هەواڵەکان
جەی دی ڤانس، جێگری سەرۆکی ئەمریکا رایگەیاند، دانوستانەکان لەگەڵ ئێران لە ئاڕاستەیەکی زۆر باشدا بەڕێوەدەچن و ئیدارەی واشنتۆن دەیەوێت دەرفەتێکی راستەقینە بدات بۆ سەرکەوتنی پڕۆسەی گفتوگۆکان.
ڤانس ئاماژەی بەوە کرد، رێنماییەکانی سەرۆکی ئەمریکا رونن بۆ پێشڕەویکردن بەرەو ئیمزاکردنی رێککەوتنێک و دانوستانکردن بە نیازپاکی و لە ئێستاشدا وەفدە تەکنیکییەکان لە دەوحەی پایتەختی قەتەر لەگەڵ ئێرانییەکان و لایەنەکانی تر کۆدەبنەوە بۆ تاوتێکردنی وردەکارییەکان و پرسی ئاسایشی هێڵەکانی دەریاوانی.
جێگری سەرۆکی ئەمریکا جەختی لەوەش کردەوە، ئامانجێکیان دەستنیشانکردووە و هەنگاوی زیاتریش بەستراوەتەوە بە هەڵوێستی ئێرانییەوەکان.
ناوبراو ئەوەشیخستوەتەڕوو، هەست بە گۆڕانکاری دەکەن لە دەسەڵاتدارانی ئێراندا و بەشێکی زۆریان دەیانەوێت لاپەڕيیەکی نوێ هەڵدەنەوە و درک بە پێویستی گۆڕینی پەیوەندییەکانیان لەگەڵ ئەمریکادا دەکەن.
جەی دی ڤانس نیگەرانی وڵاتەکەشی لەبارەی مەلەفی ئەتۆمییەوە نەشاردەوە و رایگەیاند، لە قۆناغەکانی داهاتوودا گفتوگۆ لەسەر ئەو بابەتە دەستپێدەکەن، بەڵام هۆشداریشی دا، ئەگەر ئێران هەوڵی سەرلەنوێ بنیادنانەوەی بەرنامە ئەتۆمییەکەی بدات یان دەستبکاتەوە بە بەئامانجگرتنی کەشتییەکان، ئەوا هاوکێشە و حیساباتەکانی واشنتۆن بە تەواوی دەگۆڕێن.
ئاژانسی رۆیتەرز رایگەیاند، تاران سوورە لەسەر سەپاندنی دەسەڵاتی تەواوتی خۆی بەسەر گەروی هورموزدا و دەیەوێت باج لەو کەشتییانە وەربگرێت کە دەچنە ناو ناوچەی کەنداو یان لێی دەردهچن، تەنانەت ئەگەر بۆ ئەمەش ناچار بێت، پەنا بۆ بەکارهێنانی هێزی سەربازی ببات.
ئاژانسی رۆیتەرز لە زاری دوو سەرچاوەی باڵای ئێرانییەوە ئاشکرایکرد، بەپێی رێککەوتنی نێوان ئەمریکا و ئێران، تاران رازی بووە بۆ ماوەی 60 رۆژ رێگە بە تێپەڕبوونی کەشتییەکان بدات، بەڵام بەرپرسانی ئێران پێیان وایە بەپێی رێککەوتنەکە رێگەیان پێدەدرێت کۆنتڕۆڵی هێڵەکانی هاتوچۆ و جۆری ئەو کەشتییانە بکەن کە تێپەڕ دەبن.
ئاماژەی بەوەشدا، ئەگەر رێککەوتنەکە درێژ نەکرێتەوە، تاران لە ناوەڕاستی مانگی ئابەوە دەستدەکات بە وەرگرتنی باج لە کەشتییەکان، تەنانەت ئەگەر بۆ ئەمەش ناچار بێت پەنا بۆ بەکارهێنانی هێزی سەربازیی ببات.
هاوکات دۆناڵد ترەمپ، سەرۆکی ئەمریکا و مارکۆ رۆبیۆ، وەزیری دەرەوە ئەم خواستەی ئێرانیان رەتکردووەتەوە و رایانگەیاندووە؛ رێگە بە هیچ وڵاتێک نادرێت باج یان سەرانە لە رێڕەوە نێودەوڵەتییەکاندا بسەپێنێت.
