کوردستان
لە هەڵەبجە دوو کەسی بەنەتەوە عەرەب بە تۆمەتی دزیکردن دەستگیرکران، پۆلیسی هەڵەبجەش دەڵێت: دزییان لە سندوقی خێری مزگەوتێک کردبوو.
بەڕێوەبەرایەتی پۆلیسی پارێزگای هەڵەبجە لە راگەیەنراوێکدا بڵاویکردەوە، لەلایەن بەشی پۆلیسی نەهێشتنی تاوانەوە توانرا دوو تۆمەتباری بەڕەگەز عەرەب بەناوەکانی 'م. ح. ر'ـی تەمەن 17 ساڵ و 'ا. و. ع'ـی 14 ساڵ دەستگیربکرێن، کە لەماوەی رابردوودا هەستاون بە دزیکردن لە سندوقی خێری مزگەوتێک لە ناو شاری هەڵەبجەدا.
ئاماژەی بەوەشکردووە، تۆمەتبارەکان کامێرای چاودێری مزگەوتەکەیان لەکارخستوە بۆئەوەی دەرنەکەون لەکاتی کارەکەیاندا، بەڵام لەماوەیەکی کەمدا توانرا لەلایەن بەشی پۆلیسی نەهێشتنی تاوانەوە تۆمەتباران بدۆزرێنەوە و دیاری بکرێن و بەبڕیاری دادوەر دەستگیربکرێن، هاوکات تۆمەتباران پێشینەی تاوانی دیکەیان هەیە .
پۆلیسی هەڵەبجە راشیگەیاند، تۆمەتباران لەبەردەم دادوەری لێکۆڵینەوەدا دانیان بەتاوانە کەیاندا ناوە و بەبڕیاری دادوەری لێکڵۆڵینەوە راگیراون و لێکۆڵینەوە لەگەڵیاندا بەردەوامە.
ئەمڕۆ چوارشەممە، کرێکارێک لە پڕۆژەیەکی نیشتەجێبوون لە سلێمانی کەوتە خوارەوە و گیانی لەدەستدا.
بەپێی زانیارییەکان کرێکارەکە تەمەنی سەرو 35 ساڵە و خەڵکی رۆژهەڵاتە و دانیشتوی گەڕەکی مەلا داودە لە سلێمانی.
روداوەکە لە یەکێک لە باڵەخانەکانی پرۆژەی مایۆرکا سیتی رویداوە و لە قاتی دەیەمەوە کەوتوەتە خوارەوە و لە ئێستادا تەرمەکەی رەوانەی پزیشکی دادی سلێمانی کراوە.
وەزارەتی دارایی و ئابوریی هەرێم رایگەیاند، لیستی موچەی مانگی نۆی (ئەیلول)ی سەرجەم فەرمانبەران و موچەخۆرانی هەرێم بە رەسمی رادەستی وەزارەتی دارایی حکومەتی فیدراڵی کرا بە مەبەستی وردبینیکردن و خەرجکردنی.
بەپێی راگەیەندراوێکی رەسمی کە لەلایەن وەزارەتی دارایی و ئابوریی هەرێمی کوردستانەوە ئەمڕۆ چوارشەممە، بڵاوکرایەوە، تیمی تەکنیکیی وەزارەتەکە لیستی موچەی مانگی ئەیلولی رادەستی فەرمانگەی ژمێریاری لە وەزارەتی دارایی حکومەتی فیدراڵی لە بەغداد کردووە.
ئەمە لە کاتێکدایە کە ئەمڕۆ چوار شەممە لیستی موچەی مانگی 7 بڵاوکرایەوە.
وەزارەتی دارایی خشتەی موچەی مانگی تەمووزی بڵاوکردەوە و بەپێی خشتەکە، پرۆسەکە رۆژی پێنجشەممە دەستپێدەکات و لە ماوەی چوار رۆژدا موچەی سەرجەم وەزارەت و دەستەکان دابەش دەکرێت.
وەزارەتی دارایی و ئابوریی حکومەتی هەرێمی کوردستان، ئەمڕۆ چوارشەممە، خشتەی رەسمیی دابەشکردنی موچەی مانگی حەوت (تەممووز)ی سەرجەم فەرمانبەران و موچەخۆرانی هەرێمی کوردستانی راگەیاند.
بەپێی راگەیەندراوی وەزارەت، پرۆسەی دابەشکردنی موچە لە رۆژی پێنجشەممە، 2ی تشرینی یەکەمی 2025 دەست پێدەکات و لە رۆژی یەکشەممە، 5ی تشرینی یەکەمی 2025، کۆتایی دێت.
