عەلی زەیدی رایگەیاند، لە پێنج مانگی رابردودا توانیویانە گەندەڵی لاوازبکەن و جەختیشدەکاتەوە دەبێت چەک تەنها لە ژێر کۆنتڕۆڵی حکومەتدا بێت.

لە میانی چاوپێکەوتنێکی لەگەڵ ئاژانسی عیراقییە عەلی زەیدی، سەرۆک وەزیرانی عیراق رایگەیاند، هیچ چەکێک لە دەرەوەی دەوڵەتدا نابێت و ئەمە بڕیاری کۆتاییە.

ئاماژەی بەوەشکرد، سێ گروپ چەکیان داناوە و گفتوگۆلەگەڵ چوارگروپی تر بەردەوامە و دەبێت تا 30ـی حوزەیرانی ساڵی 2027 ئەو پرسە بەتەواوەتی یەکلایکرابێتەوە.

 لەبارەی داخستنی سنورەکانیان لەگەڵ ئێران، زەیدی دەڵێت؛ داخستنی سنورەکانی عیراق و ئێران لەبەرژەوەندی هیچ لایەکیاندا نییە و ئەوە  بە مانای گەمارۆدانی ئابوریی عیراق دێت.

سەرۆک وەزیرانی عیراق رایگەیاند، هیچ سەربازێکی ئەمریکی  تەنانەت وەک راوێژکاریش لە عیراقدا نەماوە و دووپاتی کردەوە، کە عیراق بە هیچ شێوازێک بەشداری لە هیچ جەنگێکدا ناکات و دەبێتە خاڵی کۆبوونەوەی لایەنەکان، نەک  بەرەیەک لە جەنگەکە.

لەبارەی کابینەی حکومەتەکەشیەوە، عەلی زیدی باسی لەوەکردوە،  گەندەڵی بوەتە سیستماتیک و چەسپاوە لە کولتوری هەندێکدا،  روبەڕوبونەوەشی بنەمایە بۆ بنیاتنانی دەوڵەت.

زەیدی دوپاتیدەکاتەوە،  ئەگەر نەیانتوانیبێت گەندەڵی بنبڕکەن، ئەوا لایکەم توانیویانە لاوازی بکەن و سەرەڕای ئەوەی فشاری زۆری لەسەرە، بەڵام بەردەوام دەبن لە شەڕی گەندەڵی.

لەبارەی دەستکاریکردنی نرخی دینار بەرانبەر بە دۆلار، زەیدی دەڵێت؛ کاردەکەن بۆ ئەوەی نرخی 100 دۆلار لە بازاڕدا  بکەنەوە بە 155 هەزار دینار و کەمتریش.

وەفدێکی هەرێمی کورسدتان بەمەبەستی بەدواداچون بۆ شایستەداراییەکان و پرسی بودجە لە ساڵی 2027 سەردانی بەغداد دەکات.

سەرچاوەیەک لەوەزارەتی دارایی هەرێم، بە کوردسات نیوزی راگەیاند،  ئێوارەی ئەمڕۆ وەفدێکی حکومەتی هەرێم سەردانی بەغداد دەکات و لەگەڵ وەزیری دارایی عیراق کۆدەبێتەوە.

ئەو سەرچاوەیە ئاماژەی بەوەشکرد، وەفدەکە لە سەرۆکی دیوانی ئەنجومەنی وەزیران، سکرتێری ئەنجومەنی وەزیران، سەرۆکی فەرمانگەی هەماهەنگی و بەدواداچون، بریکاری وەزارەتی سامانە سروشتییەکان، بەڕێوەبەرانی گشتیی بودجە و ژمێرکاری لە وەزارەتی دارایی و ئابوریی هەرێمی کوردستان پێکدێن.

بە گوێرەی زانیارییەکان، وەفدەکە بەهەماهەنگی لەگەڵ نوێنەرە کوردستانییەکان لە دەسەڵاتە فیدڕاڵییەکان،  لەگەڵ وەزیری دارایی عیراق کۆدەبنەوە و پرسەکانی گەیشتن بە تێگەیشتنێکی هاوبەش و دادپەروەرانە لەسەر پابەندییە دارایی و نەوتییەکانی هەرێمی کوردستان گفتوگۆ دەکەن.

