لە ئەنجومەنی نوێنەرانی عیراق داوا دەكرێت هاوشێوەی دەستەی دەستپاكی، دەستەیەكیش بۆ چاودێریكردنی نرخی خۆراك و دەرمان دابمەزرێنرێت.

حامید موسەوی ئەندامی لیژنەی ئابووری و بازرگانیی لە ئەنجومەنی نوێنەرانی عیراق رایگەیاند، پێویستە لە ئەنجومەنی نوێنەران بە دەركردنی یاسا پشتیوانی لە رێوشوێنەكانی حكومەتی عیراق بكرێت بۆ پاراستنی ئابووری وڵات.

وتیشی، پێویستە بە یاسا رێگریی بكرێت لە قۆرخكاری و بەرزكردنەوەی نرخی خۆراك و دەرمان و هەر بە یاساش دەستەیەك دابمەزرێنرێت بۆ چاودێریكردنی نرخی خۆراك و دەرمان لەناوخۆی عیراقدا.

ئەو پەرلەمانتارە ئاماژەی بەوەشكرد، ئەو دەستەیە كە خوێندنەوەی یەكەم بۆ پرۆژەیاسای دامەزراندنەكەی كراوە، پێویستە دەسەڵاتی تەواوی هەبێت بۆ پابەندكردنی سەرجەم لایەنەكان بە بڕیارەكانی حكومەتی عیراق.

دەستەی راگەیاندن و پەیوەندییەکانی عیراق ئاگادارییەکی رەسمی ئاراستەی سەرجەم دەزگا و مینبەرە راگەیاندنەکان کرد، تێیدا جەخت لە گرنگیی رۆڵی نیشتمانیی راگەیاندن دەکاتەوە لەم قۆناغە هەستیارە ئابوورییەدا که عیراق و ناوچەکەی پێیدا تێپەڕ دەبێت.

دەستەکە لە ئاگادارییەکەیدا ئاماژەی بەوە داوە: پێویستە دەزگاکانی راگەیاندن زۆرترین وردبینی پەیڕەو بکەن لە هەموو ئەو هەواڵ و بابەتانەی سەبارەت بە نرخی ئاڵۆگۆڕ، بازاڕەکان و موچە بڵاو دەکرێنەوە، هەروەها دڵنیابوونەوە لە سەرچاوە رەسمی و تایبەتمەندەکان پێش بڵاوکردنەوەی هەر زانیارییەک.

هەروەها داوای کردووە: بڕیارە ئابوورییەکان بەهۆکار و دەرئەنجامەکانییەوە بە شێوازێکی هاوسەنگ بخرێنە روو، و جیاکارییەکی روون لە نێوان زانیاری و رای شارەزایان و شرۆڤەکاراندا بکرێت.

لە تەوەرێکی تردا، دەستەکە هۆشداری داوە لە خۆدوورخستنەوە لە سەردێڕی وروژێنەر و گەورەکردن یان بچووککردنەوەی روداوەکان کە دەبنە هۆی لاوازکردن و تێکشکاندنی متمانەی رای گشتی، جەختیشی کردووەتەوە: بڵاوکردنەوەی هەواڵی نادروست کاریگەری نەرێنی لەسەر جووڵەی بازاڕ دەبێت و هاووڵاتی باجی یەکەمی دەدات.

لە کۆتاییشدا، دەستەی راگەیاندن و پەیوەندییەکان دووپاتی کردەوە: ئەم رێکارانە بە هیچ شێوازێک دەستکاری مافی رەخناوەی بابەتی و گفتوگۆکردنی سیاسەتە ئابوورییەکان ناکەن، بەڵکو داوا لە راگەیاندنکاران دەکات ببنە هاوبەش و پشتیوانێک بۆ هاووڵاتی و نیشتمان لەپێناو تێپەڕاندنی ئەم قۆناغە سەختەدا.

بانكی ناوەندیی عیراق دەڵێت، ئەو بازرگانانەی پێش 7ـی ئەم مانگە حەواڵەیان كردووە نابێت پارەی زیادە بخرێتەسەر حەواڵەكانیان و بە نرخی پێشوو بۆیان هەژمار دەكرێت.

