هەواڵەکان
رێکخراوی کۆچی نێودەوڵەتی بە سەرپەرشتی نوخشە ناسیح، پرۆژەیەکی هاوکاریی بژێویی تاکەکەسی دەرفەتی کار بۆ 350 گەنجی سنوری پارێزگای هەڵەبجە دەرەخسێنێت.
ئەمڕۆ سێشەممە، پارێزگاری هەڵەبجە راگەیەندراویکی بڵاوکردوەتەوە و تێدا هاتووە؛ پرۆژەکە لەلایەن رێکخراوی کۆچی نێودەوڵەتی (IOM)ەوە پاڵپشتیی دارایی دەکرێت، چەندین تەوەری گرنگ لەخۆدەگرێت، لەوانە؛ پاڵپشتیکردنی پڕۆژە بچووکەکان، راهێنانی پیشەیی و دواترخستنەسەرکار.
هەروەها فراوانکردنی پڕۆژە ئابورییەکان و دابینکردنی پارەی کاش بەرانبەر کار بۆ گەنجەکانی سنورەکە.
ئاماژەی بەوەشکراوە، سەرەڕای سوودمەندبونی راستەوخۆی گەنجانی بێکار لەم دەرکەوتە، هاوکات چەندین سێکتەری خزمەتگوزاری لە سنورەکە، وەک کشتوکاڵ، پەروەردە و بەشی باخچەکانی سەرۆکایەتیی شارەوانی لە بەرهەم و ئەنجامەکانی ئەم پڕۆژەیە سوودمند دەبن.
لای خۆیەوە، نوخشە ناسیحی پارێزگار سوپاس و دەستخۆشی لە رێکخراوی (IOM) کرد لەپای بەردەوامی پاڵپشتییەکانیان بۆ رەخساندنی هەلی کار و جێبەجێکردنی پڕۆژەی گرنگ لە سنووری پارێزگاکەدا و داواشێ کرد بەردەوامبێت لەو هاوکاریی و پشتیوانییە.
دۆناڵد ترەمپ، سەرۆکی ئەمریکا رەزامەندیی دا لەسەر جێبەجێکردنی سزای لەسێدارەدان بە دەستڕێژی گولـلە بۆ ئەنجامدەری تاوانی کوشتنی بەکۆمەڵ لە سەربازگەیەکی تێکساس لە ساڵی 2009، ئەمەش شێوازێکە کە سوپای ئەمریکا زیاتر لە 60 ساڵە بەکاری نەهێناوە.
نیزاڵ حەسەن، کە ئەمریکییەکی موسڵمانی بەڕەگەز فەلەستینییە، لە 5ی تشرینی دووەمی 2009 لە ناوەندێکی پزیشکی لە سەربازگەی گەورەی "فۆرت هود" دەستڕێژی گولــلەی کرد، بە مەبەستی رێگریی لە بەشداریی سەربازان لە شەڕێکدا کە بە "نایاسایی" وەسپیدەکرد لە ئەفغانستان و عیراق.
هێرشەکە، کە لەلایەن کەسێکەوە ئەنجامدرا بە "گورگی تەنیا"ی سەر بە رێکخراوی قاعیدە بوو، بووە هۆی کوژرانی 13 کەس (کە 12یان سەرباز بوون) و برینداربوونی دەیان کەسی تر.
شۆن پارنێڵ، وتەبێژی پێنتاگۆن رۆژی دووشەممە لە رێگەی سۆشیاڵ میدیای "ئێکس"ەوە روونی کردەوە کە پیت هیگسێس، وەزیری بەرگری "پێشنیاری کردووە و سەرۆک دۆناڵد ترەمپیش رەزامەندیی لەسەر داوە، بۆ جێبەجێکردنی سزای لەسێدارەدان بە تەقەکردن لەلایەن مەفرەزەیەکی سێدارەدانی سەر بە سوپای ئەمریکاوە دژی تیرۆریستی سزادراو نضال مالک حسن".
ئەوەشی زیاد کرد: وەزیری سوپا کات و شوێنی جێبەجێکردنی سزاکە دیاری دەکات.
