عیراق
سەرۆک کۆمار پیرۆزبایی لەئەمیری دەوڵەتی کوێت دەکات بەبۆنەی ساڵی نوێی کۆچیەوە و پێشهاتەکانی بارودۆخی ناوچەکە تاوتوێ دەکەن
د.لەتیف رەشید، ئەمڕۆ لەپەیوەندییەکی تەلەفۆنیدا لەگەڵ شێخ مشعل ئەحمەد جابر ئەلسەباح، ئەمیری دەوڵەتی کوێت، بەبۆنەی ساڵی نوێی کۆچیەوەی پیرۆزباییان ئاڵوگۆڕ کرد.
سەرۆک کۆمار و ئەمیری دەوڵەتی کوێت، هیوای خۆشگوزەرانی و پێشکەوتنیان بۆ گەلانی عیراق و کوێت خواست.
هەروەها سەرۆک کۆمار جەختی لەچڕکردنەوەی هەوڵە هاوبەشەکان کردەوە بۆ پتەوکردنی ئاسایش و سەقامگیری لەناوچەکەدا.
لەمیانەی پەیوەندییەکەدا هەردوولا پێشهاتەکانی ناوچەکەیان تاوتوێکرد و جەختیان لەگرنگی کۆنتڕۆڵکردنی گرژییەکان بەشێوەیەک کرد که ئاشتی هه رێمایەتی و نێودەوڵەتی بپارێزێت و هەروەها باسیان لەفراوانکردنی هاریکارییه دووقۆڵییەکانیان کرد، کەڕەنگدانەوەی پتەووی پەیوەندیی برایانەی نێوان عیراق و کوێت دەکات بۆ بەدیهێنانی بەرژەوەندییەکانی هەر دوو گەلی برا.
هەروەها تاوتوێی خراپتربوونی بارودۆخی مرۆییان لەکەرتی غەززە کرد، لەبەر ڕۆشنایی ئەو دەستدرێژیە فراوانە و زیادبوونی ئازاری مرۆیی، وهاوکات جەختیشیان لەپێویستی یەک هەڵوێستی وڵاتانی عەرەبی کردەوە بۆ پشتیوانیکردن لەخۆڕاگری گەلی فەلەستین و کارکردن بۆ کۆتاییهێنان بەو دەستدرێژییانە و هەوڵدان بۆ چارەسەرکردنی ئازارەکانی هاووڵاتیانی فەلەستینی.
وەزارەتی پلاندانانی عیراق دابەزینی بەرچاوی رێژەی بێكاری لە وڵاتدا لە رێژەی 17% ـەوە بۆ 13% راگەیاند.
عەبدولزەهرا هینداوی وتەبێژی وەزارەتی پلاندانانی عیراق لە چاوپێكەوتنێكی میدیایدا رایگەیاند، ئێستا رێژەی بێكاری لە عیراق بۆ ئاستی ساڵی 2020 دابەزیوە، ئەوەش بەهۆی پەرەپێدان و دروستكردنی پڕۆژەی خزمەتگوزاری حكومی و تایبەت، لەگەڵ دەستپێكردنەوەی كاركردن لە زیاتر لە هەزار و 400 پڕۆژەی راگیراو و پێدانی قەرز بە پرۆژە بازرگانییە بچوكەكان.
ئاماژەی بەوەشكرد، دامەزراندنی دەرچووانیش بەشدار بووە لە كەمكردنەوەی رێژەی بێكاری و رەخساندنی هەلی كار لە سەرانسەری هەموو كەرتەكانی گەشەپێداندا.
وتەبێژی وەزارەتی پلاندانانی عیراق راشیگەیاند، ئەو پلانانەی حكومەت وایكردوە لە ئێستادا رێژەی بێكاری لە رێژەی 17% ـەوە كەمبێتەوە بۆ 13% ئەوەش مایەی دڵخۆشییە بۆ وەزارەتەكەیان.
