عیراق
سندوقی گەشەپێدانی عیراق هەلی وەبەرهێنان بە بەهای 40 ملیار دۆلار دەخاتە روو و باس لەوەدەكات، دەتوانرێت لەبری هاوردەكردن وەبەرهێنان لە ناوخۆدا بكرێت.
سندوقی گەشەپێدانی عیراق ئاشكرای كرد، هەلی وەبەرهێنان بە بەهای 40 ملیار دۆلار لە ئارادایە بۆ بەرهەمهێنانی ئەو كەلوپەلانەی لە جیاتی هاوردەكردنیان لە دەرەوە، لە ناوخۆی وڵاتدا بەرهەم دەهێنرێن.
محەمەد نەجاڕ سەرۆكی سندوقەكە رایگەیاند، سەرمایەی سندوقەكە بۆ پڕۆژەی وەبەرهێنانە و جیاوازە لە بودجەی گشتی كە تەنیا خەرجییە.
ئاماژەی بەوەشكرد، سندوقەكە بەردی بناغەی دروستكردنی ئابورییەكی جێگرەوەیە، بەتایبەت لە ئێستادا كە بودجە پەسەند نەكراوە.
روونیشیكردەوە، ئامانجی ئەم هەنگاوە گۆڕینی هاوردەكردنی ساڵانەیە بۆ دروستكردنی كارگە و وەبەرهێنانی ناوخۆیی بە هاوكاریی وەبەرهێنەرانی نێودەوڵەتە، كە ئەمەش جگە لە كەمكردنەوەی بارگرانیی هاوردەكردن، بە هەزاران هەلی كاری نوێ بۆ هاووڵاتییان دابین دەكات و دەبێتە هۆی گەشەپێدانی راستەقینەی ئابوری لە وڵاتدا.
عیراق حەوت رێککەوتن لەگەڵ واشنتۆن بە بڕی 200 ملیار دۆلار ئیمزادەکات.
باسم محەمەد خەزیر، وەزیری نەوتی عیراق، لە چاوپێکەوتنێکی تەلەفزیۆنیدا رایگەیاند، لە میانی سەردانەکەی سەرۆکوەزیران عەلی زەیدی بۆ ئەمریکا، حەوت رێککەوتنی گرنگ بە کۆی بڕی نزیکەی 200 ملیار دۆلار ئیمزاکراون کراون.
وتیشی، رێککەوتنەکان هەم هاوبەشێتی لەگەڵ کۆمپانیا گەورەکانی ئەمریکا بۆ گەشەپێدانی کێڵگە نەوتییەکان و هەمیش رێککەوتنێک لەگەڵ سوریا بۆ هێڵی گواستنەوەی نەوت لەخۆدەگرن.
وەزیری نەوتی عیراق ئاشکرای کرد، توانای بەرهەمهێنانی گشتی وڵات گەیشتووەتە زیاتر لە 4.8 ملیۆن بەرمیل لە رۆژێکدا، ئەمەش لە چوارچێوەی دیدگایەکی ستراتیژیدایە بۆ گەشەپێدانی کەرتەکانی نەوت و گاز، کە گفتوگۆیەکی جدی لەگەڵ رێکخراوی ئۆپێک بۆ زیادکردنی ئاستی هەناردەکردن لەخۆدەگرێت.
دەزگای ئاسایشی نیشتمانیی عیراق ئاشکرایدەکات، لە بەغداد دەستیان بەسەر کارگەیەکی دروستکردنی فڕۆکەی بێفڕۆکەواندا 'درۆن' گرتووە.
دەزگای ئاسایشی نیشتمانی لە راگەیەنراوێکدا ئاماژەی بەوەکرد، دوای هەوڵێکی وردی هەواڵگری، رێگرییان لە هەوڵێکی دروستکردنی درۆن کردووە و سێ تۆمەتباری پەیوەندیداریان دەستگیرکردووە.
