هەواڵەکان
دۆناڵد ترەمپ، سەرۆکی ئەمریکا، بڕیاری دا تەنیا رۆژێک دوای دەستپێکردنی، ئۆپەراسیۆنی سەربازی بۆ یاوەریکردنی کەشتییەکان لە گەروی هورمز راگرێت، ئەمەش وەک هەوڵێک بۆ گەیشتن بە رێککەوتن لەگەڵ ئێران و کۆتاییهێنان بە جەنگ لە رۆژهەڵاتی ناوەڕاست.
ترەمپ لە رێگەی پلاتفۆرمی "تروس سۆشیاڵ" ئاماژەی بەوە کردووە، کە لەسەر داوای پاکستان و چەند وڵاتێکی دیکە و بەهۆی ئەو پێشکەوتنە گەورەیەی لە دانوستانەکاندا بەدیهاتووە، بڕیاریان داوە "پرۆژەی ئازادی" بۆ ماوەیەکی کورت رابگرن.
سەرۆکی ئەمریکا ئاماژەی بەوەکردوە، راگرتنەکە بۆ ئەوەیە دەرفەت بۆ ئیمزاکردنی رێککەوتنێکی کۆتایی و گشتگیر لەگەڵ نوێنەرانی ئێران بڕەخسێت، هەرچەندە جەختی کردەوە کە گەمارۆکان وەک خۆیان بەردەوام دەبن.
لەلایەکی دیکەوە، مارکۆ روبیۆ، وەزیری دەرەوەی ئەمریکا، رایگەیاند کە وڵاتەکەی کۆتایی بە ئۆپەراسیۆنە هێرشبەرییەکانی بۆ سەر ئێران هێناوە و قۆناغی ئۆپەراسیۆنی "تووڕەیی داستانی - Epic Fury" کۆتایی هاتووە.
روبیۆ باسی لەوە کرد، کە لە ئێستادا کاری لەپێشینەی واشنتن کردنەوەی گەروی هورمزە بە روی هاتوچۆی کەشتییەکاندا.
مارکۆ روبیۆ، وەزیری دەرەوەی ئەمریکا رایگەیاند، پڕۆژە بڕیارێکی نوێ پێشکەشی ئەنجومەنی ئاسایشی نێودەوڵەتی دەکەن بە مەبەستی پاراستنی ئازادیی گەشتی دەریایی لە گەروی هورمز.
وەزیری دەرەوەی ئەمریکا ئاماژەی بەوەکرد، پڕۆژە بڕیارەکە بە هەماهەنگی و بەشداریی وڵاتانی (سعوودیە، قەتەر، ئیمارات، کوەیت و بەحرەین) ئامادەکراوە، داوا لە ئێران دەکات بە زووترین کات هێرشەکانی رابگرێت و واز لە چاندنی مین و وەرگرتنی باج لە گەروەکە بهێنێت.
رۆبیۆ وتیشی، لە بەشێکی تری پڕۆژە بڕیارەکەدا هاتووە، کە دەبێت تاران شوێن و ژمارەی ئەو مینانە ئاشکرا بکات کە لەو ناوچە ستراتیژییەدا چاندونی و هاوکاری نێودەوڵەتی بکات بۆ پوچەڵکردنەوەیان.
جەختی لەوەش کردەوە، کە پێویستە ئێران بگەڕێتەوە سەر مێزی گفتوگۆ و مەرجەکان قبوڵ بکات و هەریەکە لە ویتکۆف و کۆشنەر بە چڕی کار لەسەر رێگەی دیپلۆماسی دەکەن بۆ چارەسەرکردنی ئەو کێشەيیە.
بە گوێرەی راگەیەندراوێکی هاتوچۆی هەولێر، لە پێناو بەرژەوەندی گشتی و بەمەبەستی دروست نەبونی جەنجاڵی لە ناوچە گەشتیاری و سەیرانگەکان بڕیار درا بە قەدەغە کردنی هاتوچۆی ئۆتۆمبێلی بارهەڵگر و مۆتۆرسیکل لە و رێگایانەی بە ناوچە گەشتیاریەکاندا تێدەپەڕن.
