سوپای پاسداران رایگەیاند، فرۆكەیەكی بێفڕۆكەوانی سیخوڕییان لە باشوری وڵاتەكەیان خستوەتە خوارەوە.

سوپای پاسدرانی ئێران لە راگەیەنراوێكدا ئاماژەی بۆ ئەوەكردووە، لە بەردەوامی شكستەكانی ئەمریكا، هێزی ئاسمانی سوپای پاسدران فڕۆكەیەكی بێفڕۆكەوانی ئەمریكی لە جۆری"ئێم كیو نۆ" لە ئاسمانی شاری ئەهواز خستوەتە خوارەوە، چەند سەعاتێك پێشتر لە ئاسمانی كیش فڕۆكەیەكی تری ئەمریكی لە هەمان جۆر خراوەتە خوارەوە.

راشیگەیاندوە، لە ماوەی دوو رۆژدا چوار فرۆكەی بێفڕۆكەوان لە جۆری"ئێم كیو نۆ" لە ناوچە جیاجیاكانی ئێران خراونەتە خوارەوە.

ئاماژەی بۆ ئەوەشكردوە، بەپێی ئامارەكان لە سەرەتای شەڕی 40 رۆژەدا ژمارەی ئەو فرۆكانەی خراونەتە خوارەوە، گەیشتوەتە 25 بۆ 30 فڕۆكە.

سوپای ئوردن سێ موشەکی ئێرانی دەخاتە خوارەوە و دەنگۆی چۆڵکردنی بەندەری عەقەبەش رەتدەکرێتەوە.

ئەمڕۆ، ئاژانسی هەواڵی رەسمی ئوردن لە زاری هێزە چەکدارەکانی وڵاتەکەوە رایگەیاند، سێ موشەکی ئێرانییان خستووەتە خوارەوە کە ئاڕاستەی وڵاتەکەیان کرابوو، ئاماژەی بەوەشکرد، موشەکێکی دیکە لە ناوچەیەکی چۆڵ و دوورەدەست کەوتووەتە خوارەوە.

ئاژانسەکە لە زاری لێپرسراوێکی سەربازییەوە ئاشکرایکرد، روداوەکە هیچ زیانێکی گیانی یان مادی لێ نەکەوتووەتەوە، هاوکات سەرچاوە ئوردنییەکان بە تۆڕی عەرەبییەیان راگەیاندووە کە موشەکە ئێرانییەکان پێش گەیشتنیان بە شاری عەقەبە بەرپەرچ دراونەتەوە.

پێشتریش، سوپای ئیسرائیل بە ئاژانسی "فرانس پرێس"ـی راگەیاندبوو، هێزەکانی ئیسرائیل و ئوردن ، بە هاوبەشی بەرپەرچی موشەکێکیان داوەتەوە کە لە ئێرانەوە بەرەو شاری کەناراوی عەقەبە تەقێنرابوو.

وەزیری دەرەوەی ئێران دان بە بوونی کەلێنێکی ئەمنی بەردەوامدا دەنێت کە بووە هۆی کوژرانی عەلی خامنەیی، و رایدەگەیەنێت؛ پلانمان هەبوو لە کاتی بەئامانجگرتنی رابەری پێشوودا گەروی هورمز دابخەین.

عەباس عراقچی، وەزیری دەرەوەی ئێران رایگەیاند؛ بەهۆی بوونی "کەلێنێکی ئەمنی"ـیەوە کە تا ئێستاش بەردەوامە، لە جەنگی رابردوودا بارەگای عەلی خامنەیی، رابەری پێشووی ئێران کرایە ئامانج.

ئاماژەی بەوەشکرد، ئەو کەلێنە تەنها ئەمنی نەبووە، بەڵکو کاریگەری کردووەتە سەر پڕۆسەی بڕیاردانیش لە وڵاتدا.

