عیراق
محەمەد شیاع سودانی، بە ئامادەبوونی فەرماندە سەربازییەکانی هەرێم كۆبونەوەیەكی ئەمنی بەپەلەی ئەنجامدا و فەرمانی دا بە گرتنەبەری مامەڵەی توند لە بەرانبەر هەر هەوڵێکی دزەکردن لە سنورەکان و بەدواداچون کردن بۆ پێداویستییەکانی هێزەکانی پاسەوانی هەرێمی کوردستان.
ئەمڕۆ سێشەممە، محەمەد شیاع سودانی، فەرماندەی گشتی هێزە چەکدارەکان عیراق، سەرۆکایەتی کۆبونەوەیەکی بەپەلەی ئەمنی کرد، بە ئامادەبوونی فوئاد حسێن، وەزیری دەرەوەو سەرکردە فەرماندە ئەمنییەکان و نوێنەرایەتی هەرێمی کوردستانی لە بەغداد و سەرۆکی ئەرکانی پاسەوانی هەرێمی کوردستان.
مەبەستی سەرەکی کۆبونەوەکە تاوتوێکردنی روداوە خێرا پەرەسەندووەکانی سوریان و ئەو ئاستەنگانی رووبەڕووی ناوچەکە دەبنەوە،.
لە کۆبونەوەکەدا سەرۆک وەزیران جەختی لە پاراستنی ئاسایشی سنورەکان کردەوە بەتایبەتی سنوری سوریا و دڵنیای دا
گروپە تیرۆریستییەکان توانای ئەنجامدانی هیچ هێرشێکیان نییە لە سنورەکان یاخود لە ناو شآرەکاندا.
ئاماژەی بەوەشکرد، فەرمانیداوە بەوەی مامەڵەیەكی توند بکرێت بۆ هەر هەوڵێکی زیان گەیاندن بە تێکدانی ئاسایشی سنورەکان .
بە گوێرەی راگەیندراوی نوسینگەی سودانی، لە کۆبونەوەکەدا فەرمانیداوە بەدواداچون بۆ پێداویستییەکانی هێزەکانی پاسەوانی هەرێمی کوردستان بکرێت و پشتیوانی تەواویان بۆ دابینبکرێت
د. لەتیف رەشید سەرۆک کۆماری عیراق پێشوازی لە محەمەد شیاع سودانی سەرۆک وەزیرانی عیراق کرد.
لە کۆبوونەوەکەدا کە ئەمڕۆ سێشەممە 20- 1- 2026 بەڕێوەچوو باس لە دوایین پێشهاتی سیاسی و ئەمنی و ئابووریی وڵات کرا، هەروەها گرنگی پەلەکردن لە پێکهێنانی حکومەت بۆ رووبەڕووبوونەوەی ئاستەنگەکانی ئێستا، بەمەش سەقامگیری و خواستی هاووڵاتیان بەدیدێت.
لەو کۆبونەوەدا جەختکرایەوە لەسەر یەکڕیزی نیشتمانی و هەنگاوی هاوبەشی نێوان هێزە سیاسییەکان بۆ دەستەبەرکردنی بەرژەوەندیی وڵات.
هەر لە دیدارەکەدا تاوتوێی دوایین پێشهاتەکانی سوریا کرا، جەختکرایەوە لە گرنگی کەمکردنەوەی گرژییەکان و کارکردن بۆ چەسپاندنی ئاسایش و سەقامگیری لە سەرتاسەری وڵات و پاراستنی مافی هەموو پێکهاتەکانی گەلی سوریا، بەم شێوەیەش پارێزگاری لە یەکڕیزی و سەروەری سوریا و دڵنیابوون لە سەلامەتی هاووڵاتیانی سوریا دەکرێت.
