هەواڵەکان
کارنامەی حکومەتەکەی عەلی زەیدی، کاندیدی راسپێردراو بۆ پۆستی سەرۆک وەزیرانی عیراق، بڵاوکرایەوە و لە 14 تەوەر پێکدێت و جەخت دەکاتەوە دەبێت چەک تەنها لە دەستی دەوڵەتدا بێت.
14 تەوەرەکەی عەلی زەیدی بەمشێوەیەیە؛
تەوەرەی یەکەم تایبەتە بە بەهێزکردنی سەروەری دەوڵەت و ئاسایشی نیشتمانی
- بەهێزکردنی تواناکانی دەزگا ئەمنییەکان، هەواڵگری و سەربازییەکان، و هەمەجۆرکردنی سەرچاوەکانی پڕچەککردن.
- پەرەپێدانی تواناکانی ئەندامانی حەشدی شەعبی بە جۆرێک کە توانای شەڕکردنیان بەهێز بکات و دیاریکردنی بەرپرسیارێتی و ئەرکەکانیان لەناو سیستمی ئەمنیدا بەپێی یاسا.
تەوەری دووەم تایبەتە بە سیاسەتی دەرەوە
- دورخستنەوەی عیراق لە ململانێ ناوچەیی و نێودەوڵەتییەکان وەک هەنگاوێکی بنەڕەتی بۆ پاراستنی سەقامگیری ناوخۆیی و راکێشانی وەبەرهێنان.
- بەهێزکردنی پەیوەندی لەگەڵ وڵاتانی کاریگەر و دروستکردنی پەیوەندی تایبەت لەگەڵ وڵاتانی عەرەبی، بەتایبەتی وڵاتانی کەنداوی عەرەبی و وڵاتانی دراوسێ، هەروەها کارکردن لەسەر پڕۆژەی "رێگای گەشەپێدان".
تەوەری سێیەم تایبەتە بە چاکسازی ئابووری و دارایی
- بونیادنانی ئابوورییەکی نیشتمانی هەمەجۆر کە کەمتر پشت بە نەوت ببەستێت.
- پەیڕەوکردنی پرۆگرامی دیسپلینی دارایی و ڕێکخستنەوەی خەرجییە گشتییەکان و دیجیتاڵکردنی کۆکردنەوەی باج.
تەوەری چوارەم تایبەتە وزە (کارەبا و نەوت و گاز)
-کارەبا؛ چاکسازی گشتی لە کەرتەکانی بەرهەمهێنان و گواستنەوە، بەشداریپێکردنی کەرتی تایبەت لە دابەشکردنی کارەبا، و وەرچەرخان بەرەو وزەی نوێبووەوە و تۆرە زیرەکەکان.
-نەوت و گاز؛ تەواوکردنی پڕۆژەکانی گازی هاوەڵ بۆ کەمکردنەوەی هاوردەکردن، کارکردن بۆ پەسەندکردنی "یاسای نەوت و گاز"، و زیادکردنی توانای پاڵاوگەکان بۆ گەیشتن بە خۆبژێوی لە سووتەمەنیدا.
تەوەری پێنجەم تایبەتە بە پیشەسازی
- چاکسازی لە یاساکانی پیشەسازیدا بۆ زیادکردنی بەشداری ئەم کەرتە لە داهاتی نیشتمانی.
تەوەری شەشەم تایبەتە بە کشتوکاڵ و ئاو
- بەکارهێنانی تەکنەلۆژیای سەردەم لە ئاودێری و کشتوکاڵدا، بەستنەوەی پەیوەندییە سیاسییەکان لەگەڵ وڵاتانی سەرچاوەی ئاو بۆ دابینکردنی مافی ئاوی عێراق.
تەوەری حەوتەم تایبەتە حوکمڕانی و بەرەنگاربوونەوەی گەندەڵی
- بونیادنانی بەرنامەیەکی نیشتمانی بۆ چاکسازی دامەزراوەیی و بەرەنگاربوونەوەی گەندەڵی دارایی و کارگێڕی.
