عیراق
راوێژكاری ئاسایشی نەتەوەیی عیراق دەڵێت: رێگریمان کردووە لە بەكارهێنانی خاكی عیراق بۆ هێرشكردنەسەر وڵاتانی دراوسێ و رۆڵێكی كاریگەریشمان هەبووە لە بانگەشەكردن بۆ پەنابردنە بەر دانوستان
قاسم ئەعرەجی راوێژكاری ئاسایشی نەتەوەیی عیراق رایگەیاند، بڕیارێكی نیشتمانی دراوە كە خاكی عیراق بەكارنەهێنرێت بۆ هێرشكردنەسەر وڵاتان و بڕیارەكەشیان جێبەجێكردووە.
وتیشی، عیراق توانیویەتی لە رێگەی بڕیاری بەرپرسانە و ئەرێنییەوە خۆی بپارێزێت و رێگری بكات لە فراوانبوونی بازنەی ململانێكان، چونكە هەڵوێستێكی نیشتمانی هەڵبژاردووە و رێگریكردووە خاكەكەی بۆ هێرشكردنەسەر وڵاتان بەكاربهێنرێت.
ئاماژەی بەوەشدا، عیراق رۆڵێكی كاریگەری هەبووە لە بانگەشەكردن بۆ پەنابردن بۆ دانوستان و دوورخستنەوەی ناوچەكە لە جەنگ و ئاڵۆزی.
لە پەیامەکەیدا د. لەتیف رەشید دا هاتووە: شانازی دەكەین بەو دەستكەوتانەی بەدیهاتوون بەتایبەتی دادپەروەری بۆ هەڵەبجە.
بەهۆی هێرش و بۆردومانەكانی ئەمریكا و ئیسرائیل 79 ئەندامی حەشدی شەعبی كوژراون و 145 جاریش بۆردومان كراون و هێرشیان كراوەتەسەر.
دەستەی حەشدی شەعبی لە راگەیەنراوێكدا بڵاویكردەوە، لە ماوەی 40 رۆژی جەنگی دژی ئێراندا لە 28ی شوبات تا هەشتی نیسانی ئەمساڵ 145 جار هێرش كراوەتەسەر پێگە و بارەگاكانیان لە ناوچە جیاجیاكانی عیراق و بەهۆیانەوە 79 ئەندامیان كوژراون و 270ی تریش برینداربوون.
لەماوەی جەنگی دژی ئێراندا پێگە و بارەگاكانی حەشدی شەعبی لە چەند ناوچەیەكی عیراق بە فڕۆكەی جەنگیی بۆردومانكران و زۆرترین بۆردومانیش لە پارێزگاكانی ئەنبار و موسڵ و بابل ئەنجامدراون و دەستەی حەشدی شەعبیش ئەمریكا بە بەرپرسیاری یەكەمی بۆردومان هێرشەكان تۆمەتبار دەكات.
ئەمڕۆ شەممە 11ـی 4ـی 2026، ئەنجومەنی نوێنەرانی عیراق بۆ هەڵبژاردنی سەرۆک کۆمار کۆدەبێتەوە.
پەیامنێری کوردسات نیوز لە بەغداد رایگەیاند: رێژەی یاسایی بۆ کۆبوونەوەکە تەواوبووە و زەنگی چونەژوورەوە لێدراوە.
پێشتریش هەیبەت حەلبوسی سەرۆكی ئەنجومەنی نوێنەرانی عیراق لە بانگهێشتنامەیەكدا بۆ پەرلەمانتاران، داوای کردبوو لە دانیشتنی ئەمڕۆدا بۆ هەڵبژاردنی سەرۆك كۆماری عیراق ئامادە بن، داواشی لە سەرجەم لایەنەكان كردبوو، بەرپرسیارێتیی هەڵبگرن و بەرژەوەندیی باڵای نیشتمانی لەبەرچاو بگرن، جەختیشیكردووەتەوە، ناوی ئەو ئەندامانەی ئامادە نابن و ئەو كوتلانەش كە رێگری لە ئامادەبوونی پەرلەمانتارەكانیان دەكەن، بۆ رای گشتی بڵاودەكرێنەوە.
نوێدەکرێتەوە...
