هەواڵەکان
دوای هێرشی حوسییەكان بۆ سەر فرۆكەخانەی دەمام و كێڵگە نەوتییەكان، ئەمریكا فەرمان بەكشانەوەی بەشێك لە دیپلۆماتكار و خێزانەكانیان لە سعودیە دەكات.
تۆمی پیجوت وتەبێژی وەزارەتی دەرەوەی ئەمریكا رایگەیاند، واشنتۆن فەرمانی كردووە بە كشانەوەی كارمەندە نا سەرەكییەكان و خێزانی دیپلۆماتكارانی ئەمریكی لە سعودیە
وتیشی: ئەمریكا پلانی هەیە خێزانی كارمەندەكانی لەچەند باڵیۆزخانەیەكی تری وڵاتانی رۆژهەڵاتی ناوەراست بكشێنێتەوە.
ئەو هەنگاوەی ئەمریكا دوای ئەوەدێت لەئەنجامی دوو هێرش حوسییەكان بۆ سەر فڕۆكەخانەی دەمام و كێڵگەیەكی نەوتی، چوار كەس كوژران و 10 كەسیش برینداربوون.
وەزارەتی دەرەوەی ئەمریكا رایگەیاند، پێویستە سەرۆك وەزیرانی عیراق ئەو بەڵێنانەی بە سەرۆكی ئەمریكای داوە جێبەجێی بكات.
وتەبێژی وەزارەتی دەرەوەی ئەمریكا، لە كۆنفرانسێكدا جەختیكردەوە، واشنتۆن چاوەڕوان دەكات عەلی زەیدی سەرۆك وەزیرانی عیراق، پابەندی ئەو بەڵێنە بێت كە لە سەردانەكەیدا بۆ واشنتۆن بە ی سەرۆكی ئەمریكای دابوو، كە ئەوانیش بەرەنگاربوونەوەی تیرۆر، رێگریكردن لە ئەنجامدانی هەر هێرشێك لە ناو خاكی عیراق، و بنیادنانی هاوبەشییەكی ئەمریكی - عیراقی كە خزمەتی بەرژەوەندیی هەردوو وڵات بكات.
وتیشی، ئامانجەكانی واشنتۆن نەگۆڕە لە عیراق، ئەویش بریتییە لە عیراقێكی خاوەن سەروەری، ئارام و گەشەكردوو كە پێداویستییەكانی گەلەكەی دابین بكات و بەشداری لە بەهێزكردنی سەقامگیریی ناوچەكەدا بكات.
هاوكات وتەبێژی وەزارەتی دەرەوەی ئەمریكا ئێرانی بەوە تۆمەتبار كرد، گروپە چەكدارەكان بۆ تاڵانكردنی سامانەكانی عیراق و هەڕەشەكردن لە سەروەرییەكەی بەكاردەهێنێت.
حكومەتی عیراق بوونی هەر بنكە و بارەگایەكی حوسییەكان لەناو خاكی وڵاتەكەی رەتدەكاتەوە و جەخت لەوەدەكاتەوە، بوونی چەكدارانی بیانی پێچەوانەی دەستوورە.
حەیدەر عەبودی وتەبێژی حكومەتی عیراق رایگەیاند: هیچ بنكەیەكی حوسیەكان لەسەر خاكی عیراقدا نییە و ئەوانەی باسی دەكەن، هیچ بەڵگەیەكیان نییە و تەنها پشت بە گێڕانەوەكانی تۆڕە كۆمەڵایەتییەكان دەبەستن.
دووپاتیشی كردەوە، عیراق نابێتە شوێنی هێرشكردنە سەر وڵاتانی دروسێ و هیچ گروپێكی چەكدار یش لەخۆ ناگرێت كە بەشداری لە ململانێكاندا بكات.
حەیدەر عەبودی جەختی لەوەشكردەوە، بوونی هەر گروپێكی چەكدار لەناو خاكی عیراقدا پێچەوانەی دەستوورە و حكومەت رێگە بەوە نادات.
شوێنەوارناسانی زانکۆی بوو عەلی سینای هەمەدان لە گۆڕستانێکی چاخی ئاسن لە باشوری رۆژئاوای سنە و لە داوێنی چیای ئاویەر، چەندین گۆڕ و شوێنەواری مێژویییان دۆزیوەتەوە کە تەمەنیان نزیکەی 3000 ساڵە.
