حکومەتی عیراق پلانێکی نوێی بۆ کارکردن لەسەر دابەزاندنی نرخی دۆلار لە بازاڕدا ئاشکرا کرد، هاوکات بڕیاری بەخۆڕاییکردنی گومرگی بۆ بەشێک لە کەلوپەلە بنەڕەتییەکان راگەیاند.

حەیدەر عەبوودی، وتەبێژی حکومەتی عیراق، لە لێدوانێکیدا بۆ ئاژانسی دەنگوباسی عیراقی رایگەیاند: حکومەت و بانکی ناوەندیی عیراق بەپێی پلانێکی داڕێژراو و تۆکمە کار دەکەن بۆ ئەوەی لە ماوەیەکی نزیکدا نرخی دۆلار لە بازاڕ بگەیەننە 1550 دینار بۆ هەر 100دۆلارێک.

عەبوودی ئاماژەی بەوەش کرد: ئەم هەنگاوە پشت بە یەدەگ و داراییەکی بەهێز و رەوانکراوی ناو بنکەی ناوەندی دەبەستێت، کە دەرفەت دەدات تەمویلی بازرگانیی دەرەکی بە ئاسانی بەڕێوەبچێت و پێداویستییەکانی هاوردەکردن دابین بکرێت.

سەبارەت بە حەواڵەکانی پێشتر و پێش پەسەندکردنی نرخی ئاڵوگۆڕی ئێستا، وتەبێژی حکومەت دووپاتی کردەوە: تەرخانکراوی دارایی تەواو دابین کراوە بۆ جێبەجێکردنیان بەپێی نرخی پێشوو و ئۆپەراسیۆنە پەیوەندیدارەکان.

لە لایەکی ترەوە، ئاماژەی بەوە دا: ئەنجوومەنی وەزیران لە دانیشتنی بیست و سێیەمی خۆیدا بڕیاری داوە لە رۆژی 7ی تشرینی یەکەمی 2026ەوە، تەواوی کەرەستە خۆراکییەکان و دەرمانە هاوردەکراوەکان لە رەسمی گومرگی ببەخشێت.

سەرۆكی فراكسیۆنی ئاوەدانكردنەوە و گەشەپێدان لە ئەنجومەنی نوێنەرانی عیراق رایگەیاند، هەناردەكردنی نەوتی عیراق لە رێگەی هورمزەوە بە رەزامەندیی ئەمریكایە؛ و ئێران وەك پێویست پاڵپشتی عیراقی نەكردوە.

بەها ئەعرەجی سەرۆكی فراكسیۆنی ئاوەدانكردنەوە و گەشەپێدان لە ئەنجومەنی نوێنەرانی عیراق چاوپێكەوتنێكی تەلەفزیۆنیدا رایگەیاند: پرسی هەناردەكردن و تێپەڕبوونی نەوتی عیراق لە رێگەی گەروی هورمزەوە لە ئێستادا بە رەزامەندی و مۆڵەتی ئەمریكی بەڕێوەدەچێت.

لێدوانەكانی ئەعرەجی، هاوكاتن لەگەڵ ئەو قەیرانە گەورە ئابووری و بازرگانیانەی كە عیراق بەهۆی پەككەوتن گەروی هورمزەوە رووبەڕووی بووەتەوە.

هاوكات راشیگەیاند: بانكی نێودەوڵەتی پێشنیازی كردووە نرخی 100 دۆلاری ئەمریكی بكرێتە 220 هەزار دیناری عیراق.

 

محەمەد مەولا وەک ئەندامی ئەنجوومەنی شاری "دێربۆرن هایتس" لە ویلایەتی میشیگانی ئەمریکا سوێندی یاسایی خوارد، بەوەش بەپێی میدیا ناوخۆییەکان دەبێتە یەکەم ئەمریکیی بەڕەچەڵەک عیراقی کە لە مێژووی ئەو شارەدا ئەو پۆستە وەربگرێت.