تەوەری هەشتەم تایبەتە بە پەروەردە و خوێندن
- بەرزکردنەوەی ئاستی خوێندنی حکومی و ئەهلی بەردەوامبوون لە دروستکردنی قوتابخانەکان
تەوەری نۆیەم تایبەتە بە تەندروستی
- باشترکردنی خزمەتگوزارییە تەندروستییەکان و گەیاندنیان بە ناوچە دوورەدەستەکان.
تەوەری دەیەم تایبەتە بە پاراستنی کۆمەڵایەتی و بەرەنگاربوونەوەی هەژاری
- چاکسازی لە یاسای کار و بەرزکردنەوەی کارایی تۆڕی پاراستنی کۆمەڵایەتی.
تەوەری یازدەیەم تایبەتە بە پەیوەندییەکان و تەکنەلۆژیا
دەسپێکردنی ستراتیژی نیشتمانی بۆ وەرچەرخانی دیجیتاڵی.
تەوەری دوازدەیەم تایبەتە بە مافی مرۆڤ و ئافرەت و منداڵ
- پاراستنی کەرامەتی مرۆڤ و نەهێشتنی جیاکاری.
تەوەری سێزدەیەم تایبەتە بە گەنجان و وەرزش
- پشتگیریکردنی هەڵبژاردە نیشتمانییەکان و دابینکردنی هەلی کار بۆ گەنجان.
تەوەری چواردەیەم تایبەتە بە رۆشنبیری و گەشتیاری و شوێنەوار
- پاراستنی ناسنامەی شارستانی عیراق و هەوڵدان بۆ گەڕاندنەوەی شوێنەوارە دزراوەکان.
قوباد تاڵەبانی، لێپرسراویی مەکتەبی سکرتارییەتی سەرۆک مام جەلال لە سەردانەکەیدا بۆ کەرکوک لەگەڵ ژمارەیەک لە هونەرمەندانی کەرکوک کۆبووەوە.
لە کۆبوونەوەکەدا کە ئەمڕۆ پێنج شەممە بەڕێوەچوو، قوباد تاڵەبانی ئاماژەی بە رۆڵی هونەر و هونەرمەندان کرد لە قووڵکردنەوەی گیانی تەبایی و برایەتیی لەنێوان پێکهاتەکانی کەرکوک و پشتگیریی تەواوی یەکێتیی نیشتمانیی کوردستانیشی دەربڕی بۆ باشترکردنی رەوشی ژیان و گوزەرانی هونەرمەندانی کەرکوک.
لێپرسراویی سکرتارییەتی سەرۆک مام جەلال باسی لە بەرنامەی یەکێتی کرد بۆ پاڵپشتیکردنی هونەرمەندان و رایگەیاند؛ کاردەکەن بۆ ئەوەی ژینگەیەکی گونجاو دابین بکەن بۆ پێشخستنی هونەر لە کەرکوک.
وتەبێژی وەزارەتی دەرەوەی ئێران رایگەیاند، وڵاتەکەی سەرقاڵی تاوتوێکردنی پێشنیازێکی ئەمریکایە و تا ئەم ئێستا نەگەیشتوونەتە هەڵوێستی کۆتایی و هیچ وەڵامێکیان نەداوەتەوە.
ئیسماعیل بەقایی، وتەبێژی وەزارەتی دەرەوەی ئێران پشتراستی کردوە پێشنیازیان لەلایەن ئەمریکاوە پێگەیشتوە و وڵاتەکەی سەرقاڵی تاوتوێکردنیەتی.
ناوبراو ئاماژەی بەوەشکرد لەسەر پێشنیازەکە، کە لە رێگەی نێوەندگیری پاکیستانییەوە پێیان گەیشتووە، تا ئێستا نەگەیشتوونەتە هەڵوێستی کۆتایی و هیچ وەڵامێکیان نەداوەتەوە.
