کوردستان
نوێنەری گشتی مامۆستایانی گرێبەست رایدەگەیەنێت، نزیكەی دوو هەزار و ٥٠٠ وانەبێژی لەسەر كار لادراو دەكرێنە گرێبەست.
عەلی رەئوف، نوێنەری گشتی مامۆستایانی گرێبەست بە كوردسات نیوزی راگەیاند، لە كۆی ٣٧ هەزار و ٩٣٣ مامۆستای گرێبەست، دوو هەزار ٤٥٣ مامۆستایان گرێبەستەكانیان هەڵوەشاوەتەوە بەهۆی ئەوەی لە فەرمانگەی دیكەی حكومی بە هەمیشەیی دامەزراون، لە شوێنی ئەو مامۆستایانەش، وانەبێژی لەسەر كارلادراو بە گرێبەست دادەمەزرێنرێن.
ئەوەشی خستەڕوو، دامەزراندنی وانەبێژەكان لە سنووری یەك پەروەردەی دیاریكراودا نابێت، بەڵكو لە هەر پەروەردەیەك مامۆستایەكی گرێبەست كە گرێبەستەكەی هەڵوەشابێتەوە ئەوا وانەبێژێك لە جێگەكەی دادەمەزێنرێت.
راشیگەیاند، تائێستا لە ٨٥٪ـی مامۆستایانی گرێبەست بایۆمەتریان كردووە و لە كۆی ئەو رێژەیە گرێبەستی ئەو مامۆستایانە هەڵوەشاوەتەوە، بۆیە پێدەچێت لەو ٪١٥ـەی كە ماوە، ژمارەیەك مامۆستای دیكە گرێبەستەكانیان هەڵوەشێتەوە و وانەبێژ لە شوێنیان دابنرێت.
بافڵ جەلال تاڵەبانی سەرۆکی یەکێتیی نیشتمانیی کوردستان، پرسەنامەیەک ئاڕاستەی حاکم سابیر، ئەندامی ئەنجومەنی سەرکردایەتیی یەکێتی دەکات بەهۆی کۆچیدوایی (مستەفا سمایل مەلا)ـی برایەوە و دەڵێت، " بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوە، كەسوكار و بنەماڵە تێكۆشەرەكەتان دەكەم كە هەمیشە نموونەی خەبات و نیشتمانپەروەری بوون".
دەقی پرسەنامەکەی بافڵ جەلال تاڵەبانی...
هەڤاڵی بەڕێزمان کاک حاکم سابیر، ئەندامی ئەنجومەنی سەرکردایەتیی یەکێتیی نیشتمانیی کوردستان
کۆچی دوایی (مستەفا سمایل مەلا)ی براتان لەدڵەوە نیگەرانیکردین. بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوە، كەسوكار و بنەماڵە تێكۆشەرەكەتان دەكەم كە هەمیشە نموونەی خەبات و نیشتمانپەروەری بوون.
لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
دەرباز کۆسرەت رەسوڵ، ئەندامی مەکتەبی سیاسی یەکێتیی نیشتمانیی کوردستان بەهۆی کۆچیدوایی هونەرمەند زاهیر عەبدوڵا پەیامێکی هاوخەمی بڵاودەکاتەوە و دەڵێت، "کۆچکردوو یەکێک بوو لەو هونەرمەندانەی توانیبووی جێی خۆی لە دڵی هەموواندا بکاتەوە و بە هونەرەکەی خزمەتێکی گەورەی پێشکەش بە شانۆو درامای کوردی کرد".
دەقی پەیامەکەی دەرباز کۆسرەت رەسوڵ...
کۆچی دوایی هونەرمەندی ئازیزی شاری هەولێر کاکە زاهیر عەبدوڵڵا لە دڵەوە خەمباری کردین، کاک زاهیر جێ پەنجەی دیارە لەناو هونەری شانۆو درامای کوردیدا، یەکێک بوو لەو هونەرمەندانەی توانی بووی جێی خۆی لە دڵی هەموواندا بکاتەوەو بە هونەرەکەی خزمەتێکی گەورەی پێشکەش بە شانۆو درامای کوردی کرد.
پرسە و سەرەخۆشی خۆم ئاراستەی خانەوادە بەڕێزەکەی دەکەم، هەروەها سەرەخۆشی لە هونەرمەندانی شاری هەولێرو کوردستان دەکەم کە ئەمڕۆ هاوڕێیەکی ئازیزیان لەدەستدا.