ئەوەشیخستەڕوو، بە بڕیاری دادوەری دادگای لێکۆڵینەوەی، مەفرەزەکانی ئاسایش فەرمانی دەستگیرکردن و پشکنینیان جێبەجێکردووە، لە ئەنجامدا دەستیان بەسەر 25 کەرەستەی فڕۆکەی بێفڕۆکەوان و ئامێر و کەلوپەلی کۆکردنەوە و بەرهەمهێناندا گرتووە.
دەزگای ئاسایشی نیشتمانیی عیراق راشیگەیاند، لێکۆڵینەوەکان بوونە هۆی دۆزینەوەی کارگەیەکە کە تەختە و پارچەی دروستکراو لە مادەی "کاربۆن" و پێداویستیی تەکنیکیی تێدا بووە کە بۆ قۆناغەکانی بەرهەمهێنان بەکارهێنراون.
دەزگای ئاسایشی نیشتمانی جەختیکردووەتەوە، ئەم هەوڵە بەرپەرچدراوەتەوە پێش ئەوەی پڕۆسەی دروستکردنی درۆنەکان تەواو بێت، هەروەها لێکۆڵینەوەکان بەردەوامن بۆ زانینی پەیوەندیی ئەم چالاكییە بە هەر پیلانێکەوە کە زیان بە ئاسایشی نیشتمانی بگەیەنێت، تا تۆمەتباران رەوانەی دادگا بكرێن.
وتەبێژی حكومەتی عیراق، ئامادەیی بەغدادی بۆ نێوەندگیركردنی نێوان ئەمریكا و ئێران راگەیاند و دەشڵێت پەیوەندییەكانی نێوان عیراق و ئەمریكا چوەتە قۆناغێكی نوێوە.
حەیدەر عەبودی لە چاوپێكەوتنێكدا رایگەیاندووە، هەڵبژاردنی واشنتۆن وەك یەكەم وێستگەی سەردانە دەرەكییەكانی سەرۆك وەزیران كارێكی هەڕەمەكی نەبووە، بەڵكو بەهۆی هەستیاریی قۆناغەكە و خوێندنەوەیەكی وریایانەی بەغدادەوەیە بۆ هاوكێشە خێراكان.
ئاماژەی بەوەشكردووە، پەیوەندییەكانی بەغداد و واشنتۆن چووەتە قۆناغێكی نوێوە بەجۆرێك لە دوو دەیەی رابردوودا پەیوەندییەكان زیاتر ئەمنی بوون، بەڵام لەمەودوا ئابوری دەبێت.
وتەبێژی حكومەتی عیراق راشیگەیاندووە، داخستنی گەروی هورمز زیانی بە ئابوری عیراق گەیاندووە و ئەم رەوشە وا لە بەغداد دەكات بە شێوەیەكی بەپەلە بەدوای رێڕەوی نوێدا بگەڕێت بۆ زامنكردنی داهاتەكانی و هەمەجۆركردنی رێگەكانی هەناردەكردن.
هەروەها جەختیشیكردوەتەوە كە عیراق پەیوەندیی باش و هاوسەنگی لەگەڵ وڵاتانی دراوسێ و ناوچەكە هەیە، هەربۆیە سەرۆك وەزیران كۆتایی ئەم هەفتەیە سەردانی تاران دەكات و دواتریش سەردانی ئەنقەرە دەكات، ئامادەیی بەغدادیشی دەربڕیوە بۆ نێوەندگیری لەنێوان تاران و واشنتۆن بۆ هێوركردنەوەی رەوشەكە .
ئۆپراسیۆنەكانی حكومەتی عیراق بۆ روبەڕوبوونەوەی گەندەڵی بەردەوامە و لە دوایین پێشهاتیشدا دەستەی دەستپاكی عیراق بەدوای 55 داواكراودا دەگەڕێت لە پارێزگای سەڵاحەدین.