مەراسیمی سوێندخواردنەکە لەناو هۆڵی کۆبوونەوەکانی ئەنجوومەنی شارەوانی و بە ئامادەبوونی بەرپرسان و ژمارەیەک لە کەسایەتی عیراقی بەڕێوەچوو. 

مەولا بەڵێنی دا خزمەتی شارەکە و دانیشتووانەکەی بکات، پاشان لەلایەن ئەندامانی ئەنجوومەنەکە و ئامادەبووانەوە پیرۆزبایی لێکرا.

 

لە ئۆپراسیۆنێکی هاوبەشی هێزە ئەمنییەکان لە سنوری پارێزگای کەرکوک، دوو چەکداری داعش کوژران و چەندین حەشارگەی تیرۆرستان خاپورکران.

سەرچاوەیەکی ئەمنی بە ئاسۆ ئەحمەد پەیامنێری کوردسات نیوزی رایگەیاند، ئۆپراسیۆنێکی فراوانی زەمینی و ئاسمانی بۆ سەر حەشارگەکانی تیرۆرستانی داعش لە سنوری 'دۆڵی زغێتون' و 'چەمی روخانە' ئەنجامدرا.

ئاماژەی بەوەشكرد، پاش بۆرومانی فڕۆکە جەنگییەکان، هێزە ئەمنیەکان لە سنوری چەمی روخانە سەر بە قەزای داقوق، تەرمی دوو تیرۆرستی داعشیان لە شوێنی بۆردومانەکەدا دۆزیەوە.

ئەو سەرچاوەیە راشیگەیاند، لە ئۆپراسیۆنەکەدا، هێزە ئەمنییەکان توانیویانە چەندین حەشارگەی تیرۆرستانی داعش بدۆزنەوە و کێوماڵی ناوچەکە بکەن.

سەركردەكانی چوارچێوەی هەماهەنگی لەسەر كاندیدانی پۆستە وزارییە بەتاڵەكان گەیشتنە رێككەوتن و سەرۆك وەزیرانی عیراقیش پێشنیازیكردووە رۆژی پێنجشەممەی داهاتوو لە ئەنجومەنی نوێنەران دەنگ بە كاندیدەكان بدرێت.

بەپێی نوسراوێك كە ئاراستەی ئەنجومەنی نوێنەرانی كردوە، عەلی زەیدی سەرۆك وەزیرانی عیراق ، داوای  كردوە وادەیەك بۆدانیشتنێكی تایبەت بە دەنگدان بە تەواوكردنی پێكهاتەی كابینەی حكومەت دیاریبكرێت و  پێشنیازیشیكردوە دانیشتنەكە لەرۆژی پێنج شەممەدا بەرێوەبچێت

سەرۆك وەزیرانی عیراق لە نوسراوەكەدا ئاماژەی بەوەداوە رایگەیاندووە، جێگرانی سەرۆك وەزیرانی عیراق هیچ موچە و شایستەیەكی داراییان نابێت و دامەزراندنی نوێش بۆ نووسینگەكانیان ناكرێت.

سەرچاوەیەكی باڵاش لە چوارچێوەی هەماهەنگی بە كوردسات نیوزی راگەیاند، سەركردەكانی چوارچێوەی هەماهەنگی لەسەر كاندیدانی پۆستە وزارییە بەتاڵەكان گەیشتوونەتە رێككەوتن و لە ئایندەیەكی نزیكدا ناوی كاندیدەكان دەچێتە ئەنجومەنی نوێنەران.

هاوکات، ئەمشەو ئەنجومەنی نوێنەرانی عیراق دانیشتنی رۆژی پێنجشەممەی بۆ دەنگدان لەسەر تەواوکردنی پێکهاتەی کابینەی حکومەت دیاریکرد.

لەسەر وەرگرتنی بەرتیل لە خاوەن كارگەیەك، بریكاری وەزارەتی پیشەسازی و كانزاكانی حكومەتی عیراق دەستگیركرا.

