هەواڵەکان
بەڕێوبەرایەتی پۆلیسی پارێزگای هەڵەبجە، رایگەیاندوە، لەلایەن بەشی پۆلیسی نەهێشتنی تاوانەوە توانرا تۆمەتبارێک بەتۆمەتی دزینی دوو ماتۆڕسکیل دەستگیربکرێت و دانی بە تاوانەکەیدا ناوە.
ئەمڕۆ یەکشەممە، پۆلیسی هەڵەبجە بڵاویکردوەتەوە دوای ئەوەی لەلایەن چەند هاووڵاتییەکەوە سکاڵا تۆمارکرا لەبەشی پۆلیسی نەهێشتنی تاوان سەبارەت بەوەی ماتۆڕسکیلەکانیان لەناوشاری هەڵەبجە دزراوە
دەست بەجێ لەلایەن بەشی پۆلیسی نەهێشتنی تاوانەوە دەست کرا بەلێکۆڵینەوە و بەدواداچوون.
ئاماژەیان بەشکردوە، دوای بە دواداچونەکانیان لە رێگەی مەفرەزەکانیانەوە توانرا تۆمەتبارێک بەناوی (ڕ. س. ض ) تەمەن 14ساڵ دانیشتوی پارێزگای هەڵەبجە بەبڕیاری بەڕێز دادوەر دەستگیربکرێت و دانی بە تاوانەکەیدا ناوە و لە ئێستادا بەپێی مادەی446 ی. س.ع راگیراوە .
روانگەی سوری بڵاویکردوەتەوە، تا ئێستا بەهۆی هەڵنەگرتنی گەمارۆکانی دیمەشق لەسەر کۆبانێ، شارەکە روبەڕووی کارەساتێکی مرۆیی و تەندروستی مەترسیدار بووەتەوە، کە تێیدا لێشاوی دەیان هەزار ئاوارە لە گوندەکانی دەوروبەر و شارەکانی رەققە و تەبقا گوشارێکی زۆری خستووەتە سەر ژێرخانی شارەکە.
بە گوێرەی راپۆرتێکی روانگەی سووری بۆ مافەکانی مرۆڤ، کە ئەمڕۆ یەکشەممە بڵاویکردوەتەوە، کەرتی تەندروستی بەهۆی نەمانی سوتەمەنی و دەرمان و پێداویستییە سەرەتاییەکان لە رەوشێکی تەواو خراپ و مەترسیداردایە، بە جۆرێک رۆژانە زیاتر لە 500حاڵەتی ژەهراوی بوون بەهۆی خواردنەوەی ئاوی پیس تۆمار دەکرێن.
هاوکات مەترسییەکی جدیش لەسەر ئاسایشی خۆراک هەیە بەهۆی ئەگەری وەستانی فڕنەکان و نەمانی شیری منداڵان، ئەمەش دۆخی شارەکەی گەیاندووەتە ئاستێک، کە توانای لەخۆگرتنی ئەو ژمارە زۆرەی ئاوارەی نەماوە و هۆشداری لە تەقینەوەی رەوشەکە دەدرێت.
کەشناسی رایدەگەیەنێت؛ ئەمرۆ ئاسمانی هەرێم بە گشتی بەردەوام هەوری دەبێت و باران بارینیش بە شێوەی نمەباران بەردەوام دەبێت و لە لوتکەی شاخەکانیش بەفر دەبرێت، لەسەر کەشی سبەینێش ئاماژەی بەوەکردوە، لە چاو ئەمڕۆدا رێژەی باران بارین زیاتر دەبێت ئەگەری هەورەتریشقەش هەیە.
بەڕێوەبەرایەتی گشتی کەشناسی و بوومەلەرزەزانی هەرێم کەشی 48 سەعاتی داهاتووی بڵاوکردوەتەوە و دەڵێت؛ ئەمڕۆ پلەکانی گەرما کەمێک بەرزدەبنەوە و نمەبارانیش لە ناوچە جیاوازەکانی هەرێم بەردەوامی دەبێت.