دوای دورخستنەوەی هەتاهەتایی د. عەبدولـلەتیف ئەحمەد لەلایەن وەزیری خوێندنی باڵای هەرێمەوە، پارێزەرانی د. عەبدولـلەتیف راگەیەندراوێکیان بڵاوکردوەتەوە و سزاکە رەتدەکەنەوە.
لە راگەیەندراوەکەدا هاتووە؛ لیژنەکە ستەمی زۆریان لە د. عەبدولـلەتیف کردوە و پێشێلکاری زۆری یاساییان بەرانبەر کردوە و لە رێگەی دادگاوە تانە لە بڕیارەکە دەدەن.
ئاماژەیان بەوەشکردوە، سکاڵا تۆمار دەکەن و بە هیچ شێوەیەک د. عەبدولـلەتیف سازش لە مافی خۆی ناکات و داوادەکەن دادگا شوێنی یەکلایکردنەوەی دۆسیەکەبێت.
دەقی راگەیەندراوەکە
بابەت/ڕوونکردنەوە
دەمانەوێت بۆ ڕای گشتی ڕوون بکەینەوە کە ئەو لیژنەی لێکۆڵینەوەیەی کە لەسەر بەڕێز دکتۆر(عبداللطیف احمد مصطفی)مامۆستایی زانکۆی سلێمانی پێکهێنراوە، پێشێلکاری یاسایی زۆریان بەرامبەر بەم کەیسە کردووە، بۆیە بەهەموو لایەکی ڕادەگەیەنین کە بەڕێز دکتۆر(عبداللطیف آحمد مصطفی)بە بڕوابونی تەواوی بەخۆیەوە ، تانە لەم بڕیارەی وەزیری خوێندنی باڵا دەدات سەبارەت بەسزادنی بە عزل کردنی لە وەزيفه،ئێمە ئەو بڕیارە بەنایاسایی دەزانین، وە گەورەترین ستەمە. وە بەڕێزیان هەرگیز دان نانێت بەو تۆمەتەی کە بۆی دروست کراوە ، وە ڕایدەگەیەنیین کە بەڕێزیان بەهیچ شێوەیەک تنازل لەمافی خۆی ناکەن لە پەنابردن بۆ دادگا، وە دادگا بەشوێنی یەکلایکردنەوی ئەم دۆسیەیە دەزانین و سکاڵاشمان کردووە ، بۆیە داواکارین لەسەرجەم کەناڵەکانی ڕاگەیاندن بە وردی و بابەتیانە لەم دۆسییە بڕوانن وە بڕیاری پێشوەختە لەم دۆسیەیەدا نەدەن بنەما لەسەر ڕیزگرتن لەیاسا، وەڕێگەبدەن دادگا ڕێڕەوی یاسایی خۆی وەربگرێت لەم بارەیەوە.
پارێزەران:
عطا عثمان حسين و ئارام رضا سعيد
بريكارى(عبدالطيف احمد مصطفى)
رۆژنامەی نیویۆرك تایمز ئاشكرای كرد، كە سوڵتانی عومان پێشنیازێكی رەسمیی پێشكەشی واشنتۆن كردووە تاوەكو رێگە بدرێت عومان و ئێران باج لەو كەشتییانە وەربگرن كە بە گەرووی هورمزدا تێپەڕ دەبن.
رۆژنامەی نیویۆرك تایمز بڵاویكردەوە، لێپرسراوانی ئەمریكا سەرقاڵی تاوتوێكردنی پێشنیازێكی عومانن بۆ وەرگرتنی باج لە گەرووی هورمز.
بەپێی راپۆرتەكە، سوڵتانی عومان پێشنیازێكی رەسمیی پێشكەشی واشنتۆن كردووە تاوەكو رێگە بدرێت عومان و ئێران باج لەو كەشتییانە وەربگرن كە بەو رێڕەوەدا تێپەڕ دەبن.
سەرچاوە دیپلۆماسییەكان ئاماژەیان بەوە كردووە واشنتۆن نیگەرانە لە پێشنیازەكە، چونكە تاران دەیەوێت وەرگرتنی باج لەو كەشتیانەی لە گەروی هورمزەوە تێدەپەڕن جێگیر بكات.
پڕۆژەی "زانکۆی سەوز "(Green University)، کە پڕۆژەیەکی پێشەنگ و داهێنەرانەیە بۆ پەرەپێدانی ژینگەیی و زانستی لە هەرێمی کوردستان، بە چاودێری قوباد تاڵەبانی جێبەجێ دەکرێت.
