کەشناسیی هەرێم رایگەیاند،  پلەکانی گەرما نزمدەبنەوە، بارانبارین دەستپێدەکات و بەردەوام هەورەبروسکەشی لەگەڵدا دەبێت.

ئەمڕۆ سێشەممە، بەڕێوەبەرایەتی گشتیی کەشناسیی و بومەلەرزەزانی هەرێم پیشبینی کەشوهەوای بۆ 48 سەعاتی داهاتوو بڵاوکردوەتەوە و بە گوێرەی پیشبینییەکان لە ئێوارەی ئەمڕۆوە بارانبارین دەستپێدەکات.

کەشناسیی هەرێم دەڵێت؛ ئەمڕۆ پلەکانی گەرما بەراورد بە تۆمارکراوەکانی دوێنێ  یەک بۆ دوو پلە نزمدەبنەوە.

لە بارەی کەشی سبەینێشەوە ئاماژەی بەوەکردوە، بارانبارین و هەورە بروسکە زیاتر دەبێت، لەکاتی بارانبارینیشدا پلەکانی گەرمان نزمدەبنەوە.

بەرزترین پلەکانی گەرمای پێشبینیکراو بە پلەی سیلیزی بۆ رۆژی چوارشەممە بەمشێوەیە دەبێت؛

هەولێر: 30 پلەی سیلیزی

پیرمام: 27 پلەی سیلیزی

سلێمانی: 29 پلەی سیلیزی

هەڵەبجە:31 پلەی سیلیزی

چەمچەماڵ: 30 پلەی سیلیزی

دهۆک: 29 پلەی سیلیزی

زاخۆ: 30 پلەی سیلیزی

ئاکرێ:31 پلەی سیلیزی

گەرمیان:34 پلەی سیلیزی

حاجی ئۆمەران:25 پلەی سیلیزی

دوای داخستنی فڕۆکەخانەی ریاز و هەڵوەشاندنەوەی گەشتە ئاسمانییەکان بەهۆی هێرشی حوسییەکانەوە نرخی بەکرێدانی فڕۆکەی تایبەت لە سعودیە بە رێژەی زیاتر لە 50% بەرزبوەتەوە.

رۆژنامەی فاینانشیاڵ تایمز بە پشتبەستن بە نوێنەرانی کۆمپانیا تایبەتمەندەکان لەم کەرتەدا بڵاوکراوەتەوە، بەهۆی داخستنی فڕۆکەخانەکانەوە خواست لەسەر بە کرێگرتنی فڕۆکە تایبەتەکان زیادی کردوە.

رۆژنامەکە ئاماژەی بەوەکردوە، تێچووی گەشتە تایبەتەکان لە سعودیەوە بۆ وڵاتانی یەکێتی ئەوروپا نزیکەی 150 هەزار دۆلارە و بۆ ئیمارات لە نێوان 30 بۆ 50 هەزار دۆلاردایە.

بە گوێرەی زانیارییەکانی فاینانشیاڵ تایمز، کەمبونەوەی ژمارەی ئەو کۆمپانیایانەی ئامادەی گەشتکردنن بۆ ئەو ناوچانە و نەبونی رکابەری، خواستی زۆر هۆکاری سەرەکیی بەرزبونەوەی نرخەکانە.

په‌ره‌سه‌ندنی جه‌نگ له‌ جیهاندا، بە تایبەت جەنگی ئێران بووەتە هۆی بوژانەوەی بەرهەمهێنان و هەناردەکردنی نەوت و گاز لە کیشوەری ئەمەریکا.

رۆژنامەی فایننشال تایمز لە راپۆرتێکدا بڵاویکردوەتەوە، لە سایەی زیادبونی نیگەرانییەکان و درێژخایەنبوونی ئاڵۆزییەکان لە رۆژهەڵاتی ناوەڕاست، کڕیاران بۆ دابینکردنی سەرچاوەی متمانه‌پێکراوی وزە لە کێبڕکێدان.

