لە کاتێکدا ئەمریکییەکان یادی 250 ساڵەی دامەزراندنی دەوڵەتەکەیان دەکردەوە، ئامارەکانی تەقەکردنی بەکۆمەڵ ریکۆردێکی نوێی پێوانەیی تۆمار دەکەن و تەنها لە سێ ڕۆژدا 100 کەس بەهۆی تەقەکردنەوە کوژراون.

رێکخراوی "Gun Violence Archive"ی ناحکومی رایگەیاند، ژمارەی ئەو کەسانەی لە سەرانسەری ویلایەتە یەکگرتووەکانی ئەمریکا و لە کاتی بەڕێوەچوونی ئاهەنگەکانی جەژنی سەربەخۆیی ئەو وڵاتەدا بەهۆی روداوەکانی تەقەکردنەوە گیانیان لەدەستداوە، گەیشتووەتە 100 کەس.

رێکخراوەکە لە بڵاوکراوەیەکدا لە تۆڕی کۆمەڵایەتی "ئێکس" ئاماژەی بەوە کردووە، لە ماوەی پشووی جەژنی سەربەخۆیی ئەمریکادا، 20 روداوی تەقەکردنی بەکۆمەڵ تۆمارکراون، ئەمەش بە بەرزترین ئاماری پێوانەیی دادەنرێت لە دوای ساڵی 2021ـەوە.

ئاشکراشی کردووە، ئەو روداوانە لە ماوەی تەنها سێ رۆژدا بوونەتە هۆی کوژرانی 100 کەس و برینداربوونی 340 کەسی دیکە، هاوکات رێکخراوەکە رونیکردووەتەوە کە ئەم داتایانە سەرەتایین و ئەگەری هەیە لە داهاتوودا ژمارەکان گۆڕانکارییان بەسەردا بێت و زیاد بکەن.

جێی ئاماژەیە، لە 4ـی تەممووزی ئەمساڵدا، ئەمریکا یادی 250 ساڵەی دامەزراندنی دەوڵەتەکەی کردەوە.

وەزیری دەرەوەی ئێران رایدەگەیەنێت، وڵاتەکەی بە هیچ شێوەیەک دەست بە دانوستاندنی تایبەت بە رێککەوتنی کۆتایی لەگەڵ ناکات ئەگەر هاتوو هەڕەشەکان بەردەوام بن.

عەباس عراقچی، وەزیری دەرەوەی ئێران لە پەیامێکدا لە هەژماری رەسمی خۆی لە تۆڕی کۆمەڵایەتی "ئێکس" رایگەیاند: "ملیۆنان ئێرانی بۆ بەڕێکردن و رێزلێنان لە عەلی خامنەیی، رابەری کۆچکردووی ئێران و میراتەکەی کۆبوونەوتەوە، نە ئەو خەڵکە و نە هێزە چەکدارەکانمان بە چاوترساندن و هیچ جۆرە هەڕەشەیەک کاریگەر نابن."

وەزیری دەرەوەی ئێران ئاماژەی بەوەش کردووە، بڕگەی سیازدەیەمی یاداشتی لێکتێگەیشتنەکە تەواو روونە و تێیدا هاتووە کە لەکاتی بەردەوامیی هەڕەشەکاندا دانوستاندن بۆ رێککەوتنی کۆتایی دەست پێناکات، لە کۆتایی پەیامەکەشیدا نووسیویەتی: "رێز لە ئیمزاکەتان بگرن."

ئەم لێدوانانەی وەزیری دەرەوەی ئێران لە کاتێکدایە، کە واشنتۆن و تاران خۆیان بۆ دەستپێکردنەوەی پەیوەندییە سیاسییەکانیان ئامادە دەکەن، کە بەهۆی رێوڕەسمی بەخاکسپاردنی عەلی خامنەیی رابەری پێشووی ئێرانەوە بە شێوەیەکی کاتی راگیرابوون، ئەمەش لە کاتێکدایە کە ناڕوونی و ناكۆكی قووڵ لەسەر چەندین مەلەفی سەرەکی هێشتا بەردەوامە، کە لە پێشەنگیاندا مەلەفی ئەتۆمی و سزاکانی ئەمریکان.