ئاژانسی رەسمی هەواڵی عیراق لە زاری سەرچاوەیەكی باڵای حكومەتی عیراق بڵاویكردەوە، ناسر كازم بریكاری وەزارەتی پیشەسازی و كانزاكان بە تۆمەتی وەرگرتنی بەرتیل دەستگیركراوە.

ئەوەشی خستووەتەڕو،  بریكارەكەی وەزارەتی پیشەسازی و كانزاكان لەكاتی وەرگرتنی بەرتیل لە خاوەن كارگەیەكی  پارێزگای موسەنا دەستگیركراوە.

ئەوەش لەكاتێكدایە، بە سەرۆكایەتی عەلی زەیدی سەرۆك وەزیرانی عیراق هەڵمەتی بەرەبەیان بەردەوامە بۆ دەستگیركردنی گەندەڵكاران و تائێستا ژمارەیەكی زۆر لە گەورە لێپرسراوانی حكومی بە تۆمەتی گەندەڵی دەستگیركراون، لەنێویاندا عەدنان جومەیلی بریكاری وەزارەتی نەوت.

لە بەغداد عەلی زەیدی، سەرۆک وەزیران و تۆم باراکی نێردەی ئەمریکا بۆ عیراق کۆبونەوە و تاوتوێی پەیوەندییە دوو قۆڵاییەکانی نێوان عیراق  وئەمریکا کرا.

ئەمڕۆ سێشەممە، نوسینگەی سەرۆک وەزیرانی عیراق رایگەیاند،لە بەغداد عەلی زەیدی پێشوازی لە تۆم باراک کردوە و نوێترین پێشهاتەکانی ناوچەکە تاوتوێکران

 ئاماژە بەوەشکراوە، باس لە هەوڵەکان بۆ  پشتیوانیکردن لە ئاسایشی و سەقامگیری ناوچەکە، بە جۆرێک خزمەت بە بەرژوەندییەکانی هەردولا بکات کرا، بە جۆرێک گرژییەکانی ناوچەکە کەمبکاتەوە.

لای خۆشیەوە تۆم باراک لەبارەی کۆبونەوەکەوە، رایگەیاند بوو، خۆشحاڵە بە کۆبونەوەکە و سەقامگیری بەو سەرکردانە بەدی دێت،  کە رێگا سەختەکە هەڵدەبژێرن.

محەمەد شیاع سودانی، سەرۆک وەزیرانی پێشوتری عیراق، لەمیانی بەشدارییکردنی لە دیداری مێری 2026 لەبارەی ئاییندەی حوکمڕانی ورەوشی ئەمنیی عیراق، زنجیرەیەک هەڵوێستی گرنگی خستەڕوو و رایگەیاند، لەم قۆناغەدا پاراستنی ئاسایش و سەقامگیریی وڵات لە سەرووی هەموو کارە ئۆپراسیۆنی و سیاسییەکانەوەیە.

سودانی ئاماژەی بەوە کرد کە ئاڵۆزی و جەنگەکانی ناوچەکە کاریگەریی راستەوخۆیان لەسەر عیراق هەبووە، بەوپێیەی تەواوی وڵاتانی ناوچەکە تووشی گرفتی ئەمنی بوونەتەوە. جەختیشی کردەوە: بەکارهێنانی خاکی عیراق بۆ ئەنجامدانی هێرش بۆ سەر وڵاتانی دراوسێ بە تەواوی قبوڵنەکراوە.

سەبارەت بە رەوشی ئەمنی و سەربازیی وڵات، سەرۆک وەزیران باسی لەوە کرد کە هێزە ئەمنییەکانی عیراق توانای تەواویان هەیە بۆ پاراستنی سەروەریی خاک و رووبەڕوبوونەوەی تیرۆر، بەڵام لە هەمان کاتدا عیراق هێشتا پێویستی بە هاوکاریی ویلایەتە یەکگرتووەکانی ئەمەریکا هەیە.