ئاماژەیان بەوەشکردوە، کاریگەری تەم زیاتر دەبێت لەگەڵ بارینی بەفرێکی کەم لە لوتکەی چیاکان و لە 24 سەعاتی رابردودا، لەم شوێنانە زۆترین باران باریوە؛ (دینارتە 86.7ملم، مێرگەسوور 81ملم، یاخسەمەر 76.4ملم، ئاکرێ 63.7ملم، خەلیفان 62ملم، نازەنین 59.9ملم، قەسرۆک 57ملم و لە قەڵادزێ 53.5ملم) باران باریوە.
لەبارەی کەشی سبەینێ دووشەممەشەوە کەشناسی دەڵێت، بەرارود بە ئەمڕۆ باران بارین زیاتر دەبێت و لە تەواوی ناوچەکان دەبارێت، پلەکانی گەرماش بەراورد بە ئەمڕۆ یەک بۆ سێ پلە بەرز دەبنەوە و ئەگەری هەورە تریشقەش هەیە.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ؛
هەولێر : 13 پلەی سیلیزی
پیرمام : 10 پلەی سیلیزی
سۆران : 10 پلەی سیلیزی
حاجی ئۆمەران : 5 پلەی سیلیزی
سلێمانی : 11 پلەی سیلیزی
چەمچەماڵ : 12 پلەی سیلیزی
هەڵەبجە : 13 پلەی سیلیزی
دهۆک : 11 پلەی سیلیزی
زاخۆ : 12 پلەی سیلیزی
ئاکرێ : 12 پلەی سیلیزی
وەزارەتی نەوتی عیراق رەتیدەكاتەوە قەیرانی بەنزین لە وڵاتەكەدا دروست بووبێت و دەڵێت بەرهەمهێنانی رۆژانەی بەنزین 30 ملیۆن لیترە .
عەبدولساحب حەسناوی، وتەبێژی وەزارەتی نەوتی عیراق رایگەیاندووە ، ئەو هەواڵانە رەتدەكەنەوە كە باس لەوە دەكەن قەیرانی كەمی بەنزین و زیادبونی نرخەكەی لە عیراق هەبێت.
دوپاتیكردوەتەوە كە هیچ قەیرانێك لە بەرهەمهێنانی بەنزیندا نیە و یەدەگی بەنزینی وڵاتەكە 135 ملیۆن لیترە و بڕی بەرهەمهێنانی رۆژانەش 30 ملیۆن لیترە.
هەروەها رونیكردوەتەكە كە تێكرای بەكارهێنان بۆ 33 پۆینت پێنج ملیۆن لیتر بەرزبوەتەوە، بەڵام ئەوە نەبووەتە هۆكار بۆ دروستبونی قەیران و بەرز بونەوەی نرخی بەنزین.
وەزیری دەرەوەی ئیران، لە کۆنگرەی نیشتمانی سیاسەتی دەرەوەی رایگەیاند هیچ بژاردەیەک نییە جگە لە دانوستان؛ بە رونی بە تیمی ئەمریکیم وتووە، دانوستاندنەکان کاتێک سەرکەوتوو دەبن، کە مافی گەلی ئێران رەچاو بکرێن.
عەباس عراقچی رایگەیاند، داواکاری ئەوان سادەیە و، کە بریتییە لە رێزگرتن لە مافەکانی گەلی ئێران و جێبەجێکردنیان، جەختیشیکردەوە نایانەوێت کەس دان بە مافەکانیاندا بنێت؛ چونکە مافەکانمان ههەن و رەسمین.
عیراقچی دەشڵێت؛ لە روی سەربازییەوە ئامادەن بە شەڕ، ئەوان رێگەی دیپلۆماسیان هەڵبژادوە، ئەگەر بەرنبەریش هەمان رێگە هەڵبژێرێت.
وەزیری دەرەوەی ئیران دوپاتیکردەوە یەکەم پرەنسیپی سیاسەتی دەرەوەی وڵاتەکەی بریتییە لە پاراستنی کەرامەت و ماگی گەلی ئێران و سازش لەسەر مافەکانیان ناکەن.
درەنگانێکی ئەمشەو، لە قەزای خورماتوو، لە کاتی چاککردنەوەی محاویلەی کارەبادا، دوو کارمەندی فەرمانهگەی کارەبا گیانیان لەدەستدا، کە یەکیان کوردە و ئەوییکەش تورکمانە.
