عیراق
بەهۆی ئەنجامدانی چەند خۆپێشاندانێكی جیاواز، هاتوچۆ و رەوشی ئەمنیی لە شەقامەكانی بەغداد بەشیوەیەكی بەرچاو كێشەی بۆ دروستبووە.
پەیامنێری كوردسات نیوز لە بەغداد رایگەیاند: ئەمڕۆ پزیشكانی گرێبەستی ساڵانی 2022 تا 2025 بەهۆی پێنەدانی موچە مانگرتنی سەرتاسەرییان راگەیاند و لە بەردەم نەخۆشخانەی كندی گردبوونەوە، هاوکات خاوەن مۆلیدە ئەهلییەكانیش لە دژی دابین نەكردنی بەشەگازی پاڵپشتیكراو لە لایەن حكومەتەوە رژانە سەر شەقام.
لە ناوچەی سەوزیش چەندین خۆپێشاندانی جیاواز بەڕێوەچوون، كارمەندانی پێشووی پۆلیس و دژەتیرۆر داوای گەڕانەوەیان بۆسەر كارەكانیان كرد كە بە بڕیاری حكومەت دورخراونەتەوە، كەسوكاری دەستگیركراوانیش ناڕەزاییان دژی جێبەجێ نەكردنی یاسای لێبوردنی گشتی دەربڕی، كەسوكاری قوربانیانی كۆمپانیای ماریۆی فەرەنسیش خۆپیشاندانێكیان كرد بەهۆی ئەوەی لە ساڵانی هەشتاكان، ئەو كۆمپانیا فەڕەنسییە بەهۆی دابینكردنی دەرزییەكی هەڵە بۆ وەزارەتی تەندروستی عیراق بە ناوی دەرزی گرانەتاوە، بووەتە هۆی تووشبوونی نزیكەی 100 كەس بە ڤایرۆسی ئایدز كە تا ئێستاش كاریگەری لەسەر كەسوكاری قوربانیان هەیە و داوای جێبەجێكردنی بڕیاری قەرەبووكردنەوە دەكەن كە لەلایەن حكوومەتەوە دەركراوە.
نووسینگەی راگەیاندنی سەرۆک وەزیران لە راگەیەندراوێکدا بڵاوی کردەوە، سەرۆکی ئەنجومەنی وەزیران عەلی زەیدی، دوای کۆتاییهاتنی سەردانە رەسمییەکەی بۆ فەڕەنسا، رووی لە بەرلینی پایتەختی ئەڵمانیا کرد.
نووسینگەکە ئاماژەی بەوەش دا: سەردانەکەی سەرۆک وەزیران بۆ فەڕەنسا دیدار و کۆبوونەوەی لەگەڵ ئێمانوێل ماکرۆن سەرۆکی فەڕەنسا و بەڕێوەچوونی مەراسیمی ئیمزاکردنی شەش یاداشتی لێکتێگەیشتن و هاوکاریی لەخۆگرت.
وەزارەتی پەروەردەی عیراق بڕیاری دا دەستپێکردنی ساڵی نوێی خوێندنی (2026-2027) دواپاش بخات بۆ رۆژی یەکشەممە، 11ی تشرینی یەکەمی 2026، لە شوێنی ژوانی پێشوو کە 20ی ئەیلوول بوو.
بەپێی گشتاندنێکی فەرمیی بەڕێوەبەرایەتیی گشتیی پەروەردەی گشتی و ئەهلی و بێگانە کە رەزامەندیی وەزیری لەسەرە، هۆکاری دواخستنەکە دەگەڕێتەوە بۆ تەواوکردنی رێکارەکانی تاقیکردنەوەکانی خولی دووەمی پۆلە کۆتایی نەهاتووەکان (ناپۆل)، لەگەڵ ئامادەکاریی تەواو بۆ ساڵی نوێی خوێندن و بەرزبوونەوەی پلەکانی گەرما لەم ماوەیەدا.
وەزارەتی نەوتی عیراق ئاماژە بەوە دەکات کە پابەندە بە دابینکردنی تەواوی پێداویستیی ناوخۆ لە بەرهەمە نەوتییەکان و پڕکردنەوەی هەر کەلێنێک لە رێگەی هاوردەکردنی بڕی زیاتر لە دەرەوە.
