کوردستان
بەپێی هەواڵی میدیاكانی باكووری كوردستان، سوپای توركیا دەستی بە گواستنەوەی تانك و زرێپۆش و هێزی زیاتر بۆ سەر سنووری رۆژئاوای كوردستان كردووە.
ئاژانسی هەواڵی مێزۆپۆتامیا بڵاویكردەوە، سوپای توركیا لە سەعات ١٠:٠٠ـی شەوی هەینی دەستیكردووە بە گواستنەوەی تانك و زرێپۆش لە باكووری كوردستانەوە بەرەو گوندەكانی دەوروبەری كۆبانێ.
ئاژانسەكە روونیكردووەتەوە، تەنها لە سنووری گوندی ئۆخان لە ناوچەی پیرسوس لە باكووری كوردستان كە هاوسنوورە لەگەڵ كۆبانێ، زیاتر لە شەش تانكی جیگیركردووە و ژمارەیەك بارهەڵگری سەربازیش رەوانەی ئەو سنوورانە كراون.
پێشتر مەزڵوم كۆبانێ، فەرماندەی گشتی هێزەكانی سوریای دیموكرات (هەسەدە) دەستپێشخەرییەكی بۆ دروستكردنی ناوچەیەكی لە چەك داماڵراو بۆ كۆبانێ راگەیاند بە ئامانجی نەهێشتنی نیگەرانییە ئەمنییەكانی توركیا بۆ ئەو مەبەستەش، داوای نێوەندگیریی و چاودێریی ئەمریكا كرد.
شاناز ئیبراهیم ئەحمەد خانمی یەکەمی عیراق، پەیامێکی هاوخەمی بۆ کۆچیدوایی بەهرۆز قەشانی پارێزگاری پێشوتری سلێمانی بڵاوکردەوە و دەڵێت، کاک بەهرۆز دەوڵەتمەدارێکی دڵسۆز و خەمخۆر بوو کە جێدەستی بەئاوەدانکردنەوەی شار و بنیاتنانەوە دیار و بەرچاوە.
دەقی پەیامەکەی شاناز ئیبراهیم ئەحمەد خانمی یەکەمی عیراق...
بەرێزان خانەوادەی کۆچکردوو
بەبیستنی هەواڵی ماڵئاوایی یەکجارەکی پارێزگاری پێشوتری سلێمانی، کاک (بەهرۆز حەمەساڵح فەقێ رەشید قەشانی) غەمباربووم.
کاک بەهرۆز دەوڵەتمەدارێکی دڵسۆز و خەمخۆر بوو کە جێدەستی بەئاوەدانکردنەوەی شار و بنیاتنانەوە دیار و بەرچاوە و لەدوای ژیانێکی پڕ بەخشین لەپێناو خزمەتکردنی گەل و نیشتمان و پێشکەوتنیدا بەداخەوە جێی هێشتین.
تا هەتایە رۆڵی کاک بەهرۆز لەیادناکەین وەک ئەندازیارێکی شارەزا و رۆڵەیەکی بەئەمەکی سلێمانی و هاوسەنگ لەهەموو ئەو ئەرک و بەرپرسیارێتیانەدا کەلەماوەی ژیانیدا لەبوارەکانی کارگێڕی و رێکخراوەیی بەجێی گەیاندووە.
بۆ ئەم خەمە پرسە و سەرەخۆشی لەخانەوادەی کاک بەهرۆز ئەکەم و هاوبەشی خەم و پەژارەتانم و خوای گەورە سەبرو ئارامی بەهەموو لایەک ببەخشێت و ئەمە دوایین ناخۆشیمان بێت.
شاناز ئیبراهیم ئەحمەد
سەرۆكی لیژنەی دارایی لە ئەنجومەنی نوێنەران رایگەیاند، هەمواری بڕگەی تایبەت بە هەناردەی نەوتی هەرێمی كوردستان دەكرێتە خشتەی بودجەی ساڵی ٢٠٢٥ـەوە.
