د.ئازاد مستەفا بەڕێوەبەری گشتی تەندروستی ھەڵەبجە بە کوردسات نیوزی رایگەیاند، نەخۆشی ھەوکردنی پەردەکانی مێشک لە نێو منداڵانی ھەڵەبجە بڵاوبووەتەوە، بە شێوەیەک لە ماوەی دوو ھەفتەی رابردوودا ٢٠ تا ٣٠ منداڵ توشی ئەو نەخۆشییە بوون.

وتیشی لە ھەندێک خێزان زیاتر لە منداڵێک توشبووە، بەھۆی ئەوەی نەخۆشییەکە گوازراوەیە، بە مەبەستی رێگرتن لە بڵاوبونەوەی نەخۆشییەکە بە ھەموو شێوەیەک سەردانکردنی نەخۆش بۆ نەخۆشخانەی منداڵان قەدەغەکراوە.

مستەفا کەرعاوی، ئەندامی لیژنەی دارایی لە ئەنجومەنی نوێنەرانی عێراق رایگەیاند، لیژنەکەیان بە پێی خشتەیەک سەرەتا میوانداری وەزارەتەکانی دارایی، نەوت، بەرگری و کارەبا دەکات بۆ گفتوگۆکردن لەبارەی خەرجییەکانیان لە بودجەدا، لەبەرئەوەی ئەو وەزارەتانە زۆرترین خەرجییان ھەیە بەراورد بە وەزارەتەکانی تر.

 وتیشی، گفتوگۆی ورد دەکرێت بۆ زانینی خەرجی راستەقینەیان و ئەگەری کەمکردنەوەو گواستنەوەی پارە لە نێوان ئەو وەزارەتانەدا.

سەبارەت بە کورتھێنانیش کە ٦٤ ترلیۆن دینارە لە کۆی ١٩٩ ترلیۆن دیناری بودجە، ئەندامەکەی لیژنەی دارایی رایگەیاند، دوای رێککەوتن لەگەڵ سەرۆکوەزیران میوانداری وەزیرانی دارایی و پلاندانان دەکەن بۆ گفتوگۆکردن لەبارەی بژاردەکانی کەمکردنەوەی کورتھێنان و کەمکردنەوەی خەرجیی دەروازە ناپێویستەکان.

وتیشی، بەرزکردنەوەی نرخی بەرمیلێک نەوت کەلە بودجەدا بە ٧٠ دۆلار دیاریکراوە، ئەگەرێکی دوورە و ناکرێت گۆڕانکاری تێدا بکرێت بەھۆی مەترسیی گۆڕانکارییەکان لە بازاڕی نەوت.

موقەدەم عامر شوانی، بەڕێوەبەری راگەیاندنی فەرماندەیی پۆلیسی پارێزگای کەرکوک رایگەیاند، ھێزەکانیان لە یەکێک لە بازگەکانی سنوری پارێزگای کەرکوک ٢٣ ھاووڵاتی بیانییان لەناو بارھەڵگرێکدا دەستگیرکردووە کە ھیچ بەڵگەیەکی ھاتنە ناو عێراقیان پێنەبووە و ویستویانە بەشێوەیەکی ناسایاسی بێنە ناو کەرکوکەوە و شۆفێری بارھەڵگەرەکەش دەستگیرکراوە.

لای خۆیەوە، فەرماندەیی ھێزەکانی پاسەوانی سنوری عێراق رایگەیاند، ھێزێکی پاسەوانی سنور لە سنووری پارێزگای واست ١٢ ھاووڵاتی پاکستانییان دەستگیرکردووە کە لە ئێرانەوە ھاتوون و ھەوڵیان داوە بە شێوەیەکی نایاسایی بێنە ناو عێراقەوە.

دەقی پەیامەکە...

‎رۆژی رۆژنامەگەری کوردی و دەرچونی یەکەمین ژمارەی رۆژنامەی کوردستان پیرۆزبێت..

‎لە یادی سەدو بیست وپێنج ساڵەی رۆژنامەگەرییکوردییدا، ئەم رۆژە گرنگە مێژووییە لە تەواوی میدیاکاران و رۆژنامەنوسان و ئەھلی قەڵەم و ئازادی خوازان پیرۆزدەکەین. 

