عیراق
دەستەی نەزاهەتی فیدراڵی عیراق رایگەیاند، دادگای تایبەت بە بەرەنگاربونەوەی گەندەڵی ناوەندی بە غیابی، سزای حەوت ساڵ زیندانیکردنی بۆ عەممار جەبر خەلیل، پارێزگاری پێشوی سەلاحەدین دەرکردووە، ئەوەش بەهۆی تێوەگلانی لە تاوانی دەوڵەمەندبوونی ناڕەوا و زیادبوونی گوماناویی سەرمایەکەی.
دادگا جگە لە سزای زیندانیکردنەکە، بڕیاری داوە بە سەپاندنی سزایەک بە بڕی یەک ملیار و 728 ملیۆن و 74 هەزار دینار، کە هاوتا دەبێتەوە لەگەڵ بڕی ئەو سەرمایەی بە ناڕەوا بەدەستی هێناوە، لەگەڵ پابەندکردنی بە گەڕاندنەوەی هەمان بڕە پول بۆ خەزێنەی دەوڵەت، بەپێی یاسای هەموارکراوی دەستەی دەستپاکی.
بەپێی بڕیارەکەی دادگا، نە گەڕاندنەوەی پارەکە و نەدانی سزاداراییەکە، لەدوای بەسەرچوونی ماوەی زیندانییەکەشی نابێتە هۆی ئازادکردنی تۆمەتبارەکە لە حالەتی دەستگیرکردنیدا، تاوەکو تەواوی بڕە پارەکە نەگەڕێنێتەوە.
هەروەها دادگا بڕیاری دەستبەسەرداگرتنی موڵک و ماڵی گوازراوە و نەگوازراوەی تۆمەتبارەکە و هاوسەرەکەی پەسەند کردووە، لەگەڵ دەستبەسەرداگرتنی سەرمایەی کوڕەکەی.
دەستەی دەستپاکی عیراق، ئەمڕۆ یەکشەممە، دەستبەسەرداگرتنی نزیکەی نۆ ملیار دینار و حەوت قاڵب زێڕ لە ماڵی بریکاری وەزیری کارەبا بۆ کاروباری گواستنەوە و دابەشکردن راگەیاند.
لە بەیاننامەیەکی دەستەکەدا هاتووە: تیمێکی بەڕێوەبەرایەتیی لێکۆڵینەوەی بەغداد، دوای پرۆسەیەکی بەردەوام لە بەدواداچوون و پشکنینی چڕ، توانینیان بڕێکی زۆر پارە و زێڕ لە چەند ماڵێکی تۆمەتبار (خالید غەزای عەتیە) بریکاری وەزارەتی کارەبا بۆ کاروباری گواستنەوە و دابەشکردن بدۆزنەوە، کە پێشتر بڕیاری دەستگیرکردنی لەلایەن مەڵبەندەکانی دەستەکەوە بەڕێوەچوو بوو.
بەیاننامەکە ئاماژەی بەوەش کردووە: پارە دەستبەسەرداگیراوەکە بریتی بووە لە (1.175.000.000) ملیارێک و 175 ملیۆن دیناری عیراقی، و (5.839.000) پێنج ملیۆن و839 هەزار دۆلاری ئەمریکی، جگه لە حەوت قاڵب زێڕ.
جەختیشی کردەوە: پەڕاوی دەستبەسەرداگرتنی یاسایی بۆ پرۆسەکە رێکخراوە و لەگەڵ کەلوپەلە دەستبەسەرداگیراوەکاندا رادەستی قازیی لێکۆڵینەوەی تایبەتمەند کراوە بۆ وەرگرتنی رێکارە قانونییە پێویستەکان
ئەنجومەنی باڵای دادوەریی عیراق، ئەمڕۆ یەکشەممە، دەستبەسەرداگرتنی 20 ملیۆن دۆلار و گەڕاندنەوەی 60 کیلۆگرام زێڕی لە دۆسیەی بریکاری وەزارەتی نەوت بۆ کاروباری پاڵاوتن راگەیاند.
