کوردستان
ئەندامێكی ئەنجومەنی نوێنەرانی عیراق رایگەیاند، چوونی بانكی تی بی ئای بۆ ناو هەژماری من بە مانای تەوتین و جێبەجێكردنی بڕیاری دادگای فیدراڵی نییە و وەڵامی داواكاری مووچەخۆرانیش نییە.
كاروان یاروەیس ئەندامی فراكسیۆنی یەكێتی لە ئەنجومەنی نوێنەران ئاماژەی بەوەكرد، حەوت مانگ لەمەوبەر بانكی عیراقی بازرگانی "تی بی ئای" لەناو فۆڕی پڕۆژەی هەژماری من زیادكرا، بۆیە سەیرە لەكاتێكدا هەوڵەكان بۆ جێبەجێكردنی بڕیاری دادگای باڵای فیدراڵی لەبارەی تەوتینی موچەی هەرێم چڕ بووەتەوە، ئەو بانكە چوونی بۆ ناو هەژماری من رادەگەیەنێت.
وتیشی، لەو كاتەوە تا ئێستا، تی بی ئای تەنها چەند سەد هەژمارێكی بانكی كردووەتەوە، تا ئێستاش رێوشوێنی كردنەوەی لقی نوێ لە پارێزگای هەڵەبجە و ئیدارەكانی گەرمیان و راپەڕین و سۆران و زاخۆ، دانانی ئامێری ئای تی ئێم نەبووە.
كاروان یاروەیس ئاماژەی بەوەشدا لە فۆڕمی هەژماری من، موچەخۆر دەتوانێت لە خانەی هەڵبژاردنی بانكەكان لە خانەی سەرەكی تی بی ئای هەڵبژێرێت، بەڵام لە خانەی یەدەگ ناتوانێت، جەختی لەوەش كردەوە، هاتنی تی بی ئای بۆ ناو هەژماری من بە مانای تەوتین و جێبەجێكردنی بڕیاری دادگای فیدراڵی نایەت، هەروەها وەڵامی داواكاری موچەخۆرانی هەرێمیش نییە.
وەزارەتی ناوخۆی توركیا سێ سەرۆك شارەوانی كوردی لە باكووری كوردستان لە پۆستەكانیان دورخستەوە و سێ كەسی وەكو قەیوم خستە شوێنەكانیان.
وەزارەتی ناوخۆی توركیا لە راگەیەنراوێكدا بڵاویكردەوە، بە تۆمەتی ئەندامبوون لە پەكەكە هەریەك لە ئەحمەد تورك سەرۆكی گەورە شارەوانی مێردین و گولستان سۆنۆك سەرۆك شارەوانی ئێلیهـ و هاوكات سەرۆكی شارەوانیی خەلەفەتی لە روهای باكووری كوردستان دورخراونەتەوە و قەیوم لە شوێنیان دانراوە.
دوای دورخستنەوەیان، پۆلیس گەمارۆی بینای ئەو شارەوانیانەی داوە و رێوشوێنی ئەمنی توند گیراوەتەبەر.
ئەحمەد تورك سەرۆكی گەورە شارەوانی مێردین سەبارەت بە بریارەكە لە تۆری كۆمەڵایەتی ئێكس نوسیوویەتی، هیچ كات دەستبەرداری مافی ئازادی و دیموكراسی نابن و بەردەوامیی بە بەرخۆدان دەدەن و كەس ناتوانێت دەستبەسەر ئیرادەی گەلدا بگرێت.
ئەو سێ سەرۆك شارەوانییەی دورخراونەتەوە و قەیومیان بۆ دانراوە لەلایەن دەم پارتیەوە بەڕێوەدەبرێن و لە دوایین هەڵبژاردنی شارەوانییەكان سەركەوتنیان بەدەستهێنا.
دامەزراوەی سەرۆک جەلال تاڵەبانی بەبۆنەوی ۳٥ـەمین ساڵیادی دامەزراندنی یەکێتیی ژنانی کوردستانەوە پەیامێکی پیرۆزبایی ئاڕاستەی ئەندامانی رێکخراوەکە دەکات و دەڵێت، "رێکخراوەکەتان سەکۆیەکی گرنگ و پشتیوان و پشتگیری تەواوی سەرجەم چینەکانی دیکەبوونە و قوتاخانەیەکی گەورەبووە بۆ پێگەیاندنی کادری خاوەنفکر و رۆشنبیر".
دەقی پەیامەکە...
