییەکانیان دەڕوانین بۆ هێزەکانی پێشمەرگە و سوپای عیراق لە شەڕی بەرەنگاربوونەوەی تیرۆر و پاراستنی ئاسایش و سەقامگیریی عیراق و کوردستان. هەروەها لەم رۆژەدا یادی هەموو شەهیدانی پێشمەرگە و سوپای عیراق و هاوپەیمانان دەکەینەوە و سڵاو بۆ گیانی پاکیان دەنێرین.
ئاشکراشیکرد، ئێمە لە هەرێمی کوردستان هاوکارییەکانی هاوپەیمانان لە سێ قۆناغی گرنگ و چارەنووسسازی وەک راگەیاندنی ناوچەی دژەفڕین لە ساڵی 1991 بە تایبەت لەلایەن ئەمریکا و بەریتانیا و فەرەنسا، روخاندنی رژێمی دیکتاتۆری بەعس لە ساڵی 2003 و شەڕی تیرۆریستانی داعش لە دوای ساڵی 2014 هەرگیز لەبیر ناکەین.
ئاماژەی بەوەشکرد، لە ئێستاشدا کشانەوەی هاوپەیمانان و گەڕانەوەی سەروەریی تەواو بۆ عیراق ساتەوەختێکی مێژوویی گرنگە بۆ عیراق و هەرێمی کوردستان و هەردوو حکومەتی فیدراڵ و هەرێم و هەموو هێزە سیاسییەکانی عیراق و کوردستان و هەموومان لەبەردەم بەرپرسیارێتیی گەورەداین، پێویستە بۆ هاووڵاتییانی عیراق و بۆ کۆمەڵگای نێودەوڵەتیشی بسەلمێنین کە دەتوانین پارێزگاری لە سەروەریی و ئاسایش و سەقامگیری وڵاتەکەمان بکەین، ئەم ئەرکەش بەبێ هاوکاری و پێکەوەکارکردن لەپێناو بەرژەوەندیی گشتی و بەبێ جێبەجێکردنی تەواوەتی دەستور بەدی نایەت.
قوباد تاڵەبانی راشیگەیاند، وەک هێزە سیاسییەکانی کوردستانیش لەبەردەم بەرپرسیارێتییەکی مێژووییداین، ئەرکە لەسەرمان بە یەکڕیزی و هاوبیری کاربکەین بۆ بەهێزکردنی دامەزراوە شەرعییەکان و هەنگاونان بەرەو حکومڕانییەکی باشتر و خزمەتگوزار و دادپەروەر، چونکە دواجار دەستکەوتە مێژووییەکانی گەلەکەمان تەنها بە پشتیوانی و بە متمانەی هاوڵاتییانمان دەپارێزرێت.
جێگری سەرۆک وەزیرانی هەرێم ئەوەشی خستەڕوو، لە کۆتاییدا هاووڵاتییانی خۆمان دڵنیا دەکەینەوە، هاوکاری و هەماهەنگییەکی زۆرباش هەیە لەنێوان هەردوو حکومەتی فیدراڵ و هەرێم، هێزی پێشمەرگەی کوردستانیش لەوپەڕی ئامادەیی خۆیدایە و وەک هەمیشە ئامادەیە بۆ پاراستنی خاکی کوردستان و سەروماڵی هاووڵاتییان لە هەرچەشنە هەڕەشە و مەترسییەک گیانفیدایی بکات.
پۆلیسی سلێمانی رایدەگەیەنێت، مەفرەزەکانی نوسینگەی نەهێشتنی تاوانی ناوبازاڕ تۆمەتبارێکیان دەستگیرکرد کە بڕی پێنج دەفتەر دۆلاری لە هاووڵاتییەک بردووە.
بەپێی راگەیەندراوێکی بەڕێوەبەرایەتی پۆلیسی پارێزگای سلێمانی، روداوەکە دوای ئەوە هاتووە، کە هاووڵاتییەک لە دەستشۆر و شوێنی نوێژی یەکێک لە مزگەوتەکانی ناوبازاڕی سلێمانی بڕی (پێنج دەفتەر دۆلار)ـی بیرچووە و بەجێی هێشتووە، بەڵام دوای گەڕانەوەی بۆ شوێنەکە پارەکەی دیارنەماوە.
