کەشناسیی هەرێم رەوشی کەشوهەوای 48 سەعاتی داهاتووی بڵاوکردەوە و رایگەیاند، سبەینێ ئەگەری تاوەباران و بروسکەی کورتمەودای پاییزە لە ناوچە جیاجیاکانی هەرێمدا هەیە.

بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ ئاسمان بەگشتی لە نێوان نیمچەهەور و هەوری تەواودا دەبێت، پلەکانی گەرما بەراورد بە تۆمارکراوەکانی دوێنێ بە رێژەی یەک بۆ سێ پلە کەمێک بەرز دەبنەوە.

ئاماژەی بەوەشکرد، سبەینێ ئاسمان لە نێوان هەوری تەواو بۆ نیمچەهەور دەبێت، لە کاتەکانی بەیانییەوە تا دوای نیوەڕۆ، ئەگەری تاوەباران و بروسکەی کورتمەودای پاییزە هەیە لە ناوچە جیاجیاکانی هەرێمی کوردستاندا، پلەکانی گەرماش نزیک دەبنەوە لە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی

هەولێر: 30 پلەی سیلیزی

پیرمام: 27 پلەی سیلیزی

سلێمانی: 26 پلەی سیلیزی

هەڵەبجە:28 پلەی سیلیزی

چەمچەماڵ: 29 پلەی سیلیزی

دهۆک: 29 پلەی سیلیزی

زاخۆ: 30 پلەی سیلیزی

ئاکرێ:28 پلەی سیلیزی

گەرمیان:34 پلەی سیلیزی

حاجی ئۆمەران:22 پلەی سیلیزی

سۆران : 25 پلەی سیلیزی

 یوسف کیلابی، ئەندامی لیژنەی دارایی لە پەرلەمانی عیراق، دووپاتی کردەوە کە حکومەتی عیراق رووبەڕووی بارودۆخێکی دارایی سەخت بووەتەوە بەهۆی کەڵەکەبوونی قەرزەکان و دابەزینی داهاتەکانی نەوتدا.

کیلابی لە لێدوانێکی رۆژنامەوانیدا رایگەیاند: حکومەتەکەی کازمی، بەپێچەوانەی بەرزبوونەوەی نرخی ئاڵوگۆڕی دۆلار و ئەو کێشانەی هاووڵاتیان باجەکەیان دا، رادەستی حکومەتەکەی سودانی کرد بە بوونی دەستکەوتێکی نەقدی کە دەگەیشتە 70 ترلیۆن دینار.

ئاماژەی بەوەش کرد: حکومەتی پێشوو قەرزی شایستەی نزیکەی 210 ترلیۆن دیناری رادەستی حکومەتی ئێستا کردووە، هاوکات لەگەڵ راگرتنی فرۆشتنی نەوت بۆ زیاتر لە شەش مانگ بەهۆی روداوەکانی گەروی هورمزەوە، و روونی کردەوە: ئەم گەشەسەندنانە وڵاتیان رووبەڕووی ئاڵنگاریی دارایی گەورە کردووەتەوە کە پێویستی بە گرتنەبەری رێکاری بەپەلە هەیە بۆ چارەسەرکردنیان.

ناوبراو روونیشی کردەوە: حکومەتی ئێستا ئیدارەیەکی دارایی وەرگرتووە کە بەدەست کێشەی گەورەوە دەناڵێنێت، لە کاتێکدا عیراق بە شێوەیەکی بنەڕەتی پشتی بە داهاتی نەوت بەستووە بۆ دابینکردنی بودجەی گشتی و دانی موچەی فەرمانبەران، و ئاماژەی بەوەدا: بەردەوامبوونی پەککەوتنی داهاتەکانی نەوت مەترسی لەسەر توانای دەوڵەت دروست دەکات بۆ جێبەجێکردنی پێویستییە داراییەکانی.

ئامادەکارییەکانی 12هەمین خولی فێستیڤاڵی هەنار لە هەڵەبجە گەیشتوونەتە قۆناغی کۆتایی و بڕیارە فێستیڤاڵەکە بۆ ماوەی چوار رۆژ بەردەوام بێت.