کاروان حەبیب، پەیامنێری کوردسات نیوز، لە قەزای خورماتوو رایگەیاند، دوای ئەوەی یەکێک لە محاویلەکانی گەڕەکێکی قەزای خورماتوو، کیشەی دەبێت تیمێکی چاککردنەوەی سەر بە فەرمانگەی کارەبای خورماتوو چون بۆ چاکردنەوەی.
بەڵام بەهۆی ئەویە باران بوە و لەکاتی هەوڵدان بۆ چاککردنەوە شۆرتی کارەبا دروست بووە و بەهۆیەوە دوو کارمەنی گفەرمانگەکە گیانیان لەدەستداوە.
پەیامنێری کوردسات نیوز، ئەوەشی خستە ڕوو، ئەو دوو کارمەندەی گیانیان لەدەستداوە یەکێان کوردە و ئەوی تریشیان بە نەتەوە تورکمانە و دوای گیان لەدەستدانیشیان، تەرمەکانیان بۆ پشکنینى دادى رەوانەى کەرکوک کراون
دوای ئەوەی تیپی بالەی یانەی هەولێر،کە لە ئێستادا بەشدارە لە خولی نایابی عیراق و ماوەی دوو مانگە شایستە داراییەکانیان پێنەدراوە، وەک هەڵوێستێک یاریزانانی یانەکە بایکۆتی مەشقەکانیان کردووە، قوباد تاڵەبانیش بریاریداوە هاوکارییان بکات بۆ ئەوەی بەردەوام بن.
یاریزانانی بالەی یانەی هەولێر، بڕیاریاندا بایکۆتی مەشقەکانیان بکەن، بەهۆی پێنەدانی موچە و شایستە داراییەکانیانەوە، قوباد تاڵەبانی، جێگری سەرۆک وەزیرانی هەرێم بڕیاریداوە وەک پاڵپشتییەک بۆ یانەکە، هاوکاریان بکات تا بەردەوام بن.
هاوکاریەکەی قوباد تاڵەبانی لە رێگەی بۆردی وەرزشیی یەکێتیی نیشتمانی کوردستانە دەبێت و موچەکانیان بۆ دابین دەکات، وەک پاڵپشتییەک بۆ بەردەوام بوونی تیپەکە لە خولی نایابی عیراق.
رەفحەت ئۆزدەمیر، پیاوێکی تەمەن55 ساڵە و دانیشتوی شاری قەیسەری تورکیایە، دوای بڵاوبونەوەی فایلەکانی ئیپستن، توشی کێشەیەکی گەورە و سەرنجڕاکیش دەبێت، کە هیچ کات خۆی بیر لێنەکردوەتەوە؛ ئەویش لێکچوونی لە رادەبەدەریەتی لەگەڵ ملیاردێری ناوداری ئەمریکی جێفری ئێپستین، دەشڵێت بەهۆی خراپ سەیرکردنی هاووڵاتییان بۆی بیر لە گۆڕینی روخساری دەکاتەوە.
رەفحەت ئۆزدەمیر، بە میدیاکانی تورکیای راگەیاندوە، بەهۆی لێکچونی زۆری لەگەڵ ملیاردێری ئەمریکی"جێفری ئێپستین"، کە لە ئێستادا مردوە و بە تێوەگلان لە تاوانە سێکسییەکان ناوبانگی زڕاوە، ژیانی بوەتە دۆزەخ.
رفحەت وتویەتی؛ خەڵک لە شەقام بە چاوێکی پڕ لە گومان و ناخۆش سەیرم دەکەن و بەردەوام بەو پیاوەم دەچوێنن، لە کاتێکدا من سەرەتا تەنانەت نەمدەزانی ئەو کێیە!
ئەم هاووڵاتییە تورکە، کە لە دوای بڵاوبونەوەی مەلەفەکانی جێفری ئێپستین کەوتوەتە ژێر گوشارێکی توندی دەرونییەوە و بڕیاری داوە رێکاری توند بگرێتەبەر بۆ ئەوەی لەم رەوشەی ئێستای رزگاری بێت.
رەفحەت وتویەتی، سەرەتا کوڕەزاکەم پێی وتم کە لە جێفری ئیپستین دەچم، بەڵام من هیچ کاتێک نەمناسیوە و ئیتر دەستدەکات بە گۆڕینی شێوازی قژی و هێشتنەوەی ریش،گەرچی حەزی بە هێشتنەوەی ریش نییە، بەڵام ئامادەیە هەموو کارێک بکات تا رزگاری بێت و وەک تاوانبار سەیر نەکرێت.
