کوردستان
قوباد تاڵەبانی، جێگری سەرۆکوەزیران پێشوازیکرد لە دانیێل روبنستین، کاربەڕێکەری باڵیۆزخانەی ئەمریکا لە عێراق و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێ کران.
لە دەستپێکی کۆبوونەوەکەدا کە رۆژی پێنج شەمە(20/3/2025) بە ئامادەبوونی ستیڤن بیتنەر، کونسوڵی گشتیی ئەمریکا لە هەرێم بەڕێوەچوو، بەبۆنەی جەژنی نەورۆز پیرۆزبایی لە گەلی کورد کرا و هەردوولا هیوایان خواست ساڵی نوێی کوردی ساڵی ئاشتی و یەکگرتوویی و پڕ لە خۆشی و دەستکەوت بێت بۆ گەلی کورد.
لە تەوەرێکی کۆبوونەوەکەدا باسی پرۆسەی پێکهێنانی حکومەتی نوێی هەرێم کرا. لەمبارەیەوە جێگری سەرۆکوەزیران بە ئاماژەدان بە رێککەوتنی پارتی و یەکێتی لەسەر رەشنووسی دیدگای هاوبەش بۆ حکومڕانی، گەشبینی خۆی دەربڕی لە ماوەیەکی نزیکدا رێککەوتنی کۆتایی بکرێت بۆ پێکهێنانی حکومەتێکی بەهێز و کارا و یەکگرتوو.
روونیشی کردەوە پارتی و یەکێتی هەردوولا هاوڕان لەم قۆناغەدا بەپێی گۆڕانکارییەکانی ناوچەکە و هەروەها بۆ خزمەتکردنی باشتری هاوڵاتییان پێویستە حکومەتێكی کارا و خزمەتگوزار پێکبهێنرێت.
لە تەوەرێکی دیکەی کۆبوونەوەکەدا باس لە پەیوەندییەکانی نێوان هەرێم و بەغدا کرا. لەم چوارچێوەیەشدا قوباد تاڵەبانی جەختی کردەوە لەسەر پەلەکردن لە هەناردەکردنەوەی نەوتی هەرێم و رایگەیاند حکومەتی هەرێم لە هەوڵدایە بۆ چارەسەرکردنی هەموو کێشە و بەربەستەکانی بەردەم دەستپێکردنەوەی هەناردەکردنی نەوت.
هەردوولاش هاوڕابوون کە یەکگرتوویی و یەکهەڵوێستی لایەنە کوردییەکان لە بەغدا کاریگەری گەورەی دەبێت لەسەر زووتر چارەسەرکردنی ناکۆکییەکانی نێوان هەرێم و بەغدا.
ئەمڕۆ 20ی ئازار، لە هەرێمی کوردستان ئاگری جەژنی نەورۆز دەکرێتەوە و بەهۆی ئەوەشی جەژنی نەورۆز کەوتووەتە مانگی رەمەزانەوە، لەدوای بەربانگەوە ئاگر دەکرێتەوە.
ئەمڕۆ 20ی ئازار، لە شارە جیاوازەکانی هەرێمی کوردستان ئاگری جەژنی نەورۆز دەکرێتەوە و بەهۆی ئەوەشی مانگی رەمەزانە، لەدوای بەربانگەوە ئاگر دەکرێتەوە و چالاکییەکانی ئەو جەژنە نەتەوەییە بەرێوە دەچن.
لە ئاکرێ کە بە پایتەختی نەورۆز ناسراوە، بڕیارە سەعات 6 و 45 خولەکی ئێوارە ئاگری نەورۆز بکرێتەوە و پەیامنێری کوردسات نیوز باسی لەوەکرد، 2725 مەشخەڵ، کە ژمارەی مەشخەڵەکان هاوتای ساڵی کوردییە، ئامادەکراون بۆئەوەی لە ئێوارەدا دابگیرسێنرێن و ببرێنە سەر شاخەکانی کەلها ئاکرێ، کەلە کەڤن، رەزێ میری، تیشی، خڕگا، گرێ توپا، شێخ ماڤ. هەروەها چەندین یاری ئاگرین دەتەقێنرێنەوە و بۆ یەکەمجارە بەشێکی ئەو یارییە ئاگرینانە بەکاردەهێنرێن، کە هەندێکیان ماوەی تەقاندنەوەکەی 12 خولەک دەخایەنێت و ئاسمانی کارێ رووناک دەکەنەوە.
