عیراق
وەفدی باڵای یەکێتیی نیشتمانیی کوردستان بە سەرۆکایەتیی قوباد تاڵەبانی و ئامادەبوونی هەر یەکە لە دەرباز کۆسرەت رەسوڵ، خالید شوانی و یوسف گۆران، لە بەردەوامی سەردان و کۆبوونەوەکانیدا لە بەغداد، لەگەڵ عەمار حەکیم، سەرۆکی رەوتی حیکمە کۆبووەوە.
لە کۆبوونەوەکەدا کە رۆژی شەممە 24ـی 1ـی 2026 بەڕێوەچوو، هەردوولا بۆچوون و دیدگای خۆیان بۆ حکومەتی داهاتووی عیراق خستەڕوو و هاوڕابوون لەسەر پەلەکردن لە دروستکردنی کۆدەنگییەک لەنێوان لایەنە سیاسییەکانی هەموو پێکهاتەکان بۆ ئەوەی هەرچی زووتر حکومەتی نوێ پێکبهێنرێت.
قوباد تاڵەبانی روونی کردەوە کە یەکێتی پێداگرە لەسەر ئەوەی دەبێت ئەولەوییەتی هەردوو حکومەتی داهاتووی عیراق و هەرێم چارەسەرکردنی کێشەکانی نێوانیان بێت و بە تایبەتیش کێشەی بودجە کە مافێکی دەستووری خەڵکی هەرێمی کوردستانە و نابێت بخرێتە چوارچێوەی ململانێ و ناکۆکییە سیاسییەکانەوە.
وەفدی باڵای یەکێتیی نیشتمانیی کوردستان بە سەرۆکایەتی قوباد تاڵەبانی لە بەغدا لەگەڵ قەیس خەزعەلی، ئەمینداری گشتیی بزووتنەوەی عەسایب کۆبووەوە.
لە کۆبوونەوەکەدا کە رۆژی شەمە(24/1/2026) بەڕێوەچوو، تاوتوێی دۆخی سیاسی عیراق و هەرێمی کوردستان و پرۆسەی پێکهێنانی حکومەتی نوێی عێراق کرا. قوباد تاڵەبانی بۆچوونی یەکێتی لەبارەی چۆنییەتی پێکهێنانی حکومەتی نوێ خستەڕوو و جەختی کردەوە لەسەر پێکهێنانی حکومەتێکی کارا کە وەک یەک خزمەتی هەموو عێراقییەکان بکات.
قوباد تاڵەبانی روونیشی کردەوە کە یەکێتی پێیوایە هەموو کێشەکانی عیراق و لەناویشیاندا کێشەکانی نێوان هەرێم و بەغداد دەبێت بە گەڕانەوە بۆ دەستوور چارەسەر بکرێن و وتیشی دەبێت ئەولەوییەتی حکومەتی داهاتووی عیراق چارەسەرکردنی کێشەکانی نێوان هەرێم و بەغداد و بە تایبەتیش کێشەی بودجە و موچە بێت.
وەفدێکی باڵای یەکێتیی نیشتمانیی کوردستان بە سەرۆکایەتی قوباد تاڵەبانی و ئەندامێتی دەرباز کۆسرەت رەسوڵ و خالید شوانی، ئەمڕۆ شەممە 24ی کانوونی دووەمی 2026، لە بەغداد لەگەڵ محەمەد شیاع سودانی، سەرۆکی هاوپەیمانیی ئاوەدانکردنەوە و گەشەپێدان کۆبوەوە.
لە کۆبونەوەکەدا، وەفدی یەکێتی جەختیانکردەوە لەسەر پێویستی پێکهێنانی حکومەتێکی بەهێز و کارا کە رەزامەندیی هەمو پێکهاتەکانی لەسەربێت و کار بۆ جێبەجێکردنی دەستور، گەشەپێدانی ئابوری و باشترکردنی خزمەتگوزارییەکان بکات.
