کوردستان
ئەمڕۆ ٢٠٢٤/١١/٥ مەکتەبی سکرتارییەتی سەرۆک مام جەلال لە شاری سلێمانی سەردانی کەسایەتی وفەرماندە و تێکۆشەری دێرینی گەلی کورد ( جەمیل هەورامی ) یانکرد .
لەو سەردانەدا مەکتەبی سکرتارییەت وێڕای ئەوەی چەپکە گوڵی رێز و وەفای سەرۆک بافڵ جەلال و قوباد تاڵەبانیان پێگەیاند ، لە نزیکەوە لە بارودۆخی تەندروستیان پرسی و هیوای سەلامەتی هەمیشەییان بۆ خواست .
مەکتەبی سکرتارییەت لەو سەردانەدا بەرێزەوە باسیان لە خەباتی پڕشکۆ و دانەبڕاوی جەمیل هەورامی کرد کە وەک یەکێک لە سەرکردە دیارەکانی شۆڕشی نوێ و یەکێتی رۆڵی دیاروبەرچاوبووەو لە دوای راپەڕینیش بەهەمان رۆحیەتی شاخ بەردەوام بوو لە خزمەتەکانی و لەگەڵ هێزی پێشمەرگە مایەوەو بەردەوام پارێزەرێکی راستەقینەی پاراستنی مافەکانی تێکۆشەرانی کوردایەتی بوو ئەمە جگەلەوەی لەبواری پاراستنی ژینگەو زیاتر سەوزکردنی کوردستان خزمەتی بەرچاوی کرد کە جێگای ستایشی هەموومانە .
لەبەرامبەردا سەرکردە و تێکۆشەر جەمیل هەورامی دووپاتیکردەوە هەتا تەمەن و تەندروستی رێگای بدات بەردەوام دەبێت لە خزمەتکردنی تێکۆشەران و پێشمەرگەو کوردستانەکەی و لەسەر هەمان رێبازی سەرۆک مام جەلال کار دەکات بۆ پاراستنی بەرژەوەندییە باڵاکان .
قائیمقامیەتی سلێمانی رایگەیاند، تەنها لە مانگی رابردوودا لە سلێمانی نزیكەی ١٢ تۆن خواردن و شمەكی ماوەبەسەرچوو دەستیبەسەرداگیراوە و لەناوبراوە.
قائیمقامیەتی سلێمانی لە راگەیەنراوێكدا ئاماژەی بۆ ئەوەكردووە، لیژنە هاوبەشەكان لە مانگی رابردوودا حەوت هەزار و ٢٣٠ سەردانیان ئەنجامداوە، ٣٩٢ سەرپێچییان تۆماركردووە و ١٣ شوێنیشیان داخستووە.
راشیگیەاند، بەپێی ئامارەكانی لیژنەكان لە مانگی رابردوودا، ١١ تۆن و ٧٥٥ كیلۆ كیلۆگرام خواردن و شمەكی خراپ و ماوەبەسەرچوو لەناوبراون، پسوڵەی ئاگاداركردنەوەش دراوە بە ١٩١ شوێنكار، زیاتر لە ٤٨ ملیۆن دیناریش سزای دارایی سەرپێچیكاران دراوە.
بەڕێوەبەرایەتی گشتی حەج و عومرەی هەرێمی كوردستان وادەی وەرگرتنی پارەی حاجیان تا ١٢ی ئەم مانگە درێژكردەوە.
بەڕێوەبەرایەتی گشتی حەج و عومرە ئاگاداری ئەو هاووڵاتیانەی كردەوە كە ناویان بۆ پرۆسەی حەجی ساڵی ٢٠٢٥ هاتووەتەوە، گوژمەی یەكەمی پارەكەیان تا رۆژی سێشەممە واتە ١٢ی ئەم مانگە درێژكرایەوە، ئەگەریش لەو ماوەیەدا پارەكە نەدەن مافی حەجكردنیان دەفەوتێت و ناوێكی یەدەگ دادەنێن.