عیراقچی لە چاوپێکەوتنێکدا لەگەڵ بەرنامەی "چیڕۆکی جەنگ" ئاشکرایکرد؛ تاران لە یەکەم رۆژی جەنگەکەوە پلانی بۆ هەموو ئەگەرەکان دانابوو، بڕیاریش بوو لە ئەگەری بەئامانجگرتنی رابەری باڵادا، گەروی هورمز دابخرێت.

وەزیری دەرەوەی ئێران وتیشی، تەنانەت ئەگەر چانسی سەرکەوتنی دانوستانەکان لە سەدا دەش بووبێت، ئەوان دەرگای گفتوگۆیان لەگەڵ ئەمریکا دانەخستووە بۆ کەمکردنەوەی تێچووی جەنگ، بەڵام هاوکات هێزە چەکدارەکانیان لە ئامادەکاری نەوەستاون و دوای دوو سەعات لە دەستپێکردنی هێرشەکەی ئەمریکا و ئیسرائیل بۆ سەر تاران، کە تێیدا لە 28ی شوباتی رابردوو عەلی خامنەیی و چەند ئەندامێکی خێزانەکەی گیانیان لەدەستدا، وەڵامی سەربازییان داوەتەوە.

فەرماندەی بارەگای ناوەندیی خاتەمولئەنبیا هۆشدارییەكی توندی ئاڕاستەی ئەمریكا كرد و رایگەیاند، هێزە چەكدارەكانی ئێران بە توندی و بە شێوازێكی وێرانكەر وەڵامی هەر جۆرە سەركێشی و دەستدرێژییەك دەدەنەوە.

عەلی عەبدوڵاهی فەرماندەی بارەگای خاتەمولئەنبیا وتی: ئەوان پەیامی موجتەبا خامنەیی رابەری باڵای وڵاتەكەیان بە روونی پێگەیشتووە كە تەواوی توانا و وزەی خۆیان بەكاربهێنن بۆ بەهێزكردنی تەبایی، یەكگرتوویی و هاوكاریی نێوان هێزە چەكدارەكان، بە ئامانجی دەستەبەركردنی بەرژەوەندییەكانی گەلی ئێران و داكۆكیكردن لە مافەكانی خەڵك و ئاسایشی نیشتمان.

عەبدوڵاهی هۆشداری توندیدایە ئەمریكا و رایگەیاند، بە پشتبەستن بە فەرمان و رێنماییەكانی رابەرەكەیان، هێزە چەكدارەكانی ئێران بە توندی و بە شێوازێكی وێرانكەر وەڵامی هەر جۆرە سەركێشی و دەستدرێژییەك دەدەنەوە، بەجۆرێك باجێكی زۆر قورستری وەردەگرن، كە لە تێچووی شەڕی سەپێندراوی دووەم و سێیەم زیاتر بێت.

 

وڵاتانی كەنداو وئەوروپا بانگەشەی بەرێوەبردنی گەروی هورمز رەتدەكەنەوە و داوا لە ئێران دەكەن هێرشەكانی رابگرێت. 

وڵاتانی كەنداو و ئەوروپا راگەیەندراوێكی هاوبەشیان بڵاوكردەوە وئاماژەیان بەوە كرد، بانگەشەكانی سەروەری و بەرێوەبردنی گەروی هورمز لەلایەن هەر وڵاتێكەوە بە توندی رەتدەكەنەوە و بە بانگەشەی نایاسایی ناویان بردوە.

دوپاتیشیدەكەنەوە، هەر سیستمێكی سەپاندنی باج لەو رێرەوە ئاوییە رەتدەكەنەوە، هەروەها داوا  دەكەن ئێران بە زوترین كات هێرشەكانی بۆ سەر وڵاتانی ناوچەكە رابگرێت.

 

بەهۆی هێرشكردنە سەر هێزێكی ئەمنی لە دەوروبەری حەلەبی سوریا، شەرو پێكدادانی توند روویدا و هێزە ئەمنییەكان بەشێوەیەكی بەرفراوان بڵاوەیان پێكراوە. 