سەلیم رکابی، وتەبێژی وەزارەتی نەوتی عیراق لە لێدوانێکدا بۆ رۆژنامەی رەسمی رایگەیاند: کۆبونەوەی زیاتر کراوە بۆ دابینکردنی بارەگۆڕی نوێ لە هەردوو بەرهەمی بەنزین و گازاویل، پێشبینیش دەکرێت تا کۆتایی ئەم هەفتەیە ئەو بارانە بگەن، بە مەبەستی زیادکردنی بڕی بەردەست لە بازاڕەکاندا و وەڵامدانەوەی داواکارییە روو لە زیادبووەکان.
وتەبێژی وەزارەت روونیشی کردەوە، ئەم رێکارانە لە چوارچێوەی پلانی وەزارەتدان بۆ دەستەبەرکردنی بەردەوامیی دابینکردنی سووتەمەنی بەپێی ئاستی راستەقینەی داواکاری و بەکاربردن.
جەختیشی کردەوە: وەزارەت بەردەوامە لە بەدواداچوون بۆ ئاستی بەرهەمهێنانی ناوخۆ و پڕکردنەوەی هەر کەمییەک لە رێگەی هاوردەکردن لە کاتی پێویستدا، بە شێوازێک کە تەواوی وەڵامی پێداویستییەکانی هاوڵاتییان بداتەوە.
دوو زانکۆی عیراقی دەچنە نیو ریزبەندیی جیهانیی شەنگهای بۆ پسپۆڕییە ئەکادیمییەکان
وەزارەتی خوێندنی باڵا ئەمڕۆ سێشەممە رایگەیاند کە دوو زانکۆی عیراقی چوونهتە ناو ریزبەندیی شەنگهای بۆ پسپۆڕییە ئەکادیمییەکان.
حەیدەر عەبد زەهد، بریکاری وەزارەتەکە لە راگەیەندراوێکدا باسی لەوە کرد کە چوونی دوو زانکۆی عیراقی بۆ ناو ریزبەندیی جیهانیی شەنگهای دەستکەوتێکی ئەکادیمیی گرنگە و دەربڕی هەوڵە بەردەوامەکانە بۆ بەرزکردنەوەی ئاستی زانکۆکانی عیراق و بەهێزکردنی ئامادەییان لە گۆڕەپانی ئەکادیمیی نێودەوڵەتیدا.
بریکاری وەزارەت ئاماژەی بەوەش دا کە ئەم دەستکەوتە بەرهەمی روانگەی زانکۆ عیراقییەکانە بەرەو کوالێتی و جیاوازی و کێبڕکێی جیهانی، هاوکات وەرگێڕانی کرداریی هەوڵی سەرکردایەتیی زانکۆکان و مامۆستایان و توێژەرانە لە دروستکردنی دامەزراوەی ئەکادیمیی شیاو بۆ ئامادەیی و کێبڕکێ لەسەر ئاستی نێودەوڵەتی.
سەبارەت بە پسپۆڕییەکان، روونیکردەوە لە بواری توێژینەوەدا، زانکۆی عەینی عیراقی لە پسپۆڕیی (ئەندازیاری / سەرچاوەکانی ئاو) و زانکۆی وارسی ئەنبیا لە پسپۆڕیی (زانست و ئەندازیاریی وزە) چوونهتە ناو ریزبەندەکەوە.
ئەم ریزبەندییە پشت بە نۆ پێوەری زانستی و ئەکادیمی دەبەستێت کە زانیارییەکانی لە ماڵپەڕی(ماڵپەڕی وێب ئۆف ساینس / کلاریڤەیت وەردەگرێت؛ کە یەکێکە لە دیارترین و باوەڕپێکراوترین سەرچاوەکانی زانیاریی زانستی لە ڕووی وردییەوە.
جەختیشی لەسەر گرنگیی بەردەوامیی هەوڵە توێژینەوەیی و ئەکادیمییەکان کردەوە بۆ بەهێزکردنی زیاتری پێگەی زانکۆ عیراقییەکان لە ریزبەندییە جیهانییەکاندا.
بەسەرپەرشتیی سەرۆک وەزیرانی عیراق و سەرۆکی فەڕەنسا، دوێنێ دووشەممە، لەکۆشکی ئێلیزێ لە پاریس ئیمزاکردنی شەش یاداشتی لێکتێگەیشتن ئیمزاکران لە نێوان عیراق و فەڕەنسا لە بواری جیاجیا و کەرتی ئابووریی هاوبەشدا.