نیزال حەسەن کە پێشتر پزیشکی دەروونی بووە لە سوپادا، لە کاتی هێرشەکەدا بە سەختی بریندار بوو و لە ئێستادا تووشی ئیفلیجی نیوەیی بووە.
لە ساڵی 2013دا دادگایەکی سەربازی سزای لەسێدارەدانی بەسەردا سەپاند و لە ئێستادا لە بەندیخانەیەکی سەر بە سوپا لە ویلایەتی کانساس لە ناوەڕاستی وڵات دەستبەسەرە.
ئەم بڕیارە لە کاتێکدایە کە گفتوگۆی بەردەوام و مێژویی لەسەر جێبەجێکردنی سزای لەسێدارەدان لە ویلایەتە یەکگرتووەکاندا هەیە، بەتایبەت دوای هەوڵێکی بێ ئەنجامی لەسێدارەدانی تاوانبارێک بە ناوی "کریستا پایک" لە هەفتەی رابردوودا لە ویلایەتی تێنسی لە باشوری وڵات.
پایک تا ئێستاش لە نەخۆشخانەدا لە بارودۆخێکی مەترسیدادایە دوای ئەوەی رۆژی چوارشەممە لە دوو دەرزی کوشندە رزگاری بوو، کە بڕیار بوو بەهۆیەوە بێتە یەکەم ژن کە لە دوای زیاتر لە دوو سەدەوە لە ویلایەتی تێنسی لەسێدارە بدرێت.
لە پێنج ویلایەتی ئەمریکادا رێگە بە بەکارهێنانی مەفرەزەی تەقەکردن/سێدارەدان دەدرێت بۆ جێبەجێکردنی سزای لەسێدارەدان. بەڵام سوپای ئەمریکا لە ساڵی 1961 ەوە ئەم شێوازەی بەکارنەهێناوە.
نیزال حەسەن لە کاتی دادگاییکردنەکەیدا بڕیاریدا خۆی بەرگری لە خۆی بکات، بێ ئەوەی هیچ بەڵگەیەک پێشکەش بکات یان داوای ئامادەبوونی هیچ شایەتحاڵێک بکات.
ناوبراو هەرگیز تۆمەتەکانی رەتنەکردەوە، و بەپێی پارێزەرە دەستنیشانکراوەکانی لەلایەن دادگاوە، وادیار بوو هەوڵی بەدەستهێنانی سزای لەسێدارەدان دەدات.
لە کاتی دادگاییکردنەکەدا، دانیشتنەکان ئاشکرایان کرد کە حەسەن لە رێگەی ئینتەرنێتەوە پەیوەندی لەگەڵ کەسایەتییەکی سەر بە رێکخراوی قاعیدە هەبووە، کە ئەویش مەلا ئەمریکییەکە "ئەنوەری عەولەقی" بوو، کە لە ساڵی 2011 لە هێرشێکی فڕۆکەی بێفڕۆکەوانی ئەمریکیدا لە یەمەن کوژرا.
وەزیری دارایی عیراق کاتی دەستپێکردنی رێکارەکانی ناردنی موچەی مانگی 9ـی هەرێمی بە ئەندامە کوردەکانی لیژنەی دارایی ئەنجومەنی نوێنەران وتووە.
بێستون سەلام، پەیامنێری کوردسات نیوز رایگەیاند: فالح ساری، وەزیری دارایی عیراق بە ئەندامە کوردەکانی لیژنەی دارایی ئەنجومەنی نوێنەرانی وتووە، رۆژی پێنجشەممە دەست بە رێکارەکانی ناردنی موچەی مانگی 9ـی هەرێم دەکرێت.
ئەمە لەکاتێکدایە کە رۆژی 15 تا 19ـی 9ـی 2026 دەست بە دابەشکردنی موچەی مانگی 8ـی هەرێم کرا و تا ئێستا موچەی مانگی 9 دابەشنەکراوە.
قوباد تاڵەبانی رایگەیاند، یەکخستنەوەی پێشمەرگە دەستکەوتێکی گەورەی مێژووییە و هەوڵ دەدەین موچەی پێشمەرگە لەگەڵ سوپای عیراقدا هاوتا بکرێت.