هەر لە کۆبونەوەکەدا، وەفدەکە رونیکردەوە، یەکێتی پێیوایە دەبێت ئەولەوییەتی حکومەتی داهاتوی عیراق، چارەسەرکردنی کێشەکانی نێوان هەرێم و بەغدا بێت لەسەر بنەمای دەستور.
وەفدێکی باڵای یەکێتیی نیشتمانیی کوردستان بە سەرۆکایەتی قوباد تاڵەبانی و یاوەری دەرباز کۆسرەت رەسوڵ، گەیشتە بەغداد و یەکەم کۆبونەوەی لەگەڵ محەمەد شیاع سودانی، سەرۆک وەزیرانی عیراق ئەنجامدا.
بەپێی زانیارییەکانی کوردسات نیوز، کۆبونەوەکە کۆتایی هاتووە و تیایدا تاوتوێی رەوشی سیاسی عیراق و هەرێمی کوردستان کراوە.
سەمیر هەورامی، وتەبێژی قوباد تاڵەبانی، پێشتر رایگەیاندبو، وەفدەکەی یەکێتیی نیشتمانیی کوردستان زنجیرەیەک کۆبونەوەی دیکە لەگەڵ لایەنە سیاسییەکانی عیراق ئەنجام دەدات.
رەیان کلدانی، ئەمینداری گشتیی بزوتنەوەی بابلیون، پەیامێکی توند لەبارەی "بڕینی کەزیی کچە کوردێک" بڵاودەکاتەوە و رایدەگەیەنێت، ئەم کارە تەنیا بڕینی قژێک نییە، بەڵکو تاقیکردنەوەی مرۆڤبوونی هەمووانە.
لە پەیامێکدا کلدانی نووسیویەتی: "کاتێک کەزیی کچێک دەبڕدرێت، تەنها قژەکە نابڕدرێت، بەڵکو مانای مرۆڤبوون لە ناو هەمووماندا تاقی دەکرێتەوە. کەزی هێمای خۆبوونە، ئەوەی دەست دەبات بۆ ئەم هێمایە، ترسی خۆی لە جیاوازی ئاشکرا دەکات".
رەیان کلدانی بەناوی عیراقەوە دەڵێت: "کەرامەتی مرۆڤ پارچە ناکرێت، ئازاری کچێکی کورد بریندارکردنی ویژدانی هەموو عیراقە".
جەختیشی کردووەتەوە کە زمانی توندوتیژی و تۆڵە رەتدەکەنەوە و یەکترقبوڵکردن دەکەنە بنەمای پێکەوەژیان، چونکە "وڵات بە پاراستنی کەرامەت دروست دەبێت، نەک بە بڕین".
محەمەد شیاع سودانی، سەرۆکی ئەنجومەنی وەزیرانی عیراق، ئەمڕۆ پێنجشەممە، پێشوازی لە تۆماس باراک، نێردەی تایبەتی دۆناڵد ترەمپ، سەرۆکی ئەمریکا، بۆ سوریا کرد.
نووسینگەی راگەیاندنی سەرۆکی ئەنجومەنی وەزیران بڵاوی کردەوە، لە میانی دیدارەکەدا بارودۆخی ناوچەکە و پێشهاتەکانی سوریا تاوتوێ کران.
سودانی جەختی لە گرنگیی ئاسایش لە سوریا بۆ عیراق و ناوچەکە کردەوە، هەروەها ئاماژەی بە پێویستیی هاوکاری بۆ بەرقەرارکردنی سەقامگیری و دەستەبەرکردنی یەکگرتوویی خاکی سوریا دا.
لە بەشێکی دیکەی قسەکانیدا، سەرۆکی ئەنجومەنی وەزیران ئاماژەی بە هاوبەشیی بونیاتنەر لەنێوان عیراق و ویلایەتە یەکگرتووەکانی ئەمریکا کرد لە بەرەنگاربوونەوەی تیرۆر و دامەزراندنی بناغەکانی هاوکاریی ئابووری و گەشەپێدانی بەردەوام.
