عیراق
دادگای فیدڕاڵی، یاساکانی لێبوردنی گشتی و گەڕانەوەی موڵک و ماڵ و باری کەسێتیی راگرت.
دادگای باڵای فیدڕاڵی عیراق لەسەر سكاڵای ژمارەیەك پەرلەمانتار، ئەو سێ یاساییەی راگرت کە 21ی کانونی دووەمی ئەمساڵ، ئەنجومەنی نوێنەران دەنگی دا بە پەسەندکردنی یاساکانی باری کەسیی و رەشنووسی یاسای گەڕاندنەوەی موڵک و ماڵ بۆ خاوەنەکانیان وهەروەها یاسای لێبوردنی گشتی.
پێشتر لەكاتی پەسەندكردنی پرۆژە یاساكاندا لە ئەنجومەنی نوێنەران ناكۆكی لەنێوان پەرلەمانتاران و لایەنە سیاسییەكان دروست بوو.
لەلایەن تیمی نیشتمانی عیراقەوە، هەڵمەتی دووەم بۆ وەرگرتنی سامپڵی خوێن لە كەسوكاری ئەنفلكراوانی كۆیە دەستیپێكرد.
پەیامنێری كوردسات نیوز رایگەیاند، ئەمڕۆ لیژنەیەك كە پێكهاتوون لە دەزگای شەهیدانی عیراق و فەرمانگەی گۆڕەبەكۆمەڵەكان و پزشكی داد لە كۆیە دەستیان بە وەرگرتنی سامپڵی خوێن لە كەسوكاری ئەنفالكراوان كردووە، بڕیارە لیژنەكە شەش رۆژ بمێننەوە.
وتیشی، وەرگرتنی سامپڵی خوێن بۆ دۆزینەوە و ناسینەوەی روفاتی گۆڕە بە كۆمەڵەكانە، كە لە ماوەكانی رابردوودا بە هەوڵی شاناز ئیبراهیم ئەحمەد خانمی یەكەمی عیراق، لە تەلشێخە چەند گۆڕێكی بە كۆمەڵ دۆزرانەوە، لە مانگی 12ی 2024 و سەرەتای مانگی یەكی ئەمساڵیش دەستكرا بە هەڵدانەوەی گۆڕەكان.
باڵیۆزخانەی ئەمریكا لە بەغداد ئیدانەی هێرشەكەی كێڵگەی غازی كۆرمۆر دەكات و داوا لە حکومەتی عیراق دەکات لێپرسینەوە لەگەڵ ئەو كەس و لایەنە بكات كە بەرپرسە لە هێرشەكە.
باڵیۆزخانەی ئەمریكا لە بەغداد لە بڵاوكراوەیەكدا كە لە پلاتفۆرمی ئێكس بڵاویكردۆتەوە رایگەیاندووە، بە توندی ئیدانەی هێرشكردنە سەر كێڵگەی غازی كۆرمۆر دەكەن و داوا لە حكومەتی عیراق دەكەن لێپرسینەوە لەگەڵ ئەو كەس و لایەنە بكات كە بەرپرسە لە هێرشەكە .
پێشتر كۆمپانیای دانەغاز لەبارەی هێرشەكەوە رایگەیاندبوو ، شەوی یەكی شوبات لە ڕێگەی فڕۆكەی بێفڕۆكەوانەوە هێرشكراوەتەسەر كێڵگەی غازی كۆرمۆر، بەڵام هێرشەكە هیچ زیانێكی گیانی و ماددی نەبوە و لە ئێستاشدا بەشێوەیەكی ئاسایی كاركردن لە كێڵگەكەدا بەردەوامە.
ئەمڕۆ د.لەتیف رەشید سەرۆک کۆماری عیراق لە بەغدا پێشوازیکرد لە قوباد تاڵەبانی جێگری سەرۆکی حکومەتی هەرێمی کوردستان.