دەرباز کۆسرەت رەسوڵ
ئەندامی مەکتەبی سیاسی
یەکێتیی نیشتمانیی کوردستان
وەزارەتی پلاندانانی هەرێم رایدەگەیەنێت، قۆناغی دووەمی پرۆسەی سەرژمێری گشتی سەرەڕای چەندین كێشە و گرفتی تەكنیكی و مەیدانی بە سەركەوتوویی جێبەجێكراوە.
وەزارەتی پلاندانانی هەرێم لە راگەیەندراوێكدا بڵاویكردەوە، سەرەرای بوونی دەیان ئاستەنگی تەكنیكی و كێشەی مەیدانی توانراوە لەماوەی ١٤ رۆژدا قۆناغی دووەمی پرۆسەی سەرژمێری گشتی بە سەركەوتووانە جێبەجێبكرێت.
ئەوەشی خستووەتەڕوو، لەماوەی سێ رۆژی قۆناغی دووەمی پرۆسەكەدا، زیاتر لە ١٠٠ هەزار پەیوەندی تەلەفۆنی كراوە بۆ سەنتەری پەیوەندییەكان لە ژووری ئۆپراسیۆنی سەرژمێری لە دەستەی ئاماری هەرێم و توانراوە وەڵامی زۆرینەی پەیوەندییەكان بدرێتەوە و كاریان لەسەربكرێت.
هاوكات، وەزارەتی پلاندانانی هەرێم داوا لە دانیشتوانی ناوچەكانی ماددەی ١٤٠ دەكات، بەشداری قۆناغی سێیەمی پرۆسەی سەرژمێری گشتی بكەن، كە پڕكردنەوەی فۆڕمی سەرژمێرییە و دواتر سودی لێ وەردەگیرێت بۆ دیاریكردنی بارودۆخی ئابووری، كۆمەڵایەتی، پەروەردەیی و تەندروستی و دیموگرافی و بوارەكانی تر.
قوباد تاڵەبانی لێپرسراوی مەکتەبی سکرتارییەتی سەرۆک مام جەلال، بۆ کۆچیدوایی هونەرمەند زاهیر عەبدوڵا پرسەنامەیەک ئاڕاستەی هونەرمەندانی کوردستان و خێزان و خانەوادەی کۆچکردوو دەکات و دەڵێت، "زاهیر عەبدوڵا هونەرمەندێکی بەئەزموون و ئەکتەرێکی دیاری کوردستان بوو کەجێ دەستی بە بوارەکانی شانۆگەریی و دراما و فیلمی سینەمایی و چیرۆکی تەمسیلیەوە بە ڕوونی دیارە".
دەقی پرسەنامەکە...
بەڕێزان خێزان و خانەوادەی هونەرمەند زاهیر عەبدوڵا
بەڕێزان هونەرمەندانی کوردستان
زۆر بەداخەوە هەواڵی کۆچی دوایی هونەرمەند (زاهیر عەبدوڵا)م بیست. هاوبەشی خەمتانم و پرسەو سەرەخۆشی لەبنەماڵە دڵسۆزەکەتان و هەموو هونەرمەندانی کوردستان ئەکەم.
کۆچکردوو زاهیر عەبدوڵا هونەرمەندێکی بەئەزموون و ئەکتەرێکی دیاری کوردستان بوو کەجێ دەستی بە بوارەکانی شانۆگەریی و دراما و فیلمی سینەمایی و چیرۆکی تەمسیلیەوە بەڕوونی دیارە.
خوای گەورە لێی خۆش بێت و جێگەی بەهەشت بێت، سەبوری و دڵنەواییش بەهەموو لایەک ببەخشێت.
انا لله وانا الیه راجعون
قوباد تاڵەبانی
لێپرسراوی مەکتەبی سکرتارییەتی سەرۆک مام جەلال
تەنها لەماوەی یەك رۆژدا یەك ئۆنسە زێڕ لە بازاڕەكانی جیهاندا نزیكەی ٤٣ دۆلار نرخەكەی بەرزبووەوە و بەوەش لەماوەی یەك مانگی رابردوودا ٦١ دۆلار چووەتەسەر نرخەكەی.
چەند رۆژێكە نرخی زێڕ لە بازاڕەكانی جیهاندا رووی لە بەرزبوونەوە كردووە، لە ماوەی دوو رۆژیشدا لە هەرێمی كوردستان هەر مسقاڵێك نزیكەی ١٨ هەزار دیناری عیراقی بەرزبووەتەوە.
