خاتوو شاناز ئیبراهیم ئەحمەد پەیامێکی هاوخەمی بۆ کۆچی دوایی محەمەد عەلی عەبدوڵا بڵاوکردەوە.

دەقی پەیامەکەی خاتوو شاناز ئیبراهیم ئەحمەد:

بەبیستنی هەواڵی ماڵئاوایی یەکجارەکی کاک (محەمەد عەلی)، زۆر غەمباربووم.

پرسەو سەرەخۆشی لە دکتۆر شێرکۆ و خێزان و کەسوکارەکەی ئەکەم و هاوبەشی خەم و پەژارەیانم.

خواى گەورە لەکۆچکردوو خۆش بێت و جێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.

لە دوای نیگەرانییەكانی ئیسرائیل لە ئەگەری رێككەوتنی نێوان ئەمریكا و ئێران، ترەمپ دڵنیایی داوەتە سەرۆك وەزیرانی ئیسرائیل.

سەرچاوەیەكی ئاگادار بە كەناڵی 12ی ئیسرائیلی راگەیاندووە، بنیامین ناتانیاهۆ، سەرۆك وەزیرانی ئیسرائیل، لە میانی پەیوەندییەكی تەلەفۆنیدا لەگەڵ دۆناڵد ترەمپ، جەختی لەوە كردووەتەوە كە ئیسرائیل مافی هێرشكردن بۆ سەر هەموو گۆڕەپانەكان لەنێویشیاندا لوبنان، بۆ خۆی دەهێڵێتەوە.

هەروەها هۆشداری داوەتە ترەمپ لە دواخستنی بڕیارنامەیەك سەبارەت بە پرسی ئەتۆمی ئێران.

جەختی لەوەش كردووەتەوە كە تاران دانوستانەكان دەقۆزێتەوە بۆ كڕینی كات و دواخستنی بڕیارنامەیەك سەبارەت بە بەرنامە ئەتۆمییەكەی.

لە بەرانبەردا دۆناڵد ترەمپ پاڵپشتی خۆی بۆ ئەو خواستەی ئیسرائیل دوپاتكردووەتەوە، هەروەها رونكردنەوەی داوە لەسەر ئەوەی كە پابەند دەبێت بە داواكارییە نەگۆڕەكانی خۆی لە هەر رێككەوتنێك لەگەڵ ئێران، بەتایبەت هەڵوەشاندنەوەی تەواوی بەرنامەی ئەتۆمیی ئێران و دەركردنی سەرجەم یۆرانیۆمی پیتێندراو لە خاكی ئێراندا.

 

دەزگای دژەتیرۆری عیراق، ئەمڕۆ یەکشەممە، رایگەیاند کە سێ سەرباز کوژراون و چواری تریش بریندار بوون، بەهۆی تەقینەوەی بۆمبێکی چێندراوی پاشماوەکانی چەکدارانی تێرۆریستی داعش لە پارێزگای نەینەوا.

لە راگەیەندراوێکی دەزگاکەدا هاتووە: لە چوارچێوەی هەڵمەتە مەیدانییەکانی پشکنین کە پاڵەوانانی دەزگای دژەتیرۆر لە پارێزگا جیاجیاکانی عیراقدا ئەنجامی دەدەن، گروپێک لە مەفرەزە ئەمنییەکانمان روبەڕووی تەقینەوەی بۆمبێکی چێندراو بوونەوە کە لە پاشماوەکانی چەکدارانی تێرۆریستی داعش بوو، لە بیابانی حەزەر لە باشووری رۆژئاوای پارێزگای نەینەوا.

تێیدا ئاماژە بەوەش کراوە: روداوەکە بووە هۆی کوژرانی سێ شەڕکەر و برینداربوونی چوار کەسی تر لە پاڵەوانانی دەزگاکەمان.

راگەیەندراوەکە جەختیشی کردووەتەوە: پاڵەوانانی دەزگای دژەتیرۆر بەردەوام دەبن لە راپەڕاندنی ئەرکە نیشتمانییەکانیان بە هەموو ئازایەتی و پێداگرییەکەوە، جەختیشی کردەوە لەوەی کە: خوێنی پاکی شەهیدان دەبێتە پاڵنەرێک بۆمان بۆ بەردەوامبوون لە راوەدووڕانی پاشماوەکانی تێرۆر و پاراستنی ئاسایش و سەقامگیریی عیراق.

