ئەنجومەنی نوێنەرانی ئەمریکا پاکێجێکی نوێی سزای فراوانی پەسەند کرد کە ئامانج لێی زیادکردنی گوشارەکانە بۆ سەر روسیا بەهۆی جەنگی ئۆکرانیاوە، و پڕۆژەیاساکەی رەوانەی لای دونالد ترەمپ کرد بۆ ئیمزاکردنی.

ئەنجومەنی نوێنەران کە کۆمارییەکان زۆرینەی تێیدا پێکدەهێنن، بە زۆرینەی 262 دەنگ بەرانبەر 159 دەنگ پڕۆژەکەی پەسەند کرد، کە ئەمەش گەورەترین جووڵەی یاسادانانی ئەمریکایە دژی موسکۆ لە دوای گەڕانەوەی ترەمپ بۆ کۆشکی سپی.

پێشتر ترەمپ جەختی کردبووەوە کە یاساکە ئیمزا دەکات بۆ ئەوەی بچێتە باری جێبەجێکردنەوە، ئەوەش دوای ئەوەی مانگی رابردوو ئەنجومەنی پیران بە زۆرینەی 86 دەنگ بەرانبەر 11 دەنگ پەسەندی کردبوو.

 

بانکی یەدەگی فیدراڵیی ئەمریکا دوای سێ ساڵ بۆ یەکەمجار رێژەی سودی بانکی بەرزکردەوە.

بانکی یەدەگی فیدراڵیی ئەمریکا ئاشکرایکرد، لە چوارچێوەی هەوڵەکانیدا بۆ رووبەڕووبوونەوە و کۆنتڕۆڵکردنی هەڵئاوسانی بەرزی ئابوری، بۆ یەکەمجار لە ماوەی سێ ساڵی رابردوودا رێژەی سوودی بانکی بە 25 خاڵ بەرزکردەوە، ئەوەش بڕیارێکە پێدەچێت کاردانەوەی توندی کۆشکی سپی لێبکەوێتەوە.

بەپێی بڕیارەکەی ئەنجومەنی یەدەگی فیدراڵی، رێژەی سوودی بانکی بەبڕی 0.25% بەرزکراوەتەوە و ئاستی سودی سەرەکی لە ویلایەتە یەکگرتووەکانی ئەمریکا گەیشتووەتە نزیکەی 3.9%، کە ئەمەش بەپێی کات دەبێتە هۆی بەرزبوونەوەی تێچووی وەرگرتنی قەرزی خانووبەرە، ئۆتۆمبێل.

لە چوارچێوەی پێشبینییە وەرزییەکانیدا، ئەنجومەنەکە ئاماژەی بەوەشکردووە، کۆمیسیۆنی بازاڕی ئازادی بەرپرسیار لە سیستمی نەقدی، پێشبینی دەکات لە کۆتایی ئەمساڵدا بۆ جارێکی تریش رێژەی سود بەرزبکاتەوە بۆ ئاستی 4.1%.

لە ڕاگەیەنراوێکدا بانکی ناوەندی ئەمریکا ئەوەی خستووەتەڕوو،"ئەم هەنگاوەی ئەمڕۆ دەبێتە هۆی خێراکردنەوەی گەڕانەوە بۆ ئامانجی دیاریکراوی هەڵئاوسان کە بە 2% دەستنیشانکراوە".

ئەم بڕیارەی بانکی فیدراڵی لە کاتێکدایە کە هاووڵاتیانی ئەمریکا بەدەست بەرزبوونەوەی نرخی خۆراک، سوتەمەنی و خانوبەرەوە دەناڵێنن و توانای کڕین بووەتە بابەتێکی هەستیار.

ئەنجومەنی نوێنەرانی ئەمریکا لە دانیشتنێکی تایبەتدا، پڕۆژەبڕیارێکی پەسەند کرد، کە سەرۆکی وڵات ناچار دەکات کۆتایی بە ئۆپراسیۆنە سەربازییەکانی دژ بە ئێران بهێنێت.