ئەمڕۆش نرخی ئۆنسەیەك زێڕ لە بازاڕە داراییەكانی جیهاندا ٢ هەزار و ٧١٥ دۆلاری تێپەڕاند، بەوەش لە بازاڕەكانی هەرێمی كوردستان نرخی زێڕ زیاتر بەرزبووەوە، بە شێوەیەك نرخی یەك مسقاڵ زێڕی عەیارە ٢٤ بە ٦٦٨ هەزار و عەیارە ٢١ بە ٨٥٨ هەزار دینار مامەڵەی پێوەكرا.
ئەنجومەنی كۆمیسیارانی كۆمیسیۆنی هەڵبژاردنەكانی عیراق بۆ پەسەندكردنی ئەنجامی هەڵبژاردنی پەرلەمانی كوردستان كۆدەبێتەوە.
سەرچاوەیەك لە كۆمسیۆنی باڵای سەربەخۆی هەڵبژاردنەكانی عیراق بە كوردسات نیوزی راگەیاند، رۆژی یەكشەممە یاخود دووشەممە ئەنجومەنی باڵای كۆمیسیارانی كۆمیسیۆنی باڵای سەربەخۆی هەڵبژاردنەكانی عیراق كۆدەبێتەوە بە مەبەستی پەسەندكردنی ئەنجامەكانی هەڵبژاردنی خولی شەشەمی پەرلەمانی كوردستان.
وتیشی، دوای سەپەندكردنی ئەنجامەكان، رادەستی سەرۆكایەتی هەرێمی كوردستان دەكرێت، سەرۆكایەتی هەرێمی كوردستانیش وادەی یەكەم كۆبوونەوەی پەرلەمانی كوردستان دیاریدەكات.
رێژەی بەشداری لە سەرژمێری لە هەولێر گەیشتە ١٠٠٪ و لە سلێمانیش ٩٩.٩٩٪ سەعات ١٢ ی ئەمشەویش قۆناغی دووەمی پڕۆسەكە كۆتایی دێت و قەدەغەی هاتوچۆی نێوان پارێزگاكان هەڵدەگیرێت.
دڵزار حەمەساڵح بەڕێوەبەری ئاماری هەولێر بە كوردسات نیوزی راگەیاند، رێژەی بەشداری لە سەرژمێری لە پارێزگای هەولێر گەیشتە ١٠٠ ٪.
هاوكات سەرچاوەیەك لە وەزارەتی پلاندانانی عیراق بە كوردسات نیوزی راگەیاند، رێژەی بەشداری لەسەرژمێری لە پارێزگای سلێمانی گەیشتووەتە ٩٩.٩٩٪ .
عەبدولزەهرە هنداوی وتەبێژی وەزارەتی پلاندانانی عیراق دەڵێت، هەفتەی داهاتوو دوای كۆكردنەوەی داتاكان ئەنجامی بەرایی سەرژمێری گشتی دانیشتووان رادەگەیەنرێت، دوو مانگ دواتریش ئەنجامی كۆتایی رادەگەیەنرێت.
وتیشی تیمەكان بەئامادەییەكی تەواو بەردەوامن لە سەردانیكردنی هاوڵاتییان بۆ ئەوەی تا سەعات ١٢ی ئەمشەو كە وادەكە درێژكراوەتەوە سەرجەمیان تۆماربكرێن.
هاوكات میقداد میری وتەبێژی لیژنەی باڵای ئەمنی سەرژمێری رایگەیاند، سەعات ١٢ی ئەمشەو قەدەغەی هاتوچۆی نێوان پارێزگاكان هەڵدەگیرێت.
پڕۆژەیاسای هەڵوەشاندنەوەی قەیوم رەوانەی پەرلەمانی توركیا كرا، دەم پارتی دەڵێت پێویستە پڕۆژەكە پەسەند بكرێت.
هەر چوار فراكسیۆنی دەم پارتی و جەهەپە و ئی پارتی و فراكسیۆنی هاوبەشی ئایندە و سەعادەت لە پەرلەمانی توركیا پرۆژە یاسایەكیان پێشكەشی سەرۆكایەتیی پەرلەمان كرد و رایانگەیاند: قەیوم پێچەوانەی دەستوری وڵاتەكە و دەبێت هەڵبوەشێنرێتەوە.