دابەشکردنی مووچە بەم شێوەیەی خوارەوە دەبێت:
یەکەم: رۆژی پێنجشەممە (2 / 10 / 2025)
-
خانەنشینی شارستانی
-
خاوەن پێداویستی تایبەت
-
زیندانە سیاسییەکان و بەرکەوتووانی کیمیاباران
-
کەس و کاری شەهیدان و ئەنفالکراوان و کاروباری شەهیدان
-
وەزارەتی پەروەردە
-
خانەنشینی پێشمەرگە
-
وەزارەتی دارایی و ئابووری
-
دەستەکانی (دەسپاکی، وەبەرهێنان، ژینگە)
-
دەزگای مین، ناوچەکانی دەرەوەی هەرێم، کۆمسیۆنی هەڵبژاردن، دیوانی چاودێری دارایی، و مافی مرۆڤ.
دووەم: رۆژی شەممە (4 /10 / 2025)
-
وەزارەتی تەندروستی
-
وەزارەتی ناوخۆ
-
وەزارەتی داد و ئەنجومەنی دادوەری
-
وەزارەتەکانی (پلان دانان، بازرگانی و پیشەسازی، سامانە سروشتییەکان، گواستنەوە و گەیاندن، کشتوکاڵ و سەرچاوەکانی ئاو، شارەوانی و گەشتوگوزار، کار و کاروباری کۆمەڵایەتی، ڕۆشنبیری و لاوان، کارەبا).
سێیەم: رۆژی یەکشەممە (5 / 10 / 2025)
-
وەزارەتی ئەوقاف و کاروباری ئایینی
-
وەزارەتی خوێندنی باڵا و توێژینەوەی زانستی
-
سەرۆکایەتییەکانی (پەرلەمان، ئەنجومەنی وەزیران، هەرێمی کوردستان)
-
وەزارەتی پێشمەرگە (دیوان و لیواکان)
-
یەکەکانی 70 و 80
-
بەڕێوەبەرایەتیی پۆلیسی دام و دەزگا نەوتییەکان
-
ئەنجومەنی ئاسایشی هەرێمی کوردستان
-
هێزی زێرەڤانی و فەرماندەیی بەرگری و فریاکەوتن.
فەرماندەیی هێزەکانی کۆماندۆی کوردستان لەگەڵ فەرماندەیی هێزە هاوبەشەکانی دیالە، ئۆپراسیۆنێکیان لە سنوری پارێزگاکە ئەنجامدا و چەند شوێنێكی مانەوەی تیرۆرستان سوتێنران.
فەرماندەیی هێزەکانی کۆماندۆی کوردستان لە راگەیەنراوێکدا بڵاویکردەوە، بەرەبەیانی ئەمڕۆ سێشەممە سەعات 3:40 خولەك، فەرماندەیی هێزەكانی كۆماندۆی كوردستان بە هاوبەشی لەگەڵ 'لیوای 53 فرقەی 1 پیادەی هێزە هاوبەشەكانی دیالە' لەسنوری پارێزگاكە، ئۆپەراسیۆنێكی گەڕان و پشكنینان بۆ ژمارەیەك گومانلێكراو و پاشماوەكانی تیرۆرستان و شانە نوستووەكانی داعش ئەنجامدا.
ئاماژەی بەوەشکردووە، توانرا چەند حەشارگەیەكی تیرۆرستان ئاشكرا بكرێت،كە سەرجەمیان سوتێنران و لەناوبران بە پانتایی زیاتر لە 10 كیلۆمەتری ناوچەكەش پاككرایەوە.
فەرماندەیی هێزەکانی کۆماندۆی کوردستان راشیگەیاندووە، ئۆپەراسیۆنەكە لە گوندەكانی (ئەل عەلوش - ئەل بجاجیل - ئەل غزیفی - ئەل دۆرە)ی سەر بەناحییەی قەرەتەپەی قەزای خانەقین بەردەوامی هەبوو، كە راستاندن بۆ ناوی هاووڵاتیانی ئەو گوندانە كرا، بۆ دۆزینەوەی ئەو گومانلێكراوانەی ناویان لە ئاسایشی نیشتمانی عیراق هەبوو، كە ئامانجی سەرەكی ئۆپەراسیۆنەكە بوو.
