عیراق
وەزارەتی نەوتی عیراق ئاماری بڕی هەناردەی نەوتی خاو و داهاتی مانگی رابردوو راگەیاند.
وەزارەتی نەوتی عێراق لە راگەیەنراوێکدا بڵاویکردەوە، بەپێی ئاماری رەسمی کۆمپانیای سۆمۆ، کۆی هەناردەی نەوت لە ئازاردا 18 ملیۆن و 604 هەزار بەرمیل بووە و داهاتەکەی ملیارێک و 957 ملیۆن دۆلارە.
ئاماژەی بەوەشکردووە، کێڵگەکانی ناوەڕاست و باشوور پشکی شێریان بەرکەوتووە و زیاتر لە 14 ملیۆن و 561 هەزار بەرمیلیان لێ هەناردە کراوە.
وەزارەتی نەوت ئاشکراشیکرد، نەوتی کەرکوک لە رێگەی بەندەری جیهانی تورکییەوە، بڕی دوو ملیۆن و 772 هەزار بەرمیل هەناردە کراوە، هاوکات بڕی نەوتی هەنادەکراوی هەرێمی کوردستان گەیشتووەتە ملیۆنێک و 271 هەزار بەرمیل.
وەزارەتی نەوت راشیگەیاند کە بڵاوکردنەوەی ئەم ئامارانە لە چوارچێوەی شەفافیەت و ئاگادارکردنەوەی هاوڵاتییانە لە پرۆسەی هەناردە و داهاتی سامانی نیشتمانی.
بە بۆنەی هەڵبژاردنی نزار ئامێدی وەک سەرۆک کۆماری عێراق، قوباد تاڵەبانی، جێگری سەرۆک وەزیرانی هەرێم، پەیامێکی پیرۆزبایی بڵاوکردەوە و دەڵێت؛ گەرمترین پیرۆزبایی ئاراستەی بەڕێزیان دەکەم و هیوای سەرکەوتنی بۆ دەخوازم لەم ئەرکە نیشتمانییەدا.
قوباد تاڵەبانی ئاماژەی بەوەشکردوە، نزار ئامێدی کەسایەتییەکی شیاو، شارەزا و نیشتمانپەروەرێکی راستەقینەیە، چونکە ئامادەیی و کارکردنی بەردەوامی بۆ ماوەی زیاتر لە 20 ساڵ لە بەغداد، ئەزموونی دەوڵەمەندی لەگەڵ جەنابی سەرۆک مام جەلال و سەرۆک کۆمارەکانی دواتردا هەیە.
دەقی پەیامەکەی قوباد تاڵەبانی
بەبۆنەی هەڵبژاردنی بەڕێز کاک نزار ئامێدی وەک سەرۆککۆماری نوێی عێراق، گەرمترین پیرۆزبایی ئاراستەی بەڕێزیان دەکەم و هیوای سەرکەوتنی بۆ دەخوازم لەم ئەرکە نیشتمانییەدا.
کاک نزار ئامێدی کەسایەتییەکی شیاو، شارەزا و نیشتمانپەروەرێکی ڕاستەقینەیە. ئامادەیی و کارکردنی بەردەوامی بۆ ماوەی زیاتر لە ٢٠ ساڵ لە بەغدا، ئەزموونی دەوڵەمەندی لەگەڵ جەنابی سەرۆک مام جەلال و سەرۆککۆمارەکانی دواتر، هەروەها هەبوونی پەیوەندیی بەهێز لەگەڵ تەواوی لایەنە عێراقییەکاندا، دڵنیامان دەکاتەوە لە سەرکەوتنی بەڕێزیان لەم بەرپرسیارێتییە نوێیەدا.
متمانەی تەواومان هەیە کە جەنابی سەرۆککۆمار بە حیکمەت و داناییەوە کار دەکات بۆ چارەسەرکردنی کێشەکانی عێراق، بەتایبەت دۆزینەوەی چارەسەری ریشەیی بۆ پرسە هەڵپەسێردراوەکانی نێوان هەرێمی کوردستان و حکومەتی فیدراڵی.
سوپاس و پێزانینمان ئاراستەی هەموو ئەو ئەندامانەی ئەنجوومەنی نوێنەران دەکەین کە دەنگی متمانەیان بە جەنابی سەرۆککۆمار بەخشی، هەروەها سوپاس بۆ تەواوی ئەو لایەنە دۆست و هاوپەیمانانەی کە هاوکار و پشتیوان بوون لە سەرکەوتنی کاندیدی یەکێتیی نیشتمانیی کوردستان.