نووسینگەی راگەیاندنی سەرۆک وەزیران لە راگەیەندراوێکدا یاداشتەکانی لێکتێگەیشتنی نێوان عیراق و فەڕەنسای بەم شێوەیەی خوارەوە خستەڕوو:
١. ئاڵوگۆڕی نیەتپاکی لە نێوان وەزارەتی بەرگریی عیراق و کۆمپانیای هێرمتان بۆ ژیریی دەستکرد: سەبارەت بە هاوکاریی ستراتیجی لە بواری بەرگریی ئاسمانیدا.
٢. راگەیاندنی نیەتپاکی لە نێوان وەزارەتی بەرگریی عیراق و وەزارەتی سوپاکانی فەڕەنسا: سەبارەت بە دابینکردنی کەلوپەلی سەربازیی فەڕەنسی لە چوارچێوەی ئاوەدانکردنەوە و گەشەپێدانی تواناکانی بەرگری لە عیراق.
٣. راگەیاندنی نیەتپاکی بۆ هاوبەشی لە بواری بەهێزکردنی دەرفەتەکانی گەنجان و توێژینەوە و داهێنان: لە نێوان وەزارەتی دەرەوەی عیراق و وەزارەتی ئەوروپا و کاروباری دەرەوەی فەڕەنسا.
٤. راگەیاندنی نیەتپاکی لە نێوان وەزارەتی دەرەوەی عیراق و هاوتا فەڕەنسییەکەی: سەبارەت بە بەهێزکردنی هاوبەشی لەگەڵ ئاژانسی گەشەپێدانی فەڕەنسی (AFD).
٥. پرۆتۆکۆلی هاوکاریی تایبەت بە گرێبەستی دابینکردن و فرۆشتنی غاز: لە نێوان وەزارەتی کارەبا و کۆمپانیای تۆتاڵ ئینێرجیز.
٦. راگەیاندنی نیەتپاکی و هاوکاری لە بواری فڕۆکەوانیی مەدەنی: لە نێوان وەزارەتەکانی گواستنەوەی عیراق و فەڕەنسا.
سەرۆک کۆماری عیراق لە کۆبوونەوەیدا لەگەڵ وەزیری کشتوکاڵ و سەرچاوەکانی ئاوی حکومەتی هەرێمی کوردستان، جەختی لە گرنگیی بەهێزکردنی هەماهەنگیی نێوان حکومەتی فیدڕاڵ و حکومەتی هەرێم لە دۆسیەکانی کشتوکاڵ و ئاودا کردەوە.
نزار ئامێدی، سەرۆک کۆماری عیراق، ئەمڕۆ دووشەممە، پێشوازی لە بێگەرد تاڵەبانی، وەزیری کشتوکاڵ و سەرچاوەکانی ئاوی حکومەتی هەرێمی کوردستان و وەفدی یاوەری کرد.
لە دیدارەکەدا تیشک خرانە سەر کۆمەڵێک دۆسیەی تایبەت بە کەرتی کشتوکاڵ و سەرچاوەکانی ئاو. سەرۆک کۆمار ئاماژەی بەوە دا: گۆڕانکارییەکانی کەشوهەوا، کەمبوونی ئاو و کەمیی بارانبارین بوونەتە ئاستەنگی راستەقینە لەبەردم کەرتی کشتوکاڵدا، جەختیشی کردەوە لەسەر پێویستیی پەیڕەوکردنی پلانی بەردەوام بۆ بەڕێوەبردنی سەرچاوەکانی ئاو و گەشەپێدانی شێوازەکانی کشتوکاڵ بە مەبەستی رووبەڕووبوونەوەی ئەو گۆڕانکارییانە و پاراستنی ئاسایشی خۆراک و ئاو لە وڵاتدا.
لە بەرانبەردا، بێگەرد تاڵەبانی دۆخی کەرتی کشتوکاڵ و سەرچاوەکانی ئاوی لە هەرێمی کوردستان و گرنگترین پێداویستییەکانی خستەڕوو، جەختیشی لە گرنگیی بەردەوامیدان بە دیدار و هەماهەنگییەکان لەسەر دۆسیە هاوبەشەکان کردەوە.