لە راگەیەندراوێكدا بانكی ناوەندیی عیراق بڵاویكردەوە، بەدواداچوون دەكەن بۆ پرۆسە بانكییەكانی پێش و دوای گۆڕانكارییەكانی نرخی دراو بە مەبەستی دڵنیابوونەوە لە پاراستنی مافی بازرگانان و نابێت هیچ جیاوازییەكی نرخی دراو بخرێتە ئەستۆی بازرگانان بۆئەو حەواڵانەی بە نرخی پێشوو كراون.

راشیگەیاندووە، لە حاڵەتی دواكەوتنی جێبەجێكردنی حەواڵەكان یان داواكردنی بڕە پارەی زیادە، بازرگانان دەتوانن لە رێگەی پلاتفۆڕمی سكاڵای بانكەكەوە سكاڵا تۆمار بكەن.

بانكی ناوەدیی عیراق ئاشكرایكردووە، لەگەڵ بانكەكان و كۆمپانیاكانی پارەدانی ئەلیكترۆنی كاردەكەن بۆ دەركردنی كارتی تایبەت بە بازرگانیی دەرەكی بۆ بازرگانە بچووكەكان، بەمەبەستی ئاسانكاریكردن لە پارەداركردنی هاوردەكانیاندا.

وەزارەتی نەوتی عێراق ئاشکرایدەکات، تا کۆتایی ساڵی 2027 رێژەی سوتاندنی غازی هاوەڵ دەگەیەننە ئاستی سفر، هەروەها جەختی کردەوە کە تەواوی کێڵگە و بیرە نەوتییەکان ئامادەکراون بۆ وەبەرهێنان لەو غازەدا.

عیزەت سابیر، بریکاری وەزیری نەوت رایگەیاند: "لە چوارچێوەی پلانەکانی وەزارەتی نەوتدا، وەبەرهێنانی تەواو و دروست لە غازی هاوەڵدا ئەنجام دەدرێت و تا کۆتایی ساڵی 2027 دەگەینە کۆتاییهێنان بە تەواوی سوتاندنی غاز.

ئاماژەی بەوەشکرد، تا کۆتایی ئەمساڵ دەست دەکرێت بە وەبەرهێنانی نزیکەی 80 ملیۆن پێی سێجا لە غازی کێڵگەکانی کەرکوک، ئەمەش هاوکار دەبێت لە دابینکردنی پێداویستییەکانی هاووڵاتییان و وێستگەکانی بەرهەمهێنانی روناکی و کارەبا.

عیزەت سابیر ئەوەشی خستەڕوو، بە پشتبەستن بە توانای ناوخۆیی، کارەکانی چاکسازیی خولی لە کۆمپانیای غازی باکور بەردەوامن و بەم زووانە تەواو دەبن، جەختیشی کردەوە کە کەمکردنەوە و وەبەرهێنانی غازی هاوەڵ لە کەرکوک و تەواوی عیراق، پایەیەکی سەرەکییە بۆ پاڵپشتیکردنی ئابوریی نیشتمانی و دابینکردنی سەرچاوەی زیاتری کۆکردنەوەی وزە.

لەلایەن خۆشییەوە، بەڕێوەبەری گشتیی کۆمپانیای نەوتی باکور رایگەیاند، هەموو کێڵگە و بیرە نەوتییەکان بۆ پرۆسەی وەبەرهێنانی غازی هاوەڵ ئامادەن و بە تەواوی تواناوە کار بۆ بەدیهێنانی ئەم ئامانجە دەکەن.

وەزیری دارایی عیراق رایدەگەیەنێت، پابەندن بە دابینكردن و دابەشكردنی موچەی فەرمانبەران و موچەخۆران هەموو 30 رۆژ جارێك.

فالح ساری وەزیری دارایی عیراق لە وتارێكیدا لە ئەنجومەنی نوێنەران رایگەیاند: رێژەی داهاتە نانەوتییەكان لە بودجەی 2027دا دەگاتە 19% لە كاتێكدا لە بودجەی ساڵی رابدوودا 11% بووە.

