ئەمڕۆ لە ساڵیادی ماڵئاوایی سەرۆک مام جەلال، حەوتەمین پیشانگەی نێودەوڵەتیی سلێمانی بۆ کتێب دەکرێتەوە.

ئەمڕۆ لەیەکەم رۆژدا چەند چالاکییەک بۆ رێوڕەسمی کردنەوەی پێشانگەکە بەڕێوەدەچێت، هەروەها بڕیارە شاناز ئیبراهیم ئەحمەد خانمی یەکەمی عیراق و قوباد تاڵەبانی جێگری سەرۆک وەزیرانی هەرێم و چەندین لێپرسراوی حکومی و حزبی بەشداری تێدا بکەن.

لە ساڵیادی ماڵئاوای سەرۆک مام جەلال، لە یەکەم و دووەم رۆژی پێشانگەکە چەندین رێورەسم تایبەت بە خەباتی سیاسی و کاریزمایی سەرۆک مام جەلال بەڕێوەدەچێت.

پێشانگەکە بۆ ماوەی 11 رۆژ بەردەوام دەبێت و هاووڵاتیان دەتوانن لە سەعات 10ـی بەیانی بۆ 10ـی شەو سەردانی پێشانگەکە بکەن.

هاوکات ئەو هاووڵاتیانەی ئۆتۆمبێلی خۆیانیان پێ نییە و خوازیارن سەردانی پێشانگەکە بکەن، ئاسانکارییان تەواویان بۆ ئەنجامدراوە و پاسیان بۆ دابیندەکرێت بۆ ئەوەی سەردانی پێشانگەکە بکەن.

173  جێگەی ئاماژەیەدەزگای چاپ و ناوەندی ناوخۆیی و بیانی لە 17 وڵاتەوە بەشدارییان تێدا کردووە و هەزاران ناونیشانی کتێب بەردەست دەبن.

ئەمڕۆ 3ـی10ـی2025 هەشتەمین ساڵیادی کۆچی دوایی سەرۆک مام جەلالە، سەرۆک مام جەلال هەشت ساڵ بەر لە ئێستا لە نەخۆشخانەیەکی ئەڵمانیا کۆچی دوایی کرد و دڵە گەورەکەی لەکارکەوت.

سەرۆک مام جەلال وەک یەکەم کورد و یەکەم سەرۆک کۆماری عیراق دوای روخانی رژێمی بەعس، لە رۆژی 6 ی نیسانی 2005 بۆ یەکەمجار لە مێژووی عیراقدا وەک کوردێک بووە سەرۆک کۆماری عیراق.

سەرۆک مام جەلال لە ناوەڕاستی ساڵی 1970 لەگەڵ خاتوو هێرۆ ئیبراهیم ئەحمەد هاوسەرگیریی کردووە، مام جەلال لەگەڵ ئەوەی خوێندکار بووە لە بەغداد و دوای تەواوکردنیشی لە کاری سیاسی و رێکخراوەیی بەردەوامبووە.

 لەدوای روخانی رژێمی بەعس،  لە ساڵی 2003، سەرۆک مام جەلال ئەندامی مەجلیسی حوکمی عیراق بووە و بۆ خولێکیش سەرۆکی ئەو مەجلیسە بووە، لە داڕشتنەوەی دەستوری عیراقدا رۆڵی سەرەکیی گێڕاوە.

سەرۆک مام جەلال، رۆژی 17-12-2012 لە بەغداد باری تەندروستیی تێکچوو، دواتر رەوانەی نەخۆشخانەیەکی ئەڵمانیا کرا و دوای وەرگرتنی چارەسەر لە رۆژی 19-7-2014 گەڕایەوە سلێمانی، دوای ماوەیەک مام جەلال لە بەغداد رەوشی تەندروستی جارێکی دیکە تێکچوو و گەیەندرایە وڵاتی ئەڵمانیا بۆ چارەسەر، لە رۆژی 3ـی تشرینی یەکەمی 2017دا لە نەخۆشخانەیەکی ئەڵمانیا لە تەمەنی 84 ساڵیدا کۆچی دوایی کرد.

بانگەشەی هەڵبژاردنی ئەنجومەنی نوێنەرانی عیراق دەستیپێكرد و ژمارە 222 لیستی یەكێتیی نیشتمانیی كوردستانە بۆ ئەو هەڵبژاردنە. 

ئەمڕۆ بانگەشەی هەڵبژاردنی ئەنجومەنی نوێنەرانی عیراق دەستیپێكرد و تا بەرەبەیانی 8ی 11 بەردەوام دەبێت و كۆمیسیۆنی هەڵبژاردنی عیراقیش دەڵێت، 38 حزب و 38 هاوپەیمانی و 79 كاندیدی سەربەخۆ بەشداری پرۆسەكە دەكەن. 

