عیراق
دوابەدوای گەیشتنی ئەمینداری گشتی ئەنجومەنی باڵای ئاسایشی ئێران بۆ بەغداد و کۆبونەوەی لەگەڵ راوێژکاری ئاسایشی نیشتمانیی عیراق، لێکتێگەیشتنێکی ئەمنی هاوبەشیان ئیمزاکرد.
قاسم ئەعرەجی راوێژکاری ئاسایشی نیشتیمانی عیراق لە تۆڕی کۆمەڵایەتی ئێکس بڵاویکردەوە، بە سەرۆکایەتی محەمەد شیاع سودانی سەرۆک وەزیرانی عیراق لێکتێگەیشتنێکی ئەمنی هاوبەشیان لەگەڵ عەلی لاریجانی، ئەمنی هاوبەشیان ئیمزاکردوە بۆ بەهێزکردن و چەسپاندنی ئاسایش لە سنورەکانی نێوان هەردوو وڵات.
جەختیشیکردەوە، حکومەتی عیراق بەردەوام دەبێت لە رێگریکردن لە هەر پێشێلکارییەکی ئەمنی، بەئامانجی دەستدرێژیکردنە سەر هەریەکێک لە وڵاتانی دراوسێی، یاخود خاکو ئاسمانی عێراق، بەکاربهێنرێت بۆ تێکدانی ئاسایش و سەقامگیری ناوچەکە.
ئەمڕۆ کارەبای نیشتیمانی لە تەواوی ناوچەکانی باشور و ناوەراستی عیراق پچڕا، بریکاری وەزیری کارەبای عیراقیش دەڵێت: تیمەکان سەرقاڵی چارەسەرکردنی کیشەکەن.
عادل کەریم بریکاری وەزیری کارەبای عیراق بە کوردسات نیوزی راگەیاند، بەهۆی لەکارکەوتنی هێڵێکی کارەبا لە نێوان پارێزگای بابل و قەزای موسەیەب، وێستگەکانی کارەبا یەک لەدوای یەک بکوژێتەوە و کێشەی تەکنیکی دروستببێت.
ئاماژەی بەوەشکرد، بەهۆی ئەو کێشە تەکنیکیەوە کارەبای نیشتمانی لە سەرجەم شار و شارۆچکەکانی عیراق کوژاوەتەوە و لەئێستادا تیمەکانی وەزارەتی کارەبا لە هەوڵی چارەسەرکردنی ئەو کێشەیە و گەڕاندنەوەی کارەبا دەکەن و لە چەند کاتژمێری داهاتوو کارەبا دەگەرێتەوە.
د. لەتیف رەشید سەرۆک کۆماری عیراق، ئەمڕۆ دووشەممە، 11ـی 8ـی 2025، لە کۆشکی بەغداد، پێشوازی لە د. عەلی لاریجانی ئەمینداری ئەنجومەنی باڵای ئاسایشی نەتەوەیی کۆماری ئیسلامیی ئێران و وەفدی هاوڕێی کرد.
لە دیدارێکدا، کە قاسم ئەعرەجی راوێژکاری ئاسایشی نیشتیمانیی عیراق و بریکاری وەزارەتی دەرەوە محەمەد حوسێن بەحرلعلوم ئامادەی بوون. لاریجانی سڵاوی سەرۆکی ئێرانی بە سەرۆک کۆمار گەیاند. هەروەها سەرۆک کۆماری عیراق سڵاوی خۆی بۆ سەرۆک پزیشکیان و گەلی ئێران نارد و هیوای پێشکەوتن و گەشەسەندنی بەردەوامی بۆ خواستن ،جەختیشی لە قووڵایی پەیوەندییە مێژووییەکان و بەرژەوەندییە هاوبەشەکانی نێوان عیراق و کۆماری ئیسلامیی ئێران کردەوە، هەروەها پەرۆشیی عیراقی بۆ پەرەپێدانی چوارچێوەی هاریکاریی دووقۆڵی دووپاتکردەوە، بەشێوەیەک کە خزمەت بە هەردوو گەلی دراوسێ بکات و ئاسایش و سەقامگیریی ناوچەکە بچەسپێنێت.
سەرۆک کۆمار ئەوەشی خستەڕوو کە عیراق بەردەوامە لەسەر پتەوکردنی سیاسەتی کرانەوەی ئەرێنی لەگەڵ هەموو وڵاتانی دراوسێ و بنیاتنانی هاوبەشیی لەسەر بنەمای بەرژەوەندیی هاوبەش و ڕێزی یەکتری، بەجۆرێک کە هاریکاریی ئابووری و ئەمنی بەهێز بکات و بەشداری بکات لە بەرقەرارکردنی ئاشتی و خۆشگوزەرانی بۆ گەلانی ناوچەکە.