دەنگدانەکە بە زۆرینەی 220دەنگی بەڵێ بەرانبەر 204 دەنگی نەخێر بەڕێوەچوو، کە تێیدا حەوت نوێنەری پارتی کۆماریش پشتگیرییان لە بڕیارەکە کرد و ئاڕاستەی دەنگدانی حزبیی ئاساییان شکاند.

ئەم بڕیارە بووە جێی دەمەقاڵێی توند لەنێوان هەردوو پارتە سەرەکییەکەدا؛ سێس مۆڵتن، نوێنەری دیموکراتەکان، رەخنەی لە بەڵێنەکانی پێشووی دۆناڵد ترەمپ گرت کە وتبووی جەنگەکە تەنیا چەند هەفتەیەک دەخایەنێت.

 لە بەرانبەردا، برایان ماست، نوێنەری کۆمارییەکان، هەڵوێستی دیموکراتەکانی رەتکردەوە و هۆشدارییدا لە کشاندنەوەی هێزە سەربازییەکان لە کاتێکدا ئێران هێشتا وەک هەڕەشەیەکی بەردەوام لە ناوچەکەدا دەمێنێتەوە.

رۆژنامەیەکی ئەمریکی ئاشکرای دەکات، ئەمریکا ئامادەکاری دەکات بۆ فرۆشتنی گەورەترین پاکێجی تەقەمەنی بە ئیسرائیل کە زیاتر لە 40 هەزار بۆمبە.

رۆژنامەی واشنتۆن پۆست لەسەر زاری لێپرسراوێکی ئەمریکییەوە بڵاویکردەوە، ئیدارەی دۆناڵد ترەمپ ئامادەکاری دەکات بۆ فرۆشتنی 40 هەزار بۆمبی دوو هەزار پاوەندی بە ئیسرائیل، کە بەهاکەی دەگاتە 2.8 میلیارد دۆلار.

 بەپێی راپۆرتەکە، ئەمە گەورەترین پڕۆسەی فرۆشتنی سەربەخۆ و یەکجارەکیی ئەم جۆرە تەقەمەنییانەیە لەلایەن ئەمریکاوە بۆ ئیسرائیل لە ساڵانی رابردودا.

بەگوێرەی زانیارییەکانی واشنتۆن پۆست، ئەم پاکێجە سەربازییە 2.8 میلیارد دۆلارییە پێکهاتووە؛ لە 20 هەزار بۆمبی جۆری (MK-84) و هەزار بۆمبی جۆری (BLU-117) و هەروەها 20 هەزار کڵاوەی بۆمبی وێرانکەری سەنگەر شکێن.

یەكێتیی ئەوروپا هۆشداری لە فراوانخوازیی حوسییەكان دەدات و داوای پاراستنی گەرووی هورمز و بابولمەندەب دەكات.

كایا كاڵاس، لێپرسراوی سیاسەتی دەرەوەی یەكێتیی ئەوروپا لە وتارێكیدا لە پەرلەمانی ئەوروپا رایگەیاند، دەستبەسەرداگرتنی بەشێك لە كەناراوەكانی یەمەن لەلایەن حوسییەكانەوە بەشێكە لە ستراتیژیی ئێران لە ناوچەكە.

وتیشی، پێویستە بەرەوپێشچوونە سەربازییەكانی حوسییەكان بوەستێنرێت و ئازادیی كەشتیوانیی نێودەوڵەتی لە گەروی بابلمەندەب و گەروی هورمزیش دەوبێت بپارێزرێت.

جەختیشی كردەوە، بەهۆی گرژییەكانی ئەم دواییە لە یەمەن زیاتر لە 100 هەزار هاووڵاتی ئاوارەبوون، بۆیە گرنگە كە هاوكارییەكان بۆ حكومەتی شەرعیی یەمەن زیاتر بكرێن و رێگرییش لە بەرەوپێشچوونی گروپە چەكدارەكانی وەك حوسییەكان بكرێت.

