شازادە ئێلیزابێسی بەلجیکا، کە تەمەنی 23 ساڵە، رەنگە ناچار بێت واز لە خوێندنەکەی بهێنێت لە زانکۆی هارڤارد بەهۆی بڕیارە نوێیەکانی دۆناڵد ترەمپ سەرۆکی ئەمریکاوە.

شاهزادەکە کە ساڵی یەکەمی لە بەشی سیاسەتی گشتی لە هارڤارد تەواوکردووە، ئێستا بەرەوڕووی مەترسی دەرکردن بووەتەوە دوای ئەوەی ترەمپ قەدەغەی بەسەر وەرگرتنی خوێندکارانی بیانی سەپاند.

ئیدارەی ترەمپ رۆژی پێنجشەممە بڕیاری دا کە جامعەی هارڤارد ناتوانێت خوێندکارانی بیانی ئیتر وەربگرێت، هەروەها ئەو خوێندکارانەی ئێستا لەوێ خوێندکارن دەبێت بگوازرێنەوە بۆ زانکۆکانی دیکە یان مافی یاسایییان لە ئەمەریکا لەدەست دەدەن.

لۆر ڤاندۆرن، وتەبێژی کۆشکی پاشایەتی بەلجیکا دەڵێت: "شازادە ئێلیزابێس تازە ساڵی یەکەمی تەواوکردووە. کاریگەریی ئەم بڕیارە لە رۆژان و هەفتەکانی داهاتوودا رون دەبێتەوە. ئێستا سەیری بارودۆخەکە دەکەین."

خاڤیێر بایێرت، بەڕێوەبەری پەیوەندییەکانی کۆشکی پاشایەتی یش رایگەیاندووە: "ئێستا لە شیکردنەوەی ئەم بابەتەدا کاردەکەین... هێشتا ئەگەر هەیە شتی زیاتر روبدات". 

شازادە ئێلیزابێس خوێندکاری ماستەرە بۆ "سیاسەتی گشتی" لە هارڤارد. 

زانکۆی هارڤارد رۆژی هەینی سکاڵای یاسایی لە دژی حکومەتی ترەمپ کردووە و ئەم هەنگاوەی بە "پێشێلکارییەکی ئاشکرا" ناوبردووەکە دژی یاسای بنەڕەتی ئەمەریکا و یاسا فیدڕاڵیەکانی ترە.

عەباس عراقچی، وەزیری دەرەوەی ئێران لە پەیوەندییەکی تەلەفۆنیدا لەگەڵ وەزیری دەرەوەی ئیتالیا ئەنتۆنیۆ تایانی، ئەنجامەکانی پێنجەم خولی دانوستانە ناڕاستەوخۆکانی ئێران-ئەمەریکای پێڕاگەیاند دانوستانەکانی بە "پیشەیی و ئاقڵانە" ناوبرد.

عراقچی کە بۆ بەشداریکردن لە پێنجەم خولی دانوستانەکان گەشتی بۆرۆما کردووە، دانوستانەکانی ئەمڕۆی بە "پیشەیی و ئاقڵانە" ناوبردووە.

وەزیری دەرەوەی ئێران سوپاسی هاوکاری ئیتالیایی کردووە لەگەڵ عومان بۆ بەڕێوەبردنی ئەم خولە لە دانوستانەکان لە رۆما.

عراقچی هیوای ئەوەی دەربڕیووە کە عومان و ئیتالیا هەوڵبدەن زیاتر هەڵوێست و ویستی کۆماری ئیسلامی ئێران بۆ لایەنی ئەمریکی رونبکرێتەوە، بەمەستی تێگەیشتنی زیاتر لە نێوان هەردوولا و بەرەو پێش چوونی زیاتر.

ئاماژە بەوەشدراوە؛ لە تەلەفۆنەکەدا عراقچی رەخنەی لە پشتگیری هەمەلایەنەی ئەمەریکا و هەندێک وڵاتی رۆژئاوایی دیکە گرت بۆ پشتگیرییەکانیان لە ئیسرائیل.

کەمێک پێش ئێستا لە وێستگەی شەمەندەفەری سەرەکی شاری هامبورگی ئەڵمانیا 12 کەس لە هێرشێکی چەقۆ لێدان دا برینداربوون.

پۆلیسی هامبورگ راگەیاندووە کە سێ کەس لە بریندارەکان لە دۆخێکی سەخت دان، نۆ کەسی دیکەش برینەکانیان سوکە.

گۆڤاری ئەڵمانی بیلد نووسیویەتی کە لەسەر روداوەکە ژنێک لەلایەن پۆلیسی فیدراڵیەوە دەستگیرکراوە.

پۆلیسی هامبورگ لە تۆڕی کۆمەڵایەتی X نووسیویەتی: "ئۆپەراسیۆنێکی گەورەی پۆلیس لە وێستگەی سەرەکی هامبورگ دەستی پێکردووە! بەم زوانە زانیاریی زیاتر بڵاودەکەینەوە".

راپۆرتە سەرەتاییەکان ئاماژەیان بەوە کردبوو کە هەشت کەس برینداربوون، بەڵام پۆلیس دواتر ژمارەکەی راستکردەوە و وتی، 12بوون.