میدیای ئێران لە زاری کازم مەلازادە، ئەندامی گروپی شوێنەوارناسی رایگەیاندوە، لە سوێنی دۆزینەوەی گۆڕەکان، پێنج شوێنیان هەڵکۆڵیوە و ژمارەیەک گۆڕیان دۆزیوەتەوە، لە سەر گردەکەش پاشماوەی شوێنی ژیان دۆزراوەتەوە کە ڕەنگە هی سەردەمی ئەشکانی یان ساسانی بێت.
هەر لە هەمان شوێن ژمارەیک گۆڕی تر دۆزراونەتەوە، کە نیشانەکان دەریدەخەن نوێترن و مێژویان بۆ 750 تا 500ساڵی پێش زایین دەگەڕێنەوە و بە شێوازی بەخاکسپاردنەکەیاندا، گریمانەی ئەوە دەکرێت رۆژ پەرستبوبن.
گۆڕستانەکە یەکەم جار ساڵی 2008 لە کاتی کارکردن لە شەقامێکدا دۆزرایەوە و قۆناغی دووەم دوای 18 ساڵ دەستی پێکردووە، داواش دەکرێت شوێنەکە بکەنە مۆزەخانە، بۆ ئەوەی خەڵک و گەشتیارانیش زیاتر لە مێژوەکەی ئاگاداربن.
دەسەڵاتی گشتیی فڕۆکەوانیی مەدەنی لە سعودیە رایگەیاند، ژمارەی قوربانیانی هێرش و دەستدرێژییەکە بۆ سەر فڕۆکەخانەی نێودەوڵەتیی پادشا فەهد لە شاری دەممام بۆ دوو گیانلەدەستدان بەرز بووەوە، ئەوەش دوای پشتڕاستکردنەوەی گیانلەدەستدانی بریندارێکی تر.
بەپێی راگەیەندراوەکە، دوو گیانلەدەستداوەکە بریتیین لە هاووڵاتییەکی سعودی و نیشتەجێیەکی خەڵکی وڵاتی هیندستان.
دەسەڵاتەکە ئاماژەی بەوەش کردووە کە ژمارەی بریندارەکان لە هەشت کەسدا جێگیر بووە، کە پێکهاتوون لە هاووڵاتییەکی سعودی، لەگەڵ دوو نیشتەجێی هیندی، دوو یەمەنی، دوو بەنگلادیشی و نیشتەجێیەکی نیپاڵی.
بەپیی راگەیاندراوەکە برینی بریندارەکان لە نێوان سووک و قورسدایە و لە ئێستادا لە چەند نەخۆشخانەیەکدا چاودێریی پزیشکیی پێویستیان پێ دەدرێت.
لە کۆتایی راگەیەندراوەکەدا جەخت لەوە کراوەتەوە: بە هاوئاهەنگی لەگەڵ دەزگا ئەمنییەکان، بەردەوامن لە هەڵسەنگاندنی زیانەکان و گرتنەبەری رێوشوێنی پێویست بۆ دڵنیابوونەوە لە سەلامەتیی گەشتیاران و کارمەندان، وەک ئامادەکارییەک بۆ دەستپێکردنەوەی گەشتە ئاسمانییەکان و ئاساییبوونەوەی جووڵەی فڕۆکەخانەکە.
پۆلیسی دارستانی سلێمانی رایگەند، بەهۆی کەوتنەوەی ئاگر لە سنوری گوندی گەڵناغاج لە سنوری ئاغجەلەر نزیکەی 300 دۆنم پوش وپاوان سوتا.
بەڕێوەبەرایەتی پۆلیسی دارستان و ژینگەی سلێمانی رایگەیاند، دوای کەوتنەوەی ئاگر لە سنوری گوندی گەڵناغاج، دەستبەجێ تیمەکانیان چونەتە شوێن روداوەکە و لەگەڵ هاووڵاتیاندا توانراوە ئاگرەکە کۆنتڕۆڵ بکرێت.
لە راگەیەندراوەکەدا ئاماژە بەوەکراوە، بەهۆی ئاگرەکەوە نزیکەی 300 دۆنم لەوەڕگا و پوش و پاوان سوتاون.
پۆلیسی دارستانی سلێمانی راشیگەیاندوە، دوای کۆنتڕۆڵکردنی ئاگرەکە، کەسێکیان دەستگیرکردوە بە تۆمەتی کردنەوەی ئاگەرکە و پەڕاوی لێکۆڵینەوەی بۆکراوەتەوە.