ستار مەحمود، بەڕێوەبەری گشتیی کشتوکاڵی هەڵەبجە، لە لێدوانێکدا بۆ کوردسات نیوز رایگەیاند، زیاتر لە دوو مانگە کار و ئامادەکاریی بەردەوام بۆ رێکخستنی 12هەمین خولی فێستیڤاڵی هەنار دەکرێت و لە ئێستادا سەرجەم ئامادەکارییەکان لە قۆناغی کۆتاییدان، ئاماژەی بەوەشکرد کە رۆژی بەڕێوەچوونی فێستیڤاڵەکە بەپێی کەشوهەوای ناوچەکە دەستنیشان دەکرێت.

سەبارەت بە بەشداربووان، بەڕێوەبەری کشتوکاڵی هەڵەبجە ئاشکرایکرد، لەم خولەدا 550 خاوەنکار، جوتیار و دروستکەری کاری دەستی بەشدارن و شوێنی تایبەتیان بۆ تەرخان کراوە، بەشێکی تری کەپرەکان تایبەت دەبن بە خستنەڕووی خواردنە خۆماڵی و کەلەپوورییەکان.

فێستیڤاڵی هەنار و پایزی هەڵەبجە کە ساڵانە بەڕێوەدەچێت، گرنگی ئابوری، کشتوکاڵی و گەشتوگوزاری لەسەر ئاستی هەرێمی کوردستان هەیە، کە رۆڵێکی بەرچاو دەگێڕێت لە بوژاندنەوەی بازاڕی بەرهەمە ناوخۆییەکان و پشتگیریکردنی راستەوخۆی جوتیاران و خاوەن کارە بچوکەکان.

ئەمرۆ تەمویلی موچەی فەرمانبەرانی هەرێم دەکرێت و وەزارەتی دارایی هەرێمیش نوسراوی وەرگرتنی پارەکەی ئامادە کردووە.

سەرچاوەیەک لە وەزارەتی دارایی هەرێمی کوردستان  بە کوردسات نیوزی  راگەیاند، وەزارەتی دارایی  عیراق  ئاگاداری کردوونەتەوە ئەمرۆ تەمویلی موچەی مانگی نۆی فەرمانبەران دەکرێت .

ئاماژەی بەوەشکرد، نوسراوی وەرگرتنی پارەکە لە بانکی  ناوەندی لقی هەولێر لەلایەن وەزارەتی دارایی هەرێم ئامادەکراوە بۆ وەگرتنی پارەکە.

ئەمەش لەکاتێکدایە، دوێنێ وەزارەتی دارایی عیراق وربینی لە لیستی موچەی فەرمانبەرانی هەرێم تەواو کرد، هاوکات بەهۆی تەواوبوونی دەوامی رەسمی تەمویلی موچە کەوتە ئەمڕۆ پێنجشەممە.

سەرۆكی ئەمریكا دەڵێت، شایەنی خەڵاتی نۆبڵی ئاشتیە بەڵام گومانی لە بردنی هەیە.

دۆناڵد ترەمپ سەرۆكی ئەمریكا جارێكی تر رایگەیاند، ئەو شایەنی بەدەستهێنانی خەڵاتی نۆبڵی ئاشتییە بۆ ساڵی 2026، بەڵام تەنها دوو ڕۆژ پێش ڕاگەیاندنی براوەی خەڵاتەكە، گومانی خۆی دەربڕی دەربارەی دەرفەتەكانی بەدەستهێنانی.

ئاماژەی بەوەشكرد، رۆژی هەینی لیژنەی نۆبڵی نەرویژی كۆدەبێتەوە بۆ دیاریكردنی براوەی خەڵاتی ئاشتی بەڵام باوەڕناكەت ئەو هەڵبژێرن چونكە ئەوان پێوەرەكانیان جیاوازە كە رەنگە خەڵاتەكە نەبەخشنە كەسانی وەكو ئەو.

