دوای بێسەروشوێنبوونی ژمارەیەک گەنجی دەڤەری راپەڕین، توانرا بەدواداچونی خێرا بۆ بابەتەکە بکرێت گەڕاندنەوەی سەرجەم کۆچبەران بە سەلامەتی.

دوای ئەوەی چەند هەفتەیەک لەمەوبەر 33 گەنج و لە رۆژانی رابردووشدا سێ گەنجی تر گەڕێندرانەوە، بەرەبەیانی ئیمڕۆ هەینی، 11 گەنجی تری دەستبەسەرکراوی لیبیا بە سەلامەتی گەیەندرانەوە خاکی هەرێمی کوردستان و رادەستی خێزانەکانیان کرانەوە.

ئەم پڕۆسەیە بە یاوەریکردنی سەلیم پاشا، ڕاوێژکار لە فەرمانگەی پەیوەندییەکانی دەرەوە بەڕێوەچوو. لە فرۆکەخانەش لەلایەن عەلی سەعید، بەڕێوەبەری داتا و زانیاری لە ناوەندی هاوبەشی هەماهەنگی قەیرانەکان (JCC) و تیمەکانی وەزارەتی ناوخۆ پێشوازییان لێکرا. دوای ئەنجامدانی پشکنینی تەندروستی، سەرجەم گەنجەکان گەیەندرانەوە باوەشی بنەماڵەکانیان.

لە ئێستاشدا هەوڵەکانی حکومەتی هەرێمی کوردستان بۆ دۆزینەوەی سۆراخ و گەڕاندنەوەی 10 گەنجی تری بەندکراوی دەڤەری راپەڕین لە لیبیا بەردەوامن.

شایەنی باسە، بەهۆی رێکارە توندەکانی حکومەتی هەرێمی کوردستان لە ماوەی رابردوودا بۆ رووبەڕووبوونەوەی تۆڕەکانی قاچاخچێتی، ئاستی کۆچی نایاسایی بە شێوەیەکی بەرچاو کەمی کردووە.

رۆژنامەی نیویۆرك تایمز ئاشكرایدەكات, پنتاگۆن ئامادەكارییەكانی بۆ وەشاندنی گورزی سەربازی لە ئێران تەواو كردووە، و بڕیارە لە داهاتوویەكی نزیكدا سێ كەشتیی فڕۆكەهەڵگر و هێزێكی گەورەی سوپای ئەمریكا لە رۆژهەڵاتی ناوەڕاست جێگیر بكرێن.

بەپێی راپۆرتێكی رۆژنامەی نیویۆرك تایمز لەسەر زاری چەند لێپرسراوێكی ئەمریكی، پنتاگۆن پێنج بژاردەی سەربازیی جیاوازی بۆ هێرشكردنە سەر ئێران ئامادە كردووە و خستوونیەتە بەردەم دۆناڵد ترەمپ, ئامانجی سەرەكیی هێرشە چاوەڕوانكراوەكان بۆردومانكردنی جبەخانە و كۆگاكانی درۆن و موشەكی بالیستیی ئێرانە، لەگەڵ ئەگەری بە ئامانجگرتنی بارەگاكانی سوپای پاسداران و كەرتی وزە لە كاتی فراوانبوونی جەنگەكەدا.

رۆژنامەكە ئاماژەی بەوەكردووە سەرۆكی ئەمریكا چاوەڕوانی ئەنجامی هەڵبژاردنەكانی ئیسرائیل و هەڵبژاردنی نیوەی خولی كۆنگرێس دەكات تا بڕیاری یەكلاكەرەوە بدات.

 سەرەڕای ئەمەش، لێپرسراوانی باڵای سەربازی دووپاتیان كردووەتەوە سوپای ئەمریكا تەواوی رێكارەكانی جێبەجێ كردووە تا لە ئەگەری گۆڕینی بڕیارەكەی ترەمپدا، لە ماوەی چەند رۆژێكدا ئۆپەراسیۆنی سەربازی لە دژی تاران دەستپێبكات.

فڕۆکەهەڵگری ئەمریکی "ئەبراهام لینکۆڵن"، دوای ئەرکێکی درێژخایەن لە شەڕی دژی ئێران کە نیگەرانیی زۆری لەسەر تەندروستیی کارمەندەکانی دروستکردبوو گەڕایەوە بەندەری سەرەکیی خۆی لە کەناراوەکانی رۆژئاوای ویلایەتە یەکگرتووەکان.