د. لەتیف رەشید، سەرۆک کۆماری عیراق بەبۆنەی ساڵی نوێی کۆچییەوە پیرۆزبایی لە سەرجەم موسڵمانان دەکات.
دەقی پەیامەکە
بەبۆنەی ساڵی نوێی کۆچییەوە، گەرمترین پیرۆزبایی لە گەلەکەمان و سەرجەم موسڵمانان دەکەین و هیوادارین ساڵی خێر و بەرەکەت بێت بۆ هەمووان.
لەم بۆنەیەدا بەبیرهێنانەوەی بەها بەرزەکانی پەیرەوی پێغەمبەری ئازیز(د.خ) بە بیردەهێنینەوە و پەیامی ئیسلام دووپات دەکەینەوە و جەخت لەسەر گرنگی یەکخستنی ڕیزەکان دەکەینەوە بۆ ڕووبەڕووبوونەوەی ئەو ئاستەنگانەی ڕووبەڕووی وڵاتەکەمان دەبنەوە و پێکەوە کارکردن بۆ تەواوکردنی پرۆسەی پێشکەوتن و چەسپاندنی بنەماکانی ئاسایش و سەقامگیری و ئاشتی بۆ وڵاتان و گەلانی ناوچەکە.
هەموو ساڵێک هەمووان لەخێر و خۆشیدا بن
وەزیری کار و کاروباری کۆمەڵایەتی هەرێم رایگەیاند، بەکارهێنان و بازرگانیکردن بە ماددەی هۆشبەر لە عیراق و هەرێم زیادی کردووە و بەپێی دوایین ئاماری مانگی پێنجی ئەمساڵ، لە چاکسازییەکانی هەرێمدا ماددەی هۆشبەر زیاتر لە 1 لەسەر 4ی تاوانەکان پێکدەهێنێت.
کوێستان محەمەد وەزیری کار و کاروباری کۆمەڵایەتی هەرێم رایگەیاند، تاوەکو مانگی پێنجی ئەمساڵ هەزار و 576 کەس بەهۆی ماددەی هۆشبەرەوە لە چاکسازییەکاندا دەستگیر کراون، کە زیاتر لە 1 لەسەر 4ی سەرجەم تاوانەکانی دیکەیە.
ئاماژەی بەوەشکرد، لەو ژمارەیە هەزار و 486 کەسیان لە رەگەزی نێر و 81 کەسیان لە رەگەزی مێن.
ئەوەشی خستە روو، بەپێی ئامارەکانی نەتەوە یەکگرتووەکان، پێش ساڵی 2003 عیراق یەکێک بوو لە پاکترین وڵاتەکان لەرووی بەکارهێنانی ماددەی هۆشبەرەوە، بەڵام بەپێی دوایین ئاماری ساڵی 2021ی نەتەوە یەکگرتووەکان، ژمارەی بەکارهێنەرانی ماددەی هۆشبەر لە عیراق و هەرێمدا گەیشتووەتە زیاتر لە دوو ملیۆن کەس.
کوێستان محەمەد وتیشی، لە ئێستادا بەهۆی هەڵکەوتەی جوگرافی عیراق و هەرێمەوە، بوونەتە رێرەوی گواستنەوەی ماددەی هۆشبەر.
دژە تیرۆری عیراق كوشتنی دوو تیرۆریستی داعشی لە ئۆپراسیۆنێكدا لە سنوری پارێزگای كەركوك راگەیاند.
شانەی راگەیاندنی ئەمنی عیراق لە راگەیەنراوێكدا بڵاویكردەوە، هێزێكی تایبەت لە دەزگای بەرەنگاربوونەوەی تیرۆر ئۆپەراسیۆنێكی تایبەتی چوار رۆژەیان لە وادی زغیتون لە باشووری خۆرهەڵاتی قەزای حەویجە لە سنوری پارێزگای كەركوك ئەنجامداوە.