بافڵ جەلال تاڵەبانی، سەرۆکی یەکێتیی نیشتمانیی کوردستان و عەممار حەکیم، سەرۆکی رەوتی حیکمە لە بەغداد کۆبوونەوە.
لە کۆبوونەوەکەد، کە قوباد تاڵەبانی و دەرباز کۆسرەت رەسوڵ، ئەندامانی مەکتەبی سیاسی و خالید شوانی، وەزیری دادی عیراق ئامادەبوون، گفتوگۆ لەبارەی نوێترین پێشهات و گۆڕانکارییە سیاسییەکانی عیراق و ناوچەکە کرا و جەخت لە دوورخستنەوەی وڵات لە ململانێکان کرایەوە.
هەروەها دانیشتنی ئەنجوومەنی نوێنەران بۆ هەڵبژاردنی سەرۆک کۆمار تەوەرێکی دیکەی کۆبوونەوەکە بوو و دووپات لە تەواوکردنی رێکارە دەستوورییەکان کرایەوە.
هەیبەت حەلبوسی، سەرۆکی ئەنجومەنی نوێنەرانی عیراق، بانگهێشتێکی ئاڕاستەی سەرجەمئەندامانی ئەنجومەنی نوێنەران و سەرۆک فراکسیۆنەکانی کرد بۆ ئامادەبوون لە دانیشتنی سبەینێ شەممە، کە تایبەتە بە هەڵبژاردنی سەرۆک کۆمار.
بە گوێرەی بانگێشتنامەک، سەرۆکی ئەنجومەنی نوێنەران جەختی لە گرنگی تەواوکردنی شایستە دەستورییەکان و لەبەرچاوگرتنی بەرژەوەندی باڵای نیشتمانی کردوەتەوە بە تایبەت لە ژێر رۆشنایی ئەو رەوشە ئەمنیی و ئابورییەی وڵات پێیدا تێدەپەڕێت، کە بەرپرسیارێتییەکی نیشتمانی دەخاتە سەر شانی هەمووان.
هەیبەت حەلبوسی، هۆشداری داوە، کە ناوی ئەو ئەندامانەی ئامادەی دانیشتنەکە نابن، لەگەڵ ناوی ئەو فراکسیۆنانەی رێگری لە ئامادەبونی ئەندامەکانیان دەکەن، بۆ رای گشتی بڵاودەکرێتەوە.
ئەو کارەشی وەک هەنگاوێک بۆ شەفافیەت و دیاریکردنی ئەو لایەنانەی دەبنە هۆی پەکخستنی پرۆسە دەستورییەکە لەقەڵەمداوە.
فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق، لە راگەیەندراوێکدا جەخت لەسەر پێویستی بەستنی کۆبوونەوەی سبەینێ شەممە 11ـی نیسان دەکاتەوە، بە مەبەستی یەکلاکردنەوەی پۆستی سەرۆک کۆمار وەک گرنگترین شایستەی دەستوری.
فراکسیۆنەکە ئاماژە بەوە دەکات، کە ئەم پرسە کاتێکی زۆری وەرگرتووە و چیتر نابێت نەبوونی تەبایی سیاسی ببێتە رێگر لەبەردەم کاراکردنەوەی دامەزراوەکانی دەوڵەت، چونکە دواکەوتنی ئەم هەنگاوە زیانی راستەوخۆی بە ژیان و بژێوی هاووڵاتیان گەیاندووە و کاروانی خزمەتگوزاری و ئابووری پەکخستووە.
دەقی راگەیەندراوکەی فراکسیۆنی یەکێتی لە بەغداد
بەیاننامەی فراکسیۆنی یەکێتیی نیشتیمانیی کوردستان لە ئەنجوومەنی نوێنەران.