سەرۆكی ئەمریكا ئەوەشی خستەڕوو، هەستی بە شانازی كردووە كاتێك لە كانوونی دووەمی رابردوودا، ماریا كۆرینا ماچادۆ سەركردەی ئۆپۆزسیۆنی ڤەنزوێلا، مەدالیای خەڵاتی نۆبڵی ئاشتیی ساڵی 2025ی پێشكەش كرد كە خۆی بەدەستی هێنابوو.

ترەمپ پێی وایە لەسەر بنەمای بەشداربوونی لە هەوڵەكانی چارەسەركردنی هەشت ململانێ لە دوای وەرگرتنی دەسەڵاتەكەیەوە، شایەنی خەڵاتەكەیە.

سەركردەكان لە كامبۆدیا، ئیسرائیل و پاكستان رایانگەیاندووە، كە ترەمپیان بۆ خەڵاتەكە كاندید كردووە، لە كاتێكدا ئاژانسی رۆیتەرز ئاماژەی بەوەكردووە، هیچ رێگەیەك نییە بۆ پشتڕاستكردنەوەی دروستیی ئەو كاندیدكردنانە.

ئێران گەیشتنی یەکەم گەشتی ئاسمانی لە شاری نەجەفەوە بۆ تاران راگەیاند، ئەمەش دوای بەخشینی تایبەت لە سزاکانی سەر کەرتی فرۆکەوانی و گەشتە ئاسمانییەکانی ئێران.

بەپێی میدیاکانی ئێران، ئه‌مڕۆ پێنجشەممە سەعات ٧:٣٠ی بەیانی، یەکەم فڕۆکەی هێڵی ئاسمانیی عیراقی وەک کۆمپانیایەکی بیانی، دوای راوەستانی بۆ چەند مانگێک، لە فڕۆکەخانەی نێودەوڵەتیی ئیمام خومەینی نیشتەوە.

ئەم گەشتە لەسەر هێڵی (نەجەف - تاران - نەجەف) ئەنجام دەدرێت، کە نیشانەی دەستپێکردنەوەی گەشتە ئاسمانییە راستەوخۆ و رۆژانەیییەکانی ئەو کۆمپانیایەیە بۆ فڕۆکەخانەی ئیمام خومەینی.

شایەنی باسە، بەڕێوەبەرایەتیی هێڵە ئاسمانییەکانی عیراق رۆژی دووشەممەی رابردوو رایگەیاندبوو کە لە رۆژی پێنجشەممەوە گەشتە راستەوخۆکانی بۆ ئێران دەست پێ دەکاتەوە.

لە راگەیەندراوێکی وەزارەتی گواستنەوەی عیراقیشدا هاتووە: پلانە نوێیەکە گەشتی بەردەوام و رۆژانە لەنێوان فڕۆکەخانەی نێودەوڵەتیی نەجەف و فڕۆکەخانەکانی مەشهەد، تاران و ئەسفەهان لەخۆدەگرێت، ئەمەش بە مەبەستی ئاسانکاری لە هاتووچۆی گەشتیاران و رەخساندنی دەرفەتی گواستنەوەی ئاسمانیی بەردەوام لەنێوان عیراق و شارەکانی ئێراندا.

قائیمقامیەتی قەزای مەڵبەندی سلێمانی جەخت لە بەردەوامی و چڕکردنەوەی چاودێریی بازاڕەکان دەکاتەوە و هۆشداری دەداتە بازرگانان و کاسبکاران لە هەر هەوڵێک بۆ بەرزکردنەوەی نرخی کاڵا و شتومەکە بنەڕەتییەکان.

فازڵ عومەر، قائیمقامی سلێمانی بەوەکالەت رایگەیاند؛ لە رێگەی لیژنە هاوبەشەکانی قائیمقامیەتەوە بە شێوەیەکی بەردەوام بەدواداچوون لە ناو بازاڕەکاندا دەکەن بە مەبەستی کۆنتڕۆڵکردنی نرخەکان و رێگریکردن لە قۆستنەوەی بڕیارەکەی حکومەتی عیراق بۆ گرانکردنی نرخی کاڵا و پێداویستییە سەرەکییەکانی هاووڵاتییان.