سوپاسێکی تایبەتیش بۆ جەنابی دکتۆر لەتیف رەشید، سەرۆککۆماری پێشوو کە گەورەیی نواند و کاندیدبوونی خۆی کشاندەوە، ئەمەش شانازییەکی گەورەیە بۆ بەڕێزیان کە لە کلتووری سیاسیی رۆژهەڵاتی ناوەڕاستدا دەگمەنە سەرۆکێک دەستبەرداری کورسییەکەی بێت.
لە کۆتاییدا پیرۆزبایی ئەم سەرکەوتنە لە سەرۆک بافڵ جەلال تاڵەبانی و یەکێتیی نیشتمانیی کوردستان دەکەم. هەروەها پیرۆزبایی لە هەموو گەلی عێراق و گەلی کوردستان دەکەم و بە تایبەتیش پیرۆزبایی لە خەڵکی دڵسۆز و بە ئەمەکی پارێزگای دهۆکی ئازیز دەکەم کە بۆ یەکەمجار لە مێژوودا کەسایەتییەکی ئەو دەڤەرە دەبێتە سەرۆککۆماری عێراق.
کونسوڵخانەی ئەمریکا لە بەغداد پیرۆبایی خۆی ئاراستەی نزار ئامێدی، سەرۆک کۆماری نوێی عیراق کرد.
ئەمڕۆ یەکشەممە، کونسوڵخانەی ئەمریکا لە بەغداد لە بڵاوکراوەیەکدا رایگەیاند، گەرمترین پیرۆزبایی خۆی ئاراستەی سەرۆک نزار ئامێدی دەکات بەبۆنەی هەڵبژاردنی و دەستبەکاربوونی وەک سەرۆک کۆماری نوێی عیراق.
جەختی لەسەر ئەوەشکردەوە، کە بەوپەڕی خۆشحاڵییەوە چاوەڕێی کارکردن لەگەڵ سەرکردایەتی نوێی عیراق دەکەن بۆ هەنگاونان بەرەو ئایندەیەکی سەروەری و سەقامگیر و خۆشگوزەران بۆ هەموو عیراقییەکان، لە چوارچێوەی بەرژەوەندییەکانی هەردوولا.
نزار ئامێدی سەرۆك كۆماری عیراق، لە كۆشكی بەغداد پێشوازی لە بافڵ جەلال تاڵەبانی، سەرۆكی یەكێتیی نیشتمانیی كوردستان و قوباد تاڵەبانی، جێگری سەرۆك وەزیرانی هەرێم كرد.
لەدیدارێكدا كە دەرباز كۆسرەت رەسوڵ ئەندامی مەكتەبی سیاسی یەكێتی و د. خالید شوانی وەزیری داد و د.هەڵۆ عەسكەری وەزیری ژینگە ئامادەیبوون، ئامادەبووان پیرۆزبایی ئاڕاستەی نزار ئامێدی كرد بەبۆنەی دەستبەكاربوونی وەك سەرۆك كۆماری عیراق و هیوای سەركەوتنیان بۆ خواست لە جێبەجێكردنی ئەركە نیشتمانییەكانی و خزمەتكردنی گەلی عیراق و پتەوكردنی سەقامگیری لە وڵاتدا.
هەروەها باس لەبارودۆخی گشتیی سیاسی و ئەمنی عیراق و پێشهاتەكانی ناوچەكە كراو جەخت لەسەر گرنگی بەهێزكردنی هاوكاری و هەماهەنگی نێوان حكومەتی فیدراڵی و حكومەتی هەرێمی كوردستان كرایەوە بۆ ئەوەی بەشداربن لە چەسپاندنی سەقامگیری و گەیشتن بە بەرژەوەندی هاوبەش.
هاوكات جەختیان لەسەر پێویستی یەكخستنی هەوڵەكان بۆ روبەڕوبوونەوەی ئاستەنگەكانی ئێستاو كاركردن بۆ پاڵپشتی دیالۆگ و لێكتێگەیشتن لەنێوان هێزە سیاسییە جیاوازەكان بۆ بەدیهێنانی خواستەكانی گەلی عیراق بۆ ئاسایش و گەشەپێدان و سەقامگیری كردەوە.
د. لەتیف رەشید، لە کۆشکی بەغداد دەستاودەستکردنی دەسەڵاتی سەرۆک کۆماری لەگەڵ نزار ئامێدی، سەرۆک کۆماری نوێی عیراق کرد
ئەمڕۆ یەکشەممە، لە رێوڕەسمێکی رەسمیدا لە کۆشکی بەغداد، دەستاودەستکردنی دەسەڵات لە نێوان د. لەتیف رەشید و نزار ئامێدی ئەنجامدرا و بەمەش بە رەسمی نزار ئامێدی سەرۆک کۆماری نوێی عیراق دەستبەکار بوو.