داواشی لەو كەسانە كرد كە ناویان هاتووەتەوە، بە زووترین كات سەردانی نوسینگەكانی حەج و عومرەی هەرێمی كوردستان بكەن لە پارێزگاكانی سلێمانی و هەولێر و دهۆك و هەڵەبجە و ئیدارە سەربەخۆكانی زاخۆ و سۆران و راپەڕین و گەرمیان بۆ تەواوكردنی مامەڵەكانیان.
داواشیكردووە بڕی چوار ملیۆن دیناری عیراقی وەك گوژمەی یەكەم بهێنن تاوەكو گوژمەی دووەمی پارەكە دیاریدەكرێت، لەگەڵ پاسپۆرتدا.
كۆمەڵەی كێڵگە پەلەوەرییەكان رایگەیاند، لە شەش مانگی ئەمساڵدا لە بەرهەمەمهێنانی مریشك زیانی گەورەیان بەركەوتووە و داوا لە حكومەت دەكات هاوكارییان بكات.
نازم عەبدوڵا سەرۆكی كۆمەڵەی كێڵگە پەلەوەرییەكانی سلێمانی لە راگەیەنراوێكدا ئاماژەی بەوەكردووە، لەسەرەتای مانگی ئایار تا سەرەتای مانگی تشرینی دووەمی ئەمساڵ، واتە لە شەش مانگدا لە بەرهەمەمهێنانی مریشكدا زیاینان كردووە و بەرهەمەكەیان بە زەرەر فرۆشتووەتەوە، بۆ هەر هۆڵێك نزیكەی ٢٠ ملیۆن دینار زیانیانی كردووە، بە گشتی زیانی هۆڵەكان دەگاتە ٨٠ ملیار دینار.
راشیگەیاند، كێشەی بەبازاڕكردن و بەردەوامی نەخۆشی ڤایرۆسی و گرانبوونی سوتەمەنی و بەرزبوونەوەی نرخی عەلەف و گرانبوونی جوچكیان هەیە، هەروەها رێگەگرتن لە رۆیشتنی مریشك بۆ خوارووی عیراق كێشەی گەورەی بۆ خاوەن كێڵگەكان دروستكردووە، هیچ لایەنێكیش هاوكاری كەرتی پەلەوەر ناكات بۆ پڕكردنەوەی زیانەكان.
ئاماژەی بۆ ئەوەشكردووە، حكومەتی هەرێم پێیخۆشە ئەو كەرتە بەتەواوەتی نەمێنێت تا مریشكی بەستوو زیاتر هاوردەبكات و پارەی هەرێم بڕواتە دەرەوە، لەكاتێكدا كۆمەڵەی كێڵگە پەلەوەرییەكان زیاتر لە ٤٥ ملیار دۆلاری خستووەتەگەڕ، زیاتر لە ٤٠٠ هەزار هەلی كاری رەخساندووە، كە پوێستە حكومەت هاوكارییان بكات نەك دژایەتی.
كارەبای سلێمانی رایگەیاند، قۆناغی دووەمی دابینكردنی كارەبای ٢٤ سەعاتی لە سلێمانی دەستیپێكردووە.
ئەندازیار ئەنوەر حەمەسەعید بەڕێوەبەری گشتی كارەبای سلێمانی سەبارەت بە دابینكردنی كارەبای ٢٤ سەعاتی رایگەیاند، دوای تەواوبوونی قۆناغی یەكەمی پڕۆژەی پێوەری زیرەك، ئێستا بۆ قۆناغی دووەمی پرۆژەكە لیژنەیەكی تایبەت دروستكراوە، بەشێوەیەك گەڕەك بەگەڕەك هەموو هاوبەشەكان پێوەری زیرەكی بۆ ببەسرێت و دواتر كارەباكەی بكرێت بە بەردەوام و نرخەكەشی رێكبخرێتەوە بەشێوەیەك بارگرانی دروستنەكات.