ئەمڕۆ یەکشەممە لە بارەگای مەکتەبی سیاسی لەشاری سلێمانی، وەفدێکی باڵای یەکێتیی نیشتمانیی کوردستان بە سەرۆکایەتیی دەرباز کۆسرەت رەسوڵ، پێشوازیکرد لە وەفدێکی باڵای کۆمەڵی دادگەریی کوردستان بەسەرپەرشتی محمەد حەکیم، ئەندامی ئەنجوومەنی سیاسیی کۆمەڵی دادگەری.

لە کۆبوونەوەکەدا، هەردوولا بەوردی گفتوگۆیان لەبارەی دوایین پێشهاتە سیاسییەکانی هەرێمی کوردستان و عیراق و دیدگا و بەرنامەی سیاسیی بۆ  حکومەتی نوێی پێکهێنراوی عیراق کرد.

لەکۆبوونەوەکەدا یەکێتیی نیشتمانیی کوردستان و کۆمەڵی دادگەریی جەختیان لە لێک نزیکبوونەوەی زیاتری لایەنە سیاسییەکان و یەکڕیزیی نیشتمانی و بەرپرسیارێتیی هەموو لایەنەکانە بۆ خزمەتکردنی باشتر بە کۆمەڵانی خەڵکی کوردستان کردەوە .

لە بەشێکی تری گفتوگۆکاندا، پرسی عیراق و پەیوەندییەکانی نێوان هەرێم و بەغداد تەوەرێکی گرنگی کۆبوونەوەکە بوو، تیشک خرایە سەر گرنگیی هەماهەنگی نێوان هێزە کوردستانییەکان بۆ پاراستنی مافە دەستورییەکان، تا لەڕێگەی دیدگایەکی هاوبەش و یەک دەنگییەوە لەبەغداد، داکۆکی لە شایستە دارایی و سیاسییەکانی گەلی کورد بکرێت.

ئایشەگوڵ دۆغان وتەبێژی دەم پارتی رایدەگەیەنێت، ئەمڕۆ وەفدی ئیمراڵیی دەم پارتی دیدار لەگەڵ عەبدوڵا ئۆجەلان ئەنجام دەدەن.

ئایشەگوڵ دۆغان دووپاتی كردەوە، لەگەڵ نزیكبوونەوەی جەژنی قورباندا، تێدەكۆشن تاوەكو ئەم جەژنە بكەن بە جەژنێكی ئاشتییانەو ئەمڕۆ كۆبوونەوە لەگەڵ ئۆجەلان ئەنجام دەدەن.

لای خۆیەوە سەزای تەمەلی جێگری سەرۆكی فراكسیۆنی دەم پارتی رایگەیاند، ئەمڕۆ وەفدی ئیمراڵی دەچنە دوورگەی ئیمراڵی كە لە پەروین بوڵدان و مەدحەت سەنجەر و فایەق ئۆزگور ئەرۆڵ پێكدێت.

دوایین جار، وەفدەكە لە 27ی ئادار دیداریان لەگەڵ عەبدوڵا ئۆجەلان ئەنجامداوە.

 

ناوچەی کیێڤ و دەوروبەری رووبەڕووی هێرشێکی بەرفراوانی موشەکی و فڕۆکەی بێفڕۆکەوان بوونەوە کە تیایدا نوێترین تەکنەلۆژیای سەربازیی روسیا بەکارهێنرا.

ڤۆلۆدیمێر زیلینسکی، سەرۆکی ئۆکراین رایگەیاند، سوپای روسیا لە درەنگانی شەوی رابردوو هێرشێکی بەرفراوانی بۆ سەر ناوچەی کیێڤ ئەنجامداوە و بە موشەکی بالیستیی لە جۆری "ئۆریشینک" شاری "بیلا تسیرکڤا"ی کردووەتە ئامانج.

بەپێی زانیارییەکانی سەرۆکایەتیی ئۆکراین، هێرشەکە جگە لەو موشەکە، نزیکەی 600 فڕۆکەی بێفڕۆکەوان و 90 موشەکی تریشی لەخۆگرتووە.

جێگەی ئاماژەیە، بەهۆی ئەو هێرشانەوە، 83 کەس برینداربوون و چوار کەسیش گیانیان لەدەستداوە.

ئەمە سێیەم جارە روسیا ئەم جۆرە موشەکە پێشکەوتووە بەکاردەهێنێت کە توانای هەڵگرتنی کڵاوەی ئەتۆمی و ئاسایی هەیە، لێپرسراوانی ئۆکراین هێشتا بە وردی ئاشکرایان نەکردووە کە ئامانجی سەرەکیی ئەم بۆردوومانە چی بووە.

