دەستەی راگەیاندن و پەیوەندییەكانی عیراق دەستبەسەر سامانی كۆمپانیای كۆڕەك تیلیكۆمدا دەگرێت و داواش لە بانكەكان دەكات شایستە داراییەكانی ئەو كۆمپانیایە لە سێ ساڵی رابردوودا بگەڕێنەوە.

بەلیغ ئەبوکلەل سەرۆكی دەزگای جێبەجێكاری دەستەی راگەیاندن و پەیوەندییەكانی عیراق لە چاوپێككەوتنێكی تەلەفزیۆنیدا رایگەیاند، دەستەكەیان هیچ بڕە پارەیەك یاخود قەرزێكی كۆمپانیای كۆڕەك تیلیكۆمی لە ئەستۆ نییە، وتیشی، دۆسێی پاكتاوی كۆمپانیای كۆڕەك بە ئاگاداری دەستەی دەسپاكی و دیوانی چاودێریی دارایی و ئەمیندارێتی گشتیی ئەنجومەنی ئەنجامدراوە.

دەشڵێت، دەستەی راگەیاندن و پەیوەندییەكانی عیراق دەستیبەسەر سامانی كۆمپانیای كۆڕەكدا گرتووە و پەیوەندی بە بانكە عیراقییەكانیشەوە كراوە بۆ وەرگرتنەوەی ئەو شایستە داراییانەی لە ماوەی سێ ساڵی رابردوودا بە ناوی ئەو كۆمپانیایەوە تۆماركراون، راشیگەیاند، كۆمپانیای كۆڕەك لە ئێستادا خاوەنی ئەو سەرمایە نییە كە ئەو بڕەی لێی داواكراوە بیداتەوە.

زیاتر لە 10 هەزار و 500 كەس لە سوریا داواكارییان بۆ وەرگرتنی رەگەزنامە پێشكەشكردووە.

وەزارەتی ناوخۆی سوریا ئاشكرایكردووە، لە چوارچێوەی جێبەجێكردنی مەرسومی سەرۆكایەتی سوریا بۆ پێدانی رەگەزنامە، لیژنەكانی وەرگرتنی داواكاری وەرگرتنی رەگەزنامە بەو هاووڵاتییە كوردانەی مەرسومی ژمارە 13ی ساڵی 2026  دەیانگرێتەوە، تائێستا دوو هەزار و 892 خێزان كە لە 10 هەزار و 516 كەس پێكهاتوون، لە چەند پارێزگایەك داواكارییان پێشكەشكردووە.

راشیگەیاندووە، پارێزگای حەسەكە زۆرترین رێژەی داواكاریی تۆماركردووە، كە دوو هەزار و 772 داواكاری بووە، پارێزگای حەلەب 75 داواكاری و لە دیمەشقیش 32 داواكاری پێشكەشكراون.

دەستەی فڕۆکەوانیی مەدەنی ئێران، ئەمڕۆ شەممە، داخستنی کایەی ئاسمانی خۆی لە رۆژئاوای وڵاتەکەی راگەیاند.

دەستەکە لە بەیاننامەیەکدا رایگەیاندووە: کایەی ئاسمانی داخراوە لەگەڵ سنووردارکردنی جووڵەی فڕین.

لە هەمان کاتدا ئەو دەنگۆیانەی رەتکردەوە کە گوایە هیچ هۆشدارییەک سەبارەت بە داخستنی ئاسمانی رۆژئاوای وڵاتەکە دەرچووبێت.

دەستەکە دەڵێت: بڕیاردراوە کاتەکانی کارکردن لە هەردوو فڕۆکەخانەی مێهرئاباد و ئیمام خومەینی لە تاران تا کاتژمێر 9:30ی شەو درێژ بکرێتەوە، روونیشیکردەوە: ئەم رێکارانە لە چوارچێوەی رێکخستنەوەی جووڵەی ئاسمانی و گەڕانەوەی قۆناغ بە قۆناغی کارکردنی فڕۆکەخانەکاندایە.