لەکۆبوونەوەیەکدا دوایین پێشهاتەکانی وڵات بەگشتی و هەرێمی کوردستان بەتایبەتی تاوتوێکران و سەرۆک کۆمار تەئکیدی لەپێویستی گرتنەبەری دیالۆگی کاریگەر و جددی کردەوە لەپێناو چارەسەرکردنی کێشە هەڵپەسێردراوەکانی نێوان حکومەتی فیدراڵ و حکومەتی هەرێمی کوردستان بەگوێرەی دەستوور و یاسا.
هەروەها باس لە دەنگدانی ئەنجومونی نوێنەران کرا لە سەر پرۆژە یاسای هەمواری یەکەمی یاسای بوجەی گشتی فیدراڵی و جەختکرایەوە لەسەر ئەوەی ئەم هەموارکردنە ببێتەی مایەی خەرجکردنی شایستەدارییەکانی فەرمانبەرانی هەرێم و چارەسەری کێشەکانی نێوان حکومەتی فیدراڵی و حکومەتی هەرێم بە شێوەیەک ببێتە مایەی خۆشگوزەرانی و خواستەکانی هاوولاتیان بەدیبهێنێت و پێداویستییەکانی ژیانیان دابین بکات.
لای خۆیەوە قوباد تاڵەبانی ستایشی رۆڵی سەرۆک کۆماری کرد لە نزیککردنەوەی بیروبۆچوونەکان و دۆزینەوەی چارەسەر بۆ کێشە هەڵپەسێردراوەکان بەشێوەیەک کە ژیانێکی ئازاد و شکۆمەند بۆ هەموو خەڵک مسۆگەر بکات.
ئەمڕۆ دووشەممە د.لەتیف رەشید سەرۆک کۆماری عیراق، چاوی بەسکرتێری گشتی بزووتنەوەی بابلیون، رەیان کلدانی کەوت.
لەدیدارەکەدا دوایین پێشهاتەکانی گۆڕەپانی نیشتمانی و ناوچەکەو کاردانەوەکانیان تاوتوێ کران.
سەرۆک کۆماری عیراق جەختی لە پێویستی یەکخستنی هەوڵەکانی نیشتمانی بۆ رووبەڕووبوونەوەی ئاستەنگەکانی ئێستا و کارکردن بە گیانی بەرپرسیارێتی هاوبەش کردەوە، روونیشیکردەوە کە لێکتێگەیشتن و وتووێژی بنیاتنەر بنەمای سەرەکی چارەسەرکردنی کێشەکانی نیشتمان و گەیشتنە بە خواستەکانی هاووڵاتیان لە داهاتوویەکی ئارامتر و ئاوەدانتر .
لەلای خۆیەوە رەیان کلدانی، خۆشحاڵی خۆی بەم سەردانە دەربڕی و جەختی لەپاڵپشتی خۆی بۆ هەموو ئەو دەستپێشخەرییانە کردەوە کە خزمەت بە بەرژەوەندی وڵات دەکەن، لە رێگەی یەکخستنی هەوڵەکانی نیشتمانی بۆ رووبەڕووبوونەوەی ئاستەنگەکان و پشتیوانیکردن لە رێچکەی بونیادنان و چاکسازی.
زانکۆی راپەڕین بڵاویکردەوە توانیمان وەک یەکەم زانکۆ لە عیراق دا چاپتەری ژنان لەزانستدا کە سەر بەڕیکخراوی یونیسکۆیە، لە کوردستان بکەینەوە.
لە راگەیەندراوێکدا زانکۆی راپەڕین رایگەیاند: "بەهەوڵی (پ.ی.د. پەیمان رمضان احمد) سەرۆکی زانکۆ توانیمان ڕەزامەندی کردنەوەی چاپتەری ژنان لەزانستدا لە زانکۆی راپەڕین بکەینەوە، كە چاپتەری ژنان لەزانستدا تاکە چاپتەری عیراقە و سەر بەدامەزراوەی ژنان لە زانست بۆ وڵاتانی پێشکەوتوو (OWSD) ی ڕێکخراوی یونیسکۆیە".
ئاماژە بەوەشدراوە؛ "لەداهاتوویەكی نزیكدا لە زانکۆی راپەڕین لە چالاکیەکی شایستەدا چاپتەری ژنان لەزانست دەناسێنرێت و پلان و پڕۆژەکانی چاپتەرەکە دەخرێنەڕوو".