بەپێی ئەو پڕۆژە یاسایە كە پێنج حزبی دیكەی توركیا پشتیوانی دەكەن، دورخستنەوەی سەرۆكی شارەوانییەكان و دانانی قەیوم لە جێگەیان، پێچەوانەی ماددەكانی یەك، پێنج، ١٢٣ و ١٢٧ـی دەستوری توركیایە.
ئایشەگوڵ دۆغان، وتەبێژی پارتی دیموكراتی و یەكسانی گەلان دەم پارتی رایگەیاند؛ بەهۆی گۆڕانكارییەكانی رۆژهەڵاتی ناوەڕاست توركیا پێویستی بە چارەسەری پرسی كوردە و دەبێت پشتیوانیی لە ئۆپۆزسیۆن بكرێت دژی سەپاندنی قەیوم لە وڵاتەكە.
هاوكات گۆكهان ئایدن بریكاری سەرۆكی فراكسیۆنی جەهەپە ئاماژەی بەوەكرد، پشتیوانی دە لایەن لە پڕۆژە یاساكە گرنگە بۆ هەڵوەشاندنەوەی قەیوم.
تیمی نیشتمانی گۆڕە بە كۆمەڵەكان هەڵدەستێت بە هەڵمەتی كۆكردنەوەی زانیاری و وەرگرتنی نمونەی "دی ئێن ئەی" كەسوكاری ئەنفالكراوان ئەوانەی لەسەردەمی رژێم بێسەروشوێن كران.
تیمی نیشتیمانی گۆڕە بە كۆمەڵەكان لە پەیمانگای پزیشكی دادی بەغداد و فەرمانگەی گۆڕەبەكۆمەڵەكانی دەزگای شەهیدانی عیراق بە هەماهەنگی نووسینگەی شاناز ئیبراهیم ئەحمەد خانمی یەكەمی عیراق و رێكخراوی(ئای سی ئێم ئۆ)ی نێودەوڵەتی هەڵدەستێت بە هەڵمەتی كۆكردنەوەی زانیاری و وەرگرتنی نمونەی خوێن بۆ "دی ئێن ئەی"بۆ كەسوكاری ئەنفالكراوان.
هەڵمەتەكە لە كەلار و ناحیەی رزگاری لە سەعات نۆ بەیانی تاكو دووی دوای نیوەرۆ بەڕێوەدەچێت و پێویستە كەس و كاری ئەنفالكراوان كارتی نیشتیمانی یەكگرتوو و یان ناسنامەی باری كەسیان پێبێت.
لە چەند شارێكی توركیا رێگە نادرێت هونەرمەندانی كورد كۆنسێرت سازبكەن و كۆنسێرتەكانیان هەڵوەشێنراوەتەوە.
پەیامنێری كوردسات نیوز رایگەیاند، لەماوەی ئەم مانگەدا كۆنسێرتی ژمارەیەك هونرمەندی كورد لەچەند شارێكی توركیا بەتایبەت ئەو شارانەی كە سەرۆك شارەوانییەكانیان سەر بە ئەكەپە و جەهەپەن هەڵوەشێنراونەتەوە.
وتیشی لە ٨ی ئەم مانگە كۆنسێرتەكەی هونەرمەند رۆژدا شەنسێس لە ئیستەنبوڵ بەبێ هیچ هۆكارێك هەڵوەشێنراوەتەوە، هەروەها كۆنسێرتەكەی هونەرمەند دڵن رۆنی لە ناوەندی ڕۆشنبیری شاری شیشلی هەڵوەشێنراوەتەوە.
پەیامنێری كوردسات نیوز باسی لەوەشكرد، لە 15ی ئەم مانگەش، كۆنسێرتەكەی ئازاد بێران لە هۆڵی شارەوانی ئەنتالیا موراتپاشا بە بیانوی كۆبونەوە لە هۆڵەكە هەڵوەشێنراوەتەوە، هەروەها ئیلكای ئەكای هونەرمەندیش رایگەیاندوە، كۆنسێرتەكەی لە بورسا عوسمانغازی لەلایەن قایمقامیەتی قەزاكە قەدەغە كراوە.
لە شاری مێردین لە باكوری كوردستان، نارەزایەتییەكان دژی دەستەبەسەرداگرتنی شارەوانی مێردین بەردەوامە.
