رۆژهەڵاتی ناوەڕاست
هێزەکانی ئاسایشی ناوخۆی حەلەب رەتیدەکەنەوە سوپای سوریا دەستی بەسەر بەشێکی زۆری گەڕەکی شێخ مەقسوددا گرتبێت و رایدەگەیەنن، ئەوەی باسی لێوە دەکرێت "چەواشەکارییە" و تەنها بۆ داپۆشینی شکست و تاوانەکانە.
ناوەندی راگەیاندنی ئاسایشی حەلەب لە راگەیەندراوێکدا وەڵامی وەزارەتی بەرگری سوریای دایەوە کە بانگەشەی کۆنتڕۆڵکردنی 90%ـی گەڕەکی شێخ مەقسودی کردبوو، ئاسایش دەڵێت: "ئەو هەواڵانە دوورن لە راستییەوە، لەسەر زەوی شەڕێکی سەختی کۆڵان بە کۆڵان لەگەڵ میلیشیاکانی حکومەتی دیمەشق بەردەوامە و زیانێکی گەورەیان پێگەیشتووە."
راگەیەندراوەکە ئاماژەی بەوەشکردووە، هاوتەریب لەگەڵ رووبەڕووبوونەوەکاندا، بۆردومانێکی چڕ بە تۆپ و تانک بۆ سەر گەڕەکەکە دەستیپێکردووە و بەشێوەیەکی سیستماتیک ژێرخانی ناوچەکە و نەخۆشخانەکان دەکرێنە ئامانج، کە مەبەست لێی بڵاوکردنەوەی ترسە لەنێو دانیشتواندا.
فەوزا یوسف، ئەندامی دەستەی سەرۆکایەتیی پەیەدە هۆشداریدەدات لە دۆخی مەترسیداری گەڕەکەکانی شێخ مەقسود و ئەشرەفییە و رایدەگەیەنێت، ئەوەی لەوێ روودەدات "تاوانی جەنگە" درهەق بە کورد.
ئەو بەرپرسەی پەیەدە لە هەژماری تایبەتی خۆی لە تۆڕی کۆمەڵایەتی ئێکس بڵاویکردۆتەوە، ئۆپەراسیۆنە سەربازییەکان هێشتا بەردەوامن و بە هەموو جۆرە چەکێک نەخۆشخانەی "شەهید خالید فەجر" دەکرێتە ئامانج، لە کاتێکدا دەیان برینداری تێدایە و ژیانیان لە مەترسیدایە.
فەوزا یوسف ئاماژەی بەوەشکردووە، لە هەردوو گەڕەکی شێخ مەقسود و ئەشرەفییە تاوانی جەنگ ئەنجام دەدرێت و خەڵکی سڤیل و بێتاوان تەنها لەبەرئەوەی کوردن دەکوژرێن.
لە کۆتایی پەیامەکەیدا، ئەندامەکەی دەستەی سەرۆکایەتیی پەیەدە رەخنەی توند لە هەڵوێستی وڵاتان دەگرێت و دەڵێت: "هێشتا بێدەنگییەکی نێودەوڵەتی هەیە بەرامبەر ئەوەی روودەدات، بێدەنگییەکەتان ئێمە دەکوژێت".
تۆم باراک، نێردەی تایبەتی ئەمریکا بۆ سوریا وردەکاریی کۆبوونەوەکەی لەگەڵ ئەیمەن سەفەدی، وەزیری دەرەوەی ئوردن لە عەممان ئاشکرا دەکات و رایدەگەیەنێت، واشنتۆن و عەممان جەخت لە کشانەوەی هێزەکانی سوریای دیموکرات (هەسەدە) لە حەلەب دەکەنەوە.
