روانگەی ئیكۆ عیراق ئاشکرایکرد، عیراق لە نۆ مانگی سەرەتای ئەمساڵدا زیاتر لە 834 ملیۆن بەرمیل نەوتی بەرهەمهێناوە و لەئێستاشدا ئاستی بەرهەمی رۆژانەی نەوتی نزیكەی چوار ملیۆن و 400 هەزار بەرمیلە.

روانگەی ئیكۆ عیراق بۆ كاروباری ئابووری رایگەیاند، لە نۆ مانگی سەرەتای ئەمساڵدا عیراق 834.7 ملیۆن بەرمیل نەوتی بەرهەمهێناوە و لە مانگی ئەیلولیشدا ئاستی بەرهەمی رۆژانەی گەیشتووەتە بەرزترینی ئەمساڵ و 4.399 ملیۆن بەرمیل بووە.

ئەوەشی خستووەتەڕوو، بەهۆی شەڕ و پێكدادانەكانی ناوچەكەوە لە مانگەكانی سەرەتای ئەمساڵدا ئاستی بەرهەمهێنانی نەوت لە عیراق لە مانگی ئایاردا گەیشتووەتە 1.406 ملیۆن بەرمیل، بەڵام دواتر بە چەند قۆناغێك ئاستی بەرهەمهێنان بەرزبووەتەوە.

ئەوەش لەكاتێكدایە، حكومەتی عیراق هەڵمەتێكی فراوانی دەستپێكردووە بۆ بەرەوپێشبردنی ژێرخان و كەرتی وزەی وڵاتەكە و كاریش دەكات بۆ دۆزینەوەی رێڕەوی تری هەناردەی نەوت جگە لە گەروی هورمز، كە ئێستا بەهۆی جەنگی ئێران و ئەمریكاوە جوڵەی كەشتیوانی تێیدا سەخت بووە.

کەشناسیی هەرێم پێشبینییەکانی کەشوهەوای 48 سەعاتی داهاتووی بڵاوکردەوە و ئاشکرایکرد؛ بارانبارین بەردەوام دەبێت.

بەڕێوەبەرایەتی گشتی کەشناسی و بوومەلەرزەزانیی هەرێم رایگەیاند، ئەمڕۆ ئاسمان لە نێوان نیمچەهەور بۆ هەوری تەواو دەبێت، نمەباران و بارانی مامناوەند بە شێوەی پچڕپچڕ لە کات و شوێنی جیاوازدا دەبارێت، بەتایبەتی لە ناوچە شاخاوییەکان.

ئاماژەی بەوەشکرد، لە کاتەکانی دوای نیوەڕۆوە کەشوهەوا سەقامگیر دەبێتەوە و ئاسمان دەبێتە نیمچە هەور بۆ پەڵە هەور.

کەشناسیی هەرێم ئەوەشی خستەڕوو، سبەینێ ئاسمان ساماڵ و پەڵە هەور دەبێت، لە هەندێک کات و شوێندا دەگۆڕێت بۆ نیمچەهەور، هاوکات پلەکانی گەرما کەمێک بەرز دەبنەوە بەراورد بە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی

هەولێر: 32 پلەی سیلیزی

پیرمام: 27 پلەی سیلیزی

سلێمانی: 31 پلەی سیلیزی

هەڵەبجە: 32 پلەی سیلیزی

چەمچەماڵ: 32 پلەی سیلیزی

دهۆک: 32 پلەی سیلیزی

زاخۆ: 32 پلەی سیلیزی

گەرمیان: 36 پلەی سیلیزی

حاجی ئۆمەران: 18 پلەی سیلیزی

ئاگر لە کۆگایەکی سوتەمەنی لە تانجەرۆ کەوتووەتەوە و لە ئێستادا تیمەکانی بەرگریی شارستانی سەرقاڵی کۆنترۆڵکردنی ئاگرەکەن.