سێ مانگ دوای دەستپێکردنی هێرشەکان بۆ سەر ئێران، دۆناڵد ترەمپ، سەرۆکی ئەمریکا رووبەڕووی پرسیارێکی گەورە بووەتەوە: ئایا ئەو جەنگەکەی دۆڕاندووە؟

ئاژانسەکانی هەواڵ ئاشکرایانکردووە، هەرچەندە واشنتۆن لە زۆربەی پێکدادانە سەربازییەکاندا سەرکەوتنی بەدەستهێناوە، بەڵام رەوشەکە ئاماژە بەوە دەکەن کە شکستی ستراتیژی نزیکە، لە کاتێکدا ئێران هێشتا کۆنترۆڵی گەروی هورمزی لەدەستدایە و ئامادە نییە هیچ سازشێکی ئەتۆمی بکات، گومانەکان لەسەر توانای ترەمپ بۆ گۆڕینی سەرکەوتنە تاکتیکییەکان بۆ دەستکەوتی جیۆپۆلیتیکی زیاتر دەبن، لێدوانە رەسمییەکانی کۆشکی سپی باس لە سەرکەوتن دەکەن، بەڵام لە راستیدا واشنتۆن لە نێوان دیپلۆماسییەکی نادیار و هەڕەشەی بەردەوامدا گیری خواردووە.

ئاژانسی هەواڵی رۆیتەرز لە راپۆرتێکدا بڵاویکردوەتەوە، تاران توانیویەتی فشار بخاتە سەر رێڕەوی گواستنەوەی یەک لەسەر پێنجی نەوت و غازی جیهان، ئەمەش وەک کارتێکی بەهێز لە دژی هاوپەیمانەکانی ئەمریکا بەکاردەهێنێت، هەرچەندە لە سەرەتای جەنگەکەدا لە 28ـی شوبات، شەپۆلەکانی هێرشی ئاسمانی کۆگاکانی موشەکی بالیستی و بەشێکی زۆری هێزی دەریایی ئێرانیان تێکشکاند، بەڵام رژێمی تاران هێشتا بەپێی پلانەکانی خۆی دەجوڵێتەوە، لێپرسراوانی سەربازی ئاماژە بەوە دەکەن، تاران بە داخستنی گەووی هورمز نرخەکانی وزەی بەرزکردووەتەوە و ئەمەش زیانی گەورەی بە ئابوری جیهانی گەیاندووە، لە کاتێکدا ترەمپ بەڵێنی دابوو رێگری لە هەر هەڕەشەیەک بکات.

لە ناوخۆی ئەمریکادا، ترەمپ لە ژێر فشارێکی زۆردایە بەهۆی بەرزبوونەوەی نرخی بەنزین و دابەزینی ئاستی جەماوەریی بەرلە هەڵبژاردنەکانی نیوەی خول. ئێستا کە شەش هەفتە بەسەر راگەیاندنی ئاگربەستدا تێپەڕیوە، ترەمپ لە نێوان دوو بژاردەی سەختدایە؛ قبوڵکردنی رێککەوتنێکی پڕ لە کەمکوڕی یان هەڵکشانی سەربازیی تر کە رەنگە قەیرانەکە درێژخایەنتر بکات، هەندێک لە لێکۆڵەران پێیان وایە ترەمپ بۆ شاردنەوەی ئەم شکستانە، رەنگە سەرنجەکان بەرەو کوبا رابکێشێت بۆ ئەوەی سەرکەوتنێکی ئاسانتر بەدەستبهێنێت، بەڵام ئەمەش مەترسی گەورەی تێدایە و رەنگە هەڵەیەکی تری ستراتیژی بێت.

ئامانجە سەرەکییەکانی ترەمپ کە بریتی بوون لە بێبەشکردنی ئێران لە چەکی ئەتۆمی و بڕینی کەمکردنەوەی هەژمونی ئێران لە ناوچەکە، هێشتا بەدی نەهاتوون، بەپێی راپۆرتە هەواڵگرییەکان، کۆگایەکی گەورەی یۆرانیۆمی پیتێنراو هێشتا لە ژێر زەویدا پارێزراوە، سەرەڕای هێرشە ئاسمانییەکانی مانگی حوزەیرانی رابردوو، ئێران نەک هەر پاشەکشەی نەکردووە، بەڵکو رابەری باڵای ئەو وڵاتە رێگری کردووە لە ناردنە دەرەوەی یۆرانیۆمە پیتێنراوەکە، ئەم رەوشە وایکردووە وڵاتانی وەک چین و روسیا سود لە کەمکوڕییە تاکتیکییەکانی سوپای ئەمریکا وەربگرن و پێگەی واشنتۆن لە ناوچەکەدا لاوازتر ببێت.