قوباد تاڵەبانی، جێگری سەرۆکوەزیران سەردانی وەزارەتی پێشمەرگەی کرد و بە ئامادەبوونی شۆڕش ئیسماعیل، وەزیری کاروباری پێشمەرگە لەگەڵ بریکار و بەڕێوەبەران و راوێژکارانی باڵای وەزارەتەکە کۆبووەوە.
لە کۆبوونەوەکەدا قوباد تاڵەبانی یەکخستنەوەی هێزەکانی پێشمەرگەی بە دەستکەوتێکی گەورەی مێژوویی وەسف کرد کە نەک تەنها هاوڵاتییانی کوردستانی دڵخۆش کرد، بەڵکو وڵاتانی دۆست و هاوپەیمانیش بەم هەنگاوە دڵخۆش بوون. جێگری سەرۆکوەزیران بەم بۆنەیەوە دەستخۆشی لە وەزیری پێشمەرگە و بریکار و بەڕێوەبەران و فەرماندەکان و راوێژکاران و هەموو ئەو کەس و لایەنانە کرد بەشداربوون لە هەوڵەکانی یەکخستنەوە و رێکخستنەوەی هێزەکانی پێشمەرگە.
لە بەشێکی دیکەی کۆبوونەوەکەدا قوباد تاڵەبانی رایگەیاند ئێستا هەرێمی کوردستان خاوەنی هێزێکی یەکگرتووی نیشتمانییە و جەختیشی کردەوە وەک حکومەتی هەرێم پشتیوانی لە هەر هەوڵێک دەکەن بۆ پێشخستنی زیاتری هێزی پێشمەرگەی کوردستان.
جێگری سەرۆکوەزیران ئاماژەی بەوەشدا ئەم قۆناغە قۆناغی راهێنان و پڕچەککردنی زیاتری هێزی پێشمەرگەیە و لەم چوارچێوەیەدا هەوڵ دەدەن نوێنەرێکی وەزارەتی پێشمەرگە بەشداربێت لەو لیژنەیەی حکومەتی هەرێم کە بۆ جێگیرکردنی ماف و شایستە داراییەکانی هەرێم لە بودجەی حکومەتی فیدڕاڵ پێکهاتووە، بۆ ئەوەی باشتر بتوانرێت ماف و شایستەکانی هێزەکانی پێشمەرگە لە بودجەی فیدراڵی جێگیر بکرێت.
قوباد تاڵەبانی راشیگەیاند بە هەموو تواناوە کار دەکەن بۆ هاوتاکانی موچەی هێزەکانی پێشمەرگە لەگەڵ هاوتاکانیان لە سوپای عێراق، جگە لەوەش هەوڵ دەدەن بەپێی دەستوور هەر هەوڵێک بۆ پڕچەککردنی سوپای عێراق، هێزەکانی پێشمەرگەش بگرێتەوە.
کەشناسیی هەرێم رایگەیاند، ئەمڕۆ لە سەرجەم ناوچەکانی هەرێم بارانبارینی پچڕ پچڕ دەبێت و هەندێ کات شێوازی دابارین دەگۆڕێت بۆ لێزمە بارانی کورت خایەن و هەورە بروسکە.
ئەمڕۆ سێشەممە، بەڕێوەبەرایەتیی کەشناسی و بومەلەرزەزانیی هەرێمی کوردستان رایگەیاند، بەهۆی کاریگەری نزمە پاڵە پەستۆی دەریای سوور، کە رویی لە ناوچەکە کردوە پلەکانی گەرما نزمدەبنەوە و بارانبارین بەردەوام دەبێت.
ئاماژەی بەوەسکردوە پێشبینی دەکرێت رێژەی باران بارین لە ناوچە دەشتاییەکان و شاخاوییەکانلە نێوان (3 بۆ 8) ملم دا بێت.