هەروەها ماف و شایستە دارایییەکانی هەرێم لە بودجەی گشتیی فیدراڵی بۆ ساڵی 2027 بەشێکی تری گفتوگۆکانی نێوان وەفدەکەی هەرێم و وەزیری دارایی عیراق دەبن.

وەزیری گەیاندنی عیراق جارێكی تر جەخت لە قەدەغەكردنی ئەپلیكەیشنی وەیز بۆ رێنیشاندان دەكاتەوە، دەشڵێت، لەلایەن گەنجان و كۆمپانیا ناوخۆییەكانی عیراقەوە ئامادەیی نیشاندراوە بۆ دروستكردنی ئەپلیكەیشنی هاوشێوەی وەیز.

مستەفا سەنەد، وەزیری گەیاندنی عیراق لە كۆڕبەندی حكومڕانی هێڵی ئینتەرنێت لە بەغداد وتی، پێداگرن لەسەر قەدەغەكردنی ئەپلیكەیشنی وەیز بۆ رێنیشاندان و بەرنامەی تری هاوشێوە بۆ هاوڵاتییان دەستەبەر دەكەن.

ئەوەشی خستەڕوو، لەلایەن گەنجان و كۆمپانیا ناوخۆییەكانی عیراقەوە ئامادەیی نیشاندراوە بۆ دروستكردنی ئەپلیكەیشنی هاوشێوەی وەیز و ئەپڵیكەیشنی دیكە بۆ هاتوچۆی ئۆتۆمبێل.

ئاماژەی بەوەشدا، لە داهاتوودا هێندەجێگرەوە بۆ ئەپڵیكەیشنی وەیز بەردەست دەبێت، كە چیتر پێویست نەكات ئەو ئەپڵیكەیشنە بەكار بهێنرێت.

لە ئێستادا وەزیری گەیاندنی عیراق وەزارەتەكەی راسپاردووە لە سەرەتای ساڵی داهاتوودا ئەپڵیكەیشنی وەیز لەناوخۆی عیراقدا قەدە غەبكات، بە پاساوی ئەوەی بەرهەمهێنراوی وڵاتی ئیسرائیلە.

راگەیاندنی هێڵی ئاسمانیی عیراقی، لەبارەی خستنەڕووی سیستمێکی نوێی نرخ بۆ گەشتە ناوخۆیی و نێودەوڵەتییەکانی، بە ئامانجی فراوانکردن و هەمەجۆرکردنی بژاردەکانی گەشتیاران و دابینکردنەوەی بلیتی گونجاو لەگەڵ پێداویستی و توانای داراییان.

بەڕێوەبەری گشتیی کۆمپانیاکە، مستەفا تاڵیب، رایگەیاند: ئەم هەنگاوە لە چوارچێوەی رێنماییەکانی وەزیری گواستنەوە، وەهاب الحەسەنی، و لەپێناو بەرزکردنەوەی ئاستی خزمەتگوزارییەکانی گواستنەوەی نیشتمانی دێت، بە جۆرێک کە وەڵامدەری پێداویستییەکانی گەشتیاران بێت.

تاڵیب روونی کردەوە: سیستمە نوێیەکە چەندین بژاردەی نرخی جیاواز دابین دەکات، کە نەرمی زیاتر بە گەشتیاران دەدات بۆ هەڵبژاردنی بلیتی گونجاو لەگەڵ بودجەیان، هەروەها هەڵسەنگاندن لە نێوان تێچووی گەشتەکە و ئەو خزمەتگوزاریانەی پێویستیان پێیەتی.

ئاماژەی بەوەش کرد: پۆلێنبەندییە نوێیەکان ئاستی جیاواز لە خزمەتگوزاری و تایبەتمەندی لەخۆ دەگرن، لەوانە کێشی جۆراوجۆری جانتا و زەرفەکان و ئەگەری دەستکاریی کردن یان گۆڕینی کاتی گەشتەکان، بە گوێرەی مەرجەکانی هێڵەکە، ئەمەش بژاردەی نەرمتر بۆ گەشتکردن بە هەموو توێژەکان پێشکەش دەکات.

