کوردستان
شەوی رابردوو لە شەنگال شەڕ و روبەڕوبوونەوە لە نێوان سوپای عیراق و یەكینەكانی بەرخۆدانی شەنگال – یەبەشە رویدا و هەشت كەس لە هەردوولا برینداربوون.
راگەیاندنی یەكینەكانی بەرخۆدانی شەنگال - یەبەشە بڵاویكردوەتەوە، سەعات 11ی شەوی سێشەممە سوپای عیراق ئۆتۆمبێلێكی شەڕڤانانی لە ناو سەنتەری شەنگال كردوەتە ئامانج و بەهۆیەوە سێ شەڕڤان برینداربوون كە برینی یەكێكیان قورسە و تەندروستیی ناجێگیرە، بەوهۆیەوە شەڕ و پێكدادان لە نێوان شەڕڤانان و سوپای عیراق رویداوە و باری نائاسایی لە شەنگال راگەیەنراوە.
هاوكات پەیامنێری كوردسات نیوز رایگەیاند، بەهۆی شەڕ و پێكدادانەكان پێنج ئەندامی سوپای عیراق برینداربوون.
سبەینێ موچەی مامۆستایانی گرێبەستی وەزارەتی پەروەردە و خوێندنی باڵا دابەشدەکرێت
وەزارەتی دارایی رایدەگەیەنێت، سبەینێ چوارشەممە موچەی مامۆستایانی گرێبەستی وەزارەتی پەروەردە و خوێندنی باڵا دابەشدەکرێت.
وەزارەتی دارایی و ئابووری حکومەتی هەرێمی کوردستان لە راگەیەنراوێکدا بڵاویکردەوە، سبەینێ چوارشەممە ( ١٩ ی ئازاری ٢٠٢٥ ) موچەی مانگی شوباتی مامۆستایانی گرێبەستی وەزارەتی پەروەردە لە سنووری پارێزگای سلێمانی و موچەی مانگی شوباتی ساڵی ٢٠٢٥ و کرێی وانەبێژی مانگی ئابی ساڵی ٢٠٢٤ ی مامۆستایانی گرێبەستی وەزارەتی پەروەردە لە سنووری پارێزگای هەولێر و دهۆک دابەشدەکرێت.
ئاماژەی بەوەشکرد، رۆژی چوار شەممە ١٩ی ئازاری ٢٠٢٥ موچەی مانگی کانوونی دووەمی ساڵی ٢٠٢٥ـی مامۆستایانی گرێبەستی وەزارەتی خوێندنی باڵا لەسەرتاسەری هەرێمی کوردستان دابەشدەکرێت، کە سەرجەمیان تەمویلیان لەسەر داهاتی ناوخۆ خەرج دەکرێت.
وتەبێژی یەکێتی رایدەگەیەنێت: یەكێتی یەك حكومەت و یەك سیاسەتی یەكگرتووی كوردستانی دەوێت و جەخت دەكەینەوە لەسەر خۆشگوزەرانی خەڵكی كوردستان
سەعدی ئەحمەد پیرە وتەبێژی یەکێتیی نیشتیمانیی کوردستان لەمیانی بەشداریکردنی لە بەرنامەی پانۆرامای کوردسات نیوز رایگەیاند: بەرنامەی یەکێتی و پارتی دەبێتە بنەمای پێکهێنانی حکومەت، هەروەها دەرگا بۆ هەر لایەنێک کراوەیە بەشداری حکومەت بکات.
وتیشی: یەکێتی نایەوێت سامانی سروشتی وڵات تاڵانفرۆش بکرێت و جەخت لەسەر خۆشگوزەرانی بۆ هاووڵاتیان دەکەینەوە
سەعدی ئەحمەد پیرە ئاماژەی بەوەشکرد: كۆبوونەوە وەفدی باڵای دانوستانكاری یەكێتی و پارتی بۆ كۆتاییهێنانە بە ناكۆكییەكانە و رەشنوسی دیدگای هاوبەش بۆ پێكهێنانی حكومەت كۆتایی هاتووە.
وتەبێژی یەکێتی راشیگەیاند؛ گفتوگۆ لەسەر پۆستە باڵاكانی هەرێم لە قۆناغی كۆتاییدایە و پۆستەكان ماون جێگیر بكرێن و یەكلا بكرێنەوە.