وتیشی، لەگەڵ لیژنەكەی ئەنجومەنی وەزیران چەند جارێك كۆبوونەتەوە، چەند پێشنیازێكیان پێشكەشكردووە بۆ ئەوەی پڕۆژەكە سەركەوتوو بێت و سەرەتا نرخ دیاریبكرێت، دواتر میكانیزمی گونجاو بۆ جێبەجێكردنی پڕۆژەی كارەبای بەردەوام دابنرێت.
وتیشی، ئەوان سەرقاڵی لێكۆڵینەوەن لە چۆنیەتی جێبەجێكردنی ئەو پرۆژەیە، كەی و لە كوێ دەستان پێكرد بڵاویدەكەنەوە.
بەمەبەستی بەشداربوون لە پڕۆسەی سەرژمێری گشتی وەك بژمێر، دەستەی ئاماری هەرێم ماڵپەڕی پێشكەشكردنی فۆڕمی ئەلیكترۆنی بۆ دەرچووانی زانكۆ و پەیمانگاكان راگەیاند و تا سێ رۆژ بەردەوامدەبێت،
شوان جەبار، یاریدەدەری سەرۆكی ژووری ئۆپراسیۆنی سەرژمێری گشتی دانیشتوان لە هەرێم بە كوردسات نیوزی راگەیاند، ماڵپەڕەكە لە رۆژی سێشەممەوە كارا دەكرێت تا رۆژی پێنجشەممە، واتە بۆ ماوەی سێ رۆژ كراوە دەبێت بۆ پركردنەوەی فۆرمی ئەلكترۆنی بۆ هەموو دەرچوویەكی زانكۆ و پەیمانگا كە دانەمەزراون تا بە ویستی خۆیان فۆڕم پێشكەشبكەن بۆ كاری بژمێری لە پرۆسەی سەرژمێری.
وتیشی، پێشكەشكردنەكە بەپێی شوێنی نیشتەجێبونە و هەركەسێك لە شوێنی نیشتەجێبونی خۆی دەتوانێت بەپێی چەند مەرجێك كە بۆی دیاریكراوە فۆرمەكە پربكاتەوە.
هاوكات ئاماژەی بۆ ئەوەكرد، مەرج نییە هەموو پێشكەشكارێك ناوی بگەرێتەوە وەك بژمێر، چونكە بەپێی پێداویستی و ژمارەی دیاریكراو لەسەر ئاستی گەڕەك و گوند
دەستنیشانی پێشكەشكاران دەكرێت، ئەو كەسانەش كە وەردەگیرێن خول دەبینن و دواتر دەچنە كاری مەیدانی بۆ قۆناغی دووەمی پرۆسەی سەرژمێری.
کلیک بکە بۆ پڕکردنەوەی فۆرمەکە
گردبوونەوە و ناڕەزایەتییەكانی باكوری كوردستان لەدژی دوورخستنەوەی سێ سەرۆك شارەوانی كورد و دانانی قەیوم لە شوێنیان بەردەوامە و تائێستا زیاتر لە 60 خۆپیشاندەر دەستگیركراون.
تونجەر باقرخان، هاوسەرۆكی گشتیی پارتی یەكسانی و دیموكراسیی گەلان "دەم پارتی" لە كۆبوونەوەیەكی جەماوەری لە بەردەم شارەوانی مێردین رایگەیاند، تاوەكو خاوەنداری لە ئیرادەی خۆتان بكەن، هەرگیز قەیوم لە باكوری كوردستان سەرناكەوێت.
جەختیی لەوەشكردەوە، هەرگیز سیاسەتی قەیوم نەگەیشتووەتە ئەنجام و شكستیهێناوە، دەیانەوێت لەو شوێنانەی لە هەڵبژاردندا سەرنەكەوتوون، بە ساختەكاری و بڕیاری دادگا دەستیبەسەردا بگرن.