وەک لە راگەیەندراوەکەدا هاتووە، بڕیارەکە بۆ رۆژانی پێنجشەممە و هەینییە و هەر بارهەڵگرێک لەو کاتانەی کە هاتوچۆ تیایدا قەدەغەیە بەڕێگاکاندا بروات ئەوا لە رێگەی کامێراکانەوە سزای دارایی بۆ تۆمار دەکرێت.
ئاماژەبەوەشکراوە، رۆژانی شەممان، لە سەعات 12ـی نیوەڕۆ تا 1ـی شەو، هەروەها رۆژانی هەینی لە 7ـی بەیانییەوە تا 2ـی شەو بڕیارەکە جێبەجێ دەکرێت.
لە راگەیەندراوەکەدا هاتوچۆی هەولێر داوا لە شۆفێرانی بارهەڵگر و ماتۆرسکیل دەکات پابەندی بڕیارەکە بن بۆ ئەوەی گەشتیاران دوربن لە روداوی نەخوازراو.
بەپێی ئامارێکی رەسمی بەڕێوبەرایەتی گشتی تەندروستی سلێمانی، لە ماوەی مانگی نیسانی رابردوودا (1ـی 4 تا 30ـی 4) نەخۆشخانەی شار پێشوازی لە نزیکەی 30 هەزار نەخۆش کردووە، کە زۆرینەیان سەردانی بەشی فریاکەوتن و ئۆپی دی-یان کردووە.
تەندروستی سلێمانی ئاماژەی بەوەکردوە، لەماوەی مانگی رابردودا، 29,543 نەخۆش سەردانی نەخۆشخانەی شاریانکردوە و شەش هەزار و 162 نەخۆش لە بەشە جیاوازەکانی وەک فریاکەوتن، گورچیلەی دەستکرد، هەناوی و نەشتەرگەری داخڵکراون و چارەسەری پێویستیان بۆ کراوە.
هەروەها لەو ماوەیەدا هەزار و 88 نەشتەرگەری جۆراوجۆر ئەنجامدراوە، كە 407 نەشتەرگەری فریاكەوتن و 128 نەشتەرگەری قەستەرە و 84 شەبەكە و باڵۆن و 47 نەشتەرگەری بۆ منداڵان بووە.
هاوکات لە چوارچێوەی خزمەتگوزارییە پزیشکییەکاندا، نزیکەی 49 هەزار شیکاری تاقیگەیی و زیاتر لە 11 هەزار تیشک لەگەڵ هەزاران پشکنینی سۆنەر، هێڵکاری دڵ و چارەسەری سروشتی بۆ سەردانیکەران ئەنجامدراون.
رۆژنامەی "Page Six" بڵاویکردەوە، جیف بێزۆس، دامەزرێنەری کۆمپانیای ئەمازۆن بۆ بازرگانی ئەلیکترۆنی و خزمەتگوزاری هەور، یەختە چارۆکەدارەکەی بە ناوی "Koru" بە بڕی 500 ملیۆن دۆلار خستووەتە روو بۆ فرۆشتن.
رۆژنامەکە ئاماژەی بەوە کردووە کە درێژیی ئەم یەختە 417 پێیە (127 مەتر)، و بەپێی گۆڤاری "بۆت ئینتەرناشناڵ" لە ئێستادا گەورەترین یەختی چارۆکەدارە لە جیهاندا.
رۆژنامەی "نیویۆرک تایمز" باسی لەوە کردووە کە بەهۆی گەورەیی قەبارەی یەختەکەوە، ناتوانێت لەگەڵ یەختە تایبەتەکانی دیکەدا لە یەک لەنگەرگادا لە فلۆریدا لەنگەر بگرێت.
رۆژنامەی "Page Six" دەڵێت: جیف بێزۆس کۆشکە سەرئاوکەوتووەکەی (کۆرو) کە بەهای 500 ملیۆن دۆلارە، بە بێدەنگی خستووەتە روو بۆ فرۆشتن، چونکە هێندە گەورەیە بەڕێوەبردنی کارێکی زۆر قورسە.