وتیشی: حكومەتی عیراق كۆمەڵێك رێكاری گرتووەتەبەر، لەوانە تەرخانكردنی تریلیۆنێك دینار لەلایەن بانكی ناوەندییەوە بۆ پاڵپشتیكردنی كەرتی نیشتەجێبوون، جگە لە پێدانی شایستە داراییەكان بۆ پرۆژە تەواونەبووەكان بە تایبەتیش پرۆژەكانی ئاوەڕۆ.

وەزیری دارایی عیراق ئاماژەی بەوەشكرد: پابەندن بە دابینكردن و دابەشكردنی موچەی فەرمانبەران و موچەخۆران هەموو 30 رۆژ جارێك كە مانگانە بڕەكەی دەگاتە 7.7 تریلیۆن دینار.

سەرۆک وەزیرانی عیراق رایگەیاند، بۆ دەربازبون لەو قەیرانەی تییکەوتون، سێ بژاردەیان لەبەردەستدا بووە؛ جێبەجێكردنی پاشەكەوتی ناچاری، 45 رۆژ جارێک موچە دابەشبکرێت یاخود پەنا ببرێت بۆ قەرزی دەرەکی و نوقمکردنی زیاتری وڵات.

ئەمڕۆ پێنجشەممە، لە میانی کۆبونەوەی لەگەڵ سەرۆکی ئەنجومەنی نوێنەرانی عیراق، علەی زیەدی سەرۆک وەزیرانی عیراق رایگەیاند، بەرزکردنەوەی نرخی دۆلار ناچاریبووە و ئابوری عێراق لە قەیرانێکی قوڵدایە.

عەلی زەیدی ئاماژەی بەوەکرد، کاتێک حکومەتی گرتوەتە دەست زیاتر لە 200 ملیار دینار قەرزی کەڵەکەی هەبووە و بۆ رزگاربونی ئابوری وڵاتێش سێ بژارەدیان لەبەردەستدا بووە و  هەندێك كەس هەوڵیانداوە درزێك لەنێوان ئەوان و خەڵكدا دروست بكەن.

لە بارەی بژاردەکانەوە، لەبری بەرزکردنەویە نرخی دۆلا، جێبەجێكردنی پاشەكەوتی ناچاری، 45 رۆژ جارێک موچە دابەشبکرێت یاخود پەنا ببرێت بۆ قەرزی دەرەکی و نوقمکردنی زیاتری وڵات ئەو بژاردانەبوون کە لەبەردەستدابوون.

زەیدی دەڵێت؛ پێویست بوو حكومەت مانگانە 10 ترلیۆن دینار دابین بكات و ئەمەش وایکردوە بڕیاری بەرزکردنەوەی نرخی دۆلار بدەن تا  لەو قەیرانە ئابوریەی توشی وڵات بوە رزگاریان ببێت.

سەبارەت بە بازاڕی دراو و نرخی ئاڵوگۆڕی دینار بەرانبەر بە دۆلار وتویەتی؛ جیاوازیی پێشوی نرخی ئاڵوگۆڕی دراو لەلایەن هەلپەرستانەوە دەقۆزرایەوە و سودی بۆ هاووڵاتیان نەبووە.

ئەندامێكی ئەنجومەنی نوێنەرانی عیراق ئاشكراكرد،  بەشێكی زۆری لایەنەكانی ناڕازیی لە بەرزبوونەوەی نرخی دۆلار  پێشوەختە ئاگاداری بڕیارەكە بوون و سوودی مادیی گەورەیان لێ بینووە.

ئەمیر مەعمووری، ئەندامی لیژنەی دارایی ئەنجومەنی نوێنەرانی عیراق، رەخنەی توندی لەو لایەنە سیاسییانە گرت كە دژایەتی بەرزبوونەوەی نرخی دۆلار دەكەن و رایگەیاند: زۆربەی ئەوانەی ئێستا رەخنە لە بەرزبوونەوەی نرخی دۆلار دەگرن، پێشوەختە زانیارییان لەسەر گۆڕانكارییەكە هەبووە و پێش دەنگدان و جێگیركردنی نرخەكە بۆ 1520 دینار، دۆلاریان لە بازاردا كڕیوە و سوودێكی دارایی زۆریان دەستكەوتووە.