داواشی لە دەسەڵاتدارانی توركیا كرد، دەست لە سیستمی قەیوم هەڵبگرن، چونكە ئەو سیستمە مایەپووچبووە.
رۆژی دووشەممە هەریەك لە سەرۆك شارەوانییەكانی ئێلح و مێردین و خەلفەت دوورخرانەوە و قەیوم لە شوێنەكانیان دانرا، ئەوەش ناڕەزایەتی فراوانی بەدوای خۆیدا هێنا كە تائێستاش بەردەوامە و بەهۆیەوە زیاتر لە ٦٠ خۆپیشاندەر لەلایەن هێزە ئەمنییەكانی توركیاوە دەستگیركراون.
ناڕەزایەتی و خۆپیشاندانەكان لەدژی دوورخستنەوەی سێ سەرۆك شارەوانی كورد لە باكوری كوردستان و دانانی قەیوم لە شوێنیان بەردەوامە و تائێستا ٦٠ خۆپیشاندەر دەستگیركراون.
ئاژانسی هەواڵی مێزۆپۆتامیا بڵاویكردەوە، خۆپیشاندان و ناڕەزایەتی فراوان لەبەردەم شارەوانی ئێلیهـ وەك ناڕەزایەتییەك بەرامبەر دوورخستنەوەی سێ سەرۆك شارەوانی كورد بەڕێوەچوو، بەڵام هێزە ئەمنییەكانی توركیا هەوڵیاندا بە بەكارهێنانی توندوتیژی و گولـلـەی پلاستیكی بڵاوە بە خۆپیشاندەران بكەن.
ئاماژەی بەوەشكردووە، تائێستا ٦٠ خۆپیشاندەر لەلایەن هێزە ئەمنییەكانەوە دەستگیركراون.
لە ماوەی ٢٤ سەعاتی رابردوودا زۆرترین رێژەی بارانبارین لە رۆژهەڵاتی كوردستان لە شاری مەریوان تۆماركراوە و بەهۆی بارینی تەرزەشەوە كرماشان زۆرترین زیانی بەركەوتووە.
بەڕێوەبەرایەتی كەشوهەوای پارێزگای سنە بڵاویكردەوە، لە ماوەی ٢٤ سەعاتی رابردوودا ١٩٣ ملیم باران لە شاری مەریوان باریوە. لەلایەكی دیكەوە، بەڕێوەبەرایەتی چاودێریی خزمەتگوزارییەكانی شاری سنە رایگەیاند، بۆ ئەوەی زیانەكانی بارانبارین و دروستبوونی لافاو لە شارەكە كەمبكرێتەوە ٣٦ رێڕەوی سەرەكیی ئاو پاككراوەتەوە.
هاوكات قائیمقامی قەسری شیرینی سەربە پارێزگای كرماشان رایگەیاند، بەهۆی تەرزە و بارانبارینی بەخوڕەوە سەرجەم خانووە پلاستییەكانی تایبەت بە كشتوكاڵ لەو ناوچەیە بە تەواوەتی لەناوچوون و زیانی بە هێڵەكانی كارەباش گەیاندووە، وتیشی، زیانەكانیش بە نزیكەی 500 هەزار دۆلار خەمڵێندراوە.
تیمەكانی بەڕێوەبەرایەتی نەهێشتنی ماددە هۆشبەرەكان، سێ بازرگانی ماددەی هۆشبەریان لە هەولێر دەستگیركرد و دەستیانگرت بەسەر پێنج كیلۆگرام ماددەی هۆشبەر.