سیستمی زانکۆلاین بۆ ماوەی 48 سەعاتی دیکە درێژکرایەوە، وەزارەتی خوێندنی باڵا و توێژینەوەی زانستیش دەڵێت: تا ئێستا زیاتر لە 49 هەزار دەرچوی 12ـی ئامادەیی فۆرمی زانکۆلاینیان پڕکردوەتەوە.
وەزارەتی خوێندنی باڵا و توێژینەوەی زانستی لە راگەیەنراوێکدا بڵاویکردەوە، لەپێناو پێدانى دەرفەتى زیاتر بە دەرچوانى دوانزەى ئامادەیى بۆ ئەوانەى تا ئێستا فۆڕمى (زانکۆلاین) یان پڕنەکردۆتەوە یان تەواویان نەکردوە، بڕیاردرا ماوەى زانکۆلاین 48 سەعاتى دیکە واتە تا سەعات (12)ی شەوى پێنجشەممە لەسەر هەینى رۆژی 2ـی10ـی2025 بۆ دەرچوانى قۆناغى دوانزەى ئاماەیی درێژبکرێتەوە.
ئاماژەی بەوەشکردووە، لەپێناو بەرژەوەندى گشتى و پێدانى دەرفەتى زیاتر بە دەرچوانى ئەمساڵ، کە بەهەر هۆکاربێت نەیانتوانیوە فۆرمى زانکۆلاین پڕبکەنەوە، لە ئێستادا دەتوانن سوودمەندبن لەم دەرفەتەو فۆرمى زانکۆلاین تەواو بکەن، هەروەها دەرچوانى خوێندنگە نێودەوڵەتییەکان و پیشەییەکانیش بەهەمان شێوە دەتوانن سود لەم دەرفەتە وەربگرن و لەو 48 سەعاتەدا فۆرمى زانکۆلاین پڕبکەنەوە.
وەزارەتى خوێندنى باڵا ئاشکراشیکردووە، ئەمە دواین دەرفەتە و چیتر ماوەى زانکۆلاین درێژناکرێتەوە، دەشڵێت، تا ئێستا زیاتر لە 49 هەزار دەرچوی 12ـی ئامادەیی فۆرمی زانکۆلاینیان پڕکردوەتەوە.
بەڕێوەبەرایەتی ئاسایشی پارێزگای سلێمانی دەستگیرکردنی دوو تەقەکەری راگەیاند، کە تەقەیان لە ماڵی هاووڵاتییەک کردبوو.
بەڕێوەبەرایەتی ئاسایشی سلێمانی لە راگەیەنراوێکدا بڵاویکردەوە، شەوی 18ـی9ـی2025 لەگەڕەکی (شێخ محی الدین)ی شاری سلێمانی، دوو کەس تەقە لەماڵی هاووڵاتیەک دەکەن و هەڵدێن، لەسەر ئەم روداوە دەستبەجێ بەڕێوەبەرایەتی ئاسایشی پارێزگای سلێمانی لێکۆڵینەوە و بەدواداچوونی ئەنجامدا.
ئاماژەی بەوەشکرد، توانرا لەماوەی کەمتر لە24 سەعاتدا هەردوو تۆمەتبار دەستگیربکرێن و دەستبەسەر دوو چەکی بێ مۆڵەتدا بگیرێت.
ئاسایشی سلێمانی راشیگەیاندووە، لەئێستادا تۆمەتباران بەماددەی 31/405 راگیراون و لێکۆڵینەوە لە دۆسیەکانیان بەردەوامە.
سبەینێ موچەی مانگی حەوتی موچەخۆرانی هەرێمی کوردستان لە رێگەی هەژماری منەوە دابەش دەکرێت.
سبەینێ چوارشەممە موچەی مانگی حەوتی موچەخۆرانی هەرێم لە رێگەی پڕۆژەی هەژماری منەوە دابەشدەکرێت، زیاتر لە 500 هەزار موچەخۆر موچەکانیان وەردەگرن.
پرۆژەی هەژماری من بڵاویکردوەتەوە، سبەینێ لە سەرجەم پارێزگاکانی هەرێمی کوردستان زیاتر لە 500 هەزار کەس موچەکانیان لەرێگەی هەژماری منەوە وەردەگرن.
ئاماژەی بەوەشکردووە، 580 ئامێری ATM لە شوێنە جیاوازەکان دانراون و بەشداربووانی هەژماری من دەتوانن سبەینێ موچەکانیان وەربگرن.