لە بەیاننامەیەکی ئەنجومەنەکەدا هاتوە: بە هەماهەنگی لەگەڵ هەرێمی کوردستان، دەست بەسەر 20 ملیۆن و 340 هەزار دۆلاری ئەمریکی و 200ملیۆن دیناری عیراقی، لەگەڵ گەڕاندنەوەی 60 کیلۆگرام زێڕ و دەستبەسەرداگرتنی 7 ئۆتۆمبێلدا گیراوە.
ئەم رێکارانە لە چوارچێوەی دۆسیەی تۆمەتباری دەستبەسەرکراو عەدنان جومەیلی، بریکاری وەزارەتی نەوت بۆ کاروباری پاڵاوتن و کەسانی تێوەگلاو لەگەڵیدا ئەنجامدراون.
دادوەرەکە ئاماژەی بەوەش کرد کە پرۆسەکانی بەدواداچوون و لێکۆڵینەوە بۆ دەستبەسەرداگرتنی ئەو سەرمایە و دەستکەوتە داراییانەی لە ئاکامی بەهەدەردان لە پڕۆژە جێبەجێکراوەکاندا دروستبوون، بووە هۆی دەستبەسەرداگرتنی ئەم بڕە پارە و زێڕ و ئۆتۆمبێلانە.
جەختیشی کردەوە کە لێکۆڵینەوەکان و بەدواداچوون بۆ تۆمەتبارانی تر بەردەوامە تاوەکو تەواوکردنی سەرجەم ڕێکارە قانونییەکان بەرامبەریان.
شانەی راگەیاندنی ئەمنیی عیراق رایدەگەیەنێت، بڕیاری كۆنترۆڵكردنی چەك سەرجەم لایەنەكانی دەرەوەی دەوڵەت دەگرێتەوە.
فەریق سەعد مەعن، سەرۆكی شانەی راگەیاندنی ئەمنیی عیراق بڵاویكردەوە، بڕیاری سنوورداركردنی چەك و كۆنترۆڵكردنی لەلایەن دەوڵەتەوە، سەرجەم ئەو لایەن و گروپانە دەگرێتەوە كە لە دەرەوەی دامەزراوە ئەمنییەكانی عیراقن.
دەشڵێت، بەپێی یاسا حەشدی شەعبی بەشێكە لە هێزە چەكدارەكانی عیراق و سەرجەم ئەندامەكانی پابەندی یاسا سەربازییەكانی سوپای عیراقن.
سەرۆكی شانەكە ئاماژی بەوەش كردووە، ئامانجی سەرەكی لەم هەنگاوە ئەوەیە رێگری لە دروستبوونی هێزیك یان دەسەڵاتێكی تر بكرێت كە لە دەرەوەی چوارچێوەی دەوڵەتدا چەك بەكاربهێنێت.
ئەوە لەكاتێكدایە، ئەمڕۆ سوپای عیراق ئەركی پاراستنی خاڵە ئەمنییەكانی قەزای ئامرلی سەر بە پارێزگای سەلاحەدین لە گوندی بەستاملی رادەستی فەرماندەیی ئۆپەراسیۆنەكانی باكور و رۆژهەڵاتی دیجلەی حەشدی شەعبی كرد.
پەیمانگەیەكی ئەمریكی دەڵێت، عیراق بۆ دەربازبوون لە قەیرانی دارایی پێویستی بە هەمەجۆركردنی رێگاكانی هەناردەكردنی نەوتە بەتایبەتیش لە رێگەی وڵاتانی كەنداوەوە.
پەیمانگەی دامەزراوەی بەرگریكردن لە دیموكراسییەكان لە راپۆرتێكدا ئاماژەی بەوەكردووە، عیراق بۆ دابینكردنی 90%ی بودجەكەی تەنها پشت بە داهاتی نەوت دەبەستێت و لەئێستاشدا ئاستی هەناردەی نەوتەكەی بەشێوەیەكی بەرچاو دابەزیووە.