رەفحەت بە دڵتەنگییەوە بە میدیاکانی تورکیای راگەیاندوە، "بەداخەوە شێوەمان کەمێک لە یەک دەچێت، بەڵام من ئێپستین نیم و کەسێکی وا خراپ هەرگیز لە شارێکی وەک قەیسەریدا پەیدا نابێت."
بڕیارە سبەینێ بە بەشداری بافڵ جەلال تاڵەبانی، هاوپەیمانی ئیدارەی دەوڵەت لە بەغداد كۆببێتەوە، تەوەری سەرەكی كۆبوونەوەكەش یەكلاییكردنەوەی كاندیدانی پۆستی سەرۆك كۆمار و سەرۆك وەزیرانی عیراق دەبێت.
محەمەد عەبدولڕەحمان، پەیامنێری کوردسات نیوز لە بەغداد رایگەیاند، بافڵ جەلال تاڵەبانی سەرۆکی یەکێتیی نیشتمانیی کوردستان، سبەینێ بەشداری کۆبوونەوەکەی هاوپەیمانی ئیدارەی دەوڵەت لە بەغداد دەکات، کە تایبەتە بە تاوتوێیکردنی دوایین پێشهاتەكان لەسەر ئاستی ناوخۆ و دەرەوەی عیراق و پێكهێنانی حكومەتی داهاتووی وڵاتەکە.
ئەوەشی خستەڕوو، تەوەری سەرەكی كۆبوونەوەكە گفتوگۆكردن لەبارەی كاندیدانی پۆستی سەرۆك كۆمار و سەرۆك وەزیرانی داهاتووی عیراق.
بەڕێوەچوونی كۆبونەوەكەش لەكاتێكدایە، كاندیدی سەرۆك وەزیران بەتەواوی یەكلایی نەكراوەتەوە و وادەی بەرێوەچوونی دانیشتنی ئەنجومەنی نوێنەرانیش بۆ هەڵبژاردنی سەرۆك كۆمار دیاری نەكراوە.
ویلایەتە یەکگرتووەکانی ئەمریکا و هیندستان، بە رەسمی ئیمزاکردنی رێککەوتنێکی بازرگانیی کاتییان راگەیاند، کە وەک هەنگاوێکی جێبەجێکاریی خێرا دێت بۆ ئەو لێکتێگەیشتنە فراوانەی لە 13ی شوباتی 2025 لە نێوان دۆناڵد ترەمپ و ناریندرا مۆدی دەستی پێکردبوو.
بەپێی ڕاگەیەندراوێکی کۆشکی سپی، ئەم رێککەوتنە تەنها لە چوارچێوەی ئاڵوگۆڕی کاڵادا نییە، بەڵکو پابەندییەکی ستراتیژییە بۆ چەسپاندنی بازرگانییەکی هاوسەنگ و بەهێزکردنی زنجیرەی دابینکردنی کاڵا لەسەر ئاستی جیهان، بە جۆرێک کە مەودای زیاتر بە بازاڕەکان ببەخشێت و پشتبەستن بە لایەنی سێیەم کەم بکاتەوە.
ئەم هەنگاوە کە بە "وەرچەرخانێکی مێژویی" لە پەیوەندییەکانی واشنتۆن و نیودەلهی دادەنرێت، کارئاسانی بۆ گەیشتنی بەرهەمەکان بە بازاڕی هەردوولا دەکات و زەمینە خۆش دەکات بۆ رێککەوتنێکی گشتگیرتر لە داهاتوویەکی نزیکدا، کە بەرژەوەندییە ئابوورییەکانی هەردوو وڵات لە گەشەی بەردەوامدا بپارێزێت.
لای خۆشیەوە، سەرۆک وەزیرانی هیندستان لە پلاتفۆڕمی ئێکس رایگەیاندوە، ئەم چوارچێوەیە رەنگدانەوەی قوڵی متمانەی هەردوو وڵاتەکەیە و دەبێتە هۆی دەرفەتی نوێ بۆ جووتیاران، خاوەنکاران، کۆمپانیا بچووک و ناوەندەکان، داهێنەرانی دەستپێکردن، ماسیگرەکان و هیندییە ماندوونەناسەکانی تری وڵاتەکەیان.