سەرچاوەیەكی ئەمنی بە میدیا ناوخۆییەكانی عیراقی راگەیاندووە، هێزێكی تایبەتی دەستەی دەستپاكی گەمارۆی دیوانی پارێزگای سەڵاحەدینیان داوە، بە مەبەستی دەستگیركردنی 55 فەرمانبەر، كە لەلایەن دادگاوە بە تۆمەتی تێوەگلان لە دۆسیەكانی گەندەڵی داواكراون.
لە ئێستاشدا بەپێی بڕیار و فەرمانی رەسمی دەسەڵاتی دادوەری، كار بۆ دەستگیركردنی ئەو تۆمەتبارانە دەكرێت كە تۆمەتی گەندەڵی و خراپبەكارهێنانی دەسەڵاتیان دراوەتە پاڵ.
ئەم جوڵەیەی دەستەی دەستپاكی لە كاتێكدایە لە كۆتایی مانگی حوزەیرانی رابردووەوە، هەڵمەتێكی فراوانی دەستگیركردن بۆ ژمارەیەك لێپرسراوی سیاسی، حكومی، پەرلەمانتار و بازرگانان دەستیپێكردووە، لەسەر دۆسیەكانی گەندەڵی و بەكارهێنانی دەسەڵات بەشێوەیەكی خراپ.
سەرۆكی لیژنەی دارایی ئەنجومەنی نوێنەرانی عیراق رایگەیاند، بەهۆی نەبونی یاسای بودجەوە ، ئاڕاستەیەك هەیە بۆ پەسەندكردنی پڕۆژەیاسای قەرزكردن بۆ ساڵی 2026 .
عودەی عەواد سەرۆكی لیژنەی دارایی لە ئەنجومەنی نوێنەرانی عیراق رایگەیاند، هەوڵێك هەیە بۆ ئەوەی پڕۆژەیاسای قەرزكردن و بەخشینەكان بۆ ساڵی 2026 لە ئەنجومەنی نوێنەران پەسەند بكرێت، ئەمەش بەهۆی نەبوونی یاسای بودجەی گشتییە. دەشڵێت لەگەڵ وەزیری دارایی و لێپرسراوانی تردا پێشنیازێكیان سەبارەت بە یاسای قەرز تاوتوێكردووە و بڕیارە وەزیری دارایی پێشنیازەكە پێشكەشی لیژنەی دارایی ئەنجومەنی نوێنەران بكات بۆ ئەوەی ئەركی دارشتنی یاساكە بگرێتە ئەستۆ.
رونیشیكردوەتەوە كە یاساكە دەسەڵات دەداتە حكومەت بۆ وەرگرتنی قەرزی ناوخۆیی یاخود دەرەكی بۆ دابینكردنی مووچە و بەڕێوەبردنی كاروباری وڵات .
بەهۆی نەبوونی یاسای بودجەی 2026وە، لیژنەی دارایی ئەنجومەنی نوێنەران پەنا بۆ ئامادەكردنی پرۆژە یاسایەك تایبەت بە پێدانی قەرز بە حكومەت دەبات.
عودەی عەواد، سەرۆكی لیژنەی دارایی ئەنجومەنی نوێنەران لە لێدوانێكی رۆژنامەوانیدا رایگەیاند، بەهۆی نەبوونی یاسای بوودجەی 2026ـەوە، هەنگاویان ناوە بۆ ئامادەكردنی رەشنووسی پرۆژەیاسایەك، كە تێیدا رێگە بە حكومەتی عیراق دەدات قەرز لەناوخۆ و دەرەوە بكات.
ئەوەشی خستەڕوو، هێشتا كارەكان بۆ ئامادەكردنی پرۆژەیاساكە بەردەوامە و لەگەڵ وەزارەتی دارایی و لایەنە پەیوەندیدارەكانیش لەسەر ئەو پرسە گفتوگۆیانكردووە.
سەرۆكی لیژنەی دارایی ئاماژەی بەوەشدا، پرۆژەیاساكە دەسەڵات دەداتە حكومەت و وەزارەتی دارایی، لەناوخۆ و دەرەوە بەدوای قەرزدا بگەڕێن، وتیشی، لەناوخۆدا حكومەت دەتوانێت قەرز لە بانكی ناوەندی وەربگرێت بۆ زامنكردنی موچە و راییكردنی كاروبارەكانی دەوڵەت.