ئەوەش هاتووە: لەئێستادا چاپتەری ژنان لەلایەن سەرۆکی زانکۆی راپەڕینەوە بەڕێوەدەبرێت و چەند مامۆستایەکی زانکۆکەمان ئەندامی بۆردی بەڕێوەبردنن."
سەبارەت بە بەشداریکردنی زانکۆکە لەو چالاکییە زانستییەدا لە ڕاگەیەندراوەکەدا هاتووە: "بەشداریکردنی زانکۆی راپەڕین وەک چاپتەری ژنان لەسەر بانگهێشتی ئەنجومەنی زانستی نێودەوڵەتی (International Science Council)، بووە و تێیدا نوێنەری زیاتر لە 450 دامەزراوەی زانستی بەشداربوون بۆ گەنگەشەکردنی چەند پرسێکی گرنگی تایبەت بە زانست، پەرەسەندنی تەکنۆلۆژیا، پەرەپێدانی بەردەوام، گۆڕانکارییەکانی ژینگە، توێژینەوەی زانستی و پەرەپێدانی داهاتووی زانست لەسەر ئاستی جیهان".
چاپتەری ژنان لەزانستدا 55 هەمین چاپتەری دامەزراوەکەیە لە مانگی 9 ساڵی 2024 ڕەزامەندی کردنەوەی وەرگیراوەو چاپتەرەکە 7تەمین چاپتەرە لە خۆرهەڵاتی ناوەڕاستدا لەدوای میسر، ئەردەن، سودان، یەمەن، فەلەستین، مۆڕۆکۆ.
بەشی بەدواداچوونی بومەلەرزە لە دەستەی کەشناسیی عیراق ئاشکرای کرد، لە ماوەی مانگی یەکدا 62 بومەلەرزە لە عیراق تۆمار کراوە و پلەکانیشیان بە گشتی لە نێوان 1-5 پلەدا بووە.
ئەمڕۆ دووشەممە، کەشناسیی عیراق بڵاوی کردەوە، تەنیا لە مانگی یەکی ئەمساڵدا لە ناوخۆی عیراق 62 بومەلەرزە رویانداوە، کە بەپێی دابەشکردنیان زۆرترینیان دەکەوێتە قەزای خانەقین لە دیالە.
لە راگەیەنراوەکەدا هاتووە، هەولێر، نەینەوا، سلێمانی، میسان، کەرکوک و دهۆک، ئەو شارانەبوون کە تیایاندا بومەلەرزەکان تۆمار کراوە.
بەگوێرەی راپۆرتەکە، بومەلەرزەکان لە قوڵایی نێوان 4 بۆ 38 کیلۆمەتر، لە (1-5) پلەدا بوون.
شاناز ئیبراهیم ئەحمەد خانمی یەکەمی عیراق لە بەغداد پێشوازیکرد لە لەیلا خەفاجی ئەمینداری گشتی مەکتەبی سیاسی ڕەوتی حیکمەی نیشتمانی و ئینتیزار ئەحمەد خەزرەجی کە یەکێکە لە شایەتحاڵانی ئەو تاوانانەی کە ڕژێمی دیکتاتۆری، دەرهەق بە کورد لە شاڵاوەکانی ئەنفال کردویەتی.
لە دیدارەکەدا شاناز ئیبراهیم ئەحمەد سەرپەرشتیاری دۆسییەی گەڕاندنەوەی روفاتی قوربانیانی ئەنفال دووپاتی کردەوە، کارەکە بە جۆش و خرۆشێکی زۆرەوە، بەمەبەستی گەڕاندنەوەی روفاتی کوردانی ئەنفالکراو بۆ زێدی خۆیان بەردەوامە و لە هەوڵدان، تاکو ئەم دۆسییەیە بەگوێرەی پرەنسیپی مرۆیی و بەهاکانی تر، چارەسەر بکەن.
