کوردستان
کۆمپانیای دانە غاز رایگەیاند، بەرهەمهێنانی غاز لە کێڵگەی غازی کۆرۆمۆر بەردەوامە، هەروەها هێرشەکەی شەوی رابردوو هیچ زیانێکی گیانی لێنەکەوتووەتەوە.
کۆمپانیای دانە غاز رایگەیاند، ئێوارەی دوێنێ یەکشەممە، لەلایەن فڕۆکەی بێفڕۆکەوانەوە هێرشکرایە سەر کێڵگەی غازی کۆرمۆر، بەڵام هیچ زیانێکی گیانی لێنەکەوتووەتەوە و بەرهەمهێنانی غاز لە کێڵگەکە بەردەوامە.
ئاماژەی بەوەشکردووە، لە ئێستادا بەشێوەیەکی ئاسایی و لە دۆخێکی ئەمنی جێگیردا کارەکانی بەرهەمهێنانی غاز بەڕێوەدەچن و سەرجەم کارمەندەکانیش سەلامەتن.
ئاماژەی بەوەش كردووە، لە نزیكەوە هەماهەنگی لەگەڵ هەموو لایەنە پەیوەندیدارەكان و هێزە ئەمنییەكان دەكات كە لە نزیكەوە چاودێری دۆخەكە دەكەن.
دوێنێ یەکشەممە، هێرشکرایە سەر کێڵگەی غازی کۆرمۆر و رەمک رەمەزان قائیمقامی چەمچەماڵ لەبارەی هێرشەکەوە بە کوردسات نیوزی راگەیاند، تەقینەوەیەک لە دەرەوەی ناوچەی بەرهەمهێنان لە کێڵگەی غازی کۆرمۆر رویداوە.
دواتریش بەڕێوەبەرایەتی گشتیی دژەتیرۆر رایگەیاند، کێڵگەی غازی کۆرمۆر و کۆمپانیای دانەغاز بە تەواوی پارێزراون.
وەزارەتی سامانە سروشتییەكانی حکومەتی هەرێمش ئاماژەی بەوە کرد، بەرهەمهێنانی غاز لە كێڵگەی كۆرمۆر ئاساییە.
سەرچاوەیەک لە نەخۆشخانەی چەمچەماڵ بە کوردسات نیوزی راگەیاند، تەرمی ژنێک بە کوژراوی لە ماڵەکەی خۆیدا دۆزرایەوە.
سەرچاوەیەک لە نەخۆشخانەی چەمچەماڵەوە بە کوردسات نیوزی راگەیاند، پێشنیوەڕۆی ئەمڕۆ تەرمی ژنێکی تەمەن ٣٤ ساڵ بە کوژراوی دۆزرایەوە و شوێنەواری چەقۆ بە جەستەوەیەتی.
لەو بارەیەشەوە رەمک رەمەزان قائیمقامی چەمچەماڵ بۆ کوردسات نیوز باسی لەوەکرد، ئەو ژنەی کوژراوە کارمەندی زانکۆی چەرموو بووە.
باسی لەوەشکرد، ژنەکە لەناو ماڵەکەیدا بووە و بەپێی لێکۆڵینەوە سەرەتاییەکان هیچ کێشە و گرفتێکی نەبووە.
ئەوەشی خستە روو، پەڕاوی لێکۆڵینەوە بۆ روداوەکە کراوەتەوە و بڕیاری دادوەر بۆ دەستگیرکردنی کەسی تاوانبار دەرکراوە.
نرخی ئەمپێری کارەبای موەلیدە بۆ مانگی رابردوو دیاریکرا و لە سلێمانی کاتی پێدانی کارەبا دەگۆڕێت.
پەیامنێری کوردسات نیوز لە هەولێر باسی لەوەکرد، لە هەولێر نرخی ئەمپێری کارەبای موەلیدە لەنێوان 16 هەزار و 500 بۆ 20 هەزار دیناردایە و بەپێی پێدانی کارەبای موەلیدە لە گەڕەکەکاندا نرخەکەی دەگۆڕێت.