پرۆژەی هەژماری من ئەوەشی خستوەتەڕوو، تا ئێستا زیاتر لە 900 هەزار کەس لە پرۆژەکە تۆمارکراون.
وەفدی باڵای یەكێتی و پارتی لە پیرمام كۆبوونەوە بۆ تاوتوێكردنی پرسی پێكهێنانی كابینەی نوێی حكومەتی هەرێم.
پەیامنێری كوردسات نیوز لە هەولێر رایگەیاند، وەفدی یەكێتی بە سەرۆكایەتی بافڵ جەلال تاڵەبانی سەرۆكی یەكێتی و ئەندامێتی قوباد تاڵەبانی و دەرباز كۆسرەت رەسوڵ لەگەڵ وەفدی پارتی بە سەرۆكایەتی مەسعود بارزانی سەرۆكی پارتی و ئەندامێتی نێچیرڤان بارزانی، و مەسرور بارزانی و هۆشیا زێباری گفتوگۆیان لەبارەی ئاستەنگەكانی بەردەم پێكهێنانی كابینەی نوێی حكومەتی هەرێم كردووە.
ئەوەشی خستەڕو، كۆبوونەوەكە ماوەی دوو سەعاتی خایاندووە و تیایدا جەختكراوەتەوە لە چڕكردنەوەی هەوڵەكان بۆ پێكهێنانی كابینەی نوێی حكومەتی هەرێم بە زووترین كات.
پەیامنێری كوردسات نیوز راشیگەیاند، لەسەر ئاستی باڵای یەكێتی و پارتی هەوڵی راستەقینە و كرداری هەیە بۆ پێكهێنانی كابینەی نوێی حكومەتی هەرێم، هەوڵەكانیش بە ئاڕاستەیەكە بەزووترین كات پەرلەمانی كوردستان كارابكرێتەوە و پاشان بە رێككەوتنی هەردوولا سەرۆكی پەرلەمانی كوردستان دیاریبكرێت، دواتریش قۆناغ بە قۆناغ رێككەوتن لەسەر پۆستە باڵاكانی تری كابینەی نوێ بكرێت، یەكێتیش پێداگرە لەسەر وەرگرتنی پۆستی سەرۆكی پەرلەمان و وەزیری ناوخۆ لە كابینە نوێیەكەدا.
ئەوەش لەدوای ئەوەدێت، دوو شەممەی رابردوو بافڵ جەلال تاڵەبانی و مەسعود بارزانی كۆبوونەوە و رەوشی سیاسی عیراق و ناوچەكە و پرۆسەی سیاسی هەرێمی كوردستان و پێكهێنانی حكومەتی نوێی هەرێمیان تاوتوێكرد.
لە ساڵیادی کۆچی دوایی سەرۆک مام جەلالدا، بۆردی راگەیاندنی یەکێتیی نیشتمانیی کوردستان پێشانگەیەکی تایبەت بە بەشێک لە فۆتۆکانی سەرۆک مام جەلال دەکاتەوە.
بۆردی راگەیاندنی یەکێتیی نیشتمانی کوردستان، رۆژی چوارشەممە 1ـی 10ـی 2025، پێشانگەیەکی تایبەت بە بەشێک لە فۆتۆکانی سەرۆک مام جەلال دەکاتەوە.
لە پێشانگەکەدا بەشێک لەو وێنانە نمایش دەکرێن کە تایبەتن بە قۆناغە جیاجیاکانی خەباتی سیاسی و رزگاریخوازی گەلەکەمان، کە لە هەڕەتی لاوییەوە دەستیپێکردووە.
پێشانگەکە سەعات 4ـی پاشنیوەڕۆ دەستپێدەکات و شوێنی پێشانگەکە لەبارەگای بۆردی راگەیاندنی یەکێتی لە گەڕەکی رزگاری تازە لە سلێمانی بەڕێوەدەچێت و هاتن بۆ هەموانە.
ناوی فڕۆكەخانەی نێودەوڵەتیی سلێمانی دەگۆڕدرێت بۆ فڕۆكەخانەی نێودەوڵەتیی جەلال تاڵەبانی، سەرۆك وەزیرانی عیراقیش رەزامەندی دەربڕیوە بە گۆڕینی ناوی فڕۆكەخانەکە.