باراک لە هەژماری خۆی لە تۆڕی کۆمەڵایەتی ئێکس بڵاویکردەوە، لەو دیدارەدا گفتوگۆیان لەبارەی دۆخی حەلەب کردووە و پابەندبوونی خۆیان بۆ جێگیرکردنی ئاگربەست و زەمانەتکردنی کشانەوەی ئاشتیانەی هەسەدە لەو شارە دوپاتکردۆتەوە، ئەوەش وەک بەشێک لە جێبەجێکردنی رێککەوتنی 10ی ئازاری 2025.
نێردە ئەمریکییەکە ئاماژەی بەوەشکردووە، هەردوولا لەسەر بەردەوامی هەماهەنگییەکان رێککەوتوون بۆ پاڵپشتیکردنی هەوڵەکانی حکومەتی سوریا لەپێناو پاراستنی سەروەری و یەکپارچەیی خاکی ئەو وڵاتە و پاراستنی مافی سەرجەم هاووڵاتیانی سوریا.
سەبارەت بە دۆخی باشوری سوریاش، تۆم باراک دەڵێت، لەگەڵ وەزیری دەرەوەی ئوردن جەختیان لە جێبەجێکردنی نەخشەڕێگای کۆتاییهێنان بە قەیرانی سوەیدا کردۆتەوە، کە ئامانج لێی گەڕاندنەوەی سەقامگیرییە بۆ باشوری سوریا.
دەستەی ئۆپەراسیۆنەکانی سوپای سوریا راگەیەندراوێکی بڵاوکردەوە و تیایدا هۆشداری دەداتە ئەو "چەکدارانە"ی لە گەڕەکی شێخ مەقسود لە شاری حەلەب ماونەتەوە، کە تاکە بژاردە لەبەردەمیاندا دانانی چەکەکانیانە.
لە راگەیەندراوەکەی وەزارەتی بەرگری سوریادا هاتووە، تاکە رێگە لەبەردەم چەکدارانی ئەو گەڕەکە ئەوەیە دەستبەجێ خۆیان و چەکەکانیان رادەستی نزیکترین خاڵی سەربازی بکەن، لە بەرامبەر ئەو کارەشدا سوپا زەمانەتی پاراستنی ژیان و سەلامەتییان دەکات.
سوپای سوریا لە بەشێکی تری راگەیەندراوەکەدا ئاماژەی بەوەکردووە، "هێزەکانیان دەستیان کردووە بە جێبەجێکردنی ئەرکەکانیان بۆ سەپاندنی سەروەری نیشتمانی و بە "حەزمەوە" مامەڵە دەکەن، هەروەها هەر سەرچاوەیەکی تەقەکردن وێران دەکەن بۆ ئەوەی ئارامی و سەقامگیری بۆ ناوچەکە و دانیشتوانەکەی بگەڕێننەوە."
ئەم راگەیەندراوەی وەزارەتی بەرگری سوریا لە کاتێکدایە کە ئاسایشی ناوخۆی حەلەب رایگەیاند، "گرووپە چەکدارەکانی سەر بە حکومەتی کاتی بە تۆپی قورس ناوچەی دێر حافریان کردووەتە ئامانج و تۆپێک بەر ماڵی هاووڵاتییەک کەوتووە و بەهۆیەوە چەند هاووڵاتییەک شەهید بوون"
ئیدارەی خۆسەری باکور و رۆژهەڵاتی سوریا رایگەیاند، لەپێناو پاراستنی گیانی هاووڵاتیانی مەدەنی، پێشوازی لەو پێشنیازە دەکەن کە لەلایەن نێوەندگیرە نێودەوڵەتییەکانەوە کراوە بۆ گواستنەوەی هێزەکانیان لە گەڕەکی شێخ مەقسودەوە بۆ رۆژهەڵاتی فورات.
لە راگەیەندراوێکدا ئیدارەی خۆسەر ئاماژەی بەوەکردووە، پاراستنی مەدەنییەکان لە هەردوو گەڕەکی شێخ مەقسود و ئەشرەفییە لە ئەولەویەتی کارەکانیانە، بۆیە بە ئەرێنی وەڵامی دەستپێشخەرییە نێودەوڵەتییەکەیان داوەتەوە بۆ گواستنەوەی هێزەکان بە شێوەیەکی ئارام.