عەتوان عەتوانی سەرۆكی لیژنەی دارایی ئەنجومەنی نوێنەران لە چاوپێكەوتنێكی تەلەفزیۆنیدا رایگەیاند، سەرەتای ساڵی داهاتوو، خشتەی بودجەی ٢٠٢٥دەگاتە ئەنجومەنی نوێنەران و هەمواری بڕگەی تایبەت بە هەناردەكردنەوەی نەوتی هەرێمی كوردستان، دەخرێتە هەمان خشتەوە.
ئاماژەی بەوەشكرد، هەمواركردنەوەی ئەو بڕگەیە نابێت تەنها زیادكردنی بڕگەی نوێ بێت بۆ بودجەكە، بەڵكو پێویستە وەك خۆی جێبەجێبكرێت.
عەتوان عەتوانی راشیگەیاند، پێویستە چارەسەریی بنەڕەتی بۆ كێشە هەڵپەسێردراوەكانی نێوان بەغداد و هەولێر بدۆزرێتەوە.
مانگی رابردوو، ئەنجومەنی وەزیرانی عیراق بڕیاریدا بە دەستپێكردنەوەی هەناردەی نەوتی هەرێمی كوردستان و هەمواری یاساكەی رەوانەی ئەنجومەنی نوێنەران كرد، بەڵام لە ئەنجومەنەكە تائێستا خوێندنەوەی دووەمی بۆ نەكراوە.
دادگای باڵای فیدراڵی عیراق، رۆژی دووشەممە لە دانیشتنێكدا دوو سكاڵا تاوتوێدەكات كە تیایدا داوای هەڵوەشاندنەوەی دوو وەزارەتی حكومەتی هەرێم دەكات.
بەپێی خشتەی دانیشتنەكانی دادگای باڵای فیدراڵی عیراق رۆژی 23ی ئەم مانگە كە دەكاتە رۆژی دووشەممە چەند سكاڵایەك تاوتوێدەكات كە دوو سكاڵایان پەیوەستن بە هەرێمی كوردستانەوە.
لە سكاڵای یەكەمدا كە لەلایەن خالید مستەفا حسێن لەسەر سەرۆكی پەرلەمانی كوردستان تۆماركراوە و تیایدا داوادەكات وەزارەتی شەهیدان و ئەنفالكراوانی هەرێمی كوردستان بەپێی یاسای ژمارە (8)ی ساڵی 2006، بە نادەستوری لەقەڵەم بدات و دەستەیەك بە ناوی دامەزراوەی شەهیدان دروستبكرێت كە بە ئەنجومەنی وەزیرانی هەرێمەوە ببەسترێتەوە.
لە سكاڵای دووەمیش كە هەر هەمان كەس تۆماریكردووە، داوا لە دادگای فیدراڵی دەكات وەزارەتی ئەوقاف و كاروباریی ئاینی هەرێم بەپێی یاسای ژمارە 11ی ساڵی 2007 بە وەزارەتێكی نادەستوریی دابنێت و دەستەیەك بۆ ئاین و ئاینزا جیاوازەكان لە هەرێمی كوردستان دروستبكرێت كە بە ئەنجومەنی وەزیرانەوە ببەسترێتەوە.
هاتووچۆی هەولێر رایگەیاند، بەهۆی قەرەباڵخی زۆرەوە، بڕیارنداوە لە رۆژانی هەینیدا بۆ ماوەی حەوت سەعات هاتوچۆ ئوتومبێل لە سەنتەری شاری هەولێر قەدەغە بكەن.
ڕاگەیاندنی هاتووچۆی هەولێر لە راگەیەندراوێكدا ئاماژەی بەوەكردووە، لەبەرئەوەی ڕۆژانی هەینی ژمارەیەكی زۆر هاووڵاتی و گەشتیار سەردانی سەنتەری شاری هەولێر بە تایبەتی بازاری شێخەڵا و پاركی نافورەی بەردەم قەڵا دەكەن، پیادەڕۆ و ئۆتۆمبێل تێكەڵ بەیەك دەبن لە شەقامدا، كە ئەمەش بە بەردەوامی دەبێتە هۆكاری خنكانی شەقامەكە و دروستبوونی جەنجاڵی و سیمایەكی ناشیرن بە شەقامەكانی ناو بازاڕ دەدات.