لەژێر ڕۆشنایی ئەو بارودۆخە هەنووکەییەی وڵات پێیدا تێدەپەڕێت، و لە وەڵامی شایستە دەستوورییەکان کە گەلی عێراق چاوەڕوانی دەکات، فراکسیۆنی یەکێتیی نیشتمانیی کوردستان لە ئەنجومەنی نوێنەران جەخت دەکاتەوە لەسەر پێویستی بەستنی کۆبوونەوەی ئەنجومەنی نوێنەران لە سبەی شەممەدا، بە مەبەستی تەواوکردنی گرنگترین شایستەی دەستووری کە خۆی لە هەڵبژاردنی سەرۆک کۆماردا دەبینێتەوە، دوای ئەوەی ئەم مەلەفە کاتێکی پێویستی بۆ یەکلاییکردنەوە وەرگرتووە، بۆیە نابێت پرسی نەبوونی تەبایی ببێتە هۆکارێک بۆ پەکخستن و تەواوکردنی شایستە دەستوورییەکان، کە بە کۆڵەکەی سەرەکی بۆ کاراکردنەوەی دامەزراوەکانی دەوڵەت و دەستەبەرکردنی سەقامگیری سیاسی و ئابووری دادەنرێت.
دواکەوتنی یەکلاییکردنەوەی ئەم پۆستە کاروانی دەوڵەت پەکدەخات و دەبێتە هۆی کەڵەکەبوونی مەلەفە ئابووری، خزمەتگوزاری و ئەمنییەکان کە ڕاستەوخۆ پەیوەندییان بە ژیانی هاووڵاتییانەوە هەیە، هاووڵاتیانی عێراق چاوەڕوانن ئەنجومەنی نوێنەران هەڵبستێت بە بەرپرسیارێتییە دەستوورییەکانی بۆ ڕووبەڕووبوونەوەی ئەو تەحەدییانەی ڕووبەڕووی عێراق دەبنەوە لەسەر هەردوو ئاستی ناوخۆیی و دەرەکی، هەروەها باشترکردنی باری گوزەران و دابینکردنی هەلی کار .
لە سۆنگەی بەرپرسیارێتی نیشتمانییەوە، فراکسیۆنی یەکێتیی نیشتمانیی کوردستان لە ئەنجومەنی نوێنەران داوا لە بەڕێزان ئەندامانی ئەنجومەنی نوێنەران دەکات ئامادەی کۆبوونەوەی سبەی شەممە بن، کە ڕێککەوتی ۱۱ی نیسانە، لە پێناو بەدیهێنانی خواستەکانی گەلەکەمان و چەسپاندنی پڕۆسەی سیاسی و دیموکراسی کە لەسەر خوێنی پاک و قوربانییەکانی گەلەکەمان دامەزراوە، کە لە پێناو عێراق و ئازادی گەلەکەیدا بەخشیویانە.
فراکسیۆنی یەکێتیی نیشتمانیی کوردستان
بانكی ناوەندی عیراق رێنماییەكی نوێی بۆ ئەو كەسانە بڵاوكردووەتەوە كە ناویان بۆ بەجێگەیاندنی فەریزەی حەجی ئەمساڵ دەرچووەو دەڵێت، بە نرخی پاڵپشتیكراو دۆلاریان پێ دەفرۆشن.
دەشڵێت، ئەو كەسانەی فەریزەی حەج بەجێدەگەیەنن، بڕی دوو هەزار دۆلاریان بەنرخی بانكی ناوەندی پێدەدرێت، واتە بۆ هەر دۆلارێك هەزار و 320 دینار و لە 13ی ئەم مانگەشەوە بڕیارەكە جێبەجێ دەكرێت.
ئاماژەی بەوەشكردووە، پێویستە ئەو كەسە خۆی ئامادە بێت بۆ وەرگرتنی ئەو بڕە دۆلارە و هەموو مامەڵەكانیش لە رێگەی سەكۆی ئەلیكترۆنی FITR تۆمار بكرێن، تەنیا ئەوانەش سودمەند دەبن كە ناویان لە لیستی دەستەی باڵای حەج و عومرەی عیراقدا بڵاوكراوەتەوە.
رۆژی شەممە ئەنجومەنی نوێنەرانی عیراق بۆ هەڵبژاردنی سەرۆك كۆمار كۆدەبێتەوە.
فەرمانگەی راگەیاندنی سەرۆكایەتی ئەنجومەنی نوێنەرانی عیراق كارنامەی دانیشتنی رۆژی شەممەی داهاتوی ئەنجومەنەكەی بڵاوكردەوە، بەپێی كارنامەكەش دانیشتنەكە لە یەك تەوەر پێكهاتووە كە بریتییە لە هەڵبژاردنی سەرۆك كۆماری عیراق.