بەڕێوەبەرایەتی نەهێشتنی ماددەی هۆشبەرەكان لە راگەیەندراوێكدا بڵاویكردەوە، لە بەردەوامی بەدواداچوون و لێكۆڵینەوەكانیان بۆ بەرەنگاربوونەوە و نەهێشتنی ماددەی هۆشبەر، دوای وەرگرتنی بڕیاری دادوەری لێكۆڵینەوەی ئاسایش و زانیاری ورد، لە چالاكییەكدا تیمەكانیان رۆژی 3ـی ئەم مانگە، سێ بازرگانی ماددەی هۆشبەری بیانیان لەنێو شاری هەولێر دەستگیركردووە.
ئەوەشی خستووەتەڕوو، لە چالاكییەكەدا دەستگیراوە بەسەر پێنج كیلۆگرام ماددەی هۆشبەری جۆری كریستاڵ، كە بازرگانە بیانییەكان هێناویانە و هەوڵیانداوە لە ناو هەولێر ساغیبكەنەوە.
ئەمڕۆ ٢٠٢٤/١١/٤ مەکتەبی سکرتارییەتی سەرۆک مام جەلال لە سێ سەردانی جیادا لە قەزای دوکان ، شارۆچکەی پیرەمەگرون هەریەک لە ( خاڵە بەکر تەلانی ، حەمە ئەمین کوێرەکانی ، هاوڕێ سۆران ) فەرماندە و تێکۆشەری دێرینیان بەسەرکردەوەو سڵاو رێزی سەرۆک بافڵ جەلال تاڵەبانی و قوباد تاڵەبانییان پێگەیاندن لەپای ماندوبوون و رۆڵیان لە خەبات و تێکۆشانی کوردایەتیدا.
مەکتەبی سکرتارییەت لەو سەردانانەدا بە رێزەوە ئاماژەیان بە خەبات و قوربانیدانی تێکۆشەرانی یەکێتی و شۆڕشی نوێکرد کە لە قۆناغەکانی سەختی خەباتدا قارەمانانە لەگەڵ گەلەکەیان مانەوە و بە ورە بەرزیان گیانی شۆڕشیان جۆشدایەوە کە یەکێتی شانازی بەهەموو ئەو هەڤاڵانەیەوە دەکات کە بەشێک بوون لەم شۆڕشەو نەیان هێشت خەباتی گەلەکەمان بەهەدەر بڕوات کە خاڵە بەکر تەلانی ، حەمە ئەمین کوێرەکانی ، هاوڕێ سۆران لە نموونەی ئەو سەدان قارەمانانەن کە لەگەڵ یەکێتی و گەلەکەیان مانەوەو ژیانی خۆیان خستەخزمەتی بەدیهێنانی ئامانجە نیشتمانییەکانی گەلەکەمان .
لەبەرامبەردا دووپاتیانکردەوە کە لەسەر هەمان رێبازی سەرۆک مام جەلال بەردەوامن و لە هەرشوێن و جێگایەی پێویست بکات هەر پێشمەرگەی کوردو یەکێتی دەبن .
لە ئاكرێ دیاردەی هەڵدانەوەی گۆڕ و شوێنە مێژوییەكان سەریهەڵداوە و چەندین حاڵەت تۆماركراون.
پەیامنێری كوردسات نیوز رایگەیاند، لەلایەن چەند كەسێكی نەناسراوە گۆڕێك لە گۆڕستانی گوندی بەیبیناڤا لە سنوری قەزای ئاكرێ هەڵدراوەتەوە و دەوترێت ئامانج لە هەڵدانەوەی گۆڕەكە گەڕانە بەدوای زێڕ و دراوی كۆندا.
وتیشی گۆڕەكە نزیكە لە بازگە و كارگەیەكی غاز و بە ئامێری پێشكەوتوو هەڵدراوەتەوە.
تا ئێستا لایەنە پەیوەندیدارەكانی ئاكرێ هیچ رونكردنەوەیان لەو بارەیەوە نەداوە، لەكاتێكدا ئەمساڵ ئەمە سێ یەم جارە لەماوەیەكی كەمدا هەڵبدرێتەوە و لە ساڵانی رابردوودا حاڵەتی هاوشێوە تۆماركراوە.
