کوردستان
كۆمپانیای دانە غازی ئیماراتی رایگەیاند، لە نۆ مانگی سەرەتای ئەمساڵدا ئاستی بەرهەمێنانی لە هەرێمی كوردستان بەڕێژەی ٣٪ زیادیكردووە.
كۆمپانیای دانە غاز كە وەبەرهێنان لە هەرێمی كوردستان و رۆژهەڵاتی ناوەڕاست دەكات لە راگەیەنراوێكدا ئاماژەی بەوەكردووە، توانیویەتی گۆڕانكاری لە سیستمی بەرهەمهێناندا بكات لە هەرێمی كوردستان و ئاستی بەرهەمهێنان بەرەوپێش ببات بە جۆرێك كە بەڕێژەی ٣٪ زیادیكردووە و گەیشتووەتە ٣٨ هەزار و ٢٠٠ بەرمیل نەوت لە رۆژێكدا.
راشیگەیاند، لە نۆ مانگی سەرەتای ئەمساڵدا بڕی ١١٢ ملیۆن دۆلار لە رۆژهەڵاتی ناوەڕاستدا قازانجی كردووە كە بەراورد بە نۆ مانگی سەرەتای ساڵی ٢٠٢٣ كە ١٢٦ملیۆن دۆلار قازانی كردووە بەڕێژەی ١١.٣% كەمبووەتەوە.
هەروەها كۆمپانیای دانە غاز ئاماژەی بەوەشكردووە، كۆمپانیای بریتش پتڕۆڵیۆم پابەندە بەوەی كە دەست بە كاركردن بكاتەوە لە كێڵگەی غازی كۆرمۆر و پێشبینیدەكرێت لە چوار مانگی یەكەمی ٢٠٢٦دا دەست بكات بە بەرهەمهێنانی غازی بازرگانی.
دادگای بەریتانیا قاچاخچییەكی كوردی بە ١٧ ساڵ زیندانیكردن سزادا بە تۆمەتی گواستنەوەی سەدان كۆچبەری نایاسایی لەڕێی بەلەمی بچوكەوە بۆ بەریتانیا.
ماڵپەڕی سكای نیوزی بەریتانی بڵاویكردەوە، ئەمڕۆ لە دادگای شاری پریستن لە بەریتانیا ئامانج حەسەن زادە كە تەمەنی ٣٤ ساڵە و لە مانگی ئایاری ئەمساڵ لەلایەن پۆلیسی بەریتانیاوە بەتۆمەتی گواستنەوەی ژمارەیەك كۆچبەری كورد بە بەلەمی بچوك لەڕێی كەناڵی ئینگلیزەوە بۆ ئەو وڵاتە دەستگیركراوە، بە ١٧ ساڵ زیندانیكردن سزادراوە.
ئاماژەی بەوەشكردووە، ئەو قاچاخچییە كوردە لەگەڵ چەند گروپێك كاریكردووە كە كۆچبەری نایاساییان لە ئەوروپاوە كۆكردووەتەوە و رەوانەی بەریتانیایان كردوون بە تایبەت لە ساڵی ٢٠٢٣دا كە دوای دەستگیركردنی و دادگاییكردنی، ناوبراو دانی بە تاوانەكەیدا ناوە.
ئامانج حەسەن زادە كە خەڵكی رۆژهەڵاتی كوردستانە لە تۆڕە كۆمەڵایەتییەكاندا كەسایەتییەكی ناسراوە و چەندین كۆچبەری كورد لەكاتی كۆچكردنیان لەڕێی ئامانجەوە لەسەر بەلەمەكان ستایشی دەكەن، بە جۆرێك لە یەكێك لەو ڤیدیۆیانەی كە بڵاوبووەتەوە گەعدەیەكە كە ئامانجی تێدایە و هونەرمەندێك بە “باشترین قاچاخچی” وەسفی دەكات.
وادەی پڕكردنەوەی فۆڕمی دامەزراندن بۆ دەرچووانی زانكۆ و پەیمانگان وەك بژمێر بۆ پڕۆسەی سەرژمێری گشتی دانیشتووان كۆتاییهات و نزیكەی ٦١ هەزار كەس فۆڕمەكەیان پڕكردووەتەوە.