سەرەتای رێورەسمەکە، بە لێدانی سروودی نیشتمانی دەستیپێکرد، دواتر سەرۆک کۆمار پێداچوونەوەی بە پاسەوانی شەرەفدا کرد لە دیمەنێکدا کە رەنگدانەوەی رەمزی و شکۆمەندی دەوڵەتە.
دواتر نزار ئامێدی لەلایەن د. لەتیف رەشید، سەرۆک کۆماری پێشوی وڵاتەوە پێشوازی لێکرا و کۆبوونەوەیەک بەڕێوەچوو، کە تێیدا رێورەسمی رادەستکردنی دەسەڵاتی تێدا ئەنجامدرا.
لەلای خۆیەوە د.لەتیف رەشید، سەرۆک کۆماری پێشوو، هیوای سەرکەوتنی بۆ سەرۆک کۆماری نوێ خواست لەڕاپەڕاندنی ئەرکە نیشتمانییەکانی، بەشێوەیەک کەخزمەت بە بەرژەوەندییەکانی عیراق بکات و خواستەکانی گەلەکەی بەدیبهێنێت.
سەرۆکی دامەزراوەی سەرۆک جەلال تاڵەبانی پەیامێکی پیرۆزبایی ئاڕاستەی نزار ئامێدی سەرۆک کۆماری نوێی عیراق کرد و تێیدا هاتووە: هیوادارم بە دیدگای حەکیمانەی سەرۆک مام جەلال ببێتە پارێزەری دەستوور و مافە رەواکانی گەلی کورد
دەقی پەیامەکە:
لەناخی دڵەوە جوانترین و گەرمترین پیرۆزبایی گەرمتان لێ دەکەین بەبۆنەی هەڵبژاردنی بەڕێز نزار ئامێدی وەک سەرۆک کۆماری عێراق، متمانەبەخشین بە جەنابتان بۆ ئەم پۆستە باڵایە، نیشانەی لێهاتوویی و ئەزموونی دەوڵەمەندی ئێوەیە لە کایەی سیاسی و کارگێڕیدا، سەرکەوتنێکی گەورەیە بۆ یەکێتیی نیشتمانیی کوردستان و سیاسەتێکی راست، درووست و رۆڵی لە دنیای کایەی سیاسی عێراقدا.
ماندووبوون و هەوڵە چڕە دیبلۆماسییەکانی بەڕێز بافڵ جەلال تاڵەبانی، سەرۆکی یەکێتیی نیشتمانیی کوردستان و تیمی دانووستکار و فراکسیۆنی یەکێتیی نیشتمانیی کوردستان لە ئەنجومەنی نوێنەرانی عێراق بەرزدەنرخێنین و بەڕیز بافڵ جەلال تاڵەبانی ئەم سەرکەوتنەی لەم بارودۆخە ناهەموارەدا خستە پاڵ سەرکەوتنەکانی دیکەی.
ئومێدەوارین بەڕێز نزار ئامێدی، فەخامەتی سەرۆک کۆمار لەم ئەرکە نیشتمانییە نوێیەدا، بە هەمان دیدگەی حەکیمانەی سەرۆک مام جەلال، ببێتە چەتری کۆکەرەوەی هەموو پێکهاتە جیاوازەکان، پارێزەری دەستوور، مافە رەواکانی گەلی کورد و خزمەتکردنی زیاتر بە وڵات، پاراستنی یاسا و یەکگرتوویی نیشتیمانی سەرجەم گەلانی عێراق.
دامەزراوەکەمان هەمیشە پشتیوانی هەر هەنگاوێکی جەنابی فەخامەتی سەرۆک کۆمار دەبێت کە خزمەت بە سەقامگیری، پێکەوەژیان و گەشەپێدانی وڵات بکات.
دووبارە پیرۆزباییتان لێ دەکەین و هیوای سەرکەوتنان بۆ دەخوازین.