بافڵ جەلال تاڵەبانی لەگەڵ کونسوڵی گشتیی بەریتانیا لە هەرێمی کوردستان کۆبووەوە و لە کۆبوونەوەکەدا دوایین پەرەسەندنە سیاسی و ئابورییەکان گفتوگۆیان لەبارەوە کرا.

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە ئەندرۆ بیزلی، کونسوڵی گشتیی بەریتانیا لە هەرێمی کوردستان کرد.

لە دیدارێکدا کە دەرباز کۆسرەت رەسوڵ، ئەندامی مەکتەبی سیاسی ئامادەبوو، دوایین پەرەسەندنە سیاسی و ئابورییەکان گفتوگۆیان لەبارەوە کرا و جەخت لە هەماهەنگی و هاریکاریی نێوان سەرجەم لایەنەکان لە هەرێمی کوردستان و عیراق کرایەوە، لەپێناو زاڵبوون بەسەر ئاڵنگارییەکاندا.

بەربەستەکانی بەردەم پێکهێنانی حکومەتی نوێی هەرێمی کوردستان خرانەبەر باس و بافڵ جەلال تاڵەبانی رایگەیاند، داوای یەکێتی، داوای خەڵکە بۆ باشترکردنی حکومڕانی و گەیشتن بە حکومەتێکی دادپەروەر و بەهێز کە توانای خزمەتکردنی تەواوی ناوچەکانی هەبێت بەبێ جیاوازی، ئێمە دەمانەوێت هاوبەشیی راستەقینە بنەمای کارکردن بێت.

لە میانەی سەردانەکەیدا بۆ ئەلبانیا، قوباد تاڵەبانی، جێگری سەرۆک وەزیران بە جیا لەگەڵ هەر یەکە لە فێریت هۆکسا، وەزیری کاروباری دەرەوە و ئەوروپای ئەلبانیا و ئێنێیا کاراکاچی، وەزیری پیشەسازی و وزەی ئەلبانیا کۆبووەوە.

لە کۆبوونەوەی لەگەڵ وەزیری دەرەوەی ئەو وڵاتەدا گفتوگۆکرا لەبارەی گرنگیی کاری هاوبەش بۆ بەهێزکردنی پەیوەندیی سیاسی و ئابوری نێوان هەردوو وڵات و بڕیادرا لەسەر پێکهێنانی گروپێکی کاری هاوبەش لە پسپۆڕانی هەردوولا بۆ ئەوەی زەمینە بۆ دروستکردنی پەیوەندیی لە بوارەکانی گەشتوگوزار و بازرگانیدا بڕەخسێنن و هەروەها هەماهەنگی دروست بکەن بۆ ئاڵوگۆڕی پسپۆڕیی لە بوارەکانی بە ئەلیکترۆنیکردنی دامەزراوەکان و بەکارهێنانی ژیریی دەستکرد لە خزمەتگوزارییەکاندا.

لە کۆبوونەوەش لەگەڵ وەزیری پیشەسازی و وزەی ئەلبانیادا، باس لە ئەزمونی ئەو وڵاتە کرا لە چۆنییەتی پەرەپێدانی کەرتی وزە و بە تایبەتیش وزەی نوێبووەوە. لەمبارەیەشەوە جەخت کرایەوە لەسەر کارکردن بۆ ئاڵوگۆڕی ئەزموون لەنێوان هەردوولادا.

جێگری سەرۆک وەزیران بە پێویستی زانی هێڵی ئاسمانی راستەوخۆ لەنێوان سلێمانی و تیرانادا بکرێتەوە بۆ ئەوەی یارمەتیدەربێت لە دروستکردنی پەیوەندیی گەشتیاری و کولتووری و بازرگانی لەنێوان هەردوو وڵاتدا.

تائێستا دەست بەڕێکارەکانی کۆکردنەوەی داهاتی نانەوتی نەکراوە، سەرچاوەیەکیش لە وەزارەتی دارایی هەرێم ئاشکرایدەکات، ئەگەر بەغداد بڕی 120 ملیار دینار وەک داهات بگێڕێتەوە کێشەی گەورە بۆ موچە دروست دەبێت.