سێرگی لاڤرۆڤ، وەزیری دەرەوەی رووسیا رایگەیاند، پڕۆسەی سەربازیی زۆرەملێ لە ئۆکراین لە داهاتویەکی نزیکدا دەگاتە ژنانیش. 

وەزیری دەرەوەی روسیا لە میانی بەشداریکردنی لە کۆبونەوەیەکی دیپلۆماسیدا ئاماژەی بە پێشهاتەکانی قەیرانی ئۆکراین کردو رایگەیاد، ئاگاداری ئەو ڤیدیۆیانەن، کە بڵاودەکرێنەوە  وەزۆر هاووڵاتیان دەنێردرێن بۆ بەەکانی جەنگ.

جەختیشیکردەوە،  لە سۆنگەی بەردەوامی رفاندنی پیاوان لە شەقامەکان و ناردنیان بۆ بەرەکانی جەنگ بەبێ بانگهێشتنامەی رەسمی، چاوەڕوان دەکرێت ئەم هەنگاوە بە زووی ژنانیش بگرێتەوە.

ناوبراو باسی لەوەش کرد کە ڤیدیۆ تۆمارکراوەکان بەردەوام چالاکییەکانی بەناو راوچییەکانی مرۆڤ دەیسەلمێنن کە گەنجان و تەنانەت بەتەمەنەکانیش لە شەقامەکانی کیێڤ و شارەکانی دیکە دەستگیر دەکەن و بە زۆر دەیانخەنە ناو ئۆتۆمبێلەکانەوە و رەوانەی بەرەکانی جەنگیان دەکەن.

دادگای باڵای ئەمریکا رەتیکردەوە رێگە بە دۆناڵد ترەمپ بدات بۆ سنووردارکردنی دەنگدان بە پۆستە پێش هەڵبژاردنەکانی ناوەڕاستی خول لە تشرینی دووەمدا، ئەمەش بە شکستێکی نوێ بۆ ئیدارەکەی دادەنرێت.

لە کۆی نۆ دادوەر، تەنها دوو دادوەری پارێزگار دژی بڕیارەکە بوون. دادوەر برێت کاڤانۆ رایگەیاند کە هۆکاری سەرەکیی رەتکردنەوەکە کەمیی کاتی ماوەیە پێش هەڵبژاردنەکان.

ترەمپ لە ئاداردا فەرمانێکی دەرکردبوو بۆ توندکردنەوەی مەرجەکانی دەنگدان بە پۆستە بە بیانووی رێگری لە تەزویر، بەڵام ویلایەتە دیموکراتەکان داوای یاساییان تۆمارکرد و جەختیان کردەوە کە بەڕێوەبردنی هەڵبژاردن دەسەڵاتی ویلایەتەکانە نەک دەسەڵاتی فیدراڵی.

فەرمانەکە داوای دەکرد کارتی دەنگدان تەنها بۆ ناواکانی ناو لیستی شایستەکان بنێردرێت، لەکاتێکدا بەرپرسان هۆشدارییان دەدا لە پشێوی کارگێڕی، و کارمەندێکی دەستەی پۆستەش گوتی سیستەمە پەلەپڕووکانەکە دەبێتە هۆی بێبەشبوونی ملیۆنان دەنگدەر.

 

دۆناڵد ترەمپ رایگەیاند، روسیا و ئۆکراین گەشتونەتە رێککەوتن کە ژێرخانی وزەی یەکتری نەکەنە ئامانج، جەختیشیکردەوە جەنگی ئێران هۆکاری بەرزبونەوەی نەوت نییە.

ئەمڕۆ دوشەممە، دۆناڵد سەرۆکی ئەمریکا لە تۆڕی  کۆمەڵایەتی تروس رایگەیاند کە روسیا و ئۆکراین، رێککەوتون کە ژێرخانی وزەی یەکتر نەکەنە ئامانج.