لە کۆتاییدا، زۆرێک لە چاودێران جەنگەکە بە کش و مات بۆ ترەمپ وەسف دەکەن، رۆبەرت کاگان، لێکۆڵەری ناودار پێی وایە ئەم ئەنجامە شکستێکی مێژووییە کە تەنانەت لە کشانەوەکانی ڤێتنام و ئەفغانستانیش خراپترە، چونکە ئەمجارە لە دڵی ناوچەیەکی ستراتیژیی جیهانیدا رویداوە، هیچ رێگەیەک بۆ گەڕانەوە بۆ رەوشی پێشوو نەماوە و هیچ سەرکەوتنێکی ئەمریکی ناتوانێت ئەو زیانە گەورانە قەرەبوو بکاتەوە کە بە واشنتۆن گەیشتووە، بەتایبەت لە کاتێکدا کە هاوپەیمانە ئەوروپییەکانیش ئامادە نین هاوکاری ترەمپ بکەن لە جەنگێکدا کە بێ پرسی ئەوان دەستی پێکردووە.

وەزارەتی بەرگری ئێران، ئەمڕۆ شەممە، رایگەیاند کە پابەندنەبوونی دوژمن بە داواکارییەکانی گەلی ئێرانەوە، زیانی گەورەتر بە دۆناڵد ترەمپ و ئیسرائیل دەگەیەنێت و جێبەجێکردنی ئەم داواکارییانەش تاکە رێگایە بۆ چوونەدەرەوە لە شەڕ.

وتەبێژی وەزارەتی بەرگری ئێران، عەمید رەزا تەڵایی، بە ئاماژەدان بە تێوەگلانی دۆناڵد ترەمپی سەرۆکی ئەمریکا لە شەڕ لەگەڵ ئێراندا، رایگەیاند: ترەمپ هیچ بژاردەیەکی تری لەبەردەمدا نییە جگە لە قبوڵکردنی داواکارییەکانی گەلی ئێران و داننان بە مافەکانی وڵاتەکەماندا.

ئاژانسی هەواڵی "مێهر" لە زاری عەمید رەزا تەڵاییەوە بڵاویکردەوە: چ لە گۆڕەپانەکانی جەنگ و چ لە دیپلۆماسیدا، دابینکردنی داواکارییەکانی گەلی ئێران تاکە رێگایە بۆ چوونەدەرەوە لەو سێیەمین شەڕەی کە بەسەر دوژمنی ئەمریکی-ئیسرائیلدا سەپێنراوە.

وتەبێژی وەزارەتی بەرگری و پشتیوانی هێزە چەکدارەکان وتیشی: پابەندنەبوونی دوژمن بە داواکارییە رەواکانی گەلی ئێرانەوە، دەبێتە هۆی ئەوەی ترەمپ و ئیسرائیل زیانی گەورەتر و شکستە یەک لەدوای یەکەکانی داهاتوو بچێژن.

هەروەها جەختی کردەوە: ترەمپ دەبێت لەگەڵ قبوڵکردنی پێشنیازەکانی ئێراندا، بیر لە رێگریکردن لە زیان و تێچووی زیاتری بەردەوامیی شەڕەکە بۆ سەر گەلی ئەمریکا و کۆمەڵگەی نێودوڵەتی بکاتەوە.

وتەبێژی وەزارەتی بەرگری و پشتیوانی هێزە چەکدارەکان ئاماژەی بەوەش کرد کە:  پشتگوێخستنی ترەمپ و بێباکیی ئەو بەرانبەر بە بەرژەوەندییە نیشتمانییەکانی ئەمریکا، و پابەندبوونی بە ئیسرائیل و رەفتارە لوتبەرزانەکەی، دەبێتە هۆی نقومبوونی زیاتری ئەمریکا لە زۆنگاوی شەڕدا.