فایننشال تایمز ئاماژەیبەوەکردوە، بەهۆ خواستەوە لەسەر وزە،  وڵاتانی  کەنەدا و بەڕازیل ئەمساڵ ریکۆردی نوێیان لە بەرهەمهێنانی نەوتدا تۆمار کردووە و بەپێی مەزەندەی کۆمپانیای ریستاد ئینێرجی کۆی بەرهەمهێنانی نەوت لە هەردوو ئەمریکای باکور و باشور لە ماوەی دوو ساڵی کۆتاییدا تا مانگی کانوونی یەکەمی 2026 نزیکەی 10٪ روو لە زیادبوون کردوە.

بەگوێرەی راپۆرتەکە، بەرهەمهێنانی نەوت لە ئەمەریکاش لە هەڵکشاندایە و هەناردەکردنی نەوتی خاو و بەرهەمە نەوتییەکان، لەوانەش گازاویل، بۆ ئەوروپا و ئاسیا لە 15٪ زیادی کردووە.

لە بەشێکی تری راپۆرتەکەدا هاتووە؛ بازاڕە جیهانییەکان لە ئەنجامی هێرشکردن سەر ژێرخانی نەوتی و کەشتییەنەوتهەڵگرەکان، لە گەروی هورمز، زیاتر لە دوو ملیار بەرمیل نەوتی خاویان لەدەست داوە.

چوارچێوەی هەماهەنگی لیژنەیەكی باڵا بۆ لێكۆڵینەوە لەو یاسا دەستوورییانە پێكدەهێنێت، كە پەكخراون و پەیوەستن بە بەرنامەی حكومییەوە.

بەپێی راگەیەنراوێك، چوارچێوەی هەماهەنگی شیعەكان لە نوسینگەی محەمەد شیاع سودانی بە ئامادەبوونی عەلی زەیدی سەرۆك وەزیرانی عیراق كۆبووەتەوە و باس لە دابەشكردنی سەرۆكایەتییەكان و ئەندامانی لیژنەكانی ئەنجومەنی نوێنەران كراوە،  جەختیشكراوەتەوە لەسەر پێویستیی یەكلاكردنەوەی ئەو دۆسێیە بەپێی هاوسەنگی و هاوبەشیی نیشتیمانی.

ئاماژە بەوەشكراوە، لە كۆبوونەوەكەدا لیژنەیەكی باڵا پێكهێنراوە بە مەبەستی لێكۆڵینەوە و بەدواداچوونی ئەو یاسا دەستورییانەی پەكخراون و بەرنامەی حكومیی پشتیان پێدەبەستێت.

لە بەشێكی تری كۆبوونەوەكەدا جەختكراوەتەوە لەسەر گرنگیی و پێویستیی یەكلاكردنەوەی دۆسێی چەك لە دەرەوەی دەسەڵاتی دەوڵەت و هەموو پشتیوانییەكیش بۆ حكومەت دوپاتكراوەتە لەبارەی ئەو رێكارانەی لەو بوارەدا دەیانگرێتەبەر.

سوپای پاسدارانی ئێران رایگەیاند، لە رێگەی سیستمی بەرگریی وڵاتەکەیانەوە توانیویانە درۆنێکی ئەمریکی لە جۆری MQ-9 بخەنە خوارە، ئاماژەی بەوەشکردوە ئەمە 54 هەمین درۆنە لەو جۆرە دەیخەنە خوارەوە.

ئەمڕۆ سێشەممە، سوپای پاسدارانی ئێران لە راگەیەندراوێكدا خستنە خوارەوەی درۆنێكی ئەمریکی لە گەوری هورمز راگەیاند.

سوپای پاسداران ئاماژەی بەوەکردوە، درۆنەکە لە گەروی هورمزدا و  لە رێگەی سیستمی بەرگریی دەسکردی ئێرانەوە  تێکیانشکاندوە.