ژوان سابیر، سەرۆکی دەستەی گەشتوگوزاری هەرێم رایگەیاندووە: خۆشحاڵ بووم بە کۆبوونەوە و ئەنجامدانی گفتوگۆیەکی بەپێز لەگەڵ دکتۆر محەمەد حەسیب، سەرۆکی زانکۆی کۆیە سەبارەت بە هێڵە گشتییەکانی پڕۆژەی "زانکۆی سەوز" (Green University)، کە پڕۆژەیەکی پێشەنگ و داهێنەرانەیە بۆ پەرەپێدانی ژینگەیی و زانستی لە هەرێمی کوردستان.
سەرۆکی دەستەی گەشتوگوزار ئاماژەی بەوەشداوە: ئەم پڕۆژە نیشتیمانییە گرنگە لە ژێر چاودێریی راستەوخۆی قوباد تاڵەبانی، جێگری سەرۆکی حکومەتی هەرێمی کوردستان ئەنجام دەدرێت، ئەمەش نیشانەی بایەخدانی قووڵی سەرکردایەتی سیاسییە بە چەسپاندنی بنەماکانی گەشەپێدانی بەردەوام و پاراستنی ژینگە لە پاڵ بەرزکردنەوەی ئاستی ئەکادیمی و کلتوریدا.
ژوان سابیر دەشڵێت: لە میانی دیدارەکەماندا، جەختمان لەسەر گرنگیی ڕەنگدانەوەی ئەم پرۆژە کرد لەسەر کەرتی گەشتیاریی کلتوری و زانستی، وەک قۆناغی دووەمی پرۆژەکە کار لەسەر گەشتیاری پەروەردەیی سەوز (Green Educational Tourism)دەکرێت، بە شێوازێک کە هاوتەریب بێت لەگەڵ دیدگای نوێی ئێمە بۆ پێشاندانی ناسنامەیەکی مۆدێرن و ژینگەدۆست بۆ هەرێمی کوردستان.
وەزارەتی خوێندنی باڵای حکومەتی هەرێم بڕیاریدا بە دوورخستنەوەی د. عەبدولـلەتیف ئەحمەد.
بەپێی زانیاریی کوردسات نیوز: د. ئارام محەمەد، وەزیری خوێندی باڵای هەرێم، بڕیاریدا بە پەسەندکردنی راپۆرتی لیژنەکەی زانکۆی سلێمانی، کە (دورخستنەوەی هەتا هەتایی)ـیە بۆ د. عەبدولـلەتیف ئەحمەد.
نەتەوە یەكگرتووەكان هۆشداری دەدات لەداڕمانی تەواوەتی ئاژانسی ئۆنروا و دەڵێت: بۆ بەردەوامبوونی كارەكانی پێویستی بە 100 ملیۆن دۆلارە.
ئەنتۆنیۆ گۆتێرێس سكرتێری گشتیی نەتەوە یەكگرتووەكان، هۆشداری دەدات لە داڕمانی تەواوەتی دەزگای فریاگوزاری و كارەكانی نەتەوە یەكگرتووەكان بۆ ئاوارەكانی فەڵەستین ناسراو بە ئۆنروا و رایگەیاندووە، ئەو دامەزراوەیە كورتهێنانی دارایی بەبری 100 ملیۆن دۆلار هەیە.
كورتهێنانی بودجەی ئۆنروا دوای ئەوە دێت كە هەریەك لە ئەمریكا و سوید هاوكارییكردنی دامەزراوەكەیان راگرت.
گۆتێرێس داوا لە كۆمەڵگەی نێودەوڵەتی كرد ، بەپەلە هاوكاری دارایی پێشكەش بكەن، چونكە بەهۆی رێكارە توندەكانی ئیسرائیل و كەمبوونەوەی بودجە، چالاكییەكانی ئاژانسەكە بەرەو پەككەوتن دەچن.
گۆتێرێس دەشڵێت: ئۆنروا خزمەتگوزارییەكانی بە ڕێژەی 20٪ كەمكردووەتەوە ئەوەش دۆخی مرۆیی ناوچەكە خراپتر دەكات
سەرۆك وەزیرانی ئیسرائیل جەختدەكاتەوە لەوەی تا بە تەواوی حزبوڵا چەك دانەنێت، لە باشوری لوبنان ناكشێنەوە.