هێشتا 10 رۆژی ماوە بۆ کۆتایی مانگی حەوت، بەڵام دابەشکردنی موچە لە عیراق دەستی پێ کردووە.
بێستون سەلام، پەیامنێری کوردسات نیوز رایگەیاند: ئەمڕۆ لە عیراق، دەست بە دابەشکردنی موچەی مانگی حەوت کراوە و کۆمپانیای نەوتی باکور کە سەر بە وەزارەتی نەوتە، موچەیان وەرگرتووە.
دەستەی دەسپاکی فیدراڵی عیراق، دەستگیرکردنی بەرپرسێکی لە کۆمپانیای دابەشکردنی کارەبای بەغداد راگەیاند، بەهۆی تێوەگلانی لە دزینی کەلوپەلی کارەبایی کە بەهاکەیان نزیکەی چوار ملیار و نیو دینار دەبێت.
دەستەی دەسپاکی لە راگەیەندراوێکدا ئاماژەی بەوە کردووە، کە تیمێکی وردبینی و لێکۆڵینەوە سەردانی وەزارەتی کارەبایان کردووە.
دوای ئەنجامدانی وردبینی پێویست، دەرکەوتووە کە بەرپرسی کۆگاکانی سەر بە لقی دابەشکردنی رەسافە، دەستی بەسەر کۆمەڵێک کابڵـی کارەباییدا گرتووە کە بەهاکەیان دەگاتە(4.406.000) چوار ملیار و چوارسەد و شەش ملیۆن دینار.
دەستەکە روونیشی کردەوە کە تۆمەتبارەکە بە هاوکاری دوو خاوەن ئۆتۆمبێلی بارهەڵگر ئەو کەلوپەلانەی دزیوە.
ئەم پرۆسەیە لەسەر بنەمای فەرمانی دادوەر لە دادگای تاوانەکانی بەرەنگاربوونەوەی گەندەڵی ناوەندی و پاڵپشت بە ئەحکامەکانی ماددەی (315) لە یاسای سزادانی عیراقی جێبەجێ کراوە.
هاوکات پەڕاوی دەستبەسەرداگرتنی یاسایی رێکخراوە و لەگەڵ تۆمەتبارەکەدا ئاڕاستەی دادوەری لێکۆڵینەوەی تایبەتمەند کراوە، ئەویش بڕیاری راگرتنی تۆمەتبارەکەی داوە تا تەواوبوونی لێکۆڵینەوەکان.
راوێژكارێكی حكومەت رایگەیاند، 48 ڕێككەوتنەكە لەگەڵ واشنتن كرانەوەی ئابووری عیراق بەهێزتر دەكەن، و قەبارەی داراییەكان دەگاتە60 ملیار دۆلار.
مەزهەر محەمەد ساڵح، راوێژكاری سەرۆك وەزیرانی عیراق، رایگەیاند، ئیمزاكردنی 48 رێككەوتن و یاداشتی لێكتێگەیشتن لەگەڵ ئەمریكا، هەنگاوێكی گرنگە بۆ بەهێزكردنی كرانەوەی ئابووری و راكێشانی وەبەرهێنانی بیانی، بەڵام جەختی لەوەشكردەوە، كاریگەری راستەقینەی ئەو رێككەوتنانە بەندە بە گۆڕینیان لە سەر كاغەزەوە بۆ پڕۆژەی كرداری.
روونیشكردەوە، متمانەی نێودەوڵەتی بە ئابووری عیراق تەنها بە چاكسازی راستەقینە، وەك ئاسانكاری رێكارە كارگێڕییەكان، شەفافیەت، و دابینكردنی سەقامگیری یاسایی و ئەمنی بەدی دێت.