لای خۆیەوە، تۆماس باراک پێزانینی سەرۆکی ئەمریکای بە سودانی گەیاند بۆ هەوڵەکانی حکومەتی عیراق لە پشتگیریکردنی سەقامگیری لە ناوچەکە و بەڕێوەبردنی هەڵوێستی عیراق لەم قۆناغە هەستیارەدا.
باراک ستایشی هەنگاوەکانی سودانی و ئیدای هێزە ئەمنییەکانی عیراقی کرد لە بەرەنگاربوونەوەی تیرۆر و کرانەوەی عیراق بەڕووی وەبەرهێنانی نێودەوڵەتی و بونیاتنانی متمانەی ئابووریی هاوبەش، کە بە فاکتەرێکی گرنگ بۆ سەقامگیریی ناوچەکە دادەنرێت.
د.لەتیف جەمال ڕەشید، سەرۆک کۆمار عیراق پێشوازیکرد لە موسەنا سامەڕایی، سەرۆکی هاوپەیمانی عەزم.
لە دیدارەکەدا باس لە چەند پرسێکی سیاسی و نیشتمانی و دوایین پەرەسەندنەکانی گۆڕەپانی عێراق کرا.
سەرۆک کۆمار جەختی لە گرنگی بەهێزکردنی سەقامگیری سیاسی و پشتگیریکردنی ڕێڕەوەکانی دیالۆگی نیشتمانی کردەوە، بەو جۆرەی کە یارمەتیدەر بێت لە پتەوکردنی کاری دیموکراسی و تەواوکردنی شایستە دەستوورییەکان و هەنگاونان بەرەو پێکهێنانی حکومەتێکی نیشتمانی کە ئامانجی خزمەتکردنی بەرژەوەندییەکانی هاووڵاتییان بێت.
هەروەها ئاماژە بە پێویستی چەسپاندنی بنەماکانی هەماهەنگی لە نێوان هێزە سیاسییەکان و پشتگیریکردنی ئەو هەوڵانە کرا کە ئامانجیان ڕووبەڕووبوونەوەی تەحەدییەکانی ئێستا و بەدیهێنانی گەشەپێدانی گشتگیرە.
د. لەتیف رەشید سەرۆک کۆماری عیراق، لە بەغداد پێشوازیکرد لە محەمەد حەلبوسی سەرۆکی پارتی تەقەدوم.
لە میانی دیدارەکەدا کە رۆژی پێنجشەممە 22- 1- 2026 بەڕێوەچوو ، باس لە بارودۆخی گشتی وڵات کرا و جەختکرایەوە لەسەر پتەوکردنی سەقامگیری سیاسی و پاڵپشتیکردنی هەوڵە نیشتمانییە هاوبەشەکان بۆ خزمەتکردنی بەرژەوەندییەکانی گەلی عیراق.
سەرۆک کۆمار جەختیکردەوە لە گرنگی پەلەکردن لە تەواوکردنی مەرجە دەستوورییەکان لە ماوەی دیاریکراوی خۆیاندا و ئاماژەیکرد کە پابەندبوون بەم وادانە پایەیەکی بنەڕەتییە بۆ چەسپاندنی سیستەمی دیموکراسی و بەهێزکردنی متمانەی هاووڵاتیان بە دامەزراوە دەستوورییەکان.
سەرۆک کۆمار جەختیکردەوە لە سەر گرنگی چڕکردنەوەی هەوڵەکان و هاریکاری نێوان هەموو هێزە سیاسییەکان و کارکردن بە گیانی بەرپرسیارێتی نیشتمانی بۆ تێپەڕاندنی ئاستەنگەکانی ئێستا و هێنانەدی گەشەسەندنی هەمەلایەنە و چەسپاندنی ئاسایش و سەقامگیری لە سەرتاسەری وڵات.
هەروەها لە دیدارەکەدا باس لە پێشهاتی ئیقلیمی و نێودەوڵەتیی و کاریگەرییان لە سەر گۆڕەپانی عێراق و هەروەها پێویستی پاڵپشتیکردنی هەوڵە نێودەوڵەتییەکان کرا بۆ بەرەوپێشبردنی ئاشتی و ئاسایش لە ناوچەکە و جیهاندا.