کەسوکاری سەربازەکان لە بەندەری "سان دیێگۆ" لە کالیفۆرنیا کۆبووبوونەوە و ریزیان بەستبوو بۆ پێشوازیکردن لە ئازیزانیان، دوای ئەوەی بۆ نزیکەی ساڵێک لە یەکتر دابڕابوون.

ئەم کەشتییە ئەتۆمییە لە تشرینی دووەمی 2025 بە مەبەستی ئەرکێک لە دەریای چینی باشور کالیفۆرنیای بەجێهێشت، بەڵام بەر لە دەستپێکردنی هێرشە هاوبەشەکانی ئەمریکا و ئیسرائیل بۆ سەر ئێران لە کۆتاییەکانی شوباتی رابردوو، ئەرکەکەی پێچەوانە کرایەوە و رەوانەی رۆژهەڵاتی ناوەڕاست کرا.

کەشتییەکە لە ئاودا مایەوە تا سەرەتای ئەیلوول لە تايلاند لەنگەری گرت، بەڵام ئەم ئەرکە درێژخایەنە کاریگەریی قورسی دەروونی و جەستەیی لەسەر هێزەکانی سەر فڕۆکەهەڵگرەکە و تەواوی گرووپە جەنگییەکەی بەجێهێشتووە.

وەزارەتی کشتوکاڵ و سەرچاوەکانی ئاوی حکومەتی هەرێمی کوردستان، لە راگەیەندراوێکدا ناڕەزایەتی توندی بەرانبەر بڕیاری سەرۆک وەزیرانی عیراق بۆ دواخستنی سەندنەوەی باج لەسەر هێلکە و مریشکی هاوردەکراو دەربڕی.

 بێگەرد تاڵەبانی، وەزیری کشتوکاڵ، جەختی لەوە کردەوە، کە کەرتی پەلەوەر لە هەرێم گەیشتووەتە قۆناغی خۆژێنی و بەرهەمی ناوخۆیی نەک تەنها پێداویستی هەرێم، بەڵکو توانای دابینکردنی پێداویستی تەواوی عیراقی هەیە.

 بەپێی ئامارەکان، 59 پروژەی هێلکەی مێز ساڵانە 4.8 ملیار هێلکە بەرهەم دەهێنن لە کاتێکدا پێویستی ناوخۆ تەنها 1.8 ملیارە، هەروەها زياتر لە 2100 پڕۆژەی بەرهەمهێنانی مریشک ساڵانە لەسەرووی 450 هەزار تۆن ە و زۆر زیاترە لە پێویستی ناوخۆ کە  150 هەزار تۆنە

وەزیری کشتوکاڵ ئاماژەی بەوەش کردوە،  لابردنی باج لەسەر بەرهەمی دەرەکی دەبێتە هۆی خنکاندنی بازاڕی ناوخۆ، زیانی دارایی قورس بە کەرتی پەلەوەر دەگەیەنێت و دەیان هەزار هەلی کار دەخاتە مەترسییەوە.

لەم چوارچێوەیەدا،  بێگەرد تاڵەبانی داوا لە حکومەتی فیدراڵ کردوە لەبری ئەم بڕیارە، هاوکاری دابینکەرانی ئالیک و کێڵگەکان بکات و ەێگە بدات بەرهەمی زیادەی هەرێمی کوردستان بە ئاسانی رەوانەی پارێزگاکانی دیکەی عیراق بکرێت.

وەزارەتی کارەبا و سامانە سروشتییەکانی هەرێم رایدەگەیەنن؛لە سەعات 12ـی ئەمشەوەوە بەهۆی کەمبونەوەی بەرهەمهێنانی غاز لە لایەن کۆمپانیای داناغازەوە، بۆ ماوەی چوار رۆژ پێدانی کارەبا کەمدەبێتەوە.

لە راگەیەندراوە هاوبەشەکەی کارەبا و سامانە سروشتییەکاندا هاتووە؛ هۆکاری کەمبونەوەی پێدانی کارەبا، دەستکردنە بە قۆناغی دووەمی چاکسازییەکانی کۆمپانیای داناغاز، لە کێڵگەی کۆرمۆر.