راشیگەیاند، قەبارەی دارایی ئەو 48 رێككەوتن و یاداشتی لێكتێگەیشتنەدەگاتە 60 ملیار دۆلار، ئەو بڕە پارەیە وەك وەبەرهێنان لە پڕۆژە ستراتیژییەكانی عیراقدا خەرج دەكرێت، كە ئامانج لێی پەرەپێدانی ژێرخانی ئابووری و بەهێزكردنی كەرتی تایبەتە لە وڵاتدا.
مەزهەر محەمەد ساڵح، وتیشی، ئەو هاوبەشییانە دەبنە هۆی زیادبوونی بەشداری كەرتی تایبەت لە كۆی بەرهەمی ناوخۆیی، زیادبوونی داهاتە نانەوتییەكان و گەشەی ئابووری.
هێزەكانی دەزگای دژەتیرۆری عیراق، لە دوو ئۆپراسیۆنی جیاوازدا لە پارێزگای كەركوك، دوو چەکداری پاشماوەكانی رێكخراوی تیرۆریستی داعشیان دەستگیركرد و لە هەمان پارێزگاشدا دەستیان بەسەر كۆگایەكی چەك و تەقەمەنیدا گرت.
بەپێی راگەیەندراوێكی دەزگای دژەتیرۆری عیراق، ئۆپراسیۆنەكان لەسەر بنەمای زانیاریی وردی هەواڵگری و بەدواداچوونی بەردەوام ئەنجامدراون. تێیدا لە لایەن هێزەكانیانەوە لە دوو چالاكی جیاوازدا لە سنووری پارێزگای كەركوك، دوو چەکداری پاشماوەكانی داعشیان دەستگیركردووە.
لە راگەیەندراوەكەدا ئاماژە بەوەشكراوە، لە چوارچێوەی ئەركەكانیاندا بۆ پاككردنەوە و لەناوبردنی پاشماوەكانی چەك و تەقەمەنییەكانی داعش، لە هەمان پارێزگا دەستیان بەسەر كۆگایەكی چەك و تەقەمەنیدا گرتووە و پووچەڵیان كردووەتەوە. كۆگاكە پێكهاتبوو لە چەندین گولەهاوەن، موشەك، حەشوەی موشەكی ئاڕ پی جیحەوت و هەنارەی دەستی.
دەزگای دژەتیرۆری عیراق، جەختیشی كردووەتەوە كە هێزەكانیان بەردەوام دەبن لە ئۆپراسیۆنەكانیان، بە ئامانجی بنبڕكردنی تیرۆر و دەستەبەرکردنی سەقامگیری.
سەرۆك وەزیرانی عیراق دوای ئیمزاكردنی 48 رێككەوتن لەگەڵ واشنتۆن سەردانەكەی بۆ ئەمریكا كۆتایی پێهێنا و جەختی لەسەر بەردەوامبوون لە جێبەجێكردنی هاوبەشییەكان لەگەڵ ئەو وڵاتە كردەوە.
عەلی زەیدی سەرۆك وەزیرانی عیراق لە پۆستێكدا لە تۆڕی كۆمەڵایەتی ئێكس ئاشكرایكرد، كۆتایی بە سەردانەكەی بۆ واشنتۆن دەهێنێت و دەگەڕێتەوە بەغداد، هەروەها سوپاسی ئیدارەی ترەمپ و گەلی ئەمریكای كردووە بۆ ئەو پێشوازییە گەرمەی لێیان كراوە.
زەیدی جەختی لە دووبارە پێداگری حكومەتەكەی بۆ بەردەوامبوون لە جێبەجێكردنی هاوبەشی ستراتیژی ئابووری لەگەڵ ئەمریكا و بەهێزكردنی متمانەی هەردوولا كردووە، بە وتەی خۆی ئەم یاداشتانە دەبنە هۆی بنیاتنانی قۆناغێكی نوێ لە پەیوەندی دوو قۆڵی لەسەر بنەمای بەرژەوەندی هاوبەش لە بوارە جیاوازەكاندا.