بەڕێوەبەرایەتی گشتیی کارەبای سلێمانی رایگەیاندووە، لە سلێمانی نرخی یەک ئەمپێر لەنێوان 15 بۆ 16 هەزار دیناردایە، لەو گەڕەکانەشی کاتی کارکردنیان زیاترە، نرخی یەک ئەمپێر لەنێوان 18 بۆ 19 هەزار دیناردایە.
ئاماژەی بەوەشکردووە، لە مانگی شوباتدا کاتی کارپێکردنی موەلیدەکان دەگۆڕێت و رۆژانە لە سەعات 12ی نیوەڕۆ بۆ 1ی شەو کاردەکەن، بەیانیانیش لە سەعات 6 و 30 خولەک بۆ 8 کاردەکەن.
لەلایەکی دیکەوە پەیامنێری کوردسات نیوز لە دهۆک رایگەیاند، لە دهۆکیش نرخی کارەبای موەلیدە دیاریکراوە و یەک ئەمپێر 20 هەزار دیناری بۆ دیاریکراوە.
کەشناسیی هەرێم پێشبینییەکانی کەشوهەوای ئەمڕۆ و سبەی ئاشکرا کرد و رایگەیاند، پلەکانی گەرما بەشێوەیەکی بەرچاو نزم دەبنەوە.
کەشناسیی هەرێم رایگەیاندووە، ئەمڕۆ دووشەممە، ئاسمان ساماڵ و نیمچەهەور دەبێت و پلەکانی گەرما 2 بۆ 3 پلەی سیلیزی دادەبەزن.
ئااماژەی بەوەشکردووە، سبەی سێشەممە، بەهەمان شێوەی ئاسمان ساماڵ و نیمچەهەور دەبێت، بەڵام پلەکانی گەرما 1 بۆ 2 پلەی دیکە دادەبەزن.
کەشناسیی عیراقیش دەڵێت، لە رۆژی پێنجشەممەوە بارانبارین چەند ناوچەیەکی جیاوازی هەرێمی کوردستان دەگرێتەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر: 16 پلەى سیلیزى
سلێمانی: 12 پلەى سیلیزى
دهۆک: 13 پلەى سیلیزى
کەرکوک: 17 پلەى سیلیزى
زاخۆ: 13 پلەى سیلیزى
هەڵەبجە: 14 پلەى سیلیزى
حاجی ئۆمەران: 2 پلەى سیلیزى
سۆران: 12 پلەى سیلیزى
گەرمیان: 17 پلەى سیلیزى
لە سلێمانی دژی دواکەوتن و پێنەدانی موچە و بۆ پشتگیریکردنی مامۆستایان و فەرمانبەرانی مانگرتوو، خۆپیشاندان دەستی پێکرد.
ئەو موچەخۆرانە باس لەوەدەکەن، ئەمجارە دۆخەکە جیاوازە و چەند مامۆستایەک مانیان گرتووە.
دەشڵێن، پێویستە وەڵامیان بدرێتەوە و چی زووە گرفتەکانی موچە چارەسەر بکرێت.
ئەو موچەخۆرانە دەڵێن، لە ساڵی 2014وە لەو دۆخەدان، بەڵام لەمەودوا ناتوانن بەرگەی بگرن و پێویستە گرفتەکانی موچە چارەسەری یاکجارییان بۆ بدۆزرێتەوە.
بۆ حەوتەم رۆژ لەسەریەک؛ مانگرتنی مامۆستایان و فەرمانبەران لە سلێمانی بەردەوامە
ماوەی حەوت رۆژە مامۆستایان و فەرمانبەرانی ناڕازی لە سلێمانی بەردەوامن لە مانگرتن و هیچ خواردنێک ناخۆن، تیمە پزیشکییەکانیش بەردەوامن لە چاودێریکردنی چڕی تەندروستییان، لەلایەکی دیکەوە ئەمڕۆ هەر 13 مانگرتووەکە بڕیاریان داوە کفن لەبەر بکەن و بچنە ناو خۆپیشاندەرانەوە.
ئەو مامۆستایانە سەرەڕای ئەوەی دۆخی تەندروستییان تێکچووە و توانای قسەکردنیان نەماوە، بەڵام باس لەوەدەکەن، ئەوان سوورن لەسەر مانگرتن تاوەکو دەگەن بە ئامانجەکانیان.