لەکۆبوونەوەکەدا، گفتوگۆ لەبارەی دوایین پێشهاتە هەرێمی و نێودەوڵەتییەکانەوە کرا و جەخت لەسەر گرنگیی بەردەوامیی دیالۆگی بنیاتنەرانە لەنێوان وڵاتانی ناوچەکە بۆ چارەسەرکردنی قەیرانەکان و کارکردن بۆ چەسپاندنی بنەماکانی رێزگرتنی یەکتری و دەستوەرنەدان لە کاروباری ناوخۆیی یەکتر کرایەوە.
لای خۆیەوە، لاریجانی سڵاوی سەرکردایەتیی ئێرانی بە سەرۆک کۆمار گەیاند و پێزانینی وڵاتەکەی بۆ هەڵوێستەکانی عیراق دەربڕی کە پشتگیری لە بەهێزکردنی ئاسایشی هەرێمی دەکەن، هەروەها ستایشی رۆڵی گرنگی عیراقی کرد لە لێک نزیککردنەوەی بۆچوونی لایەنە جیاوازەکاندا.
هەروەها سوپاس و پێزانینی خۆی ئاراستەی گەلی عیراق کرد بۆ پێشوازی و میوانداریکردنی زیارەتکارانی ئێرانی لەکاتی بەجێهێنانی رێوڕەسمی زیارەتی چلەی شەهیداندا.
بەشی دابەشکردنی کارەبای کەرکوک، ئەمڕۆ دووشەممە، کوژانەوەی گشتیی سیستەمی کارەبای لە سەرتاسەری عیراق راگەیاند و بەرپرسێکیش دەڵێت: بەهۆی کێشەیەکی تەکنیکییەوە بووە"
بەشی دابەشکردنی کارەبای کەرکوک لە راگەیەندراوێکدا رایگەیاندووە: "کاتژمێر 3:00ی پاشنیوەڕۆ، سیستەمی کارەبا لەسەرتاسەری وڵاتدا بەتەواوی کوژاوەتەوە."
لە راگەیەندراوەکەی کارەبای کەرکوک دا هاتووە کە "وێستگەکان بە قۆناغ دەخرێنەوە کار."
لە یەکەم لێدوانیشدا لەسەر کوژانەوەی کارەبا، محەمەد نوری عەبدولڕەب، سەرۆکی لیژنەی وزەی پەرلەمان، لە پۆستێکدا لە پەیجی خۆی لە فەیسبووک رایگەیاند، "کوژانەوەی تەواوەتی سیستەمی کارەبا لە عیراق بەهۆی کێشەیەکەوە بووە لە هێڵەکانی گواستنەوەدا."
ئەمە لە کاتێکدایە کە هێشتا وەزارەتی کارەبا بە رەسمی هیچ لێدوانێکی نەداوە.
د.لەتیف رەشید سەرۆک کۆماری عیراق پێشوازی لە عەبدولعەزیز کوڕی خالید شەمەری باڵیۆزی شانشینی عەرەبستانی سعودییە لە عیراق کرد و جەختی لە گرنگی فراوانکردنی ئاسۆی هاریکاری هاوبەشی نێوان هەردوو وڵات کردەوە.
لەمیانی دیدارەکەدا کە ئەمڕۆ دووشەممە لە کۆشکی بەغداد بەڕێوەچوو، باس لە پەیوەندیی برایەتی و هاریکاریی نێوان هەردوو وڵات و چۆنیەتی پەرەپێدانیان کرا.
سەرۆک کۆمار جەختیکردەوە لە گرنگی فراوانکردنی ئاسۆی هاریکاری هاوبەشی نێوان عیراق و شانشینی عەرەبستانی سعودییە و چالاککردنی پەیوەندی و هەماهەنگی لەسەر پرسە جۆراوجۆرەکانی جێی بایەخی هەردولا بە مەبەستی هێنانەدی ویستی هەردوو گەلی برا بۆ گەشەپێدان و خۆشگوزەرانی و دامەزراندنی بناغەکانی ئاشتی و سەقامگیری لە ناوچەکەدا.