ئاماژەی بەوەشكرد، ئەنجومەنی وەزیران نوێنەری تەواوی فراكسیۆنە سیاسییەكانی تێدایە و دەنگیان بۆ  گۆرانكارییەكەداوە .

ئەو پەرلەمانتارە ئاماژەی بەوەشكرد، گۆڕینی نرخی دۆلار بەرپرسیارێتییەكی نیشتمانییە و پێویستە بە لۆژیكی دەوڵەت بەڕێوەبچێت بۆ پاراستنی سەقامگیریی دارایی.

 

 

عەلی زەێدی، سەرۆکی ئەنجومەنی وەزیران، رێنمایی دا بە دواخستنی وەرگرتنی رسووماتی گومرکی و باجی سەر بەرهەمەکانی هێلکە، مریشک و گۆشتی زیندوی هاوردەکراو.

نووسینگەی راگەیاندنی سەرۆکی ئەنجومەنی وەزیران لە بەیاننامەیەکدا ئاماژەی بەوە کرد: زەیدی رێنمایی داوە بە دواخستنی وەرگرتنی رسووماتی گومرکی و باج لەسەر بەرهەمەکانی هێلکە، مریشک و گۆشتی زیندوی هاوردەکراو، بە مەبەستی بەشداریکردن لە پشتیوانیکردنی سەقامگیریی بازاڕە ناوخۆییەکان و دابینکردنی ئەم پێداویستییە سەرەکییانە بە نرخێکی گونجاو تاوەکو لە توانای دارایی سەرجەم هاووڵاتیاندا بێت.

ئەم بڕیارە دوای بڕیاری هەموارکردنەوەی نرخی ئاڵوگۆڕی دینار بەرانبەر بە دۆلاری ئەمریکی هات، لەسەر پێشنیازی وەزیری دارایی و پارێزگاری بڕیاردەری بانک ناوەندیی عیراق لە کۆبوونەوەی ئاسایی ژمارە (544)ی ساڵی 2026، تاوەکو نرخی کۆتایی فرۆشتنی دۆلار بۆ هاووڵاتیان و دامەزراوە داراییە ناپانکییەکان ببێتە (1520) دینار بۆ هەر دۆلارێک، لە شوێنی 1320 دینار.

 یوسف کیلابی، ئەندامی لیژنەی دارایی لە پەرلەمانی عیراق، دووپاتی کردەوە کە حکومەتی عیراق رووبەڕووی بارودۆخێکی دارایی سەخت بووەتەوە بەهۆی کەڵەکەبوونی قەرزەکان و دابەزینی داهاتەکانی نەوتدا.

کیلابی لە لێدوانێکی رۆژنامەوانیدا رایگەیاند: حکومەتەکەی کازمی، بەپێچەوانەی بەرزبوونەوەی نرخی ئاڵوگۆڕی دۆلار و ئەو کێشانەی هاووڵاتیان باجەکەیان دا، رادەستی حکومەتەکەی سودانی کرد بە بوونی دەستکەوتێکی نەقدی کە دەگەیشتە 70 ترلیۆن دینار.

ئاماژەی بەوەش کرد: حکومەتی پێشوو قەرزی شایستەی نزیکەی 210 ترلیۆن دیناری رادەستی حکومەتی ئێستا کردووە، هاوکات لەگەڵ راگرتنی فرۆشتنی نەوت بۆ زیاتر لە شەش مانگ بەهۆی روداوەکانی گەروی هورمزەوە، و روونی کردەوە: ئەم گەشەسەندنانە وڵاتیان رووبەڕووی ئاڵنگاریی دارایی گەورە کردووەتەوە کە پێویستی بە گرتنەبەری رێکاری بەپەلە هەیە بۆ چارەسەرکردنیان.