راشیگەیاند، لەبەرئەو هۆكارە بڕیاردرا هاتووچۆكردن لەسەنتەری شاری هەولێر تەنها بە پیادە بێت لە كاتژمێر یەكی نیوەڕۆ تا هەشتی ئێوارە و لەدوای ئەوكاتەوە هاتووچۆی ئۆتۆمبێل بۆ ناو سەنتەری شار ئاسایی دەبێتەوە.
داهاتی نانەوتی ئەم هەفتەیەی سنوری پارێزگاكانی سلێمانی و هەڵەبجە زیاتر لە چوار ملیار و 724 ملیۆن دینارە و بەراورد بە هەفتەی رابردوو شەش ملیار دینار كەمیكردووە.
ماڵپەری شەفافیەت كە چاودێری داهاتی نانەوتی پارێزگاكانی سلێمانی و هەڵەبجە و ئیدارە سەربەخۆكانی ڕاپەڕین و گەرمیان دەكا، بڵاویكردەوە، داهاتی نانەوتی ئەم هەفتەیە لە رۆژی 14ی مانگ تا ئەمڕۆ، زیاتر لە چوار ملیار و 724 ملیۆن دینار بووە كە 84%ی نەختینە و 11%ی چەك بووە.
ئاماژەی بەوەشكردووە، داهاتەكە بەراورد بە هەفتەی رابردوو، شەش ملیار دینار كەمیكردووە كە لەو هەفتەیەدا داهاتەكە زیاتر لە 11 ملیار دینار بووە.
هاوكات بەپێی ماڵپەری شەفافیەت ئەوەشی خستووەتەڕوو، داهاتی نانەوتی سنوری پارێزگاكانی سلێمانی و هەڵەبجە لەسەرەتای ئەمساڵەوە تائێستا، زیاتر لە 869 ملیار و 755 ملیۆن دینار بووە، بەراورد بە هەمان ماوەی ساڵی رابردوو 25% كەمیكردووە.
مەكتەبی سیاسی یەکێتیی نیشتمانیی کوردستان بۆ کۆچیدوایی بەهرۆز قەشانی، پارێزگاری پێشووتری سلێمانی پرسەنامەیەکی بڵاوکردەوە و رایگەیاند؛ لەماوەی ئەوپێنج ساڵەی خزمەتكردنی ئەودا سلێمانی سەقامگیریی ئارامی و ئاوەدانیەكی زۆری بەخۆیەوە بینی كە وەك نمونەی خزمەتگوزار و تێكۆشەر لە بیرەوەری خەڵكی سلێمانیدا تۆماركراوە.
دەقی پرسەنامەکە:
"بەرێزان كەسوكارو خانەوادەی تێكۆشەری یەکێتی و گەلەکەمان ئەندازیار كاك بەهرۆز حەمەساڵەح فەقێ رەشید قەشانی
بەداخێكی زۆرەوە هەواڵی كۆچی دوایی ئەندازیار و تێكۆشەر كاك بەهرۆز قەشانی پارێزگاری پێشووی سلێمانیمان پێگەیشت ، بۆ ئەم خەمە پرسەو ماتەمی خۆمان ئاراستەی خانەوادە بەرێز و تێكۆشەرەكەتان دەكەین.
كاك بەهرۆز وەك ئەندازیارێكی شارەزا لەپاش راپەرینی ساڵی 1991 وەك ئەندامێكی چالاكی دەزگای دارایی و دواتر وەك ئەندامی مەكتەبی دارایی و ئیدارەی گشتی رۆڵێكی بەرچاوی لە ئاوەدانی و بوژانەوەدا هەبو، لە ساڵانی 2010 تاكو 2015 بوە پارێزگاری سلێمانی و لەماوەی ئەوپێنج ساڵەی خزمەتكردنی ئەودا سلێمانی سەقامگیریی ئارامی و ئاوەدانیەكی زۆری بەخۆیەوە بینی كە وەك نمونەی خزمەتگوزار و تێكۆشەر لە بیرەوەری خەڵكی .سلێمانیدا تۆمار كراوە
جارێكی تر وێرای هاوخەمیمان داواكارین لە یەزدانی مەزن ئارامی بەكەسوكارو خانەوادە سەربەرزەكەیان ببەخشێت رۆحی پاكی كاك بەهرۆزی كۆچكردوو بەهەشتی بەرین شاد بكات".