لەو بارەیەوە، وتەبێژی هێزی ئاسمانیی ئۆکراین پشتڕاستی کردەوە کە مۆسکۆ موشەکێکی بالیستیی خێراتر لە دەنگی (هایپەرسۆنیک)ی "ئۆریشینک"ی لە بۆردوومانەکەدا بەکارهێناوە، ئەمەش وەک پەرەسەندنێکی نوێ لە شەڕەکەدا دەبینرێت کە بەرەبەیانی ئەمڕۆ یەکشەممە پایتەختی ئۆکراین و ناوچەکانی دەوروبەری هەژاند.

بەپێی زانیاریەکانی پەیامنێری کوردسات نیوز، چاوەڕوان دەکرێت ئەمڕۆ یان سبەینێ موچەی مانگی پێنج بۆ هەرێم بنێردرێت.

بێستون سەلام پەیامنێری کوردسات نیوز لە بەغداد رایگەیاند: چاوەڕوان دەکرێت پێش جەژن موچەی مانگی پێنج بۆ هەرێم بنێردرێت، رێکارەکانی ناردنی موچە گیراوەتەبەر و وەزیری دارایی عیراق رایگەیاندووە کە موچە بۆ هەرێم دەنێرن.

سەبارەت بە داهاتی نانەوتیی هەرێم، پەیامنێری کوردسات نیوز رایگەیاند: حکومەتی هەرێم بەڵێنی داوە کە داهاتی نانەوتی دوای مانگی پێنج بنێرێت چونکە هێشتا مانگ کۆتایینەهاتووە و نازانرێت داهاتەکە چەند دەبێت.

سەرۆک وەزیرانی بەریتانیا، کیەر ستارمر، ئەمڕۆ یەکشەممە، رایگەیاند کە حکومەتەکەی لە نزیکەوە لەگەڵ هاوبەشە نێودەوڵەتییەکانیدا کاردەکات بۆ قۆستنەوەی دەرفەتی ئێستا و گەیشتن بە رێککەوتنێکی سیاسی درێژخایەن بۆ قەیرانی ئێران.

ستارمر جەختی لەوە کردەوە کە کۆمەڵگەی نێودەوڵەتی پێویستییەکی بەپەلەی بە رێککەوتنێکی یەکلاکەرەوە هەیە بۆ کۆتایهێنان بە ململانێ سەربازییەکان، بە شێوەیەک کە کردنەوەی گەروی ستراتیژیی هورمز مسۆگەر بکات، لەگەڵ دەستەبەرکردنی ئازادیی کەشتیوانیی دەریایی و بازرگانیی جیهانی تێیدا، بێ هیچ کۆتوبەند و مەرجێک.

لەسەر ئاستی ئەمنیش، سەرۆک وەزیرانی بەریتانیا هەڵوێستی رژدی و توندی وڵاتەکەی بەرانبەر بە تەماحە سەربازییەکانی تاران دووپاتکردەوە و رایگەیاند، زۆر پێویستە کە بە هیچ شێوەیەک رێگە بە ئێران نەدرێت چەکی ئەتۆمی گەشە پێبدات یان ببێتە خاوەنی، ئەمەش لە پێناو مسۆگەرکردنی سەقامگیریی ناوچەکەدا.

هەوڵە نێودەوڵەتییەکان بۆ کۆتاییهێنان بە ئاڵۆزییەکانی گەروی هورمز پێشکەوتنی بەرچاویان بەدەستهێناوە و چاوەڕوان دەکرێت گۆڕانکاری نوێ بێتە ئاراوە.

مارکۆ رۆبیۆ، وەزیری دەرەوەی ئەمریکا رایگەیاند، لە ماوەی 48 سەعاتی رابردوودا پێشکەوتنی بەرچاو لەسەر ئەو هێڵە گشتییانە بەدیهاتووە کە دەکرێت قەیرانی گەروی هورمز چارەسەر بکات، ئاماژەشی بەوە کرد کە ئەگەری هەیە ئەمڕۆ یەکشەممە هەواڵی "باش" لەوبارەیەوە رابگەیەندرێت.

رۆبیۆ لە لێدوانێکیدا بۆ رۆژنامەنووسان وتی: "پێموایە ئەمڕۆ زانیاری زیاتر لەبارەی دۆخی ئێرانەوە بڵاودەکرێتەوە و لە چەند سەعاتی داهاتوودا ئەگەری بیستنی هەواڵی خۆش سەبارەت بە گەروی هورمز هەیە".