قائیمقامی سلێمانی بەوەکالەت ئاماژەی بەوەشکرد، بڕیاری دیاریکردنی بەهای 100 دۆلاری ئەمریکی بە 150 هەزار دینار لەلایەن حکومەتی عیراقەوە بڕیارێکی کتوپڕ بووە، بەڵام سەرجەم ئەو کاڵا و شتومەکانەی ئێستا لە بازاڕەکاندا بەردەستن، بە نرخی پێش بڕیارەکە هاوردە کراون، بەوهۆیەوە بە هیچ جۆرێک رێگە نادرێت نرخەکانیان بەرز بکرێنەوە.

جەختیشی کردەوە، رۆژانە لە رێگەی بەڕێوەبەرایەتیی چاودێریی بازرگانییەوە لیستی نوێی نرخەکانیان بەدەست دەگات و لەسەر ئاستی سەرجەم بازاڕەکان چاودێریی دەکەن، هۆشداریشی دا کە هەر کاسبکار یان بازرگانێک سەرپێچی بکات و نرخەکان بەرز بکاتەوە، رووبەڕووی رێکاری یاسایی و لێپێچینەوەی توند دەکرێتەوە.

لە بەغداد سەرۆک کۆماری عیراق و سەرۆکی وەزیران کۆبوونەوە و دوا پێشهاتە سیاسی، ئابوری و گەشەپێدانەکانی وڵاتیان تاوتوێ کرد.

بەپێی راگەیەنراوێکی سەرۆکایەتیی کۆمار، ئەمڕۆ، نزار ئامێدی، سەرۆک کۆماری عیراق لەگەڵ عەلی زەیدی، سەرۆکی ئەنجومەنی وەزیران کۆبووەوە؛ لە کۆبوونەوەکەدا تاوتوێی گشتیی بارودۆخی ناوخۆیی و دۆسیەی تەواوکردنی پێکهاتەی کابینەی حکومەت کرا.

لە بەشێکی تری کۆبوونەوەکەدا، هەردوولا جەختیان لەسەر پێویستیی بەردەوامبوونی حکومەت کردەوە لە جێبەجێکردنی بەرنامەکەی کە لەسەر بنەمای چاکسازیی ئابوری و دروستکردنی هاوبەشیی بەرهەمدار لەگەڵ وڵاتانی دراوسێ و دۆست داڕێژراوە، بە جۆرێک کە رەنگدانەوەی ئەرێنی لەسەر ئابوریی عیراق و رەخساندنی هەلی کار بۆ هاووڵاتییان هەبێت.

هاوکات سەرۆک کۆمار و سەرۆک وەزیران ئاماژەیان بە گرنگیی کارکردنی بەردەوام کرد بۆ دۆزینەوەی چارەسەری ریشەیی و بەردەوام بۆ ئاڵنگارییەکانی ئێستای وڵات لە سەرجەم بوار و سێکتەرە جیاوازەکاندا.

دەستەی گشتیی فڕۆکەوانیی مەدەنیی سعودیە ئاماری هێرشەکانی سەر دوو فڕۆکەخانەی سەرەکیی وڵاتەکەی رادەگەیەنێت و ئاشکرایدەکات، بەهۆی ئامانجگرتنی فڕۆکەخانەکانی ریاز و ئەبهاوە، سێ کەس گیانیان لەدەستداوە و 36 کەسی تریش بریندار بوون.

بەپێی راگەیەنراوێکی دەستەی گشتیی فڕۆکەوانیی مەدەنی، دوێنێ و ئەمڕۆ، فڕۆکەخانەی نێودەوڵەتیی ئەبها و فڕۆکەخانەی نێودەوڵەتیی مەلیک خالید لە ریاز رووبەڕووی دوو هێرش بوونەتەوە و تیمەکانی فریاگوزاری و لایەنە پەیوەندیدارەکان راستەوخۆ دەستیان بە بەهاناوەچوون کردووە.