وەزارەتی دەرەوەی ئەمریكا رایگەیاند، پێویستە سەرۆك وەزیرانی عیراق ئەو بەڵێنانەی بە سەرۆكی ئەمریكای داوە جێبەجێی بكات.

وتەبێژی وەزارەتی دەرەوەی ئەمریكا، لە كۆنفرانسێكدا جەختیكردەوە، واشنتۆن چاوەڕوان دەكات عەلی زەیدی سەرۆك وەزیرانی عیراق،  پابەندی ئەو بەڵێنە بێت كە لە سەردانەكەیدا بۆ واشنتۆن بە ی سەرۆكی ئەمریكای دابوو، كە ئەوانیش بەرەنگاربوونەوەی تیرۆر، رێگریكردن لە ئەنجامدانی هەر هێرشێك لە ناو خاكی عیراق، و بنیادنانی هاوبەشییەكی ئەمریكی - عیراقی كە خزمەتی بەرژەوەندیی هەردوو وڵات بكات.

وتیشی، ئامانجەكانی واشنتۆن نەگۆڕە لە عیراق، ئەویش بریتییە لە عیراقێكی خاوەن سەروەری، ئارام و  گەشەكردوو كە پێداویستییەكانی گەلەكەی دابین بكات و بەشداری لە بەهێزكردنی سەقامگیریی ناوچەكەدا بكات.

هاوكات وتەبێژی وەزارەتی دەرەوەی ئەمریكا ئێرانی بەوە تۆمەتبار كرد، گروپە چەكدارەكان بۆ تاڵانكردنی سامانەكانی عیراق و هەڕەشەكردن لە سەروەرییەكەی بەكاردەهێنێت.

 

حكومەتی عیراق بوونی هەر بنكە و بارەگایەكی حوسییەكان لەناو خاكی وڵاتەكەی رەتدەكاتەوە و جەخت لەوەدەكاتەوە، بوونی چەكدارانی بیانی پێچەوانەی دەستوورە.

حەیدەر عەبودی وتەبێژی حكومەتی عیراق رایگەیاند: هیچ بنكەیەكی حوسیەكان لەسەر خاكی عیراقدا نییە و ئەوانەی باسی دەكەن، هیچ بەڵگەیەكیان نییە و تەنها پشت بە گێڕانەوەكانی تۆڕە كۆمەڵایەتییەكان دەبەستن.

دووپاتیشی كردەوە، عیراق نابێتە شوێنی هێرشكردنە سەر وڵاتانی دروسێ و هیچ گروپێكی چەكدار یش لەخۆ ناگرێت كە بەشداری لە ململانێكاندا بكات.

حەیدەر عەبودی جەختی لەوەشكردەوە، بوونی هەر گروپێكی چەكدار لەناو خاكی عیراقدا پێچەوانەی دەستوورە و حكومەت رێگە بەوە نادات.

 

فەرماندەیی هێزەکانی سنوری عیراق رایگەیاند هاووڵاتیەکیان بە زیاتر لە ملیۆنێک دیناری ساختەوە لە مەرزی شەلەمچە دەستگیر کرد.

ئەمڕۆ چوارشەممە، فەرماندەیی سنوری هێزەکانی سنوری عیراق رایگەیاند، پۆلیسی گومرگی مەرزی شەلەمچە لە سنوری عیراق  و ئێران  تۆمەتبارێکیان بە ملیۆنێک و 300 هەزار دیناری ساختەوە دەستگیرکرد.

ئاماژە بەوەشکراوە تەواوی پارە ساختەکە لە جۆری 25 هەزار دیناری بووە و ویستویەتی لە ناو خاکی عیراقدا ساغیبکاتەوە.

بە گوێرەی راگەیەندراوەکەی فەرماندەیی هێزەکانی سنوری عیراق پەڕاوی لێکۆڵینەوە بۆ تۆمەتبارەکە کراوەتەوە و رادەستی یاسا کراوە.

 ئەمە یەکەمجار نییە لە مەرزی شەلەمجە  دەست بەسەر پاری ساختەدا بگیرێت و هەفتانە چەندین تۆمەتبار بە تۆمەتی هێنانی مادی هۆشبەر و پارەی ساختە دەستگیر دەکرێن.