ئەمە لە کاتێکدایە، ئەم رێککەوتنە بازرگانییە کاتییە، وەک وەڵامێکی کردەیی و کۆتاییهێنان بەو گرژییە ئابوورییە توندانەدادەنرێت، کە لە ساڵانی رابردوودا بەهۆی باجی گومرگی و ململانێی سەر کەرتی تەکنەلۆژیاوە لە نێوان هەردوو وڵاتدا دروست ببوو.
لە راگەیەندراوێکدا سەرۆکایەتی کۆمار پیرۆزبایی لە نەقیبی نوێی رۆژنامەنوسان و جێگرەکانی دەکات بە بۆنەی هەڵبژاردنیان و داواشیان لێدەکات کاربکەن بۆ ئەوەی ئازادی و پیشەییبوون بکرێنە کارنامەی سەرەکی کارەکانیان، بە جۆرێک لە خزمەت خواستەکانی گەلی عیراقدا بێت.
سەرۆکایەتی کۆمار پەیامێکی پیرۆزبایی ئاراستەی نەقیبی نوێی ڕۆژنامەنووسان و هەردوو جێگرەکەی و ئەندامانی ئەنجومەن دەکەین، کە لە هەڵبژاردنەکانی سەندیکادا سەرکەوتنیان بەدەستهێنا و هیوای سەرکەوتنیان بۆ دەخوازێت لە راپەڕاندنی ئەرک و بەرپرسیارێتییە پیشەییەکانیاندا.
سەرۆکایەتی کۆمار،دەڵێت سەندیکای رۆژنامەنووسان رۆڵێکی دیار و گرنگی لەئەستۆدایە بۆ چەسپاندنی بەهاکانی پیشەییبوون و بەرپرسیارێتی، هەروەها بەرگریکردن لە مافی رۆژنامەنووسان و دەستەبەرکردنی ئازادیی دەربڕین، بە جۆرێک کە هاوکار بێت لە پاڵپشتیکردنی رێڕەوی دیموکراسی و بەرزکردنەوەی ئاستی هۆشیاریی کۆمەڵایەتی و چەسپاندنی دەوڵەتی دامەزراوەیی و یاسا.
هەروەها جەختیشیان کردوەتەوە لەسەر گرنگیی بەردەوامبونی کارەکان بۆ دابینکردنی ژینگەیەکی ئارام و ئازاد بۆ کاری رۆژنامەوانی، پاراستنی کەرامەتی رۆژنامەنووسان و پەرەپێدانی تواناکانیان بۆ ئەنجامدانی پەیامە نیشتمانییەکەیان بە هەموو پیشەییبوون و سەربەخۆییەکەوە.
سەرۆکایەتی کۆمار داواشدەکات کاربکرێت لەسەر بەرزکردنەوەی ئاستی پیشەییبوونی میدیای ئازاد، دور لە شاردنەوە و شێواندنی راستییەکان و کاربکرێت بۆ چەسپاندنی چەمکە نیشتمانییەکان و خزمەتکردنی پرسە کۆمەڵایەتییەکان، بە شێوەیەک، کە خزمەت بە بەرژەوەندییە باڵاکانی وڵات بکات و رەنگدانەوەی خواستەکانی گەلی عیراق بێت.
ئیدارەی پارێزگای کەرکوک رایگەیاند، لە پێناو پاراستنی تەندروستی گشتی و رێگریکردن لە هاوردەکردنی کاڵای بێ کوالێتی، بڕیاری داخستنی سەرجەم توولەڕێ و رێڕەوە نایاساییەکانیان دەرکرد، کە بۆ کاری قاچاخچێتی بەکاردەهێنران.
ئەمڕۆ شەممە، رێبوار تەها، پارێزگاری کەرکوک راگەیەندراوێکی بڵاوکردوەتەوە و تێیدا هاتووە؛ ئیدارەی شارەکە هەڵدەستن بە داخستنی تەواوی تولەرێگاکان، بە مەبەستی رێگریکردن لە هاوردەکردنی کاڵای بێ کوالێتی.