باڵیۆز د. محەمەد سابیر، سەرۆكی دامەزراوەی سەرۆك جەلال تاڵەبانی، راگەیاند: لەسەر داوای دامەزراوەی سەرۆک جەلال تاڵەبانی، سەرۆك وەزیرانی عیراق رەزامەندی دەربڕیوە بە گۆڕینی ناوی فڕۆكەخانەی نێودەوڵەتیی سلێمانی بۆ فڕۆكەخانەی نێودەوڵەتیی جەلال تاڵەبانی، كە زیاتر لە چوار ساڵە هەوڵەكان لەوپێناوەدا بەردەوامبووە.
وتیشی، بڕیارەكە ئاڕاستەی دەسەڵاتی فڕۆكەوانی شارستانی و سەرجەم لایەنە پەیوەندیدارەكان و فڕۆكەخانەكانی عیراق كراوە و تەنها چەند رێكارێكی یاسایی ماوە، بەڵام بڕیاری گۆڕینی ناوەكەی دراوە.
سەرۆكی دامەزراوەی سەرۆك جەلال تاڵەبانی ئەوەشی خستەڕوو: لەدوای تەواوبوونی رێكارەكان لە مەڕاسیمێكی شایستەدا، ناوی فڕۆكەخانەی نێودەوڵەتیی سلێمانی دەگۆڕێت بۆ فڕۆكەخانەی نێودەوڵەتیی جەلال تاڵەبانی.
باڵیۆز د. محەمەد سابیر ئاماژەی بەوەشكرد، ئەم هەنگاوەمان خزمەتێكی بچوكە بە خەبات و تێكۆشان و هەوڵەكانی سەرۆك مام جەلال بۆ گەلی كورد و گەلانی عیراق و هێشتنەوەی ناوی بەڕێزیانە بەزیندویی، وەك سەرجەم سەركردەی وڵاتانی دیكە كە ناوی فڕۆكەخانەی وڵاتەكەیان كردووە بەناوی سەرۆكەكانیانەوە.
فڕۆكەخانەی نێودەوڵەتیی سلێمانی29ی 11ی ساڵی 2003 بەردی بناغەی دانرا و روبەرەكەی 13.5 كیلۆ مەترە، لە رۆژی 20ـی 7ـی 2005، لەڕێوڕەسمێكدا لە لایەن سەرۆك مام جەلال سەرۆک کۆماری عیراقەوە كرایەوە، پاش چهند مانگێك له كرانهوهی رۆژی 2ـی11ـی2005 ناسنامهی نێودهوڵهتی پێدراو لهئێستاشدا لهژێر ئیدارهی دهسهڵاتی فڕۆكهوانی عیراقیدایه، فڕۆكهخانهكهش به سهرجهم سیستم و پلانی فڕۆكهخانه نێودهوڵهتیيهكان كاردهكات كه له چهندین بهش پێكهاتووه.
ناوی ئەو فڕۆکەخانانەی کە لەجیهاندا بە ناوی سەرکردەکانەوە ناونراوە...
فڕۆکەخانەی نێودەوڵەتی جۆن ئێف کێنێدی– نیویۆرک، ئەمریکا
رۆناڵد ریگان فڕۆکەخانەی نیشتمانی واشنتۆن – واشنتۆن، دی سی، ئەمریکا
فڕۆکەخانەی چارڵز دی گۆڵ – پاریس، فەرەنسا
فڕۆکەخانەی ئەتاتورک -ئەستەنبوڵ، تورکیا
فڕۆکەخانەی نێودەوڵەتی ئیمام خومەینی – تاران، ئێران
فڕۆکەخانەی نێودەوڵەتی زاید – ئەبوزەبی، ئیمارات
فڕۆکەخانەی نێودەوڵەتی شا خالید – ریاز، سعودیە
فڕۆکەخانەی نێودەوڵەتی جۆرج بوش – هیوستن، ئەمریکا
فڕۆکەخانەی نێودەوڵەتی ئیندیرا غاندی – نیودەلهی،هیندستان
وەزارەتی دارایی هەرێمی کوردستان رایگەیاند، پارەی موچەی مانگی تەممووز خرایە سەر هەژماری بانکیی وەزارەتی دارایی.
وەزارەتی دارایی و ئابووری حکومەتی هەرێمی کوردستان ئەمڕۆ سێشەممە، رایگەیاند، بڕی (956,928,000,000) نۆ سەد و پەنجا و شەش ملیار و نۆ سەد و بیست و هەشت ملیۆن دینار وەک تەمویلی موچەی مانگی تەمووزی فەرمانبەران و موچەخۆرانی هەرێمی کوردستان، خراوەتە سەر هەژماری بانکی وەزارەت لە لقی هەولێری بانکی ناوەندی عیراق.