سەرچاوەیەکی ئاگادار لە وەزارەتی دارایی و ئابوری حکومەتی هەرێمی کوردستان بە کوردسات نیوزی راگەیاند، تا ئێستا وەزارەت هیچ هەنگاوێکی رەسمی بۆ کۆکردنەوەی داهاتی نانەوتی لە هەرێمی کوردستان دەست پێ نەکردووە.

بەپێی ئەو سەرچاوەیە، وەزارەتی دارایی لەبەردەم کێشەیەکی گەورەدایە، چونکە هێشتا کورتیی داهاتی مانگی رابردوو پڕ نەکراوەتەوە، هەروەها ئەگەر حکومەتی عیراق لەم مانگەش بڕی 120 ملیار دینار پارەی موچەی موچەخۆرانی هەرێم بگێڕێتەوە، ئەوا کێشەیەکی گەورە بۆ دابەشکردنی موچەی فەرمانبەران دروست دەبێت.

سەرچاوەکە ئاماژەی بەوەشکرد، پێشبینی دەکرێت  ئەم مانگە زیاتر لە 50 ملیار دینار داهاتی نانەوتی کۆبکرێتەوە، لە هەمان کاتدا هەوڵەکان بۆ کەمکردنەوەی بڕی ئەو داهاتەی داوای لێدەکرێت لەلایەن حکومەتی عیراقەوە بەردەوامن، بەڵام تا ئێستا بەغداد هەر سورە لەسەر پێویستی دابینکردنی 120 ملیار دینار.

سەرچاوە سەربازیی و دیپلۆماسییەکانی ئیسرائیل گۆڕانکاریی لە هەڵسەنگاندنی ستراتیژیی تەلئەبیب بەرانبەر سەرکردایەتی نوێی ئێران ئاشکرادەکەن و ئاماژە بەوەشدەکەن، ئیسرائیل جەنگەکەی دۆڕاندووە و ناتانیاهۆ شکست دەشارێتەوە.

ماڵپەڕی ئەلمۆنیتەری ئەمریکی لە راپۆرتێکدا لە زاری سەرچاوە دیپلۆماسییەکانەوە بڵاویانکردەوە؛ دۆناڵد ترەمپ، سەرۆکی ئەمریکا فشار لەسەر بنیامین ناتانیاهۆ، سەرۆک وەزیرانی ئیسرائیل دروستدەکات بۆ کشانەوەی هێزەکانی لە باشوری لوبنان، ئەمەش لە چوارچێوەی رێککەوتنێکی هەرێمی فراوانتر لەگەڵ تاران.

ئاماژە بەوەشکراوە، ئیمزاکردنی  چوارچێوەی رێککەوتنی لوبنان-ئیسرائیل لە واشنتۆن لە 26ـی حوزەیرانی رابردوو، تەنها هەوڵێکی ناتانیاهۆ بووە بۆ ئەوەی هەر کشانەوەیەکی داهاتوو وەک "دەستکەوتێکی دیپلۆماسی" نیشان بدات، نەک ملکەچبوون بۆ داواکارییەکانی ئەمریکا.

راپۆرتەکە جەخت لەوە دەکاتەوە، دانوستانەکانی ئێستا لە نێوان واشنتۆن و تاران چیتر لەسەر دۆسیەی ئەتۆمی و موشەکی نین، بەڵکو تەنها لەسەر ئازادی هاتوچۆی دەریاییە لە گەروی هورمز، ئەمەش لەلایەن لێپرسراوانی ئیسرائیلەوە وەک "شکستێکی ستراتیژی" سەیر دەکرێت، بە جۆرێک بەشێکیان پێیان وایە ئیسرائیل لە دوای کۆتایی هاتنی جەنگ، لە رەوشێکی ستراتیژی زۆر خراپتردایە بە بەراورد بە پێش دەستپێکردنی.

لە کۆتایی راپۆرتەکەدا ئاماژە بەوەشکراوە، ناتانیاهۆ دوای ئەوەی نەیتوانی ئەو "سەرکەوتنە تەواوەتییە" بەدەستبهێنێت کە بەڵێنی دابوو، ئێستا هەوڵ دەدات لە رێگەی دروشمی نوێی هەڵبژاردنەوە متمانەی دەنگدەرانی وڵاتەکەی بەدەستبهێنێت، کە ئەو تاکە کەسە توانیویەتی ئیسرائیل لە مەترسییەکی گەورە رزگاربکات و رێگری لە ئێران بکات لە داهاتوودا ببێتە خاوەنی چەکی ئەتۆمی.