انا لله وانا الیە راجعون
بافڵ جەلال تاڵەبانی سەرۆکی یەکێتیی نیشتمانیی کوردستان بۆ کۆچیدوایی بەهرۆز قەشانی، پارێزگاری پێشووتری سلێمانی پرسەنامەیەکی بڵاوکردەوە و دەڵێت؛ كاك بەهرۆز ئەوكاتەی پارێزگاری سلێمانی بوو خزمەتێكی بەرچاوی پێشكەشی شارەكە و خەڵكە خۆشەویستەكەی كرد.
دەقی پرسەنامەکە:
کۆچیدوایی کاک بەهرۆز قەشانی، پارێزگاری پێشووتری سلێمانی لە دڵەوە نیگەرانیكردین
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی كەسوكار و بنەماڵە سەربەرزەكەیان دەكەم و هاوبەشی ماتەمیانم.
كاك بەهرۆز قەشانی هەڤاڵێكی دڵسۆز و ئەندازیارێكی لێهاتوو بوو، ئەوكاتەی پارێزگاری سلێمانی بوو خزمەتێكی بەرچاوی پێشكەشی شارەكە و خەڵكە خۆشەویستەكەی كرد.
لە خوای گەورە داواكارین هەڤاڵی كۆچكردوومان بە بەهەشتی بەرین شادبكات و سەبووری بەهەموولایەك ببەخشێت.
قوباد تاڵەبانی جێگری سەرۆکی ئەنجومەنی وەزیران پەیامێک ئاڕاستەی ئێزدییەکان دەکات و دەڵێت؛ خوشک و برایانی ئێزدی و هەموو پێکهاتەکان دڵنیاتان دەکەینەوە؛ کە کوردستان بۆ هەمیشە وەک وڵاتی پێکەوەژیانی ئاشتییانەی هەموو پێکهاتەکان دەمێنێتەوە.
دەقی پەیامەکەی:
"بەبۆنەی جەژنی رۆژووی ئێزی، بە گەرمی پیرۆزبایی لە هەموو خوشک و برایانی ئێزدی لە کوردستان و هەموو جیهان دەکەم و هیوای جەژنێکی پڕ لە خۆشی و ئارامییان بۆ دەخوازم.
لەم بۆنەیەدا جارێکیتر پشتگیری تەواوی خۆمان بۆ ئێزدییەکان دووپات دەکەینەوە و بە هەموو شێوەیەک هاوکار و یارمەتیدەریان دەبین لە دابینکردنی مافەکانیان و ئاوەدانکردنەوەی ناوچەکانیان و گەڕانەوە هەموو ئاوارەکان بۆ زێدی خۆیان.
لە هەمان کاتدا جەخت دەکەینەوە لەسەر قوڵکردنەوەی کلتوری پێکەوەژیان. خوشک و برایانی ئێزدی و هەموو پێکهاتەکانی دیکەش دڵنیا دەکەینەوە کە کوردستان بۆ هەمیشە وەک وڵاتی پێکەوەژیانی ئاشتییانەی هەموو پێکهاتەکان دەمێنێتەوە."
بافڵ جەلال تاڵەبانی سەرۆکی یەکێتی جەژنی"رۆژیێن ئێزی"پەیامێک ئاڕاستەی خوشک و برایانی ئێزدی دەکات و دەڵێت؛ لە پابەندیمان بە پاراستنی ماف و کەلتووری رەسەنی ئاینی ئێزدییەکان و هاوکار و پشتیوان دەبین.
دەقی پەیامەکەی:
بەبۆنەی (جەژنا رۆژیێن ئێزی) لەدڵەوە پیرۆزبایی گەرم لە خوشک و برایانی ئێزدی دەکەم، هیوادارم ئەم جەژنە لە کەشێکی ئارام و سەقامگیردا بەخۆشی بەڕێبکەن.