مەریوان عەبدوڵا، پەیامنێری کوردسات نیوز رایگەیاند، بەیانی ئەمڕۆ ئاگر لە کۆگایەکی سوتەمەنی لە ناوچەی تانجەرۆی سلێمانی کەوتەوە و لە نزیکترین کاتدا تیمەکانی بەرگریی شارستانی گەیشتوونەتە شوێنی روداوەکە.

لەلای خۆشیەوە،ئارام عەلی، وتەبێژی بەرگری شارستانی سلێمانی بە کوردسات نیوزی راگەیاند، تیمەکانیان گەیشتونەتە شوێنی روداوی ئاگرکەوتنەوەکەی تانجەرۆ و سەرقاڵی کۆنتڕۆڵکردنی ئاگرەکەن، لە ئێستاشدا بەشێک لە ئاگرەکە کۆنتڕۆڵ کراوە.

کەشتییەکی نەوتهەڵگر لە گەروی هورمز بە مینێکی دەریاییدا تەقییەوە کە زیاتر لە دوو ملیۆن بەرمیل نەوتی خاوی هه‌ڵگرتبوو.

ئەمڕۆ ، میدیاکانی ئێران لە زاری سوپای پاسدارانەوە بڵاویانکردەوە، کەشتییەکی گه‌وره‌ی نه‌وت لە کاتی تێپەڕبوونی بە گەروی هورمزدا، بەر مینی دەریایی کەوتووە و تەقیوەتەوە.

سوپای پاسداران ئاشکرایکرد، کەشتییەکە زیاتر لە دوو ملیۆن بەرمیل نەوتی خاوی هەڵگرتبوو، هەوڵیداوە بە "شێوەیەکی نایاسایی و لە رێگەیەکی مۆڵەتپێنەدراو" لەلایەن ئێرانەوە، لەو رێڕەوە ئاوە ستراتیژییە تێپەڕێت.

سوپای پاسداران دەشڵێت، گەروی هورمز داخراوە و لە ژێر كۆنترۆڵی ئێراندایە، لە ئەنجامی پێشێلكردنی هەر یاسایەكی تێپەڕینیش لە گەروەكەوە، كەشتی سەرپێچیكار دەكرێتە ئامانج.

پێشتر سوپای ئەمەریکا رۆژی پێنجشەممە رایگەیاندبوو، سوپای پاسدارانی ئێران بە موشەک هێرشی کردووە سەر کەشتییەکی کۆنتێنەر لە گەروی هورمز.

گەشەپێدانی چوار كێڵگەی نەوت لە سنوری پارێزگای كەركوك، بەرهەمهێنانی نەوت لەرۆژێكدا دەگەیەنێتە 450 هەزار بەرمیل لەگەڵ دابینكردنی 500 ملیۆن پێسێجا غاز.

باسم محەمەد خزەیر وەزیری نەوتی عیراق رایگەیاند، پلان و ئامانجەكانیان بۆ ساڵانی داهاتوو زیادكردنی ئاستی بەرهەمهێنانی نەوت و گەشەپێدانی كەرتی غاز و كۆتایی هێنانە بە دۆسێی سوتانی غازی هاوەڵ بە مەبەستی پڕكردنەوەی پێداویستی ناوخۆ و گەیشتن بە خودبژێوی لە كەرتی وزەدا.

وتیشی، گەشە پێدانی چوار كێڵگەی نەوت لە سنوری پارێزگای كەركوك لە رێگەوی كۆمپانیای بریتش پتۆلیۆمەوە ناسراو بە (بی پی)ی بەریتانی، ئاستی بەرمهێنانی نەوت لە سنوری پارێزگاكە رۆژانە دەگەیەنێتە 450 هەزار بەرمیل لەگەڵ دابینكردنی 500 ملیۆن پێسێجا غاز.