لای خۆیەوە محەمەد حەلبوسی سوپاس و پێزانینی خۆی بۆ سەرۆک کۆمار دەربڕی و جەختیکردەوە لە پەرۆشی خۆی بۆ پشتیوانی لە هەوڵەکان بە ئامانجی پتەوکردنی سەقامگیری سیاسی و هەنگاونان بەرەو پێشەوە لە جێبەجێکردنی ئەرکە نیشتمانییەکان بە شێوەیەک کە ویستی گەلی عێراق بەدیبێنێت.
د. لەتیف رەشید، سەرۆک کۆماری عیراق، ئەمڕۆ لە کۆشکی بەغداد پێشوازیی لە عیرفان سدیق باڵیۆزی بەریتانیا لە عیراق کرد.
لە کۆبوونەوەکەدا پەیوەندییە دووقۆڵییەکانی نێوان هەردوو وڵات و چۆنیەتی پەرەپێدانی هاوکاری هاوبەش بۆ خزمەتکردن بە بەرژەوەندییەکانی هەردوو گەل و بەهێزکردنی سەقامگیری لە ناوچەکە و پەرەسەندنەکانی بارودۆخی ناوچەکە و دەرئەنجامەکانی بەتایبەتی ئەوەی سوریا بەخۆیەوە دەبینێت تاوتوێ کرا و سەرۆک کۆمار جەختی لەسەر پێویستی پاراستنی ئاسایش و سەقامگیری لە ناوچەکە و چڕکردنەوەی هەوڵەکان بۆ پاراستنی سەرجەم پێکهاتەکانی کۆمەڵگای سوریا و پاراستنی یەکڕیزی پێکهاتەی نیشتمانی خۆی لە تیرۆریستان و ئامانجەکانی داعش کرد.
لای خۆیەوە باڵیۆز جەختی لە پەرۆشی بەریتانیا کردەوە بۆ بەهێزکردنی چوارچێوەی هاوکاری لەگەڵ عیراق لە بوارە جیاجیاکاندا و ئاماژەی بە گرنگی بەردەوامی دیالۆگ و هەماهەنگی هاوبەش کرد بۆ رووبەڕووبوونەوەی قەیران و ئاڵەنگاریەکانی ناوچەکە.
د. لەتیف رەشید سەرۆک کۆماری عیراق، ئەمڕۆ پێنجشەممە ٢٢ی کانونی دووەمی ٢٠٢٦ لە کۆشکی بەغداد، پێشوازی لە ئاتول کێهاری، بریکاری ئەمینداری گشتیی نەتەوە یەکگرتووەکان بۆ کاروباری پشتیوانی ئۆپەراسیۆنەکان و وەفدی هاورێی کرد.
لە دیدارەکەدا، تاوتوێی میکانیزمەکانی هەماهەنگی هاوبەش لە نێوان لایەنە حکومییە پەیوەندیدارەکان و نەتەوەیەکگرتووەکان کرا بە ئامانجی دەستەبەرکردنی تەواوکردنی رێکارەکانی کۆتاییهێنان بە ئەرکەکانی نێردەی نێودەوڵەتی لە عیراق.
سەرۆک کۆمار جەختی لە گرنگی بەردەوامیی هاوکارییە بونیادنەرەکان لەگەڵ رێکخراوی نەتەوە یەکگرتووەکان و ئاژانسە تایبەتەکانی کردەوە، هاوکات ستایشی ئەو رۆڵەی کرد کە نێردەی (یۆنامی) لە ماوەی کارکردنیدا گێڕاویەتی و ئەو پاڵپشتییانەی لە بوارە جیاجیاکاندا پێشکەشی کردوون.
هەروەها ئاماژەی بە پەرۆشیی عیراق کرد بۆ بەهێزکردنی شەراکەت لەگەڵ رێکخراوەکە بەو ئاراستەیەی کە خزمەت بە ئامانجەکانی گەشەپێدان و سەقامگیری لە هەموو ئاستەکاندا بکات.