شوان جەبار، یاریدەدەری سەرۆكی ژووری ئۆپراسیۆنی سەرژمێری گشتی دانیشتوان لە هەرێمی كوردستان بە كوردسات نیوزی رایگەیاند، پڕكردنەوەی فۆڕمی دامەزراندن بۆ دەرچووانی زانكۆ و پەیمانگاكان كە لە شەشی ئەم مانگەوە كاراكرابوو بەمەبەستی بەشداربوون لە پڕۆسەی سەرژمێری وەك بژمێر ئەمڕۆ لەسەعات ١٢ی نیوەڕۆ پڕكردنەوەی فۆڕمەكە كۆتاییهات.
راشیگەیاند، لە ماوەی ئەو سێ رۆژەدا ٦٠ هەزار ٧٥٨ كەس فۆڕمی دامەزراندنەكەیان پڕكردووەتەوە كە ٢٥ هەزار و ١٠٦ یان لە پارێزگای سلێمانی و ١٨ هەزار و ٨٦٥یان لە هەولێر و ١٦ هەزار و ٧٨٧ فۆڕمیان لە دهۆك بووە. وتیشی، لە دوو رۆژی داهاتوودا ناوی ئەو كەسانە رادەگەیەنرێت، لەكاتێكدا وەزارەتی پلاندانان تەنها ١٥ هەزار كەس دادەمەزرێنێت وەك كارمەند و مانگانە ٢٥٠ هەزار دیناریان پێدەدات بۆ ماوەی دوو مانگ.
بەپێی پێشبینییەكانی كەشناسی، سەرەتای هەفتەی داهاتوو شەپۆلێكی بارانبارینی كورتخایەن ناوچە جیاجیاكانی هەرێمی كوردستان دەگرێتەوە و ماوەی ٢٤ سەعات دەخایەنێت.
هەڤاڵ سدیق شارەزای بواری كەشناسی بە كوردسات نیوزی راگەیاند، شەپۆلێكی كورتی بارانبارین پارێزگاكانی هەرێم دەگرێتەوە و كاریگەرییەكەی لە ئێوارەی رۆژی یەكشەممەوە دەستپێدەكات، تا ئێوارەی رۆژی دووشەممەی داهاتوو بەردەوامی دەبێت.
وتیشی، زۆرترین كاریگەری شەپۆلەكە لە سنووری پارێزگای سلێمانی، هەڵەبجە و راپەرین و گەرمیان دەبێت، لە سنووری هەولێریش ناوچە شاخاوییەكان دەگرێتەوە، سەبارەت بە پارێزگای دهۆك و زاخۆش وتی، ئاستی بارانبارین مام ناوەند دەبێت.
هاوكات، دەستەی كەشناسی عیراق بڵاویكردەوە، كەشوهەوای ڕۆژی یەكشەممە هەوری تەواودەبێت لەگەڵ ئەگەری بارانبارین لە هەرێمی كوردستان و پارێزگاكانی باكوور و ناوەڕاست.
داهاتی نانەوتی ئەم هەفتەیەی سنوری پارێزگاكانی سلێمانی و هەڵەبجە زیاتر لە ١٠ ملیار دینارە و بەراورد بە هەفتەی رابردوو هەشت ملیار دینار كەمیكردووە.
ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی ڕاپەڕین و گەرمیان دەكات، بڵاویكردەوە، داهاتی نانەوتی ئەم هەفتەیە واتە لە ٢ـی ١١ـەوە تا ئەمڕۆ، زیاتر لە ١٠ ملیار و ٥١٥ ملیۆن و ٧٨٥ هەزار دینار بووە كە ٨٤٪ـی نەختینە و ١٢٪ـی چەك بووە.
داهاتەكە بەراورد بە هەفتەی رابردوو، بەڕێژەی ٤٤٪ واتە بەبڕی هەشت ملیار دینار كەمیكردووە، كە لەو هەفتەیەدا داهاتەكە زیاتر لە ١٨ ملیار دینار بووە.
هاوكات بەپێی ماڵپەری شەفافیەت، داهاتی نانەوتی سنووری پارێزگاكانی سلێمانی و هەڵەبجە لەسەرەتای ئەمساڵەوە تائێستا، زیاتر لە ٧٩٢ ملیار و ٤٦٢ ملیۆن دینار بووە، بەراورد بە هەمان ماوەی ساڵی رابردوو زیاتر ٣٢٪ كەمیكردووە.