عیراق پلان بۆ داخستنی تەواوی دەروازە سنورییەکانی لەگەڵ ئێران دادەنێت و بانگەشەی ئەوەدەکرێت بڕیارەکە لەسەر خواستی ئەمریکایە.

بەپێی راپۆرتی میدیاکان، دەسەڵاتدارانی عیراق دەستیان کردووە بە داخستنی تەواوەتیی دەروازە سنورییەکان لەگەڵ کۆماری ئیسلامیی ئێراندا، بە شێوەیەک کە سەرەتا بە دەروازەی شەیب پلانەکە دەستی پێکردوە و لە ئێستادا ئەو دەروازەیە بە تەواوی داخراوە.

بە گوێرەی زانیارییەکان، بەغداد بەرەو داخستنی زیاتری دەروازە هاوبەشەکانی نێوان هەردوو وڵات هەنگاو دەنێت.

ئاژانسی میهریی ئێرانیش لای خۆیەوە زانیارییەکانی پشتڕاستکردوەتەوە  و ئاماژەی بەوەکردوە، تەنها دوو دەروازە لەگەڵ عیراقدا بە کراوەیی دەمێننەوە  و ئەوانیتر دادەخرێن.

هاوکات سەرچاوەکان ئەوەیان خستوەتەڕوو، کە ئەم بڕیارەی عیراق لەسەر داوایەکی ئەمریکا و لە چوارچێوەی پلانی گەمارۆدان و تێکشکاندنی ئابوریی ئێراندا دراوە.

بانکی ناوەندیی عیراق، لە راگەیەندراوێکدا ئاماژەی بەوە کرد کە سەرجەم داواکارییەکانی حەواڵەکردنی پارە بۆ مەبەستی هاوردەکردن، کە پێش دەستکاریکردنی نرخی ئاڵوگۆڕ لە رێککەوتی 7ی تشرینی دووەمی 2026 راگیرابوون و مەرج و رێنماییەکانیان تێدا بوو، جێبەجێ کراون و وەڵام دراونەتەوە.

بانکی ناوەندی داوای لەو بازرگان و کۆمپانیایانە کرد کە ئەم داواکارییانە دەیانگرێتەوە، سەردانی بانکەکانیان بکەن بۆ دڵنیاوبوونەوە لە جێبەجێکردنی حەواڵە دەرەکییەکانیان.

هەروەها جەختی کردەوە لەوەی لە حالەتێکدا ئەگەر جێبەجێکردنی هەر حەواڵەیەک بێ هۆکار دواکەوت، یان بە پێچەوانەی رێنماییەکان داوای پارەی زیادەیان لێکرا، دەتوانن لە رێگەی پلاتفۆرمی ئەلیکترۆنیی سکاڵاکانی بانکی ناوەندییەوە سکاڵا تۆمار بکەن، تاوەکو بانکی ناوەندی رێکاری پێویست بەرانبەر بانکە سەرپێچیکارەکان بگرێتە بەر.

لە کۆتاییدا بانکی ناوەندی جەختی لە بەردەوامبوونی چاودێریکردنی بانکەکان کردەوە بۆ پابەندبوونیان بە رێنماییەکان، و بەڵێنی بە بازرگانان و هاووڵاتییان دا کە دابینکردنی دراوی بیانی و تەمویلکردنی هاوردەکردن بە شێوەیەکی بەردەوام و ئاسایی بەردەوام دەبێت، بە ئامانجی پاراستنی بزووتنەوەی بازرگانی و دابینکردنی کەلوپەل لە بازاڕەکانی ناوخۆدا.

چوارچێوەی هەماهەنگی لیژنەیەكی باڵا بۆ لێكۆڵینەوە لەو یاسا دەستوورییانە پێكدەهێنێت، كە پەكخراون و پەیوەستن بە بەرنامەی حكومییەوە.

بەپێی راگەیەنراوێك، چوارچێوەی هەماهەنگی شیعەكان لە نوسینگەی محەمەد شیاع سودانی بە ئامادەبوونی عەلی زەیدی سەرۆك وەزیرانی عیراق كۆبووەتەوە و باس لە دابەشكردنی سەرۆكایەتییەكان و ئەندامانی لیژنەكانی ئەنجومەنی نوێنەران كراوە،  جەختیشكراوەتەوە لەسەر پێویستیی یەكلاكردنەوەی ئەو دۆسێیە بەپێی هاوسەنگی و هاوبەشیی نیشتیمانی.