ئاماژە بەوەشکراوە، دوای ئاگادارکردنەوەی نوسینگەی نەهێشتنی تاوانی ناوبازاڕ، لێکۆڵینەوەکان دەستیان پێکرد و بە سوودوەرگرتن لە کامێراکانی چاودێری و بە بڕیاری دادوەر، توانرا تۆمەتبارێک دەستگیر بکرێت و بڕی 40 هەزار دۆلار (چوار دەفتەر دۆلار) لە پارەکە بدۆزرێتەوە و بگەڕێنرێتەوە بۆ خاوەنەکەی.
پۆلیسی سلێمانی ئاشکراشیکرد، لە ئێستادا تۆمەتبارەکە بە بڕیاری دادوەر و بەپێی (ماددەی 446) لە یاسای سزادانی عیراقی راگیراوە و لێکۆڵینەوەکان لەگەڵیدا بەردەوامن.
دوای چەند سەعاتێک لە روداوەکەی ئاسمانی ناوچەکە، ئیسرائیل روداوی فڕۆکەی کۆمپانیای 'فلای دوبەی' لە گەشتی FZ1073 لە دوبەیەوە بەرەو تەلئەبیب بە "هەوڵێکی تێرۆریستی" وەسف کرد، لە کاتێکدا کۆمپانیاکە جەخت دەکاتەوە کە هێشتا زووە بۆ دیاریکردنی هۆکار و پاڵنەرەکانی دروستبوونی ئەو روداوە.
بنیامین ناتانیاهۆ، سەرۆک وەزیرانی ئیسرائیل رایگەیاند، پەیوەندی بە یەکێک لە سەرنشینەکانەوە کردووە و پێی راگەیاندووە بە هاوکاریی ئەندامێکی تیمی فڕۆکەکە توانینیان بچنە ناو کابینەی فڕۆکەوانەکە و دەستبەسەر ئەو فڕۆکەوانەدا بگرن کە هەوڵی تێکدانی سیستمی فڕۆکەکەی دابوو، ناتانیاهۆ ئاماژەی بەوەشکرد سەرجەم سەرنشینەکان لە مەترسی دەرچوون و فڕۆکەوانە هێرشبەرەکە دەستگیرکراوە.
لە لایەکی ترەوە، یسرائیل کاتز، وەزیری بەرگریی ئیسرائیل ئاشکرایکرد، زانیارییە سەرەتایییەکان ئاماژە بەوە دەکەن کە ئامانجی هێرشبەرەکە خستنەخوارەوەی فڕۆکەکە بووە بە سەرجەم سەرنشینەکانییەوە، بێجگە لەوەی کارەکە بە هەوڵێکی تێرۆریستی ناوبرد.
لە بەرانبەردا، کۆمپانیای 'فلای دوبەی' لە راگەیەنراوێکدا ئاماژەی بەوەکرد، "دەمەقاڵێ" لە ناو شوێنی فڕۆکەوانەکاندا روی داوە، بەڵام تیمی فڕۆکەکە توانیویانە ئاسایشی فڕۆکەکە بپارێزن و ئاڕاستەکەی بگۆڕن بۆ فڕۆکەخانەی تەبوک لە سعودیە و بە سەلامەتی بنیشێتەوە.
کۆمپانیاکە جەختیشی کردەوە، سەرجەم سەرنشینەکان و تیمی فڕۆکەکە سەلامەتن و هاوکاریی تەواوی لێکۆڵینەوە فەرمییەکان دەکەن بۆ ئاشکراکردنی تەواوی وردەکارییەکانی ڕووداوەکە.
هاوکات، لێپرسراوانی فڕۆکەخانەی تەبوک رایانگەیاند، لە سەعات 8:44ـی بەیانییەوە داوای فریاگوزارییان لە فڕۆکەکەوە پێگەیشتووە و دەستبەجێ رێکارەکانی باری لەناکاویان گرتبووە بەر بۆ دڵنیاوبوونەوە لە سەلامەتیی سەرنشینان.