لە بەشێکی تری راگەیەندراوەکەدا هاتووە، لە ئەنجامی هێرشەکەی سەر فڕۆکەخانەی ئەبها، دوو ژنی دانیشتووی سعودیە بە نەتەوە مەغریبی و جەزائیری گیانیان لەدەستداوە و 28 کەسی تریش بریندار بوون؛ هاوکات هێرشەکەی سەر فڕۆکەخانەی مەلیک خالید لە ریاز بووەتە هۆی گیانلەدەستدانی هاووڵاتییەکی سودانی و برینداربوونی هەشت کەسی تر.

دەستەی فڕۆکەوانیی سعودیە جەختیشیکردووەتەوە، تەواوی بریندارەکان رەوانەی نەخۆشخانە کراون بۆ وەرگرتنی چارەسەر و زیانی مادیش بەر ناوەندەکان کەوتووە؛ هەروەها بە هەماهەنگی لەگەڵ دەزگا ئاسایشییەکاندا کار لەسەر هەڵسەنگاندنی زیانەکان و پاراستنی ئاسایشی گەشتیاران و کارمەندانی فڕۆکەوانی دەکرێت.

دواى گیانلەدەستدانى فەرمانبەرێکی تاقیگە لە پەیمانگەیەکی تایبەت بە توێژینەوەی نەخۆشیی تاعون لە سيبيريا، دۆناڵد ترەمپ رەخنە لە بێدەنگیی مۆسکۆ دەگرێت و تەندروستیی روسیاش دڵنیایی دەداتە هاووڵاتییانی.

دۆناڵد ترەمپ، سەرۆکی ئەمریکا رایگەیاند، روسیا سەبارەت بە روداوەکەی نەخۆشیی تاعون زانیاریی زۆر ئاشکرا ناکات، رێک وەک ئەوەی چین لە بەرانبەر ڤایرۆسی کۆرۆنادا ئەنجامی دا.

ترەمپ سەبارەت بە گیانلەدەستدانی ئەو فەرمانبەرە ئاماژەی بەوەکرد، بڕوا ناکات روداوەکە پەیوەندیی بە بەرهەمهێنانی چەکی بایۆلۆجییەوە هەبێت و وتیشی، "روسیا جەخت دەکاتەوە کە بارودۆخەکە لەژێر کۆنتڕۆڵدایە و ئێمەش خەریکی پشتڕاستکردنەوەی زانیارییەکانین."

لە بەرانبەردا، ئاژانسی تەندروستیی گشتیی روسیا بوونی هەر مەترسییەکی بڵاوبوونەوەی پەتای لە شاری 'ئێرکۆتسک' و ناوچەکانی دەوروبەری لە سیبیریای باشوری رۆژهەڵات ڕەتکردەوە و ئاشکرایکرد، چاودێریی پزیشکی بۆ زیاتر لە 90٪ی ئەو کەسانەی بەرکەوتنیان لەگەڵ کۆچکردووەکەدا هەبووە کۆتایی پێهاتووە و هیچ نیشانەیەکی نەخۆشییەکە تێیاندا بەدی نەکراوە.

هاوکات دیمیتری پیسکۆڤ، وتەبێژی کۆشکی سەرۆکایەتی روسیا 'کرملن ' رایگەیاند، روسیا رێکخراوی تەندروستیی جیهانیی لە زانیارییەکانی تایبەت بە باری تەندروستی و هەوکردنی سییەکان لە ناوچەی ئێرکۆتسک ئاگادار کردووەتەوە.

بانکی ناوەندیی عیراق ئاشکرایدەکات، بڕیاری دەستکاری کردنی نرخى ئاڵوگۆڕى دراو وەک رێکارێکی نائاسایی و پێشوەختە بووە بۆ دابینکردنی بودجە و پاراستنی رەوشی دارایی وڵات.