لە تیروپشكی هەڵبژاردندا ژمارەی لیستی یەكێتی نیشتمانیی كوردستان 222 بوو و لە سەرجەم پارێزگاكانی هەرێمی كوردستان كاندیدی هەیە. 
بەپێی داتاكانی كۆمیسیۆن حەوت هەزار و 768 كەس كاندیدن بۆ هەڵبژاردنەكە و لەو ژمارەیەش پێنج هەزار و 520 كاندیدیان لە رەگەزی نێرن و ژمارەی كاندیدە ژنەكانیش دوو هەزار و 248 كەسە. 

816 كاندید بەهۆی تێوەگلان لە گەندەڵی و هەبوونی پێشینەی تاوان و نەبونی مەرجی كاندیدبوون دوورخراونەتەوە .  

لیژنەی ئارامیی هەڵبژاردنەکان لە پارێزگای سلێمانی، بە سەرۆکایەتی د. هەڤاڵ ئەبوبەکر، لە فەرمانێکی کارگێڕیدا چەند بڕیار و رێنماییەکی نوێی تایبەت بە هەڵمەتی بانگەشەی هەڵبژاردنەکانی ئەنجومەنی نوێنەرانی عیراقی دەرکرد.

فەرمانەکە کە ئەمڕۆ پێنجشەممە، دەرچووە، داوا لە سەرجەم قەوارە، هاوپەیمانێتی و کاندیدەکان دەکات پابەندی یاسا و رێنماییەکانی کۆمسیۆنی باڵای سەربەخۆی هەڵبژاردنەکان بن و بانگەشەکانیان بە شێوازێکی مەدەنیانە و دوور لە توندوتیژی ئەنجام بدەن.

بەپێی فەرمانەکە، هەڵگرتنی چەک، دیاردەی چەکداری، نمایشی سەربازی و رێکخستنی کاروانی ئۆتۆمبێل بە جۆرێک کە ببێتە هۆی تێکدانی هاتوچۆی گشتی، بە توندی قەدەغە کراوە.

لیژنەکە حەوت خاڵی وەک رێنمایی بۆ لایەنەکان داناوە:

١- پێویستە هەموولایەک پابەندی یاساو بڕیارو رێنمایی و رێساکانی کۆمسیۆنی باڵای سەربەخۆی هەڵبژاردنەکانی عیراق و لیژنەی باڵای ئارامیی هەرێمی کوردستان بۆ هەڵبژاردنەکانی ئەنجومەنی نوێنەرانی عیراقی فیدراڵ بن.

٢- پێویستە هەموو کاندیدو قەوارەو هاوپەیمانێتییەکان و هەوادارو پشتیوانەکانیان بە شێوازێکی مەدەنیانەی دوور لە توندوتیژیی و بەریەککەوتن، بە پاراستنی تەواوی ئارامیی و ئاسایش و سەقامگیریی گشتییەوە، بانگەشەی هەڵبژاردنەکان بکەن.

٣- هەڵگرتنی چەک و دیاردەی چەکداریی و نمایشی سەربازیی لە هەڵمەتی بانگەشەی هەڵبژاردنەکاندا قەدەغەن.

٤- کاروان و کەژاوەی لەدوای یەک و درێژی ئۆتۆمبێل، کە ببنە مایەی تێکدانی هاتووچۆی گشتیی و گرتنی ڕێگاو شەقامەکان، قەدەغەن.

٥- داوا لە هەموولایەک دەکەین لە هەر ڕووداو و دۆخێکی نەخوازراودا، پەنا بۆ دادگاو بۆ کۆمسیۆنی باڵای سەربەخۆی هەڵبژاردنەکانی عیراقی فیدراڵ و دامەزراوە فەرمییەکان ببەن و لە هەر ڕووبەڕووبوونەوەو هێرش و تۆڵەکردنەوەیەکی کەسیی و کۆیی، خۆیان بەدوور بگرن.

٦- پابەندی تەواوی ڕێنمایی و ڕێکارەکانی سەرۆکایەتیی شارەوانیی سلێمانی و شارەوانیی یەکە کارگێڕییەکان و بەڕێوەبەرایەتی هاتووچۆی پارێزگای سلێمانی و فەرمانگا پەیوەندیدارەکانی تایبەت بە هەڵمەتی هەڵبژاردنەکان بن.

٧- پێویستە هەموو فەرمانگاکانی حکومەت، هاوکار بن لە فەراهەمکردنی زەمینەیەکی یاسایی هاوبەش و هاوسەنگ بۆ بەڕێوەچوونی پرۆسەکە بەبێ جیاوازیی، نابێت هیچ بانگەشەیەکی هەڵبژاردن لە فەرمانگا حکومییەکاندا بکرێت و، نابێت هیچ کەلوپەل و کەرەستەیەکی ماڵیی و دارایی و شوێنێکی حکومەت بۆ بانگەشەی هەڵبژاردنەکان بەکاربهێنرێت.