لای خۆیەوە باڵیۆزی عەرەبستانی سعوودییە پەرۆشی شانشینی عەرەبستانی سعودی دووپاتکردەوە بۆ پاراستنی هاریکاری لەگەڵ عیراق لە ئاستە جیاجیاکاندا، بە شێوەیەک کە خزمەت بە پێشکەوتن و خۆشگوزەرانی و سەقامگیری بکات، ئاماژەشیکرد بە قووڵی و مێژووی پەیوەندییەکانی نێوان هەردوو وڵات.
د.لەتیف رەشید، سەرۆک کۆمار ئەمڕۆ لە کۆشکی بەغداد، پێشوازیکرد لە تسوی وی، باڵیۆزی کۆماری گەلی چین لە عیراق و ئاماژەی بە گرنگیی فراوانکردنی ئاسۆی هاریکاریی دووقۆڵی لە کەرتە جیاوازەکاندا کرد.
لە دیدارێکدا، گفتوگۆ دەربارەی پەیوەندییە دووقۆڵییەکان کرا و جەخت لە گرنگیی پەرەپێدانیان کرایەوە بە شێوەیەک کە خزمەت بە بەرژەوەندییە هاوبەشەکان بکات، د.لەتیف رەشید سەرۆک کۆماری عیراق، ئاماژەی بە گرنگیی فراوانکردنی ئاسۆی هاریکاریی دووقۆڵی لە کەرتە جیاوازەکاندا کرد، کە سوودی بۆ هەردوو وڵاتی دۆست هەبێت.
هەروەها، سەرۆک کۆمار نامەیەکی پیرۆزبایی لە شی جینپینگ سەرۆکی چین، بەبۆنەی رۆژی لەدایکبوونییەوە پێگەیشت لە نامەکەدا سەرۆکی چین پیرۆزبایی و هیوای خۆی ئاڕاستەی سەرۆک کۆمار کردبوو و جەختی لە گرنگیدانی زۆری بە پەرەپێدانی پەیوەندییەکانی نێوان عیراق و چین کردبووەوە، هەروەها ئامادەیی خۆی دەربڕیبوو بۆ بەردەوام بوون لە هەوڵەکان بۆ پەرەپێدانی پەیوەندیی هاوبەشیی نێوان هەردوو وڵات، بە شێوەیەک کە خزمەت بە بەرژەوەندیی هەردوو گەلی دۆست بکات.
لای خۆیەوە، باڵیۆز تسوی وی سوپاسی سەرۆک کۆماری عیراقی کرد بۆ گرنگیدانی بە پتەوکردنی پەیوەندییەکان لەگەڵ چین و جەختیشی کردەوە کە وڵاتەکەی سوورە لەسەر چەسپاندنی بنەماکانی پەیوەندیی ئەرێنی لەگەڵ عێراق لە هەموو بوارەکاندا.
بەهۆی بەرزبوونەوەی پلەکانی گەرماوە هاووڵاتیان لە ناوچە جیاوازەکانی عیراق رودەکەنە ئەو ناوچانەیی کە رووبار یاخود چەم و دەریاچەی تێدایە بەمەستی مەلەکردن هەندێکجاریش ئەو سەردانیکردنانە بە کارەسات کۆتایاندێت.
بەپێی زانیاریەکانی وەزارتی ناوخۆی عیراق، لەسەرەتای وەرزی هاوینی ئەمساڵەوە لە تەواوی عیراق، زیاتر لە 300 کەس بەهۆی مەلەکردن لە روبارەکان و چەم و دەریاچەکان خنکاون، زۆربەی حاڵەتەکانی خنکانیش لە پارێزگاکانی بەغداد و دیالە و زی قار و سەڵاحەدین رویانداوە، بەهۆی ئەوەی ئەو پارێزگایانە روبارەکان لە نزیک شوێنی نیشتەجێبوونی هاووڵاتیانەوە تێدەپەڕن.
هەر بەپێی زانیاریەکانی وەزارەتی ناوخۆی عیراق، زۆربەی ئەو کەسانەی کە خنکاون هێلەکی فریاگوزاریان لەبەر نەبووە و مەلەیان نەزانیوە، یاخود لە جێگەیەکدا مەلەیان کردوە کە شیاوی مەلەکردن نەبووە و بەهۆی بەهێزی تەوژمی روبارەکانەوە خنکاون.
بەهۆی بڵاوبوونەوەی گازی کلۆرەوە زیاتر لە 600 زیارەتکاری چلەی ئیمام حوسێن توشی تەنگەنەفەسی بوون.