بەڕێوەبەرایەتی گشتی کەشناسی و بوومەلەرزەزانی هەرێمی کوردستان، ئاشکرایکرد، ئەمڕۆ ئاسمان بە گشتی ساماڵ دەبێت لەگەڵ هەبوونی هەندێک پەڵە هەوری جیاجیا، هاوکات پلەکانی گەرما بەبەراورد بە تۆمارەکانی دوێنێ،  دوو بۆ چوار پلە بەرزدەبنەوە.

ئاماژەی بەوەشکرد، سبەینێ ئاسمان ساماڵ و پەڵە هەور دەبێت، هەروەها لە ناوچە شاخاوییەکان نیمچە هەور دەبێت و ئەگەری تاوەبارانی کورتخایەن هەیە، بەتایبەت لە ناوچە شاخاوییەکانی رۆژئاوا و باکوری هەرێم.

کەشناسی هەرێم ئەوەشی خستەڕوو، پلەکانی گەرما بەراورد بە ئەمڕۆ، دوو بۆ سێ پلەی تر بەرزتر دەبنەوە.

رابەری دروزەكانی سوریا دەڵێت، جیابونەوەیان لە دەسەڵاتی ئێستای دیمەشق بڕیاری كۆتاییە، لەبەرئەوەی پێكەوەژیان لە سوریا بووەتە ئەستەم و مەحاڵ.

حیكمەت هیجری رابەری رۆحی دروزەكانی سوریا رایگەیاند، پێكهێنانی ئیدارەیەكی خۆبەڕێوبەریی لە ناوچەی جەبەل بەشان و جیابوونەوەی تەواو لە حكومەتی دیمەشق، بڕیاری كۆتایی دروزەكانە، چونكە پێكەوەژیان بووەتە مەحاڵ و مافی چارەی خۆنووسینیش دانووستانی لەسەر ناكرێت.

رابەری رۆحی دروزەكانی سوریا حكومەتەكەی ئەحمەد شەرعی بە تیرۆریست ناوبرد و داواشیكرد دیمەشق پابەند بێت بە ئاگربەستی تەمموزی 2025 بۆ ئازادكردنی رفێندراوان و كۆتاییهێنان بە گەمارۆی ئابووری سەر ناوچەكە دروزنشینەكان.

بەهۆی دزەكردن لە تانكییەكی مادەی كیمیایی ژەهراوی لە ویلایەتی كالیفۆرنیا، 40 هەزار كەس ماڵەكانیان چۆڵكرد.

كریگ كۆڤی، سەرۆكی دەستەی ئاگركوژێنەوە لە كەرتی ئۆرەنج رایگەیاند، زیاتر لە 40 هەزار كەس لە چەند شارێكی باشووری كالیفۆرنیا گواستراونەتەوە، چونكە تانكییەكی ماددەی كیمیایی لە دامەزراوەیەكی فڕۆكەوانی لە مەترسی داڕمان یان تەقینەوەدایە.

ناوبراو ئاماژەی بەوە كرد كە تانكییەكە نزیكەی 7 هەزار گالۆن ماددەی میساكریلاتی تێدایە كە زۆر زوو دەسووتێت و بۆ دروستكردنی پلاستیك بەكاردێت، هەروەها تیمی فریاگوزاری كار بۆ ساردكردنەوەی تانكییەكە و كەمكردنەوەی مەترسییەكان دەكەن بۆ رێگریكردن لە تەقینەوەیەك كە رەنگە بگاتە تانكییەكانی تریش.

راشیگەیاند تا ئێستا هیچ برینداربوونێك تۆمار نەكراوە و لێكۆڵینەوە لە هۆكاری دزەكردنی سیستەمی ساردكردنەوە تەنكییەكە بەردەوامە.

بەپێی نوێترین ئامارەکان، بەهۆی تەقینەوەیەک لە کانێکی خەڵوز لە هەرێمی شانسی لە باکوری چین، زیاتر لە 50 کرێکار گیانیان لەدەستداوە.

روداوەکە شەوی هەینی لە کانێکی خەڵوز بە ناوی "لیوشین یو" لە ناوچەی "چین یوان" رویداوە، لەو کاتەشدا 247 کرێکار لەژێر زەویدا سەرقاڵی کارکردن بوون.