خانمی یەکەمی عیراق لە دیدارەکەدا ئاماژەیبەوەشکرد، "بەدرێژایی ماوەی ڕابردوو لەگەڵ وەزارەتەکانی پەروەردە و خوێندنی باڵا و توێژینەوەی زانستی کارمان کردووە بۆ بە بەڵگەکردنی ئەو تاوانانەی کە ڕژێمی پێشوو بەرامبەر بە کورد و عەرەب و پێکهاتەکانی دیکە کردویەتی تا بۆ بەرنامەی خوێندنی قوتابخانەکان زیاد بکرێن تا نەوەکان ئاشنا بن بەو ستەمکارییە لەو سەردەمانەدا رویانداوە.
شاناز ئیبراهیم ئەحمەد، گوێی لە گێڕانەوەی شایەتحاڵ خەزرەجی بوو سەبارەت بەو تاوانانەی ڕژێمی دیکتاتۆری لە زینداندا بەرامبەر بە کورد کردویەتی و گوێی گرت بۆ ئەو ئەشکەنجە و دڕندەییەی کە خۆی و خانەوادەکەی و دانیشتوانی دوجەیل روبەرووی بونەتەوە.
لای خۆیەوە لەیلا خەفاجی، هەوڵەکانی خاتوو شاناز ئیبراهیم ئەحمەدی بۆ گەراندنەوە و هەڵدانەوەی گۆڕە بەکۆمەڵەکان بۆ خانەوادەکانیان بەرز نرخاند و ئاماژەیکرد بە پێویستی پشتگیریکردن و گرنگیدان بە کەسوکاری قوربانییان.
سەرۆك وەزیرانی عیراق لیژنەیەك بۆ لێكۆڵینەوە لە هێرشەكەی سەر كێڵگەی غازی كۆرمۆر پێكدەهێنێت و سامانە سروشتییەكانی هەرێمیش دەڵێت هیچ زیانێكی نەبووە.
شانەی راگەیاندنی ئەمنی عیراق ئاشكرایكرد، دوای هێرشەكەی سەر كێڵگەی غازی كۆرمۆر، بە فەرمانی محەمەد شیاع سودانی سەرۆك وەزیران و فەرماندەی گشتی هێزە چەكدارەكان، بڕیاردراوە بە پێكهێنانی لیژنەیەكی ئەمنی بۆ لێكۆڵینەوە لە هێرشەكە كە بووە هۆی ئاگركەوتنەوەیەكی بچوك لە نزیك یەكێك لە كۆگاكانی سوتەمەنی لەناو كێڵگەكە.
وەزارەتی سامانە سروشتییەكانی هەرێمیش رایگەیاند، هێرشەكە هیچ زیانێكی گیانی و ماددی بە كێڵگەكە و كۆمپانیای دانەغاز نەگەیاندوە و بەرهەمهێنانی كارەبا ئاساییە.
بەڕێوبەرایەتی گشتیی دژەتیرۆریش رایگەیاند، بەپێی زانیارییەكان درۆنەكە لەناوچەی بەشیرەوە ئاراستەی كێڵگەی غازی كۆرمۆر كراوە و لەلایەن گروپە میلیشیا و یاساشكێنەكانەوە جێبەجێكراوە.
بە تۆمەتی سپیكردنەوەی پارە و تێوەگلانی لە چەند دۆسیەیەكی گەندەڵی، ژمارەیەك ئەندامی كۆنگرێسی ئەمریكا داوا دەكەن سزا بەسەر بانكی رافیدەینی عیراقیدا بسەپێنرێت.
ئەندامێكی كۆنگرێسی ئەمریكا رایگەیاند، بانكی رافیدەین لە عیراق بووەتە ئامێرێك بۆ سپیكردنەوەی پارە لە بەرژوەندی ئێران و وەزارەتی گەنجینەی ئەمریكاش لە سەردەمی سەرۆكایەتی جۆ بایدندا رێگەیداوە عیراق ساڵانە دەیان ملیار دۆلار بنێرێت بۆ ئێران بە مەبەستی كڕینی غاز و كارەبا و عیراقیش لەو سزایانە بەخشراوە كە ئەمریكا بەسەر ئێراندا سەپاندویەتی.