وەزارەتی تەندروستی عیراق رایگەیاند، بەهۆی بڵاوبونەوەی گازی کلۆرەوە لە فەرمانگەیەکی ئاو لەسەر رێگای کەربەلا-نەجەف، 621 کەس بەهۆی هەڵمژینی ئەو گازەوە توشی تەنگەنەفەسی بوون، ئەو کەسانەش بەڕێگاوە بوون بۆ بەشداریکردن لە چلەی ئیمام حوسێن.
ئاماژەی بەوەشکرد، سەرجەم ئەو کەسانەی کە بەهۆی هەڵمژینی ئەو گازی کلۆرەوە رەوانەی نەخۆشخانە کراون ، چارەسەری پێویستیان وەرگرتووە و پاش جێگیربوونی رەوشی تەندروستیان نەخۆشخانەیان بەجێهێشتووە.
نەسیب ئەلخەتابی پاریزگاری کەربەلا لە شوێنی روداوەکەوە رایگەیاند، تیمەکانی بەرگری شارستانی بە خێرایی توانیویانە چارەسەر ئەو کێشەیە لە فەرمانگەی ئاوی نێوان پارێزگای نەجەف و کەربەلا بکەن، هەروەها ستایشی تیمەکانی فریاکەوتنی خێرا و بەرگری شارستانی کرد بەهۆی خێرا وەلامدانەوەیان بۆ ئەو روداوە.
ئەمرۆ ئەنجومەنی وەزیرانی عیراق كۆدەبێتەوە و چاورەوان دەكرێت بریارێك لە بارەی خەرجكردنی موچەی مانگی 6 ی موچەخۆرانی هەرێم بدات .
پەیامنێری كوردسات نیوز لە زاری بەرپرسێكی كوردەوە رایگەیاند ، كارنامەی كۆبونەوەكەی ئەنجومەنی وەزیران ، پرسی موچەی هەرێمی تێدا نیە ، بەڵام پێدەچێت لەناو كۆبونەوەكەدا ئەو پرسە بخرێتە بەر باس .
وتیشی هەرێمی كوردستان پێشنیارەكانی خۆی پێشكەش كردوە و لیژنەكان كاری خۆیان كردوە و راپۆرتەكان ئامادە كراون كە دەبێت ئەمرۆ لە ئەنجومەنی وەزیران گفتوگۆیان لەبارەوە بكرێت ، دوای پەسەندكردنیشیان لەلایەن محەمەد شیاع سودانی سەرۆك وەزیرانی عیراقەوە ، بریار لەسەر خەرجكردنی موچەی مانگی 6 ی موچەخۆرانی هەرێم دەدرێت .
لە چەند رۆژی رابردوودا وەفدێكی هاوبەشی وەزارەتی دارایی و دیوانی چاودێری هەرێم چوونە بەغداد بۆ ئەوەی لەگەڵ لێپرسراوانی دارایی عیراق راپۆرتی تایبەت بە داهاتە نانەوتییەكانی هەرێم و هەناردەی نەوتی هەرێم تاوتوێ بكەن و دوای تەواوكردنی كارەكانیشیان رۆژی 5 شەممە وەفدەكەی هەرێم گەرانەوە .
بەپێی لیستی گەرمترین ناوچەكانی جیهان ، لە 24 سەعاتی رابردوودا شارەكانی عیراق گەرمترین 15 ناوچەی جیهان بوون و ناوی هیچ شارو و وڵاتێكی تر لە لیستەكەدا نەهاتووە
لە لیستەكەدا، ناوچەی فرۆكەخانەی بەسرە لە پلەی یەكەمدا بوە و پلەی گەرما تێیدا گەیشتوەتە 52 پلەی سەدی، دواتر ناسریە و بەسرە و سەماوە و عەمارە لە لیستەكەدا دیاریكراون كە پلەی گەرما تێیاندا 50 پلەی سەدی بوە ، دواتریش هەریەك لە ناوچەكانیی رەفاعی لە ناسریە و فرۆكەخانەی نەجەف و كەربەلا و علی غەربی و فڕۆكەخانەی بەغداد و هیت و كوت و بەدرە بە 49 پلەی سەدی لە لیستی گەرمترین ناوچەكانی جیهاندا تۆماركراون ، لە دوای ئەوانیش دیوانیە و عەین تەمر تۆمار كراون كە پلەی گەرما تێیاندا زیاتر لە 48 پلەی سەدی بووە .