ترەمپ رایدەگەیەنێت؛ لە رووی سەربازییەوە ئێرانیان تێکشکاندووە و ئەنجامەکانی تاران هاوشێوەی دەستکەوتەکانی پێشوویانە لە ڤەنزوێلا، جەختیش دەکاتەوە کە وڵاتەکەی خاوەنی بەهێزترین سوپای جیهانە.

دۆناڵد ترەمپ، سەرۆکی ئەمریکا رایگەیاند، وڵاتەکەی لە رووی میدیاییەوە ئەو گرنگی و رووماڵە شایستەیەی پێ نادرێت کە پەیوەستە بە دۆسیەی ئێرانەوە، بەڵام جەختی کردەوە کە لە ڕووی سەربازییەوە گورزی کوشندەیان لە تاران وەشاندووە.

ترەمپ ئاماژەی بەوەکرد: "ئێمە وەک پێویست رووماڵی میدیایی شایستەمان پەوڕو نەکردووە لەوەی کە پەیوەستە بە ئێرانەوە، بەڵام لە راستیدا لە رووی سەربازییەوە سڕیماننەوە و تێکمانشکاندن".

ئەوەشی خستەڕوو، ئەمریکا لە سەرکەوتن بەردەوامە و ئەو ئەنجامانەی ئێستا لە ئێران بەدەستی دەهێنن، هاوشێوەی ئەو ئەنجامانەن کە پێشتر لە ڤەنزوێلا بەدەستیان هێناون.

سەرۆکی ئەمریکا لە درێژەی قسەکانیدا باسی لە بەهێزی پێگەی وڵاتەکەی کرد و وتی: "وڵاتەکەمان زۆر بەهێزە و لە ئێستادا خاوەنی بەهێزترین سوپاین لەسەرانسەری جیهاندا".

قوباد تاڵەبانی لەسەر بانگهێشتی رەسمی ئیدی راما، سەرۆک وەزیرانی ئەلبانیا سەردانی ئەو وڵاتەی کرد و لە یەکەم وێستگەی سەردانەکەیدا لەگەڵ سەرۆک وەزیران کۆبووەوە.

لە کۆبوونەوەکەدا کە ئەمڕۆ بە ئامادەبوونی هەر یەکە لە دارا رەشید، وەزیری پلاندانان و ژوان سابیر، سەرۆکی دەستەی گەشتوگوزار و دابان شەدەڵە، جێگری سەرۆکی فەرمانگەی پەیوەندییەکانی دەرەوەی هەرێم بەڕێوەچوو، باس لە چۆنییەتی دروستکردنی هەماهەنگی بۆ دروستکردنی پەیوەندییەکی بەهێز لە بوارەکانی بازرگانی، گەشتوگوزار و ئاڵوگۆڕی ئەزموون لەنێوان هەردوولادا کرا.

قوباد تاڵەبانی ستایشی هەوڵەکانی حکومەتی ئەلبانیای کرد لە بوارەکانی چاکسازی و نوێکردنەوە و بەهێزکردنی دامەزراوەکان و پەرەپێدانی ژێرخانی ئابووری و پێشخستنی کەرتی گەشتیاری و بەکارهێنانی تەکنەلۆژیا لە خزمەتگوزارییە گشتییەکاندا کە بەهۆی ئەم هەوڵانەوە زەمینەیەکی لەبار بۆ وەبەرهێنان و گەشەپێدانی ئابووری دروست بووە.

لە کۆبوونەوەکەدا جەخت کرایەوە لەسەر کاری هاوبەش بۆ دروستکردنی پەیوەندیی لەنێوان کەرتی تایبەتی هەردوولا بە تایبەتیش لە بوارەکانی گەشتوگوزار و وەبەرهێناندا.

زیلینسکی زەنگی مەترسی لێدەدات و داوای موشەکی پاتریۆت لە ناتۆ دەکات، هێرشە بەرفراوانەکەی روسیاش بۆ سەر کیێڤ دەیان کوژراو و برینداری لێدەکەوێتەوە.