وەزیری نەوتی عیراق ئاماژەی بەوەشكرد، بە ئەنجامگەیشتنی ئەو پرۆژەیە، كاریگەری زۆری دەبێت لەسەر گەشەسەندنی ئابوری پارێزگای كەركوك و بەهێزكردنی پێگەی عیراق لە كەرتی پیشەسازیی نەوت لە نێوان وڵاتاندا.

لە سەروبەندی نزیكبوونەوەی پەیوەندییەكانی ترەمپ و پوتن، ترەمپ سزاكانی یاسای لیندزی گراهامی بۆ سەر روسیا راگرت و دەڵێت، ئەو هەنگاوە خزمەت بە بەرژەوەندییە نیشتمانییەكانی ئەمریكا دەكات.

دۆناڵد ترەمپ سەرۆكی ئەمریكا رایگەیاند، بە ئیمزاكردنی بڕیارێكی جێبەجێكار، جێبەجێكردنی سزاكانی یاسای لیندزی گراهامی بۆ سەر روسیا راگرتووە.

ئاماژەی بەوەشداوە، ئەو هەنگاوە لەم قۆناغەدا خزمەت بە بەرژەوەندییە نیشتمانییەكانی ئەمریكا دەكات.

ئەوەش لەدوای ئەوەدێت، ناوەڕاستی مانگی ئەیلولی رابردوو ترەمپ یاسای لیندزی گراهامی ئیمزاكرد، ، كە تێیدا هاتووە لەماوەی 30 رۆژدا باجی گومرگی تاكو رێژەی ٪100 بسەپێنرێت بەسەر كاڵا و سوتەمەنییەكانی روسیادا، سزاش بسەپێنرێت بەسەر ئەو وڵاتانەی هاوكاری روسیا دەكەن بۆ دەربازبوونی لە سزاكانی ئەمریكا.

سەرۆكی ئۆكراین لەبارەی وەستاندنی جەنگ لەگەڵ روسیادا و لە لوتکەیەک لە پەرلەمانی ئەوروپادا ئاشكرایکرد، مۆسكۆ نیازی راستەقینەی بۆ وەستاندنی جەنگ نییە و بە دەستبەسەرداگرتنی دۆنباس رازی نابێت و رێككەوتن لە كەرتی وزە قبوڵ ناكەن. 

ڤۆڵۆدیمێر زێلنسكی سەرۆكی ئۆكراین لە لوتكەی ئەنجومەنی ئەوروپا لە برۆكسل رایگەیاند، سەرۆكی روسیا هیچ نیازێكی راستەقینەی بۆ ئاشتی نییە و نایەوێت جەنگەكە كۆتایی پێ بێت و هەوڵ دەدات بە فێڵ و لە رێگەی دۆزینەوەی دەستەواژەی نوێوە قۆناغ بە قۆناغ سزاكانی سەری كەم بكاتەوە.

زێلنسكی وتیشی، ناتوانن قبوڵی رێككەوتنی كەرتی وزە بكەن  و لە هەنگاوی داهاتوو سزای كەرتی بانكی و پیشەسازی روسی لادەبرێن و دواتریش پارە بلۆككراوەكانی روسیا ئازاد دەكرێن.

راشیگەیاند، بۆ ئەم زستانە و بۆ ساڵی داهاتوو، داوای 70 ملیار یۆرۆ لە ئەوروپا دەكەن بەوپێیەی قۆناغی داهاتوو سەختتر دەبێت.

سەرۆک کۆماری ئێران لەبارەی دوایین رەوشی دانوستانیان لەگەڵ ئەمریکادا چەند بابەتێکی جیاوازی بە پوختیی خستەڕوو و هۆشداریشی دایە ئەمریکا لەسەر بەردەوامیدان بە سزاکانیان لەسەر وڵاتەکەی.

مەسعود پزیشکیان، سەرۆک کۆماری ئێران رایگەیاند، بەردەوامبوونی سزاکانی ئەمریکا دەبێتە هۆی خراپتربوونی رەوشەکە.