لە هەولێریش بڕیارە لەسەر قەڵای هەولێر ئاگری نەورۆز بکرێتەوە.
لە سلێمانیش لە هەریەک لە گردی مامەیارە و شەقامی سالم و پارکی ئازادی ئاگر دەکرێتەوە و چەندین چالاکی بەڕێوەدەچێت.
لە هەریەک لە شارەکانی دیکەش بە شێوەی جیاواز ئاگری جەژنی نەورۆز دەکرێتەوە و هاووڵاتیانی هەرێم پێ دەنێنە ناو ساڵێکی نوێی کوردییەوە.
کەشناسیی هەرێم پێشبینی نوێی بۆ کەشوهەوای ئەمڕۆ و سبەینێ بڵاوکردەوە رایگەیاندووە، پلەکانی گەرما نزمتر دەبنەوە و بەفر و باران دەبارێت و شەپۆلەکە تاوەکو رۆژی یەکشەممە بەردەوام دەبێت.
کەشناسیی هەرێم رایگەیاند، ئەمڕۆ پێنجشەممە، لە ئەنجامی بەردەوامی کاریگەری نزمەپەستانی رۆژهەڵاتی دەریای سپی ناوەڕاست، ئاسمان هەور و نیمچەهەور دەبێت لەگەڵ نمەباران لە تەواوی ناوچە سنووریەکانی باکوور و رۆژهەڵاتی هەرێم، هەروەها لە ناوچە بەرزەکان بەفریش دەبارێت.
ئاماژەی بەوەشکردووە، شەپۆلەکە لە کاتەکانی دوای نیوەڕۆدا دەگۆرێت بۆ هەورەتریشقە و بروسکە، کە هەردوو سەنتەری شاری سلێمانی و هەڵەبجەش دەگرێتەوە، هەروەها ئەگەری توزێکی سووک هەیە زیاتر لە ناوچەکانی باشووری رۆژئاوای هەرێم.
کەشناسی دەشڵێت، ئەمشەو کەشەکە تاوەکو کاتەکانی بەیانی هەینی تاڕادەیەک سەقامگیر دەبێتەوە و دواتر بەیانی هەینی، ئاسمان هەور و نیمچەهەور دەبێت.
ئەوەش هاتووە، سەرەتای رۆژی هەینی دابارین لە زۆربەی ناوچەکانی بادینان و پارێزگای دهۆک بەشێوەی نمەبارانی کەم کەم دەست پێ دەکات، لەگەڵ کەمێک بەفربارین لە ناوچە شاخاوییە سنووریەکانی باکوور، پاشان بۆ کاتەکانی نیوەڕۆ کاریگەرییەی درێژدەبێتەوە بۆ ناوچەکانی رۆژهەڵات و پارێزگای سلێمانی و لە ناوچەکانی دیکەی هەرێم دابارین بەشێوەى پچڕپچڕ دەبێت.
بەپێی پێشبینییەکانی کەشناسیی، لەدوای نیوەڕۆوە کاریگەری شەپۆلەکە لاواز دەبێت و لە ناوچە شاخاوییە سنووریەکان بەفربارینێکی دەبێت، هەروەها کاتەکانی درەنگانی شەوی هەینی لەسەر شەممە، پێشبینی دەکرێت بۆ کاتەکانی نیوەڕۆی دووەم رۆژی نەورۆز بەردەوامی ببێت پاشان کەشی هەرێم بەتەواوی سەقامگیر دەبێتەوە.
بەپێی پێشبینییەکان، پلەکانی گەرما ئەمڕۆ 4 بۆ 6 پلەی سیلیزی دادەبەزن و سبەینێش 2 بۆ 3 پلەی دیکە دادەبەزن.