ئاماژەی بەوەشکردووە، بە پشت بەستن بە زانیاریی هەواڵگریی، توانیویانە دوو سەركردەی دیاری تیرۆستانی داعش بكوژن كە بە والی ریاز و سەربازی ریاز ناسرا بوون.
هەر بە پێی راگەیەنراوەكە، ئەو هێزە ئەركەكەی بە سەركەوتوویی و بەبێ هیچ زیانێك لەنێو ئەنجامداوە، هاوكات دەستیش گیراوە بەسەر چەندین چەك و ئامێر و كەلوپەلی سەربازیدا كە بۆ كردەوەی تیرۆستی بەكارهێنراوە.
سەرۆک کۆمار له پەیوەندیەکی تەلەفونیدا لەگەڵ شای ئوردن دۆخی ناوچەکە تاوتوێ دەکات
د.لەتیف رەشید سەرۆک کۆماری عیراق ئەمڕۆ لە پەیوەندییەکی تەلەفۆنیدا لەگەڵ شا عەبدوڵڵای دووەمی شای شانشینی هاشمی ئوردن باسی لە پەیوەندییە دووقۆڵییەکانی نێوان هەردوو وڵات و دۆخی ناوچەکە کرد.
سەرۆک کۆمار و شا عەبدوڵڵا پێشوازییان لە بڕیاری ئاگربەست کرد و جەختیان لە سەر گرنگی پاراستنی ئاسایشی ناوچەکە کردەوە و دورکەوتنەوە لە راکێشانی بۆ ناو ململانێ و شەڕ که هەڕەشە لە ئاشتی و ئاسایشی هه رێمی و نێودەوڵه تی دەکات.
هەروەها تاوتوێی بارودۆخی کەرتی غەززە کرا و هەردوولا جەختیان لەوە کردەوە کە پێویستە دەستبەجێ هەنگاو بنرێت بۆ وەستاندنی دەستدرێژی بو سەر گەلی فەلەستین و داننان بە مافە رەواکانیان.
بانكی نێودەوڵەتی رەزامەندی دەربڕی بە بڕی 930 ملیۆن دۆلار وەك هاوكاری دارایی بۆ عیراق خەرج بكات.
دەستەی بەڕێوەبەری جێبەجێكاری بانكی نێودەوڵەتی پاكێجێكی نوێی دارایی پەسەند كرد كە زیاتر لە یەك ملیار و 300 ملیۆن دۆلار بوو، بۆ پاڵپشتیكردنی پڕۆژە گرنگەكانی گەشەپێدان لە عێراق، سوریا و لوبنان، كە ئامانج لێی بەهێزكردنی ژێرخانی ئابووری و باشتركردنی خزمەتگوزارییە سەرەتاییەكانە.
لەو بڕە پارەیە كە لە لایەن بانكی نێودەوڵەتی پەسەند كراوە عیراق زۆرترین پشكی وەرگرتووە كە 930 ملیۆن دۆلارە، بۆ پڕۆژەی فراوانكردنی هێڵی ئاسنین.
ئاماژە بەوەشكراوە ئامانج لە پێدای ئەو هاوكارییە بە عیراق بۆ پەرەپێدانی هێڵی شەمەندەفەرە لە بەندەری ئوم قەسرەوە تاوەكو موسڵ لە باكوری وڵات لەپێناو كەمكردنەوەی كاتی گەشت و زیادكردنی كارایی گواستنەوەی بار و باشتركردنی كواڵتی خزمەتگوزارییەكانی گواستنەوە، ئەوە جگە لە پاڵپشتیكردنی بازرگانی و ڕەخساندنی هەلی كار و هەمەچەشنكردنی سەرچاوەی داهات.
بانكی نێودەوڵەتی 146 ملیۆن دۆلاریشی بۆ سوریا وەك هاوكاری پەسەند كرد بۆ پاڵپشتیكردنی هەوڵەكان بۆ پێدانی كارەبا و دەستگەیشتن بە سەرچاوەكانی وزە.