سەرۆکی ئەمریکا جەختیکردەوە،  بەرزبوونەوەی نرخی نەوت لە جیهاندا زیاتر بەهۆی جەنگی  نێوان روسیا و ئۆکراینە نەک جەنگ لەگەڵ ئێران.

ئەم قسەکانی دۆناڵد ترەمپ لە کاتێکدایە، لە ئێستادا نرخی نەوتی برێنت لە سەرو 100 دۆلارەو ەمامەڵەی پێوەدەکرێت.

لە سەرەتای جەنگی ئەمریکا و ئیسرائیل بەرانبەر ئێران، نرخی سوتەمەنی لە ئەمریکا بە رێژەی لەسەدا 65 بەرزبووەتەوە.

جەی دی ڤانس، جێگری دۆناڵد ترەمپ رایگەیاند، چاودێری روداوەکانی یەمەن دەکەن و لەگەڵ حوسییەکان پەیوەندییان هەیە و ئەوەی رودەدات لە ژێر چاودێری ئەواندایە.

ئەمڕۆ دوشەممە، جەی دی ڤانس، جێگری دۆناڵد ترەمپ رایگەیاند، بە وردی ئاگاداری ئەوەن لە یەمەن رودەدات و لەگەڵ سعودیە و حوسییەکانیشدا لە پەیوەندیدان.

جەختیشیکردوە، سەبارەت بە دوایین پێشهاتەکان گفتوگۆی راستەوخۆیان لەگەڵ حوسییەکان کردووە و رەوشەکە  بە خێرایی دەگۆڕێت.

ئاماژەی بەوەشکرد، بۆ پاراستنی بەرژەوەندییەکانیان بە وردی چاودێڕی گۆڕانکارییەکان دەکەن و نیگەرانن لە دەستبەسەرداگرتنی دورگەی پەریم لەلایەن حوسییەکانەوە لە دەریای سور.

دیموكراتەكان لە ئەنجومەنی نوێنەرانی ئەمریكا ئەگەری لێسەندنی دەسەڵات لە ترەمپ بەدوور نازانن ئەگەر دیموكراتەكان ئەنجومەنی نوێنەران بباتەوە.

حەكیم جێفریز، سەرۆكی كەمینەی دیموكراتەكان لە ئەنجومەنی نوێنەرانی ئەمریكا رایگەیاند، ئەگەر حزبەكەیان لە هەڵبژاردنەكانی تشرینی دووەمی داهاتوودا كۆنتڕۆڵی ئەنجومەنی نوێنەران بباتەوە، ئەگەری دەستپێكردنی ڕێكارەكانی گۆشەگیركردنی دۆناڵد ترەمپ سەرۆكی ەمریكا بەدوور نازانن.

ئاماژەی بەوە شكرد، ترەمپ هیچی بۆ نەهێشتوونەتەوە، پێویستە بەدوای راستییەكاندا بڕۆن، یاسا جێبەجێ بكەن و بەپێی دەستوور رەفتار بكەن.

وتیشی، نوێنەرای دیموكراتەكان لە مانگی كانونی دووەمی داهاتووەوە سەركردایەتی هەوڵەكانی لێپرسینەوە لە ئیدارەی ترەمپ دەكەن ئەگەر ببنە سەرۆكی كۆمیتەكانی دادوەری و چاودێری.

ئەمە یەكەم جار نییە رێکار دژی ترەمپ دەگرێتەبەر بۆ گۆشەگیركردنی، جاری یەكەم لە ساڵی 2019 بەهۆی دۆسیەی ئۆكراین وە، و جاری دووەم دوای هێرشەكەی سەر باڵەخانەی كاپیتۆڵ لە 6ی كانونی دووەمی 2021 بوو، كە لە هەردوو جارەكەدا لەلایەن ئەنجومەنی پیرانەوە پەسەندنەكرا.