میدیاكانی سوریا بڵاویانكردەوە، بەرەبەیانی ئەمرۆ لە شاری عەزاز لە ریفی حەلەب، هێزەكانی ئاسایش و پۆلیسی شارەكە بڵاوەیان پێكراوە، دوای ئەوەی هێرشكراوەتە سەر هێزێكی ئەمنی و پێكدادانێكی توندی لێكەوتوەتەوە.

بەپێی سەرچاوە ئەمنییەكان، ڕووداوەكە كاتێك ڕوویداوە كە كاروانێكی  سەر بە هێزەكانی ئاسایشی ناوخۆ هەوڵیداوە كۆتایی بە پێكدادانێكی چەكداری بهێنێت، بەڵام راستەوخۆ ئەو هێزە هێرشیان كراوەتەسەر، ئەوەش بوەتە هۆی پەرەسەندی گرژییەكان  ، بۆ رێگریكردن لە ئالۆزتربونی رەوشەكەش ، لە ئێستادا لە زۆرینەی ناوچە و گەرەكەكانی شارەكەدا هێزە ئەمنییەكان بڵاوەیان پێكراوە.

ئەمە لەكاتێكدایە پێشتر هەڵمەتێكی ئەمنی فراوان لە شاری عەزاز راگەیەندرابوو بۆ دەستگیركردنی بازرگانانی ماددەی هۆشبەر ، بە ئامانجی كەمكردنەوەی بڵاوبوونەوەی ماددە هۆشبەرەكان و بەهێزكردنی ئاسایش لە ناوچەكەدا.

 

سوپای ئێران رایگەیاند، رۆژی یەکشەممە بە فڕۆکەی بێفڕۆکەوانی خۆکوژی دوو بنکەی ئەمریکی لە کوەێت کردووەتە ئامانج، وەک وەڵامێک بۆ ئەو هێرشانەی کە ویلایەتە یەکگرتووەکانی ئەمریکا دەکاتە سەر خاکەکەی.

سوپای ئێران لە بەیاننامەیەکدا کە تەلەفزیۆنی رەسمی وڵاتەکە بڵاویکردووەتەوە رایگەیاندووە: هێرشی بەربڵاویان بە فڕۆکەی بێفڕۆکەوانی خۆکوژ ئەنجامداوە و تێیدا کۆگایەکی تەقەمەنی سەر بە سوپای ئەمریکایان لە بنکەی (ئەدێیرع)، لەگەڵ سیستمی راداری پاتریۆت و راداری چاودێری ئاسمانی لە بنکەی ئاسمانی (عەلی سەلیم) لە کوەێت کردووەتە ئامانج

کەناڵی 13ـی ئیسرائیلی لە زاری لێپرسراوانی  باڵای وڵاتەکەیەوە رایگەیاند، ئەمریکا خۆی بۆ فراوانکردنی ئۆپراسیۆنە سەربازییەکانی دژی ئێران ئامادە دەکات و لە چوارچێوەیەدا 100 فرۆکەی سوتەمەنی بۆ ناوچيکە گواستوەتەوە.

کەناڵەکە بە پشتبەستن بە سەرچاوە ئیسرائیلییەکان، رایگەیاندوە، هەفتەی داهاتوو بۆ ناوچەکە هەفتەیەکی چارەنوسساز دەبێت.

 لە راپۆرتی کەناڵە ئیسرائیلییەکەدا هاتووە؛ ناوخۆی ئیسرائیلدا وا دەخەمڵێندرێت کە دوای هەفتەیەک لە هێرشە بەردەوامەکانی ئەمریکا بۆ سەر خاکی ئێران، دۆناڵد ترەمپ، سەرۆکی ئەمریکا، نیازی هەیە مەودا و قەبارەی ئۆپراسیۆنە سەربازییەکانی زیاتر پەرە پێبدات.