بۆ لوبنانیش بانكی نێودەوڵەتی 250 ملیۆن دۆلاری هاوكاری دارایی پەسەندكرد، بۆ ئاوەدانكردنەوەی ئەو وڵاتە.
وەزارەتی نەوتی عیراق رایگەیاند، لە مانگی رابردوودا زیاتر لە 101 ملیۆن بەرمیل نەوتیان فرۆشتووە، داهاتەكەشی زیاتر لە شەش ملیار دۆلار بووە.
وەزارەتی نەوتی عیراق لە راگەیەنراوێكدا ئاماژەی بەوەكردووە، بەپێی ئاماری كۆمپانیای سۆمۆ لە مانگی پێنجدا 101 ملیۆن و 630 هەزار و 925 بەرمیل نەوت هەناردە كراوە.
دەشڵێت، كۆی داهاتی مانگی رابردوو شەش ملیار و 361 ملیۆن و 636 هەزار دۆلار بووە، كە لە رێگەی سۆمۆوە فرۆشراوە.
لە راگەیەندراوەكەدا ئەوەش هاتووە، نەوتی خاوی فرۆشراو بۆ مانگی پێنج لە كێڵگە نەوتییەكانی ناوەڕاست و باشوری عیراق 100 ملیۆن و 365 هەزار و 335 بەرمیل بووە، هاوكات هەناردەی كێڵگەی گەیارە بڕی 955 هەزار و 684 بەرمیل بووە، بڕی هەناردەكراوی نەوتیش بۆ ئوردن گەیشتووەتە 309 هەزار و 906 بەرمیل .
وەزارەتی گواستنەوەی عیراق رایگەیاند، ئاسمانی باشوور عیراق بە رووی گەشتە ئاسمانییەکاندا کرایەوە.
وەزارەتی گواستنەوەی عیراق رایگەیاند، گەشتەکان لە بەشی باشووری وڵاتەکە ئاسایی بوونەتەوە و بەم زووانە تەواوی ئاسمانی عیراق بە رووی گەشتەکاندا دەکرێتەوە.
دوای 12 رۆژ لە راگرتنی گەشتە ئاسمانییەکان بەهۆی شەڕی نێوان ئیسرائیل و ئێران و تێپەڕینی موشەکەکانی ئەو دوو وڵاتە بە ئاسمانی عیراقدا، جگە لە ئیسرایل و ئێران ئاسمانی عیراقیش بە رووی گەشتە ئاسمانییەکاندا داخرا.
شەوی رابردوو 23ی حوزەیران، دۆناڵد ترەمپ سەرۆکی ئەمریکا ئاگربەستی نێوان ئەو دوو وڵاتەی راگەیاند و لەمڕۆشەوە ئاگربەستەکە چووە بواری جێبەجێکردنەوە.
د. لەتیف رەشید سەرۆک کۆماری عیراق، ئەمڕۆ دووشەممە 23ـی 6ـی 2025 لەکۆشکی بەغداد، پێشوازی لە عەبدولعەزیز بن خالد ئەلشەمەری باڵیۆزی شانشینی عەرەبستانی سعودی لەعیراق کرد.
لە دیدارەکەدا باسی چۆنیەتی پتەوکردنی پەیوەندییە دووقۆڵییەکانی نێوان هەردوو وڵاتی برا و رێگاکانی پەرەپێدانیان بۆ خزمەتکردنی بەرژەوەندییە هاوبەشەکان لەگەڵ گؤڕانکارییە خێراکانی گۆڕەپانی ناوچەکە کرا.
سەرۆک کۆمار جەختی لەوە کردەوە کەهێرشەکان بۆ سەر کۆماری ئیسلامی ئێران ئاماژە بە ئاراستەیەکی مەترسیدار دەکات، کەدەبێتە هۆی گرژیی زیاتر لە ناوچەکەدا و دوپاتیشی لە گرنگی چڕکردنەوەی هەوڵەکان بۆ راگرتنی ئەم کارە دوژمنکارانە و رێگریکردن لە پەرەسەندنیانی کردەوە، هاوکات سەرۆک کۆمار داوای زامکردنی زمانی لێکتێگەیشتن و دیالۆگ وەک باشترین ڕێگە بۆ دەربازکردنی ناوچەکە لەگێژاوی زیاتر و چەسپاندنی ئاشتی لەسەر ئاستی ناوچەیی و نێودەوڵەتی کرد.