بەبۆنەی هەشتەمین ساڵیادی کۆچی دوایی سەرۆک مام جەلالەوە مەکتەبی سیاسی یەکێتیی پەیامێکی بڵاوکردەوە و تیایدا هاتووە: کۆچی دوایی سەرۆک مام جەلال، سەرتاسەری کوردستان و عیراق و ناوچەکە و دونیای دیموکرات و ئاشتیخوازانی جیهانی خەمبار و نیگەران کرد. 

دەقی پەیامەکەی مەکتەبی سیاسی:

پەیامی مەکتەبی سیاسی
بۆ هەشتەمین ساڵیادی کۆچی دوایی سەرۆک مام جەلال
——-
هەشت ساڵ لەمەوبەر ، کوردستان، ڕابەرێکی مەزن و مێژوویی ، تێکۆشەر و پێشمەرگەی زیاتر لە شەست ساڵ خەباتی ڕزگاریخوازی کوردستانی و ..عیراقی دیموکرات و فیدرالیش یەکەمین سەرکۆماری هەڵبژێردراوی لە دەست دا و بەرەو دوا مەنزڵی نەمریی بەرێکرد.

کۆچی دوایی سەرۆک مام جەلال، سەرتاسەری کوردستان و عێراق و ناوچەکە و دونیای دیموکرات و ئاشتیخوازانی جیهانی خەمبار و نیگەران کرد.

سەرۆک مام جەلال مێژووییەکی پرشنگداری بۆ گەلی کوردستان ، بۆ خەباتی دیموکراتی و مافخوازی و دادپەروەری لەسەرتاسەری رۆژهەڵاتی ناوەڕاست تۆمار کرد کە هەر لە نەوجەوانی و لاوێتییەوە تا دوا ماڵئاوایی یەکجارەکی، بێوچان خەباتی هەمەلایەنەی فیکری ، رێکخراوەیی ، سیاسیی ، جەماوەری و پێشمەرگایەتی بەرپاکرد بۆ بەدیهێنانی مافە ڕەواکانی گەلی کوردستان و پیادەکردنی بژاردەی فیدراڵی ، دیموکراسی، دادپەروەری و پێکەوە ژیان لە عێراقی فرە پێکهاتەدا.

لە تێکۆشانی شۆڕشگێڕی و پێشمەرگایەتیدا، مام جەلال نموونەی گەورە و باڵای ڕابەری کۆڵنەدەر ، وردبین، ورەبەرز و پتەو بوو ، خاوەنی ئەزموونێکی قووڵی رێبەرایەتی شۆڕشی درێژخایەن بوو ، لەو تۆمارە سەربەرزەدا ، بە نووسین و ئەدەبیاتی دەوڵەمەندی کوردایەتی و بە رێکخستن و سازدان و رێبەرایەتی دەستەجەمعی قەت درێغی نەکرد ، وەک باوەڕ بوون بە شێوازی خەباتی هەمەلایەنەی سیاسی فرە رەهەندیش توانایەکی بێ وێنەی لە دانوستاندنی سیاسیی و دیبلۆماسیدا هەبوو کە پەیتا پەیتا رەوایی مەسەلەی کوردی لە دونیا جێگیرتر دەکرد .
لەمەشدا وێستگەکانی خەباتەکەی ،بە تایبەتی لە هەڵگیرسانی شۆرشی نوێی گەلەکەمان بەرابەرایەتی یەکێتیی نیشتمانیی کوردستان. لە نەبەردی و قوربانیدان و بەرەنگاری ئاڵۆزی و تەنگژەکان سەلمێنەرێکی بەرجەستەی ئەم ڕاستیانەیە ، لە کاتی دژواری بەرەنگاربوونەوەی جینۆسایدی هەڵەبجە و ئەنفالدا کە بەسەر گەلەکەماندا هات ، سەرۆک مام جەلال لە بەرنامەرێژی بۆ ئەگەرەکانی گۆڕانکاری لە ناوچەکە و ئاراستەکردنی ڕاپەرینی ئاداری ١٩٩١دا رۆڵێکی بەرچاوی رێبەری و پێشبینی داهاتووی هەبوو.

لەپاش راپەڕین ولە قۆناغی خەباتی مەدەنی و دیپلۆماتیشدا ، وێنەی مام جەلال لە مێژووی کوردایەتی هاوچەرخ و هەتا خەباتی ئازادیخوازانەی گەلانی ناوچەکەشدا درەوشاوە و دەگمەنە. پەیوەندییەکانی لە ئاستی حکومەت و میللەتانی ڕۆژهەڵات و دونیای عەرەبی و ڕۆژئاوادا ، بناغەی پتەوی ئەو دەستکەوتە دیپلۆماتیانە بوون کە ڕەسەنایەتی بوونی کوردی لە ڕۆژهەڵاتی ناوەڕاست دووپات دەکردەوە.