سوپای پاسداران بانگەشەی ئەوەشدەکات، ئەمە 54 هەمین درۆنی لەو جۆرەیە، کە لە سەرەتای جەنگی ئەمریکا  و ئیسرائیل بەرانبەر بە ئێران تێکیدەشکێنن.

لە نووسینگەی محەممەد شیاع سودانی، بە ئامادەبوونی عەلی زەیدی، سەرۆک وەزیرانی عیراق، چوارچێوەی هەماهەنگی لە کۆبوونەوەیەکیدا بڕیاریدا بە پێکهێنانی لێژنەیەک بۆ لێکۆڵینەوە لە سەرجەم یاسا دەستورییە پەکخراوەکان و ئەو یاسایانەی جێبەجێکردنی بەرنامەی حکومەتیان وەستاندووە.

لە کۆبوونەوەکەدا، جەخت لەسەر پرسی دابەشکردنی سەرۆکایەتی و ئەندامێتی لێژنە پەرلەمانییەکان کرایەوە لەسەر بنەمای لێهاتوویی و هاوبەشی نیشتمانی بۆ چالاککردنی رۆڵی رەقابی و تەشریعی پەرلەمان. هەروەها چوارچێوەی هەماهەنگی پابەندبوونی خۆی بە ئامانجەکانی بەرنامەی حکومەت و وەرچەرخانی رێککەوتنە سیاسییەکان بۆ هەنگاوی کرداری راگەیاند.

لە تەوەرێکی تری کۆبوونەوەکەدا، جەختی لەسەر یەکلاکردنەوەی پرسی چەکی دەرەوەی دەسەڵاتی فەرمی لە رێککەوتی 30ی حوزەیرانی 2027 کردەوە و دەسەڵاتی تەواوی بە حکومەت بەخشى بۆ گرتنەبەری هەنگاوی پێویست.

لەڕووی ئابوریشەوە، جەخت لە کۆنتڕۆڵکردنی بازاڕ، دابینکردنی بودجەی پڕۆژە خزمەتگوزارییەکان و رووبەڕووبوونەوەی هەژاری و بێکاری کرایەوە.

لە کۆتاییدا، چوارچێوەی هەماهەنگی تاوتوێی ئاڵۆزییە هەرێمییەکانی کرد و جەختی لە پاراستنی سەروەری عێراق و بەدوورگرتنی وڵات لە ئاڵۆزییەکان کردەوە.

بۆ دەربازبوون لە قەیرانی ئاستەنگەكانی گەرووی هورمز عیراق كار بۆ كاراكردنەوەی پڕۆژەی راكێشانی بۆری نەوتی بەسرە – عەقەبە دەكات.

دوای ئەوەی هەناردەی نەوتی عیراق بەهۆی ئاڵۆزییەكانی جووڵەی كەشتیوانی لە گەروی هورمز تووشی ئاستەنگ بووەتەوە، بەغداد دەیەوێت رێگەی تر بگرێتەبەر بۆ قەرەبووكردنەوەی ئەو قەیرانە، لە چوارچێوەیەشدا نزار ئامێدی سەرۆك كۆماری عیراق و شا عەبدوڵڵای دووەم پاشای ئوردن لە پەیوەندیەكی تەلەفۆنیدا جەختیان لەسەر پێویستیی بەردەوامبوون لە جێبەجێكردنی پڕۆژەی راكێشانی بۆری نەوتی عیراق لە شاری بەسرەوە بۆ بەندەری عەقەبە لە باشووری ئوردن لەسەر دەریای سوور كردەوە.

ئاماژە بەوەش كراوە، بۆری نەوتی بەسرە – عەقەبە گرنگییەكی زۆری هەیە بۆ خزمەتكردنی بەرژەوەندییەكانی هەردوو وڵات.