ناوبراو روونیشی کردەوە: حکومەتی ئێستا ئیدارەیەکی دارایی وەرگرتووە کە بەدەست کێشەی گەورەوە دەناڵێنێت، لە کاتێکدا عیراق بە شێوەیەکی بنەڕەتی پشتی بە داهاتی نەوت بەستووە بۆ دابینکردنی بودجەی گشتی و دانی موچەی فەرمانبەران، و ئاماژەی بەوەدا: بەردەوامبوونی پەککەوتنی داهاتەکانی نەوت مەترسی لەسەر توانای دەوڵەت دروست دەکات بۆ جێبەجێکردنی پێویستییە داراییەکانی.

لە بەغداد سەرۆک کۆماری عیراق و سەرۆکی وەزیران کۆبوونەوە و دوا پێشهاتە سیاسی، ئابوری و گەشەپێدانەکانی وڵاتیان تاوتوێ کرد.

بەپێی راگەیەنراوێکی سەرۆکایەتیی کۆمار، ئەمڕۆ، نزار ئامێدی، سەرۆک کۆماری عیراق لەگەڵ عەلی زەیدی، سەرۆکی ئەنجومەنی وەزیران کۆبووەوە؛ لە کۆبوونەوەکەدا تاوتوێی گشتیی بارودۆخی ناوخۆیی و دۆسیەی تەواوکردنی پێکهاتەی کابینەی حکومەت کرا.

لە بەشێکی تری کۆبوونەوەکەدا، هەردوولا جەختیان لەسەر پێویستیی بەردەوامبوونی حکومەت کردەوە لە جێبەجێکردنی بەرنامەکەی کە لەسەر بنەمای چاکسازیی ئابوری و دروستکردنی هاوبەشیی بەرهەمدار لەگەڵ وڵاتانی دراوسێ و دۆست داڕێژراوە، بە جۆرێک کە رەنگدانەوەی ئەرێنی لەسەر ئابوریی عیراق و رەخساندنی هەلی کار بۆ هاووڵاتییان هەبێت.

هاوکات سەرۆک کۆمار و سەرۆک وەزیران ئاماژەیان بە گرنگیی کارکردنی بەردەوام کرد بۆ دۆزینەوەی چارەسەری ریشەیی و بەردەوام بۆ ئاڵنگارییەکانی ئێستای وڵات لە سەرجەم بوار و سێکتەرە جیاوازەکاندا.

بانکی ناوەندیی عیراق ئاشکرایدەکات، بڕیاری دەستکاری کردنی نرخى ئاڵوگۆڕى دراو وەک رێکارێکی نائاسایی و پێشوەختە بووە بۆ دابینکردنی بودجە و پاراستنی رەوشی دارایی وڵات.

حەیدەر غازی، بەڕێوەبەری راگەیاندنی بانکی ناوەندیی عیراق رایگەیاند، عیراق لەبەرانبەر بارودۆخێکی نائاسایی و سەختدایە بەهۆی داخرانی گەروی هورمز و کەمبوونەوەی هەناردەی نەوت، کە ئەوەش بووەتە هۆی دابەزینی داهاتەکان؛ بۆیە ئەم گۆڕانکارییە لە نرخى ئاڵوگۆڕدا بۆ رێگریکردن بووە لە زیانی گەورەتر بە ئابوریی دەوڵەت.

ئاماژەی بەوەشکرد، بڕیارەکە هاوکار دەبێت لە بووژانەوەی پیشەسازیی ناوخۆیی و بەرهەمی نیشتمانی، بەو پێیەی رێگە لە هەڵکشانی هاوردەکردنی کەلوپەلی دەرەکی دەگرێت و لەمەودوا زیاتر پشت بە بەرهەمی ناوخۆیی دەبەسترێت.

سەبارەت بە جیاوازیی نرخی رەسمی دۆلار و نرخی بازاڕەکان، بەڕێوەبەری راگەیاندنی بانکی ناوەندی جەختی کردەوە، ئەو جیاوازییە بەستراوەتەوە بەو مامەڵە بازرگانییانەی لە دەرەوەی رێکار و یاساکان دەکرێن؛ هاوکات حکومەت کار لەسەر توندکردنەوەی کۆنتڕۆڵی سنورەکان و رێکخستنەوەی هاتنەژوورەوەی کەلوپەل دەکات.