هاوکات لێپرسراوێکی  باڵای سوپای ئیسرائیل بە کەناڵەکەی راگەیاندووە؛ ئێرانییەکان هەوڵێکی زۆر دەدەن بۆ ئەوەی ئیسرائیل پەلکێشی ناو ئەم ململانێیە نەکەن، بەڵام ئەگەر ئەمریکییەکان هێرشەکانیان چڕتر بکەنەوە، لەوانەیە ئەم رەوشە گۆڕانکاری بەسەردا بێت.

 لە لایەکی ترەوە  باڵیۆزخانەی ئەمریکا لە ئیسرائیل داوای لە هاووڵاتیانی خۆی کردووە، کە بەهۆی ئەگەری پەرەسەندنی چاوەڕواننەکراوی گرژییەکان، پێداچوونەوە بە گەشتەکانیاندا بکەن بۆ رۆژهەڵاتی ناوەڕاست، بەتایبەتی بۆ ئیسرائیل.

کەناڵی 13ـی ئیسرائیل ئاماژەی بەوەش کردووە، هەوڵە نێوەندگیرییەکانی قەتەر بۆ کەمکردنەوەی گرژییەکان هێشتا بەردەوامن، بەڵام سەرچاوە سیاسییەکانی ئیسرائیل پێیان وایە، کە ئەم هەوڵانە لە کورتماوەدا هیچ کاریگەرییەکیان لەسەر بڕیارەکانی دۆناڵد ترەمپ نابێت.

فەرماندەیی ناوەندیی ئەمریکا (سێنتکۆم) رایگەیاند، لە هێرشەکانی دوێنێ ئێراندا بۆسەر پێگەکانیان لە ئوردن دوو سەربازیان کوژراون و سەربازێکیشیان چارەنوسی نادیارە، چوار سەربازیشیان بریندارن و چارەسەر وەردەگرن.

لە راگەیەندراوەکەی سێنتکۆمدا هاتووە؛  کاتێک هێزەکانیان بەرپەرچی هێرشە موشەکییە بالیستی و  درۆنەکانی ئێرانیان داوەتەوە، حەوت سەربازیان بوون بە قوربانی، کە تا ئێستا چارەنوسی یەکیان نادیارە.

سێنتکۆم ئاماژەی بەوەشکردوە، بریندارەکان برینیان سوکە و وەک رێزێک لە بنەماڵەکانیان، ناوی کوژرا و بریندارەکان تا 24 سەعات بڵاوناکاتەوە .

موجتەبا خامنەیی، رێبەری باڵای ئێران لە پەیامێکیدا هێرشی توندی کردە سەر ئەمریکا و بە شەیتانی گەورە ناوی بردوە و دەڵێت؛ شکاندنی چەندین جارەی بەڵێنەکان نیشانەی بێ بەهایی ئیمزای دۆناڵد ترەمپە و درۆزنی شەیتانی گەورەیە.

موجتەبا خامنەیی، سەبارەت بە یاداشتی لێکتێگەیشتن رایگەیاندوە،  بەڵگەیەکی حاشاهەڵنەگرە لەسەر درۆزنیی ئەمریکا و بێبایەخیی ئیمزای دۆناڵد ترەمپ و سەلمێنەری ئەوەیە کە بە هیچ شێوەیەک ناتوانرێت متمانەی پێ بکرێت.

خامنەیی ئاماژەی بەوەش کرد، کە تاکڕەویی و بەرژەوەندیخوازی  بەشێکی دانەبڕاون لە رێبازی سیاسیی ئەمریکا.

ناوبراو لە پەیامەکەدا جەختی کردوەتەوە، کە ئەمریکای دوژمن هەوڵی هەڵگیرساندنی شەڕ دەدات، بەڵام پێویستە بزانێت کە گەلی ئێران و بەرەی بەرگریی، دەرسێکیان دادەدەن، کە هەرگیز لەبیری نەکات.