حەیدەر غازی، بەڕێوەبەری راگەیاندنی بانکی ناوەندیی عیراق رایگەیاند، عیراق لەبەرانبەر بارودۆخێکی نائاسایی و سەختدایە بەهۆی داخرانی گەروی هورمز و کەمبوونەوەی هەناردەی نەوت، کە ئەوەش بووەتە هۆی دابەزینی داهاتەکان؛ بۆیە ئەم گۆڕانکارییە لە نرخى ئاڵوگۆڕدا بۆ رێگریکردن بووە لە زیانی گەورەتر بە ئابوریی دەوڵەت.

ئاماژەی بەوەشکرد، بڕیارەکە هاوکار دەبێت لە بووژانەوەی پیشەسازیی ناوخۆیی و بەرهەمی نیشتمانی، بەو پێیەی رێگە لە هەڵکشانی هاوردەکردنی کەلوپەلی دەرەکی دەگرێت و لەمەودوا زیاتر پشت بە بەرهەمی ناوخۆیی دەبەسترێت.

سەبارەت بە جیاوازیی نرخی رەسمی دۆلار و نرخی بازاڕەکان، بەڕێوەبەری راگەیاندنی بانکی ناوەندی جەختی کردەوە، ئەو جیاوازییە بەستراوەتەوە بەو مامەڵە بازرگانییانەی لە دەرەوەی رێکار و یاساکان دەکرێن؛ هاوکات حکومەت کار لەسەر توندکردنەوەی کۆنتڕۆڵی سنورەکان و رێکخستنەوەی هاتنەژوورەوەی کەلوپەل دەکات.

سەرۆکایەتیی شارەوانیی هەولێر هۆشدارییەک ئاراستەی سەرجەم فەرمانبەران، هاووڵاتییان و نوسینگەکانی کڕین و فرۆشتنی خانووبەرە دەکات و رایدەگەیەنێت، کڕین و فرۆشتن بە زەویی فەرمانبەران بەرلە تەواوبوونی مامەڵە یاساییەکانیان بە هەموو شێوەیەک قەدەغەیە.

بەپێی راگەیەندراوێکی سەرۆکایەتیی شارەوانیی هەولێر، دوای بڕیارەکەی ئەنجومەنی وەزیران بۆ دابەشکردنی زەوی بەسەر فەرمانبەراندا، تێبینی کراوە هەندێک لەو فەرمانبەرانەی زەوییان بۆ دەرچووە یان زەوییەکانیان بە شێوەی کارتە، دەستیان کردووە بە کڕین و فرۆشتن؛ شارەوانی جەخت دەکاتەوە کە ئەم کارە بە تەواوی پێچەوانەی یاسایە و دەبێتە هۆی سەرهەڵدانی کێشەی گەورەی کۆمەڵایەتی.

شارەوانیی هەولێر جەختیشیکردووەتەوە، تا ئەو کاتەی سەرجەم مامەڵە و رێکارە یاساییەکان تەواو نەبن و وێنەی تۆماری رەسمی 'تاپۆ' وەرنەگیرێت، هیچ مامەڵەیەکی کڕین و فرۆشتن دانپێدانراو نییە و نوسینگەکانی خانووبەرەش لە ئەنجامدانی کەوتنی هەر سەرپێچییەک بەرپرسیار دەبن.

لە بەشێکی تری ڕاگەیەندراوەکەدا هاتووە، لە کۆی 82 هەزار ناوی فەرمانبەرانی سنوری شاری هەولێر، تا ئێستا لە هەشت قۆناغدا 55 هەزار فەرمانبەر زەوییان پێدراوە و کارکردنیش لەسەر قۆناغەکانی تر بەردەوامە.

هێڵی ئاسمانیی عیراق گەشەکردنێکی بەرچاو لە جوڵەی گەشتەکانیدا رادەگەیەنێت و لە مانگی ئەیلوولدا لە رێگەی زیاتر لە هەزار و 500 گەشتەوە، سەرکەوتوو بووە لە گواستنەوەی زیاتر لە 271 هەزار گەشتیار.