رۆژانی هەینی و شەممە بانكەكانی سلێمانی و رانیە كراوەن و خانەنشینان و فەرمانبەران و مامۆستایانی گرێبەست دەتوانن سەردانیان بكەن بۆ تۆماری بایۆمەتری.
بانكی رانیە ئاگادارییەكی بڵاوكردەوە و تیایدا هاتووە رۆژانی هەینی و شەممە بانكەكە كراوە دەبێت بۆ تۆماری بایۆمەتری و دروستكردنی یو پێ ئێن بۆ فەرمانبەران و خانەنشینان و مامۆستایانی گرێبەست.
پێشتریش بانكی تانجەرۆ لە سلێمانی رایگەیاندبوو، رۆژانی هەینی و شەممە بانكەكەیان كراوە دەبێت بۆ تۆماری بایۆمەتری خانەنشینان و كەمئەندامان و خاوەن پێداویستی تایبەت.
ئەوەش لەكاتێكدایە، لە كۆتایی مانگی رابردوودا وەزارەتی دارایی هەرێمی كوردستان رایگەیاند، ئەو موچەخۆرانەی كە تۆماری بایۆمەتریان نییە تا 20ی 11 تۆماری بایۆمەتری بكەن و لە دوای ئەو وادەیەوە ئەگەر بایۆمەتریان نەبێت موچەكانیان رادەگیرێت.
326 ئاوارەی ئێزدی لە كەمپی مام رەشان لە سنووری پارێزگای دهۆك گەڕانەوە شوێنی نیشتەجێبوونی خۆیان لە شەنگال.
وەزارەتی كۆچ و كۆچبەرانی عیراق لە راگەیەنراوێكدا ئاماژەی بەوەكردووە، 326 ئاوارە لە كەمپی مام رەشان لە پارێزگای دهۆك بەشێوەیەكی خۆبەخشانە گەڕاونەتەوە زێدی خۆیان لە شەنگال.
دەشڵێت، گەڕانەوەی ئاوارەكان بە هەماهەنگی هەرێمی كوردستان، حكومەتی خۆجێی و رێكخراوی كۆچی نێودەوڵەتی بووە و ئەو كەسانەشی دەگەڕێنەوە مینحەیەكیان پێشكەشدەكرێت، هاوكاری مرۆییش دەكرێن.
ئەوەش لەكاتێكدایە، دوای بڕیارێكی حكومەتی عیراق بۆ گەڕانەوەی ئاوارەكان لە هەرێمی كوردستان لە مانگی تەممووزدا دواین كەمی ئاوارەكان لە سلێمانی بە تەواوەتی داخرا و سەرجەم ئاوارەكان گەڕانەوەی زێدی خۆیان.
سەرچاوەیەك لە وەزارەتی دارایی هەرێم رایگەیاند، چاوەڕواندەكرێت هەفتەی داهاتوو وەزارەتی دارایی عیراق موچەی مانگی دەی موچەخۆران رەوانەی هەرێم بكات.
ئەو سەرچاوەیەی وەزارەتی دارایی بە كوردسات نیوزی رایگەیاند، وردبنیكردن لە لیستی موچەی موچەخۆرانی هەرێم بۆ مانگی دە لە یەكەی ژمێریاری وەزارەتی دارایی عیراق بەردەوامی هەیە، وتیشی ئەگەر هیچ كێشەیەك بۆ لیستەكە دروستنەبێت هەفتەی داهاتوو پارەی موچە رەوانەی هەرێم دەكرێت و دەست بە دابەشكردنی موچەی مانگی دە دەكرێت.
رۆژی سێی ئەم مانگە وەزارەتی دارایی هەرێم لیستی موچەی مانگی ١٠ی پاش چارەسەكردنی سەرجەم تێبینیەكانی وەزارەتی عیراق ڕەوانەی بەغداد كردەوە، رۆژی چواری مانگیش تەیف سامی وەزیری دارایی عیراق ئیمزای لەسەر لیستە كرد و رەوانەی یەكەی ژمێریاری وەزارەتەكەی كرد بۆ دەستپێكردنی وردبینی.