لە بەشێکی تری پەیامەکەیدا، خامنەیی جەختی لە گرنگیی بەهێزکردنی بەرەی ناوخۆیی کردەوە و رایگەیاند، کە یەکڕیزیی ناوخۆ و هاودەنگیی نێوان گەل و بەرپرسان لە تەواوی گۆڕەپانەکاندا، تاکە گەرەنتییە بۆ پاراستنی عیزەت و سەربەخۆیی ئێران، بەتایبەت لە روبەڕووبوونەوەی دوژمنێکی تاوانبار و فێڵبازی وەک ئەمریکادا.

رێبەری ئێران داوای لە سەرجەم لایەنەکان کردوە، پارێزگاری لە تەبایی بکەن و خۆیان لە ناکۆکی و ململانێی سیاسی بەدوور بگرن، ئاماژەی بەوە کردوە، پاراستنی ئەم یەکڕیزییە ئەرکی سەر شانی هەمووانە، بەڵام لەم نێوەندەدا رۆڵی بەرپرسان و دڵسۆزانی شۆڕش لە پاراستنی هاوسەنگی و یەکپارچەیی وڵاتدا زۆر گرنگتر و هەستیارترە.

وتەبێژی وەزارەتی دەرەوەی ئێران رایگەیاند، ئەمریکا پێشێلی یاداشتنامەی لێکتێگەیشتنی ئیسلام ئابادی کردوە و دەیەوێت خۆی گەروی هورمز بەڕێوەبەرێت، ئاماژەی بەوەشکردوە تا ئێستا هیچ بڕەپارەیەکی بلۆکراوەی وڵاتەکەی ئازاد نەکراوە

ئیسماعیل بەقایی، وتەبێژی وەزارەتی دەرەوەی ئێران جەختیکردەوە، ئەوان تەنها بەرگرییان کردوە و هەرگیز ئێرانییەکان شەڕیان لەگەڵ هیچ وڵاتێکدا نەویستووە، جا لە ناوچەکە بێت یان لە دەرەوەی وڵات.

ئاماژەی بەوەشکردوە، جگە لە بنکە سەربازییەکانی ئەمریکا و کەرەستەی سەربازیی ئەمریکا هێرشیان نەکردووەتە سەر هیچ ئامانجێک، ئێران و کۆماری ئیسلامی لە یەکتر جیا نین، نەتەوەی ئێرانیش دوژمنی لەگەڵ گەلی ئەمریکا نییە و ئەووەی ئەمریکا ئەنجامیدا پێشێلکردنی راستەوخۆی لێکتێگەیشتنەکە بووە.

بەقایی ئەوەشیخستوەتەڕوو، ئەمریکا ویستویەتی رێرەوێکی نوێ لە گەوری هورمزدا دروستبکاتو  هەژمونی ئێران نەهیڵێت، لە کاتێکدا رێککەوتن گەروەکە لە نێوان ئێراون و عوماندا بەڕێوە ببرێت.

لە بەشێکی دیکەی قسەکانیدا، بەقایی دەڵێت؛ تا ئێستا هیچ بڕە پارەیەکی بلۆکراوی وڵاتەکەی ئازاد نەکراوە، لە کاتێکدا پابەندبوونیان ئەوە بوو کە لە کاتی جێبەجێکردنی ئەم یاداشتنامەی لێکتێگەیشتنەدا، ئێران بە ئازادی دەستی بگات بە هەموو سەروەت و سامانە بلۆکراوەکانی.

ئاژانسی هەواڵی فارس هۆشداری دەدات، لە ئەگەری هێرشی ئەمریکا بۆ سەر ژێرخانی مەدەنی ئێران، سوپای پاسداران دەستناپارێزێت و دەستبەجێ فڕۆکەخانەکانی دوبەی و ئەبوزەبی  دەکرێتە ئامانجی موشەک و درۆنەکانی ئێران.

ئەمڕۆ شەممە، ئاژانسی فارس، لە زاری لێپرسراوانی سوپای پاسدارانەوە ئاشکرای کردوە، ئەگەر جارێکی تر ئەمریکا ژێخانی مەدەنی ئێران بکاتە ئامانج، لە وەڵامدا سوپای پاسداران هەریەکە لە فڕۆکەخانەکانی  دوبەی و ئەبوزەبی بە ئامانج دەگرێت.