گواستنەوەی ئاسمانیی عیراق گەشەکردنێکی بەرچاو بەخۆیەوە دەبینێت؛ کۆمپانیای گشتیی هێڵە ئاسمانییەکانی عیراق ئاماری گەشتەکانی مانگی ئەیلوولی رابردوو بڵاودەکاتەوە و جەخت لەسەر فراوانکردنی تۆڕی گەشتەکانی دەکاتەوە.

وەزارەتی گواستنەوەی عێراق لە راگەیەنراوێکدا بڵاویکردەوە، کۆمپانیای گشتیی هێڵە ئاسمانییەکانی عیراق لە مانگی ئەیلوولی 2026دا چالاکییەکی بەربلاوی ئەنجامداوە، بە شێوەیەک لە رێگەی هەزار و 585  گەشتی راستەوخۆوە، 271 هەزار و 589 گەشتیاری بۆ وڵاتانی جیاوازی جیهان گواستووەتەوە.

لەلای خۆشییەوە، ، بەڕێوەبەری گشتیی کۆمپانیاکە رایگەیاندووە، کۆمپانیاکەیان بەردەوامە لە جێبەجێکردنی پلانەکانی بۆ فراوانکردنی تۆڕی گەشتە ئاسمانییەکان و ئامادەکاریی زیاتری گەشتی ئاسمانیی عیراق بۆ پێشکەشکردنی خزمەتگوزاریی شایستەتر بە گەشتیاران.

راوێژکاری دارایی سەرۆک وەزیرانی عیراق رایدەگەیەنێت، گۆڕانکاری لە نرخى ئاڵوگۆڕى دراودا بەشێکە لە هەنگاوی پێشوەختە بۆ رووبەڕووبوونەوەی ھەر قەیرانێک و پاراستنی سەقامگیریی ئابوریی و دارایی وڵات، ئاشکراشی دەکات پرۆسەی دابینکردنی پارە بۆ بازرگانیی دەرەکی بەشێوەیەکی بەردەوام و ئاسایی بەڕێوەدەچێت.

مەزهەر محەمەد ساڵح، راوێژکاری دارایی سەرۆک وەزیرانی عیراق رایگەیاند، جێگیریی نرخى دیناری عیراقی بەرانبەر دۆلار و دراوە بیانییەکان، بەشێوەیەکی راستەوخۆ بەستراوەتەوە بە بەردەستبوونی دراوی بیانی و توانای ئابوریی وڵات لە دابینکردنی پێداویستییەکانی بازرگانیی دەرەکی.

ئاماژەی بەوەشکرد، بەهۆی ئاڵۆزی و ئاڵەنگارییە هەرێمایەتی و نێودەوڵەتییەکان، بەتایبەت لێکەوتەکانی شەڕ و ئاڵۆزییەکانی رەنگە کاربکەنە سەر هەناردەکردنی نەوت لە رێگەی گەروی هورمزەوە، عیراق پێویستی بە گرتنەبەری رێکاری وشیارانە و پێشوەختە هەیە بۆ پاراستنی داهاتی نەوت و رەوتى هاتنی دراوی بیانی.

راوێژکاری دارایی سەرۆک وەزیرانی عیراق جەختیشیکردەوە، ئەو رێکارانەی گیراونەتەبەر بە مانای بوونی ئاڵۆزی یان کەلەبەر لە ئابوریی عیراقدا نایەن، بەڵکو تەنها وەک خۆئامادەکردن و دروستکردنی پەناگەیەکی ئارامی داراییە بۆ هەر پێشهاتێک کە کاربکاتە سەر داهاتی دەوڵەت و تواناکانی لە دابینکردنی خەرجییە گشتییەکان.

مەزهەر محەمەد ساڵح ئەوەشی خستەڕوو، ئەوەی کە حکومەت لە رێگەی گومرک، باج، و بەردەوامیی پاڵپشتیکردنی بەرهەمە سەرەکییەکانی وەک خۆراک، دەرمان و سوتەمەنی، رێگە نادات بارگرانی بکەوێتە سەر شانی هاووڵاتییان و ئامانج لەم هەنگاوانە پاراستنی ئاستی بژێوی و توانای کڕینی هاووڵاتییانە لە هەر شۆکێکی دەرەکیی بازاڕی نەوت.