خوشک و برایانی ئێزدی لە چەند ساڵی رابردوو بەدۆخێکی سەختدا تێپەڕین، وە ئێمە بەردەوام لەگەڵیاندابووین، بۆ گەیشتن بە مافەکانی خۆیان، بۆیە لەم بۆنەیەدا دووپاتی دەکەینەوە، لەپابەندیمان بە پاراستنی ماف و کەلتووری رەسەنی ئاینی ئێزدییەکان و هاوکار و پشتیوان دەبین بۆ بەهێزکردنی گیانی برایەتی و پێکەوەژیان لەنێوان هەموو نەتەوە و پێکهاتەکانی کوردستان.
یەکێتیی نیشتمانیی کوردستان بەردەوام دەبێت لە پشتگیری و جێبەجێکردنی داواکاری خوشک و برایانی ئێزدی، هیوادارین هەموولایەنەکانیش بەرپرسیارانە لەگەڵ دۆخی شەنگالدا مامەڵەبکەن و کاربکەن بۆ ئاوەدانکردنەوەی شارەکەو گەڕانەوەی ئاوارەکان بۆ زێدی خۆیان.
یەکێتی وەک هەمیشە لەگەڵتان دەبێت بۆ هێنانەدی خواستەکانتان و سارێژبوونی ئەو نەهامەتیانەی بەسەرتاندا هات.
هەر لەخۆشیدابن.
ئاژانسی هاوار نیوز رایگەیاند، دوو رۆژنامەنوسیان لە نزیك كۆبانێ بەهۆی بۆردوومانی فڕۆكە جەنگییەكانی توركیاوە شەهید بوون.
ئاژانسی هاوار نیوز لە راگەیەنراوێكدا ئاماژەی بەوەكردووە، هەردوو رۆژنامەنووس جیهان بەلكین و نازم دەشتان لە نزیك بەنداوی تشرین و پردی قەرقوزاق كە دەكاتە باشوری كۆبانێ كاریان بۆ ئاژانسەكە كردووە، بەڵام بەهۆی بۆردومانی فڕۆكە جەنگییەكانی توركیاوە شەهید بوون.
دەشڵێت، دوێنێ جیهان و نازم، لەكاتی كاركردنیان لەلایەن فڕۆكەكانی توركیاوە كراونەتەوە ئامانج و كەسێكی دیكەش برینداربوون.
لە دوای رووخانی رژێمەكەی بەشار ئەسەد توركیا و گروپە چەكدارەكانی هاوپەیمانی هێرشدەكەنە سەر رۆژئاوای كوردستان بە تایبەت بەنداوی تشرین و پردی قەرقوزاق لە باشوری كۆبانێ و ئامادەكاری دەكەن بۆ هێرشكردنە سەر كۆبانێ.
بۆردوومانەكانی سوپای توركیا بۆ سەر ناوچە سنورییەكانی هەرێمی كوردستان بەردەوامە، شەوی رابردووش توركیا بە هەلیكۆپتەر بۆردوومانی چەند گوندێكی سنوری قەزای ئامێدی كرد.
كامەران عوسمان لێپرسراوی دیسكی مافی مرۆڤی رێكخراوی "سی پی تی" ئەمریكی رایگەیاند، شەوی رابردوو سوپای توركیا بە هێلیكۆپتەر هێرشی بۆ سەر گرێ بەهار و چیای مەتینا لەسنوری گوندەكانی (گوهەرزێ، بەلاڤا و بەرچێ) لە ناحیەی دێرەلوك لە قەزای ئامێدی سەر بە پارێزگای دهۆك ئەنجامدا.
راشیگەیاند، ئەم سێ گوندە، لە چوارچێوەی ئۆپەراسیۆنی درێژكراوەی چنگ ی قوفڵی توركیا دابوون كە لە 15ی حوزەیران بۆ یەکی ئاب ئەنجامدرا و سوپای توركیا توانی چەند بارەگایەكی سەربازی نوێ لەو ناوچەیەدا دروستبكات.
دوێنیش فڕۆكە جەنگییەكانی توركیا چیاكانی كولیتار دەڕەبی لەسنوری ناحیەی ورتێ بەچڕی بۆردومانكرد كە بەهۆیەوە ترس و دڵەراوكێ لای دانیشتوانی سنورەكە دروستكردووە.