بەقایی، جەختیکردوەتەوە بڕیاردان لەسەر هەنگاوەکانی داهاتوو بەندە بە ئەنجامی ئەم نامەگۆڕینەوانەوە و هەر کاتێک بگەنە ئەنجامێکی یەکلاکەرەوە، لایەنی نێوەندگیر لە بڕیارەکەیان ئاگادار دەکەنەوە.
ئەمە لە کاتێکدایە، دوێنێ دۆناڵد ترەمپ رایگەیاند، لەگەڵ ئیران نزیکن لە رێککەوتن و لەسەر داوای پاکستان ئۆپراسیۆنی ئازادی لە گەروی هورمز رادەگرن و هۆشداریشیدابوو، ئەگەر نەگەنە رێککەوتن ئەوا خرپتر لە جاری پێشوو بۆردومانی ئێران دەکەن.
ئەمڕۆ پێنجشەممە لە بەغداد، هەیبەت حەلبوسی سەرۆکی ئەنجومەنی نوێنەران، پێشوازی کرد لە عەلی زەیدی، کاندیدی راسپردراو بۆ سەرۆک وەزیران.
هەیبەت حەلبوسی، سەرۆکی ئەنجومەنی نوێنەران، پێشوازی لە عەلی فالح زەیدی، کاندیدی سەرۆک وەزیرانی راسپێردراو کرد و لە کۆبوونەوەکەدا کارنامەی وزاریی حکومەتە نوێیەکەی لێ وەرگرت.
بەگویرەی راگەیەندراوی سەرۆکی ئەنجومەنی نوێنەران، حەلبوسی فەرمانی دا کارنامەکە بەسەر سەرجەم ئەندامانی ئەنجومەنی نوێنەران دابەش بکرێت تا لە وردەکارییەکانی ئاگادارببنەوە.
هاوکات جەختی لە ئامادەیی ئەنجومەنی نوێنەران کردەوە بۆ دیاریکردنی وادەی دانیشتنی متمانەبەخشین بە مەبەستی دەنگدان لەسەر کارنامە و پێکهاتەی حکومەت، ئەوەش هەر کاتێک کە کاندیدی راسپێردراو بۆ سەرۆک وەزیران ناوی کاندیدەکانی کابینەی حکومەتەکی رەوانەی ئەنجومەنی نوێنەران بکات.
رۆژنامەی وۆڵ ستریت جۆرناڵ بڵاویکردوەتەوە وەزارەتی گەنجینەی ئەمریکا بریکاری وەزیری نەوتی عیراق تۆمەتبار دەکات بەوەی، کە یارمەتی تاران دەدات بۆ پێشێلکردنی گەمارۆی نێودەوڵەتی و هاوکاری کردوە لە فرۆشتنی نەوتدا.
بە گوێرەی رۆژنامەکە، گەنجینەی ئەمریکا سزای دارایی عەلی مەعارج بەهادلی، بریکاری وەزیری نەوتی عیراق داوە و ناوی خستوەتە لیستی سزادراوەکانەوە ، بەهۆی تێوەگلانی لە پڕۆسەی هاوکاریکردنی ئێران بۆ دەربازبوون لە گەمارۆ نێودەوڵەتییەکان.
رۆژنامەکە ئاماژەی بەوەکردوە، بەپێی تۆمەتەکانی ئەمریکا، ئەم لێپرسراوە باڵایەی عیراق رێگەی داوە رۆژانە بە بڕی چەندین ملیۆن دۆلار نەوتی عیراق بە بارهەڵگر بگوازرێتەوە بۆ قاچاخچییەک و لەگەڵ نەوتی خاوی ئێراندا تێکەڵ کراوە.
هەروەها ئاماژە بەوە کراوە، کە مەعارج هاوکاری کردووە لە ساختەکردنی بەڵگەنامە رەسمییەکاندا بۆ ئەوەی نەوتە تێکەڵاوەکە وەک بەرهەمێکی سەد لە سەد عیراقی نیشان بدرێت و بەو شێوەیە لە بازاڕە جیهانییەکاندا ساغ بکرێتەوە.