وەزیری دەرەوەی ئەمریکا جەختی لەسەر هەڵوێستی وڵاتەکەی کردەوە و رایگەیاند، واشنتن بە هیچ شێوەیەک رێگە نادات ئێران کۆنترۆڵی گەروی هورمز بکات، هەروەها دووپاتیکردەوە کە ئەمریکا رێگە نادات ئێران دەستی بە چەکی ئەتۆمی بگات و لە ئێستادا گفتوگۆی تەکنیکی لەسەر بەرنامە ئەتۆمییەکەی تاران بەڕێوەدەچێت.

سەبارەت بە رەوشی ناوخۆی ئێران، رۆبیۆ ئاماژەی بەوەکرد،  ئابوریی ئێران بەتەواوی داڕماوە، بەڵام بە وتەی ئەو، تاران سەرچاوە داراییەکانی بۆ گەشەپێدانی ئابوری بەکارناهێنێت، بەڵکو تەرخانی دەکات بۆ "تیرۆر" لە جیهاندا و بە گەورەترین وڵاتی سپۆنسەری تیرۆری ناوبرد.

لە بەشێکی تری قسەکانیدا، وەزیری دەرەوەی ئەمریکا هەڕەشەی توندی ئاراستەی توانا سەربازییەکانی ئێران کرد و ئەوەی خستەروو: "توانای ئێران بۆ دروستکردنی موشەکی نوێ لەناو دەبەین، هەروەها توانای موشەکی و دەریایی ئێران لەناو دەبەین". رۆبیۆ لە لێدوانەکەیدا جەختیشی کردەوە کە لە ئێستادا "هێزی دەریایی ئێران لە بنی دەریاکاندایە".

بەهۆی کاریگەری بارستە هەوایەکی جیاواز لەسەر ناوچەکە، لە 48 سەعاتی داهاتوودا کەشناسی هەرێم پێشبینی بارانبارین و بەرزبوونەوەی تۆز و خۆڵ لە چەند ناوچەیەکی جیاواز دەکات.

بەڕێوەبەرایەتی گشتی کەشناسی هەرێم رایگەیاند، پێشبینی دەکرێت ئەمڕۆ لە ناوچە سنورییەکانی پارێزگای دهۆک، ئیدارەی زاخۆ، ئیدارەی سۆران و ئیدارەی راپەڕین، بارانبارین و هەورەبرووسکە روبدات.

هاوکات بەهۆی زیادبوونی خێرایی با بۆ سەرووی 25 کیلۆمەتر لە سەعاتێکدا، ئەگەری بەرزبوونەوەی خۆڵبارین لە ناوچە دەشتاییەکانی باشووری پارێزگای هەولێر، بەشێک لە ئیدارەی گەرمیان و پارێزگای کەرکووک هەیە.

سەبارەت بە کەشوهەوای سبەینێ دووشەممە، کەشناسی پێشبینی دەکات ئاسمان ساماڵ و پەڵەهەور بێت و لە ناوچە شاخاوییەکانیشدا نیمچە هەور دەبێت، هەروەها بەهۆی هاتنی بارستە هەوایەکی فێنک بۆ ناوچەکە، پلەکانی گەرما لە سەرانسەری هەرێم دوو بۆ چوار پلەی سیلیزی نزم دەبنەوە.

واشنتۆن و تاران بە نێوەندگیری پاكستان و قەتەر لە ئیمزاكردنی یاداشتێكی 14 بەندی بۆ راگرتنی جەنگ نزیكبوونەتەوە و پێشبینی دەكرێت لە سەعاتەكانی داهاتوودا رێككەوتنەكە رابگەیەنرێت.

بەپێی راپۆرتەكان، یاداشتێكی لێكتێگەیشتنی14 خاڵی بۆ رێككەوتن ئامادەكراوە بە ئامانجی كۆتاییهێنان بە جەنگ بۆ ماوەی 30 تا 60 رۆژ.