رۆژی 29ی ئاداری رابردوو سەرۆكایەتی ئەنجومەنی نوێنەرانی عیراق ئاشكرایكرد دوای كۆبونەوە لەگەڵ سەرۆكی فراكسیۆنەكان بڕیاریانداوە رۆژی 11ی نیسان بۆهەڵبژاردنی سەرۆكا كۆماری عیراق دیاری بكرێت
ئەمڕۆ پێنجشەممە، د. لەتیف رەشید سەرۆک کۆماری عیراق، پەیوەندییەکی تەلەفۆنی لەگەڵ جۆزێف عەون سەرۆک کۆماری لوبنان ئەنجامدا.
لەمیانی پەیوەندییە تەلەفۆنیەکەدا باسیان لەو پێشهات و ئاڵنگارییانە کرد کە رووبەڕووی ناوچەکە دەبنەوە، ئەمەجگە لەوەی جەختیان لە گرنگی بەهێزکردنی هاوکاری و هەماهەنگی نێوان هەردوو وڵاتی برا کردەوە بە شێوەیەک کە خزمەت بە بەرژەوەندییە هاوبەشەکان بکات و ئاسایش و سەقامگیری ناوچەکە بپارێزێت.
سەرۆک کۆمار، پشتیوانی عیراقی بە سەرۆکایەتی کۆمار و حکومەت و گەلی عیراقەوە بۆ گەلی لوبنانی برا دووپاتکردەوە و بە توندی سەرکۆنەی ئەو دەستدرێژییانەی کرد کەڕووبەڕوویان دەبێتەوە، هاوکات جەختیشی لە هەڵوێستی نەگۆڕی عیراق لەپشتیوانیکردنی ئاسایش و سەروەری لوبنان کردەوە.
هەروەها سەرۆک کۆمار، داوای لەکۆمەڵگەی نێودەوڵەتی کرد کە بەرپرسیارێتی خۆی لە ئەستۆ بگرێت، بە کارکردن بۆ راگرتنی پەرەسەندن و پابەندکردنی هەموو لایەنەکان بەڕێزگرتن لە ئاگربەست و وەستاندنی ئۆپەراسیۆنە سەربازییەکان.
لەلای خۆیەوە سەرۆک کۆماری لوبنان، پێزانینی خۆی بۆ هەڵوێستە رەسمی و جەماوەرییەکانی عیراق دەربڕی بۆ پاڵپشتی لوبنان وجەختیشی لە گرنگی یەکخستنی هەوڵە عەرەبی و نێودەوڵەتییەکان کردەوە، بۆ وەستاندنی دەستدرێژییەکان وگرتنە بەرری رێگە چارەیەکی بەپەلە کە گەرەنتی پاراستنی هاووڵاتیانی سیڤیل و چەسپاندنی سەقامگیری لە ناوچەکەدا بەدیبهێنێت.
د. لەتیف رەشید سەرۆک کۆماری عیراق، لە ساڵیادی ئازادکردنی عیراقدا پەیامێکی بڵاوکردووەتەوە و تێیداهاتووە: وانە قووڵەکانی ئەم ساتەوەختە، داوامان لێدەکات ئەزموونی دیموکراسی بچەسپێنین و بناغەکانی پتەوتر بکەین و ئاڵنگارییەکان تێپەڕێنین و بە گیانێکی نیشتمانیی بەرپرسیارانەوە کاربکەین کەڕێگری لە دووبارەبوونەوەی کارەساتەکانی ڕابردوو بکات و داهاتوویەکی سەقامگیری شایستە بۆ هەموو عێراقییەکان دەستەبەر بکات.
دەقی پەیامەکە
لە ٩ی نیساندا یادی ساتەوەختێکی مێژووی نوێی عێراق دەکەینەوە، ئەو ڕۆژەی لاپەڕەی دیکتاتۆریەت هەڵدرایەوە کە ئەستۆی گەلەکەمانی بە ساڵانێکی دوورودرێژی ستەم و ئازار و جەنگی بێمانا قورس کردبوو، سەردەمێکی نوێی دیموکراسی و بنیاتنانی دەوڵەت لەسەر بنەمای دامەزراوەکان دەستی پێکرد.