دامەزراوەی سەرۆک جەلال تاڵەبانی ۳٥هەمین ساڵیادی دامەزراندنی یەکێتیی ژنانی کوردستان پیرۆز دەکات
بەرێز/ سکرتێری یەکێتیی ژنانی کوردستان
بەڕێزان/ ئەندامانی سکرتاریەتیی یەکێتیی ژنانی کوردستان
لە ٣٥هەمین ساڵڕۆژی دامەزراندنی یەکێتیی ژنانی کوردستاندا گەرمترین و جوانترین پیرۆزبایی ئاراستەی ئێوەی بەرێز و سەرجەم ئەندامانی رێکخراوەکەتان دەکەین.
خەباتی یەکێتیی ژنانی کوردستان شانازیەکی گەورەیە بۆ ئێمە لە دامەزراوەی سەرۆک جەلال تاڵەبانی، یەکێتیی ژنان مێژوویەکی پڕ سەروەرییان لە خەباتی شاخ و شار بۆ گەلەکەم تۆمار کردووە، رێکخراوەکەتان سەکۆیەکی گرنگ و پشتیوان و پشتگیری تەواوی سەرجەم چینەکانی دیکەبوونە و قوتاخانەیەکی گەورەبووە بۆ پێگەیاندنی کادری خاوەنفکر و رۆشنبیر.
خەبات و تێکۆشانتان لە ۳٥ ساڵی رابردوودا لەپێناو دابینکردنی مافەکانی ژنانی کوردستان و هەموو مافەکانی گەلی کورد بەرز دەنرخێنین و شوێن پەنجەتان دیارە.
ئێستاش ئێوە بوونەتە پایەیەکی بەهێز و گرنگ بۆ داکۆکیکردن لە مافەڕەواکانی ژنانی کوردستان لە سەرجەم بوارەکاندا.
بۆیە لەم یادە پیرۆزودا سڵاوی تایبەت بۆ ئەو ژنان و کچانی شەهید کە خوێنی پاکی بێگەردی خۆیان بە گەلەکەمان بەخشیوە.
سەرکەوتوو و سەرفرازبن، یادتان پیرۆزبێت
باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی
۳ی ۱۱ی ٢٠٢٤
مەکتەبی سیاسی یەکێتی پەیامێکی پیرۆزبایی بە بۆنەی یادی ٣٥ ساڵەی دامەزراندنی ئاراستە یەکێتی ژنانی کوردستان دەکات
دەقی پەیامەکە
بەرێز سکرتێری یەکێتی ژنانی کوردستان
لە یادی ٣٥ ساڵەی دامەزراندنی یەکێتی ژنانی کوردستاندا پیرۆزباییەکی گەرم ئاراستەی بەرێزتان و مەکتەبی سکرتاریەت وگشت ئەندامانی رێکخراوەکەتان دەکەین
یەکێتی ژنانی کوردستان لە مێژووی کارکردنیدا سەروەرییەکی پرشنگداری بۆ خۆی تۆمار کردوە کە توانیویەتی وەک رێکخراوێکی ئازاد گرنگی بەرۆڵی ژنان بدات بۆ هێنانە پێشەوەیان لە گشت بوارەکانی تێکۆشان و خەباتدا، بەشداری چەندان ژن لە بوارەکانی حزبی و حوکمڕانیدا چ وەک سەرکردەی سیاسی چ وەک پسپۆڕیی لەبەرێوەبردنی وڵاتدا ، سەلمێنەری تواناکانی رێکخراوەکەتانە لە رووی پێگەیاندنەوە
وەک چۆن هەمیشە یەکێتیی نیشتمانیی کوردستان باوەڕی پتەونەگۆڕی بەمافەکانی ژنان هەبوە، بۆ برەودان بە کارەکانی رێکخراوەکەتان و گرنگیدانی زیاتر بە رۆڵی ژنان ، لە پێناو بەدیهێنانی مافە رەواکانتان ،پشتیوانی و پشتگیری خۆمانتان بۆ دووپات دەکەینەوە.
هەمیشە سەربەرز وسەرکەوتوبن
بە بڕیاری وەزارەتی ناوخۆی هەرێم، فرۆشیارانی سیمكارتی تۆمارنەكراو سزای گەورەی دارایی دەدرێن و سەرپێچیكار بە سێ ملیۆن دینار سزا دەدرێت.