ڤۆلۆدیمێر زیلیسنکی سەرۆکی ئۆکراین، ئەمڕۆ داوای لە هاوپەیمانانی ناتۆ کرد کە لە میانی لوتکەی ئەم هەفتەیەی هاوپەیمانێتییەکە لە ئەنکەرە "بڕیاری یەکلاکەرەوە" بدەن بۆ بەهێزکردنی بەرگرییە ئاسمانییەکانی وڵاتەکەی، ئەمەش دوای ئەوەی روسیا شەپۆلێکی نوێی هێرشی ئاسمانی بەرفراوانی لە شەودا بۆ سەر کیێڤ و ناوچەکانی تری وڵاتەکە ئەنجامدا.

زیلینسکی رایگەیاند، لە ئەنجامی ئەو هێرشانەدا لانی کەم 11 کەس گیانیان لەدەستداوە و 60 کەسی تریش لە کیێڤی پایتەخت برینداربوون، وتیشی، روسیا لەو هێرشەدا 68 موشەک و 351 فڕۆکەی بێفڕۆکەوانی بەکارهێناوە.

سەرۆکی ئۆکرانیا جەختیکردەوە، بەرگرییە ئاسمانییەکانی وڵاتەکەی توانیویانە فڕۆکە بێفڕۆکەوانەکان و موشەکە کرووزەکان تێکبشکێنن، بەڵام بەهۆی "کەمیی موشەکی دژەبەرگرییەوە" نەیانتوانیوە بەرپەرچی موشەکە بالیستییەکانی روسیا بدەنەوە.

پێشتریش زیلینسکی لەسەر بنەمای زانیارییە هەواڵگرییەکانی وڵاتەکەی، هۆشداری دابوو لە ئەگەری هێرشێکی بەرفراوانی روسیا پێش بەڕێوەچوونی لوتکەی سەرکردەکانی ناتۆ کە بڕیارە رۆژانی سێشەممە و چوارشەممە لە تورکیا بەڕێوەبچێت.

زیلینسکی کە بڕیارە رۆژی سێشەممە وەک میوان بەشداری لە لوتکەکەدا بکات، لە پۆستێکدا لە تۆڕی کۆمەڵایەتی "ئێکس" داوای لە هاوپەیمانانی ناتۆ کرد "بڕیاری یەکلاکەرەوە بۆ پشتگیریکردنی بەرگرییە ئاسمانییەکانمان و لە ئەنجامدا پاراستنی ژیانی هاوڵاتیان" بدەن.

لە کۆتاییدا زیلینسکی ئاماژەی بەوەکرد، "تا ئەو کاتەی موشەکەکانی پاتریۆت لە کۆگاکانی هاوپەیمانەکانماندا بمێننەوە، ئەمە تەنها هانی روسیا دەدات بۆ بەردەوامبوون لە وێرانکردنی باڵەخانە نیشتەجێبوونەکان. ئەمریکا و ئەوروپا هێزی پێویستیان هەیە بۆ راگرتنی ئەم تیرۆرە".

دوای ساڵێك لە نەبوونی یاسای بودجە، عیراق بە رەسمی دەستی كرد بە ئامادەكردنی پڕۆژەیاسای بودجەی ساڵی 2027.

مەزهەر محەمەد ساڵح راوێژكاری دارایی سەرۆك وەزیرانی عیراق رایگەیاند، وەزارەتی دارایی لەم مانگەدا دەستی بە داڕشتنی پڕۆژەیاسای بودجەی گشتیی ساڵی 2027 كردووە و بڕیارە تا مانگی ئەیلوولی داهاتوو تەواوی بكات.

ئاماژەی بەوەشكرد، دوای ئامادەكردنی، رەشنووسی یاساكە رەوانەی ئەنجومەنی وەزاری بۆ ئابوری و دواتریش رەوانەی ئەنجومەنی وەزیران دەكرێت بۆ پەسەندكردن، پێش ئەوەی بنێردرێتە ئەنجومەنی  نوێ،ەران

مەزهەر محەمەد ساڵح رونیشیكردەوە، هێشتا قەبارەی دارایی بودجەكە دیار نییە.