باڵیۆز، د. محەمەد سابیر
سەرۆکی دامەزراوەی سەرۆک جەلال تاڵەبانی
باڵیۆزخانەی ئیسپانیا لە عیراق پەیامێکی پیرۆزبایی ئاڕاستەی نزار ئامێدی سەرۆک کۆماری نوێی عیراق کرد و هیواخوازیشن پەیوەندی و دۆستایەتییەکانی نێوان هەردوو وڵات باشتر بکەن
دەقی پەیامەکە:
جوانترین و گەرمترین پیرۆزبایی ئاراستەی بەڕێز (نزار ئامێدی) دەکەین بەبۆنەی هەڵبژاردنی وەک سەرۆک کۆماری عێراق، و هیوای سەرکەوتنی بۆ دەخوازین لە ڕاپەڕاندنی ئەرکە نیشتمانییەکانیدا.
شانشینی ئیسپانیا هیوای ڕاستگۆیانەی خۆی بۆ سەرکەوتنی بەڕێزیان دەردەبڕێت و بە پەرۆشەوە چاوەڕێی بەهێزکردنی زیاتری پەیوەندییەکانی هاوکاری و دۆستایەتییە، بە شێوەیەک کە خزمەت بە بەرژەوەندییەکانی هەردوو گەلی دۆست بکات و بەشدار بێت لە بەردەوامیی پێشکەوتن و سەقامگیریدا.
باڵیۆزخانەی ئوسترالیا لە عیراق بەبۆنەی هەڵبژاردنی نزار ئامێدی وەک سەرۆک کۆماری نوێی عیراق، پەیامێکی پیرۆزبایی بڵاوکردەوە و تێیدا جەخت لە بەهێزترکردنی پەیوەندییەکانی نێوان هەردوو وڵات دەکاتەوە
دەقی پەیامەکە:
پیرۆزباییەکانی خۆمان ئاراستەی جەنابی بەڕێز (نزار محەمەد ئامێدی) دەکەین بەبۆنەی هەڵبژاردنی وەک سەرۆک کۆماری عێراق. لەم کاتە هەستیارەدا، ئێمە بە پابەندی دەمێنینەوە بۆ کارکردن لەگەڵ عێراق بە مەبەستی بەهێزکردنی پەیوەندییەکان و پەرەپێدانی هاوکارییە دووقۆڵییەکان، لەپێناو پشتگیریکردنی سەقامگیری و گەشەسەندنی ناوچەکە.
باڵیۆزخانەی ئوسترالیا لە عێراق
محەمەد بن ئەحمەد یەماحی، سەرۆکی پەرلەمانی عەرەبی پەیامێکی پیرۆزبایی ئاڕاستەی نزار ئامێدی سەرۆک کۆماری نوێی عیراق کرد و تێیدا هاتووە: هیوای سەرکەوتن بۆ سەرۆک کۆماری نوێی عیراق دەخوازم
سەرۆکی پەرلەمانی عەرەبی پیرۆزبایی گەرمی خۆی ئاڕاستەی سەرۆک کۆماری نوێی عیراق کرد و هیوای سەرکەوتنی بۆ خواست.
هاوکات، ستایشی ئەو پاڵپشتییە فراوانەی کرد کە رەنگدانەوەی کۆدەنگیی نیشتمانیی و ویستی سیاسییە کە پشتیوانی لە سەقامگیری و ئاوەدانکردنەوە دەکات.
یەماحی ئەوەشی دووپاتکردەوە، ئەم دەستکەوتە دەستورییە هەنگاوێکی گرنگە بەرەو پتەوکردنی دەزگاو دامەزراوەکانی دەوڵەت و چەسپاندنی بناغەی ئاسایش و سەقامگیری و هیوای سەرکەوتنیشی بۆ سەرۆک کۆمار خواست لە بەجێگەیاندنی ئەرکەکانی بە شێوەیەک کە لەگەڵ ویستی گەلی عیراقدا بۆ پێشکەوتن و خۆشگوزەرانی زیاتر بگونجێت.
لەلایەکی تریشەوە، پەرۆشی پەرلەمانی عەرەبی دووپاتکردەوە بۆ پتەوترکردنی هاوکاریی لەگەڵ عیراق و پەرەپێدانی میکانیزم و هەماهەنگی و کاری هاوبەش بە شێوەیەک کە خزمەت بە دۆزی عەرەبی بکات و ئاسایش و سەقامگیری لە ناوچەکەدا پەرەپێبدات.