 

ئەدمیراڵ براد كۆپەر، فەرماندەی فەرماندەیی ناوەندیی ئەمریكا (سێنتكۆم)، لە چاوپێكەوتنێكدا لە بەرنامەی (فەیس زە نەیشن) ی تۆڕی هەواڵی سی بی ئێس رایگەیاند، بەهیچ شێوەیەك نیگەران نییە سەبارەت بە یەدەگی تەقەمەنی و چەكەكانی ئەمریكا. 

ئەمەش لە كاتێكدایە كە هەندێك راپۆرتە رۆژنامەوانییەكان ئاماژە بەوە دەكەن وەزارەتی جەنگی ئەمریكا (پێنتاگۆن) لە رووبەڕووبوونەوەكانیدا لەگەڵ ئێراندا بەشێكی زۆری یەدەگەكەی بەكارهێناوە.

لەچاوپێكەوتنەكەدا پێشكەشكارەكە باسی لەوەكرد، ئەمریكا 45% موشەكی پاتریۆت و زیاتر لە نیوەی یەدەگی موشەكەكانی سیستمی بەرگریی ئاسمانی تادی بەكارهێناوە،  لەوەڵامدا براد كوپەر وتی لەگەڵ ئەوەشدا نیگەران نین.

هەر لەو چێوەیەشدا، دۆناڵد ترەمپ سەرۆكی ئەمریكا سەرەتای ئەم مانگە رایگەیاندبوو ئەمریكا خاوەنی بڕێكی بێسنوور لە تەقەمەنی كوالیتی ناوەند و بەرزە، جگە لەوەش، بە ئاستێك تەقەمەنی بەرهەم دەهێنین كە پێشتر وێنەی نەبووە. 

 

سەرۆکی ئەمریکا رایدەگەیەنێت، ئێران بە هەر نرخێک بێت دەیەوێت رێککەوتن بکات بەڵام رێگەی پێنادرێت ببێتە خاوەنی چەکی ئەتۆمی.

دۆناڵد ترەمپ، سەرۆکی ئەمریکا رایگەیاند، ئێران بە هەموو شێوەیەک هەوڵی بەدەستهێنانی رێککەوتن دەدات و خوازیاری گەیشتنە بە رێککەوتن بە هەر نرخێک بێت، بەڵام جەختی کردەوە کە تاران بە هیچ جۆرێک دەستی بە چەکی ئەتۆمی ناگات.

ترەمپ ئاماژەی بەوەشکرد، رەنگە شەڕی ئێران پێش یان دوای هەڵبژاردنی خولی نیوەی ئەمریکا کۆتایی پێبێت، بەڵام بە هیچ شێوەیەک ئامادە نییە ئیمزا لەسەر رێککەوتنێک بکات کە کەموکوڕی تێدابێت.

لە بەشێکی دیکەی قسەکانیدا سەبارەت بە جەنگی روسیا و ئۆکراین، ترەمپ داوای لە ڤۆلۆدیمێر زیلینسکی سەرۆکی ئۆکراین کرد هێرشەکانی بۆ سەر دامەزراوە نەوتییەکانی روسیا رابگرێت، هەروەها ئاماژەی بە پەیوەندییە بازرگانی و سیاسییەکانی واشنتۆن لەگەڵ پەکین کرد و رایگەیاند، چین لە چەند ساڵی رابردوودا بە دادپەروەرییانە مامەڵەی لەگەڵ ئەمریکادا کردووە.

لێکۆڵینەوەیەک ئاشکرایدەکات، بەکارهێنانی ژیریی دەستکرد لە جەنگی نێوان ئێران و ئەمریکا، کاریگەرییەکی گەورەی هەبووە لە گۆڕینی رەوتی شەڕەکە.