‎بە پرەنسیپی نەگۆرو بروای قوڵی سەرۆک مام جەلال؛ کە خولقێنەری ئازادی و سەربەستبووە لەسەردەمی شۆرش و دوای راپەرین و حکومرانی خۆبەخۆی کوردیدا؛ بەو کلتورە ئازادی خوازەو پێشەنگە مەدەنییە؛ بە تەواوی پشتگیری مافی رۆژنامەنوسانین و لەگەڵ راستی بێژیو پاراستنی ئیتیکی رۆژنامەنوسیداین، کە دەبێت رۆژنامەنوسان ھەمیشە پەنای بۆ ببەن و دوربن لە کلتوری رۆژنامەگەری زەردو ناراست کە بەرھەمەکەی چەواشەو خەڵەتاندنە، و دواجار زیان بە ئارامی کۆمەڵایەتی دەگەیەنێت. 

‎بەداخەوە ئێستا بەمەبەست ھەندێک پشتگیری ئەو رەوتە ناپەسەندە دەکەن!

‎لەم یادەدا جەخت لەوە دەکەینەوە کە “دەسەڵاتی سیاسی و فەرمان رەوا؛ دەبێت پارێزەری سەربەستی و ئازادی بێت، بەدیدی بەرتەنگ؛ لەبەر راستی بێژی رۆژنامەنوسان زیندان نەکات”. 

‎ھەر لەم رۆژەدا؛ درود دەنێرین بۆ گیانی پاکی ئەو رۆژنامەنوسانەی لە پێناو راستی و دەرخستنیدا شەھیدکران و گیانیان لە پێناو پەیامی راستیدا بەخشی. لەکۆتایدا  دووبارە رۆژی رۆژنامەگەری کوردی پیرۆزبێت.


‎باڵیۆز د.محمد سابیر
‎سەرۆکی دامەزراوەی سەرۆک جەلال تاڵەبانی

کونسڵخانەی ئەمریکا لە ھەولێر لە پەیامێکدا بەبۆنەی یادی رۆژنامەگەری کوردی رایگەیاند، ئەمڕۆ ڕۆژی ڕۆژنامەگەریی کوردیە، بۆنەیەکە بۆ بەرزڕاگرتنی ئەو ڕۆڵە گرنگ و سەرەکیەی میدیا لە ھەموو حوکمێکی دیموکراتیدا دەیگێڕێت.

ئاماژەی بۆ ئەوشکردووە، جۆ بایدن رایگەیاندووە، ئێستا کاری ڕاگەیاندنی ئازاد و سەربەخۆ لە ھەموو کات زیاتر گرنگە، بەردەوام دەبن لە پشتیوانییکردن لە ئازادیی ڕاگەیاندن و ڕوماڵکردنی ئازاد و بێلایەن و پڕۆفێشنەڵانەی ھەواڵەکان و دەستڕاگەیشتن بە زانیاری لە ھەرێمی کوردستان، ھاوکات ڕێز لەو ڕۆژنامەنووسانەش دەگرن کە بەردەوامن لە پێدانی ھەواڵی مانادار بە خەڵکی ھەرێمی کوردستان و لەو پێناوەشدا دەکەونە بەر مەترسیی زۆر.

لە رۆژی جەژندا شەڕو پێکدادان لە نێوان عەرەبە ھاوردەکانی گوندی پەلکانەی سەر بە ناحیەی سەگەڕان و دانیشتوانی گوندەکە دروستبوو، ھێزەکانی سوپای عێراقیش گەیشتنە ناوچەکە و کۆنتڕۆڵی رەوشەکەیان کرد، لە ئێستاشدا سوپای عێراق و پۆلیس لەنێو گوندەکەدان.

فەرماندەیەکی پێشمەرگە لە سنوری پەلکانە بە کوردسات نیوزی راگەیاند، دوای پەیوەندییەکانی ھێزی پێشمەرگە و سوپای عێراق و فشارەکان، ئەو عەرەبانەی لە ناوچە و شارەکانی دیکەوە ھاتبوونە پەلکانە بۆ ھاوکاریکردنی عەرەبە ھاوردەکان گوندەکەیان چۆڵکرد.

وتیشی جوڵە بە ھێزی پێشمەرگە نەکراوە بەرەو پەلکانە، ھێزەکانی پێشمەرگە ئامادەن بۆ ھەر ئەگەرێک لە ناوچەکەروبدات.

فەرماندەیەکی پێشمەرگە دەڵێت، فەرماندەکانی پێشمەرگە لەگەڵ سوپای عێراق لە پەیوەندیدان، سوپای عێراقیش بەڵینی داوە رێگر بێت لە سەرھەڵدانەوەی شەڕ.