تێکۆشانی درێژ مەودای تەمەنی پڕ بەرەکەتی مام جەلال هەمیشە لەسەر دینگەی پتەوی دیموکراتیزەکردنی وڵات و مسۆگەرکردنی ویستە نەتەوەییەکانی گەلی کورد بیناکرابوو، بۆیە سەرەنجام هەر ئەو نەخشە ڕێگا دیموکراتییە فرەییە سەرکەوت کە نەخشە ڕێگای عێراقێکی دیموکرات و فیدڕاڵیی بوو.
لە دوا وێستگەی ژیانی سیاسیشیدا وەکو سەرکۆمار ، لە پێگەی پارێزەری دەستوورەوە، لە پێناوی نزیک کردنەوەی لایەنە سیاسییەکان و پێکهاتەکان و چەسپاندنی سازان و تەبایی نێوانیاندا هەمیشە خاڵی کۆکەرەو و ڕاگرتنی هاوسەنگی بوو،هەر بۆیە بە (صەمام امان)ی عێراق ناوزەد کرا.

لە سیاسەتی جیهانیشدا مام جەلال وەک فیگەرێکی دیاری سۆشیالیست دیموکرات،
بە ناونیشانی جێگری سەرۆکی ڕێکخراوی سۆشیال ئینتەرناسیونال بەشدارێکی کارابوو لە خولیای چارەسەری پرسەکانی دیموکراتی ، عەدالەت و یەکسانی ، ژینگەپارێزی و دیالۆگ و ئاشتی جیهانییدا.

ئەمڕۆش یەکێتی نیشتمانی کوردستان بە سەرۆکایەتی هەڤاڵ بافل جەلال تاڵەبانی، بە پێداگری لەسەر چارەسەری کێشەکانی نێوان هەرێم و بەغدا، لە ناونیشیاندا، پرسی مووچە ، ئەو سیاسەتە حەکیمانەیەی سەرۆک مام جەلال دووپات و پەیڕەو دەکاتەوە کە کەلتورێکی کەڵەگەتە لە خزمەتی هەموو سیاسەتی کوردستانیی و عیراقی .
ئەمڕۆ بە رەچاوکردنی پێدراوە تازەکانی وڵات و ناوچەکەش کە روومان لە هەڵبژاردنی ئەنجومەنی نوێنەرانی عێراقە، هەموو هەوڵمان بە ئاراستەی ڕاستکردنەوەی رێرەوی حوکمڕانی و چاکسازی ژیرانە کە ئەزموونەکەمان بپارێزێ و پەرەپێبدات.

هەر لەم یادەشدا رژدین لەسەر ئەولەویەتی مووچە و ژیانی خەڵکەکەی خۆمان بۆ ئەوەی لە پێگەی ژیان و گوزەرانێکی جێگیر و باشترەوە گەلەکەمان بۆ ئەرکەکانی تری خەباتی نەتەوەیی و نیشتمانیی و شایستە دەستوورییەکانی تر، بە ماددەی ١٤٠ی دەستوریشەوە، ساز بدەین.
لە کۆتاییدا
سڵاو لە ڕۆحی پاکی ڕابەر و سەرۆکی مێژووییمان مام جەلال
نەمری بۆ هەموو شەهیدانی یەکێتی و گەلی کوردستان

مەکتەبی سیاسی
یەکێتیی نیشتمانیی کوردستان

جێگری سەرۆک وەزیرانی هەرێم دەڵێت: خۆشحاڵین کورد ئەمڕۆ لە هەموو پرسەکاندا کاریگەری هەیە و لە ئێستادا کورد دەبەسترێتەوە بە چارەسەری هەموو کێشەکان لەتەواوی ناوچەکە.

بە سپۆنسەری دەزگای میدیایی کوردسات کۆڕبەندی نێودەوڵەتی ئایتۆک لەژێر ناونیشانی گەڕانەوە بۆ داهاتوو دەستیپێکرد، لەمیانی دیبەیتێکدا لە کۆڕبەندەکە قوباد تاڵەبانی جێگری سەرۆک وەزیرانی هەرێم رایگەیاند، گەلەکەمان رۆژ بە رۆژ گەشە دەکات و کاریگەری کورد لە ناوچەکە زیاتر دەبێت.

سەبارەت بە رۆڵی گەنجان قوباد تاڵەبانی جەتیکردەوە، گەنجان ئەمڕۆ لە هەموو کایەکاندا پێشەنگن و توانیویانە رۆڵی خۆیان هەبێت.

وتیشی، گەنجانی ئێستا خاوەن بیرۆکەن و پێشەنگن، هاوکات هاوکاریان دەبین بۆ ئەوەی گەنجەکانمان بە خەونەکانیان بگەن.

ئاماژەی بەوەشکرد، لەمساڵدا سلێمانی زۆرترین ئیڤێنت کراوە لە بوارەکانی سیاسی و رۆشنبیری و هەموو بوارەکانی دیکە، ئەمەش وادەکات گەنجان نزیکتربن لە ناوەندی بڕیار و زیاتر بەرەوپێش بچن.