قوباد تاڵەبانی سەردانی کەرکوکی کرد و لەگەڵ پارێزگاری کەرکوک کۆبووەوە و جەختی لە خزمەتکردنی هەموو پێکهاتەکان بەبێ جیاوازی کردەوە.
قوباد تاڵەبانی رایگەیاند، دانانی یەکەمین پارێزگار لە پێکهاتەی تورکمان لە مێژووی سەد ساڵی رابردووی کەرکوکدا، روداوێکی گرنگی مێژووییە و هیوادارین ئەم روداوە گیانی پێکەوەژیان و برایەتی لەنێوان پێکهاتەکانی ئەم شارەدا قووڵتر بکاتەوە.
ئاماژەی بەوەشکرد، لە سەردانمدا بۆ کەرکوک لەگەڵ محەمەد سەمعان، پارێزگاری نوێ و رێبوار تەها، جێگری پارێزگار کۆبوومەوە، پیرۆزبایی دەستبەکاربوونم لێ کردن و پشتگیریکردنی یەکێتیی نیشتمانیی کوردستانیشم بۆ دووپات کردنەوە.
قوباد تاڵەبانی جەختیشی کردەوە، یەکێتی شانازی بەوەوە دەکات هەر لە سەرەتاوە ئاڵاهەڵگری پێکەوەژیان بووە لە کەرکوک و هەمیشە دژی پەراوێزخستنی هەر پێکهاتەیەک بووین و ئێستاش پێمانوایە پارێزگار یان هەر پۆستێکی تر لای هەر پێکهاتەیەک بێت، دەبێت بێ جیاوازی خزمەتی هەمووان بکات، چونکە هەر سیاسەتێک جگە لەمە شکست دەهێنێت و خزمەتی کەرکوک ناکات.
لە کەرکوک ژنێک بە تای خوێنبەربوون گیانی لەدەستدا، تەندروستی شارەکەش ئاشکرایکرد، ژنەکە تەمەنی 43 ساڵانە و پیشەی ئاژەڵداری بوو.
بەڕێوەبەرایەتی تەندروستی کەرکوک بڵاویکردەوە، ژنێک دوایی توشبوونی بە تای خوێنبەربوون گیانی لەدەستدا.
ئاسۆ ئەحمەد، پەیامنێری کوردسات نیوز رایگەیاند، ئهو ژنهی دوێنێ چوارشهممه له كهركوك بە گومانی تای خوێنبەربوون خرایه ژێر چاودێری پزیشكییەوە و پشكنینەكانی بۆ دڵنیابونەوە رەوانەی بەغداد كرا، دهركهوت توشی تای خوێنبهربون بووه.
وتیشی، ژنەکە تەمەن 43 ساڵانەو خەڵكی چیمەن-ـی كەركوكە، بەهۆی ناجێگیری تەندروستییەوە، کەمێک پێش ئێستا گیانی لەدەستدا.
جێگەی ئاماژەیە، ئەمە یەکەم حاڵەتی تای خوێنبەربوونە لەمساڵدا لە کەرکوک تۆماربکرێت.
مەسعوود پزیشکیان، سەرۆک کۆماری ئیسلامی ئێران، لە پەیوەندییەکی تەلەفۆنیدا لەگەڵ ئیمانوێل ماکرۆن، هاوتا فەڕەنسییەکەی، دوایین گۆڕانکارییەکانی ناوچەکە، رەوتی دانوستانەکان و هەندێک پرسی ستراتیژی لەوانە دۆخی تەنگەی هورمزی تاوتوێ کرد.