راگەیاندنی وەزارەتی ناوخۆی هەرێم بڵاویكردووەتەوە، بۆ خێراكردنی رێوشوێنەكانی كۆنترۆڵكردنی فرۆشتنی سیمكارت كە لە دەرەوەی رێوشوێنی یاسایی تۆماركردن، لیژنە تایبەتمەندەكان لە پارێزگا و ئیدارە سەربەخۆكان راسپێردران رێكاری یاسایی بەرامبەر هەر فرۆشگایەك بگرنەبەر كە سیمكارت دەفرۆشن بێ تۆماركردنی یاسایی و لەو چوارچێوەیەشدا ژمارەیەك فرۆشگا دران و داخران و بەدواداچوونی رۆژانەش بەردەوام دەبێت.
راشیگەیاندووە، رێوشوێنی یاسایی توند لە بەرامبەر هەر كەس و فرۆشگا و بریكارێك دەگیرێتەبەر كە سیمكارت لە بازاڕ بفرۆشێ و تۆماریان نەكات بە ناوی كڕیار، سەرپێچیكاریش بەرامبەر هەر سیمكارتێكی دەست بەسەرداگیراو بە بڕی سێ ملیۆن دینار سزا دەدرێت.
یەكگرتووی ئیسلامی كوردستان بڕیاریدا پێش كۆتایی ئەمساڵ كۆنگرەی نۆیەم ببەستێت و جەختیشیكردەوە، بەشدار نابێت لە كابینەی داهاتووی حكومەتی هەرێم.
ئەنجومەنی سەركردایەتی یەكگرتوو لە راگەیەندراوێكدا بڵاویكردەوە، لەكۆبوونەوەیەكدا كە رۆژی شەممە بەڕێوەچوو، بڕیاردراوە یەكگرتووی ئیسلامی كوردستان پێش كۆتایی ئەمساڵ كۆنگرەی نۆیەمی ببەستێت و بۆ ئەو مەبەستەش كۆبوونەوەكە چەند لیژنەیەكی راسپارد، بۆ تەواوكردنی ئامادەكارییەكانی كۆنگرەكە.
هەر لە كۆبوونەوەكەدا، یەكگرتووی ئیسلامی كوردستان بڕیاریدا بەشداری كابینەی داهاتووی حكومەتی هەرێم نەكات و درێژە بە رۆڵی ئۆپۆزسیۆنی بدات لە پەرلەمانی كوردستان.
ئێوارەی ئەمڕۆ یەكشەممە ٣/١١/٢٠٢٤ هەڤاڵ سەعدی ئەحمەد پیرە ئەندامی مەكتەبی سیاسی ، وتەبێژی رەسمی یەكێتیی نیشتیمانیی كوردستان لە شاری هەولێر پێشوازیكرد لە وەفدێكی كۆماری ئیسلامی ئیران كە پێكهاتبوون لە بەڕێزان نەسروڵڵا زارع رەشنوودی كونسڵی گشتی كۆماری ئیسلامی ئیران لە هەرێمی كوردستان و ژمارەیەک لە راوێژکاران و دیبلۆماتکارانی ئەو ووڵاتە.
لە دیدارێکی نێوان ھەردوولادا، بارودۆخی سیاسی ناوچەکە بەگشتی و عیراق و ھەرێمی کوردستان بەتایبەتی تاوتوێکرا.
نەسروڵڵا زارع رەشنوودی كونسڵی گشتی كۆماری ئیسلامی ئیران ڕایگەیاند, كۆماری ئیسلامی ئیران بە بایەخ و گرنگییەکی زۆرەوە دەڕوانتە بارودۆخی سیاسی عیراق بەگشتی و هەرێمی کوردستان بەتایبەتی لە پێناو سەقامگیری سیاسی و ئاشتی و بەرەو پێشچوونی پروسەی سیاسی و گەشەسەندنی ئابووری و ئاوەدانی زیاتر و بەھێزترکردنی دیموکراسی لە ناوچەکەدا .