بە گوێرەی راگەیەندراوەکە، ئەم هەنگاوە وەک بەرپرسیارێتییەک دێت بۆ رێگریکردن لە هاتنەژورەوەی مادە و خواردنی ماوەبەسەرچوو، کە زیان بە ئاسایشی خۆراک و دەرمانی هاووڵاتیان دەگەیەنن، بە تایبەت کە نزیک دەبینەوە لە مانگی رەمەزان.
هاوکات هۆشدارییەکی توند ئاراستەی بازرگانان و قاچاخچییەکان کراوە، کە لە ئەگەری ئەنجامدانی هەر سەرپێچییەک، توندترین سزای یاساییان بەبێ هیچ چاوپۆشییەک بەسەردا دەسەپێنرێت، چونکە پاراستنی سەلامەتی کۆمەڵگە لە پێشینەی کارەکانی دەسەڵاتدارانی شارەکەیە و رێگە نادرێت بەرژەوەندی گشتی ببێتە قوربانی چاوچنۆکیی چەند کەسێک.
- پەیامنێری کوردسات نیوز رایگەیاند، لە گوندی تینا کە ناوچەی پیشەسازیشی پێدەڵێن، دەکەوێتە سەر رێگای هەولێر - مەخمور، دوو کرێکاری بیانی لە کاتی پاکردنەوەی تەنکیەکدا، کەوتونەتە ناویەوە و بەهۆی تەنگەنەفەسیەوە گیانیان لەدەستداوە.
- قارەمان جەوهەر، پەیامنێری کوردسات نیوز لە شوێنی روداوەکەوە رایگەیاند، روداوەکە لە کاتی پاکردنەوەی یەکێک لە تەنکیەکاندا بووە کە شوێنی هەڵگرتنی قیر و سوتەمەنی بووە، بۆ دووبارە بەکارهێنانەوە، بەڵام دوو کرێکارەکە کەوتونەتە ناوەیەوە و گیانیان لەدەستداوە.
- ئاماژەی بەوەشکرد، دوو کرێکارەکە یەکیان بەنگلادیشییە و ئەوی دیکەیان خەڵکی ئێرانە، بەڵام بەهۆی ئەوەی نەتوانراوە تا ئێستا تەرمەکانیان دەربهێندرێت ناسنامەیان ئاشکرا نەبووە .
- وتەبێژى بەرگرى شارستانى هەولێریش، بە کوردسات نیوزی راگەیاند، بە گوێرەی زانیارییە سەرەتاییەکان، ئەو دوو کرێکارە کۆسەرەیان بەکارهێناوە و لە کاتی لەحیمکردندا روداوەکە رویداوە، کە مەبەستیان بووە ئەو تانکییە پاکبکەنەوە کە کەوتونەتە ناویەوە و بەهۆیەوە گیانیان لەدەستداوە.
قوباد تاڵەبانی، جێگری سەرۆک وەزیران، پێشوازیکرد لە وەفدێکی بازرگانیی سعودییە بە سەرۆکایەتیی محەمەد سلێمان ئەلعسیری، کونسوڵی گشتیی ئەو وڵاتە لە هەرێمی کوردستان و پێکەوە تاوتوێی چۆنییەتی پەرەپێدانی پەیوەندییە ئابوورییەکانی نێوان هەردوولایان کرد.
لە کۆبوونەوەکەدا کە رۆژی شەمە(7/2/2026) لە سلێمانی بەڕێوەچوو، قوباد تاڵەبانی ئاماژەیدا بە پرۆسەی گەشەپێدانی هەرێمی کوردستان و سیاسەتی حکومەت بۆ پشتگیریکردن و ئاسانکاریکردن بۆ وەبەرهێنەرانی بیانی و رایگەیاند لە هەرێمی کوردستان و بە تایبەتیش پارێزگای سلێمانی دەرفەتی زۆر گەورە هەیە بۆ وەبەرهێنەرانی سعودی لە بوارە جیاوازەکاندا و ئامادەیی خۆی و ئیدارەی خۆجێی سلێمانیشی بۆ هەموو جۆرە پاڵپشتی و ئاسانکارییەک دەربڕی.