دەشڵێن، تاوەکو ئێستا هیچ لایەنێک بەشێوەیەکی جددی وەڵامی نەداونەتەوە و هیچ وەڵامێکی یەکجارەکییان پێنەگەیشتووە.
ئەو 13 مانگرتووەی سلێمانی بڕیاریان داوە ئەمڕۆ کفن لەبەربکەن و بچنە ناو خۆپیشاندەرانەوە.
ئەو مامۆستایانە بە گشتیی خێزاندارن و خاوەنی ماڵ و منداڵن باس لەوەدەکەن، لە ماڵ و منداڵیان دابڕاون و رۆژ بە رۆژ تەندروستییان بەرەو خراپتر دەڕوات و لاواز دەبن، بەڵام ئیرادەیان بەهێزە.
دەڵێن، پێویستە وەڵامێکی شایستەیان بدرێتەوە، تاوەکو ئێستا کە تەندروستیان بەرەو خراپبوون دەچێت، بەڵام هیچ وەڵامێکیان نەدراوەتەوە.
لەلایەکی دیکەوە تیمە پزیشکییەکان بەردەوام بە چڕی چاودێریی تەندروستییان دەکەن و پشکنینیان بۆ دەکەن.
هەر لەسەر ئەو دۆسێیە و دوای بڕیارەكەی وەزیری پەیوەندییەكانی عیراق، كۆمپانیای ئای كیو روونكردنەوەیەكی بڵاوكردەوە و تیایدا، سەرجەم ئەو تۆمەت و دەنگۆیانەی رەتكردەوە كە ئاراستەی كراون، جەختیشیكردەوە، رێوشوێنی یاسایی دژی ئەو كەسانە دەگرنەبەر، كە ئەو تۆمەت و دەنگۆ ناڕاست و بێبنەمایانەیان بڵاوكردووەتەوە.
لە رونكردنەوەكەی كۆمپانیای ئای كیودا هاتووە، هیچ كام لە كۆمپانیاكانی ئای كیو چالاكی نایاسایی ئەنجامنەداوە و هیچ یەكێكیش لە كۆمپانیاكان لەلایەن حكومەتی عیراقەوە سزا نەدراوە، هیچ گرێبەستێكی نوێشان لەگەڵ حكومەتی عیراق ئیمزا نەكردووە و هیچ پارەیەكیشیان وەرنەگرتووە، بەپێچەوانەوە ئای كیو پارەی داوەتە حكومەتی عیراق لە چوارچێوەی شێوازی هاوبەشكردنی داهات.
كۆمپانیای ئای كیو ئاماژەی بەوەشكردەوە، لەساڵی 2010 مۆڵەتی وەبەرهێنانی ژێرخانی وەرگرتووە بۆ پرۆژەی ترانزێت، لەلایەن حكومەتی عیراقیشەوە نەخراوەتە لیستی رەشەوە.
لە كۆتایی رونكردنەوەكەشدا، كۆمپانیای ئای كیو دەڵێت، ئەو دەنگۆ و تۆمەتانەی ئاراستەیان كراوەتە، تەنها مەبەست لێی چەواشەكردنی هاووڵاتییان و لەكەداركردنی ناو و ناوبانگی كۆمپانیای ئای كیوە، لەكاتێكدا كۆمپانیاكە و عیراق كار دەكەن بۆ بەڕێوەبردنی گۆڕانكاری دیجیتاڵی و لەناوبردنی هەر قۆرخكارییەك لە ناوچەكە، بۆیە سەرجەم تۆمەتەكان رەتدەكەنەوە و رێوشوێنی یاساییش دژی ئەو كەسانە دەگرنەبەر، كە ئەو تۆمەتانەیان بڵاوكردووەتەوە.
بەڕێوبەرایەتی گشتیی دژەتیرۆر لە راگەیەنراوێکدا رایگەیاندووە، لە سەعات 07:05ـی ئێوارەی ئەمڕۆ، هێرشێکی درۆنی خۆکوژ ئاراستەی کێڵگەی غازی کۆرمۆر کرا، کە دەکەوێتە سنووری چەمچەماڵ.