ئاماژە بەوەشکراوە، کەمبونەوەکە بۆ ماوەی چوار رۆژە و بەرهەمهێنانی غاز لە  520 ملیۆن پێ سێجا بۆ 260 ملیۆن پێ سێجا کەمدەبێتەوە و بەمەش بڕی 1070 مێگاوات کارەبا کەمدەبێتەوە.

دڵنیایی بە هاوڵاتیان دەدرێت و دوو وەزارەتەکە دەڵێن؛ هەموو هەوڵی خۆیان دەدەن بۆ  ئەوەی کەمترین کاریگەریی لەسەر کاتەکانی پێدانی کارەبا هەبێت و دڵنیایی دەدەن، کە ئەم کەمبونەوەی غازە کاریگەری لەسەر غازی ماڵان نابێت.

سەرۆک وەزیرانی عیراق رایگەیاند، بۆ دەربازبون لەو قەیرانەی تییکەوتون، سێ بژاردەیان لەبەردەستدا بووە؛ جێبەجێكردنی پاشەكەوتی ناچاری، 45 رۆژ جارێک موچە دابەشبکرێت یاخود پەنا ببرێت بۆ قەرزی دەرەکی و نوقمکردنی زیاتری وڵات.

ئەمڕۆ پێنجشەممە، لە میانی کۆبونەوەی لەگەڵ سەرۆکی ئەنجومەنی نوێنەرانی عیراق، علەی زیەدی سەرۆک وەزیرانی عیراق رایگەیاند، بەرزکردنەوەی نرخی دۆلار ناچاریبووە و ئابوری عێراق لە قەیرانێکی قوڵدایە.

عەلی زەیدی ئاماژەی بەوەکرد، کاتێک حکومەتی گرتوەتە دەست زیاتر لە 200 ملیار دینار قەرزی کەڵەکەی هەبووە و بۆ رزگاربونی ئابوری وڵاتێش سێ بژارەدیان لەبەردەستدا بووە و  هەندێك كەس هەوڵیانداوە درزێك لەنێوان ئەوان و خەڵكدا دروست بكەن.

لە بارەی بژاردەکانەوە، لەبری بەرزکردنەویە نرخی دۆلا، جێبەجێكردنی پاشەكەوتی ناچاری، 45 رۆژ جارێک موچە دابەشبکرێت یاخود پەنا ببرێت بۆ قەرزی دەرەکی و نوقمکردنی زیاتری وڵات ئەو بژاردانەبوون کە لەبەردەستدابوون.

زەیدی دەڵێت؛ پێویست بوو حكومەت مانگانە 10 ترلیۆن دینار دابین بكات و ئەمەش وایکردوە بڕیاری بەرزکردنەوەی نرخی دۆلار بدەن تا  لەو قەیرانە ئابوریەی توشی وڵات بوە رزگاریان ببێت.

سەبارەت بە بازاڕی دراو و نرخی ئاڵوگۆڕی دینار بەرانبەر بە دۆلار وتویەتی؛ جیاوازیی پێشوی نرخی ئاڵوگۆڕی دراو لەلایەن هەلپەرستانەوە دەقۆزرایەوە و سودی بۆ هاووڵاتیان نەبووە.

دۆناڵد ترەمپ، سەرۆکی ئەمریکا رایگەیاند، پێش هەڵبژاردنەکانی ئەمریکا، کە لە مانگی 11دا ئەنجامدەدرێت، هێرش ناکاتە سەر ئێران، ئاماژەی بەوەشکردوە گەروی هورمز لە رەوشێکی باشدایە بۆ هەناردەی نەوت.

سەرۆکی ئەمریکا، پەیامێکی لە تروس سۆشیاڵ بڵاوکردوەتەوە و دەڵێت؛ لە ئێستادا لە گفتوگۆی بەرهەمداردان لەگەڵ ئێران و بیر لە هێرشکردن ناکەنەوە.

لە بارەی رەوشی ئابوریی ئێرانیشەوە، سەرۆکی ئەمریکا دەڵێت؛ ئەوان لە رەوشێکی تەواو خراپدان، لە روی ئابوری و سەربازییەوە بە تەواوەتی تێکشکاون.

ناوبراو ئاماژەی بە گەمارۆکانی هێزی ئەمریکا داوە بۆسەر ئێرانو دەڵێت بە تەواوەتی کاریگەری دروست کردوە.

سەرۆکی ئەمریکا دەشڵێت؛ لە ئێستادا نەوتێکی زۆر بە گەروی هورمزدا تێدەپەڕێت و تەنها شەوی رابردوو 22 ملیۆن بەرمیل نەوت بە گەروەکەدا رۆشتوە.