وتیشی، سزاکانی ئەمریکا کێشەی بۆ ئێران و جیهانیش دروستکردووە.

ئاماژەی بەوەشدا، ئەمریکا باشترە بە زمانی دیالۆگ و گفتوگۆ لەگەڵ ئێران مامەڵە بکات، لە جیاتی زمانی هێز.

لە چوارچێوەی رێکارە داراییەکان و پابەندبوون بە رێنماییەکانی بانکی ناوەندییەوە، پڕۆژەی هەژماری من بڕیاری دوورخستنەوەی بانکی گەشەپێدانی نێودەوڵەتی IDMـی لە پڕۆژەکە راگەیاند، بەو هۆیەوە ناوبراو ئێستا لە مامەڵەکردن بە دۆلاری ئەمریکی بێبەش کراوە و سوودمەندەکانی دەگوازرێنەوە بۆ بانکێکی دیکە.

بەگوێرەی زانیارییەکانی پڕۆژەی هەژماری من، لە ئەیلوولی 2025ـدا ئەم بڕیارە دراوە و تێیدا بانکی گەشەپێدانی نێودەوڵەتی بە تەواوی لە پڕۆژەکە دوورخراوەتەوە. ئامانجی سەرەکی لەم گواستنەوەیە ئەوەیە کە سوودمەندانی حکومەتی هەرێمی کوردستان بتوانن بەبێ کێشە مامەڵە داراییەکانیان بە دۆلاری ئەمریکی ئەنجام بدەن و کارتە بانکییەکانیان لە ناوخۆ و دەرەوەی عیراق بەکاربهێنن.

پڕۆژەی هەژماری من جەختی لەوە کردەوە، لە ئێستادا بەردەوامە لە کارکردن لەگەڵ حەوت بانکی بەشدار کە بە تەواوی پابەندن بە رێنمایی و رێساکانی بانکی ناوەندی عیراقەوە، بە مەبەستی پاراستنی مافی سوودمەندان و مسۆگەرکردنی خزمەتگوزاریی متمانەپێکراو.

حکومەتی ژاپۆن سەرقاڵی داڕشتنی پلانێکی نوێیە بۆ ئەوەی تا ساڵی 2030 ژمارەی هەڵدانی کەشتییە ئاسمانییەکانی بۆ 30 موشەک لە ساڵێکدا بەرز بکاتەوە و ئەمەش وەک هەنگاوێک بۆ بەهێزکردنی کەرتی ئابوری و بەدەستهێنانی سەربەخۆیی زیاتر لە کایەی بۆشایی ئاسماندا.

بەپێی راپۆرتێکی رۆژنامەی 'نیکای'ـی ژاپۆنی، وەزارەتی ئابوری، بازرگانی و پیشەسازی بۆ ساڵی دارایی داهاتوو داوای 76 ملیار یەن (نزیکەی 480 ملیۆن دۆلاری ئەمریکی) کردووە، بە مەبەستی دروستکردنی سەکۆی هەڵدانی کەشتیی ئاسمانیی نوێ لە بنکەکانی 'ئۆچینۆرا' و 'تانێگاشیما'ـی سەر بە ئاژانسی (JAXA)، تا بتوانرێت بە لە یەک کاتدا ئامادەکاری بۆ هەڵدانی چەندین کەشتی بکرێت.

لە راپۆرتەکەدا ئەوەش هاتووە، تۆکیۆ چاوی لەوەیە لە داهاتوودا کەشتیی ئاسمانی بۆ وڵاتانی دیکەش هەڵبدات.

هاوکات، لە نێوان ساڵانی 2015 بۆ 2024 لە کۆی 130 مانگی دەستکرد تەنیا 65 دانەیانی لە ناوخۆی وڵاتەوە هەڵداوە و ئەوانی دیکەی لەڕێگەی هاوبەشەکانیەوە (بە تایبەت ئەمریکا) ناردووەتە خولگەی زەوی؛ ئەوەش لە کاتێکدایە روسیا 100% و چین 99%ـی مانگە دەستکردەکانیان لەڕێگەی بنکەکانی خۆیانەوە هەڵدەدەن.