پیونگ یانگ رایگەیاند، پێشکۆتایی هاتنی ئەمساڵ، یەکەی سەربازی نوێ و بڵندگۆکانی پڕوپاگەندە لەسەر هێڵی سنوری نێوان وڵاتەکایان لەگەڵ کۆراییا باشور دوبارە کار پێ بکاتەوە.
ئاژانسی فرانس پرێس لە زاری لە کیم یۆ جۆنگ، خوشکی سەرکردەی کۆریای باکور بڵاویکردوەتەوە، یەکە سەربازییە نوێیەکان لە سنوری کۆریای باشور جێگیردەکرێن و بڵاوکردنەوەی پەیامە پڕوپاگەندەییەکان لە رێگەی بڵندگۆی گەورەوە لەسەر سنور دەست پێ دەکاتەوە.
ئەم هەنگاوەی پیونگ یانگ لە دوای ئاڵۆزییەکانی نێوان هەردوو وڵاتەکەیە و لە ئێستادا هیچ پەیوەندییەک لە نێوانیاندا نەماوە.
بەکارهێنانی بڵندگۆ یەکێکە لە شێوازەکانی شەڕی دەرونی کە هەردوولا لە قۆناغە پێشوەکاندا پەنایان بۆ بردووە، پێش ئەوەی لە چوارچێوەی هەوڵەکانی کەمکردنەوەی گرژی رابگیرێت.
گەرچی هێشتا رون نییە رێژەی ئەو یەکە سەربازیانە و ژمارەی بڵندگۆکان چەندە، یاخود وەڵامی کۆریای باشور بۆ ئەم هەنگاوەی پیونگ یانگ چێدەبێت، بەڵام ئەم هەنگاوە نیشانەی ئەوەیە هەوڵەکان بۆ باسکردنی پەیوەندی هەردوو وڵآتەکە شذکستی هێناوە.
سوپای پاسداران سووتانی چوار كەشتیی نەوهەڵگری لە كەنداوی فارس و سێ كەشتیی تری لە گەروی هورمز بەهۆی مینەوە راگەیاند.
راگەیاندنی هێزی دەریایی سوپای پاسداران رایگەیاند، چوار كەشتیی نەوهەڵگری لە كاتی گواستنەوەی نەوت لە ناو كەشتی بۆ كەشتیەكی تر لە باكووری كەنداوی فارس كراونەتە ئامانج و لە ئەنجامدا سووتاون، ئەمەش لە كاتێكدایە كە شەوی ڕابردوو سێ كەشتیی تریش لە ڕۆژئاوای گەروی هورمز بەهۆی پێكدادان بە مین تووشی رووداو و ئاگركەوتنەوە بوون.
بەپێی ڕاگەیەندراوەكەی سوپای پاسداران، ئەم ئۆپەراسیۆنە پاش ئاگادارییە پێشوەختەكان بۆ ئەو كۆمپانیا دەریاییانە هاتووە كە بە وتەی سوپای ئەمریكایان كردووە و لە رێگا نایاساییەكانەوە تێپەڕیوون، هێزی دەریایی سوپا دەشڵێت كە چاودێری و بەدواداچوونی بۆ ئەم ٤چوار كەشتییە كردووە پێش ئەوەی لە باكووری كەنداوی فارس بكرێنە ئامانج.
لە بەشێكی تری لێدوانەكەیدا، سوپای پاسداران هۆشداری تووندی داوە ئەو كەشتیانە كە بە وتەكانی سوپای ئەمریكا هەڵنەخەڵەتین رێگە نایاساییەكان بەكارنەهێنن.
سەرۆکایەتیی دادگای تێهەڵچوونەوەی ناوچەی سلێمانی راگەیەنراوێکی لەبارەی بڕیارێکی دادگای کارگێڕیی سلێمانی بڵاوکردەوە و جەخت دەکاتەوە، بەپێی دەستور و یاسا، هیچ بەربەستێک لەبەردەم هاووڵاتییانی عیراقدا نییە بۆ خاوەندارێتیی رەوای خانووبەرە لە سلێمانی.
دادگای تێهەڵچوونەوەی ناوچەی سلێمانییەوە ئاشکرایکرد، ئەمڕۆ دادگای کارگێڕیی سلێمانی بڕیاری ژمارە 57/ک/2026 لە 21ـی10ـی2026 دەرکردووە، کە بووەتە باس و خواسی راگەیاندنەکان و لێکدانەوەی جیاوازی جۆراوجۆری بۆ کراوە، بەجۆرێک پێچەوانەی یاسا و هەتا مەنتووقی بڕیاری ئاماژەبۆکراویشە.