ھەرلەو دیدارەدا، سەعدی ئەحمەد پیرە، وێرای خستنەرووی رەوشی سیاسی، بەتایبەتیش پرسی ململانێیە نێودەوڵەتی و ھەرێمایەتیەکان، تەئکیدی کردەوە کە یەكێتی نیشتمانی كوردستان خوازیاری چارەسەری دیپلۆماسیانەی کێشە سیاسییەکانە لەسەر بنەمای بەند و بڕگەکانی دەستوری هەمیشەیی عیراق لە ڕێگەی گفتوگۆی ئاشتیانە و لەیەکتر گەیشتن بە ئاراستەی چارەسەری گونجاو کە ببێتە مایەی خێر و خۆشی و سەقامگیری بۆ گەلانی عیراق، هاوكات بەبۆنەی كۆتاییهاتنی ماوەی كاركردنی وەك سەركونسڵی گشتی كۆماری ئیسلامی ئیران لە هەرێمی كوردستان هەڤال سەعدی ئەحمەد پیرە سوپاسی بەڕێز نەسروڵڵا زارع رەشنوودی كرد كە لەماوەی ڕابردوودا وێڕای ئەركە دیبلۆماسییەكانی ڕۆڵیكی گرنگی بینیوە لەبەرەو پێش بردنی پەیوەندییە سیاسی و ئابوری و فەرهەنگییەكانی نێوان كۆماری ئیسلامی ئێران و هەرێمی كوردستان ،هیوای سەركەوتنیشی بۆ ئەرك و بەرپرسیارییەتییەكانی ئایندەی خواست
توركیا بە قوڵایی ٣٠ كیلۆمەتر خاكی هەرێمی كوردستانی بەزاندووە و هەشت سەربازگەی دیكەی دروستكردووە و ئۆپراسیۆنی نوێش دژی پەكەكە ئەنجام دەدات.
میدیاكانی توركیا بڵاویانكردەوە، توركیا بە قوڵایی ٣٠ كیلۆمەتر خاكی هەرێمی بەزاندووە و هەشت سەربازگەی نوێی دروستكردووە، كە دەكەونە ناوچەكانی زیلۆك و ئەركیانەوە.
ئەوەشی خستووەتەڕو، بەگوێرەی رێككەوتنە ئەمنییەكانی نێوان توركیا و عیراق، هەردوو حكومەتی عیراق و هەرێمی كوردستان هاوكار دەبن، لە ئۆپراسیۆنەكانی سوپای توركیا دژی پەكەكە و لە دواین سەردانی محەمەد شیاع سودانی سەرۆك وەزیرانی عیراق بۆ توركیا و كۆبوونەوەی لەگەڵ بڕیاردراوە ئۆپراسیۆنێكی نوێ لە ناوچە سنورییەكان ئەنجام بدرێت.
بەپێی میدیاكانی توركیا، سوپای توركیا لە بەعشیقەش سەربازگەیەك دادەمەزرێنێت و تێیدا مەشق و راهێنان بە سەربازانی عیراق دەكات و ئاڵوگۆڕی زانیارییە هەواڵگرییەكانی نێوانیان فراوانتردەكرێت ، بڕیاریشە تاكو كۆتایی ئەمساڵ ناوەندێكی هەماهەنگی لەنێوان هەردوولادا دابمەزرێنرێت بۆ رووبەڕووبوونەوەی پەكەكە.
وەزارەتی خوێندنی باڵا ئەنجامی وەرگرتنی دەرچووانی ١٢ی ئامادەیی لە زانکۆ و پەیمانگەکانی هەرێمی راگەیاند.
له ڕاگهیهندراوێكدا وەزارەتی خوێندنی باڵا ئاماژهی بهوه كردوه، بە بەكارهێنانی هەمان ناوی بەکارهێنەرو وشەی تێپەڕ (یوزەرنەیم و پاسوۆرد) كە پێشتر فۆڕمەکانیان پێ پڕكراوەتەوە دەتوانن ئەو شوێنە بدۆزنەوە كە لێیی وەرگیراون
بۆ وەرگرتنەوەی ئەنجامەکان کلیک بکە:
ئەو شەپۆلی بارانبارینەی رووی لە ناوچەکانی هەرێمی کوردستان کردووە کاریگەرییەکەی تا رۆژی دووشەممە بەردەوام دەبێت.
وەزارەتی گواستنەوە و گەیاندن لەبارەی کەشی پێشبینیکراوی ٤٨ سەعاتی داهاتوو رایگەیاند، ئەمڕۆ یەکشەممە کاریگەریی شەپۆلی بارانبارین لە سەنتەری پارێزگای هەولێر و ناوچە شاخاوییەکان و ئیدارەی سەربەخۆی سۆران بەردەوام دەبێت، لە نیوەڕۆدا دووبارە بارانبارین دەستپێدەکاتەوە، لە دوای نیوەرۆشدا رێژەی بارانبارین زیاد دەکات بۆ لێزمە بارانی ناوبەناو، پاشان کاریگەرییەکەی تا درەنگانی شەو دەمێنێتەوە.