سەرۆکی فراکسیۆنی یەکێتی لە ئەنجومەنی نوێنەرانی عیراق پەیامێکی سوپاس و پێزانینی ئاڕاستەی تەواو ئەو کەس و لایەنانەکرد کە هاوکاربوون لە هەڵبژاردنی نزرار ئامێدی سەرۆک کۆماری نوێی عیراق
دەقی پەیامەکە:
سوپاس و پێزانین
بەناوی فراکسیۆنی یەکێتیی نیشتمانیی کوردستان لە ئەنجومەنی نوێنەران، سوپاس و پێزانینی زۆری خۆمان ئاراستەی سەرۆکایەتی ئەنجومەنی نوێنەران و جێگری یەکەم، و سەرجەم سەرۆک فراکسیۆنەکان و خانم و بەڕێزان ئەندامانی ئەنجومەنی نوێنەران دەکەین، بۆ هەڵوێستە نیشتمانییەکانیان و هەوڵە جدییەکانیان کە بووە هۆی سەرکەوتنی پرۆسە دیموکراسییەکە لە هەڵبژاردنی بەڕێز (نزار ئامێدی) وەک سەرۆک کۆماری عێراق.
ئەم هەنگاوە بەرهەمی تەبایی و هەڵوێستی هاوبەشی هەموو نوێنەران بوو، کە تێیدا پاراستنی ئیرادە و شکۆی دامەزراوەی یاسادانان ئامانجی کۆکەرەوەی هەمووان بوو، ئەمەش بووە هۆی گرتنەبەری ئەم بڕیارە دروست و هاوسەنگە لەپێناو خزمەتکردنی بەرژەوەندیی گشتیدا. لێرەشەوە، سوپاسی دووبارەی خۆمان بۆ هەر پەرلەمانتارێک دەردەبڕین بۆ دڵسۆزی و کۆششەکانیان لە بە ئەنجامگەیاندنی ئەم ئیستیحقاقە دەستوورییە گرنگە.
هەرێم کەمال ئاغا
سەرۆکی فراکسیۆنی یەکێتیی نیشتمانیی کوردستان
لە ئەنجومەنی نوێنەرانی عێراق
مەسعوود پزیشکیان سەرۆک کۆماری ئێران پەیامێکی پیرۆزبایی ئاڕاستەی نزار ئامێدی سەرۆک کۆماری نوێی عیراق دەکات و تێیدا جەخت لە پەیوەندییە مێژووییەکەی هەردوو وڵات دەکات
پزیشکیان لە پەیامەکەدا ئاماژەی بەوە داوە، ئەم هەڵبژاردنە گوزارشت لە متمانەی پەرلەمانی عیراق و گەلی عیراق دەکات بە لێهاتوویی و توانای نزار ئامێدی بۆ سەرکردایەتیکردنی وڵات لە ماوەی داهاتوودا.
سەرۆکی ئێران ئاماژەی بەوەشدا، پەیوەندییە مێژوویی و کەلتووری و ئایینی قوڵی نێوان هەردوو وڵات، بناغەیەکی گرنگ بۆ پتەوکردنی بەرژەوەندیی هاوبەش و چەسپاندنی ئاسایش و سەقامگیری لە ناوچەکە دابیندەکات.
سەرۆک کۆماری ئێران متمانەی خۆی دووپات کردەوە کە هاریکاریی نێوان دوو وڵات لە ماوەی داهاتوودا پێشکەوتنی لە بوارە جۆربەجۆرەکان بەدەستهێناوە، بە پشتبەستن بە ویستی سیاسیی هاوبەش، ئەمەش بەشدار دەبێت لە قووڵتر کردنی پەیوەندیی ستراتیژی لە هەردوو ئاستی هەر دوو وڵات و ئیقلیمی.
لە پەیامێکی پیرۆزباییدا بەبۆنەی دەستبەکاربوونی وەک سەرۆک کۆماری نوێ، د. لەتیف رەشید، پیرۆزبایی لە نزار ئامێدی دەکات و هیوای سەرکەوتنی بۆ دەخوازێت لە ئەرکەکەیدا.
دەقی راگەیەندراوەکەی د. لەتیف رەشید
گەرمترین پیرۆزبایی خۆم ئاراستەی کاک نزار ئامیدی دەکەم بە بۆنەی هەڵبژاردنی وەک سەرۆکی کۆمار، هیوای سەرکەوتنی بەردەوامی بۆ دەخوازم لە بەجێگەیاندنی ئەو بەرپرسیارێتییە گەورەیە نیشتمانییە.
ئێمە پشت بە گرنگی پتەوکردنی پێشکەوتنی دەوڵەت و چەسپاندنی بناغەکانی سیستەمی دیموکراسی دەبەستین، بە شێوەیەک کە خواستەکانی هاووڵاتیان بۆ ئاسایش و سەقامگیری و خۆشگوزەرانی بگونجێت و گیانی پێکەوە ژیان لە نێوان هەموو چین و توێژەکانی دانیشتووان بەرز بکاتەوە.