لە بەشێکی دیکەی کۆبوونەوەکەدا باس لە گرنگیی رۆڵی کەرتی تایبەت کرا لە ئابووریی هەرێمی کوردستان و پارێزگای سلێمانی کە لەم ساڵانەی دواییدا کەرتی تایبەت بە شێوەیەکی بەرچاو بەهێز بووە و رۆڵی بنەڕەتی دەبینێت لە گەشەپێدانی ئابووریدا. هەر لەم چوارچێوەیەدا هەردوولا هاوڕابوون کار بکرێت بۆ بەهێزترکردنی پەیوەندیی و هاوکاری نێوان هەردوو کەرتی تایبەتی کوردستان و سعودییە و لەم رێگەیەوە ئاستی پەیوەندییە ئابووری و بازرگانییەکانی نێوان هەردوولا لە داهاتوودا بەهێزتر بکرێت.
ئیدارەی خۆسەری لە کۆبانێ راگەیەندراوێکی لە بارەی رێککەوتنیان لەگەڵ حکومەتی کاتی سوریا بڵاوکردەوە و دەڵێت: ئیدارەی کۆبانێ جەختدەکاتەوە کە سەرەڕای رێککەوتنەکان، هێشتا گەمارۆی سەر ئەو شارە لانەبراوە.
ئیدارەی خۆبەڕێوەبەری باکور و رۆژهەڵاتی سوریا رایگەیاند، هەنگاوی کردەیی بۆ تێکەڵکردنی هێزە ئەمنییەکان لە ناحیەی "شیوخ" نراوە، بەڵام پرۆسەی کشانەوەی هێزە سەربازییەکان لە ناحیەی "جەلەبیە" بۆ گەڕانەوەی ئاوارەکان هێشتا جێبەجێ نەکراوە.
ئاماژەی بەوەشکرد، وەفدێکی کۆبانێ سەردانی شاری حەلەبیان کردووە و لەگەڵ جێگری پارێزگار و فەرماندەی هێزەکانی ناوخۆ کۆبوونەتەوە، تێیدا پرسی خزمەتگوزارییەکانی وەک (ئاو، کارەبا و ئینتەرنێت) تاوتوێ کراوە، بەڵام حکومەت تەنها "بەڵێن"ی داوە و هیچ هەنگاوێکی نەناوە.
ئیدارەی خۆسەر ئەوەشی خستەڕوو، ئیدارەی کۆبانێ جەخت دەکاتەوە کە سەرەڕای رێککەوتنەکان، هێشتا گەمارۆی سەر کۆبانێ لانەبراوە و هێزە سەربازییەکان لە دەوروبەری شارەکە نەکشاونەتەوە.
هاوکات لە راگەیەنراوەکەدا، ناڕەزایەتی بەرانبەر میدیاکانی دیمەشق دەربڕراوە کە کۆبانێ وەک "ناحیە" ناودەبەن و سورن لەسەر بەکارهێنانی ناوی "عەین ئەلعەرەب"، ئەمەش بە پێچەوانەی راستییەکان و دەقی رێککەوتنەکە دەزانن.
ئیدارەی کۆبانێ جەختدەکاتەوە، ئەوان پابەندی رێککەوتنەکەن و ئامادەن بۆ هەر هەنگاوێک، بەڵام داوا لە حکومەتی دیمەشق دەکەن گەمارۆی سەر شارەکە هەڵبگرێت و هێزە سەربازییەکان لە گوندەکانی سنوری کۆبانێ بکشێنێتەوە.
بەپێی پێشبینییەکانی کەشناسی لە 48 سەعاتی داهاتوودا بارانبارین بەردەوام دەبێت و لە کاتەکانی شەودا کاریگەری زیاتر دەبێت.
بەڕێوبەرایەتی گشتی کەشناسی هەرێم بڵاویکردەوە، لە زۆربەی ناوچەکان نمە باران و بارانی مامناوەند بە پچڕپچڕی دەبارێت، هەروەها لە ناوچە سنوریەکان بەفربارینێکی کەم دەبێت.
ئاماژەی بەوەشکرد، لە شەودا کاریگەری باران زیاتر دەبێت کە لە هەندێ کات و شوێن بە شێوەی لێزمەباران دەبێت .
کەشناسی هەرێم راشیگەیاند، سبەینێ ئاسمان هەوری تەواو دەبێت لەگەڵ بارینی بارانی مامناوەند لە کاتەکانی بەیانیدا.
ئەوەشی خستەڕوو، پلەکانی گەرما سێ بۆ شەش لە نزمدەبنەوە بە بەراورد بە تۆمارکراوەکانی دوێنێ.