بەرزترین پلەکانی گەرمای پێشبینیکراو بە پلەی سیلیزی:
هەولێر :19 پلەی سیلیزی
سلێمانی : 17 پلەی سیلیزی
دهۆک : 15 پلەی سیلیزی
کەرکوک : 21 پلەی سیلیزی
زاخۆ : 15 پلەی سیلیزی
هەڵەبجە : 16 پلەی سیلیزی
سۆران : 15 پلەی سیلیزی
حاجی ئۆمەران : 8 پلەی سیلیزی
گەرمیان :21 پلەی سیلیزی
پۆلیسی سلێمانی راگەیەنراوێکی لەبارەی رووداوەکەی شەوی رابردووی سەیدسادق بڵاوکردەوە و ئاماژەی بەوەکردووە، بکوژەکە تاوانەکەی بە چەکی کڵاشینکۆف ئەنجام داوە.
پۆلیسی سلێمانی رایگەیاند، رووداوەکە شەوی رابردوو رویداوە و کاتژمێر 11 و 10 خولەک هێزەکانی پۆلیسی لێئاگادار کراوەتەوە.
ئاماژەی بەوەشکرد، روداوەکە لە گوندی گرێزەی سەر بە قەزای سەیدسادق بووە و بەپێی لێکۆڵینەوە سەرەتاییەکان، روداوەکە بەهۆی کێشەی کۆمەڵایەتییەوە رویداوە و یەکێک لە ئەندامانی خێزانەکە بەناوی بەشیر سالار لەدایکبووی ساڵی 1988، بە چەکی جۆری کڵاشینکۆف دەستڕێژی لە ئەندامانی خێزانەکەی کردووە.
ئەوەش هاتووە، ئەو ئەندامانەی خێزانەکە کە کەژراون پێکهاتوون لە دایک و باوک و دوو خوشک و برایەک، دواتریش بکوژەکە کۆتایی بە ژیانی خۆی هێناوە.
بەپێی راگەیەنراوەکەی پۆلیسی سلێمانی، لەئێستادا دەست بەسەر ئەو چەکەدا گیراوە کە تاوانەکەی پێ ئەنجام دراوە و پەڕاوی لێکۆڵینەوە بۆ رووداوەکە کراوەتەوە، بەمەبەستی ئاشکراکردنی هۆکاری تەواوی رووداوەکە.
بەپێی راگەیەنراوی پۆلیس ناو و تەمەنی کوژراوەکان بەمجۆرەیە:
-سالار محمد عهبدولكهریم؛ باوک- لهدایكبووی 1970
-نیهاد قادر ساڵح؛ دایک- لهدایكبووی 1975
-سیما سالار محمد لهدایكبووی 2005
-سهههند سالار محمد لهدایكبووی 2015
-یارا سالار محمد لهدایكبووی 2018
-بهشیر سالار محمد لهدایكبووی 1998 (بكوژ)
لە روداوێکی هاتوچۆدا لەسەر رێگای چەمچەماڵ بۆ سلێمانی کەسێک گیانی لەدەستدا و کەسێکی دیکە بە سەختی بریندار بوو.
لێپرسراوی بنکەی هاتوچۆی بازیان بە کوردسات نیوزی راگەیاند، روداوێکی هاتوچۆ لەسەر رێگای نێوان چەمچەماڵ بۆ سلێمانی، لەنێوان دوو بارهەڵگردا رویداوە.
ئاماژەی بەوەشکرد، بەهۆی روداوەکەوە یەکێک لە شۆفێرەکان گیانی لەدەستداوە و شۆفێرەکەی دیکەشیان بە سەختی بریندار بووە.
بەپێی زانیارییەکان، لەئێستادا تەرمی ئەو شۆفێرەی گیانی لەدەستداوە بۆ پزیشکی دادی سلێمانی گواستراوەتەوە و شۆفێرەکەی دیکەشیان لە نەخۆشخانە چارەسەری بۆ دەکرێت.
شەوی رابردوو لە گوندی گرێزەی سەیدسادق کەسێک دایک و باوک و دوو خوشک و برایەکی خۆی کوشت و دواتر کۆتایی بە ژیانی خۆشی هێنا.
درەنگانی شەوی رابردوو نزیک کاتژمێر 12، لە گوندی گرێزەی سەیدسادق کەسێک دایک و باوک و دوو خوشک و برایەکی خۆی کوشت و دواتر کۆتایی بە ژیانی خۆشی هێنا، بەپێی زانیارییەکان رووداوەکە بەهۆی کێشەی کۆمەڵایەتییەوە روویداوە.