لەبارەی کەشی سبەینێشەوە، کەشناسی دەڵێت؛ کاریگەری نزمە پاڵە پەستۆی دەریای سوور بە لاوازی دەمێنێتەوە لەسەر ناوچەکە و پلەکانی گەرماش سێ بۆ چوار پلە نزمدەبنەوە بەراورد بە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی بەمشێوەیەیە؛
هەولێر: 25 پلەی سیلیزی
پیرمام: 22 پلەی سیلیزی
سلێمانی: 22 پلەی سیلیزی
هەڵەبجە:24 پلەی سیلیزی
چەمچەماڵ: 26 پلەی سیلیزی
دهۆک: 23 پلەی سیلیزی
زاخۆ: 23 پلەی سیلیزی
ئاکرێ:24 پلەی سیلیزی
گەرمیان:26 پلەی سیلیزی
حاجی ئۆمەران:18 پلەی سیلیزی
سەرۆک کۆمار بۆ ئێزدییەکان: عیراق نیشتمانی هەمووانە و مافەکانتان تێیدا پارێزراو دەبێت
نزار ئامێدی، سەرۆک کۆماری عیراق بە بۆنەی هاتنی جەژنی جەماوە، پیرۆزباییەکی گەرم ئاراستەی خوشک و برایانی ئێزدییەکان لە عیراق و جیهان دەکات و جەخت لەسەر بەهای ئارامگرتن و پێداگریکردن لەسەر خاک و ناسنامەیان دەکاتەوە.
لە پەیامەکەیدا، سەرۆک کۆمارهیوا خواست کە ئەم جەژنە ببێتە دەستپێکی شادییەکی چاوەڕوانکراو، کە تێیدا سەرجەم ئاوارەکان بۆ ناوچەکانی خۆیان بگەڕێنەوە، چارەنووسی بێسەروشوێن و ڕفێنراوان ئاشکرا بێت و ئارامی بۆ هەموو بنەماڵە ئێزدییەکان بگەڕێتەوە.
هەروەها، سەرۆک کۆمار دووپاتیکردەوە کە عیراق نیشتمانی هەموو پێکهاتەکانە و ماف و کەرامەتی ئێزدییەکان تێیدا پارێزراو دەبێت، و مافی ژیانێکی ئارام و سەقامگیر بۆ هەمووان دەپارێزرا.
ئەمڕۆ جەژنی جەمایە و رۆژێکی تایبەتە لای ئێزدییەکان، کە یەکێکە لە هەرە جەژنە گرنگەکان و لە پەرستگای لالش بەڕێوەدەچێت و حەوت رۆژ بەردەوام دەبێت.
بەهۆی گرنگی جەژنەکەوە، تەواوی ئێزدییەکان لە جیهان و دەورووبەری لەو حەوت رۆژەدا روو لە پەرستگای لالش دەکەن.
جەژنەکە حەوت رۆژ دەخایەنێت و لە شەشەم رۆژی مانگی 10وە دەستپێدەکات و چەندین رێوڕەسمی تایبەت لە جەژنەکەدا بەڕێوە دەچێت.
بە گوێرەی دەستوری ئێزدییەکان، لە رۆژی یەکەمدا سەمای ئاینیی دەکرێت و رۆژانی داهاتوش خولانەوە بە دەوری مه‌زاره‌كانی په‌رستگای لالش بەڕێوەدەچێت.
بە گوێرەی دابونەریتی ئێزدییەکان؛ دەبێت هەموو ئەوانەى بەشدارى لەو رێوڕەسمە دەکەن، پێڵاوەکانیان دابنێن و بە بێ پێڵاو رێوڕەسمەکان ئەنجام بدەن، ئەم نەریتە تەنانەت میوانەکانیش دەگرێتەوە کە ئێزدیی نین.
دەستەی دەسپاکی عیراق رایگەیاند، کە بڕیاری دەستبەسەرکردن، راگرتن و دەستگیرکردن بۆ 31 تۆمەتبار لە کۆمپانیای کشتوکاڵی لە پارێزگای کەرکووک دەرچووە، کە تێوەگلاون لە گەندەڵی و دەستکاریکردنی پرۆسەی وەرگرتنی گەنم.
بەپێی زانیارییەکانی دەستەکە، تیمێکی لێکۆڵینەوەی نووسینگەی کەرکوک لە ئەنجامی بەدواداچوونەکانیاندا ئاشکرایان کردووە کە هەزاران تۆن گەنم تەنها لە ماوەی چەند سەعاتێکدا و بە رێگەی نایاسایی رادەست کراون، کە بەناوی سێ هاوڵاتییەوە تۆمار کراون و هیچ پلانێکی کشتوکاڵیشیان نەبووە.