سەبارەت بە مەرجەکانی جێبەجێکردنی ئەو پرۆسەیە، ئیدارەی خۆسەر جەختیکردۆتەوە، دەبێت زەمانەتی مانەوەی هێزێکی پاراستنی کوردی ناوخۆیی و ئەنجومەنێکی خۆجێیی بۆ دانیشتوانی ئەو دوو گەڕەکە بکرێت، ئەوەش وەک پابەندبوون بە "رێککەوتنی 1ی نیسان".
لەئەنجامی بۆردومانكردنی نەخۆشخانەیەكی گەرەكی شێخ مەقسود ژمارەیەك كارمەندی تەندروستی شەهیدبوون، ئاسایشی ناوخۆی حەلەبیش خستنە خوارەوەی فرۆكەیەكی بێفرۆكەوانی راگەیاند .
تیمی تەندروستی گەرەكی شێخ مەقسود بلاویكردەوە، چەكدارەكانی سوریا نەخۆشخانەی شەهید خالید فەجریان لە گەرەكی شێخ مەقسود بۆردومانكردووە و لە ئەنجامدا ژمارەیەك كارمەندی تەندروستی شەهیدبوون و زیاتر لە 10 كارمەندیش برینداربوون.
هێزەكانی ئاسایشی ناوخۆی حەلەبیش لەبارەی دواین پێشهاتە مەیدانییەكان رایگەیاند، فڕۆكەیەكی بێفڕۆكەوانیان لە شێخ مەقسود خستووەتە خوارەوە.
راشیگەیاندوە، چەكدارانی سوریا بە چەكی قورس تۆپبارانی ناوەندی دێرحافر و باشوری دەروازەی دێرحافریان لە كانتۆنی تەبقا كردوە.
هاوكات ئەنجوومەنی باڵای ئیسلامیی عەلەوی لە سوریا سەبارەت بە رەوشی حەلەب رایگەیاندووە، ئەوەی رودەدات شێوازێكی رێكخراو و مەترسیدارن لە توندوتیژی، پێكهاتە رەسەنەكانی سوریا دەكاتە ئامانج.
راشیگەیاندووە، پشتیوانی كوردەكان دەكەن بۆ روبەڕوبوونەوەی ئەو دەستدرێژییانە.
سەرۆكایەتی ئەنجومەنی ڕۆحانی درووزیش، پشتیوانی خۆی بۆ كورد دەربڕیوە و دەڵێت، هێرشەكان هەوڵێكن بۆ گۆڕینی دیمۆگرافی و ئەنجامدانی كۆمەڵكوژی.
داواش لە وڵاتانی جیهان و كۆمەڵگەی نێودەوڵەتی دەكات رۆڵیان هەبێت لە راگرتنی ئەو دەستدرێژییانە بۆ سەر كەمینەكان.
هاوکات کەمێک پێش ئێستا سوپای سوریا ئاشکرایکرد، ئۆپراسیۆنی پاککردنەوەی گەڕەکی شێخ مەقسود رادەگەنین بۆ نەهێشتنی هەسەدە لە گەڕەکەکە.
جێگەی ئاماژەیە، چەکدارانی سوریا هێرشەکانی چڕتر کردوەتەوە و بە چەندین چەکی قورس و جۆراوجۆر هێرشەکانی بۆ سەر گەڕەکی شێخ مەقسود دەستپێکردووە و شوێنی نیشتەجێبوونی هاووڵاتیانی مەدەنی بە ئامانج دەگرێت.
ئەندامێکی فەرماندەیی ئاسایشی ناوخۆی حەلەب دەڵێت: بە هەموو توانامانەوە بەرگری دەکەین و بە هێج شێوەیەک گەڕەکەکانی شێخ مەقسود و ئەشرەفییە چۆڵ ناکەین.