لە مانگی ئازاری رابردوودا، هەواڵەکان ئاماژەیان بەوە دابوو کە بێزۆس کۆمەڵێک زەوی لە دوورگەیەکدا کڕیوە کە بە "حەشارگەی ملیاردێرەکان" لە فلۆریدا ناسراوە، بە بڕی 339 ملیۆن دۆلار.
هەروەها لە کانوونی یەکەمی رابردوودا، ئاژانسی بلۆمبێرگ ڕایگەیاندبوو کە سامانی 500 دەوڵەمەندترین کەسایەتی جیهان بە بڕی 2.2 تریلیۆن دۆلار زیادی کردووە، کە ئەمەش ژمارەیەکی پێوانەییە.
بەرێوەبەرایەتی پۆلیسی سلێمانی، بڵاویکردوەتەوە، هێزەکانیان ژن و پیاوێکیان بە تۆمەتی ئەشکەنجەدانی منداڵەکانیان کە تەمەنیان هەشت ساڵ و چوار ساڵبووە دەستگیر کردوە.
پۆلیسی سلێمانی لە راگەیەندراوێکدا ئاماژەی بەوەکردوە، دوای ئاگادارکردنەوەیان لە روداوەکە و بە بڕیاری دادوەر مەفرەزەکانی بنکەی پۆلیسی سەیوان چونەتە شوێنی روداوەکە و ژن و پیاوەکەیان دەستگیرکردوە، کە هاوسەری یەکترین و بە رەچەڵەک عەرەبن.
ئەوەشخراوەتەڕوو، دوای لێکۆڵینەوەکان دەرکەوتوە، ژنەکە باوەژنی منداڵەکانە و لە دایکوبی ساڵی 2001یەکە و بەدەستەبەری دارایی ئازادکراوە.
لەبارەی پیاوەکەشەوە، پۆلیسی سلێمانی دەڵێت؛ لە ئێستادا بەپێی مادەی (29) لە یاسای چاودێری نەوجەوانان و بەبڕیاری دادوەر راگیراوە و منداڵەکانیش، دوای وەرگرتنی چارەسەر لە نەخۆشخانە گوازراونەتەوە بۆ خانەی بێسەرپەرشتان بەمەبەستی پاراستن و سەلامەتی ژیانیان.
دۆناڵد ترەمپ، سەرۆکی ئەمریکا، ئەمڕۆ سێشەممە، جەختی کردەوە کە سوپای ئێران بەتەواوی تێکشکێنراوە، ئاماژەی بەوەش دا کە تاران چیتر خاوەنی هێزی دەریایی یان ئاسمانی نییە.
ترەمپ لە لێدوانێکی رۆژنامەوانیدا رایگەیاند، کردەوە سەربازییەکان بوونەتە هۆی تێکشکاندنی ئەو توانایانە بە شێوەیەکی گشتی و کوژرانی سەرکردە سەربازییەکان، ئاماژەی بەوەش کرد ئەوەی ئێستا رودەدات تەنها پێکدادانێکی سەربازی بچووکە، و ئێران هیچ دەرفەتێکی نییە لەم رووبەڕووبوونەوەیەدا و هەرگیز نەیبووە.
هەروەها وتی: رژێمی ئێران لە کۆمەڵێک کەسی "نەخۆشی دەروونی" پێکهاتووە، و جەختیشی کردەوە کە رێگە نادەن ئەوانەی بە "شێت" وەسفی کردن ببنە خاوەنی چەکی ئەتۆمی.
سەرۆکی ئەمریکا لە درێژەی قسەکانیدا وتی، ویلایەتە یەکگرتووەکان لە مامەڵەکردن لەگەڵ دۆسیەی ئێراندا زۆر سەرکەوتووانە کار دەکات، و جەختی کردەوە کە لە پێشینەی کارەکانیان پاراستنی ئاسایشی نەتەوەیی ئەمریکایە.