هێڵی ئاسمانیی عیراق گەشەکردنێکی بەرچاو لە جوڵەی گەشتەکانیدا رادەگەیەنێت و لە مانگی ئەیلوولدا لە رێگەی زیاتر لە هەزار و 500 گەشتەوە، سەرکەوتوو بووە لە گواستنەوەی زیاتر لە 271 هەزار گەشتیار.

گواستنەوەی ئاسمانیی عیراق گەشەکردنێکی بەرچاو بەخۆیەوە دەبینێت؛ کۆمپانیای گشتیی هێڵە ئاسمانییەکانی عیراق ئاماری گەشتەکانی مانگی ئەیلوولی رابردوو بڵاودەکاتەوە و جەخت لەسەر فراوانکردنی تۆڕی گەشتەکانی دەکاتەوە.

وەزارەتی گواستنەوەی عێراق لە راگەیەنراوێکدا بڵاویکردەوە، کۆمپانیای گشتیی هێڵە ئاسمانییەکانی عیراق لە مانگی ئەیلوولی 2026دا چالاکییەکی بەربلاوی ئەنجامداوە، بە شێوەیەک لە رێگەی هەزار و 585  گەشتی راستەوخۆوە، 271 هەزار و 589 گەشتیاری بۆ وڵاتانی جیاوازی جیهان گواستووەتەوە.

لەلای خۆشییەوە، ، بەڕێوەبەری گشتیی کۆمپانیاکە رایگەیاندووە، کۆمپانیاکەیان بەردەوامە لە جێبەجێکردنی پلانەکانی بۆ فراوانکردنی تۆڕی گەشتە ئاسمانییەکان و ئامادەکاریی زیاتری گەشتی ئاسمانیی عیراق بۆ پێشکەشکردنی خزمەتگوزاریی شایستەتر بە گەشتیاران.

راوێژکاری دارایی سەرۆک وەزیرانی عیراق رایدەگەیەنێت، گۆڕانکاری لە نرخى ئاڵوگۆڕى دراودا بەشێکە لە هەنگاوی پێشوەختە بۆ رووبەڕووبوونەوەی ھەر قەیرانێک و پاراستنی سەقامگیریی ئابوریی و دارایی وڵات، ئاشکراشی دەکات پرۆسەی دابینکردنی پارە بۆ بازرگانیی دەرەکی بەشێوەیەکی بەردەوام و ئاسایی بەڕێوەدەچێت.

مەزهەر محەمەد ساڵح، راوێژکاری دارایی سەرۆک وەزیرانی عیراق رایگەیاند، جێگیریی نرخى دیناری عیراقی بەرانبەر دۆلار و دراوە بیانییەکان، بەشێوەیەکی راستەوخۆ بەستراوەتەوە بە بەردەستبوونی دراوی بیانی و توانای ئابوریی وڵات لە دابینکردنی پێداویستییەکانی بازرگانیی دەرەکی.

ئاماژەی بەوەشکرد، بەهۆی ئاڵۆزی و ئاڵەنگارییە هەرێمایەتی و نێودەوڵەتییەکان، بەتایبەت لێکەوتەکانی شەڕ و ئاڵۆزییەکانی رەنگە کاربکەنە سەر هەناردەکردنی نەوت لە رێگەی گەروی هورمزەوە، عیراق پێویستی بە گرتنەبەری رێکاری وشیارانە و پێشوەختە هەیە بۆ پاراستنی داهاتی نەوت و رەوتى هاتنی دراوی بیانی.

راوێژکاری دارایی سەرۆک وەزیرانی عیراق جەختیشیکردەوە، ئەو رێکارانەی گیراونەتەبەر بە مانای بوونی ئاڵۆزی یان کەلەبەر لە ئابوریی عیراقدا نایەن، بەڵکو تەنها وەک خۆئامادەکردن و دروستکردنی پەناگەیەکی ئارامی داراییە بۆ هەر پێشهاتێک کە کاربکاتە سەر داهاتی دەوڵەت و تواناکانی لە دابینکردنی خەرجییە گشتییەکان.