ئەوە لەكاتێكدایە ، كەشناسی عیراق لە راگەیەندراوێكدا بڵاویكردەوە، لە ناوەڕاستی ئەم هەفتەوە ئەو شەپۆلی گەرمای رووی لە عیراق و هەرێمی كوردستان كردووە، قۆناغ بە قۆناغ نامێنێت و بارستە هەوایەكی فێنك جێگەی دەگرێتەوە.
كەشناسی عیراق رایگەیاند، هەفتەی داهاتوو ئەو شەپۆلە گەرمایەی رووی لە عیراق و هەرێمی كوردستان كردووە نامێنێت و بارستە هەوایەكی فێنك جێگەی دەگرێتەوە.
كەشناسی عیراق لە راگەیەندراوێكدا بڵاویكردەوە، سەرەتا یاخود ناوەڕاستی هەفتەی داهاتوو ئەو شەپۆلە گەرمایەی رووی لە عیراق و هەرێمی كوردستان كردووە، قۆناغ بە قۆناغ نامێنێت و بارستە هەوایەكی فێنكتر جێگەی دەگرێتەوە، كە لە رۆژهەڵاتی دەریای ناوەڕاستەوە سەرچاوەی گرتووە و لەگەڵ خۆیدا كەشوهەوای ئاسایی هاوین دەهێنێت.
ئەوەشی خستەڕو، ئەم هەفتەیە پلەكانی گەرما بە بەرزی لە عیراق و هەرێمی كوردستان دەمێننەوە، كە لە لوتكەی پلەكانی گەرمادان.
كەشناسی عیراق ئاماژەی بەوەشداوە، لەناوەڕاستی هەفتەی داهاتووەوە كەشوهەوای عیراق و هەرێمی كوردستان سەقامگیری رێژەیی بەخۆیەوە دەبێنێت.
کۆمسیۆنی باڵای سەربەخۆی هەڵبژاردنەکان تیروپشک بۆ پێدانی ژمارەی لیست و هاوپەیمانێتی و کاندیدە سەربەخۆکان ئەنجامدەدات.
جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق رایەگەیاند، ئەم ئێوارەیە 31 هاوپەیمانی و 38 لیست و 76 کاندیدی سەربەخۆی تیروپشکیان بۆ ئەنجامدەدرێت و ژمارەیان پێ دەدرێت.
ئاماژەی بەوەشکرد، ژمارە 256 لە تیروپشکەکان دەرکراوە، بەهۆی ئەو ئاماژە کۆمەڵایەتییەی کە هەیەتی و نادرێت بە هیچ لایەنێک.
راوێژكاری دارایی سەرۆك وەزیرانی عیراق دەڵێت، حكومەت بەردەوامە لە زیادكردنی داهاتی نانەوتی لە چوارچێوەی سیاسەتی داراییدا.
مەزهەر محەمەد ساڵح راوێژكاری دارایی محەمەد شیاع سودانی سەرۆك وەزیرانی عیراق رایگەیاند: حكومەتی عیراق لە چوارچێوەی چاكسازیی لە سیاسەتی دارایی بەردەوامە لەسەر زیادكردنی داهاتی نانەوتی لە پێناو پڕكردنەوەی كورتهێناندا.
وتیشی، سیاسەتی دارایی تەنها لە چوارچێوەی فەرمانبەراندا خۆی نابینێتەوە، بەڵكو پێویستی بە پلان هەیە و یەكێك لە بابەتەكانیش هاوسەنگی خەرجی و دادپەوەریی دابەشكردنی داهاتە.
راشیگەیاند، راگرتنی پلەبەرزكردنەوەی فەرمانبەران كاریگەری لەسەر باج و داهاتی ناوخۆ هەیە و راگرتنی سەرموچەش كاریگەری لەسەر دادپەروەری دابەشكردنی سەرچاوەی دارایی دەوڵەت هەیە و نەبوونی خشتەكانی یاسای بودجەش مانای ئەوە نییە فەرمانبەر لە مافەكانی بێبەش دەكرێت.
لە کەرکوک گەورەترین چالاکی هونەری و رۆشنبیریی بەڕێوەدەچێت لەژێر ناوی "فیستیڤاڵی کەرکوک هێمای پێکەوەژیانە".
فیستیڤاڵەکە لەسەعات 7ی ئێوارە لەهۆڵی سەنتەری رۆشنبیری کەرکوک ساز دەکرێت و لەلایەن وەزارەتی رۆشنبیری عیراق و بەبەشداریی سەرۆک کۆماری عیراق ساز دەکرێت.