دەشڵێت، داهاتی عیراق لە مانگەكانی ئایار و حوزەیراندا تەنها نزیكەی دوو ملیار دۆلار بووە، لە كاتێكدا مانگانە پێویستی بە شەش ملیار دۆلارە و كۆمپانیای سۆمۆش پەنای بۆ فرۆشتنی نەوت بە كۆمپانیای ئادنۆكی ئیماراتی بردووە بۆئەوەی لەو رێگەیەوە هەناردەی بكات.
پەیمانگەكە داوا لە ئەمریكا دەكات، هانی عیراق بدات بۆ نزیكبوونەوەی زیاتر لە وڵاتانی كەنداو بە مەبەستی هەناردەكردنی نەوت لە پێناو دابینكردنی موچەی فەرمانبەرانی حكومەتی عیراق.
لە نزیك بەندەرێكی عیراق باندێكی نێودەوڵەتی بۆ قاچاخچێتی ماددەی هۆشبەر دەستگیركرا كە 90 كیلۆگرام ماددەی هۆشبەری پێبووە.
بەڕێوەبەرایەتی گشتی كاروباری ماددە هۆشبارەكان لە عیراق لە راگەیەنراوێكدا بڵاویكردەوە، بە پشتبەستن بە زیانیاری هەواڵگریی، لە لە بەندەری ئوم قەسر توانیویانە باندێكی نێودەوڵەتی قاچاخچێتی ماددەی هۆشبەر دەستگیر بكەن.
دەشڵێت، یەكێك لە تۆمەتبارەكان بیانی بووە و 90 كیلۆگرام ماددەی هۆشبەری لە جۆری حەشیش پێبووە كە لە دوو بەلەمدا هەڵگیرابوو.
حكومەتی توركیا بەردانەوەی ئاوی روباری فوراتی دەستپێكردووە و بەهۆی بەرزبوونەوەی ئاستی ئاوەكەش هۆشداریی دەدرێتە عیراق.
وەزارەتی فریاگوزاریی سوریا هۆشدارییەكی بە پەلەی ئاراستەی پارێزگاكانی رەققە و دێرەزو و سەرجەم دانیشتوانی نزیك روباری فورات كردووە بەهۆی بەردانەوەی ئاوی روباری فورات لەلایەن حكومەتی توركیاوە.
ئاماژەی بەوەشكردووە، توركیا لە یەك چركەدا نزیكە 600 بۆ 800 مەتر سێجا ئاو بەردەداتەوە و بەهۆیەوە ئاستی ئاوی روبارەكە بەشێوەیەكی بەرچاو بەرزبووەتەوە و رەنگە لە هەندێك ناوچەدا مەترسی لەسەر دانیشتوان دروست بكات.
لایەنە پەیوەندیدارەكانی سوریا هۆشداریشیان داوەتە عیراق چەند رێكارێك لەو ناوچانە بگرێتەبەر كە نزیكن لە روباری فورات بە مەبەستی رێگریكردن لە دروستبوونی لافاو بەهۆی بەزبوونەوەی ئاستی ئاوی روبارەكە.
ئەمڕۆ هەینی، 14ـی 8ـی 2026، عەلی زەیدی سەرۆک وەزیرانی عیراق سەردانی بارەگای دەستەی دەروازە سنورییەکانی کرد.
لە سەردانەکەیدا، سەرۆک وەزیرانی عیراق داوای لە لێپرسراوابت دەروازە سنورییەکان کرد کە کارەکانیان بۆ بەئەلیکترۆنیکردنی هاوردەکردن و هەناردەکردنی کاڵا بازرگانییەکان خێراتربکەن و بەوەش هەل بۆ گەندەڵی و چەواشەکاریی لە دەروازە سنورییەکان نەهێڵنەوە.
ئاماژەی بەوەشداوە، پێویستە بۆلەمەودا دەروازە سنورییەکان پشت بە داهاتی خۆیان ببەستن، بەجۆرێک کە باج و رسوماتی گومرگی پێشوەختە و پێش ئەنجامدانی حەواڵەکان ببڕدرێن و کرێی خزمەتگوزارییەکانیش پێشوەختە وەربگرن و داهاتەکەی بۆمەبەستی نۆژەنکردنەوە و پەرەپێدانی دەروازەکان تەرخان بکرێن.