لەلای خۆیەوە باڵیۆز ئەلشەمەری، پێزانینی وڵاتەکەی بۆ ئەو پەیوەندییە برایانە دەربڕی کە هەردو وڵات پێکەوە دەبەستێتەوە وجەختیشی لە پەرۆشی وڵاتەکەی کردووە بۆ بەردەوامبوونی راوێژ و هاوکاری لەپێناوی ئاسایش و سەقامگیری ناوچەکە.
د. لەتیف رەشید سەرۆک کۆماری عیراق پێشوازی لە دادوەر عومەر ئەحمەد محەمەد سەرۆکی ئەنجومەنی کۆمسارانی کۆمسیۆنی باڵای سەربەخۆی هەڵبژاردنەکان کرد.
لە میانی کۆبوونەوەکەدا کە ئەمڕۆ دووشەممە 23-6-2025 لە کۆشکی بەغداد بەڕێوەچوو، باس لە ئامادەکارییەکانی کۆمسیۆن بۆ هەڵبژاردنی داهاتوو کرا.
سەرۆک کۆمار جەختیکردەوە لە پابەندبوون بە خشتەی کات و دیاریکردنی میکانیزمی پێویست بۆ جێبەجێکردنی بڕگەکانی یاساکە، لەگەڵ ئەنجامەکانیش لە کاتی خۆیدا ڕابگەیەندرێ، هەروەها سەرۆک کۆمار جەختیکردەوە لە دابینکردنی پێداویستییەکان بۆ سەرخستنی هەڵبژاردن و گرتنەبەری ڕێکاری یاسایی بەرامبەر ئەو کەسانە کە پارەی سیاسی بەکاردەهێنن.
لای خۆیەوە دادوەر عومەر ئەحمەد، سوپاس و پێزانینی خۆی بۆ سەرۆک کۆمار دەربڕی بۆ گرنگیدان و ڕێنماییە بەنرخەکانی، باسی لە ئامادەکارییەکانی کۆمسیۆن کرد بۆ سازکردنی هەڵبژاردن لە کاتی خۆیدا و بە گوێرەی وادەی دەستووری.
د.لەتیف رەشید سەرۆک کۆماری عیراق جەختی لەسەر پێویستی وەستاندنی شەڕ لە ناوچەکە و کارکردن بۆ گێڕانەوەی ئاسایش و سەقامگیری کردەوە بەشێوەیەک کە ئاشتی هەرێمایەتی و جیهان بپارێزرێت.
سەرۆک کۆمار لە کۆشکی بەغداد پێشوازی کرد لە ئەحمەد سەمیر باڵیۆزی میسر لە عیراق .
لە دیدارێکدا تەئکیدیان کردەوە لەسەر پتەوکردنی پەیوەندییە دووقۆڵییەکان لەنێوان هەردوو وڵات و گەلانی برادا و کارکردن بۆ بەهێزکردنی هاوکاری و هەماهەنگی لە بوارە جیاجیاکانی سیاسی، ئابووری و ژینگەیی، بەمەبەستی بەدیهێنانی بەرژەوەندییە هاوبەشەکان.
لەدیدارەکەدا دوایین پێشهاتەکانی رەوشی ئەمنی ناوچەکە لەدوای گرژییەکان و شەڕەکانی ئەم دواییەی ناوچەکە تاوتوێکرایەوە و تێیدا سەرۆک کۆمار تەئکیدی لەپێویستی یەکخستنی دیدگا و هەڵوێستە نێودەوڵەتیەکان کردەوە و کارکردن بۆ وەستاندنی ئەو شەڕەی بە پێویست زانی کە هەڕەشە لەئاسایش و سەقامگیریی گەلان دەکات.