ئەوەش دوای ئەوە دێت، ئوردن و عیراق لە نیسانی 2012دا رێككەوتننامەیەكی چوارچێوەییان ئیمزا كرد بۆ راكێشانی بۆرییەك بە درێژایی هەزار و 700 كیلۆمەتر، كە توانای گواستنەوەی یەك ملیۆن بەرمیل نەوتی لە رۆژێكدا هەبێت.

مەسعود پزشکیان،سەرۆک کۆماری ئێران رایگەیاند،  قبوڵی ناکەن هیچ وڵاتێک بە هێز و ئامرازەکانی فشار ئیرادەی خۆی بەسەریاندا بسەپێنێت.

ئەمڕۆ دوشەممە، لە میانی دیدارێکیدا لەگەڵ سێرگی لاورۆڤ، وەزیری دەرەوەی روسیا، مەسعود پزیشیکان سەرۆک کۆماری ئێران رایگەیاند، تاران قبوڵی نییە هیچ وڵاتێک بە هێز و ئامرازەکانی فشار بیەوێت خۆی بەسەر تاراندا بسەپێنێت.

پزیشکیان، جەختیی کردەوە ئێران و روسیا خاوەنی دیدگایەکی هاوبەشن لەسەر بنەماکانی رێزگرتن و یەکتر قبوڵکردن لەسەر بنەمای هاوبەش.

سەرۆک کۆماری ئێڕان ئاماژەی بەوەکرد  بەرنامە هاوبەشەکان بە شێوازێکی جدی لە په‌یوەندیدا لەگەڵ سەرۆکی روسیا بەدواداچوونیان بۆ دەکرێت و هیواخواست لە سەفەری داهاتووی بۆ مسکۆ، زەمینەی پێویست بۆ جێبەجێکردنی پراکتیکیی رێککەوتنەکان و بەدیهێنانی ئەنجامی بەرجەستە بڕەخسێت.

پزیشکیان هیواشی خواستوە، پەرەپێدانی پەیوەندییەکان لە چوارچێوەی رێکخراوە ناوچەیی و نێودەوڵەتییەکاندا ببێتە هۆی بەهێزکردنی بەرژەوەندییە هاوبەشەکان.

لە پاریسی پایتەختی فەرەنسا، قەدەغەی هاتوچۆی لە سەعات 11ـی شەو تا شەشی بەیانی راگەیەندرا، ئەمەش لە دوای ئەوە دێت خۆپیشاندانێکی فراوانی پڕ لە توندوتیژی تەواوی وڵاتەکەی گرتوەتەوە.

ئەمڕۆ دووشەممە، ئاژانسی فرانس پرێس بڵاویکردوەتەوە، پۆلیسی پاریس، لە بەشێکی شارەکە قەدەغەی هاتوچۆی راگەیاند، ئەمەش لە کاتێکدایە کە حکومەتی ئەو وڵاتە هەوڵ دەدات رەوشەکە کۆنتڕۆڵ بکات، کە لە رۆژانی رابردوودا خۆپیشاندانێکی سەرتاسەری وڵآتەکەی گرتوەتەوە  و توندوتیژی لێکەوتوەتەوە.

بەپێی راگەیەندراوی پۆلیس، قەدەغەی هاتوچۆ لە سەعات 11ی ئەمشەوەوە دەست پێ دەکات و تا سەعات شەشی بەیانی بەردەوام دەبێت.

ئەمەش لە کاتێکدایە، بەهۆی خۆپیشاندانەکانەوە، زیاتر لە  هەزار و 200 كەس دەستگیرکراون و دەیان خۆپیشاندەر و پۆلیس بریندارن و چەندین کۆگا  ومارکیت و شوێنی بازرگانیش تاڵان کراون.