کارەبای سلێمانی رایدەگەیەنێت، نرخی یهك ئهمپێر كارهبای موهلیدهی ئههلی گهڕهكهكان بۆ مانگی ١٠ لهناو سەنتەری شارەکە لهنێوان حەوت هەزار بۆ هەشت هەزار دیناره.
بهڕێوهبهرایهتی گشتی كارهبای سلێمانی لە راگەیەنراوێکدا بڵاویکردەوە، بهپێی نرخی سووتهمهنی له بازاڕهكاندا نرخی ههر سەعاتێک کارەبای موەلیدە بۆ یهك ئهمپێر ٤٣ دینارە، بهمهش نرخی یهك ئهمپێر كارهبای موهلیدهی ئههلی گهڕهكهكان لهناو شاری سلێمانی لهنێوان ٧ هەزار بۆ ٨ هەزارە دیناره.
ئاماژەی بۆ ئەوەشکرد، بەو پێیەی موەلیدەکان لەنێوان ١٦٥ بۆ ١٨٥ سەعات کاریانکردووە، بههۆی جیاوازی كارکردنیان نرخی ئهمپێرێك له گهڕهكێك بۆ گهڕهكێكی دیكه جیاواز دهبێت.
هاوکات کارەبای سلێمانی سەبارەت بە خشتهی كارپێكردنی موهلیده ئەهلییەکانی رایگەیاند، بۆ مانگی تشرینی دووەم رۆژانە لە سەعات ١٢ـی نیوەڕۆ تا ١ـی شەو کاردەکەن، لە سەعات ١ـی شەو دەکوژێتەوە تا ٦:٣٠ ی بەیانی، سەعات ٣ـی بەیانی تا ٨ـی بەیانی کاردەکەن، سەعات ٨ـی بەیانی تا ١٢ـی نیوەڕۆ کارناکەن.
وتیشی، رۆژانی هەینی و شەممە موەلیدە ئەهلییەکان بەیانیان کارناکەن، لەبری بەیانیان سەعات ١١ـی پێشنیوەڕۆ کاردەکەن.
هاوکات لیژنهی دیاریكردنی نرخی موهلیده ئههلییهكان جهختیان لهوهكردووهتهوه كه لهكاتی كوژاندنهوهی كارهبای نیشتیمانی نابێت كارپێكردنی موهلیده و پێدانی كارهبا بههاووڵاتیان له پێنج خولهك زیاتر بخایهنێت، بهپێچهوانهوه خاوهن موهلیدهكه سزادهدرێت.
قوباد تاڵەبانی لێپرسراوی مەکتەبی سکرتارییەتی سەرۆک مام جەلال بەهۆی ساڵیادی دامەزراندنی یەکێتی ژنانی کوردستانەوە پەیامێکی پیرۆزبایی ئاڕاستەی رێکخراوەکە دەکات و دەڵێت،" ئومێدەوارم ئەم ساڵیادە ببێتە وێستگەیەک بۆ وەرچەرخان لەبەردەم ئاڵنگارییەکانی ئەم قۆناغەی تێکۆشانی ژنان".
دەقی پەیامەکە...
بەبۆنەی ساڵیادی دامەزراندنی یەکێتی ژنانی کوردستانەوە، پیرۆزباییتان لێ دەکەم و هیوای سەرکەوتنتان بۆ دەخوازم.
ئەم ڕێکخراوە شوێن و پێگەی خۆی لەسەر ئاستی هەرێمی کوردستان و عێراق لەکایەکانی سیاسی و ئابووری و کۆمەڵایەتی و پاڵپشتیکردنی ژناندا مسۆگەرکردووە بەتایبەت کە لە مێژووی خەباتیدا خاوەنی چەندین هەڵوێستی نیشتمانی دیار و بەرچاو بووە، جگە لەبەشدارییەکانی لەپەرەپێدانی هۆشیاری گشتی و خەبات لەپێناو بەدەستهێنانی مافەکانی ژنان بۆ هێنانەکایەی کۆمەڵگەیەک کە یەکسانی لە ماف و بەرپرسیارێتی فەراهەم بکات.