ئەوەش لە كاتێكدایە، عیراق بۆ ئەمساڵیاسی بودجەی نییە و وەزارەتی دارایی پشتی بە سیستمی خەرجكردنی كاتیی بەستووە بۆ دابینكردنی موچە و خەرجییە بنەڕەتییەكان.

 

 

ئەنجومەنی نوێنەرانی عیراق کارنامەی دانیشتنی ژمارە 2 ی خۆی بۆ رۆژی پێنجشەممە، بڵاوکردەوە. بەپێی کارنامەکە، گرنگترین ته‌وه‌رەکانی دانیشتنەکە بریتین لە:

_خوێندنەوەی چەند ئایەتێک لە قورئانی پیرۆز.

_سوێندخواردنی دەستووریی چەند پەرلەمانتارێکی ژن و پەرلەمانتارانی جێگر.

_لێپرسینەوە لە سەرۆکی دەستەی نیشتمانیی وەبەرهێنان.

_ئەنجامدانی گەنگەشە و گفتوگۆی گشتی.

بڕیارە دانیشتنەکە لە سەعات 1ی پاشنیوەڕۆی رۆژی پێنجشەممەدا بەڕێوەبچێت.

هەیبەت حەلبووسی، سەرۆکی ئەنجومەنی نوێنەران، ئەمڕۆ دووشەممە، کارەکانی دانیشتنی ژمارە 1ی لە وەرزی دووەمی یاسادانانی ساڵی یەکەمی خولی شەشەمی هەڵبژاردنەکانی کردەوە.

فەرمانگەی راگەیاندنی ئەنجومەنی نوێنەران لە بەیاننامەیەکدا ئاماژەی بەوە کردووە، هەیبەت حەلبووسی، سەرۆکی ئەنجومەنی نوێنەران کارەکانی دانیشتنی ژمارە 1ی لە وەرزی دووەمی یاسادانانی ساڵی یەکەمی خولی شەشەمی هەڵبژاردنەکانی کردەوە.

سازدانی ئەم دانیشتنە وەک راگەیاندنی دەستپێکردنی قۆناغێکی نوێیە لە کارە یاسادانان و چاودێرییەکانی ئەنجومەنەکە دوای کۆتاییهاتنی پشوی یاسادانان، کە چاوەڕوان دەکرێت ئەنجومەن لە کارنامەکەیدا تاوتوێی کۆمەڵێک یاسا و دۆسیەی نیشتمانی بکات کە لەم وەرزەدا پێی سپێردراوە.

تووشبوویەكی نوێی تای خوێنبەربوون لە كەركووك تۆماركرا، بەوەش ژمارەی تووشبووان گەیشتە چوار كەس لەو پارێزگایە.

فەرمانگەی تەندروستیی كەركووك بڵاویكردەوە، یەكەمینی حاڵەتی تووشبوون بە تای خوێنبەربوون لە قەزای حەویجە تۆماركراوە، بەمەش كۆی گشتیی تووشبووان لە سەرەتای ئەمساڵەوە لە پارێزگای كەركوك بۆ چوار حاڵەت بەرزبووەوە.

راشیگەیاند،  توشبوەكە ژنێكی تەمەن 35 ساڵە و  دانیشتووی گوندی بەرتەغالییەیە لە قەزای حەویجە.

ئاماژەی بەوەشكرد، نەخۆشەكە لەژێر چاودێریی پزیشكییدایە و تیمەكانی تەندروستی دەستیانكردووە بە رێوشوێنەكانی پشكنینی و بەدواداچوون بۆ ئەو كەسانەی بەركەوتنیان لەگەڵ نەخۆشەكەدا هەبووە.

بەمەش حاڵەتەكانی توشبوون بە تای خوێنبەربوون لە عیراق لە سەرەتای ئەمساڵەوە گەیشتە 220 حاڵەت كە زۆرینەیان لە پارێزگای زیقارن

 

جیاواز لە زیانە گیانییەكان، شەپۆلی گەرما لە فەرەنسا بووەتە هۆی كەوتنەوەی ئاگر لە 20 ناوچەی جیاوازی ئەو وڵاتە و تا ئێستا بەشێكی ئاگرەكان كۆنتڕۆڵ نەكراون.

لۆران نونێز وەزیری ناوخۆی فەرەنسا رایگەیاند، شەش لەو ئاگرانە مەترسیدارن وتاكو ئێستا سێ ئاگر بە تەواوی كۆنتڕۆڵ نەكراون.