بنیامین ناتانیاهۆ سەرۆك وەزیرانی ئیسرائیل رایگەیاند، هێزەكانیان لە ناوچە سنورییەكانی باشوری لوبنان ناكشێنەوە تا حزبوڵا بە تەواوی چەك دانەنێت و دڵنیایی نەدرێت لەوەی چیتر نابێتە هەڕەشە بۆ سەر ئیسرائیل.
ناتانیاهۆ لە كاتی بەسەركردنەوەی هێزەكانی سوپادا، داوای لێكردوون بە تەواوی ژێرخانی حزبوڵا لەناوبەرن بەتایبەت تونێلەكان، وتوشییەتی، هیچ شتێك لە دوای خۆتان جێمەهێڵن.
سەرۆك وەزیرانی ئیسرائیل ئاماژەی بەوەشكردووە، حزبوڵا گرنگترین هاوپەیمانی ئێرانە و لە ئێستاشدا تەنیا 8٪ی جبەخانە موشەكییەكەی حزبوڵا ماوەتەوە، كە پێشتر نزیكەی 150 هەزار موشەك و هاوەن بووە.
لەلایەكی ترەوە، تەنها هەفتەیەك لەدوای رێككەوتنی ئیسرائیل و لوبنان، جارێكی تر سوپای ئیسرائیل هێرشی كردەوە سەر باشوری لوبنان و ژمارەیەك خانوویان تەقاندەوە.
وەزارەتی ناوخۆی بەریتانیا پەنابەران ناچار دەكات بڕی 10 هەزار پاوەند بۆ تێچووی نیشتەجێبوون و پشتگیرییە داراییەكانیان بدەن، و سەرپێچیكردنی بریارەكەش كاریگەری لەسەر مافی مانەوەیان دەبێت.
لە چوارچێوەی یاسای نوێی كۆچ و پەنابەریدا وەزارەتی ناوخۆی بەریتانیا رایگەیاند، بریاردراوە ئەو پەنابەرانەی مافی مانەوەیان پێدەدرێت 10 هەزار پاوەندیان لێوەربگیرێت لەبەرانبەر تێچووی نیشتەجێبوون و ئەو هاوكارییە داراییەی پێش وەرگرتنی مافی پەنابەری پێیاندراوە.
لە بڕیارەکەدا ئەوەش هاتووە، ئەو پەنابەرانەی مافی مانەوە و پاراستنیان پێدەدرێت هەر كاتێك توانای داراییان باشبێت دەبێت ئەو بڕە پارەیە بدەن.
هاوکات، شەبانە مەحموود وەزیری ناوخۆی بەریتانیا رایگەیاندووە، دەكرێت گۆرانكاری لەو بڕە پارەیەدا بكرێت، بەڵام پابەندنەبوون بە بڕیارەكە كاریگەری نەرێنی لەسەر داهاتووی پەنابەران دەبێت، بەتایبەتیش مافی نیشتەجێبوونی هەمیشەیی لەو وڵاتەدا.
هەولێر و بەغداد رێككەوتن لەسەر پێكهێنانی لیژنەیەكی هاوبەش بۆ داخستنی دەروازە سنووریە نایاسایەكان و ئەم بڕیارەش لە چوارچێوەی توندكردنەوەی چاودێریی سەر سنوورەكان و پاراستنی ئابووری عیراق دێت.
دەستەی دەروازە سنووریەكانی عیراق رایگەیاند، لەسەر راسپاردەی ئەنجومەنی وزاری بۆ كاروباری ئابوری بڕیاردراوە بە پێكهێنانی لیژنەیەكی هاوبەش لە نێوان حكومەتی فیدراڵی و حكومەتی هەرێمی كوردستان بۆ ئەنجامدانی پشكنینی بۆ خاڵە سنوورییەكانی پارێزگاكانی هەرێم.
وتیشی، ئامانج لە كاری لیژنەكە، دیاریكردن و داخستنی سەرجەم دەروازە و خاڵە سنوورییە نایاساییەكانی هەرێم لەگەڵ هەر سێ وڵاتی ئێران و توركیا و سوریا.
جەختیشیكردەوە، ئەم بڕیارە لە چوارچێوەی هەوڵەكانی هەولێر و بەغداد دێت بۆ توندكردنەوەی چاودێریی سەر سنوورەكان و پاراستنی ئابووری وڵات و رێگریكردن لە قاچاخچێتی.