هاوكات، ئەنجومەنی وەزیرانی هەرێم لە كۆبوونەوەی رۆژی چوارشەممەدا داوای لە وەزارەتی دارایی فیدڕاڵ كرد بە زووترین كات موچەی مانگی دە خەرجبكات و ڕێكاریی جیاكاریی بەرامبەر هەرێمی كوردستان نەگرێتە بەر لە جێبەجێكردنی یاسای بودجە و ڕێكارە داراییەكان.
بەرێوەبەری گشتی نەخۆشخانەی هیوا رەتیدەكاتەوە سلێمانی بوبێتە چەقی توشبون بە نەخۆشی شێرپەنجە .
د. یاد نەقشبەندی، بەرێوەبەری نەخۆشخانەی هیوا لە كۆنفرانسێكی رۆژنامەوانیدا رایگەیاند ، ساڵی رابردوو شەش هەزار و ٤٤٢ كۆدی گشتی لە نەخۆشخانەی هیوا كراوەتەوە كە لەو ژمارەیە سێ هەزار و ٣٥٦ حاڵەتی شێرپەنجەیی بووە.
راشیگەیاند، لە دە مانگی ئەمساڵیشدا، پێنج هەزار و ٨٦٦ كۆدی گشتی كراوەتەوە كە لەو ژمارەیە سێ هەزار و ١٥١ ی حاڵەتی توشبون بە شێرپەنجە بووە، بۆیە بەشێوەیەكی گشتی ئەمساڵ و ساڵی رابردوو ئامارەكان نزیكن لە یەكەوە و رەتیشیكردەوە سلێمانی بوبێتە چەقی توشبون بە شێرپەنجە و ووتی، ئامارەكە هەمووی هی سلێمانی نییە بەڵكو هی هەموو ناوچەكانی تر و عیراقیشی تێدایە چونكە ژمارەیەكی زۆر لە توشبوانی شێرپەنجە لە هەموو ناوچەكانی ترەوە دێنە نەخۆشخانەی هیوا .
هەروەها ئاماژەیبەوەشکرد، ماوەیەكی زۆرە زەوییەكی ١٢ دۆنمی لە هەواری شار بۆ دروستكردنی نەخۆشخانەی هیوای گەورە تەرخان كراوە ، بەڵام تا ئێستا بریاری دروستكردنی نەدراوە، بۆیە بە پێویستی زانی بە زوترین كات لیژنەی تایبەتی ئەنجومەنی وەزیران بێنە سلێمانی و هەنگاوەكان بۆ ئەو مەبەستە دەستپێبكەن.
لە قەزای شارەزوور نزیكەی هەزار كەس بە هۆكارێكی نادیار تووشی سكچون و رشانەوە بوون و گوماندەكرێت هۆكارەكەی پیسبوونی ئاوی خواردنەوە بێت، لیژنەیەكی تەندروستی سلێمانیش لێكۆڵینەوەی لەو بارەیەوە دەستپێكردووە.
بەڕێوەبەری ئاوی شارەزوور لە كۆنفرانسێكی رۆژنامەوانیدا رایگەیاند، لەئێستادا سامپڵی ئاویان وەرگرتووە و پشكنین دەكەن و تا ئەنجامی پشكنینەكان دەرنەچێت ناتوانن هۆكاری تووشبوون بە سكچوون و رشانەوەكە بە روونی ئاشكرا بكەن.
هاوكات لیژنەیەك لەلایەن بەڕێوەبەرایەتی گشتی تەندروستی سلێمانی راسپێردراوە بۆ ئەوەی لێكۆڵینەوە ئەنجامبدات و هۆكارەكان دەستنیشانبكات. هەروەها لەلایەن تەندروستی سلێمانی پزیشكی پسپۆڕ و پێداویستی پزیشكی رەوانەی قەزای شارەزوور كراون بۆ ئەوەی رەوشەكە كۆنتڕۆڵبكەن.
لە ناحیەی فەیدی لەسنوری پارێزگای دهۆك ژن و مێردێك كە تەمەنیان لە نێوان ٣٥ بۆ ٤٠ ساڵیدایە بە كوژراوی لە ماڵەكەی خۆیاندا دۆزرانەوە.