لە بڕیارێکی نوێی دادگادا و بە تۆمەتی زیادکردنی سەروەت و سامان بە شێوەیەکی نایاسایی، دادگای تاوانەکانی بەرەنگاربوونەوەی گەندەڵی سزای حەوت ساڵ زیندانیکردنی بۆ بەڕێوەبەری گشتیی کۆمپانیای دابەشکردنی کارەبای ناوەڕاست دەرکرد و پابەندیشی کرد بە گەڕاندنەوەی زیاتر لە 25.7 ملیار دینار بۆ خەزێنەی دەوڵەت.
بەپێی راگەیەندراوێکی دەستەی دەستپاکی، دادگای تایبەت بە تاوانەکانی بەرەنگاربوونەوەی گەندەڵی سزای حەوت ساڵ زیندانیکردنی بۆ سزادراو (عەلاء سەمیر راشد) دەرکردووە، بەپێی ماددەی (19/دووەم) لە یاسای دەستەی دەستپاکی و دەستکەوتی ناڕەوا (ژمارە 30ی ساڵی 2011ی هەموارکراو).
لە بڕیاری دادگاکەدا هاتوو، سزادراوەکە پابەند کراوە بە گەڕاندنەوەی (پێنج ملیار و 524 ملیۆن و 135 هەزار دیناری عیراقی) لەگەڵ (پێنج ملیۆن و538 هەزار و 593 دۆلاری ئەمریکی)، جگە لە سەپاندنی سزایەکی دارایی بە هەمان بڕ، کە بە کۆی گشتی هەردوو بڕەکە دەکاتە 25.7 ملیار دینار.
دەستەکە ئاماژەی بەوەش کردووە، بڕیاری دادگا پشتڕاستکردنەوەی دەستبەسەرداگرتنی گشت ئامراز و مڵکە گوازراوە ونەگوازراوەکانی سزادراوەکەی لەخۆگرتووە، لەگەڵ بەخشینی ماف بە دەستەی دەستپاکی بۆ داواکردنی قەرەبووکردنەوە لە زیانەکان دوای یەکلا بوونەوەی کۆتایی بڕیاری دادگا.
روانگەیەكی عیراق هۆشداری دەدات لەبەردەوامی خوێندنی خوێندكاران لە خوێندینگا قورنیەكان لە پارێزگای سەڵاحەدین و زیقار.
روانگەی ئێكۆ عیراق لە راگەیەنراوێكدا ئاشكرایكرد: عیراق پێویستی بە زیاتر لە 10هەزار خوێندنگای نوێ هەیە بۆ رووبەڕووبوونەوەی قەرەباڵغیی نێو پۆلەكان و چاككردنی ژینگەی خوێندن، لەگەڵ هەشت هەزار خوێندنەی تر بۆی خوێندن لە خوێندنگەكاندا بكرێتە یەك دەوامی.
هاوكات ئاشكرایكرد، 200 خوێندنگای قوڕین لە پارێزگای سەڵاحەدین و زیقار هێشتا لە كاردان و خوێندكارەكان لەسەر خاكەكەی دادەنیشتن بۆ خوێندن، ئەمە جگە لەوەی 800 خوێندكار لە كەرڤانەدا دەخوێن، روانگەكە هۆشداری داوە لەوەی ئەو ژینگانە كاریگەری نەرێنی لەسەر تەندروستی و دەرونی ئەو خوێندكارانە دەبێت.
روانگەكە ئاماژی بەوەشكردوە، زیاتر لە 40 هەزار قوتابخانە لە سەرانسەری عیراقدا هەن، بەڵام ئەو ژمارەیە بەشی پێداویستییە راستەقینەكان ناكات،
لە كۆتاییدا، روانگەكە راشیەیاندوە، وەزارەتی پەروەردەی عیراق و هەوڵەكانی چڕ كردووە بۆ چارەسەركردنی رەوشی قەرەباڵغی پۆلەكان و باشتركردنی ژینگەی پەروەردەیی لە وڵاتدا.
وەزارەتی تەندروستیی عیراق ئاماری کۆتایی روداوی دزەکردنی غازی ئامۆنیای لە کارگەیەکی پارێزگای بەسڕە راگەیاند و ئاشکرای کرد، بەهۆی روداوەکەوە دوو کەس گیانیان لەدەستداوە و 114 کەسی تریش بریندار بوون.