لە بەشێکی تری وتارەکەیدا، سودانی تیشکی خستە سەر پرسی گرووپە چەکدارەکان و رایگەیاند: پێشهاتەکانی ناوچەکە کاریگەرییان لەسەر پرۆسەی چەکداماڵینی گرووپەکان دروستکردووە، ئاماژەی بەوەش دا کە رێکخستنەوەی ریزەکانی حەشدی شەعبی و دەرکردنی یاسای خانەنشینی بۆ ئەندامانی، هەنگاوێکی سەرەکی و گرنگە بەرەو چەسەپاندنی سەروەریی یاسا و ڕێکخستنی چەک.

سودانی هۆشداریشی دا لە مەترسیی بڵاوبوونەوەی ماددە هۆشبەرەکان و بە "گەورەترین هەڕەشە" بۆ سەر داهاتووی عیراق وەسفی کرد.

لە بارەی کێشەکانی نێوان هەولێر و بەغداد، سودانی گەشبینی خۆی دەربڕی و رایگەیاند: خاڵە هاوبەشەکانی نێوان هەرێم و بەغداد گەلێک زیاترن لە خاڵە ناکۆکەکان، جەختیشی کردەوە کە چارەسەرکردنی بنەڕەتیی کێشەکان تەنها لە رێگەی پابەندبوون بە دەستوور و یاساکانەوە دەبێت، چونکە رێککەوتنی کاتی و پینەوپەڕۆکردن ناکۆکییەکان چارەسەر ناکات.

لە کۆتاییدا و لە رووی ئابوورییەوە، سودانی ئاماژەی بە پڕۆژەی "رێگەی گەشەپێدان" کرد و وەک وەچەرخانێکی ستراتیژی ناوی برد کە دەبێتە هۆی بوژانەوەی بنەڕەتیی ئابووریی عیراق و رەخساندنی دەرفەتی نوێ لە ناوچەکەدا.

حكومەتی عیراق بۆ رزگاركردنی ئاوەكانی لە پیسبوون، پڕۆژەیەكی گەورە لە بەغدادەوە رادەگەیەنێت

فەیسەڵ غازی بەڕێوەبەری بەشی پلاندانان و بەدواداچوون لەفەرمانگەی ئاوەڕۆی بەغداد، رایگەیاند: پلانی فراوانكردنی وێستگەی پاڵاوتن و چارەسەركردنی ئاوەڕۆ لە چەند ناوچەیەكی بەغداد ئامادەكراوە و رۆژانە351 هەزار مەتر چوارگۆشە لە ئاوەكان پاك دەكرێنەوە.

هاوكات لەگەڵ ئامادەكاری بۆ بەكارخستنی پێنج وێستگەی پاڵنەر لەبەشی كەرخ، ئەوەش لە چوارچێوەی رێكارەكاندا بۆ كەمكردنەوەی فڕێدانی ئاوی پیس بۆ ناو رووبار و توندوتۆڵكردنی ژێرخانی ئاوەڕۆ.

ئەم جووڵانە  دوای لێدوانەكانی وەزیری ژینگەی عیراق دێت، سەبارەت بە  پیسبوونی سەرچاوەكانی ئاو.

 

بانکی ناوەندیی عیراق، جەختی کردەوە کە کارتەکانی پارەدان بە نرخی رەسمی پەسەندکراو کار دەکەن بۆ دابینکردنی پێداویستییەکانی هاووڵاتییان لە دەرەوەی وڵات.

بانکەکە لە راگەیەندراوێکدا ئاماژەی بەوە دا: ئەو هەواڵەی کە یەکێک لە ئاژانسەکانی هەواڵ لە زاری سەرچاوەیەکی نەناسراوەوە بڵاوی کردووەتەوە و تێیدا بانگەشەی ئەوە کراوە کە بانکەکە بڕی 600 ملیار دیناری گەڕاندووەتەوە چونکە نرخی پێشووی 1320 دیناری بۆ هەر دۆلارێک پەسەند نەکردووە، بەڵکو داوای پێداچوونەوەی بڕەکەی کردووە لەسەر بنەمای نرخی ئێستای ئاڵوگۆڕ کە 1520 دینارە بۆ هەر دۆلارێک، دوورە لە راستییەوە.