ئومێدەوارم ئەم ساڵیادە ببێتە وێستگەیەک بۆ وەرچەرخان لەبەردەم ئاڵنگارییەکانی ئەم قۆناغەی تێکۆشانی ژنان.
قوباد تاڵەبانی
لێپرسراوی مەکتەبی سکرتارییەتی سەرۆک مام جەلال
وەزیری دارایی عیراق ئیمزای لەسەر لیستی موچەی مانگی 10 ی فەر مانبەرانی هەرێم كرد، سەرچاوەیەك لە وەزارەتی دارایی دەڵێت، كۆتایی ئەم هەفتەیە یاخود سەرەتایی هەفتەی داهاتوو پارەی موچە رەوانەی هەرێم دەكرێت.
سەرچاوەیەك لە وەزارەتی دارایی عیراق بە كوردسات نیوزی راگەیاند، تەیف سامی وەزیری دارایی عیراق ئیمزای لەسەر لیستی موچەی موچەخۆرانی هەرێمی بۆ مانگی 10 كردوە، رەوانەی یەكەی ژمێریای كردوە بۆ دەستپێكردنی وردبینی لە لیستی موچەی هەرێم.
وتیشی، ئەگەر هیچ كێشەیەك بۆ لیستی موچە نەیەتە پێشەوە، كۆتایی ئەم هەفتەیە یاخود سەرەتایی هەفتەی داهاتوو پارەی موچەی مووچەخۆرانی هەرێم رەوانە دەكرێت.
ئەو سەرچاوەیی وەزارەتی دارایی عیراق ئاماژەی بەوەشكرد، هۆكاری دواكوتنی ناردنی موچەی موچۆرانی هەرێم بەهۆی ئەوەیە، وەزارەتی دارایی و ئابوری هەرێم درەنگ لیستی موچەی مووچەخۆرانی رەوانەی بەغداد كردووە.
وەزارەتی دارایی هەرێم دوێنێ دوای چارەسەركردنی تێبینییەكانی بەغداد لەسەر لیستی موچە، جارێكی تر لیستی موچەی مانگی 10ـی رەوانەی وەزارەتی دارایی عیراق كرد.
لە سنووری ماوەت ٢٠٠ دۆنم پوشوپاوان و داری سروشتی سووتا و پۆلیسی دارستانیش کەسێک لەسەر ئەو روداوە دەستگیردەکات.
بەڕێوەبەرایەتی پۆلیسی دارستان و ژینگەی پارێزگای سلێمانی لە راگەیەنراوێکدا بڵاویکردەوە، دوای ئەوەی لەلایەن دانیشتووانی گوندی گەڵاڵێ ئاگادارکرانەوە لە روداوێکی ئاگرکەوتنەوە لە سنوورەکەیاندا، دەستبەجێ مەفرەزەکانی بەشی پۆلیسی دارستانی ماوەت گەیشتنە شوێنی روداوەکە و توانیان بە هاوکاری دانیشتووانی گوندەکە لە ماوەیەکی کەمدا ئاگرەکە کۆنترۆڵ بکەن .
ئاماژەی بۆ ئەوەشکرد، بەهۆی ئاگرەکەوە ٢٠٠ دۆنم پوشوپاوان و داری سروشتی ناوچەکە سووتان.
بەڕێوەبەرایەتی پۆلیسی دارستان و ژینگەی پارێزگای سلێمانی ئەوەشی خستەڕوو، لەسەر ئەو روداوە کەسێک دەستگیرکراوە و رادەستی دادوەر کراوە بۆ وەرگرتنی رێکاری یاسایی .