سەبارەت بە موچەی فەرمانبەرانی هەرێم قوباد تاڵەبانی رایگەیاند، بەهۆی تۆماری بایۆمەتری توانیویانە شێوازی پێدانی موچە رێکبخەنەوە.

قوباد تاڵەبانی سەبارەت بە ئەلیکترۆنیکردنی حکومەتی هەرێم ئەوەی خستەڕوو، حکومەت بە ئەلیکترۆنی کراوە، هەروەها هەرێمی کوردستان و بەتایبەت سلێمانی لەرووی ئەلکترۆنییەوە زۆر پێشکەوتووە.

لەمیانی کۆڕبەندەکەدا جێگری سەرۆکی حکومەتی هەرێم تیشکی خستەسەر کەرتی کشتوکاڵ و ئاماژەی بەوەکرد، هەرێمی کوردستان ناوچەیەکی کشتوکاڵییە و خاوەنی زەوییەکی زۆریی بەپیتە، دەشڵێت؛ هەوڵدەدەن لەگەڵ پێشکەوتنی سەردەمدا برۆن و سود لە تەکنەلۆژیا وەربگرن بۆ بەرەوپێشبردنی زیاتری کەرتی کشتوکاڵ.

ئاشکراشیکرد، بەستنەوەی کشتوکاڵ و گەشتوگوزار پێکەوە یەکێکی ترە لە پڕۆژەکان کە لە ماوەکانی رابردوودا رایانگەیاندووە، ئەو پڕۆژەیەش رۆڵی بەرچاوی دەبێت لە پێشکەوتنی هەرێمی کوردستان.

دەشڵێت، پڕۆژەی گەشتوکاڵ گرنگە بۆ هەمەجۆرکردنی ئابوری هەرێم.

لە مانگی 9ـی ئەمساڵ 314 بومەلەرزە لە هەرێمی کوردستان تۆمارکراوە و لەو ژمارەیەش 61 بومەلەرزە لە ناو هەرێمی کوردستان رویانداوە.

بەڕێوەبەرایەتی گشتی کەشناسی هەرێمی کورستان لە راگەیەنراوێکدا بڵاویکردەوە، کۆی گشتی ئەو بومەلەرزانەی کە لەلایەن تۆڕی بومەلەرزەی کوردستانەوە تۆمارکراون، ژمارەیان 314 بوومەلەرزە بووە، بەڵام ژمارەی ئەو بومەلەرزانەی کە لە ناو هەرێمی کوردستان رویانداوە بریتی بووە لە 61 بوومەلەرزە.

ئاماژەی بەوەشکردووە، بەرزترین گووڕی بومەلەرزە کە تۆمارکرابێت لە هەرێمی کوردستان لە ناوچەی گەرمیان بووە بە گووڕی 3٠3 پلەی رێختەر بووە، کە لەرۆژی 1ـی9ـی2025 بە دووری  19 کم لە کەلار رویداوە.

کەشناسی هەرێم ئەوەشی خستەڕوو، زۆرترین تۆماری بومەلەرزەش لە سنوری پارێزگای سلێمانی و ناوچەی گەرمیان بووە، کە بریتی بووە لە 53 روداوی بوومەلەرزە، دوای ئەویش پارێزگای هەولێر دێت کە شەش روداوی بومەلەرزە هەبووە و لە پارێزگای دهۆکیش دوو روداوی بومەلەرزە تۆمارکراوە.

شەشەمین كۆنفرانسی نێودەوڵەتی نەخۆشی شەكرەی كوردستان لە سلێمانی دەستیپێكرد و لە کۆنفرانسەکەدا چەندین سیمینار و بابەتی زانستی لەبارەی نەخۆشیەكانی شەكرە پێشكەش دەكرێن.

بەڕێوەبەرایەتی تەندروستی سلێمانی بڵاویکردەوە، لەشاری سلێمانی شەشەمین كۆنفرانسی نێودەوڵەتی كۆمەڵەی نەخۆشی شەكرەی كوردستان بەهەماهەنگی وەزارەی تەندروستی و بەڕێوبەرایەتی گشتی تەندروستی سلێمانی، زانکۆی سلێمانی و بۆردی کوردستانی و كۆمەڵەی نەخۆشی شەكرەی كوردستان، لە پارێزگاکە دەستیپێكرد و لەڕۆژانی 1 بۆ 3ـی تشرینی یەكەمی 2025 بەردەوام دەبێت.

لەكۆنفراسەكەدا وەزیری تەندروستی حكومەتی هەرێمی كوردستان، پارێزگاری سلێمانی، بریكاری وەزارەتی تەندروستی، بەڕێوبەری گشتی تەندروستی سلێمانی ، بەڕێوبەری گشتی كاروباری تەندروستی لە وەزارەتی تەندروستی و سەرۆكی كۆمەڵەی نەخۆشی شەكرەی كوردستان، چەندین پزیشك، ئەكادیمی، راگری كۆلیژ و ژمارەیەك لە پزیشكانی پسپۆڕ لەناوچە جیاوازەكانی هەرێمی كوردستان و عێراق و دەرەوەی وڵات بەشدارن.