بەپێی راپۆرتی کۆمپانیای چاودێریی کەشتییە نەوتهەڵگرەکان نرخی رۆژانەی کرێی کەشتییەکان بۆ گواستنەوەی نەوت، لە نێوان 35 بۆ 50 هەزار دۆلاری پێش جەنگەوە، بۆ ئاستێکی پێوانەیی کە 1.4 ملیۆن دۆلارە بەرزبوەتەوە.

ئەمڕۆ دوشەممە، بەپێی داتاکانی کۆمپانیای تانکەر تراکەرز، کە چاودێر جوڵەی دەریای دەکات و رەوشێ ئاڵۆزی و هەستیاری گەروی هورمز نیشاندەدات، کڕێی  رۆژانەی یەک کەشتی نەوتهەڵگر لە گەروەکەدا 1.4 ملیۆن دۆلاری تێپەڕاندوە.

کۆمپانیاکە رایگەیاند، کە حکومەتی ئێران 104 کەشتی خستوەتە لیستی رەشەوە،  لە کاتێکدا ژمارەی ئەو کەشتیانەی بە گەروەکەدا تێدەپەڕن و جی پێ ئێسەکانیان دەکوژێنەوە نزیکەی چوارهێندەی ئەو ژمارەیە.

تانکەر تراکەرز، ئاماژەی بەوەکردوە،  سەرەڕای ئەم بەرزبوونەوە خەیاڵییەی نرخەکان و مەترسییەکانی پێکانی کەشتییەکان، بەڵام هێشتا کۆمپانیا و خاوەنی کەشتیی زۆر ئامادەن نەوت بگوازنەوە و هەموو رۆژێکیش کەشتی نوێ دەدۆزرێتەوە و نەوت لە گەرەکەدا دەگوازنەوە.

قوباد تاڵەبانی، جێگری سەرۆكی ئەنجومەنی وەزیرانی هەرێمی كوردستان و جۆناسان پاوڵ راوێژكاری ئاسایشی نیشتمانی بەریتانیا لە هەولێر كۆبوونەوە، هەردوولا جەختیانكردەوە لە پێكهێنانی حكومەتێكی بەهێز و یەكگرتوو لە هەرێمی كوردستان.

لە كۆبوونەوەكەدا گفتوگۆ كرا لەسەر چۆنییەتی بەردەوامیدان بە هاوكاری و هەماهەنگییەكانی نێوان هەرێمی كوردستان و بەریتانیا كرا بە تایبەت لە بوارەكانی راهێنان بە هێزەكانی پێشمەرگە و زیاتر بە دامەزراوەییكردنی هێزە ئەمنی و هەواڵگرییەكانی هەرێم.

هەردوولا هاوڕابوون لەسەر پێكهێنانی حكومەتێكی بەهێز و یەكگرتوو لە هەرێم كە رۆڵی گرنگ و دیاری هەبێت لە پاراستنی ئاسایش و سەقامگیری عیراق و ناوچەكە.

لە بەشێكی تری كۆبوونەوەكەدا، پرسی كۆچ خرایە بەرباس و هەردوولا جەختیانكردەوە لە بەردەوامیدان بە هەماهەنگییەكان و كاری هاوبەش بۆ رێگریكردن لە كۆچی نایاسایی گەنجان.

بەڕێوەبەرایەتی پۆلیسی گەرمیان رایگەیاند، تۆمەتبارێکیان دەستگیرکردوە، کە دەستڕێژی تەقەی لە ئۆتۆمبێلی بەڕێوەبەری پۆلسی دارستانی خانەقین کردوە و زیاتر لە 30 گولـلە بەر ئۆتۆمبێلەکە کەوتوە.

پۆلیسی گەرمیان رایگەیاند، ئێوارەی ئەمڕۆ دووشەممە، لە ئەنجامی ئۆپەراسیۆنێکی هاوبەشی هەریەکە لە بەڕێوەبەرایەتیی پۆلیسی گەرمیان و بەڕێوەبەرایەتیی ئاسایشی گەرمیان، تۆمەتبارێک بە فەرمانی دادوەر دەستگیر کرا.