قوباد تاڵەبانی، جێگری سەرۆک وەزیران لەگەڵ تیمی بەڕێوەبەرە گشتییەکانی یەکێتی لە حکومەتی هەرێمدا کۆبووەوە و لە کۆبوونەوەکەدا بەرچاوڕوونی پێدان لەبارەی سیاسەت و هەڵوێستی یەکێتی بۆ هەردوو حکومەتی هەرێم و حکومەتی فیدڕاڵ.
لە تەوەرێکی کۆبوونەوەکەدا باسی سیاسەتی یەکێتی لە بەغداد کرد و ئاماژەیدا بە پێگەی بەهێزی یەکێتی و رایگەیاند، یەکێتی بەغداد وەک قوڵایی ستراتیژی هەرێمی کوردستان دەبینێت.
هەروەها یەکێتی وەک هێزێکی کاریگەر لەلایەکەوە هەوڵ دەدات کێشەکانی هەرێم و بەغداد چارەسەر بکات و لەلایەکی دیکەشەوە کار دەکات بۆ ئەوەی لەڕێی داڕشتنەوەی سیاسەتەوە بەشدارییەکی کاریگەری هەبێت لە چارەسەرکردنی کێشە جۆراوجۆرە ناوخۆیی و دەرەکییەکانی عیراق.
وتیشی یەکێتی بەم سیاسەتە ژیرانەی کە رەچاوی کردووە نەک تەنها چیتر هێزێک نییە پەراوێز بخرێت، بەڵکو بە پێچەوانەوە بۆ هەموو پرسە گرنگ و چارەنووسسازەکانی عێراق و ناوچەکە حیساب بۆ سیاسەت و هەڵوێستی یەکێتی دەکرێت.
سەبارەت بە رەوشی ناوخۆی هەرێمی کوردستانیش ئاماژەیدا بە کۆسپەکانی بەردەم پێکهێنانی حکومەتی نوێی هەرێم و رایگەیاند یەکێتی لەسەر هەڵوێست و سیاسەتی خۆی پێداگرە، دەرگای گفتوگۆ و دانووستانی هەرگیز دانەخستووە، بەڵام سووریشە لەسەر هاوبەشیی راستەقینە لە حکومڕانیدا.
روونیشیکردەوە یەکێتی پێیوایە حکومڕانی بە شێوازی رابردوو سەرکەوتوو نابێت لە پاراستن و پێشخستنی هەرێم و چارەسەرکردنی کێشەکانی ناوخۆ و کێشەکانیشمان لەگەڵ بەغداف. هەربۆیە یەکێتی پێداگرە لەسەر راستکردنەوە رێڕەوی حکومڕانی و بەهێزکردنی پێگەی دامەزراوەکان و هاوبەشی راستەقینە لە حکومڕانیدا.
جەختیشی کردەوە ئەم سیاسەتەی یەکێتی تەنها لەبەر یەکێتی خۆی نییە، بەڵکو لە بەرژەوەندیی خەڵکی کوردستان و هەموو لایەنەکانە بە خودی پارتی دیموکراتی کوردستانیشەوە. چونکە تەنها بە هاوبەشیی راستەقینە و بە بەهێزکردنی دامەزراوەکان دەتوانرێت ئاسەوارەکانی دوو ئیدارەیی نەمێنێت و هەر کەسێک لە هەر پۆست و پێگەیەکدابێت هەم دەسەڵاتی پێویستی لە هەموو کوردستاندا دەبێت و هەم بەرانبەر بە هەموو خەڵکی کوردستان بەرپرسیار دەبێت.
محەمەد ئیسحاق دار، وەزیری دەرەوەی پاکستان، ئەمڕۆ سێشەممە جەختی کردەوە کە ئامانجی وڵاتەکەی وەک نێوەندگیر، قایلکردنی ئێران و ویلایەتە یەکگرتووەکانی ئەمریکایە بۆ گەیشتن بە رێککەوتنی ئاشتی.