لە شەشەمین كۆنفرانسی كۆمەڵەی نەخۆشی شەكرەی كوردستان چەندین سیمینار و بابەتی زانستی و توێژینەوەی نوێی زانستی لەبارەی نەخۆشیەكانی شەكرە پێشكەش دەكرێن.

لە دوو مانگی رابردوودا زیاتر لە 700 هاوبەشی کارەبا سیستمی وزەی خۆریان لە سلێمانی داناوە.

بەڕێوەبەرایەتی گشتی کارەبای سلێمانی ئامارێکی لەبارەی وزە نوێبووەکانی بڵاوکردەوە و رایگەیاندووە، رۆژ لە دوای رۆژ هاووڵاتیان زیاتر روو لە دانانی سیستمی کارەبای وزەی خۆر 'سۆلار' دەکەن، لە ئێستاشدا زیاتر لە 700 هاوبەشی کارەبا سیستمەکەیان داناوە.

ئاشکراشیکرد، بە پێی كۆتا ئامار تا رۆژی 30ـی9ـی2025 ژمارەی ئەو هاوبەشانەی كارەبا كە سیستمەكەیان داناوە و لە بەشی وزە نوێبووەکان تۆمارکراوە ، گەیشتوەتە هەزار 746 هاوبەش و هەروەها بڕی بەرهەمهێنانی کارەبا بەو سیستمە 26.244 مێگاوات بووە.

بەڕێوەبەرایەتی کارەبای سلێمانی ئەوەشی خستەڕوو، لە كاتێكدا تا رۆژی 4/2/2028 ژمارەی ئەو هاوبەشانەی كارەبا كە سیستمەكەیان دانابوو، هەزار و 33 هاوبەش بوون، واتە لە ماوەی دوو مانگدا 713 هاوبەشی نوێ سیستمی سۆلاریان داناوە.

بە بەشداری قوباد تاڵەبانی و بە سپۆنسەری دەزگای میدیایی کوردسات، ئەمڕۆ لە سلێمانی کۆڕبەندی نێودەوڵەتی ئای تۆک لەژێر ناونیشانی گەڕانەوە بۆ داهاتوو بەڕێوەدەچێت.

دیداری نێودەوڵەتی ئای تۆک ئەمڕۆ سەعات 2ـی پاشنیوەڕۆ لە کارگەی کولتووری سلێمانی لەهۆڵی فاوندەیشن، دەستپێدەکات.

لە دیدارەکەدا، قوباد تاڵەبانی جێگری سەرۆک وەزیرانی هەرێم بەشداری دەکات و تێیدا تیشک دەخرێتەسەر، بابەتەکانی 'زیرەکی دەستکرد و کارسازی و دیبلۆماسی و توانای گەنجان' و گفتوگۆیان لەبارەوە دەکرێت.

هەروەها پارە پەیداکردن و رۆڵی ژنان و گۆڕانکارییەکانی داهاتوو، بازاڕی کار و هونەر، بابەتە سەرەکییەکانی دیدارەکەیە.

ئای تۆک سەکۆیەکی جیهانی لە شاری سلێمانییەوە، دەیان وڵات بەشداری تێدا دەکات، هەروەها دەیان بابەت و دەیان هەنگاوی گەورە، بە ئامانجی گەڕانەوە بۆ داهاتوو دەخاتەڕوو.

رێبوار تەها پارێزگاری کەرکوک حەوت هەزار و 200 هەلی دامەزراندنی راگەیاند.

رێبوار تەها پارێزگاری کەرکوک لە کۆنفڕانسێکی رۆژنامەوانیدا رایگەیاند، دامەزراندنەکە بەشێوەی گرێبەستە و زیاتر لە حەوت هەزار کەس لێی سودمەند دەبن.

وتیشی، دامەزراندنەکە تەنیا لەرێگەی لینکێکەوەیە کە رۆژی سێشەممەی داهاتوو دەکرێتەوە و لەسەر بنەمای شایستەیی دەبێت نەوەک پشتگیریی حزبی و کەسی.

رێبوار تەها ئەوەشی خستەڕوو، لەسەرجەم بوارەکاندا دەچووان دەتوانن سودمەندبن لە دامەزراندنەکە.

بەپێی پێشبینییەکانی کەشناسی لە هەفتەی داهاتوودا پلەکانی گەرما روو لە بەرزبوونەوە دەکەن و ئاسمان بە گشتی ساماڵ دەبێت.