لای خۆیەوە باڵیۆزی میسر سوپاسی خۆی بۆ سەرۆک کۆمار دەربڕی و پشتیوانی هەمیشەیی میسری بۆ هەوڵەکانی عێراق بۆ چەسپاندنی بنەماکانی ئاشتی و سەقامگیری لەسەر ئاستی هەرێمایەتی و نێودەوڵەتی دووپاتکردەوە.
د.لەتیف رەشید سەرۆک کۆماری عیراق، ئەمڕۆ لە کۆشکی بەغداد، پێشوازیکرد لەباڵیۆزی شانشینی ئوردنی هاشمی لەعیراق، ماهر تەراونە.
لە دیدارەکەدا باس لە چۆنیەتی پتەوکردنی پەیوەندییە دووقۆڵییەکانی نێوان هەردوو وڵاتی برا کرا ، هەروەها دوایین پێشهاتەکانی گۆڕەپانی ناوچەکە و جیهان و گرنگی بەردەوامی هەماهەنگی هاوبەش بۆ بەشداریکردن لە پاڵپشتیکردنی ئاسایش و سەقامگیری ناوچەکە تاوتوێ کرا.
سەرۆک کۆمار دووپاتی لە هەڵوێستی نەگۆڕی عیراقی لە رێزگرتنی سەروەری دەوڵەتان و دەستوەرنەدان لەکاروباری ناوخۆیاندا کردەوە و جەختیشی لەوە کردەوە کەعیراق هەر جۆرە پێشێلکارییەکی سەروەری وڵاتەکەی رەتدەکاتەوە و هەروەها رەتیشی دەکاتەوە ببێتە مەیدانێک بۆ هەر دەستدرێژییەک بۆ سەر وڵاتانی دیکە.
لەلای خۆیەوە باڵیۆز تەراونە سوپاس و پێزانینی وڵاتەکەی بۆ هەڵوێستەکانی عیراق دەربڕی و پشتیوانی شانشینی ئوردنی بۆ هەوڵەکانی عیراق لە چەسپاندنی ئاسایش و سەقامگیری و پەرەپێدانی پەیوەندییە ناوچەیی و نێودەوڵەتییەکانی دووپاتکردەوە.
چوار سەرۆكایەتییەكەی عیراق سەبارت بە رەوشی سیاسی عیراق و پێشهاتەكانی ناوچەكە كۆبونەوە
بە ئامادەبوونی د. لەتیف رەشید سەرۆك كۆمار، چوارسەرۆكایەتییەكەی عیراق لە كۆشكی بەغداد كۆبونەوە، لە كۆبونەوەكەدا پێشهاتەكانی ناوچەكە و كاردانەوەكانی شەڕی ئێران- ئیسرائیل لە ناوچەكە تاوتوێكرا، جەختیان لە ڕەتكردنەوەی هەر جۆرە پێشێلكارییەك بۆ سەر سەروەری و ئاسمانی عیراق و بە كارهێنانی وەكو مەیدانی دەستدرێژی بۆ سەر وڵاتانی دراوسێ كردەوە.
هەروەها پشتیوانی خۆیان بۆ حكومەت دووپات كردەوە لە گرتنەبەری ڕێوشوێنی پێویست بۆ پاراستنی ئاسمانی و سەروەری عیراق، ڕێگریكردن لە پێشێلكردنی سەروەری عیراق.
لە بەشێكی تری كۆبونەوەكەدا، ئیدانەی هێرشەكانیان كرد بۆ سەر ئێران، بەو پێیەی پێشێلكارییەكی ئاشكرای یاسا یاسا نێودەوڵەتییەكانە.