بەپێی سەرچاوە ئاگادارەكان، گرنگترین خاڵەكان بریتین لە كشانەوەی هێزەكانی ئەمریكا لە ناوچەی جەنگ و كەمكردنەوەی گەمارۆكانی سەر بەندەرەكانی ئێران و ئازادكردنی پارە بلۆككراوەكانی تاران لە دەرەوە، لەگەڵ كردنەوەی قۆناغ بە قۆناغی گەروی هورمز، هەروەها پابەندبوون بە گفتوگۆكان لەسەر پرسی یۆرانیۆمی پیتێنراو، بەڵام پرسی ئەتۆمی بەهۆی ئاڵۆزییەكەیەوە بۆ دوای 30 رۆژ لە جێبەجێكردنی رێككەوتنەكە دواخراوە.

ماركۆ رۆبیۆ وەزیری دەرەوەی ئەمریكا رایگەیاندووە، پێشبینی دەكرێت لە 24 بۆ 48 سەعاتی داهاتوودا بڕیاری كۆتایی بدرێت، ترەمپیش ئاشكرای كرد كە رەشنووسەكەی پێگەیشتووە.

پاكستان پیرۆزبایی لە ترەمپ دەكات و ئامادەكاری بۆ میوانداریكردنی گفتوگۆكانی ئاشتی دەكات.

شەهباز شەریف، سەرۆك وەزیرانی پاكستان، بە رەسمی پیرۆزبایی لە دۆناڵد ترەمپ، سەرۆكی ئەمریكا كرد بەبۆنەی هەوڵە ناوازەكانی لە پێناو چەسپاندنی ئاشتیدا.

ئەم هەنگاوە دوای زنجیرەیەك پەیوەندی چڕوپڕ دێت كە ئامانج لێیان گەیشتنە بە رێككەوتنێك بۆ كۆتاییهێنان بە گرژی و جەنگی نێوان ئەمریكا و ئێران.

شەهباز شەریف ئاماژەی بەوەكرد، ئەو پەیوەندییە تەلەفۆنیانەی ترەمپ لەگەڵ سەركردەكانی عیراق، ئیمارات، سعودیە، قەتەر، توركیا، میسر، ئوردن و پاكستان ئەنجامی داون، زۆر بەپیت و بەرهەمدار بوون.

خاتوو شاناز ئیبراهیم ئەحەمەد پەیامێکی سەرەخۆشی ئاڕاستەی د. جوان ئیحسان بەبۆنەی کۆچی دوایی براکەی محەمەد ئیحسان کرد و دەڵێت: بەبیستنی هەواڵی ماڵئاوایی یەکجارەکی کاک محەمەد، زۆر غەمباربووم. 

دەقی پەیامەکە: 

بەبیستنی هەواڵی ماڵئاوایی یەکجارەکی کاک (محەمەد)، زۆر غەمباربووم. 

پرسەو سەرەخۆشی لە دکتۆرە جوان و خێزان و کەسوکارەکەی ئەکەم و هاوبەشی خەم و پەژارەیانم.

خواى گەورە لەکۆچکردوو خۆش بێت و جێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.

شاناز ئیبراهیم ئەحمەد

سەرۆكی پەرلەمانی ئێران رایگەیاند، وڵاتەكەی دەستبەرداری مافە رەواكانی نابێت، بەتایبەت لەگەڵ لایەنێك كە هیچ راستگۆیی و متمانەیەكی تێدا نییە.

لەكاتی پێشوازیكردنی لە عاسم مونیر، فەرماندەی سوپای پاكستان لە تاران، محەمەد باقر قالیباف، سەرۆكی پەرلەمانی ئێران ئاماژەی بەوەكرد، ئێران وەك چۆن بە ئازایەتییەوە لە مەیدانی جەنگدا بەرگریی لە بوونی خۆی كردووە، لە كایەی دبلۆماسیشدا بە ژیرییەوە كار بۆ بەدەستهێنانی مافەكان و دابینكردنی بەرژەوەندییە نیشتمانییەكان دەكات.

رونیشیكردەوە، لە كاتی دانوستاندا ئەمریكا جەنگی هەڵگیرساند و دواتر بە گەمارۆی دەریایی پێشێلی ئاگربرەستی كرد كە پاكستان ناوبژیوان بوو تێیدا.

سەرۆكی پەرلەمانی ئێران هۆشداریشیدا، كە هێزە چەكدارەكانی ئێران خۆیان ئامادەكردووەتەوە و ئەگەر ترەمپ سەركێشی بكات و جەنگ دەستپێبكاتەوە، وەڵامی ئێران زۆر توندتر دەبێت.

لەلایەن خۆیەوە، عاسم مونیر جەختی "لە پەیوەندییە بەهێزەكانی نێوان هەردوو وڵات كردەوە و پێزانینی خۆی بۆ ژیری و دیدگای سەركردایەتی ئێران لەم قۆناغەدا دەربڕی".