بەپێی ئاژانسی هەواڵی رەسمی چین (شینخوا)، دوای روداوەکە سەرۆکی چین "شی جینپینگ" فەرمانی بە دەزگا پەیوەندیدارەکان کردووە هەموو هەوڵێک بخەنەگەڕ بۆ دۆزینەوەی بێسەروشوێنبووان و فریاکەوتنی برینداران، هەروەها جەختی لە ئەنجامدانی لێکۆڵینەوەیەکی ورد و سزادانی توندی سەرپێچیکاران کردووەتەوە.

جێگەی ئاماژەیە، تەقینەوەکە دوێنێ رویداوە و تا بەرەبەیانی ئەمڕۆ شەممە، 201 کرێکار بە سەلامەتی ڕزگار کراون، بەڵام بەهۆی سەختی روداوەکە، ئاماری قوربانیان بۆ زیاتر لە 50 کەس بەرز بووەتەوە، ئێستاش تیمەکانی فریاگوزاری بەردەوامن لە گەڕان و لێکۆڵینەوەکان بۆ زانینی هۆکاری راستەقینەی تەقینەوەکە.

دۆناڵد ترەمپ، سەرۆكی ئەمریكا رایگەیاند، واشنتۆن بودجەیەكی سەربازیی نوێ بە بەهای یەك تریلیۆن و 500 ملیار دۆلار بۆ ساڵی 2027 پێشكەش دەكات. 
ترەمپ لە كاتی سوێندخواردنی سەرۆكی نوێی یەدەگی فیدراڵیدا جەختی كردەوە كە ڕێگە بە ئێران نادەن ببێتە خاوەنی چەكی ئەتۆمی و تاران بە توندی پەرۆشی ڕێككەوتنە لەگەڵیاندا.
ئاماژەی بەوەش كرد، ئەمریكا گورزی توند و بەهێزی لە ئێران وەشاندووە كە هیچ بژاردەیەكی تری لەبەردەمدا نەهێشتووەتەوە.
هاوكات، ڕاپۆرتە ڕۆژئاوایییەكان ئاشكرایان كردووە كە پێنتاگۆن خەریكی هەڵسەنگاندنی كۆگای موشەكە بەرگرییەكانیەتی دوای ئەوەی لە جەنگی دژ بە ئێراندا بەشێكی زۆری لێ بەكارهێنا. 
بەپێی زانیارییەكان، ئەمریكا زیاتر لە 200 موشەكی سیستمی ساد و 100 موشەكی تری ستانداردی بۆ بەرگریكردن لە ئیسرائیل تەقاندووە، ئەمەش نیگەرانیی لەبارەی ئامادەیی سوپاكەی دروستكردووە.
ئەم پێشهاتانە لەكاتێكدایە كە ترەمپ پێشتر ڕایگەیاندبوو ململانێكان لەگەڵ ئێراندا بەمزووانە كۆتاییان دێت.

تولسی گابارد بەڕێوەبەری هەواڵگری نیشتمانی ئەمریكا دەستی لەكاركێشایەوە و رۆژی 30 مانگی داهاتوو دوایین رۆژی دەبێت لە پۆستەكەی.
بەگوێرەی هەواڵێكی كەناڵی فۆكس نیوز: تولسی گابارد، بەڕێوەبەری هەواڵگری نیشتمانی ئەمڕۆ ترەمپی لە بڕیاری دەستلەكاركێشانەوەی ئاگادار كردەوە و رۆژی 30ی حوزەیران دوایین رۆژی دەبێت لە پۆستەكەی.
ئاماژەی بەوەشكردووە، گابارد دەست لەكار دەكێشێتەوە بۆ پشتگیریكردنی هاوسەرەكەی لە ململانێی لەگەڵ جۆرێكی زۆر دەگمەنی شێرپەنجە. 
گابارد پاڵپشتیكارێكی سەرسەختی ترەمپ بووە لە كەمپینی هەڵبژاردنی سەرۆكایەتی 2024 و دوای گەڕانەوەی ترەمپیش بۆ كۆشكی سپی یەكێك بووە لە كەسایەتیە بەهێزەكانی ئەمریكا كە بانگهێشتی كۆشكەكە كراوە. 
پێگەی بی بی سی رایگەیاند، لە كاتێكدا ئەمریكا هێرشی كردەسەر ئێران و فشاری دەخستە سەر كوبا و مادۆرۆی لەسەر كار لابرد گابارد ئەمساڵ تا ڕادەیەكی ونبوو لە بەرچاو.