ئەو کەسەی تاوانەکەی ئەنجامداوە بەمدواییانە لە ئەوروپا گەڕاوەتەوە و تەمەنی 22 ساڵ بووە، بە سەردان بۆلای باوکی گەڕاوەتەوە کە بەهۆی نەخۆشی دڵەوە نەشتەرگەریی بۆکراوە و ماەی چەند رۆژێکی کەمە لە نەخۆشخانە هێنراوەتە دەرەوە.
ژمارەی ئەندامانی خێزانەکە 9 کەس بووە و سالار محەمەد کە سەرۆکی خێزانەکە بووە، فەرمانبەر بووە لە بەڕێوەبەرایەتی دابەشکردنی کارەبای سەیدسادق.
لە ئێستادا تەنها دوو برا و یەک خوشکی ئەو خێزانە لە ژیاندا ماون.
هێشتا هیچ لایەنێکی فەرمی روونکردنەوەی لەسەر رووداوەکە بڵاونەکردووەتەوە، دوابەدوای رووداوەکەش بەیانی ئەمڕۆ تەرمی هەر شەش ئەندامی بنەماڵەکە لە تەنیشت یەک لە سەیدسادق بەخاک سپێردران.
ئەو کەسانەی لە رووداوەکەدا کوژراون:
-باوکی بکوژەکە بەناوی سالار محەمەد؛ 50 ساڵ
-دایکی بکوژەکە بەناوی نیهایەت قادر؛ 40 ساڵ
-برای بکوژەکە بەناوی سەهەند سالار؛ 14 ساڵ
-خوشكی بکوژەکە یارا سالار؛ 8 ساڵ
-خوشکی بکوژەکە سیما سالار؛ 20 ساڵ
بەبۆنەی بەڕێوەچوونی ئاهەنگەکانی نەورۆزەوە بەرگریی شارستانیی هەرێمی کوردستان رایگەیاند کە سەرجەم تیمەکانی لە ئامادەباشیدا دەبن.
ئەمڕۆ چوارشەممە، سەرکەوت کاڕەش، گوتەبێژی بەرگریی شارستانیی هەرێم، راگەیاند: "لە بەیانییەوە هەر نۆ بەڕێوەبەرایەتییەکانی بەرگریی شارستانیی هەرێم دەکەونە ئامادەباشییەوە تاوەکو تەواوبوونی هەڵکردنی ئاگر و ئاهەنگی نەورۆز."
گوتەبێژی بەرگریی شارستانیی هەرێم جەختی کردەوە کە "دیاردەی سووتانی تایە بە هەموو شێوەیەک قەدەغەیە و هەر کەسێک ئەم کارە بکات، ڕووبەڕووی سزا دەبێتەوە."
سەرکەوت کاڕەش ئاماژەی بەوەش کرد، لەکاتی هەبوونی هەر حاڵەتێکی نەخوازراو، هاووڵاتییان دەتوانن ڕاستەخۆ ئاگاداریان بکەنەوە.
سبەی ئێوارە، بەبۆنەی ساڵی نوێی کوردی و جەژنی نەورۆز، لە زۆربەی شار و شارۆچکەکانی هەرێمی کوردستان ئاگری نەورۆز دەکرێتەوە.
بافڵ جەلال تاڵەبانی، سەرۆکی یەکێتیی نیشتمانیی کوردستان، ئەمڕۆ لە شاری سلێمانی سەردانی سیاسەتمەدار عومەر سەید عەلی کرد.
لە دیدارێکدا، سەرۆک بافڵ جەلال تاڵەبانی لە نزیکەوە لە تەندروستی عومەر سەید عەلی پرسی و هیوای سەلامەتی و تەندروستییەکی باشی بۆ خواست.
سەرۆک بافڵ لەو دیدارە دۆستانەیەدا، ستایشی رابردووی پاک و درەوشاوەی عومەر سەید عەلی و بنەماڵەکەیانی کرد کە نموونەی بەرزی خەبات و قوربانیدانی گەلەکەمانن.
سەرۆکی یەکێتیی نیشتمانیی کوردستان جەختی کردەوە کە لە مێژووی رزگاریخوازی کورددا، بە تایبەت لە شۆڕشی نوێ، جێدەستی عومەر سەید عەلی لە نەخشەی سیاسی، خەباتی شاخ و شار، رێکخستن و خۆڕاگری لە زینداندا دیار و بەرچاوە و هەمیشە بۆ ئێمە مایەی شانازییە.