وانە قووڵەکانی ئەم ساتەوەختە، داوامان لێدەکات ئەزموونی دیموکراسی بچەسپێنین و بناغەکانی پتەوتر بکەین و ئاڵنگارییەکان تێپەڕێنین و بە گیانێکی نیشتمانیی بەرپرسیارانەوە کاربکەین کەڕێگری لە دووبارەبوونەوەی کارەساتەکانی ڕابردوو بکات و داهاتوویەکی سەقامگیری شایستە بۆ هەموو عێراقییەکان دەستەبەر بکات.
هەر بەم بۆنەیەوە، بەئەوپەڕی ڕێزەوە قوربانیدانی ئەو شەهیدانەمان وەبیردەهێنیەوە کە ڕووبەڕووی دڕندەیی ڕژێمی ستەمکار بوونەوە، لە پێشەنگیاندا، سەید محمد باقر ئەلسەدر و خوشکەکەی، علوییە بنت ئەلهودا، شەهیدانی کیمیابارانی هەڵەبجە، شاڵاوەکانی ئەنفال، گۆڕە بەکۆمەڵەکان، ڕاپەڕینی شەعبانی و شەهیدانی بارزانیەکان و هەموو ئەو شەهیدانەی عێراق کەبوونە قوربانی سیاسەتەکانی ستەم و زۆرداری ڕژێمی بەعس، کەووڵاتی نوقمی دۆزەخی جەنگەکانی و کارەسات و وێرانکاری کرد.
وەفاداری بۆ خوێنی شەهیدان پێویستی بە بەرزڕاگرتنی یەکڕیزی و پتەوکردنی بەهاکانی دادپەروەری و ئازادی و بەرەوپێشچوونی بنیاتنانی عێراقێک کە تێیدا ئاشتی و خۆشگوزەرانی زاڵ بێت، و هەموو هاووڵاتیانی لە لەئامێز بگرێت.
د.لەتیف جمال ڕەشید
سەرۆک کۆمار
٩ی نیسان ٢٠٢٦
23 ساڵ لەمەوبەر لە 9ی نیسانی 2003، ئەمریكا و هاوپەیمانان ئۆپراسیۆنی رزگاركردنی عیراقیان بۆ لەناوبردنی رژێمی بەعس دەستپێكرد. دوای تێپەڕبوونی 21 رۆژ بەسەر شەڕەكەدا، شاری بەغداد بەتەواوی كۆنترۆڵكرا و پەیكەری سەدام حوسێن لە ناوەڕاستی پایتەخت شكێندرا .
رۆژی 9ی نیسانی 2003، وەك وەرچەرخانێكی مێژوویی لە رۆژهەڵاتی ناوەڕاست تۆماركرا، كاتێك هێزەكانی هاوپەیمانان بە سەرۆكایەتی واشنتۆن توانییان بە تەواوی كۆنتڕۆڵی بەغدادی پایتەخت بكەن.
لەو رۆژەدا و لە گۆڕەپانی فیردەوسی، رووخاندنی پەیكەری سەدام حسێن بووە رەمزی كۆتاییهاتن بە رەوشێكی پڕ لە ستەم و چەوسانەوە كە بۆ ماوەی زیاتر لە دوو دەیە باڵی بەسەر عیراقدا كێشابوو.
ئەم رووداوە تەنیا گۆڕینی دەسەڵات نەبوو، بەڵكو كۆتاییهاتنی قۆناغێكی تاریك بوو كە تێیدا هەموو پێكهاتەكان، بەتایبەت گەلی كورد، رووبەڕووی دڕندانەترین شێوەی پاكتاوی رەگەزی و جینۆساید بوونەوە.
رژێمی بەعس لە ماوەی دەسەڵاتداریدا، چەندین تاوانی گەورەی دژ بە مرۆڤایەتی ئەنجامدا.
لە 16ی ئازاری 1988، شاری هەڵەبجەی كیمیاباران كرد و بووە هۆی شەهیدبوونی 5000 هاووڵاتی بێتاوان.
جگە لەمەش، شاڵاوەكانی ئەنفال كارەساتێكی تر بوون كە تێیدا 182 هەزار كورد بێسەروشوێن كران.