دار لە لێدوانێکی رۆژنامەوانیدا بەدواداچوونی بۆ کردووە، رایگەیاند: "ئامانجی پاکستان وەک نێوەندگیر ئەوەیە کە ئێران و ویلایەتە یەکگرتووەکان قایل بکات بگەنە رێککەوتنێکی ئاشتی، ئەوەش شتێکە کە ناوچەکە و جیهان پێویستیان پێیەتی.
هەروەها دار وتیشی: دڵنیایین لەوەی پێشکەوتنی گەورە لە دانوستانەکاندا بەدەست هاتووە، هەوڵی زۆرمان داوە بۆ گەیشتن بە ئاگربەست و دەستپێکردنی دیالۆگ، جەختیشی کردەوە کە: هەوڵمان داوە رێگری بکەین لەرودانی هێرش بۆ سەر وڵاتانی کەنداو و سەرکۆنەی ئەو هێرشانەشمان کردووە کە کراونەتە سەریان.
فەرماندەیی ناوەندیی ئەمریکا (سێنتکۆم)، ئەمڕۆ سێشەممە، رایگەیاند کە رێگرییان لە 51 کەشتی کردووە لە چوونە ناوەوە بۆ ئێران یان هاتنە دەرەوە لێی.
فەرماندەییەکە لە بەیاننامەیەکدا ئاماژەی بەوە کردووە: هێزەکانی ئەمریکا تاوەکو ئەمڕۆ بەردەوامن لە سەپاندنی گەمارۆی دەریایی.
هەروەها ئەوەشی خستووەتە روو: داوا لە 51 کەشتی کراوە بگەڕێنەوە یان روو لە بەندەرەکان بکەنەوە، ئەوەش بە مەبەستی رێگریکردن لە کەشتییە بازرگانییەکان بۆ چوونە ناو خاکی ئێران یان بەجێهێشتنی.
دەزگای ئاسایشی هەرێم رایگەیاند، گروپێکی نێودەوڵەتی مادەی هۆشبەر دەستگیرکران و دەستبەسەر ملیۆنێک حەبی کاپتاگۆن و 100 کیلۆ مادەی هۆشبەر گیرا.
ئەمڕۆ سێشەممە، دەزگای ئاسایشی هەرێم لە راگەیەنراوێکدا رایگەیاند، لە ماوەکانی رابردوودا و لە ئۆپراسیۆنێکی هەواڵگری هاوبەشی نێوان دەزگای هەواڵگری نیشتمانی عیراق و ئاژانسی پاراستن و زانیاری/زانیاری و بەڕێوەبەرایەتی گشتی نەهێشتنی مادە هۆشبەرەکانی دەزگای ئاسایشی هەرێم، توانرا گروپێکی نێودەوڵەتی بازرگانیکردن بە مادەی هۆشبەر لە چەند پارێزگایەکی عیراق و هەرێمی کوردستان دەستگیربکەن.
ئاماژەی بەوەشكرد، لە ئۆپراسیۆنەکەدا توانیان دەستبەسەر زیاتر لە یەک ملیۆن دەنک حەبی کاپتاگۆن و 100 کیلۆگرام مادەی هۆشبەر لە جۆری حەشیشدا بگرن، رێگریش لە ناردنە دەرەوەی مادەکان بۆ دەرەوەی وڵات بکەن.
دەزگای ئاسایشی هەرێم ئاشکراشیکرد، لەئێستادا سەرجەم تۆمەتبارانی گروپەکە بە مادەی 28 لە یاسای مادە هۆشبەرەکان و کارتێکارە عەقڵییەکان ژمارە (50)ـی ساڵی 2017ـی عیراقی راگیراون و لێکۆڵێنەوە لە دۆسییەکانیان بەردەوامە.
سەرچاوەیەکی ئیسرائیلی بە تۆڕی سی ئێن ئێنـی راگەیاندوە، تەلئەبیب لەگەڵ واشنتۆن لە هەماهەنگیدایە بۆ ئامادەکاریی گەرێکی تری هێرشەکان بۆ سەر ئێران.