سوپاسالاری پاكستان لە تاران لەگەڵ پزیشكیان و قالباف كۆبووەوە و نامەی هەڕەشەی ئەمریكای بۆ دەستپێكردنەوەی جەنگی رادەستكردن.

ئاژانسی تەسنیمی ئێرانی بڵاویكردەوە، عاسم مونیر سوپاسالاری پاكستان لە تاران لەگەڵ مەسعود پزیشكیان سەرۆكی كۆمار و محەمەد باقر قالیباف سەرۆكی پەرلەمانی ئێران كۆبووەتەوە و رەوشی ناوچەكە و ئاگربەست و دانوستانیان لەگەڵ ئەمریكا تاوتوێكردووە.

ئاماژە بەوەشكراوە، بڕیارە پاكستان وەفدێكی تەكنیكی و یاسایی رەوانەی تاران كردووە بۆئەوەی یاوەری عاسم مونیر بكات بە مەستی گفتوگۆی زیاتر لەگەڵ لێپرسراوانی ئێران.

بەپێی راپۆرتە رۆژنامەوانییەكانیش باس لەوە دەكەن، عاسم مونیر نامەی هەڕەشەئامێزی ئەمریكای رادەستی دەسەڵاتدارانی تاران كردووە و كە تیایدا چارەسەركردنی كێشانی خستوەتەڕوو بە مەبەستی گەیشتن بە رێككەوتن و كۆتایی هێنان جەنگ.

وەفدێكی قەتەریش بە هەماهەنگی لەگەڵ ئەمریكا لە ئێرانە بۆئەوەی وەك نێوەندگیر لە نێوان تاران و واشنتۆن كار بكات بە مەبەستی كۆتایی هێنان بە شەڕ.

نوسینگەی سەرۆك وەزیرانی پاكستانیش بڵاویكردەوە، شەهباز شەریف سەرۆك وەزیرانی ئەو وڵاتە بەرەو چین بەڕێكەتووە لە چوارچێوەی هەوڵە دیبلۆماسییەكان بۆ كۆتاییهێنان بە جەنگی نێوان ئێران و ئەمریكا.

لە درێژەی هەوڵە نێودەوڵەتییەکان بۆ کۆنتڕۆڵکردنی ئاڵۆزییەکان لە ناوچەکە، شێخ تەمیم بن حەمەد ئال سانی میری قەتەر، لەگەڵ دۆناڵد ترەمپ، سەرۆکی ئەمریکا پەیوەندییەکی تەلەفۆنی ئەنجامدا و تێیدا تاوتوێی پشتیوانیکردن لە هەوڵە دیپلۆماسییەکانی پاکستان بۆ ئاشتییان کرد.

بەپێی راگەیەنراوێکی  دیوانی ئەمیری قەتەر، لەو پەیوەندییە تەلەفۆنییەدا، میری قەتەر و سەرۆکی ئەمریکا باسیان لە گرنگیی بەهێزکردنی ئەو هەوڵانە کرد کە پاکستان بۆ هێورکردنەوەی رەوشەکە و خاوکردنەوەی گرژییەکان دەستی پێکردووە.

لە راگەیەنراوەکەدا ئەوەش هاتووە، گفتوگۆکان تەوەرێکی گرنگیان بۆ پاراستنی ئاسایشی هاتوچۆی دەریایی و رێڕەوە ستراتیژییەکان تەرخان کرد، بەتایبەت بۆ مسۆگەرکردنی بەردەوامیی دابینکردنی وزە بۆ بازاڕەکانی جیهان.

ئاماژەی بەوەشکرد، میری قەتەر جەختی لە هەڵوێستی جێگیری قەتەر کردەوە کە بریتییە لە پێشخستنی چارەسەری ئاشتییانە و پشتیوانیکردن لە هەر دەسپێشخەرییەک کە ئامانج لێی کۆتاییهێنان بە قەیرانەکە بێت لە ڕێگەی گفتوگۆوە.

ئەم جوڵە دیپلۆماسییەی قەتەر لە کاتێکدایە کە ناوچەکە بە رەوشێکی هەستیاردا تێپەڕ دەبێت و هەموو لایەک چاویان لەوەیە ئایا هەوڵەکانی نێوەندگیری دەتوانن رێگری لە پەرەسەندنی زیاتری ململانێ سەربازییەکان بکەن یان نا.