ئەمە لە کاتێکدایە، فەرماندەیی ناوەندیی ئەمریکا(سێنتکۆم) پێشتر، رایگەیاندوە لە مانگەکانی رابردوی جەنگدا هێزەکانی ئەمریکا، هاوکاربون بۆ تێپەڕبونی ملیارێک و 250 ملیۆن بەرمیل نەوت بە گەروی هورمزدا.

 

سی ئێن ئێن نوێترین زیانەکانی ئەمریکا لە جەنگی ئێران بڵاودەکاتەوە و بەبێ زیانی سەربازگەکان، ئەمریکا 45 ملیار دۆلار زیانی بەرکەوتوە و  81 فڕۆکە و هێلیکۆپتەر و درۆنی لە دەستداوە.

سی ئێن ئێن،بە پشتبەستن  بە راپۆرتێکی نوێی دەستەی توێژینەوەی کۆنگرێسی ئەمریکا ئاشکرای کردوە، لە سەرەتای هەڵگیرسانی جەنگی نێوان ئەمریکا و ئێران، 81 فڕۆکەی جەنگی، هێلیکۆپتەر و درۆنی سوپای ئەمریکا تێکشکاون یان زیانیان پێگەیشتووە.

ئاماژە بەوەشکراوە، لەو ژمارەیە 45ـیان درۆنی جۆری (MQ-9 Reaper)ن کە زیاتر لە نیوەی تەواوی زیانەکان پێکدەهێنێت، جگە لەوەش، فڕۆکەی پێشکەوتوی وەک (F-35A) و فڕۆکەی راداری گەورەی (E-3 Sentry) لە لیستەکەدان.

بە گوێرەی زانیارییەکانی سی ئێن ئێن، تێچوی کۆی گشتیی ئەو فڕۆکانەی تێکشکاون لە نێوان 1.9 بۆ 3.3 ملیار دۆلاردایە. ئەمە لەکاتێکدایە، کە تێچوی تەواوی جەنگەکە تا ئێستا 45 ملیار دۆلاری تێپەڕاندووە، بەبێ هەژمارکردنی زیانی بنکە سەربازییەکان.

لە بەشێکی تری راپۆرتەکەی سی ئێن ئێندا هاتوە؛ کۆنگرێس رەخنە لە وەزارەتی جەنگی وڵاتەکەی گرتوە، بەهۆی تەمومژاویبوون و ناڕونی  زانیارییەکان لەسەر زیانەکان.

قائیمقامەیتی سلێمانی لە رێگەی کوردسات نیوزیوە دڵنیای دەدات؛ ناهێڵن نرخی شتومەک بەرزبێتەوە، داواش دەکات هاووڵاتیان هاوکاریان بن.

دوای بەرزبونەوەی نرخی دۆلار بەرانبەر بە دینار، ترسی بەرزبونەوەی نرخی شتومەک لای هاووڵاتیان دروست بوە و لایەنە پەیوەندیدارەکانیش دڵنیای دەدەن رێگری دەکەن لە بەرزبونەوەی نرخ.

بابان ئەحمەد، سەرۆکی لیژنە هاوبەشەکانی قائیمقامیەتی سلێمانی بە کوردسات نیوزی راگەیاند، لیژنەکانیان بەردەوام چاودێری بازاڕ دەکەن و هەر ئەمڕۆش پسوڵەی سەرپێچیان بۆ چەند شوێنێک کردووە، کە نرخی کاڵاو شمەک و خواردەمەنیەکانیان بەرزکردوەتەوە.

بابان ئەحمەد ئاماژەی بەوەشکردوە، هەر فرۆشیارێک گران فرۆشی بکات و نرخەکانی بەرزبکاتەوە سزای دەدەن، داواش لە هاووڵاتیان دەکەت، کە هاوکاریان بکەن و هەر فرۆشیارێک نرخی بەرزکردەوە ئاگاداریان بکەنەوە تا سزایان بدەن.

عەباس عراقچی، وەزیری دەرەوەی ئێران، رایگەیاند تاران سەرقاڵی پێداچوونەوە و تاوتوێکردنی وەڵامی ئەمریکایە بۆ پڕۆژە حەوت رۆژیەکەی تاران.