بەپێی ئامارێكی رێكخراوی "سی پی تی" ئەمریكی، لەسەرەتای ئەم ساڵەوە تائێستا بەهۆی ئۆپراسیۆن و لەشكركێشییەكانی توركیا لەناو خاكی هەرێمی كوردستاندا 18 هاووڵاتی مەدەنی گیانیان لەدستداوە و چوار هاووڵاتی دیكەش برینداربوون.
وەزارەتی خوێندنی باڵای هەرێم ستافی مامۆستایان بۆ کۆلێجی پزیشکی زانکۆی هەڵەبجە دابین دەکات،و لە ڕێگەی هەماهەنگی نێودەوڵەتی ڕاهێنان و ڕاوێژکاری زانستی ورد پێشکەش بە مامۆستایانی کۆلێجی پزیشکی زانکۆی هەڵەبجە دەکات
وەزارەتی خوێندنی باڵاو توێژینەوەی زانستی ڕایگەیاند، بەهاوکاری بەڕێوەبەرایەتی گشتی تەندروستی هەڵەبجە، ستافی مامۆستایان بۆ کۆلێجی پزیشکی زانکۆی هەڵەبجە دابین دەکەین، بەمەش هەنگاوەکانی جێبەجێکردنی کردنەوەی کۆلێجەکە لە ڕووی دابینکردنی توانا مرۆییەکان چارەسەردەبێت.
وەزارەتی خوێندنی باڵا ئاماژەبەوەش دەکات، لەسەر راسپاردەی د. ئارام محمد قادر وەزیری خوێندنی باڵاو توێژینەوەی زانستی بۆ دابینكردنی توانا مرۆییەكان تیمێکی وەزارەتی خوێندنی باڵا، سەردانی زانكۆی هەڵەبجەیان كردوە بە ئامادەبونی د. بەمۆ پەروێز عەزیز سەرۆكی زانكۆی هەڵەبجە و بەڕێوبەری گشتی تەندروستی هەڵەبجە، لەگەڵ ئەو پزیشكانە كۆبونەوە كە ڕاژەكانیان بۆ کۆلێجی پزیشكی زانكۆی هەڵەبجە دەگوازرێتەوە و دەبنە ستافی مامۆستایانی کۆلێجی پزیشکی
خوێندنی باڵا ئاماژەبەوەشدەکات، بۆ ئەم مەبەستە وەزارەتەکەمان ئامادەکاری کردووە کە لە ڕێگەی هەماهەنگی نێودەوڵەتی ڕاهێنان و ڕاوێژکاری زانستی ورد پێشکەش بە مامۆستایانی کۆلێجی پزیشکی زانکۆی هەڵەبجە بکرێت
بەڕێوەبەری فەرمانگەی ژینگەی سۆران بە کوردسات نیوزی راگەیاند، بەهۆی پابەندنەبوون بە رێنمایەکانی ژینگە کارگەیەکی بەرهەمهێنانی قیر لە ئیدارەی سۆران داخرا.
هەژار ماهیر بەڕێوەبەری فەرمانگەی ژینگەی سۆران بە کوردسات نیوزی راگەیاند، "دوای ئاگادارکردنەوەمان کە ئەو کارگەیە پاشماوەی زۆری دوکەڵ و پیسی بڵاودەکاتەوە و هۆکارە بۆ پیسبوونی ژینگە، لێژنەیەک بە چاودێری قائیمقامی سۆران و بە سەرپەرشتی فەرمانگەی ژینگەی سۆران پێک هات".
دەشڵێت، "کاتێک سەردانی کارگەکەمان کرد دەرکەوت هیچ مەرجێکی ژینگەیی و تەندروستی و بەرگری شارستانی تێدا نییە، تەنانەت مۆڵەتی کارکردنیشی نەبوو بۆیە دەستبەجێ بڕیاری داخستنی ئەو کارگەیە درا و بە هیچ جۆرێک رێگای پێنادرێت بەو شێوەیە کار بکات".