بەپێی راگەیەندراوێکی وەزارەتی تەندروستی: تەواوی برینداران فریاگوزاریی سەرەتاییان بۆ کراوە و خزمەتگوزارییە پزیشکییە پێویستەکانیان پێشکەش کراوە.
هەروەها ئاماژە بەوە کراوە: بە راسپاردە و بەدواداچوونی راستەوخۆی دکتۆر عەبدولحوسێن موسەوی، وەزیری تەندروستی، چاودێریی دۆخی برینداران دەکرێت.
وەزارەتەکە ئەوەشی خستۆتە روو کە زیاتر لە 50 ئۆتۆمبێلی فریاکەوتن ئاڕاستەی شوێنی روداوەکە کراون بۆ پێشکەشکردنی یارمەتیی سەرەتایی و گواستنەوەی برینداران بۆ مەڵبەند و بنکە تەندروستییەکان.
رونیشی کردەوە کە تاوەکو ئێستا 21 بریندار لە نەخۆشخانەکاندا ماونەتەوە و بەسەر نەخۆشخانەکاندا دابەش بوون؛ 12 بریندار لە نەخۆشخانەی زوبێر، دوو بریندار لە نەخۆشخانەی سەیاب، و 7برینداریش لە نەخۆشخانەی کوەیتی.
وەزارەتی تەندروستی جەختی کردەوە: دۆخی تەندروستیی هەموو بریندارەکان جێگیرە بە بێجگە لە یەک دۆخ، و پرۆسەی پێشکەشکردنی چاودێریی پزیشکی و بەدواداچوون بۆ تەندروستیی برینداران بەردەوامە.
نوسینگەی سەرۆك وەزیرانی عیراق رایگەیاند، زەیدی لە فەرەنسا و ئەڵمانی چەند یاداشتێك لە بواری وزە و ئاسایش و چەند كەرتێكی تر ئیمزا دەكات.
بەپێی راگەیەنراوێكی نوسینگەی سەرۆك وەزیرانی عیراق، عەلی زەیدی لەسەر بانگهێشتی حكومەتی ئەڵمانیا و فەرەنسا دەكات و بە سەرۆكایەتی وەفدێكی باڵا گفتوگۆ لەگەڵ هەردوو لایەنی فەرەنسی و ئەڵمانیدا دەكات.
دەشڵێت، ئەم سەردانە لە چوارچێوەی هەوڵەكان و سیاسەتی حكومەتدایە بۆ پەرەپێدانی پەیوەندییە نێودەوڵەتییەكان و فراوانكردنی ئاسۆی هاوبەش لەگەڵ فەرەنسا و ئەڵمانیا لە كەرتی وزە و ئاسایش و گواستنەوە و بوارە گرنگەكانی تردا.
راشیگەیاند، زەیدی لەگەڵ ئیمانوێل ماكرۆن سەرۆكی فەرەنسا و فرێدریك مێرتس راوێژكاری ئەڵمانیا كۆدەبێتەوە بۆ تاوتوێكردنی چەندین دۆسیە و پرسێكی هەرێمیی و نێودەوڵەتیی هاوبەش.
نوسینگەی زەیدی ئاماژە بەوەدەكات، وەفدی عیراق بەشداری لە گفتوگۆ فراوانەكاندا دەكات بۆ پتەوكردنی هاوبەشی ئابوری لە سایەی ئالنگارییەكانی ناوچەكە و جیهان و لە سەردانەكەدا چەندین یاداشتنامەی لێكتێگەیشتن لە چەند بوارێكدا ئیمزا دەكرێت.
بەڕێوەبەرایەتیی هەواڵگریی سەربازی، ئەمڕۆ یەکشەممە، دەستگیرکردنی تیرۆریستێک بە ناوی (ئەبو ساهیر)، کە یەکێکە لە سەرکردە دیارەکانی رێکخراوی تیرۆریستی داعش لە کەرکوک راگەیاند.
بەڕێوەبەرایەتییەکە لە راگەیەندراوێکدا بڵاویکردەوە، ئەمڕۆ یەکشەممە، لە ئۆپراسیۆنێکی پێشوەختە و ورددا، توانرا یەکێک لە تیرۆریستە داواکراوەکان بەپێی ماددەی (4/1) لە یاسای بەرەنگاربوونەوەی تیرۆر دەستگیر بکرێت، کە بە (ئەبو ساهیر) ناسراوە و لەلایەن دەزگا ئەمنییەکانەوە بە ئامانجێکی ئاستبەرز و گرنگ هەژمار دەکرا.