پەیامنێری كوردسات نیوز رایگەیاند، بە پێی زانیارییە سەرەتاییەكان، ئەو ژن و مێردە خەڵكی روژئاوای كوردستانن و بكوژەكەشیان ئاشكرانەبووە.
وتیشی، تائێستا پۆلیس و ئاسایشی دهۆك هیچ زانیارییەكیان لەبارەی رووداوەكە بڵاونەكردووەتەوە و هۆكاری كوژرانیان دیار نییە.
وەزارەتی كشتوكاڵی هەرێم بریاریدا بە هەڵگرتنی باج و رێگەدان بە هاوردەكردنی بەرهەمی تەماتە لە دەرەوەی هەرێم.
بێگەر تاڵەبانی وەزیری كشتوكاڵی هەرێم رایگەیاندوە، دوابەدوای بەدواداچوونیان بۆ بەرهەمی تەماتە، دەركەوت ئەو بەرهەمە لە بازاڕەكانی هەرێم كەمبوەتەوە و بەشی پێویستی هاوڵاتیان ناكات، لە هەمانكاتدا نرخیشی بەرزبوەتەوە.
راشیگەیاندوە، لەپێناو بەرژەوەندی گشتی و پاڵپشت بە یاسای پاراستن و پێشخستنی بەرووبوومی كشتوكاڵی و پاڵپشت بە بڕیاری سەرۆكایەتی ئەنجومەنی وەزیران، تایبەت بە پاراستنی بەرهەمی خۆماڵی بڕیاریاندا بە هەڵگرتنی باج و قەدەغە لەسەر هاوردەكردنی بەرهەمی تەماتە لە دەرەوەی وڵات، بۆ ئەو مەبەستەش سەرجەم لایەنە رەسمیەكان ئاگاداركراونەتەوە بۆ گرتنەبەری رێككاری پێویستی كارگێری و یاسایی .
نوسینگەی سەرۆك وەزیرانی عیراق داوای خەرجكردنی ٢٨٤ ملیار دیناری پارەی گەنمی جوتیارانی هەرێمی كوردستانی ئاڕاستەی ئەمیندارێتی گشتی ئەنجومەنی وەزیران دەكات.
هەرێم كەمال ئاغا سەرۆكی فراكسیۆنی یەكێتی لە ئەنجومەنی نوێنەران بە كوردسات نیوزی راگەیاند، بە هەوڵی سەرجەم فراكسیۆنە كوردستانییەكان و بە تایبەتیش فراكسیۆنی یەكێتی و سۆران عومەر ئەندامی ئەنجومەنی نوێنەران بە دوو نوسراوی جیا داوایان ئاڕاستەی نوسینگەی سەرۆك وەزیرانی عیراق كردووە بۆ خەرجكردنی پارەی گەنمی جوتیارانی هەرێم.
وتیشی، نوسینگەی سەرۆك وەزیران داوای لە وەزارەتی بازرگانی كردووە كە ئاگاداریان بكاتەوە لە بڕی ئەو پارەیەی كە تائێستا ماوە و خەرجنەكراوە، لە بەرامبەریشدا وەزارەتی بازرگانی رایگەیاندووە 248 ملیار دیناری پارەی گەنمی جوتیارانی هەرێم ماوە.
سەرۆكی فراكسیۆنی یەكێتی ئاماژەی بەوەشكرد، نوسینگەی سەرۆك وەزیران داواكەی ئەوانی بە نوسراو ئاڕاستەی ئەمیندارێتی گشتی ئەنجومەنی وەزیران كردووە بۆ خەرجكردنی پارەكە.
وەزارەتی خوێندنی باڵا و توێژینەوەی زانستیی حکومەتی هەرێمی کوردستان ٧٠ زەمالەی خوێندنی لە وڵاتی رووسیا راگەیاند و مەرج و داواکارییەکانیشی بۆ پێشکەشکردن بڵاوکردەوە.