بە ئامانجی دانوستانی چڕ لەگەڵ دەسەڵاتدارانی تاران بۆ گەیشتن بە رێككەوتنی كۆتایی لەگەڵ ئەمریكا، سوپا سالاری پاكستان بەرەو ئێران بەرێكەوت.

ئاژانسی هەواڵی فرانس پرێس بڵاویكردەوە، عاسم مونیر سوپاسالاری پاكستان بۆ نێوەندگیری نێوان ئێران و ئەمریكا و دانوستانی چڕ لەگەڵ ئێرانیەكان بەرەو تاران بە رێككەوتووە.

هاوكات ئاژانسی رۆیتەرز رایگەیاندووە، تیمێكی قەتەر بە هەماهەنگی ئەمریكا لە ئێرانن بۆ ئەوەی لایەنەكان لەیەك نزیك بكەنەوە و رێككەوتنی كۆتاییهاتن بە شەڕ بكرێت.

باڵیۆزخانەی پاكستانیش لە تاران ڕایگەیاند، موحسین نەقەوی، وەزیری ناوخۆ، لەگەڵ عەباس عراقچی، وەزیری دەرەوەی ئێران كۆبووەتەوە بۆ تاوتوێكردنی پێشنیارەكانی تایبەت بە چارەسەركردنی ناكۆكییەكانی نێوان ئێران و ئەمریكا. 

داهاتی نانەوتیی ئەم هەفتەیەی سنوری پارێزگای سلێمانی زیاتر لە 16ملیار دیناربووە و بەراورد بە هەفتەی رابردووش 10ملیار دینار زیادیكردووە.
ماڵپەڕی شەفافیەت كە چاودێری داهاتی نانەوتیی پارێزگاكانی سلێمانی و هەڵەبجە و ئیدارە سەربەخۆكانی راپەڕین و گەرمیان دەكات، بڵاویكردەوە، داهاتی نانەوتیی ئەم هەفتەیە لە 16ـی 5ـەوە تا ئەمڕۆ، 16ملیار و 561 ملیۆن و 345 هەزار  و 340 دینار بووە، كە لە 90% بە نەختینەبووە و 10% بە چەك بووە.
ئاماژەی بەوەشكردووە، داهاتەكە بەراورد بە هەفتەی رابردوو، زیاتر لە 10ملیار دینار زیادیكردووە كە لەو هەفتەیەدا تەنها 6 ملیار و 404 ملیۆن دینار بووە.

بە مەبەستی پاراستنی سامانی ئاژەڵ و رێگری لە بڵاوبوونەوەی نەخۆشییە گوازراوەكان، عیراق گواستنەوەی ئاژەڵی زیندووی لە سوریاوە بەرەو عیراق و وڵاتانی كەنداو قەدەغە كرد.

وەزارەتی كشتوكاڵی عیراق رایگەیاندووە، بڕیاریان داوە بە راگرتنی كاتیی جوڵەی ترانزێتی ئاژەڵی زیندوو كە لە خاكی سوریاوە بەرەو عیراق و وڵاتانی تری كەنداو دێن، ئەمەش وەك هەنگاوێكی پێشوەختە بۆ رێگری لە هەر مەترسییەك.
وەزارەتەكە ئاماژەی بەوەش كرد ئەم هەنگاوە دوای گەیشتنی زانیاری ورد دێت سەبارەت بە بڵاوبوونەوەی نەخۆشی تەبەق لەناو مانگا و مەڕوماڵاتی سوریا.
هەروەها جەختی كردەوە كە رێكارە تەندروستییەكان بەبێ جیاوازی بەسەر هەموو وڵاتاندا جێبەجێ دەكرێن بۆ رێگری لە گواستنەوەی پەتا سنووربەزێنەكان.
ئەم بڕیارە لە چوارچێوەی هەوڵەكانی حكومەتە بۆ پاراستنی رەوش و ئاسایشی خۆراك و رێگری لە زیانگەیاندن بە سامانی ئاژەڵی ناوخۆیی و رێگری لە بڵاوبوونەوەی ڤایرۆسەكان.