هاوکات، عومەر عەدنان سەرۆکی دەستەی دەروازە سنورییەکانی عیراق ئەوەی بۆ سەرۆک وەزیران ئاشکراکرد، کە ئەمساڵ داهاتی دەروازە سنورییەکان بەراورد بە ساڵانی رابردوو زۆر زیادیکردووە، ئەوەش بۆ پەیڕەوکردنی میکانیزمێکی نوێی ئەلکترۆنیی گەڕاندەوە کە هاوکاریانە لە کۆنترۆڵکردنی جوڵە بازرگانییەکان بە دەروازەکانیاندا.
لیژنەی دارایی لە ئەنجومەنی نوێنەرانی عیراق رایگەیاند، وەزارەتی دارایی راستەوخۆ دەستی بە ئامادەکارییەکانی دارشتنی پڕۆژەیاسای بودجەی گشتیی ساڵی 2027 کردووە، هاوكات ئاشکرای کرد کە هەفتەی داهاتوو یاسای بەخشین و قەرزکردن لە پەرلەمان دەخوێنرێتەوە.
سەرچاوەیەک لە لیژنەی دارایی ئەنجومەنی نوێنەرانی عیراق ئاشكرایکرد، لە سەردانێکدا بۆ لای سەرۆک وەزیران رێککەوتن لەسەر چەندین پرسی گرنگ کراوە، لەوانەش ناردنی پڕۆژەیاسای بودجەی 2027 لە کاتی دیاریکراوی خۆیدا.
روونیشی کردەوە: وەزارەتی دارایی ستراتیژیەتی بودجەی بە بەشداری لیژنەی دارایی، چەند وەزارەتێک و نوێنەرانی هەرێمی کوردستان ئامادە کردووە.
باسی لەوەش کرد، بەپێی یاسای بەڕێوەبردنی دارایی، پێویستە تاوەکو 15ی تشرینی یەکەمی ئەمساڵ پڕۆژەیاسای بودجە بگاتە پەرلەمان، بە مەبەستی رێکخستنی سەقامگیریی دارایی، دیاریکردنی نرخی دۆلار، نرخی بەرمیلی نەوت و میکانیزمەکانی هەناردەکردن.
سەبارەت بە دامەزراندن و بەهەمیشەییکردنی فەرمانبەرانی گرێبەست، ئەو ئەندامەی لیژنەی دارایی روونیکردەوە: بەهۆی راگرتنی هەناردەکردنی نەوتەوە وڵات لە بارودۆخێکی دارایی سەختدایە، بەڵام هیواخوازن کێشەی پلەبەرزکردنەوە و موچەی فەرمانبەران لە ناو بودجەی نوێدا چارەسەر بکرێت.
وەزیری نەوتی عیراق کردنەوەی وێستگەیەکی گەورەی غاز و چەند پڕۆژەیەکی نوێی راگەیاند
باسم محەمەد خەزیر، وەزیری نەوتی عیراق، لە کۆنگرەیەکی رۆژنامەوانی، ئاشکراکردنی وێستگەی ناوەندیی چارەسەرکردنی غازی لە کێڵگەی نەوتی فەیحا راگەیاند، کە توانای رۆژانەی دەگاتە 130 ملیۆن پێی سێجا غاز، لەگەڵ بەرهەمهێنانی 100 هەزار بەرمیل نەوت لە رۆژێکدا لە هەمان کێڵگەدا.
وەزیری نەوتی عیراق رایگەیاند کە لە سەرەتای ئەم مانگەوە ئاستی هەناردەکردنی نەوت گەیشتووەتە تێکڕای دوو ملیۆن بەرمیل لە رۆژێکدا، لەکاتێکدا کۆی هەناردەی مانگی تەممووزی رابردوو نزیکەی 49 ملیۆن بەرمیل بووە.