بەپێی راگەیەندراوی نووسینگەی سەرۆکایەتی ئێران، بزشکیان لەم پەیوەندییەدا جەختی لەسەر چارەسەری دیپلۆماسی کردووەتەوە و وێڕای دەربڕینی پێزانین بۆ بەدواداچوونەکانی فەڕەنسا، رایگەیاندووە: خۆشحاڵین کە رێبازی فەڕەنسا پشتبەستووە بە چارەسەرکردنی کێشەکان لە رێگەی گفتوگۆوە، کۆماری ئیسلامی ئێرانیش هەمیشە پێشوازی لەم رێبازە دەکات.
پزیشکیان ئاماژەی بە پێشێلکارییە بەردەوامەکانی ئاگربەست لەلایەن ئیسرائیلەوە و هێرشە یەک لە دوای یەکەکانی بۆ سەر لوبنان کرد و رونی کردەوە: ئەم قەوارەیە بە هیچ شێوەیەک پابەندی بەڵێنەکانی ئاگربەست نەبووە، هەروەک چۆن لە غەززە هەرگیز پابەند نەبوو، ئێستاش لە لوبنان چەندین جار رێککەوتنەکان پێشێل دەکات، بەداخەوە کۆمەڵگەی نێودەوڵەتی هێشتا بینەری تاوانەکان و شەڕی جینۆساید و دەستدرێژییەکانی ئەم قەوارەیەیە، سروشتییە لە ژێر ئەم بارودۆخەدا بەرگری ئیسلامی لە لوبنان بۆ بەرگریکردن لە وڵات و گەلەکەی بجوڵێتەوە.
سەرۆک کۆماری ئێران ئاماژەی بە ئەزموونی دانوستانەکانی رابردوو و بەربەستە بەردەوامەکانی ئەمریکا کرد و وتی: لە کاتی دانوستانە دووقۆڵییەکانی نێوان ئێران و فەڕەنسا لە نیویۆرک، سەرەڕای گەیشتن بە تێگەیشتن، ئەوە ئەمریکا بوو کە بە دروستکردنی بەربەست رێگری لە پێشچوونی پرۆسەکە کرد.
بزشکیان هۆکارەکانی بێ متمانەیی بەرامبەر لایەنی ئەمریکی روون کردەوە و وتی: کۆماری ئیسلامی ئێران دوو جار چووە ناو گفتوگۆ لەگەڵ ئەمریکا، لە هەر دوو جارەکەدا و هاوکات لەگەڵ بەڕێوەچوونی دانوستانەکان، هێرشی سەربازی کرایە سەر ئێران، ئەمەش رەفتارێکە کە بە خەنجەر لێدان لە پشتەوە ئەژمار دەکرێت.
لە کۆتاییدا جەختی کردەوە کە لە بارودۆخی ئێستاشدا، چاوچنۆکی و لێدوانە هەڕەشەئامێزەکانی ئەمریکا و پابەندنەبوونی بە چوارچێوە پێویستەکان، رەوتی دیپلۆماسیی تووشی ئاڵۆزیی دوو هێندە کردووە.
مەسعوود پزیشکیان، سەرۆک کۆماری ئێران، ئەمڕۆ پێنجشەممە جەختی لەوە کردەوە کە وڵاتەکەی رووبەڕووی فشارێکی زۆری دەرەکی بووەتەوە بە مەبەستی تێکدانی سەقامگیری ناوخۆیی.
پزیشکیان لە لێدوانێکی رۆژنامەوانیدا رایگەیاند: بەم دواییانە لەگەڵ رێبەر، موجتەبا خامنەیی، بۆ ماوەی دوو کاتژمێر و نیو کۆبوومەتەوە و کۆبوونەوەکەش لە کەشێکی پڕ لە متمانە و گفتوگۆی راستەوخۆدا بووە.
سەبارەت بە ئامانجی فشارەکان، سەرۆک کۆماری ئێران وتی: ئێران رووبەڕووی فشار دەبێتەوە بۆ زیادکردنی تەنگژەی ئابووری و لاوازکردنی یەکڕیزی نیشتمانی.