ئاژانسەکە ئاماژەی بەوەشکردوە، جگە لەو فڕۆکەخانەکان، هەریەکە لە  بەندەری فوجەیرە لە ئیمارات و بەندەریجەبەل عەلی لە دوبەی  پێویست چۆڵبکرێن، چونکە لە ئامانجەکانی سوپای پاسداراندان.

ئەو لێپرسراوەی ئێران، بە ئاژانسی فارسی راگەیاندوە، ئەم هۆشدارییە بۆ پاراستنی هاووڵاتیان و دورکەوتنەوەیە لەو شوێنانە.

ئەم هەڕەشەی سوپای پاسداران  لە کاتێکدایە، چەند رۆژێکە ئەمریکا لە هێرشەکانیدا بۆسەر ئێران، پرد و تونێل و وێستگەی ئاوی خواردنەوەی کردوەتە ئامانج.

لە توركیا نزیكەی 120 كەس بە تۆمەتی هاوكاریكردنی گروپی تیرۆریستی داعش دەستگیركران كە لە رێگەی تۆڕە كۆمەڵایەتییەكانەوە پارەیان كۆكردووەتەوە.

وەزارەتی ناوخۆی توركیا رایگەیاند، لە ئۆپەراسیۆنێكدا كە لەلایەن دژە تیرۆر و فەرماندەیی گشتیی جەندەرمە و سەرۆكایەتییەكانی داواكاری گشتی لە 30 پارێزگا بەڕێوەچووە، 119 كەس بە تۆمەتی هاوكاریكردنی داعش دەستگیركران، كەلە رێگەی تۆڕە كۆمەڵایەتییەكانەوە پروپاگەندەیان بۆ ئەو گروپە تیرۆریستییە كردووە و لە رێگەی دامەزراوە خێرخوازییەكانیشەوە هاوكاری داراییان بۆ داعش كۆكردووەتەوە.

ئاماژەی بەوەشكردووە، لە ئەنجامی پشكنینەكاندا، دەستبەسەر ژمارەیەكی زۆر بەڵگەنامەی رێكخراوەیی و پێداویستی دیجیتاڵیدا گیراوە.

سوپای ئیسرائیل ئاشکرایدەکات، دەیان فڕۆکەی سەربازیی ئەمریکی کە تایبەتن بە تێکردنی سوتەمەنی لە ئاسماندا، لەبری فڕۆکەخانەی نێودەوڵەتیی بن گۆریۆن لە بنکە ئاسمانییە سەربازییەکانی وڵاتەکەدا جێگیر دەکرێن.

سوپای ئیسرائیل رایگەیاند، دەیان فڕۆکەی سوتەمەنی پڕکەرەوەی ئەمریکی کە بۆ تێکردنی سوتەمەنی لە ئاسماندا رەوانە کراون، لە بنکە ئاسمانییە سەربازییەکانی ئیسرائیلدا جێگیر دەکرێن نەک لە فڕۆکەخانەی نێودەوڵەتیی بن گۆریۆن.

بەپێی ئاژانسەکانی هەواڵ، بڕیاری جێگیرکردنی ئەم فڕۆکانە لە بنکە سەربازییەکاندا بە ئامانجی کەمکردنەوەی کێشە و ئاستەنگەکانە لەبەردەم هێڵە ئاسمانییە مەدەنییەکاندا.

رۆژنامەی (تایمز ئۆف ئیسرائیل) ئاماژەی بەوەکردووە، پێشتر وەزارەتی گواستنەوەی ئیسرائیل ژمارەی فڕۆکەی پڕکەرەوەی سوتەمەنی لە فڕۆکەخانەی بن گۆریۆن بە تەنیا 20 فڕۆکە دیاریکردبوو، تا رێگری بکات لە دروستبوونی پشێوی و دواکەوتنی گەشتە هاوینەییەکان.