بەپێی بەڵگەنامە مێژووییەكان، ئێستاش گۆڕە بەكۆمەڵەكان گەواهی ئەو دڕندەییە دەدەن كە دەرهەق بە كورد كراوە.
ئەم رژێمە هیچ سنوورێكی بۆ فشار و سەركوتكردنی نەیارەكانی نەدەناسی و هەموو تواناكانی بۆ پاراستنی كورسییەكەی بەكاردەهێنا.
سەدام حسێن ، كە لە 28ی نیسانی 1937 لە گوندی عۆجە لەدایكبووە، لە ساڵی 1979دا بە رەسمی بووە چوارەم سەرۆك كۆماری عیراق.
ئەو پێشتر رۆڵی سەرەكی لە كودەتای 17ی تەموزی 1968دا بینیبوو و هەموو جومگەكانی دەسەڵاتی لە دەستی خۆیدا كۆكردبووەوە.
سەدام نەك هەر وەك سەرۆك كۆمار، بەڵكو وەك ئەمینداری گشتی حزبی بەعس و فەرماندەی گشتی هێزە چەكدارەكانیش مامەڵەی دەكرد، ئەمەش وایكردبوو كە هیچ لێپرسراوێكی تر نەتوانێت بەبێ رەزامەندی ئەو بڕیار بدات.
پرۆسەی ئازادیی عێراق لە 20ی ئازاری 2003 بە یەكەم گورزی ئاسمانی دەستیپێكرد، دوای تێپەڕبوونی تەنیا چەند هەفتەیەك، لە 9ی نیساندا رژێمەكە هەرەسی هێنا.
سەدام حسێن دوای ماوەیەك خۆشاردنەوە، لە 13ی كانوونی یەكەمی 2003 لە ئۆپەراسیۆنێكی تایبەتدا دەستگیركرا.
پاش دادگاییكردنێكی درێژخایەن و ئیمزاكردنی بڕیاری لەسێدارەدانی، لە سەعاتەكانی سەرەتای رۆژی 30ی كانوونی یەكەمی 2006دا سزاكەی بەسەردا جێبەجێكرا و كۆتایی بە ژیانی یەكێك لە مەترسیدارترین دیكتاتۆرەكانی سەدەی بیستەم هات.
ئیمانوێل ماکرۆنی سەرۆکی فەرەنسا پەیوەندییەکی تەلەفۆنی لەگەڵ محەمەد شیاع سودانی ئەنجامدا و بەپێی راگەیەندراوی نووسینگەی رۆژنامەوانی سودانی، باسیان لە چەند تەوەرێک کردووە.
بەپێی زانیارییەکانی نووسینگەی رۆژنامەوانی سودانی: هەردوولا باسیان لە ئاگربەست و گرژییەکانی ناوچەکە کردووە بەتایبەت هێرشەکانی ئەمڕۆی ئیسرائیل بۆسەر لوبنان.
سودانی بە ماکرۆنی راگەیاندووە، ئەو کەسانەمان دەستگیرکردووە کە دەستیان هەبووە لە هێرشکردنە سەر بنکەیەکی هاوپەیمانان لە نزیک هەولێر کە بووە هۆی کوژرانی ئەفسەرێکی فەڕەنسی.
لە پەیوەندییەکەدا باس لە مۆندیالیش کراوە، سەرۆکی فەرەنسا بەبۆنەی سەرکەوتنی هەڵبژاردەی تۆپی پێی عیراق بۆ مۆندیالی 2026، پیرۆزبایی لە سەرۆک وەزیرانی عیراق کردووە و خۆشحاڵی خۆی بەوە دەربڕیوە کە هەردوو هەڵبژاردەکە لە یەک گروپی مۆندیالدان و یاری پێکەوە ئەنجام دەدەن.
د. لەتیف رەشید سەرۆک کۆماری عیراق لەبارەی ئاگربەستی کاتیی نێوان ئەمریکا و ئێران بەیاننامەیەکی بڵاوکردەوە و تێیدا هاتووە: پێشوازی لە ڕاگەیاندنی ئاگربەستی نێوان ئەمریکا و کۆماری ئیسلامی ئێران دەکەین و بە پەرەسەندنێکی گرنگی دەزانین
دەقی بەیاننامەکە:
پێشوازی لە ڕاگەیاندنی ئاگربەستی نێوان ئەمریکا و کۆماری ئیسلامی ئێران دەکەین و بە پەرەسەندنێکی گرنگی دەزانین کە یارمەتیدەر دەبێت بۆ هێورکردنەوەی گرژییەکان لە ناوچەکەدا.