ئاماژە بەوەشكراوە، لە كۆبوونەوەكەدا لیژنەیەكی باڵا پێكهێنراوە بە مەبەستی لێكۆڵینەوە و بەدواداچوونی ئەو یاسا دەستورییانەی پەكخراون و بەرنامەی حكومیی پشتیان پێدەبەستێت.

لە بەشێكی تری كۆبوونەوەكەدا جەختكراوەتەوە لەسەر گرنگیی و پێویستیی یەكلاكردنەوەی دۆسێی چەك لە دەرەوەی دەسەڵاتی دەوڵەت و هەموو پشتیوانییەكیش بۆ حكومەت دوپاتكراوەتە لەبارەی ئەو رێكارانەی لەو بوارەدا دەیانگرێتەبەر.

لە نووسینگەی محەممەد شیاع سودانی، بە ئامادەبوونی عەلی زەیدی، سەرۆک وەزیرانی عیراق، چوارچێوەی هەماهەنگی لە کۆبوونەوەیەکیدا بڕیاریدا بە پێکهێنانی لێژنەیەک بۆ لێکۆڵینەوە لە سەرجەم یاسا دەستورییە پەکخراوەکان و ئەو یاسایانەی جێبەجێکردنی بەرنامەی حکومەتیان وەستاندووە.

لە کۆبوونەوەکەدا، جەخت لەسەر پرسی دابەشکردنی سەرۆکایەتی و ئەندامێتی لێژنە پەرلەمانییەکان کرایەوە لەسەر بنەمای لێهاتوویی و هاوبەشی نیشتمانی بۆ چالاککردنی رۆڵی رەقابی و تەشریعی پەرلەمان. هەروەها چوارچێوەی هەماهەنگی پابەندبوونی خۆی بە ئامانجەکانی بەرنامەی حکومەت و وەرچەرخانی رێککەوتنە سیاسییەکان بۆ هەنگاوی کرداری راگەیاند.

لە تەوەرێکی تری کۆبوونەوەکەدا، جەختی لەسەر یەکلاکردنەوەی پرسی چەکی دەرەوەی دەسەڵاتی فەرمی لە رێککەوتی 30ی حوزەیرانی 2027 کردەوە و دەسەڵاتی تەواوی بە حکومەت بەخشى بۆ گرتنەبەری هەنگاوی پێویست.

لەڕووی ئابوریشەوە، جەخت لە کۆنتڕۆڵکردنی بازاڕ، دابینکردنی بودجەی پڕۆژە خزمەتگوزارییەکان و رووبەڕووبوونەوەی هەژاری و بێکاری کرایەوە.

لە کۆتاییدا، چوارچێوەی هەماهەنگی تاوتوێی ئاڵۆزییە هەرێمییەکانی کرد و جەختی لە پاراستنی سەروەری عێراق و بەدوورگرتنی وڵات لە ئاڵۆزییەکان کردەوە.

بۆ دەربازبوون لە قەیرانی ئاستەنگەكانی گەرووی هورمز عیراق كار بۆ كاراكردنەوەی پڕۆژەی راكێشانی بۆری نەوتی بەسرە – عەقەبە دەكات.

دوای ئەوەی هەناردەی نەوتی عیراق بەهۆی ئاڵۆزییەكانی جووڵەی كەشتیوانی لە گەروی هورمز تووشی ئاستەنگ بووەتەوە، بەغداد دەیەوێت رێگەی تر بگرێتەبەر بۆ قەرەبووكردنەوەی ئەو قەیرانە، لە چوارچێوەیەشدا نزار ئامێدی سەرۆك كۆماری عیراق و شا عەبدوڵڵای دووەم پاشای ئوردن لە پەیوەندیەكی تەلەفۆنیدا جەختیان لەسەر پێویستیی بەردەوامبوون لە جێبەجێكردنی پڕۆژەی راكێشانی بۆری نەوتی عیراق لە شاری بەسرەوە بۆ بەندەری عەقەبە لە باشووری ئوردن لەسەر دەریای سوور كردەوە.