بە گوێرەی زانیارییەکانی سی ئێن ئێن، پێدەچێت هێرشەکانی ئەمجارە ژێرخانی وزە و بەرپرسانی باڵای ئەو وڵاتە بکاتە ئامانج .
هاوکات جەخت لەوە کراوەتەوە، کە بڕیاری کۆتایی بۆ دەستپێکردنەوەی پێکدادانەکان لە دەستی دۆناڵد ترەمپ، سەرۆکی ئەمریکادایە.
ئەمە لەکاتێکدایە کە بنیامین ناتانیاهۆ لە چەند رۆژی رابردوودا زنجیرەیەک کۆبوونەوەی ئەمنیی نهێنی ئەنجامداوە و داوای لە وەزیرەکانی کردووە بە هیچ شێوەیەک لەسەر ئەم بابەتە لێدوان نەدەن و بێدەنگ بن.
وەزیری بەرگریی ویلایەتە یەکگرتووەکانی ئەمریکا، ئەمڕۆ سێشەممە، رایگەیاند کە ئێران هیچ جۆرە کۆنترۆڵێکی بەسەر گەروی هورمزدا نییە، هاوکات جەختیشی کردەوە کە هێزەکانی ئەمریکا پێشێلی سەروەریی ئاوە هەرێمییەکانی ئێران ناکەن.
وەزیر لە لێدوانێکی رۆژنامەوانیدا ئاماژەی بەوە کرد: دەستپێشخەریی پڕۆژەی ئازادی بە ئامانجی پاراستنی هێڵەکانی گواستنەوەی بازرگانییە لە بەرانبەر هەڕەشە و دەستدرێژییەکانی ئێران،"
رونیشیکردەوە کە: تاران پەنا بۆ تێکدانی ئارامیی کەشتییەکان و تەقەکردن و سەپاندنی سەرانەی نایاسایی دەبات.
هەروەها رایگەیاند: لە رێگەی بڵاوکردنەوەی کەشتیی جەنگی و فڕۆکەی هێلیکۆپتەر، چاودێریی وردی گەروی هورمزمان گرتووەتە دەست بۆ دەستەبەرکردنی هاتوچۆیەکی ئارام بۆ کەشتیگەلەکان،"
و دووبارە جەختی لەوە کردەوە کە "ئێران باڵادەست نییە بەسەر ئەم رێڕەوەدا."
وەزیری بەرگری ئاماژەی بەوەش دا کە بەکارهێنانی هێز لەلایەن واشنتۆنەوە بۆ پاراستنی بەرژەوەندییەکانی کۆمەڵگەی نێودەوڵەتییە و وتی: ئێمە خوازیاری پێکدادانی سەربازی نین، بەڵام رێگەش نادەین تاران مافی وڵاتانی تر لە تێپەڕبوون بەناو ئاوە نێودەوڵەتییەکاندا زەوت بکات.
لە کۆتاییدا ئاماژەی بەوە کرد کە ئەم پڕۆژەیە هەنگاوێکی "کاتییە" و پێویستە جیهان بەرپرسیارێتیی خۆی هەڵبگرێت، چونکە تاران خاڵە ستراتیژییەکانی جیهان بۆ بەرژەوەندی دارایی خۆی و هەڕەشە لە دەریاوانان بەکاردەهێنێت، و جەختی کردەوە: ئاوە نێودەوڵەتییەکان موڵکی گشتین و رێڕەوی بازرگانی بە کراوەیی دەمێنێتەوە.
دەوڵەت باخچەلی، سەرۆكی پارتی بزووتنەوەی نەتەوەیی (مەهەپە)، ناوی "رێكخەری پڕۆسەی ئاشتی و بەسیاسیبوون"ی بۆ پێگەی عەبدوڵا ئۆجەلان پێشنیاز كرد و رایگەیاند كە دەبێت ناوبراو لە ژێر ئەم ناوەدا كارەكانی ئەنجام بدات.