قوباد تاڵەبانی، لەگەڵ ئەندامانی فراکسیۆنی سەوز لە پەرلەمانی کوردستان کۆبووەتەوە و دەشڵێت: یەکێتی نەک رێگر نییە لەبەردەم پێکهێنانی حکومەتی نوێ، بەڵکو جەخت لە پەلەکردن لە پێکهێنانی حکومەت لەسەر بنەمای هاوبەشیی راستەقینە دەکەینەوە.
قوباد تاڵەبانی رایگەیاندووە: بە ئامادەبوونی برای بەڕێزم کاک شاڵاو کۆسرەت رەسوڵ لەگەڵ ئەندامانی فراکسیۆنی سەوز لە پەرلەمانی کوردستان کۆبوومەوە، بەرچاوڕوونیمان پێدان لەبارەی سیاسەت و پێگەی یەکێتی لە کوردستان و عیراق و ناوچەکە.
قوباد تاڵەبانی ئاماژەی بەوەشداوە: یەکێتی نەک رێگر نییە لەبەردەم پێکهێنانی حکومەتی نوێ، بەڵکو جەخت لە پەلەکردن لە پێکهێنانی حکومەت لەسەر بنەمای هاوبەشیی راستەقینە دەکەینەوە و دواخستنی لەوە زیاتری ئەم پرسە بە مەترسی بۆسەر پێگەی هەرێم دەزانین.
قوباد تاڵەبانی دەشڵێت: داواشم لێکردن سەرباری کارانەبوونی پەرلەمان، ئەرکی خۆیان بەرامبەر بە دەنگدەران و خەڵکی کوردستان جێبەجێ بکەن و رۆژانە بەدواداچوون بۆ کێشەی هاوڵاتییان بکەن.
ئەندامێکی فراکسیۆنی یەکێتی لە ئەنجومەنی نوێنەرانی عیراق رایگەیاند، فەرمانگەی پاسپۆرت لە قەزای خانەقین دەکرێتەوە و چەندین ناوچەی تری دەوروبەریشی لێی سوودمەند دەبن.
سروە محەمەد، ئەندامی فراکسیۆنی یەکێتی لە ئەنجومەنی نوێنەرانی عیراق بە کوردسات نیوزی راگەیاند: دوای ئەوەی پێشتر رەزامەندی وەزارەتی ناوخۆی عیراقیان بۆ کردنەوەی فەرمانگەی پاسپۆرت لە خانەقین بەدەستهێنابوو، لە ئێستادا رەزامەندی بەڕێوەبەرایەتی گشتیی رەگەزنامە و پاسپۆرتی عیراقیشیان بۆ ئەو مەبەستە وەرگرتووە.
ئاماژەی بەوەشدا، لە ئایندهیهکی نزیکدا فەرمانگەکە بە رووی هاووڵاتیاندا دەکرێتەوە و دەستبەکار دەبێت.
بەپێی ئەو نووسراوەی کە پەرلەمانتارەکە بڵاویکردووەتەوە، کردنەوەی ئەم فەرمانگەیە ئاسانکاری بۆ دانیشتووانی ناوچەکە دەکات و جگە لە ناوەندیی قەزای خانەقین، دانیشتووانی ناحیە و ناوچەکانی جەلەولا، سەعدیە، قەرەتەپە، جەبارە و "حەوزی حەمرین" لە خزمەتگوزارییەکانی ئەم فەرمانگەیە سوودمەند دەبن و چیدیکە پێویست ناکات بۆ راییکردنی مامەڵەکانیان روو لە ناوەندەکانی تر بکەن.
وەزارەتی دارایی عیراق نووسراوێکی ئاڕاستەی وەزیری دارایی کوردووە و چاوەڕوان دەکرێت ئەمڕۆ رێکارەکانی ناردنی موچەی موچەخۆرانی هەرێم بگیرێتەبەر.
سەرچاوەیەك بە كوردسات نیوزی راگەیاند: بەشی ژمێریاری وەزارەتی دارایی عیراق، سەبارەت بە 120 ملیارەكە نوسراوێكی ئاڕاستەی وەزیری دارایی كردوە و چاوەڕوانی وەڵام و فەرمانی وەزیری داراین بۆ لێبڕینی 120 ملیار دیناری داهاتی ناوخۆی هەرێم.