بانکەکە جەختی لەوە کردەوە: داواکارییەکانی حەواڵەی دەرەکی کە پێشکەشی بانکییەکان کراون پێش رێککەوتی 7/10/2026، بە نرخی پێشووی ئاڵوگۆڕ و بێ تێچووی زیادە جێبەجێ کراون، و دەستی کردووە بە وەرگرتن و جێبەجێکردنی ئەو داواکارییانە.

هەروەها وتیشی: تەواوی کارتەکانی پارەدان بە نرخی رەسمی پەسەندکراو کار دەکەن بۆ دابینکردنی پێداویستییەکانی هاووڵاتییان لە دەرەوە، و جەختی لەسەر ئەوە کردەوە: لە نووسراوی دەستەی راگەیاندن و گەیاندندا هاتووە پەنابردن بۆ وردبینی لە هەموو ئەوەی کە بڵاو دەکرێتەوە دەربارەی نرخی ئاڵوگۆڕ، بازاڕەکان و موچە، و دڵنیابوونەوە لە سەرچاوە رەسەنەکانیان پێش بڵاوکردنەوە، و بە پێچەوانەوە رێکاری یاسایی لەلایەن ئەم بانکەوە دەگیرێتە بەر بەرانبەر هەر لایەنێک کە پڕوپاگەندە و هەواڵی هەڵە بڵاو بکاتەوە.

سەرۆکایەتی کۆماری عیراق، لە راگەیەندراوێکدا سەرکۆنەی هێرشکردنەسەر فڕۆکەخانەی نێودەوڵەتی مەلیک خالید لە سعودیە دەکات و دەڵێت، " بەئامانجگرتنی فڕۆکەخانە مەدەنییەکان پێشێلکردنی یاسا و نەریتە نێودەوڵەتییەکانە".

دەقی پەیامەکە

سەرۆکایەتیی کۆمار سەرکۆنەی ئەو هێرشە دەکات کە کرایە سەر فڕۆکەخانەی نێودەوڵەتیی مەلیک خالید لە شانشینی عەرەبیی سعوودیە و بووە هۆی کەوتنەوەی قوربانی لەنێو هاووڵاتییانی مەدەنیدا، و جەخت لە رەتکردنەوەی تەواوەتیی سەرجەم ئەو کارە دوژمنکارییانە دەکاتەوە کە ئاسایش و سەقامگیریی دەوڵەتان دەکەنە ئامانج و هەڕەشە لە ژیانی هاووڵاتییان و سەلامەتیی دامەزراوە مەدەنییەکان دەکەن.

سەرۆکایەتیی کۆمار جەختیش دەکاتەوە لەوەی کە بەئامانجگرتنی فڕۆکەخانە مەدەنییەکان پێشێلکردنی یاسا و نەریتە نێودەوڵەتییەکانە، و پەرەسەندنێکە دەبێتە هۆی تێکدانی ئاسایش و سەقامگیریی هەرێمی.

هەروەها سەرۆکایەتیی کۆمار جەخت لە گرنگیی باڵادەستکردنی زمانی دیالۆگ و چارەسەرە دیپلۆماسییەکان و کارکردن بۆ دوورخستنەوەی ناوچەکە لە گرژی و ئاڵۆزیی زیاتر دەکاتەوە، بە شێوەیەک کە ئاسایش و ئاشتیی نێودەوڵەتی بپارێزێت.

سەرۆکایەتیی کۆمار

یەکشەممە، ١١ی تشرینی یەکەمی ٢٠٢٦

وەزارەتی دادی عیراق 200 فەرمانی گرتن و دەستبەسەرداگرتنی پارە و موڵك و ماڵی جیاوازی راگەیاند و دوپاتیشیكردەوە، هەوڵەكان بۆ گەڕاندنەوەی سەروەت و سامانی عیراق بەردەوامن.