هەر لەو کۆبونەوەیەدا جەختکرایەوە لەسەر پێویستی پاڵپشتیکردنی هەوڵە سیاسی و دیپلۆماسییەکان بە ئامانجی دۆزینەوەی چارەسەرێکی هەمەلایەنە بۆ قەیرانەکە، چارەسەرێک کە ویستی گەلی سوریا بۆ ئاسایش و ئاشتی و گەشەپێدان بەدیبهێنێت و دەرفەتەکانی بوژانەوە و ئاوەدانکردنەوە برەخسێنێت.
سەرۆک کۆماری عیراق لەگەڵ راوێژکاری ئاسایشی نیشتیمانی و سەرۆکی دەزگای هەواڵگری پەرەسەندنەکانی بارودۆخی سوریای تاوتوێ کرد.
د.لەتیف رەشید، سەرۆک کۆماری عیراق، ئەمڕۆ لە بەغداد، پێشوازیکرد لە قاسم ئەعرەجی، راوێژکاری ئاسایشی نیشتمانی و حەمید شەتری، سەرۆکی دەزگای هەواڵگری نیشتمانی.
لە دیدارەکەدا باس لە بارودۆخی ئەمنیی وڵات و پەرەسەندنەکانی سوریا کرا.
سەرۆک کۆمار جەختی لە پێویستی پەنابردن بۆ گفتوگۆ کردەوە بۆ کەمکردنەوەی ئاڵۆزییەکان و کۆنترۆڵکردنی قەیرانەکە، هەروەها جەختی لە گرنگی دابینکردنی پاراستن بۆ هاووڵاتیانی مەدەنی کردەوە.
سەرۆک کۆمار ئیدانەی ئەو تاوانانەی کوشتنی کرد کە رێکخراوە تیرۆریستییەکان دژی هاووڵاتیان ئەنجامیان داوە، لەگەڵ پێشێلکردنی مافەکانی مرۆڤ لەلایەن ئەو رێکخراوانەوە.
داواشی لە کۆمەڵگەی نێودەوڵەتی کرد کە بەرپرسیارێتییەکانی خۆی لە ئەستۆ بگرێت و هەنگاو بنێت بۆ راگرتنی کردەوەکانی توندوتیژی و تیرۆر لە سوریا و دابینکردنی پاراستنی پێویست بۆ مەدەنییەکان.
د. لەتیف رەشید سەرۆک کۆماری عیراق، ئەمڕۆ سێشەممە 20ـی کانونی دووەم 2026، لە کۆشکی بەغداد، پێشوازیکرد لە عەبدولعەزیز ئەلشەمەری، باڵیۆزی عەرەبستانی سعودی لە عیراق.
لەمیانەی دیدارەکەدا باس لەپەیوەندییە دووقۆڵییەکانی نێوان هەردوو وڵات و چۆنیەتی پتەوکردنیان لەبوارە جیاجیاکاندا لەگەڵ تاوتوێکردنی کۆمەڵێک بابەتی جێی بایەخی هاوبەش.
هەروەها گفتۆگۆ لەبارەی پێشهاتە هەنوکەییەکانی ئێستای ناوچەکە و جیهان بەتایبەتی دوایین پێشهاتەکانی سوریا کرا، سەرۆک کۆمار جەختی لە پێویستی رەچاوکردنی دیالۆگ و هێورکردنەوەی قەیرانەکە و مسۆگەرکردنی پاراستنی هاووڵاتیانی سیڤیل کردەوە، هاوکات بەڕێزیان دوپاتی لەگرنگی پشتیوانیکردنی هەوڵەکان کردەوە بەئامانجی گەیشتن بەسەقامگیری و یەکپارچەیی خاکی سووریا و پاراستنی مافی سەرجەم پێکهاتەکان.