دەقی راگەیەندراوەکە :
وەزارەتی خوێندنی باڵا و توێژینەوەی زانستی مامۆستایان و فەرمانبەران و هاوڵاتیانی هەرێمی کوردستان ئاگادار دەکاتەوە، کە وڵاتی ڕوسیای فیدراڵ ٧٠ زەمالەی خوێندن بۆ ساڵی خوێندنی ٢٠٢٥_٢٠٢٦ڕادەگەیەنێت، بەمەبەستی خوێندنی (بەکالۆریۆس، ماستەر و دکتۆرا) بەم شێوەی خوارەوە:
هەرکەسێک ئەم مەرجانەی خوارەوەی تێدا بەرجەستە بێت و ئارەزوی خوێندن لە زانکۆکانی وڵاتی ڕوسیا دەکات بە لەبەرچاوگرتنی ئەم تێبینیانەی خوارەوە، تکایە داواکاری لە ڕێگەی ئەم لینکەی خوارەوە پێشکەش بە سەرچاوەی زەمالەکە بکەن:
https://education-in-russia.com
- هەروەها بەهۆی ئەوەی پێشکەشکردن راستەوخۆ لەڕێگەی ماڵپەری زەمالەکە دەبێت، وەزارەتەکەمان هیچ فایلێکی لەبەردەست نابێت تا کاری لەسەر بکات، بۆیە تاکو دەرچونی ئەنجامەکان، بە هیچ شێوەیەک پێشکەشکار سەردانی وەزارەت نەکات. هاوکات کاندیدی سەرکەوتوو پێویستە دۆسیەی ئەلیکترۆنی لە وەزارەتی خوێندنی باڵا و توێژینەوەی زانستی لە رێگەی ئەم لینکەی خوارەوە پر بکاتەوە:
Scholarship.digital.gov.krd
- ئەو پێشکەشکارانی فەرمانبەری حکومەتن ئەگەر زەمالەی ڕووسیا بەدەستبهێنن بەڵام مەرج و ڕێنماییەکانی ئاماژە پێکراوی خوێندنەکانی تێدا بەرجەستە نەبێت، دواجار مۆڵەتی خوێندنی پێنادرێت و بڕوانامەکەی بۆ یەکسان ناکرێت.
مەرجەکانی پێشکەشکردن:
١. بەکالۆریۆس:
- پێشکەشکار دەبێت هاوڵاتی هەرێمی کوردستان بێت.
- پێویستە لە هیچ دامودەزگایەکی حکومەتی هەرێمی کوردستان دانەمەزرابێت.
- بۆ ئەو پێشکەشکارانەی داواکاری بۆ پسپۆری پزیشکی پێشکەش دەکەن، دەبێت کۆنمرەی پۆلی دوانزەی زانستیان لە (٨٥%) کەمتر نەبێت، بۆ ئەو بەڕێزانەشی کە داواکاری بۆ پسپۆری ددان و دەرمانسازی پێشکەش دەکەن، دەبێت کۆنمرەی پۆلی دوانزەی زانستیان لە (٨٠%) کەمتر نەبێت، هەروەها ئەو بەرێزانەی کە داواکاری بۆ پسپۆری ئەندازیاری پیشکەش دەکەن دەبێت کۆنمرەی پۆلی دوانزەی زانیستیان لە (٧٥%) کەمتر نەبێت.
- کاندیدی سەرکەوتوو لەلایەن وڵاتی ڕوسیا پشتگیری دارایی دەکرێت، بۆ خوێندنەوەی وردەکاری زیاتر سەردانی مالپەری زەمالەکە بکەن.
٢. ماستەر:
- پێشکەشکار دەبێت هاوڵاتی هەرێمی کوردستان بێت.
- پێشکەشکار ئەگەر فەرمانبەر یان مامۆستا بێت لە دامودەزگاکانی هەرێمی کوردستان، ئەوا دەبێت بە لایەنی کەم دوو سال خزمەتی هەبێت لە پاش بەدەستهێنانی دواین بڕوانامە.
- پێویستە کۆنمرەی بەکالۆریۆسی لە (٦٥%) کەمتر نەبێت.
- پێشکەشکار دەبێت لە هەمان بواری خۆی داواکاری بۆ بەرنامەی ماستەر پێشکەش بکات. (واتە بەکالۆریۆس و ماستەرەکەی لە هەمان بوار بێت).
- کاندیدی سەرکەوتوو ئەگەر دامەزراو بێت، لەلایەن وەزارەتی پەیوەندیدار تەنها مۆڵەتی خوێندنی پێدەدرێت، واتا بە موچەی بنەڕەتی و دەرماڵە جێگیرەکان.