بەپێی ئەجێندای فیستیڤاڵەکە وتاری هەر یەک لەد. لەتیف رەشید سەرۆک کۆماری عیراق و ئەحمەد فەکاک ئەلبەدرانی وەزیری رۆشنبیری عیراق و رێبوار تەها پارێزگاری کەرکوک پێشکەش دەکرێن.
دواتر کار و چالاکیەکانی فیستیڤاڵ بەڕێوەدەچێت کەچەندین چالاکی هونەری و رۆشنبیری پێکهاتەکانی پارێزگاکە لەخۆ دەگرێت، سازدانی فیستیڤاڵەکەش هەوڵێکە بۆ مکۆمترکردنی گیانی برایەتی و پێکەوەژیان لەپارێزگای کەرکوک.
دوای شەش رۆژ لەچەند شار و شارۆچکەیەکی هەرێمی کوردستان و کەرکوک و گەرمیان، ئەمڕۆ دوایین وادەیە بۆ تۆمارکردنی سکاڵا لەسەر عەجاج کە ناسراوە بە جەلادەکەی زیندانی نوگرەسەلمان.
لە ئەمنە سورەکەی سلێمانی کە تیایدا سکاڵاکان تۆماردەکرێن، شایەتحاڵێکی ناو زیندانەکە بە کوردسات نیوزی راگەیاند، عەجاج لەهەموو کەسێکی ناو زیندانەکەی دەدا لەسەرجەم تەمەنە جیاوازەکان، دەڵێت ئێستاش کە ناوی دەهێنن لێی دەترسم چونکە زۆر دڕندە بوو.
ئەو زیندانەی ناو نوگرەسەلمان باس لەوەشدەکات، بەبەچاوی خۆمەوە پیرێژنێک بەپێ لەقە لەبەرچاوی خۆمدا گیانیلەدەستدا، جگە لە ئازاردانی جەستەیی لەڕوی دەرونییەوە زۆر ئازاردراوین.
هاوکات لە مۆنۆمێنتی ئەنفال لە چەمچەماڵ و بەڕێوەبەرایەتی شەهیدان و ئەنفالکراوانی گەرمیان وەرگرتنی سکاڵاکان بەردەوامن، کە تیایدا وتە لە شایەتحاڵ و زیندانییەکانی نوگرە سەلمان وەردەگیرێن وەکو بەڵگە لەسەر تاوانەکانی عەجاج.
بەمزوانە وەزیری وزەی سوریا سەردانی عیراق دەكات بۆ گفتوگۆکردن لەسەر نۆژەنكردنەوەی ئەو بۆریە نەوتەی، كێڵگە نەوتییەكانی كەركوك بە بەندەری بانیاسەوە دەبەستێتەوە.
محەمەد بەشیر وەزیری وزەی سوریا رایگەیاند، ئەگەر ئەو بۆرییەی کە كێڵگە نەوتییەكانی كەركوك بە بەندەری بانیاسەوە دەبەستێتەوە، زیندوو بكرێتەوە، رێگە بە نەوتی عیراق دەدات راستەوخۆ بەرەو سوریا بڕوات و لەوێشەوە بۆ بازاڕەكانی جیهان، بەوەش لە تێچووی زۆری هەناردەكردنی نەوت لە رێگەی دەریاوە رزگاری دەبێت.
وتیشی، بۆئەو مەبەستە بەمزوانە سەردانی عیراق دەكات و لەگەڵ لێپرسراوانی باڵای ئەو وڵاتە گفتوگۆ دەكات لەسەر نۆژەنكردنەوەی ئەو بۆرییە نەوتیەی، كێڵگە نەوتییەكانی كەركوك بە بەندەری بانیاسەوە دەبەستێتەوە.
جەختیشیكردەوە، وەزارەتی وزەی سوریا كار بۆ داڕشتنەوەی كەرتی وزە لە وڵاتەكەی دەكات لە رێگەی دامەزراندنی چەند كۆمپانیایەكی نەوت و كارەبا، هاوشێوەی كۆمپانیا گەورە نێودەوڵەتییەكان، بۆ ئەنجامدانی گەڕان و بەرهەمهێنان و گواستنەوە و پاڵاوتن.
راشیگەیاندوە، بۆری غازی نێوان سوریا و توركیا بەم دواییە نۆژەنكراوەتەوە و لە ئێستادا رۆژانە نزیكەی سێ ملیۆن مەتر سێجا غاز لە رێگەیەوە دەگوزارێتەوە.