وەزارەتی دارایی حكومەتی هەرێمی كوردستان رایگەیاند، لە رێگەی تیمی تەكنیكیەوە لیستی موچەی مانگی سێ رەوانەی دارایی عیراق كرا.
وەزارەتی دارایی و ئابوری حكومەتی هەرێمی كوردستان لە راگەیەنراوێكدا بڵاویكردەوە، ئێوارەی ئەمڕۆ لیستی موچەی مانگی سێ فەرمانبەران و موچەخۆرانی هەرێمی كوردستان لە رێگەی تیمی تەكنیكی وەزارەتی دارایی هەرێم ڕەوانەی وەزارەتی دارایی عیراق كرا.
سەرچاوەیەكی تایبەت لە وەزارەتی دارایی هەرێم بە كوردسات نیوزی راگەیاند، تیمەكەی وەزارەتی دارایی پێكهاتوون لە بەرێوەبەری ژمێریاری و دوو كارمەندی وەزارەتی دارایی هەرێم، هەوڵەكانیش چڕكراونەتەوە بۆ ئەوەی پێش جەژن موچە دابەش بكرێت.
ئەنجومەنی دادوەری هەرێم رایگەیاند، ساڵی رابردوو زیاتر لە 51 هەزار پڕۆسەی هاوسەرگیری بە یاسایی لە هەرێمی كوردستان ئەنجامدراون.
ئەنجومەنی دادوەری هەرێمی كوردستان، ئاماری دادگای پێداچوونەوە و دادگاكانی هەرێمی بۆ ساڵی 2024 بڵاوكردەوە و رایگەیاند، لەو ساڵەدا 51 هەزار و 18 پرۆسەی هاوسەرگیری لە داگاكانی هەرێم ئەنجامدراون و 12 هەزار و 348 حاڵەتی جیابوونەوەش هەبووە.
بەپێی ئامارەكان، سلێمانی لە پێشەنگی زۆرترین پرۆسەی هاوسەرگیری دێت كە ژمارەكە 18 هەزار و 522 حاڵەتە و دوای ئەویش هەولێرە و دهۆك دێن.
بۆ پێنجەم جار وەفدی باڵای دانووستانكاری یەكێتی و پارتی تایبەت بە پێكهێنانی كابینەی نوێی حكومەتی هەرێم كۆبوونەوە و گەیشتنە دواڕەشنووسی دیدگای هاوبەش بۆ قۆناغی داهاتوو، كە دەبێتە ئامرازێك بۆ پێكهێنانی حكومەت.
كۆبوونەوەی وەفدی باڵای دانووستانكاری یەكێتی و پارتی لە مەكتەبی سیاسی یەكێتی لە هەولێر بەڕێوەچوو و بەگوێرەی راگەیەندراوی هاوبەشی كۆبوونەوەكەش، كۆبوونەوەكە ئەرێنی بووە و تێیدا، هەردوولا گەیشتنە دواڕەشنوسی دیدگای هاوبەش بۆ قۆناغی داهاتووم كە دەبێتە ئامرازێك بۆ پێكهێنانی حكومەت و دامەزراوەكانی تر و هاوكات، باشتر خزمەتكردنی هاوڵاتیان.
هاوكات، پەیامنێری كوردسات نیوز لە هەولێر رایگەیاند، یەكێتی و پارتی گەیشتوونەتە دوایین وردەكارییەكانی رەشنووسی ستراتیژی نێوانیان بۆ پێكهێنانی كابینەی نوێی حكومەتی هەرێم و چاوەڕوان دەكرێت، لە كۆبوونەوەكانی داهاتووی وەفدی باڵای دانووستانكاری هەردوولا، گفتوگۆ لەبارەی دابەشكردنی پۆستە حكومییەكان بكرێت.
رۆژی یەكشەممەی رابردوو بافڵ جەلال تاڵەبانی سەرۆكی یەكێتیی نیشتمانیی كوردستان و مەسرور بارزانی سەرۆكی حكومەتی هەرێم لە پیرمام كۆبوونەوە بۆ گفتوگۆكردن لەسەر پێكهێنانی كابینەی نوێی حكومەتی هەرێم و دواتریش رایانگەیاند، كۆبوونەوەكەیان ئەرێنی بووە
بۆ یەكەم جار بە سەرپەرشتی فەرماندەی گشتی هەسەدە، پەیەدە و ئەنەكەسە لە حەسەكە كۆبوونەوە و گەیشتنە لێكتێگەیشتن لەسەر رەشنووسی پەیماننامەیەكی سیاسی كوردی و سوری.