- کاندیدی سەرکەوتو لەلایەن وڵاتی ڕوسیا پشتگیری دارایی دەکرێت، بۆ وردەکاری زیاتر تکایە سەردانی ماڵپەری زەمالەکە بکەن.
٣. دکتۆرا:
- پێشکەشکار دەبێت هاوڵاتی هەرێمی کوردستان بێت.
- پێشکەشکار ئەگەر فەرمانبەر یا مامۆستا بێت لە دامودەزگاکانی هەرێمی کوردستان، پێویستە بەلایەنی کەم دوو ساڵ خزمەتی هەبێت لە پاش بەدەستهێنانی دواین بڕوانامە.
- دەبێت کۆنمرەی ماستەری لە ٧٠٪ کەمتر نەبێت.
- داواکار دەبێت لە هەمان بواری خۆی داواکاری بۆ بەرنامەی دکتۆرا پێشکەش بکات. (واتا ماستەر و دکتۆراکەی لە هەمان بوار بێت).
- کاندیدی سەرکەوتوو ئەگەر دامەزراو بێت، ئەوا لەلایەن وەزارەتی پەیوەندیدار تەنها مۆڵەتی خوێندنی پێ دەدرێت، واتە بە موچەی بنەڕەتی و دەرماڵە جێگیرەکان.
- کاندیدی سەرکەوتوو لە لایەن ولاتی ڕوسیا پشتگیری دارایی دەکرێت، بۆ وردەکاری زیاتر تکایە سەردانی ماڵپەڕی زەمالەکە بکەن.
ئەنجومەنی وەزیرانی هەرێم لە كۆبوونەوەدایە و پرسی موچە و ژمارەی وەزیفی فەرمانبەران و دەستپێكردنەوەی هەناردەی نەوت و سەرژمێری گشتی تاوتوێدەكات.
بەپێی كارنامەكە، كۆبوونەوەكەی ئەمڕۆی ئەنجومەنی وەزیران لە سێ بڕگە پێكهاتووە كە لە بڕگەی یەكەمدا، تاوتوێی خستنەڕووی دواپێشهاتەكانی سەرژمێری گشتی دانیشتووانی عیراق دەكرێت كە بڕیارە لە ٢٠ی ئەم مانگكەدا ئەنجامبدرێت.
بڕگەی دووەمیش، تایبەتە بە تاوتوێكردنی پرسی دەستپێكردنەوەی هەناردەی نەوتی هەرێمی كوردستان و بڕیارەكانی ئەنجومەنی وەزیرانی عیراق لەوبارەیەوە.
هەروەها لە تەوەری سێیەمدا، ئەنجومەنی وەزیرانی هەرێم تاوتوێی دۆخی دارایی و موچە و ژمارەی وەزیفی فەرمانبەران و ئەو رێكارە نوێیانەی وەزارەتی دارایی عیراق لەبارەی موچەی مانگی ١٠ەوە دەكات.
وەزارەتی پێشمەرگە رایگەیاند، سبەینێ هاوكاری دارایی هاوپەیمانی نێودەوڵەتی بۆ مانگی دە، بەسەر هێزەكانی پێشمەرگە دابەشدەكرێت كە بڕەكەی ٤٠٧ هەزار دینارە.
وەزارەتی پێشمەرگە لە راگەیەندراوێكدا بڵاویكردووەتەوە، دوای ئەوەی هاوكاری هێزەكانی هاوپەیمانان بۆ هێزی پێشمەرگە خرایە سەر هەژماری وەزارەتی پێشمەرگە، بەڕێوەبەرایەتی گشتی بودجە و بەرنامەكان"ژمێریاری سەربازی"، ڕێكارە دارایی و ژمێریارییەكانی ئەنجامداوە و لە سبەینێوە هاوكارییەكە بۆ مانگی دە دابەشدەكرێت.
ئەو هاوكارییەی هاوپەیمانانی نێودەوڵەتی بۆ هێزی پێشمەرگەی كوردستان تەرخانیكردووە بڕەكەی زیاتر لە ١٣ ملیار دینارە و هەر پێشمەرگەیەك ٤٠٧ هەزار دینار وەردەگرێت.