سەرۆک کۆمار جەختی لەوە کردەوە کە عیراق بەردەوامە لە رووبەڕووبوونەوەی رێکخراوی تیرۆریستی داعش بە شێوەیەک کە بەشدار بێت لە پاراستنی دەستکەوتە بەدەست هاتووەکان و ئاماژەشی بەوەدا که ئەو رێکخراوه تیرۆریستیه مەترسیی بۆ سەر ئاسایش و سەقامگیری ناوچەکه دروست دەکات و داوای گرنگی بەهێزکردنی هاوکاری ئەمنی و هه واڵگریی لەو بارەیەوه کرد.
لەلای خۆیەوە باڵیۆزی سعودی سوپاس و پێزانینی خۆی بۆ پەرۆشی سەرۆک کۆمار دەربڕی بۆ پەرەپێدانی هاریکاری دووقۆڵی لەبوارە جیاجیاکاندا، هاوکات دووپاتی لە پاڵپشتی عەرەبستانی عەرەبی بۆ هەموو ئەو دەستپێشخەرییانەی بەئامانجی گەیشتن بەسەقامگیری لەناوچەکەدا کردەوە.
وەزارەتی بەرگری عیراق وەرگرتنەوەی تەواوەتی بنكەی سەربازیی عەین ئەسەدی لە رۆژئاوای ئەنبار لەدوای كشانەوەی هێزەكانی هاوپەیمانان راگەیاند.
وەزارەتی بەرگری عیراق لە راگەیەنراوێكدا ئاماژەی بۆ ئەوەكردووە، لیوا عەبدولئەمیر یارەڵا سەرۆك ئەركانی سوپای عیراق سەرپەرشتی دابەشكردنی لق و پێكهاتە جیاوازەكانی بنكەی ئاسمانی عەین ئەسەدی كردووە بەسەر هێزە ئەمنییەكانی عیراق، لەگەڵ دیاریكردنی ئەركەكانیان، ئەوەش دوای كشانەوەی هێزەكانی ئەمریكا و هاوپەیمانان لە بنكەكە و وەرگرتنەوەی بەشێوەی تەواوەتی لەلایەن سوپای عیراقەوە.
لە راگەیەنراوەكەدا ئاماژە بەوەشكراوە، پاش گەیشتی وەفدی وەزارەتەكان بۆ بنكەكە، جەختكراوەتەوە لەسەر ئەوەی كە پێویستە وەك تیمێكی یەكگرتوو كار بكەن و ئەركەكانیان دابەشبكەن، بە شێوەیەك كە ئاسایش و پاراستنی بنكەی ئاسمانی عەین ئەسەد مسۆگەر بكرێت، ئەوەش بۆ ئەوەی بتوانن سود وەربگرن لە تواناكان و شوێنی ستراتیژییەكەی ئەو بنكەیە.
میدیا عیراقییەکان بڵاویانکردوەتەوە، بەرەبەیانی ئەمرۆ مارک ساڤایا، نوێنەری تایبەتی سەرۆکی ئەمریکا بۆ کاروباری عیراق گەیشتە هەولێر و هاتنەکەی هاوکاتە لەگەڵ کاتی کۆبونەوەکەی تۆم باراک و مەزڵوم کۆبانێ لە هەولێر.
لە دوایین لێدوانەکانیدا ساڤایا رایگەیاندبوو لەگەڵ "بڕیاردەرانی دروست" لە عیراق کاردەکات و جەختیکردوەتەوە لەسەر کارکردن بە کردەوە نەک تەنها قسەکردن.
هاتنی ساڤایا لە کاتێکدایە، بڕیارە ئەمڕۆ تۆم باراک، نوێنەری ترەمپ بۆ سوریا بگاتە هەولێر و لەگەڵ مەزلوم کۆبانێ، فەرماندەی هێزەکانی سوریای دیموکرات کۆببێتەوە و مەبەست لە کۆبونەوەکەش بە ئامانجی کەمکردنەوەی پێکدادانەکانی سوریایە و هێورکردنەوەی رەوشەکەیە.