هەروەها جەخت لەسەر گرنگی هەوڵی هاوبەش و کاری یەک تیمی دەکەینەوە بۆ ڕووبەڕووبوونەوەی ئاستەنگەکانی ئێستا، هەنگاونان بەرەو پێشەوە لەسەر ڕێگای چاکسازی و گەشەپێدان، و بنیاتنانی دامەزراوەی بەهێز کە توانای جێبەجێکردنی خواستەکانی نەوەکانی داهاتوویان هەبێت.
د. لەتیف جەمال ڕەشید
سەرۆک کۆمار
١١ی نیسانی ٢٠٢٦
دوای هەڵبژاردنی وەک سەرۆک کۆماری عیراق، نزار ئامێدی لە یەکەم وتاریدا رایگەیاند، شەرەفمەندە بە ئەرکەکەی و بەڵێنیش دەدات بەرگریکارێکی دادپەروەربێت لە بەرژەوەندییەکانی گەلی عیراق و بەرپرسیارانە هەڵسوکەوت بکات.
سەرۆک کۆماری نوێی عیراق جەختیکردەوە، لهسهر رێبازی سهرۆك مام جهلال بهردهوام دەبێت و سوپاسی یەکێتی نیشتیمانی کوردستانیشی کرد بۆ پێدانی ئەو متمانەیە و کاندیدکردنی بۆ پۆستی سەرۆک کۆماری عیراق
لە بەشێکی دیکەی وتارەکەیدا، نزار ئامێدی ئاماژەی بەوەکرد، پێویسته لهم ساته ههستیارهدا، کە ناوچهكهی پێدا تێدهپهڕێت بهرپرسیارانهتر ههڵسوكهوت بكهن و هەموو هەوڵێکیان بۆ ئەوەبێت عیراق لە جەنگ بە دور بێت.
ناوبراو دوپاتیشیکردەوە، كاردهكهن بۆئهوهی عیراق بهرهو پێش بچێت و پابەند دەبێت بە کارکردن لەگەڵ دەسەڵاتەکانی جێبەجێکردن، یاسادانان و دادوەرییەکان.
نزار ئامێدی، کاندیدی یەکێتیی نیشتمانیی کوردستان بە سەرۆک کۆماری عیراق هەڵبژێردرا.
ئەمڕۆ شەممە 11ـی 4ـی 2026، ئەنجومەنی نوێنەران بۆ هەڵبژاردنی سەرۆک کۆماری عیراق کۆبووە و لە گەری دووەمدا، نزار ئامێدی کاندیدی یەکێتی بە 227 دەنگ وەک سەرۆک کۆماری نوێی عیرق هەڵبژێردرا
بۆ هەڵبژاردنی سەرۆک کۆمار، دوو گەڕی دەنگدان بەڕێوەچوو، ئەنجامی دەنگدان لە گەڕی یەکەمدا بەم شێوەیە بوو؛
نزار ئامێدی 208 دەنگ
موسەنا ئەمین 17 دەنگ
فوئاد حسێن 16 دەنگ
لە گەڕی دووەمیشدا کە دەنگدان لە نیوان نزار ئامێدی و موسەنا ئەمین دا بوو، ئەنجامی دەنگەکان بەم شێوەیە بوو؛
نزار ئامێدی دەنگ
موسەنا ئەمین دەنگ
بەپێی ئەنجامەکان، نزار ئامێدی کاندیدی یەکێتیی نیشتمانیی کوردستان وەک سەرۆک کۆماری عیراق هەڵبژێردرا.