 

وەزارەتی ناوخۆی عیراق رایگەیاند، لەسەر راسپاردەی عەلی زەیدی، سەرۆک وەزیرانی عیراق  تێچوی دەرکردنی پاسپۆرتی عیراقی بە 91 هەزار دینار دەمێنێتەوە  و زیاد ناکرێت.

ئەمڕۆ پێنجشەممە، وەزارەتی ناوخۆی عێراق لە راگەیەندراوێکدا رایگەیاند، تێچوی دەرهێنانی پاسپۆرت زیاد ناکرێت و وەک خۆی دەمێنێتەوە.

ئاماژەی بەوەشکردوە، ئەم بڕیارە لە چوارچێوەی جێبەجێکردنی رێنماییەکانی عەلی زەیدی، سەرۆک وەزیرانی عیراقدا دراوە.

ئەمەش لە کاتێکدایە، دەنگۆی ئەوە بڵاوکراوەیەوە، کە رسوماتی دەرهێنانی پاسپۆرت گۆڕانکاری بەسەردا دێت و لە 91 هەزار دینارەوە دەکرێت بە 101 هەزار دینار.

ئەنجومەنی نوێنەرانی عیراق لە كۆی 16 پۆستی بەتاڵ، دەنگی لەسەر 14 وەزارەت و پۆستی باڵای حكومەتەكەی عەلی زەیدی دا.

ئەمشەو ئەنجومەنی نوێنەرانی عیراق بە ئامادەبونی 261 ئەندام بۆ دەنگدان لەسەر كاندیدی پۆستە بەتاڵەكانی حكومەت كۆبوەوە و تێیدا دەنگی لەسەر موحسین مەندەلاوی، لەیس خەز عەلی و محەمەد تەمیمی وەك جێگرانی عەلی زەیدی دا، دەنگدان لەسەر كاندیدەكەی پارتیش بۆ جێگری سەرۆك وەزیران دواخرا.

هەر لە لە كۆبونەوەكەدا ئەنجومەنی نوێنەران یاسر مالكی وەك وەزیری ناوخۆ، نایف شەممەری وەك وەزیری بەرگری، قوتەیبە غازی وەك وەزیری پلاندانان، حەیدەر حسێنی وەك وەزیری خوێندنی باڵا، یاسین محەمەد وەك وەزیری رۆشنبیری، رێباز حەملان وەك وەزیری ئاوەدانكردنەوە و نیشتەجێكردن، محەمەد موسەوی وەك وەزیری كار و كاروباری كۆمەڵایەتی، سەفا كینانی وەك وەزیری وەرزش و لاوانی عیراق دەنگیان لەسەر درا.

جگە لەو وەزارەتانە هەرسێ وەزارەتە نوێیەكەی حكومەتەی عەلی زەیدی دەنگیان لەسەر درا كە بریتین لە محەمەد سەمعان وەزیری دەوڵەت، محەمەد ئەلدەراجی وەزیری ئابوری دیجیتاڵی و حوكمڕانی، عەلی ئەلدەخیلی وەزیری گەشتوگوزاری عیراق.

كاندیدی پۆستی وەزیری كۆچ و كۆچبەرانیش دەنگی لەسەر نەدراو و دواخرا بۆ كۆبونەوەیەكی تری ئەنجومەنی نوێنەران .

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە مەزڵوم عەبدی، راوێژکاری سەرۆکایەتیی کۆماری سوریا کرد، رایگەیاند باوەڕی نەگۆڕمان وایە، مافەکانی گەلی کورد تەنها لە رێگەی گفتوگۆوە دەستەبەر دەبن.