ئاماژەی بەوەشکردووە، بەپێی زانیارییە هەواڵگرییەکان، درۆنەکە لە ناوچەی بەشیرەوە ئاراستە کراوە و لەلایەن گروپە میلیشیا و یاساشکێنەکانەوە جێبەجێ کراوە، هێرشەکەش هیچ زیانێکی گیانی و ماددی بەدواوە نەبوو و کێڵگەکە و کۆمپانیای دانەغاز بە تەواوی پارێزراون.
بەڕێوبەرایەتی گشتیی دژەتیرۆر راشیگەیاند، دەزگا ئەمنییەکان دڵنیایی دەدەنە هاووڵاتیان، کە بە وردی بەدواداچوون بۆ ئەم پێشێلکارییە دەکات و هەر زانیارییەکی نوێ لەم بارەیەوە ڕادەگەیەنرێت.
وەزارەتی سامانە سروشتییەكانی هەرێم روونكردنەوەیەكی لەسەر هێرشەكەی سەر كێڵگەی غازی كۆرمۆر بڵاوكردەوە و ئاماژەی بەوەکرد، سەعات 7:05ـی ئێوارەی ئەمڕۆ هێرشێكی درۆنی كرایە سەر كێڵگەی غازی كۆرمۆر و بێ ئەوەی هیچ زیانێك بە كێڵگەکە بگەیەنێت.
ئاماژەی بەوەشکرد، بەرهەمهێنانی غاز لە كێڵگەی غازی كۆرمۆر ئاساییە و هەڵسەنگاندن بۆ زیانە مادییەكانی هێرشەكە دەكرێت.
کەمێک پێش ئێستا بە موشەک هێرشکرایە سەر کێڵگەی غازی کۆرمۆر لە سنوری چەمچەماڵ و تائێستا زیانەکانی نەزانراوە
رەمەک رەمەزان قایمقامی چەمچەماڵ لەبارەی هێرشەکەوە بە کوردسات نیوزی راگەیاند: تەقینەوەیەک لەدەرەوەی ناوچەی بەرهەمهێنان لە کێڵگەی غازی کۆرمۆر رویداوە.
وتیشی، زیانی گیانی نەبووەو زیانی مادیش تاوەکو ئێستا نەزاندراوە.
رەمەک رەمەزان ئاماژەی بەوەکرد، هێرشەکە لە نێوان موشەک و درۆندایە و تیمەکان سەرقاڵی لێکۆڵینەوەن بۆ دەرکەوتنی ئایا موشەکە یاخود درۆن.
سكرتێری ئەنجومەنی وەزیرانی هەرێم دەقی هەمواری یاسایی بوودجە تایبەت بە دەستپێكردنەوەی هەناردەی نەوتی هەرێم روونكردەوە و دەڵێت، بەپێی هەمواری یاساكە، حكومەتی عیراق لە خەرجییە سەرەوەرییەكان قەرەبووی هەرێم دەكاتەوە بۆ تێچووی بەرهەمهێنان و گواستنەوەی نەوت.
ئامانج رەحیم سكرتێری ئەنجومەنی وەزیرانی هەرێم لە راگەیەندراوێكدا دەڵێت، لەماوەی 60 رۆژی سەرەتای چوونە بواری جێبەجێكردنی یاساكەوە، بە هەماهەنگی نێوان هەولێر و بەغداد لیژنەیەكی راوێژكاری تەكنیكی نێودەوڵەتی دەستنیشان دەكرێت، بۆ خەمڵاندنی تێچوی بەرهەمهێنان و گواستنەوەی نەوت لە هەر كێڵگەیەك بە جیا، دواتر بە رێككەوتنی نێوان هەردوو وەزارەتی نەوت و سامانە سروشتییەكان و بە پشتبەستن بەو خەمڵاندنە، عیراق حكومەتی هەرێم قەرەبوو دەكاتەوە بۆ فرۆشتنی نەوت لە رێگەی كۆمپانیای " سۆمۆ"وە.