راشیگەیاند؛ لە سنووری پارێزگای سلێمانی و هەڵەبجە و ئیدارەی راپەڕین، کاریگەریی شەپۆلی بارانبارین بەردەوام دەبێت، لە دوانیوەڕۆدا لە ناوچە جیاجیاکاندا بارانبارین دەستپێدەکات، لە هەندێک ناوچەی ئیدارەی راپەڕین و باکووری پارێزگای سلێمانی بارانی بەلێزمە دەبارێت و هەورەبروسکە دەبێت.
ئاماژە بەوەش کراوە؛ لە سنووری پارێزگای دهۆک و ناوچە شاخاوییەکانی ئیدارەی سەربەخۆی زاخۆ، ئاسمانی ئەم ناوچانە زیاتر نیمچەهەور دەبێت، کاریگەریی بارانبارین لەم ناوچانەدا بە شێوەی نمەبارانی پچڕپچڕ دەبێت.
سەبارەت بە پێشبینییەکانی کەشوهەوا بۆ سبەینێ، وەزارەتی گواستنەوە و گەیاندن رایگەیاند، شەپۆلی بارانبارین بەگشتی لەسەر ناوچەکانی هەرێم لاواز دەبێت، ئاسمان نیمچە هەور دەبێت، بارانبارین بەشێوەی نمەباران و هەندێ کات هەورەبروسکە دەبێت.
پارێزگای هەولێر رایدەگەیەنێت، هەموو ئامادەکارییەکی پێویستیان بۆ وەرزی بارانبارین گرتووەتەبەر و سەرجەم تیمە خزمەتگوزارییەکان لە حاڵەتی ئامادەباشیدان، بۆیە هیچ هۆکارێک بە پێویست نابینن تاکو سبەینێ بکرێت بە پشوو.
راگەیاندنی پارێزگای هەولێر لە راگەیەنراوێکدا بڵاویکردەوە، لەسەر فەرمان و راسپاردەی پارێزگاری هەولێر، تیمەکانی سەرجەم فەرمانگە خزمەتگوزارییەکان لە ماوەی چەند رۆژی رابردوودا هەموو جۆرە ئامادەکارییەک و رێوشوێنێکی پێویستیان بۆ وەرزی بارانبارین و زستانی ئەمساڵ گرتووەتەبەر و تەواوی چەپەرەکانی ئاو وەرگرتن، مەنهۆلەکان، ئاوەڕۆكانی شەقامە گشتییەکان و کوچە و کۆڵانەکانی گەڕەکەکانی سەنتەری شار، دەرەوەی شار، کەند و رێڕەوەکانی ئاوی سروشتی باران پاککراوەنەتەوە.
ئاماژەی بۆ ئەوەشکرد، هاووڵاتیانی سنووری پارێزگاکە دڵنییا دەکەنەوە، هەموو ئامادەکارییەکی پێویست کراوە و تیمەکانی فەرمانگە خزمەتگوزارییەکانیش لە حاڵەتی ئامادەباشیدان بۆ رێگریكردن لە روودانی هەر حاڵتێکی نەخوازراو و چارەسەركردنی.
هاوکات پارێزگای هەولێر سەبارەت بە پشووی سبەینێ رایگەیاند، هیچ هۆکارێک بە پێویست نابینن تاکو سبەینێ بکرێت بە پشوو، هەموو لایەک ئاگاداردەکەنەوە، سبەینێ لە سەرجەم فەرمانگە و دامودەزگاکانی سنووری پارێزگاکە دەوام ئاساییە و پشوو نییە.
بافڵ جەلال تاڵەبانی سەرۆکی یەکێتیی نیشتمانیی کوردستان، بەهۆی کۆچیدوایی حاجی کاکە ئەحمەد دارەتوو تێكۆشەر و كەسایەتیی دیاری دزەیی و هەولێر پەیامێکی هاوخەمی بڵاودەکاتەوە و دەڵێت، "لەخوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت".
دەقی پەیامەکە...
کۆچی دوایی (حاجی کاکە ئەحمەد دارەتوو) تێكۆشەر و كەسایەتیی دیاری دزەیی و هەولێر لەدڵەوە نیگەرانیكردین.
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی كەسوكار و بنەماڵە سەربەرزەكەیان دەكەم كە نموونەی باڵای خەبات و تێكۆشانن لەپێناو گەلەكەمان.
لەخوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
بۆ ئەمساڵیش كرێی خوێندن بە شێوەی پارالێڵ و ئێواران لە زانكۆ و پەیمانگەكانی هەرێم كەمكرایەوە.
بەگوێرەی نووسراوێكی وەزارەتی خوێندنی باڵا و توێژینەوەی زانستی هەرێم، بە رەچاوكردنی دۆخی دارایی خوێندكاران، بۆ ئەمساڵیش بڕیارداوە كرێی خوێندن بەشێوەی پارالێڵ و ئێواران كەمبكرێتەوە، لە زانكۆ و پەیمانگە حكومی و تایبەتەكان.
لە نووسراوەكەدا هاتووە، كرێی خوێندنی پارالێڵ و ئێواران لە زانكۆ و پەیمانگە حكومییەكان بە رێژەی %45 كەمدەكرێتەوە و لە زانكۆ و پەیمانگە تایبەتەكانیش بە رێژەی لە سەدا 10 بۆ 20 كەمدەكرێتەوە و سەرجەم بەش و قۆناغەكانیش دەگرێتەوە.
هاوشێوەی ناوچەكانی باشوور، شەپۆلی بارانبارین رۆژهەڵاتی كوردستانیش گرتووەتەوە، بەپێی پێشبینیەكانیش زۆرترین بڕی بارانبارین لە كامیاران تۆمار دەكرێت.
كەشناسی پارێزگای سنە لە رۆژهەڵاتی كوردستان رایگەیاند، ئەو شەپۆلە بارانبارینەی لە رۆژی پێنجشەممەوە ناوچەكانی رۆژهەڵاتی كوردستانی گرتووەتەوە تا ئێوارەی سێشەممە بەردەوام دەبێت .
بەپێی پێشبینییەكانی كەشناسی سنە، بارانی بەخوڕ ناوچەكانی هەورامان، سنە و مەریوان، سەقز و بانە و بیجار دەگرێتەوە.
هاوكات هۆشداریی ئەوەشیداوە لە دروستبونی لافاو لە زۆربەی ناوچەكانی پارێزگای سنە و داواشدەكات خەڵك خۆیان لە نزیكبونەوەی پرد و كەنار روبارەكان دوور بگرن.
دادگای جێبەجێكردنی سزاكانی بوورسا، جارێكی تر سزای دیسپلینی نوێی بۆ عەبدوڵا ئۆجالان دەركرد و دیداری لەگەڵ خانەوادەكەی لێ قەدەغەكرا.
بەپێی هەواڵی میدیاكانی باكوری كوردستان، جارێكی تر سزای دیسپلینی نوێ بۆ عەبدوڵا ئۆجالان رێبەری زیندانیكراوی پارتی كرێكارانی كوردستان دەركراوە، پارێزەرانی نووسینگەی یاسایی سەدە بە مەبەستی ئەنجامدانی دیداری خانەوادەكەی سەردانی دادگای جێبەجێكردنی سزاكانی بوورسایان كردووە.
دادوەری دادگای جێبەجێكردنی سزاكانی بوورسا لە 16ی تشرینی یەكەمی 2024، سزای دیسپلینی بۆ ماوەی سێ مانگ دەركردوە، پارێزەرانیی دۆسیەی ئۆجالان بڕیارە تانە لە دەركردنی سزاكە بدەن.
ئەوەش لە كاتیكدایە رۆژی 23ی تشرینی یەكەمی رابردوو، عومەر ئۆجالان پەرلەمانتاری دەم پارتی دوای 43 مانگ دیداری لەگەڵ ئۆجالان ئەنجامدا.
لە چەند ناوچەیەكی شاری وانی باكوری كوردستان قەدەغەی هاتوچۆ بۆ ماوەی ١٥ رۆژ راگەیەنرا
بەپێی هەواڵی میدیاكانی باكوری كوردستان، بۆ جاری دووەم لە چەند ناوچەیەكی ئەلباكی سەر بە شاری وانی باكوری كوردستان بۆ ماوەی ١٥ رۆژ تا ١٦ی تشرینی دووەمی ٢٠٢٤، هاتوچۆ قەدەغەكراوە و ئەو ناوچانە وەك هەرێمی ئەمنیی تایبەت” راگەیەندران.
ئەوەش لە كاتێكدایە، ئەو ناوچانە پێشتریش لە نێوان ١٨ی تشرینی یەكەم تا ١ی تشرینی دووەم، قەدەغەی هاتوچۆیان تێدا راگەیەنرابوو.