پڕۆفایلی نزار ئامێدی سەرۆک کۆماری عیراق
- لە ساڵی 1968 لەدایکبووە
- لە ساڵی 2022 بۆ 2024 وەزیری ژینگەی عیراق بوو
- ئەندامی مەکتەبی سیاسیی یەکێتیە
- بەرپرسی مەکتەبی سیاسی یەکێتیە لە بەغداد
- خاوەنی بڕوانامەی بەکالۆریۆسە لە ئەندازیاری میکانیک
- ئەزموونی زیاتر لە 40 ساڵ لە كاری باڵای حکومی و سیاسیدا هەیە
- پەیوەندییەكی پتەوی لەگەڵ لایەنە کوردی و ھێزە سیاسییە سەرەکییەکانی بەغداد هەیە
بەشداری و نوێنەرایەتی عیراقی کردووە لە:
كۆمكاری عەرەبی لە (میسر، جەزائیر، تونس، سعودیە، کوەیت)
کۆنفرانسی نێودەوڵەتی گۆڕانی کەشوھەوا COP21 - پاریس 2015
سەرۆکایەتی وەفدی عیراق بۆ COP28 – لەئیماراتی عەرەبی 2023
کۆبوونەوەکانی كۆمەڵەتی گشتیی نەتەوە یەکگرتووەکان بۆ ژینگە - نایرۆبی 2023
کۆنفرانسی نێودەوڵەتی نەتەوە یەکگرتووەکان بۆ ئاو - نیویۆرک
ئەزموونی سیاسی و ڕێکخراوەیی:
* ئەندامی ئەنجومەنی سەرکردایەتی – یەکێتیی نیشتیمانیی کوردستان
* ئەندامی هاوپەیمانی ئیدارەی دەوڵەت (2022 – تائێستا)
* ئەندامی مەکتەبی سیاسی – یەکێتیی نیشتیمانیی کوردستان (2023 – تائێستا)
* لێپرسراوی بارەگای مەکتەبی سیاسی یەکێتیی نیشتمانیی کوردستان لە بەغداد (2024 – تائێستا)
* لە نووسینگەی سکرتێری گشتی یەکێتیی نیشتیمانیی کوردستان (1993-2003) کاریکردووە
ڕاوێژکاری باڵای سەرۆک مام جەلال و سەرۆک کۆمارەکانی تر بووە لە ساڵی 2005 تا 2022
بەرپرسیارێتیەکان:
- راوێژکاری سەرۆکی کۆمار لە پرسە دەستووری و سیاسییەکان
- پەیوەندی نێوان سەرۆکایەتی و دەسەڵاتە دەستوورییەکان و لایەنە هەرێمییەكان
- پاڵپشتیکردنی پێکهێنانی حکوومەت و بەڕێوەبردنی قەیرانە نیشتمانییەکان
- سەرپەرشتیکردنی بڕیارەکانی سەرۆکایەتی كۆمار
شاناز ئیبراهیم ئەحمەد پەیامێکی بڵاوکردووەتەوە و تێیداهاتووە: لەگەڵ کۆتاییهاتنی ئەرکە رەسمییەکانی هاوسەر و هاوڕێی تەمەنم، عەبدولەتیف جەمال رەشید لە سەرۆکایەتی کۆماردا، هەست بە شانازی دەکەم لە ئاست ئەو میراتە دوانەهاتووەی کە سەرکردایەتییەکەی بۆی جێهێشتووین.
لە پەیامەکەی شاناز ئیبراهیم ئەحمەد دا ئاماژە بەوەشدراوە: زۆرێک لە کار و دەستکەوتە بەرهەمدارەکانی نەبوونە سەردێڕی هەواڵەکان، بەڵام هەوڵ و کۆششەکانی لە پشت پەردەوە، رۆڵییان هەبوو لە هێورکردنەوەی گرژییەکان، دووبارە کردنەوەی کەناڵەکانی پەیوەندی، پاراستنی عیراق لە پەلکێشکردن بۆ ناو ململانێ هەرێمییەکان و ئاڕاستەکردنی وڵات بەرەو رێڕەوێکی پێشکەوتووتر و سەقامگیرتر.
دەقی پەیامەکە
هاونیشتمانیانی ئازیزی عیراق،
لەگەڵ کۆتاییهاتنی ئەرکە رەسمییەکانی هاوسەر و هاوڕێی تەمەنم، عەبدولەتیف جەمال رەشید لە سەرۆکایەتی کۆماردا، هەست بە شانازی دەکەم لە ئاست ئەو میراتە دوانەهاتووەی کە سەرکردایەتییەکەی بۆی جێهێشتووین.
وڵاتەکەمان و ناوچەکەش بە ساڵانێکی پڕ لە ئاڵۆزی و ناسەقامگیریدا تێپەڕین. بەدرێژایی ئەم ماوەیەش، شایەتی ئەوە بووم کە چۆن بە دەستپاکییەوە و بە هەستێکی بەرزی لێپرسراوێتیی نیشتمانیی بەرامبەر وڵات و گەلی عییراق سەرۆکایەتی دەکرد، لە ساتەوەختی فشار و دابەشبووندا، ئەو لەبری خۆنواندن حیکمەتی هەڵبژارد و لەبری رووبەڕووبوونەوەش دیالۆگی کردە پیشە.