د. لەتیف رەشید، سەرۆک کۆماری عیراق بەهۆی کۆچی دوایی هادی حوسێنی سیستانی، سەرەخۆشی خۆی ئاڕاستەی ئایەتوڵا عەلی سیستانی دەکات و دەڵێت: کۆچکردوو ژیانی خۆی تەرخان کرد بۆ خزمەتکردنی ئاینەکەی، ئەو زانایەک بوو، لە ژێر دەستی زانایانی ناودار و گەورە خوێندوویەتی و لە هەگبەی پڕ لە زانستیدا، زۆرێک لە کەسایەتییە دیارەکان لێوەی فێربوون.
دەقی پەیامەکەی سەرۆک کۆماری عیراق...
بەناوی خودای گەورە و میهرەبان
سەماحەتی ئایەتوڵڵا سەید عەلی حوسێنی سیستانی، سایەو سێبەرت پڕ بەرەکەت بێت
سڵاو و سەلامی خودای گەورەتان لێ بێت. بە خەمێکی قووڵ و ناسۆرەوە هەواڵی کۆچی دوایی ئایەتوڵڵا سەید هادی حسێنی سیستانیمان پێگەیشت، ڕۆحی شاد بێت و خودای گەورە گیانی ئارام و بەربەزەیی خۆی بخات. کۆچکردوو ژیانی خۆی تەرخان کرد بۆ خزمەتکردنی ئاینەکەی، ئەو زانایەک بوو، لە ژێر دەستی زانایانی ناودار و گەورە خوێندوویەتی و لە هەگبەی پڕ لە زانستیدا، زۆرێک لە کەسایەتییە دیارەکان لێوەی فێربوون و لە زانستەکەی سوودمەند بوون، هاوکات جێپەنجەیەکی زانستی نەسراویان لەسەر ئایین و ئەکادیمی و قوتابخانە ئاینییەکان بەجێهێشتوە.
لەم کۆستە گەورەدا، لە خودای مەزن دەپاڕێینەوە کە سەبووری و دڵنەوایی بە ئێوە و بنەماڵە بەڕێزەکەت ببەخشێت، و بە بەهەشتی بەرین شاد بکات.
إنا لله وإنا إليه راجعون
د.لەتیف جەمال ڕەشید،
سەرۆک کۆمار
مارک ساڤایا، نێردەی دۆناڵد ترەمپ بۆ عیراق رایگەیاند، لە کۆشکی سپی کۆبوونەوەیەکی لەگەڵ وەزیری جەنگ و بەڕێوەبەری دژە تیرۆر ئەنجامداوە و لە سەردانەکەیدا بۆ بەغداد لەگەڵ "بڕیاربەدەستانی راستەقینە" کۆدەبێتەوە.
ساڤایا لە پەیامێکدا ئاماژەی بەوەکردووە، ئەمڕۆ لە کۆشکی سپی لەگەڵ پیت هێگسێس، وەزیری جەنگ و د. سباستیان گۆرکا، بەڕێوەبەری دژە تیرۆر کۆبووەتەوە و رێککەوتوون لەسەر ئەوەی ئەو پرسە گرنگانەی باسیان لێوە کردووە، لە سەردانە چاوەڕوانکراوەکەیدا بۆ عیراق چارەسەر بکرێن.
جەختیشی کردووەتەوە کە لەو سەردانەدا "لەگەڵ بڕیاربەدەستانی راستەقینە کۆدەبێتەوە بۆ رووبەڕووبوونەوەی دۆخی مەیدانی لەپێناو بەرژەوەندیی گەلی عیراق".
نێردەکەی ترەمپ لە کۆتایی پەیامەکەیدا دروشمەکەی دووپات کردووەتەوە و دەڵێت: "با عیراق جارێکی تر مەزن بکەینەوە".
سەرۆک کۆمار رایگەیاند، قۆناغی ئێستا پێویستی بە هەوڵی هاوبەش هەیە بۆ پاراستنی سەقامگیری سیاسی و ئابووری و ئەمنی لە وڵاتدا.