داواشی كردووە، ئەو بەخشینە هەڵبوەشێتەوە و كارئاسانی بكرێت بۆئەوەی عیراق وزە لە وڵاتانی عەرەبی بكڕێت، باسی لەوەش كردوە چەند ئەندامێكی كۆنگرێس هەوڵ دەدەن سزا بەسەر بانكی رافیدەیندا بسەپێنن.
لە بەرامبەریشدا تا ئێستاش بانكی رافیدەین هیچ وەڵامێكی نەداوەتەوە سەبارەت بەو تۆمەتانەی لەلایەن ئەندامانی كۆنگرێسی ئەمریكاوە ئاراستەی كراوە.
سودانی داوا لە حكومەتی هەرێم و وەزارەتی نەوتی عیراق دەكات دەستبەجێ دەستبكەنەوە بە هەناردەكردنەوەی نەوتی هەرێمی كوردستان.
باسم عەوادی وتەبێژی حكومەتی عیراق رایگەیاند، پەسەندكردنی هەمواری یاسای بودجە رۆڵی دەبێت لە سەقامگیری سیاسی و بە لێكتێگەیشتن توانرا بگەنە ئەو قۆناغە بەهۆی هاریكاری حكومەت و ئەنجومەنی نوێنەران، حكومەت بەردەوام دەبێت لە چارەسەركردنی كێشەكان و روبەڕوبوونەوەی ئاڵنگارییەكان لە پێناو بەرژەوەندیە باڵاكانی گەلی عیراق.
وتیشی، سودانی داوا لە حكومەتی هەرێم و دامەزراوە پەیوەندیدارەكان و وەزارەتی نەوتی عیراق دەكات دەستبەجێ دەست بە جێبەجێكردنی یاسای بودجە بكەن لە پێناو وەبەرهێنانی نمونەیی لە سامانی سروشتیدا بە تایبەتی نەوت كە رۆڵی هەیە لە سەقامگیریدا و ئامرازێكە بۆ بەجێگەیاندنی ئەو بەرنامەیەی دانراوە بە مەبەستی پڕكردنەوەی پێویستییەكانی گەلی عیراق.
جێی ئاماژەیە دواجار ئەنجومەنی نوێنەرانی عیراق دەنگی لەسەر هەمواری یاسای بودجەدا، بەپێی یاساكەش هەرێمی كوردستان رۆژانە لە رێگەی كۆمپانیای سۆمۆ 400 هەزار بەرمیل نەوت لە بەندەری جیهانەوە هەناردە دەكات، تێچووی دەرهێنان و هەناردەكردنی هەر بەرمیلێك نەوتیش بە 16 دۆلار دەستنیشانكراوە.
وەزارەتی سەرچاوە ئاوییەكانی عیراق بەرزبوونەوەی ئاستی ئاوی روباری فوراتی بە رێژەیەكی بەرچاو راگەیاند و دەشڵێت، لەگەڵ توركیا و سوریا رێككەوتنێكیان هەیە بۆ بەردانەوەی 500 مەتر سێجا ئاو لە چركەیەكدا.
خالد شمال وتەبێژی وەزارەتی سەرچاوەكانی ئاوی عیراق لە لێدوانێكی رۆژنامەوانیدا رایگەیاند، پەیوەندییەكانی نێوان عیراق و سوریا لە بواری ئیدارەدانی ئاودا چەندین ساڵە بەردەوامە و پرۆتۆكۆڵێكیش لەنێوان هەردوولادا هەیە، بۆ دابەشكردنی ئاوی روباری فورات بەسەر هەردوو وڵاتدا.
وتیشی، لەگەڵ توركیا و سوریا رێككەوتنێكی دیكەیان هەیە، بۆ بەردانەوەی 500 مەتر سێجا ئاو لە توركیا و سوریاوە بۆ ناو خاكی عیراق.
وتەبێژی وەزارەتی سەرچاوەكانی ئاوی عیراق راشیگەیاند، ئاستی ئاوی روباری فورات بە رێژەیەكی بەرچاو بەزربووەتەوە و لە هەر چركەیەكدا زیاتر لە 400 مەتر سێجا ئاوی تێدەچێت، وتیشی، وەزارەتیان لە بەنداوەكانی حەدیسە و عەمود ئاوی فورات گل دەداتەوە بۆ پارێزگاكانی ناوەڕاستی عیراق.