زیاد حەلەب ئەندامی فەرماندەیی هێزەکانی ئاسایشی ناوخۆی حەلەب لە میانی بەشداریکردنی لە گەشتی سەعات هەشتی هەواڵەکانی کوردسات نیوز رایگەیاند، ماوەی چوار رۆژە چەکدارانی سوریا بەشێوەیەکی دڕندانە هێرشەکانیان بۆ سەر گەڕەکە کوردنشینەکان دەستپێکردووە و هاووڵاتیانی مەدەنی بە ئامانج دەگرن.
وتیشی، چەکدارانی سوریا ناوچە هەستیارەکانیان بۆردومان کردووە و لە ئێستادا کێشەی کەمییەکی زۆری دەرمان و تەندورستیمان هەیە.
زیاد حەلەب ئەوەشی خستەڕوو، لە رێگەی سیاسەت و گفتوگۆی ئاشتییانەوە، ئێمە ئامادەین بۆ گفتوگۆ لەگەڵ حکومەتی کاتی سوریا بۆ بەڕێوەبردنی هەموو گەڕەکەکانی حەلەب پێکەوە،
ئاشکراشیکرد، چەکدارانی سوریا هەموو چەکێکی قورس بەکاردەهێنن و ژیانی هاووڵاتیانی سڤیلیان خستووەتە مەترسییەوە، هەروەها چەکدارانی سەر بە حکومەتی سوریا دژی هەموو یاسا نێودەوڵەتییەکان بەردەوامن لە هێرشەکانیان بۆ سەر ئەو گەڕەکانە.
ئەو ئەندامەی فەرماندەیی هێزەکانی ئاسایشی ناوخۆی حەلەب ئاماژەی بەوەشکرد، ئێمە وەکو ئاسایشی ناوخۆ بەردەوام دەبن لە بەرگریکردن و تا کۆتایی دەمێننەوە و شەڕ دەکەن.
"تۆڵەی شەهیدانی ئەشرەفییە و شێخ مەقسود بە سەرکەوتن دەسێنینەوە، زیاد حەلەب وا دەڵێت".
ئەندامێكی فەرماندەیی گشتیی هەسەدە دەڵێت، هێرشەكانی سەر گەڕەكەكانی شێخ مەقسوود و ئەشرەفییە بە بەرچاوی رای گشتییەوە ئەنجام دەدرێت.
سیپان حەمۆ، ئەندامی فەرماندەیی گشتیی هێزەكانی سوریای دیموكرات"هەسەدە"پەیامێكی ڤیدیۆیی بڵاوكردەوە و رایگەیاند، لە شەشی ئەم مانگەوە هێرشێكی دڕندانە دژی گەڕەكەكانی شێخ مەقسوود و ئەشرەفییە بە بەرچاوی رای گشتییەوە ئەنجام دەدرێت و بێ دەنگیشی لێ دەكرێت.
وتیشی، وەك هەسەدە پابەندن بە رێككەوتنی یەكی نیسان، لەو گەڕەكانە كشاونەتەوە و ئەنجوومەنێكی مەدەنی و هێزەكانی ئاسایشی ناوخۆ ئەركی بەڕێوەبردن و پاراستنیان گرتەدەست.
راشیگەیاند، هیچ كەس و لایەنێك ئەو مافەی نییە خەڵكی ئەشرەفییە و شێخ مەقسود لە ناوچەكە دووربخاتەوە و رەوانەی ناوچەكانی دیكەیان بكات، دانیشتوانەكە خاوەنداریی لە ماڵ و حاڵی خۆیان دەكەن و پیلانەكانی دوژمن تێكدەدەن.
سوپای سوریا دەڵێت: گەڕەکی شێخ مەقسود ناوچەیەکی سەربازیی داخراوە و قەدەغەی هاتوچۆ تا کاتێکی نادیار دەستپێدەکات.
سوپای سوریا رایگەیاند لە سەعات 6:30ـی ئێوارەوە قەدەغەی هاتوچۆی تەواو لە گەڕەکی شێخ مەقسود دەستیپێکردووە تا کاتێکی نادیار.