ئاماژەی بەوەش کرد: مەبەست لەم فشارانە دروستکردنی ناڕەزایەتی گشتی و هاندانی خەڵکە بۆ رژانە سەر شەقامەکان، تاوەکو لەو رێگەیەوە پێکهاتەی دەسەڵات لاواز بکەن.
هەروەها بزشکیان ئاماژەی بەوە کرد کە بەرپرسانی ئەمریکی بە ئاشکرا باس لە توندکردنەوەی فشارە ئابوورییەکان بۆ سەر گەلی ئێران دەکەن، تەنها بەو ئامانجەی کە دۆخی ناڕەزایەتی بخوڵقێنن.
نوێنەری هەمیشەیی تاران لە نەتەوە یەكگرتووەكان چارەسەریی كۆتاییهێنان بە جەنگ بە كردنەوەی گەروی هورمز و هەڵگرتنی گەمارۆكانەوە دەبەستێتەوە.
ئەمیر سەعید ئیروانی، نوێنەری هەمیشەیی ئێران لە نەتەوە یەكگرتووەكان لە وەڵامی پێشنیازەكەی ئەمریكا تایبەت بە گەروی هورمز رایگەیاند، چارەسەری كۆتایی بۆ گەروی هورمز راگرتنی تەواوەتی جەنگەكەیە، لەگەڵ هەڵگرتنی تەواوی گەمارۆ دەریاییەكانی سەر ئێران.
ئاماژەی بەوەشكردووە، ئاساییكردنەوەی هاتووچۆ لە گەرووەكەدا بە هەنگاوی كرداریی بەدی دێت، نەك تەنها بە بڕیاری سیاسیی و راگەیاندن لەرێگەی میدیاكانەوە.
ئیرەوانی دەشڵێت: ئەمریكا دروشمی ئازادی كەشتیوانی وەك پاساوێك بۆ شەرعیەتدان بە كارەكانی و سەپاندنی ئەجێندای خۆی بەكاردەهێنێت.
داواش لە وڵاتانی ئەنجومەنی ئاسایش دەكات، لەژێر فشاردا بڕیار نەدەن و پشتیوانی بڕیارەكەی ئەمریكا نەكەن.
دوای ساڵانێکی زۆر لە چاوەڕوانی، رێکارە یاساییەکان دژی یەکێک لە گەورە تۆمەتبارانی کەیسی ئەنفال بە ناوی عەجاج دەستیپێکرد و پیرۆزبایی لە کەسوکاری قوربانییان دەکرێت.
قائیمقامیەتی قەزای چەمچەماڵ رایگەیاند، گەورە تۆمەتباری کەیسی ئەنفال بە ناوی عەجاج رووبەڕووی دادگا کراوەتەوە و پیرۆزبایی لە کەسوکاری سەربەرزی ئەنفالکراوان دەکەن کە توانراوە ئەم هەنگاوە گرنگە بنرێت.
ئاماژەی بەوەشکرد، سوپاس و پێزانینی تایبەتی ئاڕاستەی شاناز ئیبراهیم ئەحمەد دەکەن، کە لە ماوەی رابردوودا رۆڵی گرنگ و کاریگەری هەبووە لە هاوکاریکردن و پشتیوانیکردنی ئەم کەیسە، تا گەیاندنی تۆمەتبارەکە بە بەردەم دادگا و جێبەجێکردنی رێکارە یاساییەکان.
هەروەها سوپاسی هەموو ئەو کەس و لایەنانە کراوە کە ماندوونەناسانە هاوکاربوون لە دۆزینەوە و دەستگیرکردنی ئەو تۆمەتبارەدا.
قائیمقامیەتی چەمچەماڵ، جەخت لە مافە رەواکانی کەسوکاری قوربانییان کراوەتەوە و داواکراوە کە جگە لە سزادانی تاوانباران، کاربکرێت بۆ قەرەبووکردنەوەی مادی و مەعنەوی کەسوکاری سەربەرزی ئەنفالکراوان، وەک کەمترین وەفاداری بۆ ئازارەکانیان.