ئاماژەبەوەکراوە، دەستگیرکردنی ئەم تۆمەتبارە پەیوەندی بە روداوێکی پێشووی تەقەکردنەوە هەیە، کە تیایدا ناوبراو دەستڕێژی گولەی لە ئۆتۆمبێلی نەقیب (هاوڕێ جەلیل قادر)، بەڕێوەبەری بەشی پۆلیسی دارستانی خانەقین کردبوو؛ بە جۆرێک، نزیکەی (30) گولـلە بەر ئۆتۆمبێلەکە کەوتووە.

پۆلیسی گەرمیان دەڵێت؛ لە ئێستادا، تۆمەتبارەکە بە بڕیاری دادوەر و بەپێی ماددەی (430) لە یاسای سزادانی عیراقی دەستگیر کراوە، هاوکات لێکۆڵینەوە لە وردەکاری و هۆکارەکانی روداوەکە لەلایەن هێزە ئەمنییەکانەوە بەردەوامە.

بنیامین ناتانیاهۆ، سەرۆک وەزیرانی ئیسرائیل رایگەیاند، دەبێت بە یەکجاری و بۆ هەمیشە دەسەڵاتی ئێستای ئێران بڕۆخێنن و ئەو فەرمانەی بە هەمو دەزگا ئەمنییەکانی وڵاتەکەی داوە

میدیاکانی ئیسرائیل بڵاویانکردوەتەوە بنیامین ناتانیاهۆ، سەرۆک وەزیرانی ئیسرائیل رایگەیاندوە، وڵاتەکەی ئامادەیە بۆ هێرشی پێشوەختە بۆ سەر ئێران، تەنانەت بەبێ پشتیوانی ئەمریکا.

رۆژنامەی ئیسرائیل هیۆم بڵاویکردوەتەوە،  ناتانیاهۆ  روخاندنی کۆماری ئیسلامی بە یەکێک لە ئامانجە سەرەکییەکانی دەزانێت.

ئاماژەی بەوەشکردوە،  بڕیارەکانی ئیسرائیل بۆ روبەڕوبونەوەی هەڕەشەکانی ئێران بەندە بە رەزامەندی واشنتۆن، بەڵام ئەگەر پێویست بکات وڵاتەکە سەربەخۆ مامەڵە دەکات.

رۆژنامە ئیسرائیلییەکە ئەوەشیخستوەتەڕوو، ناتانیاهۆ  ئێرانێکی چەکداری ئەتۆمی وەک گەورەترین هەڕەشەی ئەمنیی  بۆسەر وڵاتەکەی دەستنیشان کردوە.

لە راگەیەندراوێکدا، وەزارەتی کارەبای حکومەتی هەرێمی کوردستان دەڵێت خۆشحاڵە بە سەرکەوتنی هەڵمەتی داشکاندنی قەرزی پێش روناکی، کە تێیدا لێخۆشبوون بۆ زیاتر لە 400 ملیار دینار کراوە.

وەزارەتی کارەبای هەرێم رایگەیاند، زیاتر لە 400 ملیار دینار گەڕاوەتەوە بۆ هاووڵاتیان  و کۆی گشتیی هاوبەشانی سوودمەند گەیشتووەتە 951,098 هاوبەش، کە بە   بڕی 403.13 ملیار دینار لێخۆشبوونیان بۆ کراوە.

وەزارەتی کارەبا دەشڵێت؛  بەهۆی بڕیاری لێخۆشبونەکەوە، زیاتر لە 500 ملیار دینار  لە ماوەی سێ مانگدا (ئاب، ئەیلوول و تشرینی یەکەم) کۆکراوەتەوە و  لە ئێستادا زیاتر لە 70٪ی هەموو هاوبەشانی کارەبا لەسەرانسەری هەرێم هیچ قەرزێکی پێش روناکیان لەسەر نەماوە.