ئاماژەی بەوەش کرد، دەستگیرکردنی ناوبراو دوای بەدواداچوونی چڕی هەواڵگری هات، کە بووە هۆی دەستنیشانکردنی شوێنی خۆحەشاردانی لە ناحیەی (یایچی) لە پارێزگای کەرکوک، و پرۆسەی هەڵکوتانە سەر شوێنەکە بە هەماهەنگی لەنێوان بەشی هەواڵگریی فیرقەی هەشت و هۆبەی هەواڵگریی یایچی ئەنجامدرا.
لە بەشێکی تری راگەیەندراوەکەدا هاتوو، زانیارییە هەواڵگرییەکان ئاماژە بەوە دەکەن کە تیرۆریستە دەستگیرکراوەکە چەندین پۆستی لەوەی پێی دەوترا "ویلایەتی عیراق" وەرگرتووە؛ لەوانە کارکردن لە "فیرقەی یەرمووک" لە پارێزگای ئەنبار لە سنووری سەقڵاویە، جگە لە وەرگرتنی بەرپرسیاریەتی لەوەی پێی دەوترا "دیوانی خزمەتگوزارییەکان" لە سەردەمی دەسەڵاتی چەکدارانی داعش لە بەشێک لە ناوچەکانی ئەنبار.
سەرباری ئەوەش، جەخت کراوەتەوە کە رێکارە یاساییە پێویستەکان بەرانبەر تۆمەتبارەکە گیراونەتە بەر بە مەبەستی رەوانەکردنی بۆ دادگا بەپێی یاسا بەرکارەکان.
فالح ساری، وەزیری دارایی عیراق ئەمڕۆ یەکشەممە رایگەیاند، لە چوارچێوەی رێکارەکانی وەزارەت بۆ یەکلاکردنەوەی قەرزە داراییەکانی سەر دەوڵەت بۆ کەرتی ک کشتوکاڵ، بڕی 500 ملیار دینار لە شایستە داراییەکانی جووتیاران لەم مانگی ئەیلوولەدا خەرج دەکرێت.
وەزیری دارایی روونیکردەوە، وەزارەتەکەی بەردەوام دەبێت لە جێبەجێکردنی رێکارەکان بۆ دانانی تەواوی شایستەی دارایی جووتیاران لە مانگەکانی داهاتوودا، تاوەکو بەپێی رێکارە داراییە پەسەندکراوەکان هەموو قەرزەکان بە تەواوی سفر دەکرێنەوە.
وەزیری دارایی ئاماژەی بە گرنگی کەرتی کشتوکاڵ و رۆڵی جووتیاران دا لە پەرەپێدانی بەرهەمی ناوخۆیی و بەهێزکردنی ئاسایشی خۆراک، و جەختی کردەوە لەسەر پەرۆشی وەزارەتی دارایی بۆ دابینکردنی پێداویستییە داراییەکان بە مەبەستی بەردەوامبوونی چالاکییە کشتوکاڵییەکان.
ناوبراو وتیشی: ئەم هەنگاوانە لە چوارچێوەی رێکخستنی پرۆسەی دانەوەی شایستە داراییەکاندایە، بە جۆرێک کە بەردەوامی تەمویلکردنی پێویست بۆ وەرزەکانی کشتوکاڵ و جێگیربوونی کەرتەکە لە وڵاتدا مسۆگەر بکات.
عیراق وادەی كردنەوەی سێ دەروازەی سنووری لەگەڵ ئێران دیاری دەكات، ئەوەش دوای داخستنیان بەهۆی هێرشەكەی سەر سعودیە.
بەپێی راگەیەندراوێكی رەسمی شانەی راگەیاندنی ئەمنیی، بڕیاردراوە بە دەستپێكردنەوەی كاركردن لە سێ دەروازەی سنووری لەگەڵ ئێران كە ئەوانیش شەلامچە، مەندەلی، و شەیب بۆ هاتووچۆی گەشتیاران و بازرگانی، ئەوەش دوای تەواوكردنی پێداویستییە رێكخستنی هونەرییەكان و نوێكردنەوەی سیستەمەكانیان.