ئاماژەی بەوەش کرد کە زیاتر لە 85٪ی بودجەی وڵات پشت بە داهاتی هەناردەکردنی نەوت دەبەستێت و دامەزراوەکانی وەزارەت بەردەوامن لە هەوڵەکانیان بۆ زیاترکردنی ئەو داهاتە.
سەبارەت بە ستراتیژیەتی داهاتوو، وەزیر روونی کردەوە: هاوپەیمانییەکی پێکاهاتوو لە کۆمپانیای شیڤرۆن و UCCی قەتەری پڕۆژەی راکێشانی هێڵی بۆڕیی بەسڕە – فیشخابور جێبەجێ دەکەین تاوەکو نەوت بگەیەنرێتە بەندەری جەیهانی تورکی، بە ئامانجی فرەچەشنکردنی دەروازەکانی هەناردەکردن.
هاوکات باسی لەوەش کرد کە ئاماژە بەراییەکانی پشکنین لە ناوچەی ئەلفاو بوونی نەوت و غازیان سەلماندووە، ئەمەش هاوشانی هەوڵەکان بۆ گەیشتن بە خۆبژێوی لە غاز و رەخساندنی هەلی کار بۆ گەنجان.
رێكخراوی بەدر هۆشداری دەدات لە بەكارهێنانی هێز بۆ چەككردنی گروپە چەكدارەكان و دەڵێت ئەمە دەرگا بۆ فیتنەی ناوخۆیی دەكاتەوە.
محەممەد ناجی محەممەد، سەرۆكی مەكتەبی سیاسیی رێكخراوی بەدر، لە راگەیەنراوێكدا ئاماژەی بەوە كرد، ئەو زمانەی كە باس لە بەكارهێنانی هێز دەكات بەرانبەر بە دانانی چەكی گروپە چەكدارەكان، ئەگەر راست بێت، بەزاندنێكی گەورەی سنوورەكانە، وتیشی بەرەی مقاوەمە جێگرەوەی دەوڵەت نییە و دەوڵەتیش ركابەری بەرەی مقاوەمە نییە.
وتیشی، ئەوان رێگە بە سەرۆك وەزیران و هیچ كەسێكی تر نادەن بگەنە ئەو ئاستە لە مامەڵەكردن لەگەڵ براكانیان لە بەرگریدا، چونكە ئەمە دەرگا بۆ فیتنەی ناوخۆیی دەكاتەوە كە بە پلەی یەكەم ئەمریكا و ئیسرائیل لێی سوودمەند دەبن.
سەرۆكی مەكتەبی سیاسیی بەدر جەختی كردەوە، حكومەتی سەرۆك وەزیران عەلی زەیدی كەوتووەتە ژێر كاریگەریی فشارەكانی ئەمریكا و زۆر بە پەلە بەرەو جێبەجێكردنی مەرجی واشنتۆن رۆیشتووە.
هەروەها محەممەد سێ مەرجی سەرەكی بۆ پرسی كۆكردنەوەی چەك دیاری كرد لەوانە كشاندنەوەی تەواوەتی هێزەكانی ئەمریكا و نەمانی مەترسییە ستراتیژییەكان لەسەر عیراق و بونیادنانی تەواوەتی هێزە چەكدارەكانی عیراق، بەتایبەت لە بواری بەرگریی ئاسمانیدا.
ماڵی دەستنووسەکانی عیراق تۆمارکردن و فەهرەس کردنی دەستنووسە سریانییەکانی ناو گەنجینەی نیشتمانیی خۆی تەواو کرد، لە هەنگاوێکدا کە بە یەکەم لە جۆری خۆی دادەنرێت لە ماوەی نزیکەی 80 ساڵی رابردوودا.