ئاماژەی بەوەشکرد، ئاگاداری هاووڵاتیانی مەدەنی ئەو گەڕەکە دەکەن کە لە پەنجەرەکان دوربکەونەوە و بچنە نهۆمی خوارەوەی باڵەخانەکان.
سوپای سوریا راشیگەیاند، دەبێت هاووڵاتیان خۆیان بەدوور بگرن لە پێگەكانی هێزەكانی سوریای دیموكرات.
هاوکات ئاسایشی ناوخۆی حەلەب رایگەیاند، هێزەکنیان گردبونەوەیەکی گەورەی چەکدارانی دیمەشقی هێرشبەریان کردە ئامانج لە دەوروبەری گەڕەکی شێخ مەقسودو زیانی گیانیان پێگەیاندن.
ئاشکراشیکرد، بۆردومان و هێرشەکانی چەکدارانی سوریا بۆ سەر هەموو ناوچە نیشتەجێبووەکانی شێخ مەقسوب بەردەوامە.
لێپرسراوی پەیوەندییەکانی دەرەوەی ئیدارەی خۆسەر دەڵێت: پاپەندی رێککەوتنەکانین لەگەڵ حکومەتی سوریا، بەڵام دیمەشق لەرێی هێرشکردنە سەر حەلەب هەوڵی کۆتاییهێنان بە رێککەوتنەکە دەدات.
ئیلهام ئەحمەد لێپرسراوی پەیوەندییەکانی بەڕێوەبەرایەتیی خۆسەری باکور و رۆژهەڵاتی سووریا رایگەیاند، پابەندی رێككەوتنەكانین لەگەڵ حكومەتی سووریا و هەوڵی جێبەجێكردنیان دەدەین، دەشڵێت؛ ئیدارەی خۆسەر پابەندی ئەو رێككەوتنەیە كە لەگەڵ دەسەڵاتدارانی سوریا ئیمزای كردووە.
وتیشی، دیمەشق لەرێی هێرشكردنە سەر حەلەب هەوڵی كۆتاییهێنان بە رێككەوتنەكە دەدات، هەروەها ئێمە پەرۆشی ئاشتی و چارەسەركردنی كێشەكانین.
ئیلهام ئەحمەد راشیگەیاند، تا ئەم ساتە حكومەتی دیمەشق ئینكاری دەكات و چارەسەری ناوێت، هاوکات پەیوەندیی پچڕ پچڕ و سست لەگەڵ حكومەتی دیمەشقدا هەیە.
ئەوەشی خستەڕوو، ویلایەتە یەكگرتووەكانی ئەمریكا رۆڵی نێوەندگیر دەگێڕێت.
هێرش و بۆردومانەکانی چەکدارانی سوریا بۆ سەر گەڕەکە کوردنشینەکان بەردەوامە، ئاسایشی ناوخۆی حەلەبیش دەڵێت: دوو هێرشمان تێکشکاندووە.
ئاسایشی ناوخۆی حەلەب رایگەیاند، دوو هێرشی چەكدارانی سوریامان بۆسەر گەڕەكی شێخ مەقسود تێكشكاند.
ئاماژەی بەوەشکرد، هێرشەكان لەلایەن چەكدارانی گروپەكانی عەمشات و نورەدین زەنكی و حەمزاتەوە ئەنجام دران.
ئاسایشی ناوخۆی حەلەب ئەوەشی خستەڕوو، چەكدارانی سوریا بەچڕی بۆردومانی گەڕەكی شێخ مەقسود دەكەن.
تۆم باراک رایگەیاند، ئەمریکا بە نیگەرانییەکی زۆرەوە چاودێریی روداوەکانی گەڕەکەکانی ئەشرافییە و شێخ مەقسود لە حەلەب دەکات، داواش لە هەموو لایەنەکان دەکات دانبەخۆیاندابگرن و نەرمی بنوێنن و پاراستنی گیانی هاووڵاتییانی مەدەنی و موڵک و ماڵیان لە سەرووی هەموو شتێکەوە دابنێن و جەختیشدەکاتەوە بە زوویی کۆتایی بە ناکۆکی و شەڕ بهێنرێت.