سەرچاوەیەکی تایبەت لە نوسینگەی بەڕێوەبەری گشتیی ژمێریاریی وەزارەتی دارایی حکومەتی فیدراڵی عیراق، بە بێستون سەلام پەیامنێری کوردسات نیوزی راگەیاند، کە دەستکراوە بە ئامادەکاریی لیستی موچەی مانگی حەوتی فەرمانبەرانی هەرێمی کوردستان.
ئەو سەرچاوەیە راشیگەیاند، پاش تەواوکردنی ئەو رێکارانە، لیستەکە دەبرێتە بەردەستی بەڕێوەبەری گشتیی خەرجییەکان بۆ ئەوەی واژووی بکات و فەرمانی خەرجکردنەکە دەربکات. بەمەش موچەی فەرمانبەرانی هەرێم بۆ مانگی حەوت خەرج دەکرێت.
سەبارەت بەوەی ئایا ئەو رێکارانە ئەمڕۆ کۆتایی دێت و پارەکە دەخرێتە سەر حسابی هەرێم، سەرچاوەکە ئەوەی راگەیاند: "رێکارەکان بەردەوامە، هەر کاتێک کۆتایی هات، دەستبەجێ پارەکە دەخرێتە سەر حسابی هەرێم."
بڕیار محەمەد پەیامنێری کوردسات نیوز رایگەیاند: ئەمڕۆ لە پیرمام وەفدی باڵای یەکێتیی نیشتمانیی کوردستان و پارتی دیموکراتی کوردستان کۆدەبنەوە.
پەیامنێرمان راشیگەیاند: تەوەری سەرەکی کۆبوونەوەکە پێکهێنانی کابینەی دەیەمی حکومەتی هەرێمی کوردستانە.
نوێدەکرێتەوە...
بەڕێوەبەرایەتی گشتیی تەندروستی سلێمانی ئەمڕۆ پێنجشەممە رایگەیاند، لە سەرەتای هەفتەی داهاتووەوە ڤاکسینی پەتای وەرزی (ئەنفلۆنزا) لە سەرجەم مەڵبەند و بنکە تەندروستییەکانی سنووری پارێزگای سلێمانی بەردەست دەبێت و هاوڵاتییانی دەتوانن سەردانی نزیکترین مەڵبەند و بنکەی تەندروستی لە خۆیانەوە بکەن بۆ وەرگرتنی ڤاکسینەکە.
بەپێی راگەیاندن و پەیوەندییە گشتییەکانی بەڕێوەبەرایەتی گشتیی تەندروستی سلێمانی، ئەم پێکوتەیە کار دەکات بۆ بەرزکردنەوەی ئاستی بەرگری لەشی مرۆڤ و رێگری کردن لە تووشبوون بە ڤایرۆسی ئەنفلۆنزای وەرزی یان کەمکردنەوەی نیشانەکانی تووشبوون بەو ڤایرۆسە.
بەڕێوەبەرایەتییەکە جەخت لەوە دەکاتەوە کە ئەم کوتانە ڕێگری لە تووشبوون بە ڤایرۆسی پەتای وەرزی دەکات. هەروەها ئەو کەسانەش کە دوای کوتانەکە تووشی پەتا دەبن، بەهۆی کاریگەریی ڤاکسینەکەوە لەسەریان، نیشانەکانیان سووکتر دەبێت و زووتر تێیدەپەڕێنن و چاک دەبنەوە.
بەیانیی ئەمڕۆ پێنجشەممە، لەسەر رێگای سەرەکی کەرکوک-هەولێر، نزیک پردێ، روداوێکی هاتوچۆ لەنێوان بارهەڵگرێک و ئۆتۆمبێلێکی تایبەتدا رویدا. بەهۆی ئەم روداوەوە، نۆ کەس برینداربوون.
سەرچاوەیەک لە پۆلیسی هاتووچۆی کەرکوک بە کوردسات نیوزی راگەیاند، پێنج لە بریندارەکان خوێندکاری زانکۆی کیتاب بوون، و چوارەکەی دیکەش کرێکار بوون.
تیمەکانی فریاگوزاری دەستبەجێ گەیشتنە شوێنی روداوەکە و بریندارەکانیان گواستەوە بۆ نەخۆشخانە بۆ وەرگرتنی چارەسەری پێویست. پۆلیسی هاتوچۆش دەستی بە لێکۆڵینەوە کردووە بۆ زانینی هۆکاری سەرەکی روداوەکە.