مەزهەر محەمەد ساڵح ئەوەشی خستەڕوو، ئەوەی کە حکومەت لە رێگەی گومرک، باج، و بەردەوامیی پاڵپشتیکردنی بەرهەمە سەرەکییەکانی وەک خۆراک، دەرمان و سوتەمەنی، رێگە نادات بارگرانی بکەوێتە سەر شانی هاووڵاتییان و ئامانج لەم هەنگاوانە پاراستنی ئاستی بژێوی و توانای کڕینی هاووڵاتییانە لە هەر شۆکێکی دەرەکیی بازاڕی نەوت.

رۆژنامەی "جیروزالیم پۆست"ـی ئیسرائیلی لە راپۆرتێکدا ئاشکرای کردووە، کە واشنتن دوو بژاردەی خستووەتە بەردەم بەغداد؛ یان چەککردنی گروپە چەکدارەکان یان روبەڕووبوونەوەی داڕمانی تەواوەتیی ئابوری.

بەپێی ڕاپۆرتەکە، سەرەڕای کشانەوەی هێزەکانی ئەمریکا لە عیراق، بەڵام واشنتن تا ئێستاش کاریگەرییەکی گەورەی بەسەر بەغداوە هەیە، چونکە لە ساڵی 2003ەوە کۆنتڕۆڵی داهاتی نەوتی عیراقی لە دەستدایە و ئەمەش رێگری لە چوونی تەواوەتیی عیراق بۆ ناو میحوەری ئێران دەکات.

راپۆرتەکە ئاماژەی بەوەش کردووە، ئەگەر ئیدارەی ئەمریکا هەست بکات بەغدا پابەند نییە بە چەککردنی گروپە چەکدارەکان، رەنگە راگرتنی رەوانەکردنی داهاتی نەوت بڕیار لێ بدات کە ئەمەش ئابوریی وڵاتەکە بەرەو داڕمانی تەواو دەبات.

 لە راپۆرتەکەدا جەختکراوەتەوە، کە ئارامیی واشنتن لەم بابەتەدا بەرەو کۆتایی دەچێت و چاوەڕوانی کۆتا وەڵامی بەغدادە.

ئەنجومەنی وەزیرانی عیراق نرخی رەسمی ئاڵوگۆڕی دۆلاری بەرانبەر دینار دەستکاری کرد، نرخی فرۆشتنی یەک دۆلاری بە دامەزراوە  و هاووڵاتیان بە 1520 دینار دیاری کرد.

بە گوێرەی ئەو نوسراوەی بڵاوکراوەتە، ئەنجومەنی وەزیرانی عیراق بەپێی بڕیاری ژمارە 544ی ساڵی 2026کە لەسەر پێشنیازی وەزیری دارایی و پارێزگاری بانکی ناوەندیی عیراق دەرچووە، بەڕەسمی دەستکاریکردنی نرخەکانی ئاڵوگۆڕی دۆلاری بەرانبەر بە دیناری عیراقی راگەیاند.

بەپێی بڕیارەکە، نرخی کڕینی یەک دۆلار لەلایەن وەزارەتی داراییەوە بە 1500دینار و نرخی فروشتنی بە بانکەکان بە 1510 دینار دیاری کراوە، هەروەها نرخی فروشتی یەک دۆلار لەلایەن بانک و دامەزراوە داراییە ناپانکییەکانەوە بۆ بەکارهێنەری کۆتایی کراوەتە 1520 دینار.

بە گوێرەی بڕیارەکە لە ئەمڕۆوە ئەم بڕیارە کاری پێدەکرێت و حکومەتی عیراق 100 دۆلار بە 152 هەزار دینار دەدرێتە هاووڵاتیان و بازرگانان لە بانکەکاندا، ئەمە لە کاتێکدایە لە ئێستادا 100 دۆلار لە بازاڕدا بەهاکەی لە سەرو 165 هەزار دینارەوە مامەڵەی پێوەدەکرێت.