ئاماژەی بەوەشکرد، ئەو کەسانەش، کە قەرزیان ماوە بەشێوەی ئۆتۆماتیکی دەکرێنە قیستی درێژخایەن.

لە میانی سەردانەکەی بۆ تاران، وەزیری دەرەوەی روسیا رایگەیاند، ئەوان  داوای پێکهێنانی سیستمێکی جیهانی دادپەروەرانە دەکەن کە لەسەر بنەمای میساقی نەتەوە یەکگرتووەکان بێت.

لە دوای کۆبونەوەی لەگەڵ عەباس عراقچی رایگەیاند، لەگەڵ هاوتا ئێرانیەکەی سەبارەت بە ئاسایشی ناوچەکە بیروڕای ئاڵوگۆڕکردوە و پێێ وایە گرنگە، رەوشی گەروی هورمز بگەڕێتەوە بۆ پێش جەنگ.

لاڤرۆڤ ئاماژەی بەوەشکرد، کۆبونەوەیەکی بەرهەمداریان ئەنجامداوە و هاوکارییەکانیان لەگەڵ ئێران لە پەرەسەندندایە.

وەزیری دەرەوەی روسیا جەختیشیکردەوە، مۆسکۆ پابەندە بە رێککەوتنی هاوکاری ستراتیژی لەگەڵ ئێران و سازش لەسەر پابەندبوونیان بە رێککەوتنی ستراتیجی لەگەڵ تاران ناکەن.

لەبارەی بۆچونی روسیا و ئێران لەسەر پرسی ناوچەکەش، لاڤرۆڤ رایگەیاند بۆچونەکانیان لەسەر پرسە ناوچەییەکان نزیکە، هەردولا جەختیان لەسەر پرسی پتەوکردنی ئاسایش لە لوبنان کردوە  و رەوشی غەزەیان تاوتوێکردوە

لای خۆشیەوە عەباس عیراقچی رایگەیاند، نائەمنی لە گەروی هورمز دەرئەنجامی راستەوخۆی دەستدرێژییەکانی ئەمریکا و ئیسرائیلە و لەگەڵ لاڤرۆڤ باسی لە پێشهاتەکانی یەمەن، لوبنان، فەلەستین و ئەفغانستان کردوە.

حسین موحیبی، وتەبێژی سوپای پاسداران هۆشداریدا و رایگەیاند، ئەگەر ناوچەکە بۆ ئێران پارێزراو نەبێت، ئەوا هیچ ئاسایشێک لە ناوچەکەدا بونی نابێت.

ئەمڕۆ دووشەممە، لە چاوپێکەوتنێکیدا لەگەڵ میدیای وڵاتەکەی، حسین موحیبی، وتەبێژی سوپای پاسداران رایگەیاند لە جەنگەکانیاندا لەگەڵ ئەمریکا  وئیسرائیل بە وریایەوە چەکەکانیان بەکارهێناوە.

ناوبراو ئاماژەی بەوەکرد، ئەوان بە گوێرەی رەوشەکە چەکەکانیان بەکاردەهێنن و بانگەشيی ئەوەی کردوە لە ئەگەری هێرشی ئەمرکا بۆسەر وڵاتەکەی بە چەکی نوێ روبەڕوی واشنتۆن دەبنەوە و  وەڵامیان توندتر دەبێت لە رابردوو.

جەختیشیکردەوە لە ئەگەری دەستپێکردنەوەی جەنگدا، ئەمریکا توشی کێشەیەکی گەورە دەبێت و جیهان بە تەواوەتی روبەڕوی قەیرانی وزە دەبێتەوە.

هەروەها هۆشداریشیداوەتە وڵاتانی ناوچەکە، کە  ئاسایشی ئێران پەیوەستە بە ئاسایشی ناوچەکەوە و بێبونی ئاسایشی ئێران ناوچەکە پارێزراو نابێت.