دەستپێشخەری بۆ ئازادی و هونەر لەبەردەم شارەوانی مێردین گردبونەوە و لە راگەیەنراوێكدا ئیدانەی دوورخستنەوەی سەرۆكی شارەوانی كرد و ئاماژەی بۆ ئەوەكرد، كودەتا بەسەر بەڕێوەبەرییە هەرێمیەكان و گەلی كورد و داكۆكیكارانی ماف و ئۆپۆزسیون لەبەرچاو نەگرتنی سەرەتایترین مافەكانیانە و قبوڵی ناكەن.
راشیگەیاند، لە ئێلحەوە تاوەكو خەلفەتی، لە مێردینەوە تاوەكو ئەسەنیورت و جولەمێرگ لە هەموو شوێنێك بەردەوام دەبن لە نارەزایەتی و گردبونەوە و خۆپیشاندان.
هاوكات هاوسەرۆكی شارەوانی مێردین كە لە پۆستەكەی دوورخراوەتەوە رایگەیاند، لە ماوەی هەشت ساڵی قەیومدا هێرشی زۆر كراوەتە سەر هونەر و هونەرمەندان، لە ماوەی هەشت ساڵدا هیچ كۆنسێرت و فیستیڤاڵێك نەكراوە، لەبەر ئەوەی سیستەمی قەیوم دژایەتی كلتور هونەری گەل و دوژمنایەتی ناسنامە جیاوازەكان دەكات.
وەزیری دەرەوەی توركیا دەڵێت ئامادەكاری بۆ دەستپێكردنەوەی هەناردەی نەوتی هەرێم دەكەن و پێویستە هەریچم و بەغداد بڕیاری لەسەر ئەو پرسە بدەن.
هاكان فیدان وەزیری دەرەوەی توركیا لە وتارێكدا لە پەرلەمانی وڵاتەكەی رایگەیاند، پەیوەندییەكانی توركیا لەگەڵ هەولێر لەڕادەبەدەر باشە، هەوڵی چارەسەركردنی كێشەكانی نێوان بەغداد و هەولێریش دەدەن.
ئاماژەی بۆ ئەوەشكردوە، ئامادەكارییان بۆ دەستپێكردنەوەی هەناردەی نەوتی هەرێم كردووە، بەڵام پێویستە بەغداد و هەولێریش كۆببنەوە و بڕیار لەسەر ئەو بابەتە بدەن، هیواشی خواست بەمنزیكانە بۆرییەكە بكرێتەوە.
سەبارەت بە پرۆژەی رێگەی گەشەپێدان، هاكان فیدان رایگەیاند، توركیا گرنگە بەو پرۆژەیە دەدات و بۆ یەكەمجارە پرسێكی ئەرێنی لەگەڵ عیراق هاتۆتە بەرنامەی كار.
داهاتی نانەوتی ئەم هەفتەیەی سنوری پارێزگاكانی سلێمانی و هەڵەبجە زیاتر لە پێنج ملیار و ٦٨٢ ملیۆن دینارە و بەراورد بە هەفتەی رابردوو حەوت ملیار دینار كەمیكردووە.
ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی ڕاپەڕین و گەرمیان دەكات، بڵاویكردەوە، داهاتی نانەوتی ئەم هەفتەیە واتە لە ١٦ی ١١ ەوە تا ئەمڕۆ، زیاتر لە پێنج ملیار و ٦٨٢ ملیۆن و ٤٨٧ هەزار دینار بووە كە ٧٥%ی نەختینە و ١٨%ی چەك بووە.
داهاتەكە بەراورد بە هەفتەی رابردوو، بەڕێژەی ٥٨% واتە بەبڕی حەوت ملیار دینار كەمیكردووە، كە لەو هەفتەیەدا داهاتەكە زیاتر لە ١٣ ملیار دینار بووە.
هاوكات بەپێی ماڵپەری شەفافیەت، داهاتی نانەوتی سنوری پارێزگاكانی سلێمانی و هەڵەبجە لەسەرەتای ئەمساڵەوە تائێستا، زیاتر لە ٨١٣ملیار و ٧٥٦ملیۆن دینار بووە، بەراورد بە هەمان ماوەی ساڵی رابردوو زیاتر ٣٠% كەمیكردووە.
رێژەی تۆماركردنی هاوڵاتییان لە سەرژمێری ٩٧%ی تێپەڕاند، پارێزگاری هەولێر دەڵێت، درێژكردنەوەی وادەكە بە دەرفەت دەزانن بۆ ئەوەی رێژەكە بگەیەننە ١٠٠% .