ئەحمەد کەریم عولیاوی، بەڕێوەبەری گشتیی ماڵی دەستنووسەکان رایگەیاند: ئەم فەهرەس کردنە لە چوارچێوەی پڕۆژەیەکی گشتگیردا دێت بۆ بەڵگەدارکردن و ئامادەکردنی رێبەری ناساندن بۆ دەستنووسەکانی ناو دەزگاکەمان، بەتایبەتی ئەو دەستنووسانەی کە پێشتر فەهرەس نەکرابوون، لە سەروویانەوە دەستنووسە سریانییەکان.
ئاماژەی بەوەش کرد کە: پڕۆسەکە لەلایەن تیمێک لە بەشی فەهرەس کردن و بە بەشداریی شارەزایانی زمانی سریانی جێبەجێ کراوە؛ کارەکە ماوەی چوار مانگی خایاندووە و بە شێوازێکی خۆبەخشانە ئەنجامدراوە.
روونیشی کردەوە کە سروشتی ئەم دەستنووسانە پێویستی بە هەوڵی پسپۆڕانە هەبووە لە رووی زمانەوانی، زانستی و مێژوویی پەیوەست بە کەلەپووری سریانییەوە.
عولیاوی جەختی کردەوە: تەواوکردنی ئەم فەهرەسە رێبەری زانیاری وا خستنەڕوو کە یارمەتی توێژەران دەدات بۆ ئاشنابوون بە ناوەرۆکی دەستنووسەکان و لێکۆڵینەوە لێیان، هەروەها بەشداردەبێت لە پاراستنی کەلەپووری دەستنووسی سریانی و ناساندنی لەسەر ئاستی ناوخۆیی و جیهانی.
لە کۆتاییدا باسی لەوە کرد کە دەستنووسە سریانییەکان رەنگدانەوەی بەشێک لە فرەیی کولتوورین لە مێژووی عیراقدا، و فەهرەس کردنیان دەرگا لەسەر توێژینەوەی پسپۆڕانەی زیاتر دەکاتەوە و هەوڵەکانی دەزگاکە بەهێزتر دەکات لە بەڵگەدارکردنی سامانە مێژووییەکەی و خستنەبەردەستی بۆ توێژەران.
ئاژانسی هەواڵگری و لێكۆڵینەوەی فیدراڵی عیراق، دەستبەسەرداگرتنی زیاتر لە 20 فڕۆكەی بێفڕۆكەوانی دروستكراوی ناوخۆی لە بەغداد راگەیاند.
ئاژانسەكە ئاماژەی بەوەش كردووە، مەفرەزەكانیان لە بەڕێوەبەرایەتیی هەواڵگری و دژەتیرۆری بەغداد - رەسافە، دوو ئۆپراسیۆنی جیاوازیان ئەنجامداوە.
ئەوەشی خستووەتەڕوو، لە ئەنجامی ئۆپراسیۆنەکاندا دەستیان بەسەر زیاتر لە 20 فڕۆكەی بێفڕۆكەوانی دروستكراوی ناوخۆدا گرتووە و چوار تۆمەتبارشیان دەستگیركردووە كە بەپێچەوانەی مەرج و رێنمایی لایەنە پەیوەندیدارەكان مامەڵەیان بەو درۆنانەوە كردووە.
هەروەها دەڵێت، لەكاتی لێكۆڵینەوەدا تۆمەتباران بەڕاشكاوی دانیان بەوەدا ناوە كە بە مەبەستی بازرگانیكردن مامەڵەیان بەو درۆنانە كردووە.
راوێژکاری دارایی سەرۆک وەزیرانی عیراق روونیکردەوە، پلانیان هەیە بۆ بودجەی ساڵی 2027 زیاتر پشتبە داهاتی نانەوتی ببەستن و چاکسازیی ئیداریش ئەنجامبدەن.
مەزهەر محەمەد، ساڵح راوێژكاری دارایی سەرۆك وەزیرانی عیراق رایگەیاند، حكومەتی عیراق بەرەو ئامادەكردنی بودجەی ساڵی داهاتوو هەنگاودەنێت و تیایدا كار لەسەر بەرزكردنەوەی داهاتی نانەوتی دەكرێت و چاكسازی ئیداری تێدا ئەنجامدەدرێت.