بە وتەی وەزیری ناوخۆی فەرەنسا، یەكێك لە ئاگرەكان  لە هەرێمی پیرینێی  لە رۆژهەڵاتی فەرەنسا  كەتوەتەوە و رووبەری هەزار و 600 هێكتار زەوی گرتووەتەوە، بەهۆیەوە 10 هەزار كەس لە دانیشتووانی ناوچەكە ماڵەكانیان چۆڵ كردووە.

هەر بەهۆی ئاگرەكەوە كارمەندێكی تیمەكانی ئاگركوژێنەوە بریندار بووە و چەندین رێگای سەرەكی لەنێوان شارەكانی ئەو وڵاتەدا پەكیان كەوتووە.

 

روسیا تەقاندنەوەی پردێكی ستراتیژی و كوژرانی زیاتر لە هەزارو 400 سەربازی ئۆكراینی لەماوەی 24 سەعاتدا راگەیاند.

وەزارەتی بەرگری روسیا بڵاویكردەوە، لە 24 سەعاتی رابردوودا توانیویانە پردێكی ستراتیژی لە رۆژهەڵاتی ئۆكراین خاپور بكەن و هەزار و 470 سەربازی ئەو وڵاتە بكوژن.

ئاماژەی بەوەشكردوە، هێزەكانیان لە هەموو بەرەكانەوە لەپێشرەویدان و لە هەرێمی لە دۆنێتسك پێگەكانی خۆیان بەهێزتر كردووە ولەبەرەی رۆژهەڵاتیشەوە زیاتر چوونەتە ناو سنورەكانی ئۆكراینەوە.

 

ئەنجومەنی باڵای دادوەری، ئەمڕۆ دووشەممە، دەستبەسەرداگرتنی 25 ملیار دیناری عیراقی تری لە دۆسیەی بریکاری وەزارەتی نەوت بۆ کاروباری پاڵاوتن راگەیاند.

ئەنجومەنی دادوەری لە بەیاننامەیەکدا، ئاماژەی بەوە کردووە: دادوەری لێکۆڵینەوەی دادگای تاوانەکانی بەرەنگاربوونەوەی گەندەڵی ناوەندی، دەستبەسەرداگرتنی 25 ملیار دیناری عیراقی نوێی روونکردووەتەوە، جگە لە دەستبەسەرداگرتنی بڕی (یەک ملیۆن دۆلار)، لەگەڵ زێڕ و خشڵ کە کێشەکەی بە نزیکەیی 5 کیلۆگرام دەخەمڵێندرێت، ئەمەش لە چوارچێوەی دۆسیەی بریکاری وەزارەتی نەوت بۆ کاروباری پاڵاوتن.

دادوەری تایبەتمەند زانیاری زیاتری دا و وتی: لە ئەنجامی بەدواداچوونی ورد بۆ دەستبەسەرداگرتنی ئەو داهاتە داراییانەی کە لەو بەهەدەردانەوە سەرچاوەیان گرتووە کە لەو پڕۆژانەدا رویانداوە کە لەلایەن تۆمەتبار و لایەنەکانی دیکەی دۆسیەکەوە جێبەجێ کراون، توانرا دەست بەسەر ئەم بڕە پارانەدا بگیرێت کە خرابوونە ناو دەبە پلاستیکییەکانی ئاوەوە و لە ناو ماڵی تۆمەتبارەکەدا لە شاری تکریت شاردرابوونەوە.

ئاماژەی بەوەش کرد: کۆی گشتی ئەو پارە داراییانەی کە دەستیان بەسەردا گیراوە بەرزبووەتەوە بۆ 127 ملیار دینار و 24 ملیۆن دۆلار، ئەمە جگە لەو خانوو، زەوی و ئۆتۆمبێلانەی کە دەستیان بەسەردا گیراوە و ئەو زێڕ و خشڵانەی دۆزراونەتەوە، هاوکات جەختیشی کردەوە: لێکۆڵینەوەکان و بەدواداچوون بۆ تێوەگلاوانی دیکە بەردەوامە تاوەکو تەواوکردنی سەرجەم رێکارە یاساییەکان.