کۆمپانیای ئەنسرۆپیک راپۆرتێکی بڵاوکردووەتەوە و کاریگەرییەکانی بەکارهێنانی ژیری دەستکرد بەگشتیی و 'کڵاود' بەتایبەتی دەردەخات.

لە راپۆرتەکەدا هاتووە، لەلایەکەوە ئێران لە بەئامانجگرتنی بەشێک لە پێگە و کەشتییەکانی ئەمریکا لە ناوچەکە، ژیریی دەستکردی کۆمپانیای 'کڵاود'ـی وەک سەرچاوەیەک بۆ دروستکردنی رێبەری دەستنیشانکردنی ئامانجەکان و پێگەی کەشتییەکان و کۆکردنەوەی زانیاریی لەبارەی شێوە و جۆری فڕۆکەکان، بەکارهێناوە.

لەلایەکی دیکەشەوە، حوسییەکانی یەمەنیش لە دروستکردنی مۆدێلی پێشکەوتووی موشەک و درۆن، پشتیان بە بەکارهێنانی ئەم مۆدێلە لە ژیریی دەستکرد بەستووە بۆ کۆکردنەوەی زانیاریی ورد و دیاریکردن و کردنە ئامانجی ئامانجەکانیان.

هاوکاتی ئەمانە، روسیاش مۆدێلێکی نوێی درۆنی دروستکردووە و لە بەرانبەر ئۆکراین بەکاریدەهێنێت، کە هیچ مرۆڤێک و ئاڕاستەکەرێکی پێویستنەبێت بۆ پێکانی ئامانجەکانی، بەڵکو پشت بە ژیریی دەستکرد ببەستێت.

هەر لەو چوارچێوەیەدا، محەمەد باقر قاڵیباف سەرۆكی پەرلەمانی ئێران، یاسای نیشتمانی بۆ گەشەپێدانی ژیریی دەستكردی ئاڕاستەی مەسعود پزیشكیان، سەرۆك كۆماری وڵاتەكە كرد  بۆ پەسەندكردنی.
ئەم یاسایە كە لە 12 ماددە پێكدێت، بڕیاری دامەزراندنی رێكخراوێكی نیشتمانی سەربەخۆ لەژێر سەرپەرشتی سەرۆك كۆمار دەدات بۆ رێكخستن و گەشەپێدانی سیستەمی ژیریی دەستكرد لە وڵاتەكەدا.

حکومەتی کۆماری کۆنگۆ لە راگەیەنراوێکدا ئاشکرایکرد، ژمارەی توشبووانی ئیبۆلا لە وڵاتەکەیاندا بەزرتربووەتەوە و رێژەی گیان لەدەستانیش بۆ زیاتر لە سێ هەزار زیادی کردووە.

لە راگەیەنراوەکەی حکومەتی کۆنگۆدا هاتووە، لە ئێستادا 17ـەمین شەپۆلی ڤایرۆسی ئیبۆلا لە وڵاتەکەیاندا بڵاوبووەتەوە و ژمارەی توشبووانیش بۆ حەوت هەزار و 22 کەس بەرزبووەوە.

ئاماژەی بەوەشداوە، تائێستا ڤایرۆسەکە لە حەوت پارێزگای کۆنگۆدا بڵاوبووەوە و رێژەی گیان لەدەستدانیش بەهۆی ڤایرۆسەکەوە بۆ سێ هەزار و 398 کەس بەرزبووەوە.

ئەوەش لە کاتێکدایە، لە 50 ساڵی رابردوودا، ڤایرۆسی ئیبۆلا لە ئەفریقا بووەتە هۆی گیانلەدەستدانی زیاتر لە 15 هەزار کەس و تائێستاش بەرەسمی هیچ ڤاکسین یان چارەسەرێکی پشتپێبەستراوی نییە.