ئەنجومەنی نوێنەرانی عیراق هەمواری یاسای بودجەی پەسەند كرد و بەو پێیەش هەناردەكردنەوەی نەوتی هەرێمی كوردستان لە رێگەی كۆمپانیای سۆمۆوە دەستپێدەكاتەوە.
ئەنجومەنی نوێنەرانی عیراق لە دانیشتنێكی تایبەتدا دەنگیدا بە هەمواری یاسای بودجە بەپێی یاساكە نرخی دەرهێنان و گواستنەوەی هەر بەرمیلێك نەوت 16 دۆلار دەبێت و رۆژانە 400 هەزار بەرمیل نەوتی هەرێم لە رێگەی كۆمپانیای سۆمۆوە دەفرۆشرێت. .
لە یاساكەدا هاتووە، لە ماوەی 60 رۆژدا لایەنێكی تایبەتمەندی نێودەوڵەتی نرخی دەرهێنان و گواستنەوەی بەرمیلێك نەوت لەهەر كێگەیەك بە جیا لە هەرێم دیاری دەكات.
ئەوەش لەكاتێكدایە، شەوی چوارشەممەی رابردو محەمەد شیاع سودانی سەرۆك وەزیرانی عیراق لەگەڵ سەرۆك فراكسیۆنەكان كۆبوەوە و هەموو لایەك هاوڕابوون لەسەر پەسەندكردنی هەمواری یاسای بودجە.
عیراق دەستی کرد بە پارەدارکردنی موچەی مانگی دووی خانەنشینان و لەم دوو رۆژەشدا ەست بە دابەشکردنی دەکات.
دەستەی خانەنشینی عیراق رایگەیاندووە، دەستیان کردووە بە پارەدارکردن 'تمویل'ی موچەی مانگی دووی خانەنشینان.
ئاماژەی بەوەشکردووە، لەماوەی ئەم دوو رۆژەدا خانەنشینان نامەیەکیان پێدەگات و لەوە ئاگادار دەکرێنەوە، کە موچەکانیان خراوەتە سەر هەژمارە بانکییەکانیان.
دەشڵێت، خانەنشینان دەتوانن لە هەر شوێنێک کە لە خۆیانەوە نزیکە لەرێگای ئامێرەکانی ئەی تی ئێمەوە موچەکانیان رابکێشن.
عیراق هەموو 1ی مانگێک بەر لە سەرجەم فەرمانگەکانی دیکە موچەی خانەنشینانی دابەش دەکات.
لە هەرێمی کوردستان خانەنشینان لە مانگی دوو'دان، بەڵام هێشتا موچەی مانگی 12ی ساڵی رابردوویان وەرنەگرتووە، جگە لەوەی ساڵانە موچەیەک یان زیاتریان پێنادرێت و چارەنووسی موچەکانیان نادیارە.
ئەنجومەنی نوێنەرانی عیراق كۆدەبێتەوە و دەنگ لەسەر هەمواری یاسای بودجە دەدات كە تایبەتە بە دەستپێكردنەوەی هەناردەكردنی نەوتی هەرێمی كوردستان.
بڕیارە ئەمڕۆ ئەنجومەنی نوێنەرانی عیراق كۆببێتەوە، بەپێی كارنامەی كۆبوونەوەكەش لە بڕگەی یەكەمدا دەنگ دەدرێت بە هەمواری یاسای بودجە، كە هەموارەكە پەیوەندی بە دەستپێكردنەوەی هەناردەكردنەوەی نەوتی هەرێمی كوردستانەوە هەیە.
ئەوەش لە كاتێكدایە هەفتەی رابردوو سەرۆك و جێگرانی سەرۆكی ئەنجومەنی نوێنەران و سەرۆكی فراكسیۆنە كوردی و عیراقییەكان، لەماڵی محەمەد شیاع سودانی سەرۆك وەزیرانی عیراق كۆبوونەوە بۆ رێككەوتن لەسەر تێپەڕاندنی هەمواری یاساكە.