عراقچی لە لێدوانێکیدا بۆ رۆژنامەنووسان ئاماژەی بەوە کرد کە پرۆسەی دانوستانەکان نەپچڕاون و ئاڵوگۆڕی پەیامەکان لە رێگەی ناوبژیوانانەوە بەردەوامە.

 ناوبراو ئاماژەی بەوەشکردوە، دیدگاکانی لایەنی ئەمریکییان وەرگرتووە و پێشبینی دەکەن لە  چەند رۆژی داهاتوودا وەڵامی رەسمی ئەمریکا بدەنەوە.

 ئەم لێدوانانە لە کاتێکدایە، پێشتر دۆناڵد ترەمپ سەرۆکی ئەمریکا رایگەیاندبوو پێشنیازە حەوت رۆژیەکەی ئێرانی رەتکردوەتەوە.

وەزارەتی دارایی و ئابووریی هەرێمی کوردستان رایگەیاند، بڕی 835 ملیار و553 ملیۆن دینار وەک تەمویلی موچەی مانگی ئەیلولی فەرمانبەران و موچەخۆرانی هەرێم خراوەتە سەر هەژماری بانکی وەزارەتەکەیان لە لقی هەولێری بانکی ناوەندیی عیراق.

بەپێی راگەیەندراوێکی وەزارەتی دارایی، هاوشێوەی چەند مانگی رابردوو، وەزارەتی دارایی فیدراڵ بڕی 120ملیار دیناری وەک پشکی گەنجینەی فیدراڵی لە داهاتی نانەوتیی هەرێم بۆ مانگی ئەیلول لە کۆی تەمویلی موچە بڕیوە.

لە راگەیەندراوەکەدا ئاماژە بەوەش کراوە، کە بەغدا بڕی 4 ملیار و 961 ملیۆن دیناری لە تەمویلی موچەی مانگی ئەیلول نەناردووە، کە بریتییە لە شایستەی موچەی مانگەکانی رابردووی خانەنشینانی شارستانی و سەربازی.

وەزارەتی دارایی و ئابووری جەختیشی کردووەتەوە: هەر ئەمڕۆ خشتەی دابەشکردنی موچە بڵاودەکرێتەوە.

ئەندامێكی ئەنجومەنی نوێنەرانی عیراق ئاشكراكرد،  بەشێكی زۆری لایەنەكانی ناڕازیی لە بەرزبوونەوەی نرخی دۆلار  پێشوەختە ئاگاداری بڕیارەكە بوون و سوودی مادیی گەورەیان لێ بینووە.

ئەمیر مەعمووری، ئەندامی لیژنەی دارایی ئەنجومەنی نوێنەرانی عیراق، رەخنەی توندی لەو لایەنە سیاسییانە گرت كە دژایەتی بەرزبوونەوەی نرخی دۆلار دەكەن و رایگەیاند: زۆربەی ئەوانەی ئێستا رەخنە لە بەرزبوونەوەی نرخی دۆلار دەگرن، پێشوەختە زانیارییان لەسەر گۆڕانكارییەكە هەبووە و پێش دەنگدان و جێگیركردنی نرخەكە بۆ 1520 دینار، دۆلاریان لە بازاردا كڕیوە و سوودێكی دارایی زۆریان دەستكەوتووە.

ئاماژەی بەوەشكرد، ئەنجومەنی وەزیران نوێنەری تەواوی فراكسیۆنە سیاسییەكانی تێدایە و دەنگیان بۆ  گۆرانكارییەكەداوە .

ئەو پەرلەمانتارە ئاماژەی بەوەشكرد، گۆڕینی نرخی دۆلار بەرپرسیارێتییەكی نیشتمانییە و پێویستە بە لۆژیكی دەوڵەت بەڕێوەبچێت بۆ پاراستنی سەقامگیریی دارایی.

 

 

بڕیار لەسەر خەرجکردنی 22 ملیار دینار وەک شایستەی دارایی جوتیاران دراوە، بەڕێوەبەری بازرگانی هەرێمیش دەڵێت؛ لەو بڕە حەوت ملیاری دیناری کۆتا گوژمەی ساڵی 2025ـە.

نەوزاد شێخ کامل، بەرێوبەری گشتی بازرگانی هەرێم کوردستان، بە کوردسات نیوزی راگەیاند، بڕیار لەسەر خەرجکردنی زیاتر لە 22 ملیار دینار وەک شایستەی دارایی جووتیاران دراوە.