د. لەتیف ڕەشید سەرۆک کۆماری عیراق لەگەڵ شێخ هومام حەمودی، سەرۆکی ئەنجومەنی باڵای ئیسلامی عێراق کۆبووەوە.
لە کۆبوونەوەکەدا، چەندین بابەت تاوتوێ کرا، لە هەمووی گرنگتر پێکهێنانی حکومەتێک کە توانای جێبەجێکردنی خواستەکانی گەلی عێراق و پاراستنی سەروەری و سەقامگیری وڵاتی هەبێت.
سەرۆک کۆمار جەختیکردەوە لە گرنگی جێبەجێکردنی مەرجە دەستوورییەکان لە ماوەی دیاریکراو و کارکردن بۆ پێکهێنانی حکومەتێکی نیشتمانی بە پێی بڕگەکانی دەستوور و ڕوونیشی کردەوە کە قۆناغی ئێستا پێویستی بە هەوڵی هاوبەش هەیە لەلایەن هەموو لایەنەکان بۆ پاراستنی سەقامگیری سیاسی و ئابووری و ئەمنی لە وڵاتدا.
لای خۆیەوە شێخ هومام حەمودی پێزانینی خۆی نیشاندا بۆ ویستی سەرۆک کۆمار سەبارەت بە سەقامگیری لە هەموو بوارەکاندا و هەوڵەکانی ئەنجومەنی باڵای دووپاتکردەوە بۆ تێپەڕاندنی ئاستەنگەکانی بەردەم پێکهێنانی حکومەت و مەرجە دەستوورییەکانی داهاتوو.
دوای ئەوەی ژمارەیک میدیا بڵاویان کردەوە کە گەشتە ئاسمانییەکانی نێوان عیراق و تورکیا وەستێندراون، وەزارەتی گواستنەوە و گەیاندنی عیراق رایگەیاند، گەشتە ئاسمانییەکانی نێوان عیراق و تورکیا بەردەوامن و رانەوەستاون.
ئەمڕۆ پێنجشەممە، مەیسام ئەلسافی، وتەبێژی وەزارەتی گواستنەوە و گەیاندنی عیراق رایگەیاند، گەشتە ئاسمانییەکانی نێوان تورکیا و عیراق بەردەوامن و رانەوەستاون.
ناوبرا ئاماژەی بەوەشکردوە، تەنها هێڵە ئاسمانیەکانی تورکیا خشتەی گەشتەکانیان لە شەوەوە بۆ رۆژ گۆریوە هاوشێوەی هێڵە ئاسمانییەکانی تر و ئەم رێکارەش کاتییە.
ئەمە لە کاتێکدایە، ژمارەی میدیا بڵاویان کردەوە تورکیا بەبێ باسکردنی هۆکارەکەی گەشتە ئاسمانییەکانی بۆ عراق راگرتووە.
دوای ئاڵۆزییەکانی ناوچەکە و هەرەشە ئەمنی و سەربازییەکان، حکومەتی عیراق رایگەیاند، رێگە نادات، خاکەکەی ببێتە گۆڕەپانی شەڕ و بەکاربهێندرێت بۆهێرشکردنە سەر وڵاتانی ناوچەکە و جەخت لەسەر هەڵوێستی نەگۆڕ و پرەنسیپی خۆی دەکاتەوە لە رەتکردنەوەی بەکارهێنانی خاک و ئاسمان یان ئاوی ناوچەیی، وەک دەستپێکی هەر کردەوەیەکی سەربازی، کە هەر وڵاتێک بکاتە ئامانج.