ئەمڕۆ پێنجشەممە، بافڵ جەلال تاڵەبانی و مەزڵوم عەبدی کۆبونەوە و  لە کۆبونەوەکەد،  کە شێخ ئەحمەد حەمەکەریم و د. هاوڕێ شێخ دارۆ، ئەندامانی مەکتەبی سیاسی ئامادەیبوون، دوایین پێشهاتەکانی ناوچەکە و دۆخی سووریا تاوتوێ کران و جەخت لە فراوانکردنی هەماهەنگیی نێوان هەردوولا کرایەوە.

بافڵ جەلال تاڵەبانی جەختی لە یەکخستنی هەوڵەکان بۆ سەرخستنی دیالۆگ کردەوە و رایگەیاند، باوەڕی نەگۆڕمان وایە کە مافەکانی گەلی کورد و پێکەوەژیانی ئاشتییانە تەنها لە رێگەی گفتوگۆوە دەستەبەر دەبن.

هەروەها ئاماژەی بەوەکرد،  سوریای نوێ دەبێت لەسەر بنەمای هاوبەشیی نیشتمانی و فرەڕەنگی بنیاد بنرێتەوە، لەو پێناوەشدا یەکێتی هەموو پشتیوانییەکی خۆی دەخاتەگەڕ.

لای خۆیەوە، مەزڵوم عەبدی رۆڵی سەرۆک بافڵ و یەکێتیی نیشتمانیی کوردستانی بە گرنگ ناوبرد و وتی، پشتیوانی و هەوڵە بەردەوامەکانیان بناغەیەکی گرنگ بوون بۆ زاڵبوون بەسەر ئاڵنگارییەکان و رەخساندنی زەمینەی لێکتێگەیشتن، بە جۆرێک کە مافەکانی گەلی کورد پارێزراو بن و خزمەت بە داهاتووی سووریای نوێ بکات.

حوسییەكان كۆشكی سەرۆكایەتیی مەعاشیقیان لە شاری عەدەنی باشووری یەمەن بۆردومان كرد كە بارەگای حكومەت و سەرۆكی یەمەنی لێییەو تا ئێستاش چارەنوسی سەرۆك ئاشكرا نەكراوە.

وتەبێژی حكومەتی یەمەن رایگەیاند، لە هێرشێكدا كە ئەمڕۆ حوسییەكان بۆ سەر كۆشكی سەرۆكایەتی مەعاشیق، بارەگا و شوێنی نیشتەجێبوونی سەرۆك كۆماری یەمەن ئەنجامیاندا، دوو پاسەوان كوژراون و چەندین كەسی دیكەش برینداربوون.

هەروەها دڵنیاییدا كە رەشاد علێمی سەرۆكی كاتی یەمەن و سەرۆك وەزیران و وەزیرەكانی حكومەت سەلامەتن، بەڵام سەرچاوەكان دەڵێن، چارەنوسی سەرۆك هێشتا نادیارە.

حوسییەكان لە راگەیەندراوێكدا بانگەشەی ئەوەیان كردووە كۆشكی مەعاشیقیان كردۆتە ئامانج لە میانی كۆبوونەوەیەكدا كە ئەفسەرانی سعودیەو حكومەتی یەمەن و سەرۆك كۆمار تێیدا بەشداربوون.

هاوكات توركی مالیكی، وتەبێژی هاوپەیمانی عەرەبی ئاشكرای كرد، سیستمی بەرگریی ئاسمانی توانیویەتی مووشەكێكی كروزی حوسییەكان لە ئاسمانی مەدینە تێكبشكێنێت، ئەمەش دووەم پەلامارە بۆ سەر ئەو ناوچەیە پاش ئەوەی لە سەرەتای ئەم مانگەدا وێستگەیەكی كارەبا كرایە ئامانج.