دەستەی ناوچە کوردستانییەکانی دەرەوەی ئیدارەی ھەرێم لە راگەیەنراوێکدا دەڵێت، لەیەکەم رۆژی جەژنی رەمەزان عەرەبی ھاوردە پەلاماری دانیشتوانی کوردی گوند پەڵکانەیان داوەو خۆشی جەژنیان گۆڕیوە بۆ پشێوی و ھەڕەشەو چاوسورکردنەوە، پەلاماردان و داگیرکردنی گوندەکان و خاپورکردنیان لە سایەی  حکومەتەکانی دوای روخانی سەدام بەردەوامە ، ئەوەش دادگاو دادپەروەری عێراقی دەخاتە بەردەم بەرپرسیارییەتی گەورەوە، لە کاتێکدا ئیدانەو نیگەرانی قوڵی خۆیان ڕادەگەیەنین، چاوەڕێن لە کابینەکەی محەممەد شیاع سودانی سنورێک بۆ ئەم جۆرە دژایەتیانە دابنرێت.

دەستەی ناوچە کوردستانییەکان داوا دەکات دەستور و یاسا نوێکان ببنە بنەما بۆ چارەسەرکردنی کێشەکان چونکە پەلامار و ھەڕەشەی چەکداری  ناتوانن ھاووڵاتیان کورد لەو ناوچانە بێدەنگ بکەن.

دووپاتیشیدەکاتەوە، جێبەجێکردنی ماددەی ١٤٠ی دەستور بنەمای چارەسەرکردنی یەکجاری کێشەکانەو داوا لە سەرۆکایەتی کۆمارو وەزیر و فراکسیۆنە کوردستانییەکان لە بەغداد دەکات توانا دەستورییەکانیان بۆ جێبەجێکردنی ماددەکە بخەنەگەڕ و ھەوڵی زیاتر بدەن بۆ نەەَشتنی ئەو جۆرە یاساشکێنییە.

دەقی پەیامەکەی وەزارەتی رۆشنبیری‌و لاوان:

 

125 ساڵ لەمەوبەر، میقداد مەدحەت بەدرخان یەكەم ژمارەی ڕۆژنامەی (كوردستان)ی دەركرد، دەركردنی ئەو ڕۆژنامەیە بە وەرچاخانێكی گرنگی كولتووری لە مێژووی گەلی كوردستاندا دادەنرێت، لەو كاتەوە كاروانی ڕۆژنامەگەریی كوردی بەردەوامە‌و خزمەت بە وشەی پیرۆزی كوردی دەكات.

لەم یادە پیرۆزەدا، پیرۆزبایی لە ڕۆژنامەنووسانی كوردستان  بە هەموو دەنگ‌و ڕەنگە جیاوازاكانەوە دەكەین، داواكارین بەردەوام بن لە خزمەتی كاروانی وشەی پیرۆزی كوردی‌و بە گیانێكی بەرزی نیشتمانی‌و نەتەوەییەوە مامەڵە بكەن.
لەم یادەدا دروود بۆ گیانی پاكی ئەو ڕۆژنامەنووسانە دەنێرین كە گیانی خۆیان بە خاك‌و گەلی كوردستان بەخشی‌و بوونە سیمبولی ئازادی.

وەزارەتی رۆشنبیری‌و لاوان، وەك هەمیشە لەسەنگەری رۆژنامەنووسانی كوردستاندا دەبێت‌و پشتیوانی خواست‌و داوا ڕەواكانیان دەبێت.

دووبارە پیرۆزە ئەم یادە مێژووییە.

 

وەزارەتی ڕۆشنبیری‌و لاوان

22ی نیسانی 2023

سەرچاوەیەک لە پۆلیسی کەرکوک بە کوردسات نیوزی رایگەیاند، شەوی پێنجشەممە شۆفێری ماتۆڕسکیلێک لە بازاڕی پەنجا عەلی کەرکوک ھەوڵیداوە بۆمبێک لە نێوبازاڕەکەدا دابنێت، بەڵام ھێزەکانی پۆلیس رووبەڕووی دەبنەوە و شکستی پێدەھێنن، بەڵام لەو رووبەرووبوونەوەیەدا پۆلیسێک بە سەختی برینداردەبێت.

پۆلیسی کەرکوک راشیگەیاند، دوای ھەڵھاتنی تاوانبارەکە پۆلیسی کەرکوک توانیان لە کەمتر لە ٢٤ سەعات دەستگیری بکەن و رادەستی دادگای بکەن.