ئاماژەی بەوەشکرد، سەرەتا ئەو بڕیارە تەنها لە مەنتووقەکەیدا هەڵوەشاندنەوەی فەرمانێکی کارگێڕی لەخۆ دەگرێت و ئەو بڕیارەش پلەی بنەبڕیی وەرنەگرتووە و هیچ بەڵگەیەک (حوجییەتێک) پێک ناهێنێت، واتە ئەو بڕیارە تەنها تاوتوێی حاڵەتێکی تایبەتی لەخۆ گرتووە کە بە یەکلاکەرەوە دانانرێت هەتاوەکو بڕیارەکە پلەی کۆتایی وەرنەگرێت، لەکاتێکدا بڕیارەکە تەنها بڕیارێکی کارگێڕی هەڵوەشاندووەتەوە لە رووی تایبەتمەندێتیی (اختصاص)ەوە.
دادگای تێهەڵچوونەوەی ناوچەی سلێمانییەوە ئەوەشی خستەڕوو، بابەتی خاوەندارێتیی خانووبەرە لە شاری سلێمانی هاوشێوەی شارەکانی تری عیراق، دەستوور پاشان یاسا تایبەتەکان و لە پێشیانەوە یاسای تۆمارکردنی خانووبەرە رێکیخستووە، هیچ بەربەستێکی یاساییان تێدا نییە رێگر بێت لەبەردەم هاووڵاتیانی ناوچەکانی تری عیراق کە خاوەندارێتیی یاساییان هەبێت بۆ شوقە و خانووبەرە، چونکە بەپێی دەستوری عیراقیی بەرکار هاووڵاتیان یەکسانن لە ماف و ئەرکدا بەبێ جیاکاریی رەگەزی و تائیفی و ناوچەگەرێتی.
راشیگەیاند، بەوەش ناکرێت هەر کەسە و لای خۆیەوە راڤە و لێکدانەوە بۆ بڕیارێکی دادوەری بکات کە پلەی بنەبڕیی وەرنەگرتووە و گشتاندن بۆ ئەو حاڵەتە تایبەتە بکات کە ئەو بڕیارە تاوتوێی کردووە.
لیستی موچەی مانگی 10 و راپۆرتی تەرازوی پێداچوونەوەی مانگی نۆی موچەخۆرانی هەرێم رەوانەی بەغداد کرا.
وەزارەتی دارایی و ئابوری هەرێم ئاشکرایکرد، ئێوارەی ئەمڕۆ چوارشەممە لیستی ووچەی مانگی تشرینی یەکەمی فەرمانبەران و موچەخۆرانی هەرێمی کوردستان و راپۆرتی تەرازووی پێداچوونەوەی مانگی ئەیلول لەلایەن تیمی تەکنیکی وەزارەتی دارایی و ئابوری هەرێمی کوردستانەوە رەوانەی شاری بەغداد کرا.
ئاماژەی بەوەشکرد، سبەینێ پێنجشەممە بە رەسمی رادەستی فەرمانگەی ژمێریاری لە وەزارەتی دارایی فیدراڵ دەکرێت.
وەزارەتی گەنجینەی ئەمریكا سزای نوێی بەسەر ئێراندا سەپاند و رایدەگەیەنێت، پێنج کەسایەتی و چوار کۆمپانیای لە وڵاتانی پەنەما، سەنگاپوور و ئیمارات خستووەتە لیستی سزاکانیەوە، بەهۆی بوونی پەیوەندی و کارکردنیان لەگەڵ تاران.
هاوکات لە راگەیەندراوەکەی وەزارەتی گەنجینەی ئەمریكادا هاتووه، سزاکان نۆ کەشتیشی گرتووەتەوە کە بەشداربوون لە گواستنەوەی نەوت و پۆڵای ئێراندا.
لە بەشێکی دیکەی راگەیەندراوەکەدا ئاماژە بەوە کراوە، وەزارەتی گەنجینەی ئەمریكا لێکۆڵینەوەی لە بانکێکی یۆنانی دەستپێکردووە، بە گومانی گواستنەوەی پارە بۆ ئێران.
سەرۆك وەزیرانی ئیسرائیل دەڵێت، تاكە چارەسەر بۆ لەناوچوونی هەڕەشەی ئێران بریتییە لە روخانی دەسەڵاتەكەی.