دەشڵێت، بە جێبەجێكردنی یاساكە، هەناردەی نەوتی هەرێم لە رێگەی كۆمپانیای سۆمۆوە، بە تێچووی تێكڕای 16 دۆلار بۆ هەر بەرمیلێك دەستپێدەكاتەوە، پاشان دوای تەواوبوونی كاری لیژنە تەكنیكییەكە گۆڕانكاری بەسەر تێچووی بەرهەمهێنانی نەوت دەێت
سكرتێری ئەنجومەنی وەزیرانی هەرێم دەشڵێت، ئەو قەرەبووەی بڕیارە حكومەتی عیراق بیداتە حكومەتی هەرێم لەبەرامبەر تێچووی بەرهەمهێنانی نەوت، بەشێوەی پێشینە دەبێت.
کەمێک بەر لە ئێستا کارەکانی تیمی هاوبەشی دارایی هەرێم و دارایی حکومەتی فیدراڵ کۆتایی هات، سەرچاوەیەک بۆ کوردسات نیوز ئاشکرایکرد، سبەینێ وەزیری دارایی عیراق موچەی مانگی یەک خەرجدەکات.
راشیگەیاند: سبەینێ لە وەزارەتی دارایی عیراق وەفدی دارایی هەرێم لەگەڵ تەیف سامی کۆدەبنەوە و بە رەسمی یاداشتنامەی نێوان هەردولا ئیمزا دەکرێت.
ئەو سەرچاوەیە ئاشكرایکردوە، تەیف سامی بە وەفدی هەرێمی وتوە لە دوای ئیمزاکردنی یاداشتنامەکە، پارەی موچەی مانگی یەک رەوانەی هەرێم دەکات و لە ماوەی دوو هەفتەی داهاتودا، موچەی مانگی شوباتیش خەرج دەکات.
ئاماژەی بەوەشکردوە، ئەگەر هیچ پێشهاتێکی نوێ روو نەدات، سبەی وەفدەکە دەگەڕێنەوە هەرێمی کوردستان.
ئاسایشی سلێمانی رایگەیاند، دەستیان بەسەر حەوت کیلۆگرام لە ماریجوانەدا گرتووە و دوو بازرگانیشیان دەستگیر کردووە.
ئاسایشی سلێمانی رایگەیاند، بەڕێوەبەرایەتی نەهێشتنی ماددە هۆشبەرەکانی دەزگای ئاسایشی هەرێم، دوو بازرگانی ماددەی هۆشبەری دەستگیر کردووە و دەستی بەسەر بڕی حەوت کیلۆگرام ماددەی هۆشبەر لە جۆری ماریجوانەدا گرتووە، کە بازرگانان لەدەوروبەری سلێمانی بەنیازبوون بیگوازنەوە بۆ شاری کەرکوک.
ئەوەشی خستووەتە روو، ئەو تۆمەتبارانە دەیانویست ماددەکان بگوازنەوە بۆ کەرکوک، بەڵام دەستگیرکراون و لەئێستادا بە ماددەی 25 لە یاسای بەرەنگاربوونەوەی ماددە هۆشبەرەکان و کارتێکەرە عەقڵییەکان راگیراون و لێکۆڵینەوە لە دۆسییەکانیان بەردەوامە.
پەیامنێری کوردسات نیوز لە بەغداد باسی لەوەکرد، وەفدی هەرێم و بەغدا گەیشتوون بە خاڵی رێککەوتن و لێکتێگەیشتنی باش لە نێوانیاندا هەیە.
پەیامنێری کوردسات نیوز لە بەغداد ئەوەشی خستە روو، گرفتە داراییەکانی نێوان هەرێم بەغداد بەرەو چارەسەری یەکجاریی هەنگاو دەنێت و کۆبوونەوەکانی وەفدی دارایی هەرێم لەگەڵ وەزارەتی دارایی عیراق چڕ و پڕتر بوون، تاوەکو ئێستا کارەکانی وەفدی هونەری و دارایی هەرێم و بەغداد بەردەوامە لەپێناو نەهێشتنی گرفتەکانی ناو لیستی موچە.
ئاماژەی بەوەشکرد، دووەم رۆژی کۆبوونەوەکەی نێوان هەردوولا زیاتر لە ١٣ سەعاتی خایاندووە تاوەکو گەیشتوون بە خاڵی رێککەوتن.