نێردەی ترەمپ بۆ سوریا، پەیامێکی لە ئێکس بڵاوکردوەتەوە و دەڵێت؛ لە ماوەی سێزدە مانگی رابردوودا، سوریا هەنگاوی مێژوویی ناوە بەرەو سەقامگیری، ئاشتەوایی نیشتمانی، و ئاوەدانکردنەوە، ئەوەش دوای چەند دەیەیەک لە ململانێی وێرانکەر.
تۆم باراک نوسیویەتی؛ گفتوگۆ سەرنجڕاکێشەکان، کە ئەم هەفتەیە لەگەڵ نوێنەرانی ئیسرائیل ئەنجامدران، هەنگاوێکی سەرەکییە بەرەو ئاشتییەکی فراوانتری ناوچەیی، ئەمەش جەخت لە پابەندبوونی بەردەوامی سوریایە بە شکاندنی بازنەی توندوتیژی، ئازار، و تاوانکاری کە زیاتر لە نیو سەدەیە تووشی نەتەوەکەی بووە.
نێردەی ترەمپ داوایەکی بەپەلە ئاڕاستەی سەرکردایەتی حکومەتی سوریا، هێزەکانی سوریای دیموکرات (SDF)، دەسەڵاتە خۆجێییەکان لە ناوچە کوردییەکان و هەموو لایەنە چەکدارەکان دەکات، کە دەستبەجێ دەست لە دوژمنایەتی هەڵبگرن، گرژییەکان کەم بکەنەوە و پابەند بن بە کەمکردنەوەی ئاڵۆزییەکان.
ئاماژەی بەوەشکردوە، داهاتووی حەلەب و سوریای بە گشتی، هی خەڵکەکەیەتی و دەبێت لە رێگەی هێمنانەوە، نەک توندوتیژی، دابڕێژرێت ئەوان لەگەڵ هاوپەیمانانیان و بەرپرسەکانی ناوچەکە، ئامادەن بۆ ئاسانکاریکردن لە هەوڵەکان بۆ کەمکردنەوەی گرژییەکان و دەرفەتێکی نوێ بە سوریا و خەڵکەکەی بدەن بۆ هەڵبژاردنی رێگەی گفتوگۆ لە جیاتی ناکۆکی.
ژمارەی قوربانیانی مەدەنی لەحەلەب لە زیادبوندایە و ئاسایشی ناوخۆی ئەو شارەش كوشتنی 13 چەكداری سوریای راگەیاند.
ئاسایشی ناوخۆی حەلەب رایگەیاند، توانیویانە شكست بەهێرشێكی چەكدارانی سوریا بۆسەر هەردو گەرەكی شێخ مەقسود وئەشرەفسیە بهێنن 13 چەكدار بكوژن و دوو چەكداریش بەدیل بگرن و دوو زرێپۆش تێكبشكێنن درۆنێكی بەیرەقداری توركیاشیان خستوەتەخوارەوە.
سەبارەت بە ژمارەی قوربانییەكانیش، ئاسایشی ناوخۆی حەلەب رایگەیاند، لە ئەنجامی هێرشی چەكدارانی سوریا 12 هاولاتی مەدەنی كوژراون و 64 هاولاتی دیكەش برینداربوون ، لە ئەنجامی بۆردومانكردنی شارۆچكەی دێرحافریش شەش هاوڵاتی شەهید بوون و چەند كەسێكیش برینداربوون.
وەزیری دەرەوەی ئێران رایگەیاند، تاران ئامادەیە بۆ دانوستان لەگەڵ ئەمریكا ئەگەر لەسەر بنەمای رێزی یەكتر و بەرژەوەندیی هاوبەش بێت، بەڵام ئامادەی جەنگیشن لەگەڵ واشنتۆن.