ئەمڕۆ یەكەم دانیشتنی دادگاییكردنی عەجاج دەستپێدەكات و كەسوكار و شایەتحاڵانی ئەنفالیش چاوەڕوانن سزایەكی توندی بەسەردا بسەپێنرێت.
دوای كۆكردنەوەی سەدان بەڵگە و وەرگرتنی سكاڵا لە شایەتحاڵانی ئەنفال، ئەمڕۆ یەكەم دانیشتنی دادگاییكردنی عەجاج ئەحمەد حەردان تكریتی ناسراو بە جەلادەكەی نوگرەسەلمان لە دادگای باڵای تاوانەكان لە بەغداد دەستیپێکرد.
پەیامنێری كوردستان نیوز رایگەیاند، زیاتر لە 250 سكاڵا لەلایەن كەسوكاری ئەنفالەوە لەسەر عەجاج تۆماركراوە و 17 شایەتحاڵ و ژمارەیەك لە كەسوكاری ئەنفال لە دانیشتنەكەدا ئامادە دەبن و وتەیان لێ وەردەگیرێت.
وتیشی، چاوەڕوان دەكرێت هەر ئەمڕۆ دادگاییكردنەكە كۆتایی پێ بهێنرێت و دادگا بڕیاری سزادانی عەجاج دەربكات.
دیلمان لەتیف پارێزەری سكاڵاكارانی دۆسیەی عەجاج بە كوردسات نیوزی راگەیاند، شاناز ئیبراهیم ئەحمەد رۆڵێكی گرنگ و بەرچاوی بینیوە لە ئامادەكردنی دۆسییەكان و چاوەڕێش دەكەن دادگا بڕیاری لە سێدارەدان بۆ عەجاج دەربكات.
ئاژانسی تەسنیم لە زاری سەرچاوەیەكی ئاگادارەوە بڵاویكردەوە، تاران تاوەكو ئێستا هیچ وەڵامێكی رەسمی سەبارەت بە دوایین پێشنیازی ئەمریكا پێشكەش نەكردووە.
ئەم سەرچاوەیە دەنگۆی میدیا ئەمریكییەكانی لەبارەی نزیكبوونەوەی هەردوولا لە ڕێككەوتنی كۆتایی بۆ كۆتاییهێنان بە جەنگ رەتكردەوە و رایگەیاند، دەقی پێشنیازەكەی واشنتۆن هێشتا چەند خاڵێكی تێدایە كە بۆ تاران قبوڵكراو نین.
ئاماژەی بەوەش كردووە، پڕوپاگەندە میدیاییەكانی ئەمریكا تەنها بۆ شاردنەوەی شكستی ترەمپ و پاشەكشەكردنیەتی لە هەنگاوە دوژمنكارانەكانی، كە لە بنەڕەتدا هەڵە بوون.
هەروەها جەختی كردەوە كە زمانی هەڕەشە بەرانبەر ئێران بێسوودە و تەنها رەوشەكە ئاڵۆزتر دەكات.
لە كۆتاییدا روونیكردەوە، تاران دوای پاشەكشەكەی ترەمپ، دەستی بە پێداچوونەوەی وردی دۆسیەكان كردووەتەوە و لە ڕێگەی نێوەندگیری پاكستنییەوە وەڵامی كۆتایی خۆی رادەگەیەنێت.
سەرۆكی پەرلەمانی ئێران هێرشی دووبارەی ئەمریكا و ئیسرائیل بۆسەر وڵاتەكەی بەدوور نازانێت و دەڵێت: سەركەوتنی ئێران لەم جەنگەدا پێگەی نێودەوڵەتییان جێگیر دەكات.
محەمەد باقر قاڵیباف لە پەیامێكدا دەڵێت، سەركەوتنی ئێران لەم جەنگەدا دەبێتە هۆكارێك بۆ ئەوەی پێگەی نێودەوڵەتی ئێران جێگیر ببێت و ئێران رۆڵی سەرەكی و چالاكی دەبێت لە سیستمی نێودەوڵەتیدا.