ئەمڕۆ پێنجشەممە، سەباح نوعمان، وتەبێژی رەسمی فەرماندەی گشتیی هێزە چەکدارەکانی عیراق رایگەیاند، وڵاتەکەی رێگە نادات خاکەکەی ببێتە گۆڕەپانی ململانێ نێودەوڵەتییەکان و سوورە لەسەر هەڵوێستی نەگۆڕی خۆی، کە رێگری دەکات لە بەکارهێنانی سنوری خاک، ئاسمان و ئاوییەکانی بۆ ئەنجامدانی هەر هێرش و کردەوەیەکی سەربازی بۆ سەر هەر وڵاتێکی تر.
ئاماژەی بەوەشکردوە، لەسەر بنەمای بڕگەکانی دەستووری عیراق و سیاسەتی حکومەت لە رێزگرتن لە سەروەری وڵاتان و دەستوەرنەدان لە کاروباری ناوخۆیان، عێیراق بە تەواوی پابەند دەبێت بەوەی رێگە نادات خاکەکەی ببێتە گۆڕەپانێک بۆ هەڕەشەکردن لە ئاسایش و سەقامگیری هتەواوی وڵاتانی دراوسێی ناوچەیی، یان تێوەگلانی لەو ململانێیانەی کە خزمەت بە بەرژەوەندی گەلەکەی ناکات.
سەباح نوعمان، ئەوەشی خستوەتەڕوو، عیراق داوای خۆی بۆ هەموو لایەنە پەیوەندیدارەکان دووپات دەکاتەوە، کە خۆ کۆنتڕۆڵکردن و وتوێژ لە پێشینەی کارەکانیان دابنێن و دووربکەونەوە لە پەرەسەندن و بە پەرۆشەوە کار بکەن بۆ چارەسەرکردنی ناکۆکیەکان بە شێوازی ئاشتیانە و دیپلۆماسی، بە پێی بنەماکانی یاسا نێودەوڵەتییەکان و پەیمانی نەتەوە یەکگرتووەکان، بۆ ئەوەی ناوچەکە لە گرژی و ناسەقامگیری زیاتر بەدووربگرن.
شاناز ئیبراهیم ئەحمەد، خانمی یەکەمی عیراق پەیامێکی هاوخەمی ئاراستەی ئیلهام ئەحمەد، بەرپرسی پەیوەندییەکانی دەرەوەی ئیدارەی خۆسەر دەکات ، بەهۆی گیان لە دەستدانی حەوت ئەندامی بنەماڵەکەی لە کۆمەڵکوژیەکەی شێخمەقسود وئەشرەفییە
لە پەیامەکەی شاناز ئیبراهیم ئەحەمەد دا هاتووە؛ بە خەم و پەژارەیەکی زۆرەوە هەواڵی شەهیدبوونی حەوت کەسم لە ئەندامانی ماڵباتە تێکۆشەرەکەت بیست، کە لە کۆمەڵکوژییەکەی شێخمەقسود وئەشرەفییە گیانی پاکیان بە کورد و مرۆڤایەتی بەخشی.
خانمی یەکەمی عیراق ئاماژەی بەوەشکردوە؛ ئیتر داخ لە سەر داخ و خەم لە دوای خەم و کۆست لە دوای کۆست دیاری و بەرهەمی ئەم رۆژگارە نامۆیەن کە بۆ نەتەوەکەمان بەڕێوەن.
دەقی پەیامەکەی شاناز ئیبراهیم ئەحمەد, خانمی یەکەمی عیراق
خاتوو شاناز ئیبراهیم ئەحمەد پەیامێکی هاوخەمی ئاراستەی خاتوو ئیلهام ئەحمەد دەکات، ئەمە دەقەکەیەتی:
خوشکی ئازیز و تێکۆشەرم ئیلهام ئەحمەدی سەربەرز
بە خەم و پەژارەیەکی زۆرەوە هەواڵی شەهیدبوونی حەوت کەسم لە ئەندامانی ماڵباتە تێکۆشەرەکەت بیست، کە لە کۆمەڵکوژییەکەی شێخمەقسود وئەشرەفییە گیانی پاکیان بە کورد و مرۆڤایەتی بەخشی.