وتیشی، لەو بڕە حەوت ملیار و 736 ملیۆن و 857 هەزار دیناری کۆتا گوژمەی ساڵی 2025ـە.

ئامای بەوەشکرد، چوار ملیار و 602 ملیۆن و 604 هەزار دینار بۆ سلێمانی و سێ ملیار و 134 ملیۆن و 253 هەزار دیناریش بۆ دهۆک تەرخان کراوە، بەمەش پرۆسەی دابەشکردنی پارەی ساڵی 2025 بە تەواوی کۆتایی دێت.

هاکان فیدان، وەزیری دەرەوەی تورکیا، دووپاتی کردەوە کە وڵاتەکەی هێزی سەربازی نانێرێت بۆ خاکی وڵاتانی تر بۆ ئەنجامدانی هێرش لێیانەوە.

فیدان لە لێدوانێکی رۆژنامەوانیدا رایگەیاند: تورکیا هێزی سەربازی نانێرێت بۆ خاکی وڵاتێکی تر تا هێرشی لەوێوە بپێورێت، روونیشی کردەوە: پەیماننامەی مەککە رێککەوتنێکی بەرگرییە نەک هێرشبەری، و لە ئاناساتێکدا ئەگەر یەکێک لە وڵاتانی ئەندام رووبەڕووی هێرش ببێتەوە، وڵاتانی تر پشتیوانی لێ دەکەن.

ئاماژەی بەوەش کرد: لیژنە سەربازییەکان لە هاوپەیمانیی مەککە کاردەکەن لەسەر لێکۆڵینەوە لە چۆنیەتی بەشداری لە پشتیوانیکردنی عەرەبستانی سعودیە دژی هێرشەکانی حوسییەکان.

 

عەلی زەێدی، سەرۆکی ئەنجومەنی وەزیران، رێنمایی دا بە دواخستنی وەرگرتنی رسووماتی گومرکی و باجی سەر بەرهەمەکانی هێلکە، مریشک و گۆشتی زیندوی هاوردەکراو.

نووسینگەی راگەیاندنی سەرۆکی ئەنجومەنی وەزیران لە بەیاننامەیەکدا ئاماژەی بەوە کرد: زەیدی رێنمایی داوە بە دواخستنی وەرگرتنی رسووماتی گومرکی و باج لەسەر بەرهەمەکانی هێلکە، مریشک و گۆشتی زیندوی هاوردەکراو، بە مەبەستی بەشداریکردن لە پشتیوانیکردنی سەقامگیریی بازاڕە ناوخۆییەکان و دابینکردنی ئەم پێداویستییە سەرەکییانە بە نرخێکی گونجاو تاوەکو لە توانای دارایی سەرجەم هاووڵاتیاندا بێت.

ئەم بڕیارە دوای بڕیاری هەموارکردنەوەی نرخی ئاڵوگۆڕی دینار بەرانبەر بە دۆلاری ئەمریکی هات، لەسەر پێشنیازی وەزیری دارایی و پارێزگاری بڕیاردەری بانک ناوەندیی عیراق لە کۆبوونەوەی ئاسایی ژمارە (544)ی ساڵی 2026، تاوەکو نرخی کۆتایی فرۆشتنی دۆلار بۆ هاووڵاتیان و دامەزراوە داراییە ناپانکییەکان ببێتە (1520) دینار بۆ هەر دۆلارێک، لە شوێنی 1320 دینار.

پارەی موچەی مانگی ئەیلولی  موچەخۆرانی هەرێم رەوانەی هەرێم كراو پێشبینی دەكرێت رۆژی یەك شەممەی داهاتوو دەست بە دابەشكردنی بكرێت.

پەیامنێری كوردسات نیوز لە زاری سەرچاوەیەك لە وەزارەتی دارایی و ئابوری هەرێم ئاشكرایكرد، لە لقی هەولێری بانكی ناوەندی، تەواوی موچەی مانگی ئەیلولی موچەخۆرانی هەرێم خراوەتە سەر هەژمارەی وەزارەتی دارایی هەرێم.

پەیامنێری كوردسات نیوز ئاشكراشیكرد، بریارە ئەمڕۆ لیستی دابەشكردنی موچە لە لایەن وەزارەتی دارایی هەرێم بڵاوبكرێتەوە رۆژی یەكەشەممەی داهاتوو دەست بەدابەشكردنی بكرێت.