بنیامین ناتانیاهۆ سەرۆك وەزیرانی ئیسرائیل لە میانی بانگەشەی هەڵبژاردندا لە شاری دیمۆنا لە باشوری ئیسرائیل رایگەیاند، ئێران دەیویست لە ناویانببات و بۆمبی ئەتۆمی دروست بكات، بەڵام رایانگرت و سەرەڕای ئەو رەوشەی بەسەر وڵاتەكەدا هاتووە هێشتا پێداگرە لەسەر دروستكردنی بۆمبەكە و تاكە چارەسەریش نەمانی دەسەڵاتەكەیەتی.
دەشڵێت، ئێران هەوڵی دروستكردنی بۆمبی مردن دەدات و رێنمایی بە سوپای ئیسرائیل و مۆساد داوە كار لەسەر نەهشتنی دەسەڵاتی ئەو وڵاتە بكەن.
رۆژنامەی فاینانشاڵ تایمز رایگەیاند، ناتانیاهۆ لە ئێستادا هەوڵدەدات هێرشی سەربازی بەرفراوان دژی ئێران دەستپێبكاتەوە و كۆمەڵێك ئامانجی بۆ ئۆپەراسیۆنەكە دیاریكردبوو و دیارترینیان بە ئامانجگرتنی ژێرخانی شارستانی و شوێنە ئەتۆمییەكانە.
پۆلیسی سلێمانی، سێ تۆمەتباریان بە تۆمەتی دزینی ماتۆڕسکیل دەستگیرکرد، کە لە لێکۆڵینەوە سەرەتاییەکاندا دانیان بە چەندین تاوانی دزینی ماتۆڕسکیلدا ناوە.
بەڕێوەبەرایەتی پۆلیسی سلێمانی ئاشکرایکرد، مەفرەزەکانی بنکەی پۆلیسی زەڕایەنی سەر بە بەشی پۆلیسی شارەزووری بەڕێوەبەرایەتییان، سێ تۆمەتباریان بەتۆمەتی دزینی ماتۆڕسکیل دەستگیرکرد.
ئاماژەی بەوەشکرد، دوای ئەوەی بنکەی پۆلیسی زەڕایەن ئاگادارکرایەوە لەروداوێکی دزیکردن لەناحیەی زەڕایەن، بڕیاری دادوەر وەرگیراو لێکۆڵینەوەو بەدواداچوون بۆ دۆزینەوەو دەستگیرکردنی تۆمەتبار دەستیپێکرد.
پۆلیسی سلێمانی راشیگەیاند، هەمان شەو بەهاوکاری مەفرەزەکانی بنکەی پۆلیسی عەربەت توانرا تۆمەتبارێک بەناوی (ش، ڕ، ع) دەستگیر بکرێت.
ئەوەشی خستەڕوو، لەبەردەوامیی لێکۆڵینەوەکانی هێزەکانی پۆلیسدا توانرا دوو تۆمەتباری تر بەناوەکانی (ڕ، س، ع - ڕ، ت، ی) لەسەر هەمان دۆسیە لەشاری سلێمانی دەستگیربکرێن.
پۆلیسی سلێمانی تیشکی خستەسەر ئەوەی لە لێکۆڵینەوەکاندا تۆمەتباران دانیان بەچەندین تاوانی دزینی ماتۆڕسکیلدا ناوەو لەچەند بنکەیەکی پۆلیس فەرمانی دەستگیرکردنیان هەبووە.
ئاماژە بەوەشکراوە، لەئێستادا تۆمەتباران بەبڕیاری دادوەر و بەپێی مادەی (31/443) لەیاسای سزادانی عیراقی راگیراون و لێکۆڵینەوەکان بەردەوامە.
سەرۆکی ئۆکراین، هیواخوازە سەردانەکەی ستیڤ ویتکۆف، نێردەی تایبەتی ئەمریکا بۆ روسیا، ئەنجامی ئەرێنی لێبکەوێتەوە.
ڤۆلۆدیمێر زیلینسكی، سەرۆکی ئۆکراین لە چاوپێکەوتنێکدا لەگەڵ کەناڵی 'فۆکس نیوز' رایگەیاند، گفتوگۆکانی لەگەڵ ویتکۆڤ لە ئۆسلۆ بەرهەمدار بوون و ئۆکراین بۆ دیپلۆماسی ئامادەیە.