ئاماژە بەوەش كراوە، بۆری نەوتی بەسرە – عەقەبە گرنگییەكی زۆری هەیە بۆ خزمەتكردنی بەرژەوەندییەكانی هەردوو وڵات.

ئەوەش دوای ئەوە دێت، ئوردن و عیراق لە نیسانی 2012دا رێككەوتننامەیەكی چوارچێوەییان ئیمزا كرد بۆ راكێشانی بۆرییەك بە درێژایی هەزار و 700 كیلۆمەتر، كە توانای گواستنەوەی یەك ملیۆن بەرمیل نەوتی لە رۆژێكدا هەبێت.

وەزارەتی کشتوکاڵ جەخت لە بەردەوامیی هەڵمەتە مەیدانییە چاودێرییەکان دەکاتەوە بۆ بەدواداچوون بۆ سەلامەتیی ئەو گۆشتەی لە بازاڕەکاندا مامەڵەی پێوە دەکرێت، ودڵنیابوونەوە لەوەی لە کوشتارگەکاندا سەربڕدراون و پشکنینی پزیشکیی ڤێتێرنەرییان بۆ کراوە.

 قوسەی حەتاب، وتەبێژی وەزارەتی کشتوکاڵ، لە لێدوانێکدا بۆ ڕرۆژنامەی رەسمی رایگەیاند: تیمە چاودێرییە ڤێتێرنەرییەکانی سەر بە وەزارەت لە بەغداد و پارێزگاکان، گەشتی مەیدانیی نزیکەی رۆژانە ئەنجام دەدەن بۆ بەدواداچوون بۆ دۆخی گۆشتی نمایشکراو لە بازاڕەکاندا، لە چوارچێوەی پلانێکی چاودێریدا کە بە هەماهەنگی لەگەڵ لایەنە ئەمنییەکان دایڕشتووە.

روونیشی کردەوە: تیمە ڤێتێرنەرییەکان بە شێوازێکی فراوان چاودێریی پرۆسەکانی سەربڕین و مامەڵەکردن بە گۆشتەوە دەکەن، بۆ دڵنیابوونەوە لە ئاستی پابەندبوونیان بە مەرجە تەندروستی، و ئاماژەی بەوەش دا: وەزارەت بە هەماهەنگی لەگەڵ هێزە ئەمنییەکان کار دەکات بۆ گرتنەبەری رێوشوێنی پێویست بەرانبەر سەرپێچیکاران و سنووردانان بۆ پرۆسەکانی سەربڕینی هەڕەمەکی و خستنەبازاڕی ئەو گۆشتانەی پشکنینیان بۆ نەکراوە.

حەتاب داوای لە هاووڵاتییان کرد کە ئەو گۆشتانە نەکڕن کە لە شوێنەکانی دەرەوەی چاودێریی ڤێتێرنەری نمایش دەکرێن، و بچن بۆ کڕینی ئەو گۆشتانەی مۆری رەسمیی ڤێتێرنەرییان لەسەرە لە بنکە بازرگانییە متمانەپێکراوەکاندا، چونکە ئەوە نیشانەیەکە بۆ ئەوەی کە خستراونەتە ژێر پشکنینی رێکارە یاساییەکان و دڵنیابوون لە شیاوبوونیان بۆ بەکارهێنانی مرۆیی بە شێوازێکی سەلامەت.

موقتەدا سەدر، رابەری رەوتی نیشتمانیی شیعە، داوا دەکات لە سەرانسەری خوێندنگەکان و زانکۆکانی عیراقدا ناڕەزایەتیی یەکگرتوو دژی بڕیاری قەدەغەکردنی حیجاب لە هەندێک لە وڵاتانی جیهاندا رێکبخرێت.

موقتەدا سەدر لە راگەیەنراوێکدا ئاشکرایکرد، لە بەرژەوەندیی ئاینیی، بیروباوەڕ و مرۆییدایە، ناڕەزایەتیی یەکگرتوو لە کاتێکی دیاریکراودا لە خوێندنگەکان و زانکۆ حکومی و ئەهلییەکانی عیراقدا ئەنجامبدرێت، دژی بڕیارەکانی قەدەغەکردنی حیجاب و بۆ پشتگیریکردنی لە ئازادیی جلوبەرگ.