لە راگەیەندراوێکی هاوبەشی بەڕێوەبەرایەتیی گشتیی شوێنەوار و کەلەپووری هەرێمی کوردستان و زانکۆی کەیمبریجی بەریتانیدا، ئاشکراکردنی توێژینەوەیەکی زانستیی نوێی گۆڤاری (Scientific Reports) راگەیەندرا، کە تیشک دەخاتە سەر پاشماوەکانی «شانەدەر A» بە تەمەنی 75 هەزار ساڵ.

بەپێی توێژینەوەکە کە سەرپەرشتیارەکەی دکتۆر ئێما پۆمیرۆییە، کونێکی بازنەیی بە پانیی 15 ملم لە ئێسکی شانی ئەم نیاندەرتالەدا دۆزراوەتەوە کە رەنگە کۆنترین بەڵگەی بێت لەسەر توندوتیژیی کوشندە بە بەکارهێنانی رمی دارینی تیژکراو کە بەرەو دڵ ئاراستە کرابێت.

 سەرەڕای ئەم کۆتاییە توندوتیژە، بوونی برینی پێشوتری چاکبوەوە لە دەموچاویدا دەریخستووە کە ئەم کەسە دوای برینداربوونی سەخت لانیکەم ساڵێک ژیاوە، ئەمەش بەڵگەیەکی رونە لەسەر بوونی چاودێری، هاوسۆزی و پەیوەندیی قوڵی کۆمەڵایەتی لەنێوان نیاندەرتالەکاندا.

 محەمەد لەشکری لە بەڕێوەبەرایەتیی گشتیی شوێنەوار ئاماژەی بەوەداوە، ئەم هاوکارییە درێژخایەنە دەروازەیەکی جیهانییە بۆ ناساندنی دەوڵەمەندیی مێژویی ناوچەکە و لای خۆشیانەوە توێژەرانی کەیمبریج جەختیان لەسەر گرنگیی پشتگیریی بەڕێوەبەرایەتییەکانی شوێنەواری هەرێم و سۆران کردەوە لە بەدیهێنانی ئەم دەستکەوتە زانستییەدا کە بە شێوەیەکی هاوکات بە هەردوو زمانی کوردی و ئینگلیزی بڵاوکرایەوە.

دۆناڵد ترەمپی سەرۆکی ئەمریکا رایگەیاند، نیزال مالک حەسەن، ئەفەسەری پێشوی سوپای ئەمریکا لە کاتی خۆیدا لە سێدارە دەدرێت، بەڵام پێچەوانەی پێشبینییەکان پڕۆسەکە بە شێوەی راستەوخۆ په‌خش ناکرێت.

دۆناڵد ترەمپ لە پەیامێکیدا لە تروس سۆشیال رایگەیاندوە، هەرچەندە په‌خشی راستەوخۆ دەبووە هۆی ترساندنی تیرۆریستان، بەڵام بەهۆی ئەوەی بەشێکی زۆر لە هاووڵاتییان نایانەوێت تەماشای بکەن، بڕیاری په‌خشنەکردنی درا.

سەرۆکی ئەمریکا ئاماژەی بەوەشکردوە، تەنها بەشداریکردنی خانەوادەی قوربانییەکان لە شوێنی بەڕێوەچوونی سزاکەدا رێگەپێدراو دەبێت.

ئەمەش لە کاتێکدایە پێشتر پنتاگۆن رایگەیاندبوو، لە سێدارەدانی نیزال حەسەن بە سێوەی راستەوخۆ پەخش دەکرێت و ئەوە دەبێتە یەکەم لە سێدارەدانی سەربازی لە ماوەی 65 ساڵی رابردودا لە مێژوی ئەمریکادا.

نیزال حەسەن سەربازێکی ئەمریکیی بەرەچەڵەک فەلەستینییە، ساڵی 2009 دەستڕێژی گولـلەی لە هاوڕێ سەربازەکانی کرد  بوەهۆی کوشتنی 13 سەربازی ئەمریکی.