بە بەشداریی زیاتر لە 200 كاندیدی كورد، ئەمڕۆ هەڵبژاردنی گشتیی پەرلەمان و پەرلەمانی هەرێمەكان و شارەوانییەكانی سوید بەڕێوەدەچێت، زۆرینەی رەوەندی كوردیش دەنگیان بۆ سۆسیال دیموكراتەكانە.

لەلایەکەوە، زیاتر لە 170 هەزار كەس لە رەوەندی كوردی لە سوید نیشتەجێن، كە دەنگەكانیان كاریگەریی یەكلاییكەرەوە لەسەر ململانێی سەختی نێوان بەرەی چەپ و راست دەبێت، پرسی كۆچبەران و مافەكانیان بووەتە تەوەرێكی سەرەكیی بەرنامەی پارتەكان.

لەلایەکی دیکەشەوە، 64%ـی كاندیدە كوردەكان لەسەر پارتی سۆسیال دیموكراتەكان خۆیان كاندید كردووە بۆ هەڵبژاردنی پەرلەمانی گشتی و پەرلەمانی هەرێمەكان و شارەوانییەكان.

هاوکات، پارتی سۆسیال دیموكرات جەخت لە دادپەروەریی كۆمەڵایەتی، مافی ژنان و باشتركردنی خزمەتگوزارییەكان دەكاتەوە، هاوكات لەسەر داوای رای گشتی سیاسەتەكانی كۆچبەری توندتر كردووەتەوە، لەگەڵ ئەوەشدا پارتە راستڕەوەكان بانگەشەی ئەوە دەكەن لەگەڵ سەركەوتنیان، مۆدێلی سیاسەت بەگشتی لە وڵاتەكەیان دەگۆڕن.

ئەوەش لە کاتێکدایە، كاندیدە كوردەكان ئامانجی سەرەكییان چاوساغیكردن و رێنماییكردنی كۆچبەرانە بۆ خۆگونجاندن و تێگەیشتن لە یاساكان و جێگیركردنی پێگەی رەوەندی كوردی لە كایەی سیاسیی وڵاتەكەدا.

ئیلۆن مەسك و كەسایەتی بەناوبانگی كۆمپانیاكانی ژیریی دەستكرد داوا دەكەن پەرەپێدانی تەكنەلۆژیای ژیریی دەستكرد خاوبكرێتەوە.

لە جیهانیی كێبڕكێی بەدەستهێننی خێراترین و باشترین تەكنەلۆژیای ژیریی دەستكرد سام ئاڵتمان، سەرۆكی جێبەجێكاری كۆمپانیای ئۆپن ئەی ئای و ئیلۆن مەسكی ملیاردێر چوونە پاڵ داواكارییەكەی داریۆ ئامۆدی سەرۆكی كۆمپانیای ئەنسرۆپیك بۆ دانانی سنوور و پێوەرێك لە بەردەم پەرەپێدانی زیرەكیی دەستكرد.

بەوپێیەی خێرایی گەشەكردنی تواناكانی ژیریی دەستكرد رەنگە لە داهاتوودا لە توانای مرۆڤ بۆ كۆنتڕۆڵكردنی تێپەڕێت.

ئەو كەسایەتییانە داوا دەكەن بەهێزكردن و پەرەپێدانی مۆدێلەكانی ژیریی دەستكرد و بەردەستخستنیان خاوبكرێنەوە تاوەكو یاساو رێكاری پێویست پێشنیاز دەكرێت بۆ كۆنترۆڵكردنی تەواوەتیی چۆنییەتی بەركارهێنانی ژیریی دەستكرد.

ئەم مشتومڕانەش دوای دەركردنی جەیكۆب كۆكسن دێت لە كۆمیای ئەنسرۆپیك دوای بڵاوكردنەوەی چەند هۆشدارییەك لەبارەی سیستمە خودكارەكانی ژیریی دەستكرد و لە كۆنترۆڵدەرچونیان لە ماوەیەكی كەمدا و دروستكردنی هەڕەشەی گەورە لەسەر مرۆڤایەتیی.