لە لایەن خۆیانەوە، ئەندامانی وەفدی نەتەوە یەکگرتووەکان هەنگاوەکانی کۆتاییهێنان بە ئەرکەکانی نێردەکەیان خستەڕوو و پێزانینی خۆیان بۆ ئەو هاوکاری و پاڵپشتییە دەربڕی کە عیراق بۆ سەرخستنی ئەم پرۆسەیە پێشکەشی دەکات، هەروەها پابەندیی نەتەوە یەکگرتووەکانیان بە بەردەوامیی کارکردنی دووقۆڵی هاوبەش لە بوارە جۆراوجۆرەکاندا دوپاتکردەوە.
د.لەتیف رەشید، سەرۆک کۆماری عیراق ئەمڕۆ لەکۆشکی بەغداد، پێشوازیکرد لە ئێلبروس کوتراشێڤ، باڵیۆزی روسیا لە عیراق.
لەمیانی دیدارەکەدا باسیان لەچۆنیەتی پەرەپێدانی هاوکارییە دووقۆڵیەکان و هەروەها کۆمەڵێک بابەتی ناوچەیی و جیهان کرد، سەرۆک کۆمار جەختی لە گرنگی گەیشتن بەچارەسەرێکی سیاسی کرد کەیەکێتی خاکی سوریا بپارێزێت و کۆتایی بەئازارەکانی گەلەکەی بەهەموو پێکهاتەکانیەوە بهێنێت و دوپاتیشی لە پێویستی پشتیوانیکردن لەهەوڵە نێودەوڵەتییەکان بە ئامانجی گەیشتن بە سەقامگیری لەناوچەکە بەگشتی کرد.
لەلای خۆیەوە باڵیۆزی روسیا ، سڵاوی سەرکردایەتی روسیای گەیاندە سەرۆک کۆمار و دووپاتیشی لەپەرۆشی وڵاتەکەی کردەوە بۆ پتەوکردنی هاریکاری و هاوبەشی لەگەڵ عیراق لەبوارە جیاجیاکاندا بەشێوەیەک کە خزمەت بە بەرژەوەندییە هاوبەشەکانی هەردوو وڵاتی دۆست بکەن.
د.لەتیف رەشید، سەرۆک کۆماری عیراق ئەمڕۆ لە کۆشکی بەغداد، کارنامەی باڵیۆزانی هەر یەک لەدەوڵەتی ڤاتیکان، مۆنسینۆر میرۆساڤ ستانسلاڤ فاخۆڤسکی، کۆماری ئازەربایجان، ئێلدار نادر ئۆگلو سەلیمۆڤ، دەوڵەتی فەلەستین، سەمەر عەبدولڕەحمان عەوەزوڵڵای وەرگرت.
لەڕێوڕەسمێکدا بەئامادەبوونی بریکاری وەزارەتی دەرەوە شۆڕش خالید سەعید ، سەرۆک کۆمار بەجیا پێشوازی لە باڵیۆزە نوێیەکان کرد و هیوای سەرکەوتنی بۆ خواستن لە ئەرکە دیپلۆماسییەکانیان کە دەبێتە هۆی پتەوکردنی دۆستایەتی و پەرەپێدانی پەیوەندییە هاوبەشەکانی نێوان عیراق و وڵاتەکانیان لەبوارە جیاجیاکاندا و خزمەت بە بەرژەوەندییە هاوبەشەکان دەکات.
له میانی دیدارەکاندا سەرۆک کۆمار جەختی لەپابەندبوونی عیراق کردەوه بۆ پەیڕەوکردنی سیاسەتێکی هاوسەنگ لەسەر بنەمای رێزگرتن لەسەروەری دەوڵەتان و دەستورنەدان لەکاروباری ناوخۆیان و بەشداریکردن له چەسپاندنی ئاسایش و سەقامگیری ناوچەکە وجیهان .