ھۆبەی راگەیاندنی بەڕێوەبەرایەتی کۆمەڵگەی دەروازەی نێودەوڵەتی باشماخ بڵاویکردەوە، تەنھا لە یەکەم رۆژی جەژنی رەمەزاندا کاروباری بازرگانی و گومرگی بۆ ماوەی ٢٤ سەعات راگیرا، بەڵام لە دووەم رۆژی جەژنەوە کاروبارەکان ئاسایی دەبنەوە. 

ھاوکات ھاتووچۆی گەشتیاری بەھیچ شێوەیەک لە دەروازە سنورییەکان رانەگیراوە و ٢٤ سەعات لە جەژن و پشووەکانیشدا بەردەوامی ھەیە. 

دەقی پیرۆزباییەکە .... 

لە یادی سەدو بیست وپێنج ساڵەی رۆژنامەگەریی کوردییدا، گەرمترین پیرۆزبایی لە رۆژنامەنووسان و میدیاکارانی  کوردستان دەکەین.

لە سۆنگەی بڕوابوونمان بەپرەنسیپی نەگۆڕی (  نان و ئازادی) و پشتیوانییە بەردەوامەکانی کەلتوری ئازادیخوازی سەرۆک مام جەلال بۆ سەربەستی راگەیاندن و ئازادی رۆژنامەنووسان، هەمیشە پشتگیریی لە مافەکانی رۆژنامەنووسانی هەقبێژ دەکەین و پشتیوانی بۆ ئەو رۆژنامەنووسانە رادەگەیەنین کە لەسەر رادەربڕین و وشە و هەواڵی راستبێژیی، پانتایی ئازادی و مافی رەخنەگرتنیان لێ بەرتەسک  دەکرێتەوە و لە رێی داتاشینی کەیسی پڕ لە بوختانەوە دەخرێنە زیندانەکانەوە. داوای دەستبەچێ ئازادکردنیان دەکەین بەتایبەتی کە ئەم کەیسە داتاشراوانە لای ناوەندە جیهانییەکان و  دونیای ئازادیخواز وێنەیەکی ناشیرین  بۆ هەرێمەکەمان دروست دەکات وەکو ئێستا بەداخەوە دروستی کردووە.

هەر لەم بۆنەیەدا بۆ گشت رۆژنامەنووسانی کوردستانی تەئکید دەکەینەوە ئێمە بە هەموو جۆرێک دژی ئەو جۆرە سیاسەتی خنکاندنەین کە ئێستا لە ناوچەیەکەی دیاریکراو وەک ترس و تۆقاندن دژ بە دەنگ راستی و ناڕازییەکان لە ئیدارەدانی هەرێمەکەمان دەکرێت.

درود بۆ گیانی ئەو رۆژنامەنووسانەی لەپێناوی بڵاوکردنەوەی هەواڵ و زانیاری و راستیدا گیانیان بەخشی 
سڵاو لەو رۆژنامەنووسانەی کۆڵ نادەن لە گەیاندنی راستییەکان وەکو خۆی.

مەکتەبی سیاسی 
یەکێتیی نیشتمانیی کوردستان

 

ئیبراھیم عەبدولمەجید، وتەبێژی دەستەی گەشتوگوزاری ھەرێم بە کوردسات نیوزی راگەیاند، لە سێ مانگی سەرەتای ئەمساڵدا زیاتر لە دوو ملیۆن گەشتیاری ناوخۆ و بیانی و شارەکانی ناوەڕاست و خوارووی عێراق ھاتوزنەتە ھەرێمی کوردستانەوە.

راشیگەیاند، بەپێی ئەو پلانەی دایانناوە پێشبینیدەکەن تا کۆتایی ئەمساڵ زیاتر لە حەوت ملیۆن گەشتیار سەردانی ناوچە گەشتیارییەکانی کوردستان بکەن.

وتەبێژی دەستەی گەشتوگوزاری ھەرێم باسی لەوەشکرد، ئامادەکاریی تەواویان بۆ رۆژانی جەژن کردووە، تاوەکو ئەو گەشتیارانەی ھاتوونەتە شارەکانی ھەرێم سەرجەم پێداویستییەکانیان بۆ دابین بکەن.

ماکەوان جەمیل بەڕێوەبەری بانکی ناوەندی ھەرێم لە سلێمانی بە کوردسات نیوزی راگەیاند، ئەو ھەواڵانە دوورن لەراستییەوە کە باس لەوەدەکەن فەرمان بە بانکەکان کراوە بۆ ئەوەی مووچەی خانەنشینانی پێشمەرگەی ئەیلوول رابگیرێت، جەختیشدەکاتەوە کە بانکەکان ھیچ کاتێک جیاوازی لە نێوان خەبات و تێکۆشانی پێشمەرگەی ھیچ حزبێکدا ناکەن.