لیژنەیەكی وەزارەتی دارایی هەرێمی كوردستان گەیشتە بەغداد و لیستی موچەی مانگی سێیان رادەستی وەزارەتی دارایی عیراق كرد.
پەیامنێری كوردسات نیوز رایگەیاند، لیژنەیەكی وەزارەتی دارایی هەرێم گەیشتووەتە بەغداد و لیستی موچەی مانگی سێیان رادەستی وەزارەتی دارایی عیراق كردووە.
وتیشی، وەزارەتی دارایی عیراق هەموو وەزارەت و فەرمانگەكانی عیراقی ئاگادار كردووەتەوە، بۆ مانگی سێ هیچ گۆڕانكاریەك لە لیستی موچەدا ناكرێت و دەبێت هاوشێوەی مانگی دوو بێت، ئەوەش بۆ هەرێمی كوردستان جێبەجێ دەكرێت.
راشیگەیاند، سبەینێ پێنجشەممە لە دەوامی رەسمیدا دەست بە وردبینی لیستی موچەی مانگی سێی موچەخۆرانی هەرێم دەكرێت، ئەگەر هەر جیاوازییەكیش هەبێت لەلایەن وەزارەتی دارایی عیراقەوە رەتدەكرێتەوە.
قوباد تاڵەبانی، جێگری سەرۆک وەزیران بە جیا لەگەڵ هەر یەکە لە نیکۆلۆ فۆنتایا، باڵیۆزی ئیتالیا و گلێن مایلز، باڵیۆزی ئوسترالیا لە عێراق کۆبووەوە و لە هەردوو کۆبوونەوەکەدا باس لە دواین بەرەوپێشچوونەکانی پرۆسەی پێکهێنانی کابینەی دەیەمی حکومەتی هەرێم کرا.
لە هەردوو کۆبوونەوەکەدا کە رۆژی چوارشەمە (19/3/2025) بەڕێوەچوون، قوباد تاڵەبانی روونیکردەوە لێکتێگەیشتنی زۆر باش لەنێوان پارتی و یەکێتی دروست بووە و لە دواین کۆبوونەوەشدا لەسەر رەشنووسی دیدگای هاوبەش بۆ حکومڕانی لە هەرێم رێککەوتوون.
راشیگەیاند بەپێی ئەم دۆخە ئەرێنیەی دروست بووە، پرۆسەی پێکهێنانی حکومەت خێراتر بووە و گەشبینین لە ماوەیەکی نزیکدا حکومەتی داهاتووی هەرێم پێکبهێنرێت.
جێگری سەرۆک وەزیران ئاماژەی بەوەشدا هەردوو لایەنی پارتی و یەکێتی هاوڕان کە بەپێی ئەو دۆخەی لە ناوچەکەدا دەگوزەرێت و هەروەها بۆ جێبەجێکردنی داواکارییەکانی هاووڵاتیان، پێویستە حکومەتێکی بەهێز و کارا و یەکگرتوو پێبکبهێنرێت.
قوباد تاڵەبانی سوپاسی هەردوو وڵاتی ئیتاڵیا و ئوسترالیای کرد لە هاوکاریکردنی هەرێمی کوردستان لە رووبەڕووبوونەوەی تیرۆردا و داوایکرد بەوپێیەی هێشتا تیرۆر مەترسییەکی گەورەیە بۆسەر ئاسایش و سەقامگیری ناوچەکە، هەردوو وڵات بەردەوامبن لە هاوکارییەکانیان.
مەكتەبی سیاسی یەكێتیی نیشتمانیی كوردستان، بەبۆنەی نەورۆز و ساڵی نوێی کوردی و ساڵیادی راپەڕینی کەرکوکەوە پەیامێکی بڵاوکردووەتەوە و تێیدا هاتووە، "هیوادارین لەم بۆنە نەتەوەییەدا هەموان بەڕۆحێكی كوردانەوە یەكدەنگ و یەكڕیزبین بۆ پاراستنی بەرژەوەندییە باڵاكانی نەتەوەكەمان و پێكهێنانی حكومەتێكی كاراو خزمەتگوزار لەخزمەتی ژیان و گوزەرانی خەڵكەكەمان".