دەستەکە ئاماژەی بەوەش کردووە، کە لێکۆڵینەوەکان کەمتەرخەمیی 31 کارمەندی کۆمپانیاکە و کارمەندانی بانکی کشتوکاڵیی هەولێر و کەرکوکی دەرخستووە.
ئەوەشخراوەتەڕوو، ئەو کەسانە دەستیان هەبووە لە خەرجکردنی پارەی ئەو گەنمە، تا ئێستاش فەرمانی دەستگیرکردن بۆ 10 لە تۆمەتبارەکان جێبەجێ کراوە و هەوڵەکان بۆ دەستگیرکردنی تۆمەتبارانی دیکەش بەردەوامن.
وەزارەتی پەروەردەی هەرێم رایگەیاند، چوار خوێندکاری کورد لە نێوان 210 خوێندکاری وڵاتانی عەرەبیدا سەرکەوتنی گەورەیان لە پێشبڕکێی بیرکاریی هزری بۆ لوتکەی وڵاتانی عەرەبی تۆمارکردوە و توانیویانە پلەی یەکەم بەدەستبهێنن.
پێشبڕکێی بیرکاریی هزری بۆ لوتکەی وڵاتانی عەرەبی لە وڵاتی سعودییە بە بەشداری 210 خوێندکار بەڕێوەچوو، خوێندکارەکان لە کوردستان و وڵاتانی سعودییە، جەزائیر، تونس، میسر، سودان، فەلەستین، عیراق و مەغریبەوە بەشداربوون.
لەم رکابەرییە نێودەوڵەتییەدا، چوار خوێندکاری کورد هاوشانی بەشداربووان و بە ئاڵای کوردستانەوە ئامادەبوون و سەرکەوتنی گەورەیان تۆمار کرد؛ بە شێوازێک کە عەبدولڕەحمان ئاراز لە خوێندنگەی کامبریج لە هەولێر، لە قورسترین ئاستدا (ئاستی H) بە وەڵامدانەوەی زۆرترین پرسیار پلەی یەکەمی زێڕینی باڵای بەدەستهێنا.
هاوکات سێ خوێندکاری قەزای پیرەمەگروونیش دەستکەوتی بەرچاویان هەبوو؛ هامنۆ لە ئاستی F پلەی زێڕین، رۆڤار لە ئاستی C پلەی زێڕین، و راڤێل لە ئاستی G پلەی زیوی بەدەستهێنا.
وەزارەتی پەروەردە ئاماژە بەوەش کردوە، کە ئەمە دووەم ساڵی بەردەوامە خوێندکارانی کورد بەشداری لەم پاڵەوانیەتییە نێودەوڵەتییەدا دەکەن و ئاستێکی بەرز و نایاب نیشان دەدەن.
وتەبێژی سوپای پاسداران رایگەیاند، کێشەی کەمی چەکیان نییە و تا ئێستاش بەردەوامن لە بەرهەمهێنانی چەکی نوێ، جەختیشدەکاتەوە کۆگایەکی گەورەی چەکی نوێیان ئامادەیە بۆ بەکارهێنان و لە کاتی گونجاودا نمایشی دەکەن.
محەمەد ئەکرەمی، وتەبێژی سوپای کۆماری ئیسلامیی ئێران رایگەیاند، کە پێداویستی و ئامێرە سەربازییە نوێیەکانی بەرگریی و هێرشبەری لەوانەش موشەک و درۆنیان لەبەردەستدایە و لە ئێستاشدا بەردەوامن لە بەرهەمهێنانی چەک.
وتەبێژی سوپای کۆماری ئیسلامیی ئێران بە میدیای وڵاتەکەی وتووە؛ ئەوان تا ئێستاش بەردەوامن لە بەرهەمهێنانی چەک و ئێستا یەکە جیاوازەکانی سوپای ئێران خاوەنی کۆگایەکی گەورەن لەو ئامێر و کەلوپەلە سەربازییە نوێیانە.
ناوبراو ئاماژەی بەوەشکردوە، ئەزموونێکی باشیان بەدەستهێناوە و فێربوون کە لاوازییەکانی دوژمن لە کوێدایە و دەتوانن بە ئاسانی زەفەری پێببەن.