ئەحمەد لعێبی وتەبێژی وەزارەتی دادی عیراق رایگەیاندووە: بە ئامانجی گەڕانەوەی سامانی دزراوی عیراق، مانگی رابردوودا 200 فەرمانی گرتن و دەستبەسەرداگرتن بۆ موڵك لەلایەن دامەزراوە جیاوازەكانی دەوڵەتەوە تۆماركراون و رێكاریی یاساییان بەرامبەر گیراوەتە بەر.

ئاماژەی بەوەشكردووە، وەزارەتەكە كار لەسەر فراوانكردنی هاوكارییە دەستوری و یاساییەكان دەكات لەگەڵ چەندین وڵاتدا، لەوانەش ئیمزاكردنی یاداشتنامەی لێكتێگەیشتن تایبەت بە گواستنەوەی سزادراوان، هاوكاری دادوەری و گۆڕینەوەی زانیاری، ئەم هەوڵانە هاوتەریبن لەگەڵ هەنگاوەكانی وەزارەت بۆ بەدواداچوونی داواكراوان و گەڕاندنەوەی سامانی دزراوی عیراق.

 

حکومەتی عیراق، ئەو هێرشەی شەرمەزار کرد کە فڕۆکەخانەی نێودەوڵەتیی شای خالید لە شاری ریازی پایتەختی سعودیەی کردە ئامانج و بووە هۆی کەوتنی قوربانی و زیانی مادی.

صەباح نەعمان، وتەبێژی فەرماندەی گشتیی هێزە چەکدارەکان، لە راگەیەندراوێکدا ئاماژەی بەوە دا: ئەم دەستدرێژییە زیان بە ئاسایش و سەقامگیریی ناوچەکە دەگەیەنێت، و جەختی لەسەر رەتکردنەوەی عیراق کردەوە بۆ هەر پەرەسەندنێکی سەربازی و توندوتیژی، بەتایبەت ئەو هێرشانەی کە شارنشینان و دامەزراوە مەدەنییەکان دەکەنە ئامانج.

عیراق داوای راگرتنی گشتگیرانەی کارە سەربازییەکانی کرد، بە ئامانجی دوورخستنەوەی هاووڵاتیان و گەلە براکەکان لە لێکەوتەکانی، و پاراستنی دامەزراوە مەدەنییەکان لە هێرش و زیانەکان.

لە بەیاننامەکەدا پشتگیریی عیراق بۆ گفتوگۆ و تێگەیشتن وەک جێگرەوەیەک بۆ کاری سەربازی و توندوتیژی دووپات کرایەوە، هەروەها جەخت لەسەر پێویستیی پێشخستنی بەرژەوەندییە هاوبەشەکانی گەلان، دابینکردنی ئازادیی هاتوچۆی دەریایی، ئاسمانی و زەمینی لە ناوچەکەدا، و پەرەپێدانی بەرژەوەندییە ئابووری و گەشەپێدانەکان کرایەوە.

سەرچاوەیەكی ئەمنی بۆ میدیاكانی عیراق ئاشكرایكردووە، بەرەبەیانی ئەمڕۆ فەرمان دراوە بە داخستنی ئاسمانی عیراق.

سەرچاوەكە ئاماژەی بەوەشكردووە، هیچ داخستنێكی تەواوی ئاسمانی عیراق لە ئێستادا بوونی نییە، تەنها ڕێنماییەكان تایبەت بوون بە چۆڵكردنی فڕۆكەی مەدەنی كە تا ئێستاش هۆكارەكەی نادیارە.

پێشتر سەرچاوەیەك، ئاشكرای كردبوو دوو فڕۆكە گەڕێندراوەنەتەوە فڕۆكەخانەی نەجەف ئەوەش دوای ئەوەی ڕێگرییان لێ كرابوو بچنە ناو ئاسمانی ئێرانەوە.

 

وەزارەتی كشتوكاڵی عیراق رایگەیاند، لەگەڵ لایەنە پەیوەندیدارەكان چاودێریی بەرزبوونەوەی نرخی هێلكەو مریشك و گۆشت دەكات.