بڕگەكانی تری كۆبوونەوەكەی ئەمڕۆ ئەنجومەنی نوێنەران تایبەتن بە دەنگدان بە پێشنیازەیاسای هەمواری هاوتاكردنی بڕوانامە و خوێندنەوەی دووەمیش بۆ پێشنیازەیاسای خوێندنی باڵای ناحكومی دەكرێت.
شاناز ئیبراهیم ئەحمەد خانمی یەکەمی عیراق، لە بەغداد پێشوازی لە جەمیلە عەلام هودا هاوسەری سەرۆک کۆماری کۆچکردووی کۆماری ئیسلامی ئێران، ئیبراهیم رەئیسی و وەفدی یاوەری کرد.
لە کۆبونەوەکەدا کە بە ئامادەبوونی سەرۆکی دەستەی راوێژکاری لە سەرۆکایەتی کۆمار، د. عەلی شوکری و باڵیۆزی ئێران لە عیراق محەمەد کازم سادق بەڕێوەچوو، خانمی یەکەمی عیراق سەرەخۆشی خۆی بۆ کۆچی دوایی سەرۆک کۆماری پێشووی ئێران ئیبراهیم رەئیسی گەیاند بە جەمیلە عەلام هودا.
شاناز ئیبراهیم ئەحمەد جەختیکردەوە لە گرنگی پەرەپێدانی هاریکاری نێوان هەردوو وڵات لە بواری رۆشنبیری و کۆمەڵایەتی و پەروەردەیی و ئاڵوگۆڕی شارەزایی بە شێوەیەک کە پێشکەوتن بۆ هەردوو گەلی دراوسێ دەستەبەر بکات.
هاوکات ئاماژەیکرد بە گرنگی هاوسەنگبوون لەگەڵ ئەو پێشهاتانەی کە جیهان بەخۆیەوە دەبینێت بە تایبەت لە بواری بەکارهێنانی تەکنەلۆژیا و میدیای مۆدێرن و پێویستی بەکارهێنانیان بۆ خزمەتکردنی کەلتوورێکی تۆکمە و پەروەردەیی پێشکەوتوو بۆ گەشەسەندنی کۆمەڵ.
خانمی یەکەمی عیراق راشیگەیاند، عیراق گرنگییەکی تایبەت بە پەرەپێدان و پاڵپشتیکردنی پارێزگاکان دەدات کە مەزارگە پیرۆزەکان لەخۆدەگرێت، هەروەها ئاسانکاری بۆ سەردانیکەرانی وڵاتانی برا و دۆستدەکات تا مەراسیمی بەسەرکردنەوەی مەرقەدەکان هەروەک عیراقییەکان بەجێ بگەیەنن.
هەر لە دیدارەکەدا بارودۆخی ژنان لە هەردوو وڵات تاوتوێ کرا، هەروەها جەختکرایەوە لەسەر بەهێزکردن و پێدانی دەرفەتی یەکسان و دادپەروەرانە کە ببێتە مایەی پەرەپێدانی رۆڵیان لە بنیاتنانی کۆمەڵ و پێشکەوتن و باشترکردنی ئاستی ژیان بە گشتی.
لە بەرانبەردا جەمیلە عەلام هودا سوپاس و پێزانینی خۆی بۆ خانمی یەکەمی عیراق نیشاندا بۆ ئەو پێشوازییە گەرمە، هەروەها ستایشی ئەو میواندارییەی کرد کە گەلی عیراق پێشکەشی سەردانکەرانی ئێرانی کرد لە کاتی مەراسیمەکاندا.
جەختیکردەوە لە گرنگی هاریکاری و هەماهەنگی نێوان هەردوو وڵات لەسەر ئەو مەسەلانەی کە پەیوەندی نێوان هەردوو گەل بەهێزتر دەکەن و سوودمەند دەبن لە ئەزموونی پسپۆڕی جۆراوجۆری ئێرانی لە زانکۆ و پەیمانگەکانی عیراق بەتایبەتی لە بوارەکانی پەیوەست بە خێزان و منداڵان.