لەلای خۆیانەوە باڵیۆزە نوێیەکان سوپاس و پێزانینی قووڵی خۆیان بۆ ئەو پێشوازییە گەرمە دەربڕی و جەختیان لەپەرۆشییان کردەوە بۆ پتەوکردنی پەیوەندییە دووقۆڵییەکانی نێوان عیراق و وڵاتەکانیان و فراوانکردنی بوارەکانی هاریکاری و هەماهەنگی هاوبەش لەبارەی پرسە هاوبەشەکان. هەروەها هیوای پێشکەوتن وخۆشگوزەرانی زیاتریان بۆ عیراق و گەلەکەی خواست.
سەرۆكی ئەركانی سوپای عیراق بۆ چاودێریكردنی و ئامادەكاریەكانی سەر سنوری وڵاتەكەی لەگەڵ سوریا گەیشتە شەنگال.
وەزارەتی بەرگری عیراق ئەمڕۆ لە راگەیەنراوێكدا ئاماژەی بۆ ئەوەكرد، عەبدولئەمیر رەشید یارەڵا سەرۆكی ئەركانی سوپای عیراق بە یاوەری وەفدێكی باڵای سەربازی گەیشتوەتە شەنگال سنوری نێوان عیراق و سوریا.
هەر لە راگەیەنراوەكەدا هاتووە، ئامانجی سەردانەكەی یارەڵا بۆ سنورەكان بۆ چاودێریكردنی ئامادەكارییە ئەمنییەكان و پێداچوونەوە بە روداو و پێشهاتە سەرەكییەكان و پشكنینی سەربازەكانە لەو ناوچەیە.
هاوكات،سەرچاوەیەكی ئەمنی رایگەیاند، لیوای 25 و 74ی حەشدی شەعبی بەدرێژایی سنوری عیراق و سوریا جێگیركراون،وتیشی ئەم جێگیركردنە بەشێكە لە هەوڵە ئەمنییەكان بە ئامانجی توندكردنەوەی كۆنترۆڵی سنورەكان و رێگریكردن لە هەر دزەكردنێكی ئەگەری تیرۆستانی داعش.
بە مەبەستی دڵنیابونەوە لە ئامادەیی هێزەکانی عیراق، محەمەد شیاع سودانی سەردانی بنکەی سەربازی بنکەی عەین ئەسەدی کرد، ئەمەش لە دوای ئەوە دێت لە چەند رۆژی رابردوودا بنکەکە لەلایەن هێزەکانی ئەمریکاوە تەسلیمی عیراق کرایەوە.
ئەمڕۆ چوارشەممە، محەمەد شیاع سودانی فەرماندەی گشتیی هێزە چەکدارەکانی عیراق، گەیشتە بنکەی عەین ئەسەد لە رۆژئاوای پارێزگای ئەنبار، بە مەبەستی بەدواداچون بۆ ئاگاداربوون لە ئامادەیی یەکە سەربازییەکان، کە کۆنتڕۆڵی سنووری عیراقی-سووریایان کردووە.
وەک دڵنیایدان بە سودانی، لەکاتی چونی بۆ بنکەی عەین ئەسەد، چوار فڕۆکەی جەگی لە جۆری ئێف -16 لە چوارچێوەی راهێنانێکی تاکتیکیدا بۆ چاودێریکردن و پشکنین و جێبەجێکردنی ئەرکەکانیان ئۆپراسیۆنێکیان ئەنجامدا.
ئەمەش لە کاتێکدایە لە سوریا گۆڕانکاری نوێ بەڕێوەیە و عیراقیش وەک ئامادەکارییەک بۆ هەر پێشهاتێکی نوێ و رێگریکردن لە هەر هەوڵێکی دزەکردن لە سنورەوە ئامادەکاری تەواوی کردوە و لە چەند رۆژی رابردوشدا بنکەی عەین ئەسەدیان لە هێزەکانی هاوپەیمانان وەرگرتەوە.
مارک ساڤایا، بەردەوامە لە هۆشداریدان لە رەوشی عێراق و لە نوێترین پەیامیدا دەڵێت؛ ئەگەر بڕیارە عیراق چاک بکرێت، دەبێت سەرەتا و بە شێوەیەکی یەکلاکەرەوە رووبەڕووی گەندەڵی ببنەوە.