عەباس عراقچی وەزیری دەرەوەی ئێران لە كۆنفڕانسێكی رۆژنامەوانیدا لە بەیروت رایگەیاند، ئامانجی سەردانەكەی بۆ لوبنان تاوتوێكردنی ئاڵنگاری و هەڕەشەكانی ئیسرائیلە بۆ سەر ئاسایشی ناوچەكە.
دەشڵێت، ئامادەن لەگەڵ ئەمریكا دانوستان بكەن بە مەرجێك لەسەر بنەمای رێز و بەرژەوەندی هاوبەش بێت.
راشیگەیاند، ئەمریكا دەبێت جیاوازی بكات لە نێوان دانوستان و سەپاندنی مەرجدا و ئەوان لەگەڵ ئەوەدا نین جەنگ هەڵبگیرسێت، بەڵام ئەگەر ئەمریكا و ئیسرائیل خوازیاری جەنگ، تاران ئامادەی جەنگە.
ئاسایشی ناوخۆ لە حەلەب هێرشی پێچەوانەی نۆ سەر هێزەکانی حکومەتی سوریا و چەکدارەکانی لە گەڕەکە کوردنشینەکان دەستپێکرد و چەند ناوچەیەکی کۆنترۆڵکرد.
پەیامنێری كوردسات نیوز لە رۆژئاوای کوردستان رایگەیاند: هێزەكانی ئاسایشی ناوخۆ لە شێخ مەقسود و ئەشرەفیە هێرشی پێچەوانەیان دەستپێكرد.
وتیشی، هێزەكانی ئاسایشی گەڕەكە كوردنشینەكان چەند شوێنێكیان لە گەڕەكەكانی حەی سەرەیان و زهور كۆنتڕۆڵكرد.
راگەیاندنی ئاسایشی ناوخۆ رایگەیاند، هێزەكانمان لە گەڕەكەی سەرەیان لە رووبەڕوو بوونەوەدان لەگەڵ چەكدارانی سوریا و زیانی زۆریان بە چەکدارانی دیمەشق گەیاندووە.
هێزەکانی ئاسایشی ناوخۆی حەلەب ئەوەشی خستەروو، هێزەکانمان لە ناوچەکانی سەریانی نوێ، یانەی جەلا، مەیدان، گۆڕەپانی شێخان و نەخۆشخانەی یۆنانی لە پێشڕەویدان.
ئاماژەی بەوەشکرد، ژمارەیەکی زۆر لە چەکدارانی هێزەکانی سوریا کوژراون.
نوێدەکرێتەوە....
سوپای سوریا قەدەغەی هاتوچۆی لە گەڕەكەكانی شێخ مەقسود و ئەشرەفییە و بەنی زەید لە حەلەب راگەیاند و داوا لە دانیشتوانی ناوچەیەكی شێخ مەقسود دەكات چۆڵی بكەن.
سوپای سوریا نەخشەی ئەو ناوچەیەی بڵاوكردووەتەوە و دەڵێت لە چەند سەعاتی داهاتوودا بۆردومانی دەكەن.
هاوکات، سوپای سوریا ئەم گەڕەكانەی وەك ناوچەی سەربازی داخراو ناساندووە و ئاماژەی بەوەکردووە، پێگە سەربازییەكان لەو گەڕەكانە دەبنە ئامانجی داهاتوویان.
هەروەها، دوو رێڕەوی مرۆیی بۆ ماوەی چەند سەعاتێك كراونەتەوە تا دانیشتوان ناوچەكە چۆڵ بكەن، بەپێی ئامارەكان تا ئێستا زیاتر لە 46 هەزار كەس لەو گەڕەكانە ئاوارەبوون.
جێگەی ئاماژەیە، تا ئێستا 9 شەهید و 300 بریندار لە بۆردومانەكانی سوپای سوریا و چەکدارەکانی لە حەلەب تۆمار كراون.