دەستەی کەشناسی عیراق لە راگەیەنراوێکدا بڵاویکردەوە، سبەینێ هەینی لە زۆربەی ناوچەکان ئاسمان ساماڵ دەبێت و پلەکانی گەرما نزیک دەبێتەوە لە تۆمارکراوەکانی ئەمڕۆ.

ئاماژەی بەوەشکرد،  پلەکانی گەرما لە شارەکانی بەغداد و دیالە و کەربەلا 36 پلەی سیلیزی دەبێت و لە بابل دەگاتە 37 پلە، هاوکات لە دهۆک و سلێمانی 32 پلەی سیلیزی بەرزترین تۆمارکراو دەبێت و لە هەولێری دەگاتە 34 پلە، هەر بەپێی راگەیەنراوەکە، بەپێی پێشبینییەکان بەرزترین پلەی گەرما لە میسان و بەسرە تۆماردەکرێت و دەگاتە 39 پلەی سیلیزی.

کەشناسی عیراق ئاشکراشیکرد، رۆژی شەممە لە زۆربەی ناوچەکانی وڵاتدا ساماڵ دەبێت وپلەکانی گەرما کەمێک بەرزتر دەبنەوە بە بەراورد بە رۆژی پێشوو.

 سێ بازرگانی مادەی هۆشبەر لە سنوری گەرمیان دەستگیرکران، دەزگای ئاسایشی هەرێمیش دەڵێت: دەست بەسەر بڕی 9 کیلۆگرام مادەی هۆشبەر لەجۆری حەشیش و 45 دەمانچەی بێمۆڵەتدا گیراوە.

دەزگای ئاسایشی هەرێم لە راگەیەنراوێکدا بڵاویکردەوە، بەڕێوەبەرایەتی گشتی نەهێشتنی مادە هۆشبەرەکانی دەزگای ئاسایشی هەرێم بەهەماهەنگی بەڕێوەبەرایەتی ئاسایشی گەرمیان، لەچالاکییەکدا لەگوندی ساڵح ئاغای ناحیەی قۆرەتوو لەگەرمیان سێ بازرگانی مادەی هۆشبەریان دەستگیرکرد.

ئاماژەی بەوەشکردووە، لەئەنجامی کۆکردنەوەی زانیاری پێشوەخت و چاودێری ورد و بەدواداچوونی بەڕێوەبەرایەتی گشتی نەهێشتنی ماددە هۆشبەرەکان، بەبڕیاری دادوەری لێکۆڵینەوەی ئاسایش لەڕۆژی 1ـی10ـی2025 لەگوندی ساڵح ئاغای ناحیەی قۆرەتوو لە گەرمیان، توانیان سێ بازرگانی ماددەی هۆشبەر دەستگیربکەن و دەستبگرن بەسەر بڕی 9 کیلۆگرام مادەی هۆشبەر لەجۆری حەشیش و 45 دەمانچەی بێمۆڵەت و 92 دەنک حەبی 'میثادۆن' کە بازرگانان ئامانجیان ساغکردنەوەی بوو لەهەرێمی کوردستان.

دەزگای ئاسایشی هەرێم ئەوەشی خستەڕوو، لەئێستادا تۆمەتباران بەبڕیاری دادوەر بەماددەی 25 لە یاسای بەرەنگاربوونەوەی مادە هۆشبەرەکان و کارتێکارە ئەقڵییەکان راگیراون و لێکۆڵینەوە لەدۆسیەکانیان بەردەوامە.

لە هەولێر چوار تۆمەتباری تاوانێکی کوشتن دەستگیرکران، هاوکات پۆلیس و ئاسایشی هەولێر رایانگەیاندووە، ئەو تۆمەتبارانە تەقەیان لە هاووڵاتییەکی دیکە کردووە و بە سەختی برینداریان کردووە.

لە راگەیەنراوێکی هاوبەشدا بەڕێوەبەرایەتی ئاسایشی هەولێر و پۆلیسی پارێزگای هەولێر رایانگەیاند، دوای ئەوەی لەرۆژی 28ـی9ـی2025  لە شەقامی کرکوک نزیک بەشە ناوخۆی شەهید شەوکەوت لە سەعات 11:30 ـی خولەکی شەو، لە روداوێکی تەقەکردندا هاووڵاتیەک بەناوی (یوسف محمد ڕەشید)  لەسەر کێشەیەکی کۆمەڵایەتی کوژرا، دەست بەجی لە لایەن تیمەکانیانەوە، دەست بە ئەنجامدانی بەدواداچون کراو لە ماوەیەکی کەمدا ناسنامەی بکوژەکانیان ئاشکرا کرد.

ئاماژەیان بەوەشکردووە، لە چوار تۆمەتبار پێکهاتبون، بەناوەکانی 'هـ ، هـ ، هـ' و 'ع ، هـ ، هـ' و ' أ ، هـ ، هـ' و' خ ، ع ، ر' ،هەرورها تۆمەتبارانی ناو هاتوو لە شەوی 30ـی9ـی2025 لەسەر هەمان کێشە تەقەیان  لە هاووڵاتیەکی دیکە کردووە ،بەناوی (دڵشێر محمد) بە سەختی برینداریان کردوە.