مارک ساڤایا، نێردەی تایبەتی سەرۆکی ئەمریکا بۆکاروباری عیراق، لە ئێکس پەیامێکی بڵاوکردوەتەوە وئاماژەی بەوەکردوە، بە ودی دەزانێت چۆن پارەی نایاسایی سپی دەکرێتەوە و رەوانە دەکرێت، تەنها لە رێگەی بەرپرسە باڵاکانەوە ناڕوات بەڵکو و گرنگتر ئەوەیە، لە رێگەی چینە نزمەکانەوە دەڕوات، وەک ئەندامانی خێزان، هاوڕێیان، پاسەوانەکان و شۆفێرەکان.
ساڤایا جەختیکردوەتەوە، ئەم تۆڕەدروستکراوە بۆ سپیکردنەوە ناردنی پارە پارێزگاری و نکۆڵیکردن دروست دەکات لە هەمان کاتدا، ئەم سیستەمەی عیراق بە تەواوی بە کارایی دەهێڵێتەوە و لە رێگەی ئەم سیستەمەوە، گروپە چەکدارەکانی نزیک لە ئێران بە شێوەیەکی دارایی بەهێزکراون، پارێزراون و بەردەوام بوون.
لە بەشێکی دیکەی پەیامەکەیدا ئاماژەی بەوەکردوە، ئەمە تۆڕێکی زۆر ئاڵۆز و بە ئەنقەست دروستکراوە، کە بۆ ماوەی زیاتر لە دوو دەیەیە چالاکە و بە سەرکەوتوویی رێساکان، چوارچێوەکانی پابەندبوون و میکانیزمەکانی وردبینی نێودەوڵەتی بڕیوە.
ساڤایا، نوسیویشیەتی؛ هەر هەوڵێکی جددی بۆ سەقامگیرکردنی عیراق، گێڕانەوەی سەروەری و هەڵوەشاندنەوەی گروپە چەکدارەکان، دەبێت بە هەڵوەشاندنەوەی تۆڕەکانی گەندەڵی دەست پێبکات، کە پارەیان بۆ دابین دەکەن و دەیانپارێزن و ئەو سەرچاوانەی پەرەی زۆری گەندەڵی کۆدەکەنەوە وەک لیستی مووچەی ساختە، قەرزی ساختە و دارایی خەیاڵی دەبێت بوەستێنرێت و لەناوببردرێن، ئەگەرنا هەموو هەوڵێکی تر شکست دەهێنێت.
نوسینگەی راگەیاندنی سەرۆک وەزیرانی عیراق، بڵاویکردوەتەوە، محەمەد شەیاع سودانی پەیوەندییەکی تەلەفۆنی لەگەڵ فەرماندەی گشتی هێزەکانی سوریای دیموکرات "هەسەدە" ئەنجامدا و تێیدا نوێترین رەوشی سوریا و روداوە ئەمنییەکانیان تاوتوێ کرد.
وەک لە راگەیەندراوەکەی سەرۆک وەزیراندا هاتووە؛ لە میانەی پەیوەندییەکەدا لە ژێر رۆشنایی پێشهات و روداوە ئەمنییەکانی ئەم دواییەدا رەوشی ئاسایش و سەقامگیری ناوچەکە و بارودۆخی عیراقیان تاوتوێ کرد.
سودانی جەختی کردوەتەوە لە پێویستی چەسپاندنی گفتوگۆ لەم قۆناغە گرنگەدا، بە شێوەیەک مافی هەموو پێکهاتەکانی سوریا دەستەبەر بکات و یەکڕیزی و ئاسایشی وڵات بپارێزێت.
هەروەها رێگری بکرێت لە هەڵاتنی تیرۆریستان لە زیندانەکان و تێکدانی ئاسایش و سەقامگیری سوریا و عیراق بەتایبەتی و تەواوی ناوچەکە بە گشتی.