نووسەر و سیاسەتمەداری بەناوبانگی بەریتانی و دۆستی دێرینی كورد، جێفری ئارچەر لە تەمەنی 86 ساڵیدا كۆچی دوایی كرد.
نووسەری بەناوبانگی جیهانی و سیاسەتمەداری پێشووی بەریتانی، لۆرد جێفری ئارچەر، لە تەمەنی 86 ساڵیدا كۆچی دوایی كرد.
ئارچەر لە كاتی نووسیندا كۆچی دوایی كردووە، ئەوەش دوای رۆژێك لە ناساندن و بڵاوكردنەوەی كتێبە نوێیەكەی دێت كە بۆ سەدان هەواداری.
كتێبەكانی ئارچەر سەدان ملیۆن دانەیان لە سەرانسەری جیهاندا لێ فرۆشراوە.
ناوبراو لە ساڵی 1992 بە دەستنیشانكردنی ئەندامی ئەنجومەنی لۆردان رێزی لێنرا.
جێفری ئارچەر بە دۆستی دێرینی كورد ناسراوە و لە ساڵانی نەوەدەكانی سەدەی رابردوودا هاوكاری پەنابەرانی كوردی كردووەو هاوكاربووە لە گەیاندنی دۆسیەی كورد.
هەروەها ساڵی 1991 لەرێگەی كۆنسێرتێكەوە داهاتی بۆ هاوكاری پەنابەرانی كورد كۆكردووەتەوە دوای جەنگی كەنداو.
ئەمڕۆ، 5ی تشرینی یەکەمی 2026، چوارچێوەی هەماهەنگی کۆبوونەوەی ئاسایی خۆی ژمارە (298) لە نووسینگەی موحسین مەندەلاوی، سەرۆکی هاوپەیمانێتی ئەساسی نیشتمانی، بە ئامادەبوونی سەرۆک وەزیرانی عیراق ئەنجامدا. کۆبوونەوەکە تەرخانکرابوو بۆ تاوتوێکردنی چەندین پرس و دۆسیەی گرنگی نیشتمانی کە پەیوەندیی راستەوخۆیان بە بژێویی ژیان و خزمەتگوزارییەکانی هاووڵاتیانی عیراقەوە هەیە.
بەپێی راگەیەندراوێکی فەرمانگەی راگەیاندنی چوارچێوەی هەماهەنگی، لە کۆبوونەوەکەدا میوانداریی فالح ساری، وەزیری دارایی کراوە و تێیدا پێداچوونەوە و گفتوگۆ لەسەر کاروباری دارایی و ئابوریی وڵات و پلانی خزمەتگوزارییەکانی حکومەت کراوە.
وەک لە راگەیەنراوەکەدا هاتووە، ئامادەبووانی کۆبوونەوەکە تیشکیان خستووەتە سەر دۆسیە ئابوری و داراییە لەپێشینەکان، هەروەها جەختیان لەسەر گرتنەبەری سیاسەتی نەختینەیی و گەشەپێدان کردەوە کە پشتیوانی لە سەقامگیریی ئابوری بکات و بە شێوەیەکی بەرچاو بەشداری بکات لە بەرزکردنەوەی ئاستی بژێویی تاکی عیراقی و باشترکردنی خزمەتگوزارییە سەرەکییەکان.
لە بەشێکی دیکەی دیدارەکەدا، باس لە پێشهاتەکانی گۆڕەپانی هەرێمی و نێودەوڵەتی و پرسەکانی ئێستای ناوچەکە و جیهان کرا، هاوکات گرنگیی پاراستنی سەقامگیریی عیراق و بەرژەوەندییە باڵاکانی لە نێو ئەو ئاڵەنگارییانەی دەوروبەریدا دووپات کرایەوە.
لە راگەیەندراوێکی هاوبەشدا، کە هەر یەکە لە سعودیە، تورکیا و پاکستان لەخۆدەگرێت، ئامادەیی تەواوی خۆی بۆ دەستپێکردنی دەستبەجێی پابەندبوونی بەرگریی هاوبەش راگەیاند.