ئیتر داخ لە سەر داخ و خەم لە دوای خەم و کۆست لە دوای کۆست دیاری و بەرهەمی ئەم رۆژگارە نامۆیەن کە بۆ نەتەوەکەمان بەڕێوەن. نەتەوەیەک کە باشترین رۆڵەکانی بۆ ئازادی و بەختەوەری مرۆڤ لەم جیهانە ئەکاتە قوربانی کەچی زلهێزەکانیش چاو لەو هەموو نەهامەتی و لەو هەموو خوێنە ئەپۆشن کە بەدەستی تاریکپەرستان و دوژمنانی روناکی لە جەستەی گەلەکەمان ئەڕژێت.
شەهید بوونی حەوت ئەندامی ماڵباتەکەت تا بڵێی کۆستێکی گەورەیە، هەروەها ئازارێکیشە لە ناخ و رۆحی هەموو نیشتمانپەروەر و ئازادیخوازێکدایە، بەڵام لە سایەی خۆڕاگری ئێوەو گەلە سەربەرزەکەمان، بارتەقای ئەو ئازارە، هیوا و ئومێد بە ئازادی و ژیانێکی سەربەرزانە، لە دڵماندا زیاتر گەشە ئەکات.
جارێکیتر هاوخەمی ئازارەکانتم و پشتیوانی
شاناز ئیبراهیم ئەحمەد
کۆمپانیای بەبازاڕکردنی نەوتی عیراق (سۆمۆ) رایدەگەیەنێت، لە ماوەی سێ مانگی رابردوودا 19 ملیۆن بەرمیل نەوتی هەرێمی کوردستان هەناردەی دەرەوە کراوە و رادەستکردنی نەوتەکەش بەپێی رێککەوتنەکە بەردەوامە.
عەلی نەزار شەتری، بەڕێوەبەری گشتیی کۆمپانیای سۆمۆ رایگەیاند، پڕۆسەی وەرگرتنی نەوتی هەرێمی کوردستان بەپێی ئەو رێککەوتنەی هەیە بەردەوامە و هەموو لایەنەکان هەوڵی جێبەجێکردنی بڕگەکانی دەدەن.
ئاماژەی بەوەشکرد، لە سەرەتای دەستپێکردنی جێبەجێکردنی رێککەوتنەکەوە لە 27ـی ئەیلولی 2025 تا کۆتایی مانگی کانونی یەکەمی 2025 نزیکەی 19 ملیۆن بەرمیل نەوتی هەرێم وەرگیراوە و هەناردە کراوە، کە تێکڕای مانگانەی نزیکەی 6 ملیۆن بەرمیل بووە.
بەڕێوەبەری سۆمۆ روونیشیکردەوە، گۆڕانکاری لە بڕی هەناردەکراوی مانگانە شتێکی ئاساییە و پەیوەندی بە دۆخی تەکنیکی و بەرهەمهێنانەوە هەیە، بەڵام گۆڕانکارییەکان لە چوارچێوەی رێگەپێدراو و ستانداردە جیهانییەکانن.
د. لەتیف رەشید، سەرۆک کۆماری عیراق لە بەغداد پێشوازیکرد لە جۆشوا هاریس، هەڵسوڕێنەری کاروباری باڵیۆزخانەی ویلایەتە یەکگرتووەکانی ئەمریکا، لەمیانی دیدارەکەدا تاوتوێی پەرەسەندنەکانی رەوشی ناوچەیی و نێودەوڵەتی و کاریگەرییەکانی لەسەر ناوچەکە کرا.
لە کۆبوونەوەکەدا، هەردوولا پەیوەندییە دووقۆڵییەکانی نێوان هەردوو وڵات و چۆنیەتی پتەوکردنیان و بەردەوامی هەماهەنگی و هاوکاری هاوبەش لەسەر پرس و دۆسیەکانی بەرژەوەندی هاوبەش تاوتوێکرد بەمەبەستی بەدیهێنانی بەرژەوەندییە هاوبەشەکانی هەردوو وڵات.