پەیامنێری كوردسات نیوز لە رۆژئاوای كوردستان رایگەیاند، لە كۆبوونەوەكەدا، بە سەرپەرشتی مەزڵوم كۆبانێ فەرماندەی گشتی هێزەكانی سوریای دیموكرات، پارتی یەكێتی دیموكرات و ئەنجومەنی نیشتمانی كورد لە سوریا گفتوگۆیانكردووە لەبارەی هەوڵەكان بۆ رێكخستنەوەی ناوماڵی كورد لە رۆژئاوا و هاوكات، پێكهێنانی وەفدێكی هاوبەش بۆ دانووستان لەگەڵ ئیدارەی سوریا و دەستەبەركردنی مافەكانی گەلی كورد لە سوریای نوێدا.
ئەوەشی خستەڕو، كۆبوونەوەكە ئەرێنی بووە و تێیدا هەردوولا، گەیشتوونەتە لێكتێگەیشتن لەسەر رەشنووسی پەیماننامەیەكی سیاسی كوردی و سوری.
لەدوای تەواوبوونی كۆبوونەوەكە، مەزڵوم کۆبانێ فەرماندەی گشتی هەسەدە لە راگەیەنراوێكدا دڵخۆشی خۆی بۆ بەڕێوەچوونی كۆبوونەوەكە نیشاندا و وتی، لە كۆبوونەوەكەدا تاوتوێی نەخشەرێگەیەكی هاوبەش و یەكڕیزی كورد بۆ قۆناغی نوێی سوریا كرا.
کۆبونەوەی وەفدی باڵای دانوستانکاری یەکێتیی نیشتمانیی کوردستان و پارتی دیموکراتی کوردستان لەهەولێر دەستیپێکرد.
كۆبوونەوەكە لە مەكتەبی سیاسی یەكێتی لە هەولێر بەڕێوەدەچێت و تاوتوێی پێكهێنانی كابینەی نوێی حكومەتی هەرێم دەكرێت.
وەفدی باڵای یەكێتی بە سەرۆكایەتی قوباد تاڵەبانی بەشدارە لە كۆبوونەوەكەدا و هۆشیار زێباری سەرۆكایەتی وەفدی باڵای پارتی دەکات
كۆبوونەوەكە لەدوای دوو رۆژ لە دیداری بافڵ جەلال تاڵەبانی و مەسرور بارزانی بەڕێوەدەچێت
دادگای پێداچوونەوەی هەرێمی كوردستان بڕیاریدا بە ئازادكردنی ئەو مامۆستایەی كە تۆمەتباركرابوو بە بردنی كێك و پسكیت بۆ پەكەكە.
پارێزەر بەشدار حەسەن بە كوردسات نیوزی رایگەیاند، مامۆستا لوقمان برادۆستی ئەو كەسەی تۆمەتی ئەوەی درابووە پاڵ كە سێ كارتۆن كێك و پسكیتی بۆ پەكەكە بردووە، دوای ساڵێك و چوار مانگ لە زیندانیكردنی لە چاكسازی گەورانی هەولێر، ئازاد كرا.
وتیشی، دادگای پێداچوونەوەی هەرێمی كوردستان بڕیاری ئازادكردنی مامۆستا لوقمانی دا لەگەڵ لابردنی سەرجەم تۆمەتەكانی سەری و لە ئێستادا سەرقاڵی رێكارە یاساییەكانن بۆ ئەوەی تەواویان بكەن و ئازادبكرێت.
راگەیاندنی دەروازەی نێودەوڵەتیی ئیبراهیم خەلیل رایگەیاند، بەهۆی دروستبوونی كێشەیەكی تەكنیكییەوە، هاتووچۆی سنووریی نێوان هەرێم و توركیا راگیرا.