ئاسایش و پۆلیسی هەولێر راشیانگەندووە، تۆمەتبارەکان دوای ئەنجامدانی ئەم دوو تاوانە بەنیازبوون هەڵبێن بۆ دەرەوەی شاری هەولێر، دوای وەرگرتنی رەزامەندی دادوەری لێکۆڵینەوەی ئاسایشی هەولێر ، بەهەماهەنگی لەگەڵ بەڕێوەبەرایەتی ئاسایشی بازگەکانی هەولێر، لە بازگەی شێراوە سەرجەم تۆمەتبارەکان دەستگیر کران.

بۆبینی ساتی دەتگیرکردنەکە کلیلک لێرە بکە.......

ئەنجومەنی وەزیرانی هەرێم داوا لە حکومەتی فیدراڵ دەکات هاوشێوەی دۆسیەی نەوت، دۆسیەی داهاتی نانەوتیش یەکلایی بکرێتەوە و رێكکەوتنێکی هاوبەش لەمبارەیەوە بکرێت.

ئەمڕۆ بە سەرپەرشتیی سەرۆک وەزیرانی هەرێم و ئامادەبوونی قوباد تاڵەبانی جێگری سەرۆک وەزیران ، ئەنجومەنی وەزیرانی هەرێمی کوردستان کۆبووەوە و گفتوگۆ لەبارەی چەند پرسێکەوە کرا.

لە بڕگەی یەکەمدا، بارودۆخی داراییی نوێی هەرێم لە رووی داهات و خەرجییەکان بە زانیاری و ژمارەی ورد خرایەڕوو، لە دوای گفتوگۆ، ئەنجومەنی وەزیران پشتیوانیی خۆی بۆ بەردەوامبوون لەسەر جێبەجێکردنی رێککەوتننامەی هەناردەکردنەوەی نەوتی هەرێمی کوردستان دووپات کردەوە کە لە رۆژی 27ـی 9ـی 2025 ەوە کەوتووەتە بواری جێبەجێکردن و لە چەند رۆژی رابردوو، بە تێکڕایی رۆژانە 195 هەزار بەرمیل نەوت، لە کێڵگە نەوتییەکانی هەرێمی کوردستان، لەلایەن وەزارەتی سامانە سروشتییەکانەوە، رادەستی کۆمپانیای بەبازاڕکردنی نەوتی سۆمۆ کراوە و لە بازاڕی جیهانی فرۆشراوە و داهاتەکەی گەڕاوەتەوە بۆ گەنجینەی فیدڕاڵ.

ئەنجومەنی وەزیران هیواشی خواست  حکومەتی فیدراڵ بەردەوام بێت لەسەر جێبەجێکردنی پابەندیی خەرجکردنی موچە و شایستەکانی هەرێمی کوردستان بۆ مانگی ئابی ساڵی 2025 و مانگەکانی تر، وەک ناوچەکانی دیکەی عیراق.

ئاماژەی بەوەشکردووە، ئەنجومەنی وەزیران داواکارە لە حکومەتی فیدراڵ وەفدی دانوستانکاری هەردوو حکومەت، لە ژێر سەرپەرشتیی لیژنەی وەزاریی پێکهاتوو بە بڕیاری ئەنجومەنی وەزیرانی فیدراڵ، بەردەوامی بە کۆبوونەوەکانیان بدەن بۆ گەیشتن بە رێكکەوتنێکی هاوبەش تا لە نزیکترین دەرفەتدا، هاوشێوەی دۆسیەی نەوت، دۆسیەی داهاتی نانەوتیش یەکلایی بکرێتەوە و ئیتر هیچ پاساو و بەربەستێک، نەکرێتە بیانوو بۆ کێشەی موچە.

لە بڕگەی دووەمی کۆبوونەوەکەدا، پێشنیازی وەزارەتی داد بۆ هەڵوەشاندنەوەی کارکردن بە بڕیارێکی پێشووی ئەنجومەنی ئابوریی هەرێمی کوردستان گفتوگۆی لەبارەوە کرا، چونکە بڕگەکانی لەگەڵ یاسای نوێی فرۆشتن و بەکرێدانی موڵک و ماڵی دەوڵەت ژمارە 1ی ساڵی 2021 ناگونجێت، دوای گفتوگۆ و راگۆڕینەوە، ئەنجومەنی وەزیران دەنگی لەسەر هەڵوەشاندنەوەکە دا.

لە بڕگەی سێهەمدا، راپۆرتێک لەبارەی رێبەری سەلامەتی پێشکەشکرا و ئەم رێبەرە پاراستنی گیان و سامانی هاووڵاتییانی هەرێمی کوردستان ئەنجامداراوە و بەزۆرینەی دەنگ پەسەندکرا.