ئاماژەی بەوەشکرد، تائێستا مووچەی خانەنشینان بۆ بانکەکان نەنێردراوە تا جیاوازی لە نێوانیاندا بکرێت، تەنانەت بەشێک لە بەڕێوەبەرایەتییەکانی شارەوانیش مووچەیان وەرنەگرووە، بۆیە لەئێستادا پلەبەندییان بۆ کردوون و ئەمڕۆ مووچەی کرێکارانی شارەوانی دابەش دەکەن.

بەگوێرەی خشتەی دابەشکردنی مووچە ئەمڕۆ خانەنشینانی سەربازی مووچەی مانگی ئازار وەردەگرن، بەڵام لە ھەولێر و دھۆک مووچەی خانەنشینی پێشمەرگەکانی یەکێتی راگیراوە و ھێزە ئەمنییەکانیش رێگەیان نەداوە خانەنشینانی یەکێتی بچنە بەردەم بانکەکان.

دەقی پرسەنامەکە...

بەڕێز کاک شێخ قادری شێخ سەدرەدینی سندۆڵان بەڕێزان لە خانەوادەی کۆچکردوو و خزمانی سندۆڵان بۆ کۆچی دوایی خاتوو (حەبیبە خدر رەسوڵ) ھاوسەری کەسایەتی خوالێخۆشبوو کاک سەدرەدینی سندۆڵان، پرسە و ھاوخەمی قووڵی خۆمان ئاڕاستەی ئێوە و بنەماڵە تێکۆشەرەکەتان دەکەم کە نموونەی باڵای خەبات و تێکۆشانن لەپێناو کوردستان.

لەخوای گەورە داواکارم کۆچکردوو بە بەھەشتی بەرین شاد بکات و سەبووری و ئارامی بەھەموولایەک ببەخشێت.

دڵسۆزتان 
بافڵ جەلال تاڵەبانی 
سەرۆکی یەکێتیی نیشتمانیی کوردستان 

راگەیاندنی بەڕێوەبەرایەتی گشتی بانکی ناوەندی ھەرێم لە سلێمانی لە روونکردنەوەیەکدا بۆ رای گشتی، دەنگۆکان لەبارەی راگرتنی مووچەی توێژێکی دیاریکراو لە سلێمانی رەتدەکاتەوەو دەڵێت، ئەوەی سەیرە بەڕێوەبەری گشتی بانکە بازرگانیەکانی ھەرێم، پێچەوانەی سەرجەم رێکارە ئیداری و یاساییەکان فەرمانیکردووە بە راگرتنی  موچەی خانەنشینانی پێشمەرگە دێرینەکانی یەکێتیی نیشتمانیی کوردستان لە ھەولێر ، بۆیە داوا دەکەن لێپرسینەوەی لەگەڵ بکرێت.

بەڕێوەبەرایەتی گشتی بانکی ناوەندی ھەرێم لە سلێمانی ئاماژەی بەوەشداوە، بە فەرمانی وەزارەتی دارایی بۆ موچەی مانگی ( ٢ و ٣) لەگەڵ بودجەی سیادی داوای ١٨١ ملیار دینار لە ئیدارەی سلێمانی کراوە، ئەوە لەکاتێکدا لەماوەی رابردودا بە چەندین یاداشت وەزارەتیان ئاگادار کردوەتەوە لە  دۆخی داھاتی دارایی ئیدارەی سلێمانی لەتوانایدا نیە بڕی داواکراو دابین بکات بۆ موچە پێش جەژنی رەزامەنی پیرۆز، بەڵام بەھەند وەرنەگیرا

دووپاتیشیدەکاتەوە، لە سەرەتای دروستبونی گرفتەکە نوسراوی رەسمیان ناردوە بۆ وەزیر و سەرجەم لایەنی پەیوەندیدار کە موچەی تێکۆشەرانی خانەنشینی ئەیلول و گوڵان بەھیچ شێوەیەک نەوەستاوە وە تاکو ئێستا دابەش دەکرێت وەک لە خشتەی رەسمی بڵاوکراوەی وەزارەتی دارایی و ئابوری دیاری کراوە. لەئێستاشدا ئامادەیی تەواویان ھەیە بەبونی سیولەی پێویست لە بانکەکانی سنورەکە تا درەنگانی شەو و لەرۆژانی جەژنی رەزمەزانی پیرۆزیش موچە دابەش بکرێت و ھیچ جیاکاریەک لەھیچ شەریحەیەک نەکراوە.