هەر بە پێی راگەیەنراوەكە، بڕیارەكە بەپێی رێنماییەكانی عەلی فاڵح زەیدی، سەرۆكی ئەنجومەنی وەزیران و فەرماندەی گشتیی هێزە چەكدارەكان دەرچووە، ئەوەش دوای پێداچوونەوە بە ڕەوشی دەروازەكان و بەهێزكردنی ئاسایش و ڕێكخستنی هاتووچۆی بازرگانی و هاووڵاتییان.
ئاماژە بەوەشكراوە، دەستیپێكرد لەو دەروازەی شەلامچە لە ئەمڕوە دەستپێدەكات ئەوانی تریش لە رۆژانی دواترەوە دەستپێدەكات، وتیشی هاتووچۆ و ئاڵوگۆڕی بازرگانی لەگەڵ لایەنی ئێرانی نەوەستان و لە دەروازەكانی زڕباتییە و مەنزرییە بەشێوەی 24 سەعاتیی بەردەوامە.
بەهۆی هێرشەكەی سەر سعودیە، فەرماندەی ئۆپراسیۆنەكان و فەرماندەی پۆلیسی پارێزگای میسان لە پۆستەكانیان دوورخرانەوە و بەڕێوەبەری هەواڵگری ئاسایشی پارێزگاكەش رەوانەی لێكۆڵینەوە كران.
سەباح نوعمان، وتەبێژی فەرماندەی گشتیی هێزە چەكدارەكانی عیراق رایگەیاند: دوای لێكۆڵینەوە دەركەوتووە هێرشە درۆنییەكەی سەر بۆری نەوتی رۆژهەڵات_ رۆژئاوای سعودیە لە سنوری پارێزگای میسانەوە ئەنجامدراوە، هەربۆیە فەرماندەی ئۆپراسیۆنەكان و فەرماندەی پۆلیسی پارێزگای میسان لە پۆستەكانیان دوورخراونەتەوە و بەڕێوەبەری هەواڵگری ئاسایشی پارێزگاكەش رەوانەی لێكۆڵینەوە كراوە.
وتیشی: بە فەرمانی سەرۆك وەزیران، عەلی عەبدولحوسێن كازمی وەك فەرماندەی فەرماندەیی ئۆپەراسیۆنەكانی میسان دەستنیشانكراوە، هەروەها سەرۆك وەزیران داواكارییەكی ئێرانی بۆ ئەنجامدانی لێكۆڵینەوەی هاوبەش لە دۆزینەوەی سەكۆی هەڵدانی فڕۆكەی بێفڕۆكەوان لە نزیك سنووری عیراق و ئێران پەسەند كردووە.
سەباح نوعمان پێزانینی عیراقی بۆ سعودیە نیشاندا كە وەڵامی ئەو هێرشەی نەداوەتەوەو داوایكرد چیتر خاك و ئاسمانی عیراق بۆ هێرشكردنەسەر وڵاتان بەكارنەهێنرێت.
سەرۆک کۆماری عیراق، بە توندی سەرکۆنەی ئەو هێرشانەی کرد کە ئەنجامدرانە سەر شانشینی عەرەبیی سعودیە و جەختی کردەوە، عیراق بە هیچ شێوەیەک رێگە نادات خاک یان ئاسمانی بۆ دەستدرێژیکردنە سەر وڵاتانی دراوسێ بەکاربهێنرێت.
نزار ئامێدی، سەرۆک کۆماری عیراق رایگەیاند، پاراستنی سەروەریی عیراق و پاراستنی پەیوەندییەکانی لەگەڵ ناوچەکە، بەرپرسیارێتیی دەوڵەت و دامەزراوە دەستوورییەکانییەتی.
هەروەها پشتیوانیی تەواوی خۆی بۆ رێکارەکانی حکومەت دەربڕی و جەختی لەسەر بەردەوامیی لێکۆڵینەوەکان و سزادانی یاسایی تەواوی ئەنجامدەرانی کردەوە تاوەکو رێگری لە دووبارەبوونەوەی ئەو جۆرە هێرشانە بکرێت.
سەرۆک کۆمار ئاماژەی بەوەشکرد، عیراق پەرۆشی پەیوەندییەکانیەتی لەگەڵ سعودیە و دەوروبەری، و هەوڵی چەسپاندنی ئاسایش و جێگیری لە ناوچەکەدا دەدات، دوور لە هەر رەفتارێک کە ئاسایشی عیراق و پەیوەندییەکانی بخاتە مەترسییەوە.