سەبارەت بە بابەتی دابینكردنی بودجەی موچەی فەرمانبەرانی هەرێم، داوایان لە حكومەتی هەرێم كرد، بڕیارەكەی دادگای فیدراڵی جێبەجێ بكات بۆ ئەوەی حكومەتی فیدراڵی بتوانێت پارەی مووچەی فەرمانبەرانی هەرێم دابین بكات و هەر كێشەیەكی ماوەتەوە بە پێی دەستوور و یاسا چارەسەری بكات.
د.لەتیف رەشید سەرۆک کۆماری عیراق لە گەڵ فارس عیسا سەرۆکی نوێنەرایەتی حکومەتی هەرێمی کوردستان لە بەغداد کۆبووەوە.
لە دەسپێکی کۆبوونەوەکەدا، دوایین پێشهاتەکانی شەڕی نێوان ئێران و ئیسرائیل، و چۆنیەتی دورخستنەوەی عیراق و وڵاتانی ناوچەکە لەو شەڕە وێرانکاریە، وکاردانەوەکانی ئێستا و داهاتوی لە سەر عیراق، تاوتوێکرا.
هەردوولا، رەوشی سیاسی عیراق، و ئەو ئاستەنگانەی دەبنە رێگر لە بەڕێوەچونی هەڵبژاردنی پەرلەمانی کە لە کۆتایی ئەمساڵدا ئەنجام دەدرێت، تاوتوێکرد.
لە کۆتایی کۆبوونەوەکەدا، سەرۆکی نوێنەرایەتی حکومەتی هەرێمی کوردستان لە بەغداد، نامەی سەرۆکی حکومەتی هەرێمی کوردستان، بۆ چارەسەرکردنی کێشەی موچەی فەرمانبەران، کە ئاراستە لایەنە پەیوەندیدارەکان کراوە، تەسلیمی سەرۆک کۆمارکرد، و ناوەڕۆکی نامەکە لە کۆبوونەوەی چوار سەرۆکایەتی کە ئەمڕۆ بە مەبەستی تاوتوێکردنی رەوشی گشتی وڵات گرێدەدرێت، باس دەکرێت.
سەرۆك كۆماری عیراق داوای كۆبوونەوەی هەردوو دەسەڵاتی دادوەری دەكات بۆ باسكردن لە كێشەكانی نێوانیان و چارەسەركردنی.
د. لەتیف رەشید سەرۆك كۆماری عیراق لە راگەیەنراوێكدا ئاماژەی بۆ ئەوەكردوە، بە پشت بەستن بە ماددەی 87 دەستوری عیراق، كە سەرۆك كۆماری وەك پارێزەری دەستور لە وڵاتدا ناساندوە، سەرۆك كۆمار ، نارەزایی خۆی دەربڕیوە لە بەرامبەر دەستێوەردانەكانی ئیدارەی بەڕێوەبردنی دەوڵەت لە كاروباری دەسەڵاتی دادوەری عیراق و بە پێشێلكاری دەسەڵاتی دادوەری وەسفی كردوە.
سەرۆك كۆمار لە راگەیەنراوەكەیدا پێشنیازی كردوە دادگای باڵای فیدراڵی عیراق و دادگای پێداچونەوەی فیدراڵی بە ئامادەبوونی كەسانی شارەزا لە دەستور و یاسا كۆببنەوە بۆ باسكردن لە كێشەكانی نێوانیان تاوەكو عیراق نەكەوێتە بۆشایی یاسایی.
ئەم هوڵوێستەی سەرۆك كۆمار لە كاتێكدایە ، كە رۆژی پێنج شەممەی رابردوو، نۆ دادوەری دادگای باڵای فیدراڵی كە باڵاترین دەسەڵاتی دادوەرییە لە عیراقدا نامەی دەستلەكاركێشانەوەیان پێشكەشكرد، وەكو ناڕەزاییەك دژی فشاری حكومەت و ئیدارەی بەڕێوەبەردنی دەوڵەت بۆ سەر دادگاكە سەبارەت بە دۆسیەی خور عەبدوڵا.