قاڵیباف ئاماژەی بەوەش كردووە، ئێران لە قۆناغێكی نوێی جەنگدایە و لەم قۆناغەدا ئەمریكا هەوڵدەدات لەرێگای فشاری ئابوری و گەمارۆی دەریاییەوە ئێران ناچار بكات خۆی رادەست بكات.
دەشڵێت: دووبارە هێرشی سەربازی ئەمریكا و ئیسرائیل بۆسەر ئێران بەدوور نازانێت و رەچاوی ئەو بارودۆخەیان كردووە، بەڵام سەركەوتن لەم جەنگەدا دەبێتە سەرەتایەك بۆ پێشكەوتنی ماددی و مەعنەوی ئێران.
ئەمڕۆ یەكەم كاروانی حاجیانی هەرێمی كوردستان بەرەو سعودیە بەرێككەوتن، پرۆسەكەش تا 17ی مانگ بەردەوام دەبێت.
ئەمڕۆ یەكەم كاروانی حاجیان لە فڕۆكەخانەی نێودەوڵەتیی هەولێرەوە بەرێككەوتن، رۆژی شەممەی داهاتووش حاجیانی دهۆك و دووشەممەی داهاتووش حاجیانی سلێمانی بەرەو سعودیە بەڕێدەكرێن بۆ بەجێهێنانی فەریزەی حەج.
بەڕێوەبەرایەتی گشتی حەج و عومرەی كوردستان رایگەیاندووە، سەرجەم گەشتەكان لەلایەن وەزارەتی ئەوقاف و كاروباری ئایینی هەرێمەوە چاودێری دەكرێن و هەموو ئامادەكارییەكان تەواوكراون بۆ ئەنجامدانی گەشتەكان بەبێ كێشە و لەكاتی دیاریكراودا.
لای خۆیەوە كاروان ستونی وتەبێژی بەڕێوەبەرایەتی گشتی حەج و عومرەی هەرێم رایگەیاند، بۆ ئەمساڵ پێنج هەزار و 120 حاجی هەرێم گەشتی سعودیە دەكەن بۆ بەجێهێنانی فەریزەی حەج.
ئەمڕۆ لە بەغداد یەكەم دانیشتنی دادگاییكردنی عەجاج بەڕێوەدەچێت و كەسوكار و شایەتحاڵانی ئەنفالیش چاوەڕوانن سزایەكی توند بەسەر عەجاجدا بسەپێنرێت.
دوای كۆكردنەوەی سەدان بەڵگە و وەرگرتنی سكاڵا لە شایەتحاڵانی ئەنفال، ئەمڕۆ یەكەم دانیشتنی دادگاییكردنی عەجاج ئەحمەد حەردان تكریتی ناسراو بە جەلادەكەی نوگرەسەلمان لە دادگای باڵای تاوانەكان لە بەغداد بەڕێوەدەچێت، دیلمان لەتیف پارێزەری سكاڵاكارانی دۆسێی عەجاج بە كوردسات نیوزی راگەیاند، نزیكەی 200 دۆسێ ئامادەكراوە و لە یەكەم دانیشتنی دادگاییكردنیشدا ژمارەیەك لە سكاڵاكارانی كەسوكاری ئەنفالكراوان ئامادە دەبن و وتەیان لێوەردەگیرێت.
وتیشی، شاناز ئیبراهیم ئەحمەد رۆڵێكی گرنگ و بەرچاوی بینیووە لە ئامادەكردنی دۆسیەكان و چاوەڕێش دەكەن دادگا بڕیاری لە سێدارەدان بۆ عەجاج دەربكات.
كەسوكاری ئەنفالكراوانیش دوای تۆماركردنی سكاڵاكان چاوەڕوانن سزایەكی توند بەسەر عەجاجدا بسەپێنرێت و تۆڵەی كەسوكاری سەرجەم ئەنفالكراوانی لێبكرێتەوە.