باخچەلی لە كۆبوونەوەی فراكسیۆنی پارتەكەیدا ئاماژەی بەوە كرد كە هەنگاوی داهاتوو بریتییە لە هەمواركردنەوەی یاسایی و وتی: تاوتوێكردنی پرسی 'پێگەی' ئۆجەلان بۆ ئێمە گرنگە و دەشڵێت كە چەكدانان لەلایەن پەكەكەوە بە تەنیا ئەنجام نییە، بەڵكو دەبێت پرسی پێگەی ئۆجەلانیش یەكلایی بكرێتەوە بۆ ئەوەی پڕۆسەكە بە كاریگەری بەڕێوە بچێت.
باخچەلی وتیشی: ئەگەر بۆشایییەك لە پێگەی عەبدوڵڵا ئۆجەلاندا هەبێت، دەبێت بە شێوازێك چارەسەر بكرێت كە خزمەت بە داهاتووی توركیا بكات.
لە كۆتاییدا باخچەلی جەختی كردەوە كە لیژنەی پەیوەندیدار بەرپرسیارێتییەكی مێژوویی لەسەر شانە و نابێت ئەم هەلە لەپێناو دەستكەوتی سیاسیی بچووكدا بەفیڕۆ بدرێت، یان ببێتە هۆی پارچەبوونی توركیا.
دەوڵەت باخچەلی پێشنیازێكی نوێ بۆ ناونانی پێگەی ئۆجەلان دەخاتە روو<
باڵیوزخانەی ئەمریکا لە بەغداد، ئەمڕۆ سێشەممە، هۆشدارییەکی نوێی تایبەت بە عیراقی دەرکرد.
باڵیوزخانەکە لە بەیاننامەیەکدا رایگەیاند: کایەی ئاسمانی عیراق سەرلەنوێ کراوەتەوە و لە ئێستادا گەشتە بازرگانییەکان بە شێوەیەکی سنووردار کار دەکەن.
هەروەها ئاماژەی بەوە کردووە: ئەوانەی بیر لە گەشتی ئاسمانی لە ناوخۆی عیراقدا دەکەنەوە، دەبێت ئاگاداری ئەو مەترسییە بەردەوامانە بن کە لە ئارادان بەهۆی هەبوونی مووشەک، فڕۆکەی بێفڕۆکەوان و پاشماوەی مووشەکی لە ئاسمانی عێراقدا.
باڵیوزخانەی ویلایەتە یەکگرتووەکانی ئەمریکا لە عیراق، جارێکی تر هۆشداری ئاستی چوارەم بە هاووڵاتیانی ئەمریکی رادەگەیەنێت کە بریتییە لە: سەفەر مەکەن بۆ عیراق.
هەروەها ئامۆژگاری هاووڵاتیانی دەکات و دەڵێت: بۆ هیچ مەبەستێک گەشت بۆ عیراق مەکەن، ئەگەر لەوێشن هەر ئێستا بەجێی بهێڵن.
لە بەشێکی تری بەیاننامەکەدا هاتووە: میلیشیاکان بەردەوامن لە داڕشتنی پلان بۆ هێرشی زیاتر دژی هاووڵاتیانی ئەمریکی و ئەو ئامانجانەی پەیوەندییان بە ویلایەتە یەکگرتووەکانەوە هەیە لە سەرانسەری عێراق، بە هەرێمی کوردستانیشەوە.
هەروەها هەندێک لایەنی سەر بە حکومەتی عیراق بەردەوامن لە پێشکەشکردنی پشتگیری سیاسی، دارایی و مەیدانی بۆ ئەو میلیشیایانە."
سەرەڕای فەرمانی کشانەوەی ناچاری، نێردەی ویلایەتە یەکگرتووەکان لە عیراق بەردەوامە لە کارەکانی بۆ پێشکەشکردنی هاوکاری بە هاووڵاتیانی ئەمریکی لە عێراق.
هۆشداریش دەدات: هەوڵ مەدەن بچنە سەفارەت لە بەغداد یان کونسوڵخانەی گشتی لە هەولێر، بەهۆی بوونی مەترسییە ئەمنییە گەورەکان ئەگەر ئێوە هاووڵاتی ئەمریکین و پێویستان بە هاوکارییە، پەیوەندی بکەن.