بەشی پەیوەندییەكان و راگەیاندنی دەروازەی نێودەوڵەتیی ئیبراهیم خەلیل لە راگەیەندراوێكدا بڵاویكردەوە، ئەمڕۆ لە دەروازەی خابوور بەهۆی دروستبوونی كێشەیەكی تەكنیكی لە سیستەمی پاسپۆرت-دا هاتوچۆی گەشتیاری و بازرگانی لەنێوان هەردوو دەروازەی ئیبراهیم خەلیل و خابوور-دا راگیرا.
باسی لەوەشكردووە، تیمە تەكنیكییەكان لە هەوڵذان بۆ چارەسەرکردنی کێشەکە.
سەرۆک بافڵ جەلال تاڵەبانی، سەرۆکی یەکێتیی نیشتمانیی کوردستان، ئەمڕۆ لە دەباشان پێشوازی لە بەڕێز شێخ مادح شێخ عوسمان نەقشبەندی، کەسایەتی دیاری ئاینیی کوردستان و سەرپەرشتیاری خانەقاکانی نەقشبەندی کرد.
لە دیدارەکەدا، کە شێخ ئەحمەد حەمە کەریم، ئەندامی مەکتەبی سیاسی یەکێتی تێیدا ئامادەبوو، جەختکرایەوە لەسەر پێویستی پەرەپێدانی گیانی پێکەوەژیانی ئاینی و ئاشتییانەی نێوان نەتەوە و پێکهاتەکان، هەروەها پاراستنی بەها باڵا و پیرۆزەکانی ئاینی ئیسلام. هەروەها باس لە یەکخستنی هەوڵەکان کرا لەپێناو برایەتی و یەکڕیزی گەلی کورد و زیاتر خزمەتکردنی کۆمەڵانی خەڵک.
سەرۆک بافڵ جەلال تاڵەبانی بە گرنگییەوە ئاماژەی بە رۆڵی ئەرێنیی شێخانی نەقشبەندی و مورید و شوێنکەوتووانیان کرد لە کاری چاکەکاری، خواپەرستی و بەهێزکردنی بیروباوەڕی میانڕەوی و پێکەوەیی رێبازەکان.
سەرۆکی یەکێتی رایگەیاند کە یەکێتیی نیشتمانیی کوردستان بە چاوی ڕێزەوە لە تەریقەت، پیاوچاکان، زانایان و مامۆستایانی پایەبەرزی ئاینی، خانەقا و تەکێکان دەڕوانێت کە لە هەموو قۆناغەکاندا خزمەتی بەرچاویان بە گەلەکەمان و شۆڕشی کوردایەتی کردووە. هەروەها ئاماژەی بەوەدا کە رێبازی نەقشبەندییەکان خاوەن تەریقەتێکی مرۆڤ دۆستانە و کراوەن کە چاکەیان بەسەر هەمووانەوە هەیە و بە پێزانینەوە لێیان دەڕوانرێت.
سبەینێ كۆنفرانسی دووەمین دیداری یەكێتی لە شاری سلێمانی بەڕێوەدەچێت و تیایدا لیژنەی باڵا ڕا و سەرنجی كادرانی یەكێتی بۆ داڕشتنەوەی سیاسەتی گشتی یەكێتی وەردەگرێت.
سكرتاریەتی لیژنەی باڵای دیداری یەكێتی رایگەیاند، رۆژی چوارشەممە 19ی ئاداری 2025، كۆنفرانسی دیداری یەكێتی بە ئامادەبوونی لێپرسراوان و كادرانی سنوری سلێمانی و چەمچەماڵ، لە سلێمانی بەڕێوەدەچێت و كۆمەڵێك تەوەری گرنگ لە خۆدەگرێت.
راشیگەیاندوە، لە كۆنفرانسەكەدا گفتوگۆ لەسەر سیاسەت و پرسەكانی یەكێتی و رێوشوێنەكانی گەشەپێدان و نوێكردنەوەی ئۆرگانەكانی حزب دەكرێت.
پێشتریش بە مەبەستی ئەنجامدانی دووەمین دیداری یەكێتی، كۆنفرانسەكان لە موسڵ و بادینان و كۆیە و هەولێر و گەرمیان و شارەزوور ئەنجام دران، لە دوای كۆنفرانسی سلێمانی لە داهاتوویەكی نزیكدا لە كەركوك و راپەڕینیش كۆنفرانس ئەنجام دەدرێت.