تەندروستیی سلێمانی رایگەیاند لە مانگی رابردودا 29 هەزار و 299 چارەخواز سەردانی نەخۆشخانەی شاریان کردوە و چارەسەریان وەرگرتوە.

ئەمڕۆ چوارشەممە، لە راگەیەندراوێکدا، تەندروستیی سلێمانی ئاماری سەردانیکردنی نەخۆشخاەی شاری لە رێکەوتی 1ـی 9 بۆ 30ـی 9ـی 2026 بڵاوکردەوە.

بە گوێرەی راگەیەندراوەکە، 29 هەزار و 299 چارەخواز سەردانی نەخۆشخانەکەیان کردوە و هەزار و 208 نەشتەرگەری جۆراوجۆریش ئەنجام دراوە.

ئامارەکان بەمشێوەیەن؛22 هەزار و331  چارەخواز سەردانی بەشی فریاکەوتنیان کردوە و پێنج هەزار  و917 سەردانی بەشی ئۆپی دی و 985 نەخۆش سەردانی بەشی گورچیلەی دەستكردیان كردووە و چارەسەریان وەرگرتوە.

هاوکات، شەش هەزار و 709 نەخۆش داخڵ کراون و هەر لەو ماوەیەدا لە نەخۆشخانەی شار هەزار و 208  نەشتەرگەری جۆراوجۆر ئەنجام دراوە، كە 460 نەشتەرگەری فریاكەوتن و 103 نەشتەرگەری قەستەرە و 74 شەبەكە و باڵۆن و 82 نەشتەرگەری بۆ منداڵان بووە.

تەندروستی سلێمانی ئەوەشیخستوەتەڕوو، مانگی رابردوو  65 هەزار و 865 شیكاری تاقیگەیی و دوو هەزار و 762 هێڵكاری دڵ كراوە، هەروەها 12 هەزار و 210  تیشك و 469 ئیكۆ و  سێ هەزار و 243 سۆنەر و 652 چارەسەری سروشتی ئەنجام دراوە.

وەزیری دەرەوەی ئەمریکا رایگەیاند، ئێران چەندین دەرفەتی بۆ گەیشتن بە رێککەوتن لەگەڵ واشنتن لەبارەی بەرنامە ناوەکییەکەی دەستداوە، جەختیشی کردەوە کە تاران بە هیچ شێوەیەک دەستی بە چەکی ئەتۆمی ناگات.

مارکۆ روبیۆ، وەزیری دەرەوەی ئەمریکا ، لە کۆنفرانسێکی رۆژنامەوانیی هاوبەشدا لەگەڵ هاوتا یۆنانییەکەی رایگەیاند، ئێران تەواوی دەرفەتەکانی بۆ رێککەوتن لەگەڵ ئەمریکا لە دەستداوە.

رۆبیۆ ئاماژەی بەوەکردوە، بۆ رێککەوتن دەبێت ئێران گرنتی ئەوەبدات نەبێتە خاوەنی چەکی ئەتۆمی و هەرگیزیش نابێتە خاوەنی ئەو چەکە.

لەبارەی رەوشی ئێرانیشەوە، وەزیرەکەی ئەمریکا وتویەتی؛ تاران لە ئێستادا لە هەمووکات لاوازترە، تاران توانای درۆن و موشەکیی بەشێوەیەکی بەرچاو کەمبوەتەوە و هێزی دەریایی و ئاسمانیی وڵاتەکە تێکشکێنراون.

لە بارەی رەوشی گەروی هورمزیشەوە، مارکۆ رۆبیۆ دڵنیای داوە، کۆنتڕۆڵی گەروەکە لە دەستی ئێراندا نەماوە و ئاستی گواستنەوەی نەوت تێیدا گەیشتووەتەوە ئاستی پێش دەستپێکردنی جەنگ و ئێستا ئابوری ئێران لە خراپترین رەوشی مێژووی خۆیدایە.