سەبارەت بە کۆبوونەوەی ویتکۆڤ لەگەڵ ڤلادیمێر پوتن، سەرۆکی روسیا، کە ئەمڕۆ چوارشەممە ئەنجام درا، زیلینسكی رایگەیاند، هیوادارە لە چەند سەعاتی داهاتوودا هەندێک ئەنجامی ئەرێنییان دەستکەوێت.
زیلینسكی جەختی لە گرنگیی راگرتن و وەستاندنی شەڕ و کردەوە بۆ قۆناغی دیپلۆماسی و گەیشتن بە رێککەوتنێک کە مسۆگەری ئەمنی تێدا بێت، هەروەها ستایشی بانگەوازەکەی دۆناڵد ترەمپ، سەرۆکی ئەمریکای کرد بۆ راگەیاندنی ئاگربەست.
سەرۆکی ئۆکراین ئەوەشی خستەڕوو، گرنگ ئەوەیە کە گفتوگۆی سێقۆڵی لە نێوان خۆیی و ترەمپ و پوتن ئەنجام بدرێت، ئاماژەی بەوەشکرد، باشتر دەبێت وڵاتانی ئەورووپاش بەشدار بن.
قوباد تاڵەبانی، جێگری سەرۆکی ئەنجوومەنی وەزیران پێشوازیکرد لە ئەرمان تۆپجوو، کونسوڵی گشتیی تورکیا لە هەرێمی کوردستان و پێکەوە لەبارەی بەهێزترکردنی پەیوەندییەکانی نێوان هەردوولا گفتوگۆیان کرد.
لە کۆبوونەوەکەدا کە رۆژی چوارشەممە 21ـی 10ـی 2026 بەڕێوەچوو، قوباد تاڵەبانی کردنەوەی سەنتەری پێدانی ڤیزەی تورکیای لە سلێمانی بە هەنگاوێکی گرنگ زانی بۆ باشترکردنی پەیوەندییەکان بە تایبەت لە بوارەکانی بازرگانی و کلتووریدا.
هەردوولاش هاوڕابوون لەسەر پێویستیی کاری هاوبەش لە بواری کارئاسانیکردن بۆ بازرگانان و وەبەرهێنەرانی کوردستان و تورکیا بۆ ئەوەی ئاستی پەیوەندیی ئابووری و بازرگانیی نێوان هەردوولا بەرەوپێشچوونی زیاتر بەخۆیەوە ببینێت.
جێگری سەرۆکی ئەنجومەنی وەزیرانی هەرێم و هەڵسوڕێنەری کاروباری باڵیۆزخانەی ئەمریکا لە عیراق کۆبوونەوە و باسیان لە رەوشی سیاسیی هەرێم و عیراق و چەند پرسێکی دیکە کرد.
قوباد تاڵەبانی، جێگری سەرۆکی ئەنجومەنی وەزیرانی هەرێم، لەگەڵ باڵیۆز ستیڤ ڤەیگن، هەڵسوڕێنەری کاروباری باڵیۆزخانەی ئەمریکا لە عیراق کۆبووەوە و پێکەوە تاوتوێی رەوشی سیاسیی هەرێمی کوردستان و عیراق و چەند پرسێکی دیکەیان کرد.
لە کۆبوونەوەکەدا کە رۆژی چوارشەممە 21ـی 10ـی 2026، بە ئامادەبوونی گویندەلن ویندی گرین، کونسوڵی گشتیی ئەمریکا بەڕێوەچوو، گفتوگۆ کرا لەبارەی رەوشی سیاسیی هەرێمی کوردستان و هەردوولا جەختیان کردەوە لەسەر پێویستیی خێراترکردنی هەنگاوەکانی پێکهێنانی کابینەی نوێی حکومەتی هەرێم.
سەبارەت بە حکومەتی فیدڕاڵیش، هەردوولا خۆشحاڵیی خۆیان دەربڕی بە تەواوبوونی پرۆسەی پێکهێنانی کابینەی حکومەت و جەختیان کردەوە لەسەر چارەسەرکردنی کێشەکانی نێوان هەرێم و بەغداد بەپێی دەستوور. لەم چوارچێوەیەدا قوباد تاڵەبانی ئاماژەیدا بە گفتوگۆکانی پەیوەندیدار بە پرسی بودجە و بە پێویستی زانی لایەنە کوردستانییەکان بە یەکدەنگی و یەکڕیزییەوە لە بەغدا کاربکەن بۆ چەسپاندنی ماف و شایستە داراییەکانی هەرێمی کوردستان.