لە راگەیەندراوەکەدا هاتووە؛ ئاسایشی هەر وڵاتێک لەم سێ وڵاتە، بەشێکی دانەبڕاوە لە ئاسایشی بەکۆمەڵی هەموویا و لەم چوارچێوەیەدا بڕیاردراوە بە دابینکردنی هێز و توانای سەربازی و بڵاوەپێکردنی خێرایان لە خاکی سعودیە بۆ بەرپەرچدانەوەی هەر هەڕەشەیەک.
هەردوو وڵاتی تورکیا و پاکستان ستایشی ئامادەیی و لێهاتوویی هێزە چەکدارەکانی سعودیەیان کرد لە روبەڕوبونەوەی هەڕەشە و هێرشەکاندا.
لە بەشێکی دیکەی راگەیەندراوەکەدا، هاوپەیمانی مەککە بە توندی سەرکۆنەی هەوڵەکانی بەئامانجگرتنی شاری مەککەی پیرۆز و مەدینەی منەوەرە و هەروەها هێرشە بەردەوامەکانی سەر شار و دامەزراوە مەدەنی و ئابوورییەکانی سعودیەی کرد.
دەزگای ئاسایشی هەرێم دەستگیر کردنی 22 ئەندامی داعشی راگەیاند، کە سەر بە (کەتیبەی 5ی سەربە ویلایەتی کوردستان)ـن و بڕێکی زۆر چەک و تەقەمەنیان پێبوە.
دەزگای ئاسایشی هەرێم رایگەیاند، لە ئۆپراسیۆنێکی بەرفراواندا کە بە هەماهەنگی لەنێوان بەڕێوەبەرایەتی گشتی ئۆپراسیۆنەکانی ئاسایش و بەڕێوەبەرایەتی ئاسایشی پارێزگای هەڵەبجە بەڕێوەچوو، توانییان گروپێکی تیرۆرستانی داعش (کەتیبەی 5ی سەربە ویلایەتی کوردستان) هەڵوەشێننەوە.
دەگای ئاسایشێ هەرێم دەڵێت؛ ئۆپراسیۆنەکە لەسەر بنەمای زانیاری وردی هەواڵگریی و ئەنجامدانی لێکۆڵینەوە لە نێوان رۆژانی 8 تا 12ی ئەیلوولی 2026 و لە ماوەی 96 سەعاتدا بە بڕیاری دادوەری لێکۆڵینەوە بەڕێوەچوو.
ئاماژە بەوەشکراوە، لە ئۆپراسیۆنەکەدا 22 تۆمەتبار لە سنوری پارێزگاکانی سلێمانی، هەڵەبجە، پێنجوێن، خورماڵ و سیروان دەستگیرکران.
بەپێی زانیارییەکانی ئاسایش، پیلانی ئەم گروپە بریتی بووە لە خۆڕێکخستن و وەرگرتنی بەیعەت لە ئەندامانیان، کۆکردنەوەی پارە بۆ کڕینی چەک، هەروەها دانیشتنی بۆمب و تەقینەوە لەناو پارێزگای هەڵەبجە و چاودێریکردن و تەقەکردن لە هێزە ئامادەیییە ئەمنییەکان لە کاتی مەشق و راهێنانەکاندا.
جگە لەوەش، گروپەکە هیوای دروستکردنی "ئەمائارەتێک"یان لە ناوچەکانی هەورامان یان شارەزوور هەبووە و هەوڵیانداوە پەیوەندی لەنێوان شانە نووستووەکانی داعش لە کوردستان و عیراق لەگەڵ تیرۆریستانی دەرەوەدا ببەستنەوە.
دەزگای ئاسایشی هەرێم دەڵێت؛ لە هێرش و پشکنینەکانی ئەم ئۆپراسیۆنەدا دەستگیرا بەسەر بڕێکی زۆر لە چەک و کەلوپەلی سەربازی، لەوانە:
-یەک چەکی ئاربیجی بە سێ گولـلە و پێنج حەشوەوە.
-یەک گوللـە هاوەن، شەش رومانە (بۆمبی دەستی).
-شەش چەکی کڵاشینکۆف لەگەڵ 13 مەخزەن و 300 فیشەک.