سەرچاوەکە ئاماژەی بەوەشدا: دوای وەڵامی وەزیری بەشی ژمێریاری نوسراو دەكات بۆ تەمویلكردنی موچەی فەرمانبەرانی هەرێم، هەروەها پێدەچێت ئەمڕۆ رێكارەكانی ناردنی موچەی فەرمانبەرانی هەرێم بگیرێتەبەر.
مارکواین مۆلین، وەزیری ئاسایشی ناوخۆی ئەمریکا، بە میدیای وڵاتەکەی راگەیاندوە، لە دڵخۆشی کرانەدەرەوەی هەڵبژاردەی ئێران لە مۆندیال دەستی کردوە بە سەما و چەند گۆرانییەکیشی وتووە.
وەزیری ئاسایشی ناوخۆی ئەمریکا، لە کۆنگرەرەکی رۆژنامەوانیدا، رایگەیاندوە، هیچ هەڵبژاردەیەکی پاڵەوانێتی مۆندیال هێندەی ئێران کێشە و گرفتی بۆ ئەمریکا دروست نەکردوە، چونە دەرەوەیان لە مۆندیال دڵخۆشی کردوە.
وەزیرەکەی ئەمریکا بە میدیای وڵاتەکەی وتوە، کاتێک زانیویەتی هەڵبژاردەی ئێران کراوەتە دەرەوە و نەی توانیوە سەرکەوێت بۆ قۆناغی 32ـی پاڵەوانێتی جامی جیهانی، لە خۆشیدا دەستی کردوە بە گۆرانی وتن وسەماکردن.
ناوبراو ئاماژەی بەوەکردوە، بەهۆی سنوردارکردنی ڤیزەی یاریزانان و تیمی هەڵبژاردەی ئێران لە ناوخۆی ئەمریکادا توشی گرفتی زۆر بونەتەوە.
ئەم قسانە لە کاتێکدایە، هەڵبژاردەی ئێران لە جامی جیهانی 2026، بەهۆی کێشەکانیان لەگەڵ ئەمریکا ڤیزەی سنورداریان پێدرابوو، هەر ئەمەش وایکرد دوای تەواو بونی یارییەکان و کرانەدەرەوەیان راستەوخۆ ئەمریکایان بەجێهێشت.
ئەحمەد شەرع، سەرۆکی سوریا، ئەمڕۆ سێشەممە سەرکۆنەی هەوڵەکانی ئیسرائیلی کرد بۆ تێکدانی سەقامگیری لە ناوچەکانی باشوری سوریا، و رایگەیاند کە ئەوەی رودەدات لە چوارچێوەی هەوڵەکاندایە بۆ نوقمکردنی وڵات لە پشێوییەکی نوێدا و لاوازکردنی تواناکانی بۆ تەواوکردنی پرۆسەی بونیاتنانەوە.
کەناڵی "ئەلئیخباریە"ی سوری لە زاری شەرعەوە گواستییەوە: ئیسرائیل دووبارە هەوڵدەدات خاکی سوریا بکاتە گۆڕەپانی پشێوییەکی بێبڕانەوە، بە ئامانجی تێکدانی یەکڕیزی گەلی سوریا و لاوازکردنی تواناکانی بۆ بەردەوامبوون لە کاروانی راپەڕین و بونیاتنانەوە.
شەرع وتیشی: سوریا گۆڕەپانی تاقیکردنەوەی پیلانگێڕییە دەرەکییەکان نییە، و شوێنێکیش نییە بۆ جێبەجێکردنی تەماحی لایەنەکانی ترە، ئەم هەڵوێستەش رەنگدانەوەی پەرەسەندنێکی سیاسی رونی دیمەشقە بەرانبەر بە تحرکاتی ئەم دواییەی ئیسرائیل لە باشور.
ئەم لێدوانانەی شەرع دوای ئەوە هاتن کە هێزەکانی ئیسرائیل چوونە ناو گوندەکانی عابیدین، جوملە و تەل مەغەر لە پارێزگای دەرعای باشور، کە دوێنێ دووشەممە روبەڕووی بۆردوومانی تۆپخانە و هێرشی هەلیکۆپتەر بوونەوە، لە کاتێکدا ناوچەکە گرژییەکی سەربازیی توندی بەخۆوە بینیوە.