جەختیشیکردووتەوە، پێویستە خۆپیشاندانەکە رێکخراو و ئارام بێت و چەند خولەکێک بخایەنێت تا پرۆسەی خوێندن تێک نەدات، باشترین کاتیش بەیانیی رۆژی پێنجشەممەی داهاتووە ئەو خۆپیشاندانە بەڕێوەبچێت.

موقتەدا سەدر لە کۆتایی راگەیەنراوەکەدا ئەم وتەیەی نووسیوە، خودا رەوشی هیچ گەلێک ناگۆڕێت تا ئەوان خۆیان رەوشی خۆیان نەگۆڕن، ئاماژەی بەوەشکردووە، نابێت هیچ وێنە یان ئاڵایەک بەرز بکرێتەوە جگە لە ئاڵای عیراق.

بانکی ناوەندیی عیراق، ئەمڕۆ یەکشەممە، رایگەیاند کە وەزارەتی گەنجینەی ئەمریکا سزاکانی سەر ژمارەیەک کۆمپانیای ئاڵوگۆڕی دراوی لە عیراق هەڵگرتووە، دوای ئەوەی ئەو کۆمپانیایانە هەموو پێوەرەکانی پێڕەوکردن و پابەندبوونیان جێبەجێ کردووە، بەمەش دەتوانن بگەڕێنەوە بۆ بەشداریکردن لە پرۆسەی فرۆشتنی دۆلار بە گەشتیاران.

بانکی ناوەندی لە بەیاننامەیەکدا ئاماژەی بەوە داوە: ئەم بڕیارە دوای دڵنیابوونەوە بووە لە جێبەجێکردنی پێوەرە پەسەندکراوەکانی پابەندبوون لەلایەن کۆمپانیا پەیوەندیدارەکانەوە.

ئەوەشی خستەڕوو: ئەم هەنگاوە لە چوارچێوەی بەهێزکردنی پابەندبوون بە رێنماییە چاودێرییەکان و رێکخستنی پرۆسەکانی فرۆشتنی دراوی بیانییە بەپێی چوارچێوە پەسەندکراوەکان.

بانکی ناوەندیی عیراق، راگەیەنراوێکی بڵاوکردەوە و تێیدا هاتووە: لەپێناو ئاسانکاریکردن و خزمەتکردنی هاووڵاتیانی عیراق سیستەمێکی ئەلیکترۆنی بۆ گۆڕینەوەی پارەی دڕاو بەگەڕخستووە. 

بانکی ناوەندیی عیراق رایگەیاند، سیستمێکی ئەلکترۆنیان بۆ گۆڕینەوەی پارەی دڕاو دروستکردووە و ئامانجیش لەم کارە، ئاسانکاریکردنە بۆ هاووڵاتیان لە گۆڕینەوەی پارە دڕاو و شێواوەکانیان بە شێوەیەکی خێراتر و رێکخراوتر.

لە راگەیەنراوەکەدا ئەوەش هاتووە، ئەم سیستەمە رێگە بە هاووڵاتییان دەدات لە رێگەی پلاتفۆرمی ئەلیکترۆنیی 'ئور'ـەوە داواکاریی گۆڕینەوەی دراوە تێکچووەکانیان پێشکەش بکەن، ئەوەش لە رێگەی تۆمارکردنی ئەو زانیارییانەی لێیان داوادەکرێت، دوابەدوای تۆمارکردنی زانیارییەکان، لایەنە پەیوەندیدارەکان لە بانکی ناوەندیی عیراق رێکارە پێویستەکان بۆ تەواوکردنی پرۆسەی ئاڵوگۆڕەکە ئەنجامدەدەن.

ئەوەشی روونکردووەتەوە، بەگەڕخستن و چالاک کردنی ئەم خزمەتگوزارییە لە چوارچێوەی هەنگاوەکانی بانکی ناوەندییە بەرەو بەدیجیتاڵکردن و پەرەپێدانی ئەو خزمەتگوزارییانەی کە پێشکەشی هاووڵاتییانی دەکات، بە جۆرێک کە ببێتە هۆی کەمکردنەوەی کات و ماندووبوون و بەرزکردنەوەی ئاستی خزمەتگوزارییە بانکییەکان.