ناردنی ئەم فڕۆکانە بۆ ناو بنکە سەربازییەکان بە هەماهەنگی لەگەڵ سوپای ئیسرائیل ئەنجامدراوە، ئەمەش رێگەی بە هێزی ئاسمانیی ئیسرائیل داوە ئامادەکاریی پێشوەختە بکەن.

سوپای ئیسرائیل راشیگەیاندووە، مەبەست لەم هەنگاوە رەخساندنی زۆرترین دەرفەتە بۆ بڵاوەپێکردنی هێزەکانی ئەمریکا لە ئیسرائیلدا، بەبێ ئەوەی زیان بە کەرتی فڕۆکەوانیی مەدەنی وڵاتەکە بگات.

سوپای پاسدارانی ئێران رایدەگەیەنێت، لە رێگەی هێرشێکی موشەکی و فڕۆکەی بێفڕۆکەوانەوە، بنکەی سەربازیی ئەمریکایان لە ناوچەی "ئەزرەق" لە وڵاتی ئوردن کردووەتە ئامانج و پێنج فڕۆکەی جەنگیی ئەو وڵاتەیان بە تەواوی تێکشکاندووە.

لە راگەیەنراوێکی هێزی ئاسمانیی سوپای پاسداراندا، هاتووە، هێزەکانیان لە رێگەی موشەک و فڕۆکەی بێفڕۆکەوانەوە، هێرشێکی چڕیان کردووەتە سەر بارەگای سەربازانی ئەمریکا لە بنکەی ئەمریکی لە ئەزرەق لە ئوردن."

سوپای پاسداران ئاشکراشیکرد،لە ئەنجامی ئەو هێرشەدا، بە لایەنی کەمەوە دوو فڕۆکەی جەنگیی شەڕکەر و سێ فڕۆکەی دیکەی ئەمریکی بە تەواوی تێکشکێنراون، هاوکات زیانێکی زۆر گەورەش بە ژمارەیەک فڕۆکەی دیکەی نێو بنکەکە گەیشتووە.

راوێژكاری سەربازیی فەرماندەی گشتیی هێزە چەكدارەكانی ئێران رایدەگەیەنێت، سیاسەتی شەڕ و دانوستان بەیەكەوە و لە یەك كاتدا كۆتایی هاتووە.

موحسین رەزایی، راوێژكاری سەربازیی فەرماندەی گشتیی هێزە چەكدارەكان و فەرماندەی سوپای پاسدارانی ئێران رایگەیاند: بەشێوەیەكی گشتیی هیچ لێكەتێگەیشتنێك لە نێوان ئێران و ئەمریكا نەماوە، تەنها ناوێك ماوەتەوە لەسەر كاغەز، ترەمپیش ئەو خاڵانەی پێشێلكردووە كە بۆ جێبەجێكردنی یاداشتەكە دیاریكرابوون.

وتیشی: یەكێك لەسەر پێچییەكان كێشەی لوبنان بوو كە سوپای ئیسرائیل لەو وڵاتە نەكشایەوە و ئەمریكاش رێڕەوێكی لە گەروی هورمز دروستكرد بۆ تێپەڕاندنی چەند كەشتییەك، كە بەپێی رێككەوتنەكە دەبێت ئێران گەروی هورمز بەڕێوەببات، یەكێكی تر لە پێشێلكارییەكان هێرشی ئەمریكابوو بۆسەر كەناراوەكانی ئێران و فڕۆكەخانەی بەندەر عەباس و دورگەی قشم.

لەبارەی ئازادكردنی پارە بلۆككراوەكانی ئێرانیش موحسین رەزایی وتی: بۆ ماوەی سێ‌ هەفتە لەسەر پێدانی 12 ملیار دۆلار دانوستانكرا، بەڵام چەند مەرجێك دانرا بۆئەوەی پارەكە نەدەنەوە بە ئێران و دەیان ویست ئێران ناچار بكەن داواكارییەكانیان قبوڵ بكات، ئەوەش بووە بەهۆی شكستی دانوستانەكان.