لای خۆیەوە وەزیری دەرەوەی عیراق رایگەیاندووە، رۆژی پێنجشەممەی داهاتوو سەرۆك وەزیرانی عیراق بە سەردانێكی رەسمی دەگاتە تاران و رۆژی 28ی مانگیش سەردانی ئەنكەرە دەكات.
نزار ئامێدی، سەرۆک کۆماری عیراق، ئەمڕۆ شەممە، ئیدانەی ئەو هێرشانەی کرد کە کرانە سەر هەردوو شاری هەولێر و سلێمانی، و جەختی لەسەر رەتکردنەوەی عیراق کردەوە بۆ ئەوەی ببێتە گۆڕەپانی ململانێکان یان مەیدانێک بۆ یەکلاکردنەوەی بەرژەوەندی ناوچەیی.
سەرۆک کۆمار لە بڵاوکراوەیەکدا لە تۆڕی کۆمەڵایەتیی ئیکس، رایگەیاند: ئیدانەی ئەو دەستدرێژییانە دەکەین کە کرانە سەر هەردوو شاری هەولێر و سلێمانی، و جەخت دەکەینەوە کە هەر بەئامانجگرتنێکی خاکی عیراق، لەژێر هەر ناو و پاساوێکدا بێت، پێشێلکارییەکی رەتکراوەی سەروەریی عیراقە و ئاسایشی هاووڵاتیان و سەقامگیریی وڵات دەخاتە مەترسییەوە.
وتیشی: عیراق رەتیدەکاتەوە ببێتە گۆڕەپانێک بۆ ململانێکان یان مەیدانێک بۆ یەکلاکردنەوەی بەرژەوەندی ناوچەیی، و جارێکی تر پابەندبوونی خۆی بەو پێوەندییانە دەربڕییەوە کە لەسەر بنەمای رێزی یەکتر و دراوسێیەتیی باش دامەزراون، بە شێوەیەک کە سەروەریی دەوڵەتان بپارێزێت و گەلانی ناوچەکەش لە پەرەسەندنی زیاتری گرژی و ناسەقامگیری بەدوور بگرێت.
سەرۆک وەزیرانی عیراق، پێشوازی لەو لێکتێگەیشتنە کرد کە لە نێوان بانکی ناوەندیی عیراق و وەزارەتی خەزێنەی ئەمریکادا بەدی هاتووە، و رایگەیاند کە ئەمە هەنگاوێکی گرنگە لە کاروانی چاکسازیکردنی کەرتی بانکی و بەهێزکردنی تێکەڵبوونی بە سیستمی دارایی جیهانییەوە.
سەرۆک وەزیران ئاماژەی بەوەدا: ئامادەکردن و گەڕانەوەی حەوت بانکی عیراقی بۆ نێو کەناڵەکانی ناردن و مامەڵەی بانکیی دەرەکی بە دراوەکانی دیکە، وەک سەرەتایەک بۆ گەڕانەوەی شایستەیی و توانایان بۆ مامەڵەکردن بە دۆلاری ئەمریکی دوای تەواوکردنی پێداویستییەکانی پابەندبوون و حوکمڕانی، دووپاتکردنەوەی سەرکەوتنی ئەو رێبازە چاکسازییە داراییەیە کە حکومەت پەیڕەوی دەکات، هاوکات متمانە بە کەرتی بانکیی عیراق بەهێزتر دەکات و ئاسۆیەکی فراوانتر لەبەردەم ئابووریی نیشتمانی و وەبەرهێناندا دەکاتەوە.
لە کۆتاییدا، سەرۆک وەزیران جەختی لەوە کردەوە: بەردەوام دەبن لە پشتگیریکردنی چاکسازییە دارایی و بانکییەکان، و چەسپاندنی بنەماکانی شەفافیەت و حوکمڕانی، بەو شێوەیەی کە خزمەت بە بەرژەوەندییەکانی عیراق دەکات و پێگەی ئابووریی وڵات لەسەر ئاستی ناوچەیی و نێودەوڵەتیدا بەرزتر دەکاتەوە.