دەقی پەیامەکە
پیرۆزبایی مەكتەبی سیاسی بۆ نەورۆز و راپەڕینی كەركوك
بە بۆنەی نەورۆزو ساڵی نوێی كوردییەوە كە هاوكاتە لەگەڵ یادی 34 ساڵەی سەركەوتنی راپەرین و رزگاركردنی شاری كەركوكی قودسی كوردستان، پیرۆزباییەكی گەرم لە كۆمەڵانی خەڵكی كوردستان و نەتەوەی كورد لەسەرتاسەری جیهان دەكەین.
لە مێژووی گەلانی نەورۆزخوازدا نەورۆز جەژنێكی دێرینی نوێبوونەوەی سروشتەو لەناو گەلی كوردیشدا رەمزی تێكۆشانی نەتەوەیی و بەرەنگاربوونەوەیە.
هیوادارین لەم بۆنە نەتەوەییەدا هەموان بەڕۆحێكی كوردانەوە یەكدەنگ و یەكڕیزبین بۆ پاراستنی بەرژەوەندییە باڵاكانی نەتەوەكەمان و پێكهێنانی حكومەتێكی كاراو خزمەتگوزار لەخزمەتی ژیان و گوزەرانی خەڵكەكەمان.
نەورۆزتان پیرۆز و بەهاری رزگاری یەكجارەكیتان بێتە دی
مەكتەبی سیاسی
یەكێتیی نیشتمانیی كوردستان
لیوا ئەحمەد لەتیف وتەبێژی هێزەکانی 70 بە کوردسات نیوزی راگەیاند: کێشەی موچەیی هێزەکانی پێشمەرگەی 70 چارەسەر کراوە و ئەو کورتهێنانەی هەبوو لە موچەی هێزەکانی 70 پڕکراوەتەوەو بەبێ هیچ گرفتێک ئەمڕۆ موچەیی هێزەکانیان دابەشکراوە.
نوێدەکرێتەوە...
لە سبەینێوە بۆ ماوەی سێ مانگ راوكردنی ماسی لە هەرێمی كوردستان قەدەغە دەكرێت. وتەبێژی پۆلیسی دارستان و ژینگەی سلێمانیش دەڵێت، پێویستە هەموو لایەك پابەندی بڕیارەکە بن.
هێمن کەمەرخان وتەبێژی پۆلیسی دارستان و ژینگەی سلێمانی لە کۆنفڕانسێکی رۆژنامەوانیدا رایگەیاند: بۆ ئەمساڵ لە سبەینێوە تاوەکو 20ی 6ی 2025 قەدەغەی راوەماسی دەستپێدەکات، راوکردنی ماسی بە هەموو شێوەیەک قەدەغەیە.
وتیشی، لەو ماوەیەی کە دیاریکراوە، وەرزی گەرا دانان و زۆربوونی ماسییە، بۆیە داواکارین لەسەرجەم هاووڵاتیان و راوچییەکان لەو ماوەیەدا پاپەندی رێنماییەکان ببن، لەپێناو پاراستنی سامانی ماسی.
وتەبێژی پۆلیسی دارستان و ژینگەی سلێمانی ئاماژەی بەوەشکرد، هێزەکانمان بەردەوام چاودێری دەریاچە و روبارەکان دەکەن بۆ رێگریکردن لە راوکردنی ماسی لەو وادەیەی کە دیاریکراوە.
راشیگەیاند، هەر کەسێک سەرپێچی ئەو بڕیارە بکات، دەستگیر دەکرێت و رێکاری یاسایی بەرانبەر دەگیرێتەبەر و سزادەدرێت.
بەپێی بڕیارەکە رۆژی 21-6-2025 راوکردنی ماسی ئاسایی دەبێتەوە، هاووڵاتیان و راوچییەکان دەتوانن لەو رۆژەوە دەست بە راوە ماسی بکەنەوە.
وەزارەتی دارایی عیراق رەتیكردەوە لیستی موچەی مانگی سێی موچەخۆرانی هەرێمی پێگەیشتبێت و دەڵێت، نە لیستی موچە، نە وەفدی هەرێمیان نەبینیوە.