ئاماژەی بەوەشكرد، لە ئێستادا بەهۆی پێشهاتەكانی ناوچەكە و ناجێگیریی بازاڕی وزە، دارایی گشتیی روبەڕوی فشاری زیاتر بووەتەوە و ئەوەش كاری كردووەتە سەر داهاتی نەوت، كە عیراق بەشێوەیەكی سەرەكی پشتی پێدەبەستێت، بۆیە هەوڵدەدرێت ئەو مۆدێلەی بودجە بۆ ساڵی داهاتوو بگۆڕدرێت.
راوێژكاریی دارایی سەرۆك وەزیران ئەوەشی خستووەتەروو، نەبوونی یاسای بودجەی ساڵی 2026 وایكرد كار بە یاسای كارگێڕێ دارایی بكرێت و خەرجییەكان بە رێژەی 1/12 دابەش بكرێن بۆ دابینكردنی موچە و چاودێری كۆمەڵایەتی.
ئەنجومەنی ئاسایشی نیشتمانیی عیراق بە سەرۆکایەتی عەلی زەیدی، سەرۆک وەزیرانی عیراق کۆبووەوە و چەند تەوەرێک تاوتوێ کراون.
لە کۆبوونەوەکەدا سەرۆک وەزیرانی عیراق رایگەیاندووە: رۆژی 30ـی 9ـی 2026، کۆتا وادەیە بۆ کشانەوەی هێزەکانی هاوپەیمانان لە عیراق.
بەپێی زانیارییەکان، باس لە رەوشی ناوچەکە و گرتنەبەری رێکارت پێویست بۆ پاراستنی بەرژەوەندییەکانی عیراق کراوە.
مەزھەر محەمەد ساڵح، راوێژکاری سەرۆک وەزیرانی عێراق رایگەیاند، موچە دەستەبەرکراوە و هەوڵەکان بە هەموو توانایەکەوە بۆ دابینکردنی بەردەوامن. جەختیشی کردەوە کە حکومەت پابەندە بە یاسا و دەستوور بۆ پاراستنی بژێویی هاوڵاتییان.
لە لێدوانێکیدا بۆ ئاژانسی هەواڵی عیراقی (واع)، مەزهەر محەمەد ساڵح ئاماژەی بەوە کرد: قەیرانی نەختینەی ئێستا بەهۆی بارودۆخی جیۆپۆلیتیکی ناوچەکە و ئاڵۆزییەکانی گەروی هورمزەوە دروستبووە، چونکە نزیکەی 85٪ی نەوتی هەناردەکراوی عیراق لەو گەروەوە تێدەپەڕێت و 70٪ی بۆ بازاڕەکانی ئاسیایە.
راوێژکارەکەی سەرۆک وەزیران روونیکردەوە: 90٪ی داهاتی بودجەی عیراق پشتبەستوە بە نەوت، هەر دابەزینێک لە داهاتدا کەلێنێکی دارایی دروست دەکات.
ئاماژەی بۆ ئەوەش کرد: مانگانە پێویستمان بە 8 تریلیۆن دیناری عیراقی هەیە بۆ دابینکردنی موچەی نزیکەی 10ملیۆن کەس (لەوانەش موچەخۆرانی هەرێمی کوردستان و بەغداد، خانەنشینان، چاودێری کۆمەڵایەتی و کارمەندانی کۆمپانیا حکومییە راگیراوەکان).
ساڵح وتیشی: دابینکردنی سەبەتەی خۆراک بۆ 40 ملیۆن هاوڵاتی بەشێکی تری گرنگی خەرجییە داراییەکانی دەوڵەتە.
لە کۆتاییدا ناوبراو جەختی کردەوە: دابینکردنی موچە و بژێویی خەڵک ئەرکێکی نیشتمانی و ئەخلاقییە، حکومەت بە هەموو رێگە و توانایەکەوە مانگ بە مانگ کار لەسەر زامنکردنی موچە و ئاسایشی خۆراکی هاوڵاتییان دەکات.