هەروەها لە کۆبوونەوەکەدا تاوتوێی پەرەسەندنەکانی رەوشی ناوچەیی و نێودەوڵەتی و کاریگەرییەکانی لەسەر ناوچەکە کرا و جەختیان لەسەر پێویستی دوورکەوتنەوە لە گرژی و گرتنەبەری دیالۆگ وەک رێگەیەک بۆ چارەسەرکردنی قەیرانەکان کردەوە بەشێوەیەک، کە یارمەتیدەر بێت بۆ پشتیوانیکردن لە ئاسایش و سەقامگیریی ناوچەیی و نێودەوڵەتی.
ناوی کاندیدان بۆ پۆستی سەرۆک کۆماری عیراق بڵاوکرایەوە کە ژمارەیان 15 کاندیدە.
فەرمانگەی راگەیاندنی ئەنجومەنی نوێنەرانی عیراق بڵاویکردەوە، لە كۆی ئەو ناوانەی وەك كاندید بۆ پۆستی سەرۆك كۆمار تۆماركرابوون، 15 ناو مەرجە یاساییەكانیان تێدا بووە و بە كاندید بۆئەو پۆستە پەسەندكراون.
هاوکات ئەنجومەنی نوێنەرانی عیراق ئاماژەی بەوەکردووە، ئەو کەسانەی خۆیان بۆ ئەو پۆستە کاندیدکردووە و ناویان لە لیستەکەدا نییە، ماوەی سێ رۆژیان لەبەردەستدایە بۆ تانەگرتن و داواکەیان بەرزدەکرێتەوە بۆ دادگای باڵای فیدراڵی.
د. لەتیف رەشید سەرۆک کۆماری عیراق، ئەمڕۆ چوارشەممە 14ـی 1ـی 2026 لە کۆشکی سەلامی بەغداد، پێشوازی لە عومەر مەشعان دەبوس پارێزگاری نوێی ئەنبار کرد.
لەسەرەتای دیدارەکەدا سەرۆک کۆمار مەرسومی کۆماری تایبەت بە دەستبەکاربوونی پێشکەش بە پارێزگاری نوێی ئەنبار کرد و هیوای سەرکەوتنی بۆ خواست لەجێبەجێکردنی بەرپرسیارێتییەکانی و جەختی لە گرنگی خستنەگەڕی هەموو هەوڵەکان کردەوە بۆ باشترکردنی خزمەتگوزاری و گەشەپێدان لە پارێزگاکە بەشێوەیەک کە لەگەڵ خواستەکانی هاووڵاتیاندا بگونجێت.
سەرۆک کۆمار داواشیکرد، ئاوەدانکردنەوە و ئاسایش و خزمەتگوزارییەکان بکرێتە پێشینەی کارەکان و پشتگیری سەرۆکایەتی کۆماری بۆ هەموو هەوڵەکان دووپاتکردەوە کەئامانجیان بەدەستهێنانی گەشەپێدانی بەردەوام و باشترکردنی ئاستی بژێوییە لەپارێزگاکە.
لەلای خۆیەوە پارێزگاری ئەنبار سوپاس و پێزانینی خۆی بۆ متمانەی سەرۆک کۆمار دەربڕی و پابەندبوونی خۆی دووپاتکردەوە بۆ خستنەگەڕی هەوڵەکان بۆ خزمەتکردنی دانیشتوانی پارێزگاکە و کارکردن بۆ جێبەجێکردنی پلانەکانی گەشەپێدان و هەماهەنگی لەگەڵ لایەنە پەیوەندیدارەکان بۆ بەشداریکردن لەسەقامگیری پارێزگاکە و باشترکردنی خزمەتگوزارییەکانی.