دوێنێ وەزارەتی دارایی و ئابووری هەرێم رایگەیاند، ئێوارەی سێشەممە لیستی موچەی مانگی سێی فەرمانبەران و موچەخۆرانی هەرێم لە رێگەی تیمی تەكنیكی وەزارەتی دارایی هەرێم ڕەوانەی وەزارەتی دارایی عیراق كراوە. بەڵام دوای نیوەڕۆی ئەمڕۆ سەرچاوەیەك لە وەزارەتی دارایی عیراق بە كوردسات نیوزی راگەیاند، تا ئێستا لیستی موچەی مانگی سێی موچەخۆرانی هەرێم نەگەیشتۆتە دەستیان، هەربۆیە وردبینكردنی لیستەكە دەستیپێنەكردوە و هەر كات لیستەكەیان پێبگات وردبینی تێدا دەكەن.
سەرچاوەكە وتیشی، هاوشێوەی فەرمانگەكانی تری عیراق نابێت هیچ گۆڕانكارییەك لە لیستی موچەی مانگی سێی موچە خۆرانی هەرێمدا هەبێت و دەبێت هاوشێوەی لیستی موچەی مانگی دوو بێت. ئەگەر هەر جیاوازییەكیش هەبێت لەلایەن وەزارەتی دارایی عیراقەوە رەتدەكرێتەوە و وردبینیكردن تیایدا دوادەكەوێت.
ئەنجومەنی وەزیرانی هەرێم لە كۆبوونەوەدایە و پرسی دامەزراندن و لێخۆشبوون لە بەشێك لە قەرزی شۆفێران تاوتوێ دەكرێت.
بەپێی كارنامەی كۆبونەوەكە، لە بڕگەی یەكەمی كۆبونەوەكەی ئەنجومەنی وەزیراندا پێشنیاری وەزارەتی ناوخۆ بۆ درێژكردنەوەی بڕیاری پێشووی ئەنجومەنی وەزیران تایبەت بە داشكاندنی ڕێژەی 20%ی سەرپێچی هاتووچۆ بۆ ماوەی 6 مانگی دیكە تاووتوێ دەكرێت.
لە بڕگەی دووەمیشدا یەكلاییكردنەوەی كێشەی دامەزراوان لەسەر میلاكی دامەزراوەكانی حكومەتی هەرێم بە هەمیشەیی و گرێبەست تاووتوێ دەكرێت كە لە مانگی 7ی 2024وە مووچەیان لەلایەن وەزارەتی دارایی و ئابووری بۆ نەبەستراوە بەهۆی جێگیرنەبوونی میلاكی مانگی تەمووز لەلایەن وەزارەتی دارایی فیدراڵەوە.
هەروەها لە بڕگەی سێیەمدا بابەتی دەرچوانی ساڵی 2024 ی كۆلێژی پزیشكیی گشتیی زانكۆ حكومییەكان تاووتوێ دەكرێت .
کەشناسی هەرێم: بەپێی پێشبینییەکان باران بارین دەستپێدەکاتەوە و پلەکانی گەرماش روو لەدابەزین دەکات.
بەڕێوەبەرایەتی کەشناسی هەرێم پێشبینی 48 سەعاتی داهاتووی بڵاوکردەوە و بەپێی پێشبینییەکان، ئەمڕۆ ئاسمان هەور و نیمچە هەور دەبێت و ئەگەری باران بارین و هەورە بروسکە هەیە، لەگەڵ زیاد بوونی خێرای با بۆ سەرووی (35) کم لە سەعاتێکدا.
کەشناسی هەرێم ئاماژەی بەوەشکردووە، پلەکانی گەرما بەگشتی نزم دەبێتەوە بە نزیکەی ( 1 – 3 ) پلەی سیلیزی لە تۆمارکراوەکانی دوێنێ زیاتر لەناوچە بەرزەکاندا.
کەشناسی هەرێم ئاشکراشیکردووە، سبەینێ پێنجشەممە ئاسمان هەوری تەواو و نیمچە هەور دەبێت لەگەڵ ئەگەری نمە بارانی پچر پچر لەسەر ناوچە شاخاوییە سنورییەکان، پلەکانی گەرما بەنزیکەی (3-5) پلە بەراوورد بە تۆمارکراوەکانی ئەمڕۆ بەتایبەتی لەناوچە شاخاوییەکان نزمدەبێتەوە.