- دوو دەمانچە و 100 فیشەک، بە هەمان شێوە کامێرایەکی چاودێری، دووربینێکی سەربازی و بڕێک جلوبەرگ و کەلوپەلی سەربازی ناوچەکە.
مەسعود پزیشکیان رایگەیاند، دانوستان لەگەڵ دوژنێک، کە رۆژانە کاری تیررۆستی ئەنجامدەدات، پەنا دەباتە بەر سەپاندنی سزاکان، گوشارەکان و پێشێلکردنی بەڵێنەکان، هیچ مانایەکی نییە.
مەسعود پزیشکیانی سەرۆک کۆماری ئێران رایگەیاند، کە کێشەی سەرەکی ئێران لەگەڵ ئەمریکادا ئەوەیە لە هەر کاتێکدا کە دێنە سەر مێزی دانوستان، شەڕیان بەسەردا دەسەپێندرێت.
ئاماژەی بەوەشکرد، وڵاتەکەی بەردەوام ڕاستگۆیی خۆی سەبارەت بە چالاکییە ئەتۆمییەکانی سەلماندوە و کەوتووەتە ژێر توندترین پرۆسەی چاودێریی ئاژانسی نێودەوڵەتیی وزەی ئەتۆم.
پزیشکیان باسی لەوەشکردوە، لە رابردوودا، هەر جارێک پشکنەرانی ئاژانسەکە سەردانی ئێرانیان کردبێت، بنکە ئەتۆمییەکان و زاناکانیان دەستنیشان کراون، بەدوای ئەوەشدا ئەو بنکانە کراونەتە ئامانج و زاناکانیان تیرۆر کراون.
سروش سازانی، لێپرسراوی بەشی ژینگەی بەڕێوەبەرایەتی گشتی شارەوانییەکانی سلێمانی رایگەیاند، هۆکاری رێگری لە دروستبوونی لافاو و نەبوونی کاریگەریی نەرێنی بارانی کتوپڕ لەسەر سنووری پارێزگای سلێمانی، بۆ جێبەجێکردنی پلانێکی پێشوەختە و ستراتیژیی خاوێنکردنەوەی رێڕەوە ئاوییەکان دەگەڕێتەوە.
لێپرسراوی بەشی ژینگەی شارەوانییەکانی سلێمانی ئاماژەی بەوە کرد: "لە ناوەڕاستی مانگی ئابی رابردوودا، لەسەر پێشنیاری بەشی ژینگە و لەسەر راسپاردەی بەڕێوەبەری گشتی بەڕێوەبەرایەتی گشتی شارەوانییەکانی سلێمانی، هەڵمەتێکی فراوانمان بۆ پاککردنەوەی سەرجەم باراناو، مەنهۆڵ و ڕێڕەوە ئاوییەکانی زۆنی چەمچەماڵ ئەنجام دا."
ئەوەشی روونکردەوە، هەڵمەتەکە لە ماوەی یەک مانگدا و لە بەرەبەیانی زووی هەموو رۆژێکدا دوور لە چاوی کامێرا و میدیاکان، بە بێ چاوەڕوانی سوپاسگوزاری، لەسەر دەستی تیم و ژینگەپارێزانی کۆمپانیاکانی (ئانزو، گەردین و ئۆرانوس) و بە سەرپەرشتیی سەرپەرشتیارانی زۆن و چاودێرانی شارەوانییەکان ئەنجام دراوە.
ناوبراو ئاماری کارەکانی لە سنووری 43 شارەوانی بەم شێوەیە خستەڕوو:
9078 باراناو پاککراونەتەوە.
1712 مەنهۆڵ پاککراونەتەوە.
122 قەنتەرە و رێڕەوی ئاوی خاوێنکراونەتەوە.
سروش سازانی جەختیشی کردەوە، ئەم کارانە دەستکەوتێک بوون کە لە بێدەنگیدا و لە نێوەندی قەیرانی دارایی و موچەدا بە ئەنجام گەیەندراون. بە درێژایی وەرزەکانی پاییز و زستان، هەمان ئەم تیمانە بەردەوام دەبن لە شەونخونی و ئامادەباشی بۆ پاراستنی گیان و ماڵی هاووڵاتییان.