ئومێد خۆشناو پارێزگاری هەولێر لە راگەیەنراوێكدا ئاماژەی بەوەكرد، توانراوە بە هەوڵ و هەماهەنگی هەموولایەنە پەیوەندیدارەكان لە سنووری پارێزگاكە رێژەی تۆماركردنی هاووڵاتییان لە قۆنای یەكەمی خێزان و ئەندامان لە پڕۆسەی سەرژمێری گشتیی بگات بە ١٠٠%، لە قۆناغی دووەمیشدا لە دوو رۆژی رابردوودا توانرا رێژەی تۆماركردن بگاتە ٩٧.٣٩%.
دەشڵێت، وەك پارێزگای هەولێر بەدەرفەتی دەزانن لەماوەی درێژكردنەوەی پڕۆسەكە ڕێژەی تۆماركردن لە سنووری پارێزگای هەولێر بگەیەنن بە ١٠٠%.
ئاسۆ مامەند سەرپەرشتیاری کەرکوک-سەڵاحەدینی یەکێتیی نیشتمانیی کوردستان رایگەیاند، ئەم رووداوە بۆ ئێمە وەک سەرژمێری دێرینی ساڵی ١٩٥٧ گرنگە
دەقی پەیامەکە
کۆمەڵانی خەڵکی بەشەرەفی کەرکوک
خوشک و براکانمان لە دانیشتوانی بەڕێزی کەرکوک و کەسوکارمان لە ئاوارە و نیشتەجێکانی شارەکانی هەرێمی کوردستان و عیراق کە بە بنەچە کەرکوکین.
پڕبەدڵ دەستخۆشی و پیرۆزبایتان لێدەکەم بۆ ئەو هەڵوێستە بەرپرسیارانەتان کە رۆژانی سەرژمێری گشتیتان کردە بۆنەیەکی گەورەی نیشتمانیی و پێکەوەژیانی پێکهاتەکان و لە پارێزگای کەرکوک و دەوروبەری ، بە گیانی پەرۆشی و هیممەتی شارستانیتان بەشداربوون لەم سەرژمێرییە و خۆتان و کەسوکارتان بە کەرکوکی تۆمارکردەوە.
لە کەرکوکی خۆشەویست ڕۆژانی سەرژمێری هەر ناونووسکردن و خۆتۆمار کردنی هاوڵاتیان نەبوو کە ئەم بابەتەش بۆ گەشەپێدان و ئاوەدانکردنەوەی وڵاتەکەمان و بۆ هاوڵاتیبوون و مافەکانیان پێویستن، بەڵکو وێستگەیەکی تری خەباتی مەدەنی و ئاوێتەبوونی کۆمەڵایەتی دانیشتوانی خۆڕاگری کەرکوک و خەڵکە رەسەنەکانمان بوو کە لە شوێنەکانی تر نیشتەجێن ،
ئەم رووداوە بۆ ئێمە وەک سەرژمێری دێرینی ساڵی ١٩٥٧ گرنگە و هیوادارین پێکەوەش بنەما و بەڵگەی داهاتوو بن بۆ سەلماندنی رەوایەتی و خاوەندارێتی گەلەکەمان لە زێدی مێژوویی خۆی لە کە کەرکوک وەک شاری برایەتی و پێکەوەژیان ، ببێتە دەسکەلای رەوا بۆ نەخشەرێی ماددەی ١٤٠ و هەموو ئیستیحقاقە دەستورییەکانمان لە عیراق.
هەر بەو بۆنەیەشەوە دەستخۆشی لە دامودەزگاکانی ئیدارەی کەرکوک ، بەڕێز پارێزگار کاک رێبوار تەها و سەرجەم دامودەزگا ئەمنییەکان و پۆلیسی هاتووچۆ و مامۆستایانی خۆشەویست و سەرجەم فەرمانبەرانی ئازای فەرمانگەکانی سەرژمێری دەکەین، دەستخۆشی لە هاوڵاتیانی میواندۆستی شارەکەمان دەکەین کە ئامێزی کەرکوکی و خزمانەیان بۆ میوانانی خاوەن ماڵ کردەوە،
سەرکەوتن بۆ ئەم خەباتە مەدەنییە نوێباوە،
سەرکەوتن بۆ گەلەکەمان.