كشتوكاڵی عیراق ئاماژەی بەوە كردووە، بۆ دابەزاندنی نرخەكان و زیادكردنی كاڵا لە بازاڕدا، حكومەت بڕیاریدا گومرگ و باج لەسەر هێنانی هێلكە، مریشك و ئاژەڵی زیندوو لابدات.

قوسەی حەتاب وتەبێژی وەزارەتەكە ئاماژەی بەوەداوە، هۆكاری سەرەكیی بەرزبوونەوەی نرخەكان دەگەڕێتەوە بۆ بەرزبوونەوەی بەهای دۆلار و هەندێك هۆكاری بازرگانی.

روونیشیكردەوە، وەزارەت پێشتر بۆ پشتیوانیكردنی بەرهەمی ناوخۆیی، هاوردەكردنی تەماتە، خەیار و باینجانی قەدەغە كردبوو، بەڵام بۆ ڕاگرتنی هاوسەنگی، لێژنە تایبەتەكان ڕۆژانە چاودێریی بازاڕ و نرخی كاڵاكان دەكەن و لە كاتی پێویستدا ڕێوشوێنی زیاتر دەگیرێتەبەر.

 

عەلی زەیدی، سەرۆکی ئەنجومەنی وەزیرانی عیراق، جەختی کردەوە کە هەر خێزانێک خاوەنی خانووی تایبەت بە خۆی نەبێت، سەنەدی زەوییەک وەردەگرێت و حکومەتیش لە پرۆسەی دروستکردنیدا هاوکاریی دەکات.

نوسینگەی راگەیاندنی سەرۆک وەزیران لە راگەیەندراوێکدا بڵاوی کردەوە: عەلی زەیدی لە پارێزگای کەربەلاوە پرۆژەی «ملیۆن پارچە زەوی نیشتەجێبوون - دەستپێشخەریی وەتەن»ی یاگەیاند، کە 60 هەزار پارچە زەوی لەخۆدەگرێت و وەک پشکی ئەو پارێزگایە دیاری کراوە.

سەرۆک وەزیران لە وتارێکیدا لە کاتی راگەیاندنی پرۆژەکدا ئاماژەی بەوە کرد: سەردانەکەی تەنها بۆ دانانی بەردی بناغە نییە، بەڵکو بۆ چەسپاندنی مافێکە کە هاووڵاتیی عیراقی ساڵانێکە چاوەڕێی دەکات. روونیشی کردەوە هەڵبژاردنی کەربەلا بۆ راگەیاندنی پرۆژەکە لەبەر ئەوەیە کە شارەکە سیمبولی چاکسازییە.

دەربارەی هەنگاوەکانی داهاتوو، سەرۆک وەزیران ئاشکرای کرد کە پارێزگای نەجەف دەبێتە وێستگەی دووەمی راگەیاندنی پرۆژەکە و بەدوایدا نەینەوا و پارێزگاکانی تر دێن.

جەختیشی کردەوە: لە قۆناغی داهاتوودا دابەشکردنی سەنەدەکان دەست پێدەکات و ئەمەش بەڵێنێکە کە پاشگەزبوونه‌وه‌ی تێدا نییە، چونکە دەیەوێت هەر هاووڵاتییەکی عیراقی لە خانووی تایبەتی خۆیدا بژی و رزگاری ببێت لە نیگەرانی و بارگرانیی کرێچێتی.

سەرۆک وەزیران جەختی لەسەر ئیرادەی حکوومەت کردەوە بۆ تەواوکردنی ئەم پرۆژانە لە ماوەی کارکردنیدا و ئاماژەی بەوە دا زەوییەکان بە شێوازێکی رێکخراو سەرجەم خزمەتگوزارییە سەرەکییەکانیان بۆ دابین دەکرێت، هەروەها جەختی کردەوە ئەم دەستپێشخەرییە هیچ تێچوویەک ناهێنێتە سەر بودجەی گشتی. لە کۆتاییدا سوپاسی پارێزگاری کەربەلا و کۆمپانیای جێبەجێکاری پرۆژەکەی کرد.