ئیمارات لە كۆبوونەوەیەكی ئەنجومەنی ئاسایشی نێودەوڵەتیدا، داوای ئازادكردنی نزیكەی 20 هەزار دەریاوانی كرد كە بەهۆی هێرشەكانی ئێرانەوە لە گەروی هورمز گیریان خواردووە و ژیانیان لە مەترسیدایە.

غەسەق شاهین، جێگری نوێنەری هەمیشەیی ئیمارات لە نەتەوە یەكگرتووەكان ڕایگەیاند، جەنگی ئێران كە لە 28ی شوباتەوە دەستی پێكردووە، بە ئەنقەست بنكە مەدەنییەكان، بەندەرەكان، فڕۆكەخانەكان و تۆڕەكانی وزە و خۆراكی ئیمارات كراونەتە ئامانج.

ئاماژەی بەوەش كرد، ئەم هێرشانە پێشێلكارییەكی ئاشكرای یاسای نێودەوڵەتین، ئاسایشی ئابووری جیهانی دەخەنە مەترسییەوە و رێگرن لە گەیشتنی هاوكارییە مرۆییەكان.

هەروەها جەختیشی لە گرنگی جێبەجێكردنی بڕیارەكانی ئەنجومەنی ئاسایش كردەوە بۆ پاراستنی مەدەنییەكان و ئازادی گەشتوگوزاری دەریایی.

شاهین پشتیوانی وڵاتەكەی بۆ پڕۆژە بڕیاری بەحرەین_ ئەمریكی دەربڕی كە لەلایەن 138 دەوڵەتەوە پاڵپشتی دەكرێت، وەك پەیامێكی ناڕەزایەتی نێودەوڵەتی دژی ڕەفتارە شەڕانگێزییەكانی ئێران.

لەكاتی نمایشێكی ئاسمانی لە ویلایەتی ئایداهۆی ئەمریكا، دوو فڕۆكەی جەنگیی ئەمریكا بە بەهای 136 ملیۆن دۆلار بەیەكیاندا كێشاو تێكشان.

میدیاكانی ئەمریكا بڵاویانكردووەتەوە، سەرەڕای ئەوەی فڕۆكەكان لە ئاسمان تێكشكاون، بەڵام چوار فڕۆكەوانەكەیان بە سەلامەتی ڕزگاریان بووە.

سەرەڕای ئەوەی رووداوەكە لە 17ی ئەم مانگە روویداوە، بەڵام لێكۆڵینەوەكان دەریانخستووە كە تێچووی دارایی ئەم نمایشە سەربازییە زۆر لە قازانجە پیشەییەكەی زیاتر بووە، لەگەڵ ئەوەشدا رووداوەكە مشتومڕی زۆر لەسەر هۆكاری سەركێشیكردنی پێنتاگۆن بە فڕۆكە گرانبەهاكان و ژیانی فڕۆكەوانان لە پێناو كاتبەسەربردن دروستكردووە.

بەپێی توێژینەوەیەكی ساڵی 2012 تێچووی تیمی نمایشی ئاسمانیی هێزی دەریایی ئەمریك، نزیكەی 98 ملیار و 600 ملیۆن دۆلار بووە، لە كاتێكدا داهاتی راكێشانی گەنجان بۆ ناو سوپا تەنیا یەك ملیۆن دۆلار بووە، ئەمەش واتە زیانی دارایی بە ڕێژەی 99% بووە.
لەگەڵ ئەوەشدا، لێپرسراوانی پێشووی سوپا جەخت دەكەنەوە كە پێنتاگۆن ئەم نمایشە ئاسمانییانە بە پێویست دەزانێت بۆ نیشاندانی هێز و كارامەیی سوپا و هاندانی خەڵك بۆ خزمەتی سەربازی، سەرەڕای ئەو مەترسییە گەورانەی كە لە رابردوودا بوونەتە هۆی چەندین رووداوی كوشندە.