ئەوەشی خستە روو، بڕیارە لێژنەیەک بۆ ئەو مەبەستە پێک بێت، هەر شوێنێک مەرجی پاراستنی ژینگە و تەندروستی و بەرگری شارستانی نەبێت، "بەبێ دوودڵی" دادەخرێت، تەنانەت مۆلیدە ئەهلیەکانیش.
بەشێکی هاوڵاتیان گرفتیان لەگەڵ کارگەکان و مۆلیدە ئەهلییەکانی گەڕەکەکاندا هەیە و باس لەوەدەکەن، بەشێکیان رێنماییەکانی ژینگە و تەندروستی جێبەجێ ناکەن و کارگە لەنزیک ناوچەی نیشتەجێبوون دەکەنەوە، یانیش مۆلیدەی ئەهلی گەڕەکەکان دەنگێکی بەرز و دوکەڵێکی زۆریان هەیە.
بەپێی راپرسی دەزگایەکی عێراقی تایبەت بە دەستنیشانکردنی کەسایەتی و کۆمپانیا سەرکەوتووەکانی ساڵ، 'قەیوان گروپ' لەسەر ئاستی هەموو عێراق پلەی یەکەمی بەدەستهێناوە وەک باشترین کۆمپانیای بواری خانووبەرە.
دامەزراوەی (المرکز الخبری الوطنی) لە عێراق، لە راپرسییەکدا بۆ دیاریکردنی باشترین کۆمپانیا لە بواری خانووبەرە راپرسییەکی ئەنجامداوە، بەپێی راپرسییەکە لەسەر بنەمای کوالێتی و رەزامەندی کڕیاران و لایەنە پەیوەندارەکان و متمانەی خەڵک بەکارەکانیان، لەناو سەدان کۆمپانیای گەورە و جیاجیای بواری خانووبەرە لە عێراق، گروپی کۆمپانیاکانی قەیوان بۆ ساڵی ٢٠٢٤ بە باشترین کۆمپانیای وەبەرهێنانی بواری خانووبەرە هەڵبژێردراوە.
ئاماژە بەوەشکراوە، "بڕیارە لە ڕۆژانی داهاتوودا و بەئامادەبوونی چەندین کەسایەتی حکومی و پەڕلەمانی و نوێنەری وڵاتان و کۆمپانیا و کەسایەتی بوارەکانی میدیا و کۆمەڵی مەدەنی، لە مەراسیمێکی شایستەدا لە بەغدادی پایتەخت براوەکانی ئەو راپرسیە بۆ ئەمساڵ رابگەیەنرێن".
دامەزراوەی (المرکز الخبری الوطنی)، دامەزراوەیەکی ئەکادیمی و مەدەنیی عێراقە و کۆتایی هەموو ساڵێک راپرسی بۆ دەستنیشانکردنی کەسایەتی و کۆمپانیا و دامەزراوە سەرکەوتووەکان ئەنجام دەدات.
پۆلیسی سلێمانی رایگەیاند، تۆمەتبارێکیان دەستگیر کردووە کە بە ئۆتۆمبێل لە کەسێکی دابوو و هەڵاتبوو.
پۆلیسی سلێمانی رایگەیاندووە، دوای بەدواداچوون و سوودوەرگرتن لە کامێراکانی چاودێری، لەلایەن مەفرەزەكانی بنكەی پۆلیسی ئازادییەوە تۆمەتبارێك دەستگیركرا كە بە ئۆتۆمبێلەكەی لە هاووڵاتییەكی دابوو دواتر هەڵاتبوو.
ئاماژەی بەوەشکردووە، لەرێگای کامێراکانی چاودێرییەوە توانرا ئۆتۆمبێلەکە بدۆزرێتەوە، کە لە جۆری تۆیۆتا کراون بوو و دواتریش تۆمەتبارەکە دۆزرایەوە و دەستگیر کرا.
پۆلیسی سلێمانی راشیگەیاندووە، لە ئێستادا تۆمەتبار (ر،م،ج) بەبڕیاری دادوەر و بەپێی ماددەی ٢٣ی هاتوچۆ راگیراوە و دانی ناوە بەتاوانەكەیدا.