عیراق نزیكەی 50 رێككەوتن و یاداشتی لێكتێگەیشتن و هاوكاری ئابوریی لەگەڵ ئەمریكا ئیمزاكرد لە بوارەكانی نەوت و پیشەسازیی و دارایی و تەكنەلۆژیا.
بەپێی راگەیەنراوێكی نوسینگەكەی، بە چاودێری عەلی زەیدی سەرۆك وەزیرانی عیراق، 48 رێككەوتن و یاداشتی لێكتێگەیشتن و هاوكاری ئابوری لەگەڵ ئەمریكا لە چەندین بواری جیاجیادا ئیمزا كردووە.
ئاماژەی بەوەشكردووە، رێككەوتن و یاداشتەكانی لێكتێگەیشتن هاوكاری و هاوبەشیی لە نێوان وەزارەتەكانی نەوت و كارەبای عیراق و كۆمپانیاكانی ئەمریكا لە خۆدەگرێت وەك كۆمپانیای ئێكسۆن مۆبیل و كەی بی ئاڕ و شێڵ و هالیبەرتۆن و جی ئەی ڤیرنوڤا، رێككەوتنێكی تریش بۆ دابینكردنی خزمەتگوزاریی ستارلینك لە عیراق، لە نێوان دەستەی راگەیاندن و پەیوەندییەكان و كۆمپانیای ستارلینك ئیمزاكراوە.
راشیگەیاندووە، چەند رێككەوتنێكی تریش لەگەڵ ژمارەیەك كۆمپانیای ئەمریكی ئیمزاكراون تایبەت بە نۆژەنكردنەوەی بۆری گواستنەوەی نەوت لە عیراقەوە بۆ بەندەری بانیاس لە سوریاو دەریای سپی ناوەڕاست، جگە لە چەندین رێككەوتنی تر لە بوارەكانی پەروەردە و تەكنەلۆژیا و دەرمان و كەرتی تایبەت.
ژوری بازرگانیی ئەمریكاش رایگەیاندووە، ئەو یاداشتنی لێكتێگەیشتن و رێككەوتنانەی لە نێوان ئەمریكا و عیراق ئیمزاكراون و بەهاكەیان دەگاتە زیاتر لە 60 ملیار دۆلار.
سەرەرای هەوڵە بەردەوامەكانی سەرۆك وەزیرانی عیراق، واشنتۆن رەتیدەكاتەوە سزاكانی سەر بانكە عیراقییەكان هەڵبوەشێنێتەوە.
سەرچاوەیەك وردەكارییەكانی كۆبوونەوەی نێوان عەلی زەیدی سەرۆك وەزیرانی عیراق و وەزارەتی گەنجینەی ئەمریكای ئاشكراكردووە و رایگەیاندووە، زەیدی لە كۆبوونەكەدا داوای لە لێپرسراوانی وەزارەتی گەنجینەی ئەمریكا كردووە پێداچوونەوە بەو سزایانەدا بكات كە بەسەر بانكە عیراقییەكاندا سەپێنراون و هەڵیانبوەشێنێتەوە، چونكە رێگە نادەن ئەو بانكانە دۆلار بفرۆشتن.
ئەو سەرچاوەیە دەڵێت، ئەمریكا حكومەتی عیراقی ئاگاداركردووەتەوە، چەندین بانك لە ساڵانی رابردوودا سزادراون بەهۆی قاچاخچێتیكردن بە پارە و بەكارهێنانی سیستمی دارایی عیراق بۆ گواستنەوەی نایاسایی، ئەوەش وایكردوە هەڵگرتنی ئەو سزایە لەسەر بانكە سزادراوەكانی عیراق لە ئێستادا ئەستەم بێت.
بەپێی ئامارەكانی بانكی ناوەندیی عیراقیش، لە ئێستادا 81 بانكی حكومی و ناحكومی چالاكن دوورن لە سزاكانی ئەمریكا، 32 بانكیش سزادراون.