پێویستە ئەم هەنگاوە بۆ بەهێزکردنی ڕێڕەوی دیالۆگی دیپلۆماسی بنیاتنەر و گرتنەبەری لۆژیکی دانایی و تێگەیشتن و چارەسەری ئاشتیخوازانە بۆ چارەسەرکردنی ناکۆکیەکان و پەنا نە بردنە بەر بەکارهێنانی هێز بۆ گەیشتن بە ڕێگا چارەیەکی یەکلاکەرەوەی بەردەوام کە ئاسایشی ناوچەکە و جیهان بپارێزێت.
عێراق لەسەر بنەمای ڕۆڵی خۆی لە ناوچەکەدا بەپەرۆشە بۆ پشتیوانیکردن لەهەوڵە نێودەوڵەتییەکان بەشێوەیەک کە ببێتە هۆی سەرکەوتنی دیالۆگ و دانوستانەکانی نێوان کۆماری ئیسلامی و ئەمریکا و بەدیهێنانی ئاشتی هەمیشەیی و پاراستنی تواناکانی گەلان.
جەخت لەوە دەکەینەوە کە ناوچەکە پێویستی بە هەوڵی هاوبەشی ناوچەیی و نێودەوڵەتی هەیە بۆ پتەوکردنی بنەماکانی ئاشتی، پاراستنی سەروەری دەوڵەتان و دەستەبەرکردنی ئایندەیەکی ئارام و خۆشگوزەران بۆ گەلانی.
د. لەتیف جەمال ڕەشید
سەرۆک کۆمار
چوارشەممە 8 ی نیسانی 2026
دەسەڵاتی فڕۆکەوانیی مەدەنیی عیراق لەبارەی دەستپێکردنەوەی گەشتە ئاسمانییەکان راگەیەنراوێکی بڵاوکردەوە و تێیدا هاتووە، لە ئەمڕۆوە ئاسمانی عیراق بەڕووی گەشتە ئاسمانییەکاندا دەکرێتەوە
لە راگەیەنراوەکەدا ئەوەش هاتووە، رێگە بە دەستپێکردنەوەی سەرجەم گەشتە ئاسمانییە مەدەنییەکان دەدرێت، کە تێپەڕبوون (ترانزێت)، فڕین و نیشتنەوە لە فڕۆکەخانەکانی عیراق دەگرێتەوە.
ئەوەش روونکراوەتەوە، دەسەڵاتی فڕۆکەوانیی مەدەنیی عیراق جەخت لە پابەندبوونی تەواوی خۆی دەکاتەوە بە جێبەجێکردنی بەرزترین پێوەرەکانی سەلامەتی و ئاسایشی ئاسمانی دەکاتەوە.
بە موشەك كۆبوونەوەی گروپێكی چەكداری عیراق لەناوچەی خۆرزوبێری قەزای سەفوان لە بەسڕە كرایە ئامانج و پێنج كوژراوی لێكەوتەوە، میدیاكانی عیراقیش دەڵێن، موشەكەكە لە كوەیتەوە ئاڕاستە كراوە.
میدیاكانی عیراق لە سەرچاوەیەكی ئەمنییەوە ئاشكرایانكردووە، بە موشەك ماڵێك لە خۆرزوبێری قەزای سەفوان لە بەسڕە كراوەتە ئامانج، كە كۆبوونەوەی گروپێكی چەكداری تێدا بەڕێوەچووە.
ئەوەشیان خستووەتەڕوو، بەپێی زانیارییە سەرەتاییەكان لە بۆردومانەكەدا پێنج كەس كوژراوە و یەكێك لە كوژراوەكانیش ژنە.
میدیا عیراقییەكان دەشڵێن، لێكۆڵینەوەی لایەنە ئەمنییەكان لە رووداوەكە دەستیپێكردووە و لە لێكۆڵینەوەكانیشدا دەركەوتووە موشەكەكە لە كوەیتەوە ئاڕاستە كراوە.