زۆرێک لە کار و دەستکەوتە بەرهەمدارەکانی نەبوونە سەردێڕی هەواڵەکان، بەڵام هەوڵ و کۆششەکانی لە پشت پەردەوە، رۆڵییان هەبوو لە هێورکردنەوەی گرژییەکان، دووبارە کردنەوەی کەناڵەکانی پەیوەندی، پاراستنی عیراق لە پەلکێشکردن بۆ ناو ململانێ هەرێمییەکان و ئاڕاستەکردنی وڵات بەرەو رێڕەوێکی پێشکەوتووتر و سەقامگیرتر.
لە هەمان کاتدا، پێویستە راستییەک ئاشکرا بکەین، ئەگەر لەم ماوەیەدا خاوەنی یەکڕیزییەکی گەورەتر و پشتگیرییەکی فراوانتر و کارێکی دەستەجەمعی بەهێزتر بووینایە، دەتوانرا دەستکەوتی زۆر گەورەتر بەدەست بهێنرێت.
شانازیش بەوەوە دەکەم کە لە پێگەی خۆمەوە وەک خانمی یەکەم، بەشدار بووم لە مسۆگەرکردنی ئەنجامدانی مەراسیمێکی شایستە بۆ بەخاکسپاردنی قوربانیانی ئەنفال لە گۆڕە بەکۆمەڵەکاندا دوای تێپەڕبوونی چل و پێنج ساڵ، هەروەها پاڵپشتیکردنی هەوڵەکان بۆ ناسینەوەی ناسنامەی قوربانییە بێسەروشوێنبووەکانی ناو ئەو گۆڕە بەکۆمەڵانە کە تا ئێستاش برینەکانیان خاکی ئێمەیان رەنگ کردووە. بۆ یەکەمجاریش، سەکۆی نووسینگەی خانمی یەکەم بۆ تیشکخستنەسەر منداڵانی خاوەن پێداویستی تایبەت و چەندین پرسی تری مرۆیی بەکارهێنرا کە لە دڵمەوە نزیکن.
بە هەمان شێوەش، هەوڵمداوە پشتگیری ژنانی عیراق بکەم، کە رۆژانێک لە پێشەنگی بزووتنەوەی ژنان بوون لە ناوچەکەماندا، بەڵام لەم چەند دەیەی دواییدا زۆرجار دەنگیان پەراوێز خراوە. هیوادارم توانیبێتم بەشدار بم لە رەخساندنی دەرفەتی راستەقینە بۆ بەشدارییپێکردنیان لە ژیانی گشتی، پەروەردە و سەرکردایەتیکردندا.
نووسینگەی خانمی یەکەم، هەر لە سەرەتاوە دامەزراوەیەکی نوێ و هەندێک جاریش جێگەی مشتومڕ بووە. هەرچەندە کارە مرۆییەکانم و داکۆکیکردنم لە مافەکان و چالاکییە مەدەنییەکانم مێژووەکەی بۆ زۆر پێش ئەم پۆستە رەسمییە دەگەڕێتەوە، بەڵام ئەم پێگە و سەکۆیە دەرفەتی ئەوەی پێدام کە لە گۆڕەپانی نێودەوڵەتیدا نوێنەرایەتی عیراق بکەم، چ لە کۆنفرانسە نێودەوڵەتییەکانی تایبەت بە گۆڕانی کەشوهەوا یان لە کارە مرۆییەکاندا.
لە ساڵانی دواییشدا، نووسینگەی خانمی یەکەم رۆڵێکی کاراتری گێڕا لە خزمەتکردنی بەرژەوەندییە نیشتمانییەکان و پاڵپشتیکردنی پێشکەوتنی ژنان. هیوادارم لەمەودوا ئەم ئەزموونە وەک حاڵەتێکی ناوازە سەیر نەکرێت، بەڵکو وەک سەرەتایەک لێی بڕوانرێت.
لێرەدا دەمەوێت سوپاسی تەواوی تیمەکەم بکەم، کە ماندوونەناسانە و زۆرجار دوور لە چاوی کامێراکان کاریان کرد بۆ پشتگیریکردنی خانمی یەکەم و پەیامەکەمان. دەستخۆشی لە دڵسۆزیی، کارامەیی و بڕوای نەگۆڕیان دەکەم بە خزمەتی گشتی.
پاپەندبوونم بەرامبەر بە عێراق و گەلەکەی و داهاتووەکەی بە نەگۆڕی دەمێنێتەوە. هیوادارم بەردەوام بم لە بەخشین بەو شێوەیەی کە ویژدان و بڕواکانم رێنوێنیم دەکەن.
شاناز ئیبراهیم ئەحمەد