وتیشی، ئێستا لێکتێگەیشتنی زۆر باش لەنێوان هەرێم و بەغدا هەیە سەبارەت بە پرسی موچە، ئەم لیستەی کە دانراوە رەزامەندی تەیف سامی وەزیری دارایی عیراقی لەسەرە و تاوەکو کۆتایی ئەمساڵ پشتی پێ دەبەسترێت.
پەیامنێری کوردسات نیوز دەشڵێت، لە ئێستادا وەفدەکەی حکومەتی هەرێم لە بەغدادە و لە چاوەڕوانی خەرجکردنی موچەی مانگی یەکە، وەزیری دارایی عیراق ئیمزای لەسەر نووسراوی خەرجکردنی پارەی موچەکە کردووە، تەنها هەندێک کاری هونەری هەردوو دارایی هەرێم و بەغدا ماوە تاوەکو لیستەکە جێگیر بکرێت و پارەی موچە رەوانە بکرێت.
باسی لەوەشکرد، بڕی پارەکە زیاتر لە یەک ترلیۆن دینارە و ئەمڕۆ لەلایەن وەزارەتی دارایی عیراقەوە دەخرێتە سەر هەژماری بانکی وەزارەتی دارایی هەرێم، ئەو موچە خۆرانەشی بایۆمەتریان بۆ نەکراوە، دەبێت کەموکوڕییەکانیان چارەسەر بکرێت و ناوەکانیان بخرێتە ناو لیستی موچەوە.
کەشناسیی عیراق پێشبینییەکانی کەشوهەوای ئەمڕۆ و سبەی ئاشکرا کردووە و رایگەیاندووە، لە کۆتایی ئەم هەفتەیەدا باران دەبارێت.
کەشناسیی عیراق رایگەیاندووە، لە رۆژی سێشەممەوە لە هەرێم ئاسمان بۆ هەور دەگۆڕێت و لە رۆژی چوارشەممەوە کەشەکە بە تەواوی دەگۆڕێت.
ئاماژەی بەوەشکردووە، رۆژی چوارشەممە، ئاسمان هەوری تەواو دەبێت و ئەگەری هەیە لە چەند ناوچەیەکی هەرێمدا باران ببارێت.
دەشڵێت، خێرایی با بەشێوەیەکی بەرچاو بەرزدەبێتەوە و هەندێک جار دەگاتە 30 بۆ 40 کیلۆمەتر لە سەعاتێکدا.
ئەوەشی خستووەتە روو، رۆژی پێنجشەممە 6ی ئەم مانگە، بەهەمان شێوە لە هەرێم ئاسمان هەور دەبێت و باران دەبارێت، هەروەها ڕەشەبا بەردەوام دەبێت.
کەشناسیی هەرێم پێشبینییەکانی کەشوهەوای ئەمڕۆ و سبەی راگەیاند و ئاماژەی بەوەکرد، کەش جێگیر دەبێت و پلەکانی گەرما نزمتر دەبنەوە.
کەشناسیی هەرێم رایگەیاندووە، ئەمڕۆ یەکشەممە، ئاسمان ساماڵ و پەڵەهەور دەبێت بە گشتى، پلەکانی گەرماش نزیک دەبنەوە لە تۆمارکراوەکانى دوێنێ.
ئاماژەی بەوەشکردووە، سبەی دووشەممە، ئاسمان ساماڵ و پەڵەهەور دەبێت بە گشتى، بەڵام پلەکانی گەرما 1 بۆ 2 پلەی سیلیزی نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر: 16پلەى سیلیزى
سلێمانی: 15پلەى سیلیزى
دهۆک: 17 پلەى سیلیزى
کەرکوک: 18 پلەى سیلیزى
زاخۆ: 17 پلەى سیلیزى
هەڵەبجە : 17 پلەى سیلیزى
حاجی ئۆمەران: 2 پلەى سیلیزى
سۆران: 15 پلەى سیلیزى
گەرمیان: 19 پلەى سیلیزى
سۆران: 15 پلەى سیلیزى