لە بارەگای مەکتەبی سیاسی یەکێتیی نیشتیمانیی کوردستان لە شاری هەولێر، سەعدی ئەحمەد پیرە، ئەندامی مەکتەبی سیاسی و وتەبێژی رەسمی یەکێتی، پێشوازی کرد لە وەفدێکی یونامی بە سەرپەرشتی فرانسیک لاناو، بەرپرسی یونامی لە هەرێمی کوردستان و مۆنیا رادزی مۆتسی، بەرپرسی بەشی کاروباری سیاسی یونامی لە هەرێمی کوردستان.
لە دیدارەکەدا، هەردوولا بارودۆخی سیاسی، ئابووری و سەربازی عێراق و کوردستان و ناوچەکەیان بەگشتی تاوتوێکرد. بەتایبەتی، هەنگاوەکانی پێکهێنانی کابینەی نوێی حکومەتی هەرێمی کوردستان، پەیوەندییەکانی نێوان هەولێر و بەغدا، و ئامادەکارییەکانی هەڵبژاردنی ئەنجومەنی نوێنەرانی عێراق کە بڕیارە لە نۆڤەمبەری ئەمساڵ ئەنجام بدرێت، خرانە بەر باس.
هەروەها، دوایین پەرەسەندنە سیاسییەکانی سوریاش لە دیدارەکەدا تاوتوێکران.
مەکتەبی سیاسی یەکێتی بەبۆنەی کۆچی دوایی خاتوو "ساریا سۆفی حسێن" دایکی "نزار ئامێدی ئەندامی مەکتەبی سیاسی و گوهدار ئامێدی"ەوە پرسەنامەیەکی ئاڕاستەکردن و رایگەیاند: "لەناخی دڵمانەوە پرسە و ماتەمینی خۆمان ئاڕاستەی بەڕێزتان و کەسوکار و خانەوادە تێکۆشەر و ماندونەناسەکەتان دەکەین ".
دەقی پرسەنامەکەی مەکتەبی سیاسی یەکێتیی نیشتیمانیی کوردستان:
هەڤاڵ نزار ئامێدی ئەندامی مەکتەبی سیاسی
هەڤاڵ گۆهدار ئامێدی
بۆ کۆچی دوایی خاتوو ساریا سۆفی حسێن دایکی بەڕێزتان، لەناخی دڵمانەوە پرسە و ماتەمینی خۆمان ئاڕاستەی بەڕێزتان و کەسوکار و خانەوادە تێکۆشەر و ماندونەناسەکەتان دەکەین
لە یەزدانی مەزن داواکارین کۆچکردوو بە بەهەشتی بەرین شاد بکات و ئارامی بە گشت لایەکتان ببەخشێت
انا للە وانا الیە راجعون
مەکتەبی سیاسی
یەکێتیی نیشتمانیی کوردستان
سەرۆک بافڵ جەلال تاڵەبانی بەبۆنەی کۆچی دوایی خاتوو "ساریا سۆفی حسێن" دایکی "نزار ئامێدی ئەندامی مەکتەبی سیاسی و کاک گوهدار ئامێدی"ەوە پرسەنامەیەکی ئاڕاستەکردن و رایگەیاند: "بۆ ئەم لەدەستدانە هاوخەمتانم، لەخوای گەورە داواکارین ئەمە دواناخۆشیتان بێت و گیانی کۆچکردووش بە بەهەشتی بەرین شادبکات".
دەقی پرسەنامەکە:
هەڤاڵانی ئازیزمان کاک نزار ئامێدی ئەندامی مەکتەبی سیاسی و کاک گوهدار ئامێدی
بەداخ و خەمێکی قووڵەوە هەواڵی کۆچی دوایی خاتوو(ساریا سۆفی حسێن)دایکی بەڕێزتانمان پێگەیشت.
بۆ ئەم خەمە گەورەیە پرسە و سەرەخۆشی ئاڕاستەی ئێوەو کەسوکارو بنەماڵە سەربەرزو تێکۆشەرەکەتان دەکەم کە نموونەیەکی هەرەباڵان لە خەبات و تێکۆشاندا.
بۆ ئەم لەدەستدانە هاوخەمتانم، لەخوای گەورە داواکارین ئەمە دواناخۆشیتان بێت و گیانی کۆچکردووش بە بەهەشتی بەرین شادبکات.
ئارامی و سەبووریش بەهەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان