جیهان
بابا ڤانگا، پێشبینیکارە نابیناکەی جیهان، لە پێشبینییەکانی بەردەوامە، بەڵام ئەمجارەیان لەڕێی تەکنەلۆجیای زیرەکیی دەستکردەوە زنجیرەیەک پێشبینیی بۆ رووداوەکانی ساڵی نوێ دەخاتەڕوو و کە دەشێت بۆ هەندێک لە سەرۆکی وڵاتان جێی نیگەرانی بێت.
بەپێی هەواڵێکی رۆژنامەی "زە سەن"ـی بەریتانی، تیمێک توانیویانە بابا ڤانگا بە تەکنەلۆجیای زیرەکیی دەستکرد دروستبکەنەوە و زنجیرەیەک پێشبینی بۆ ساڵی 2025 پێ ئەنجام بدەن، کە دەرکەوتووە؛ لەڕووی وەرزش و هونەرەوە پێشبینیی دەرئەنجامی باش و لەڕووی سیاسیشەوە پێشبینی کارەساتی گەورە و مەترسیدار دەکرێت.
پێشبینییەکان پێدەچێت بۆ دۆناڵد ترەمپ، سەرۆکی هەڵبژێردراوی ئەمریکا باش نەبن، وەک دەوترێت، لە ساڵی نوێدا لەڕووی یاساییەوە گرفتی بۆ دروست دەبێت و دۆخی تەندروستیشی تێکدەچێت، هەروەها جوڵاندنی دۆسیەیەکی لە دادگادا، ویلایەتە یەکگرتووەکانی ئەمریکا و تەنانەت جیهانیش تووشی دابەشبوون و لیکترازان دەکات.
ئاماژەی بەوەش داوە؛ ترەمپ هەوڵی ئەوە دەدات لەسەر ئاستی جیهاندا ئیمپراتۆریەتێکی میدیایی تایبەت بەخۆی دابمەزرێنێت، بە ئامانجی ئەوەی هەواڵی کار و چالاکییەکانی بگەیەنێت بە لایەنگرەکانی لە تەواوی جیهاندا.
پێشبینی ئەوەش دەکات ترەمپ پەیوەندییەکانی لەگەڵ ئیلۆن مەسک، دەوڵەمەندترین پیاوی جیهان پتەوتر بکات، بەڵام لەگەڵ دەستبەکاربوونیدا وەک سەرۆکی ئەمریکا، دۆخی تەندروستی تێکدەچێت و بەوهۆیەوە ماوەیەک لە چاوی میدیاکان دووردەکەوێتەوە، بەڵام پێشبینی دەکرێت وەک چۆن لە هەوڵی کوشتنی دەربازی بوو، بەهەمان شێوە ئەو ئاڵنگارییەش تێپەڕێنێت.
سەبارەت بە ڤلادیمێر پوتن، سەرۆکی رووسیا، وەشانی زیرەکیی دەستکردی بابا ڤانگا دەڵێت، " پوتنیش ساڵێکی سەخت بەڕێدەکات، تەندروستی تێکدەچێت و لەسەر شانۆی سیاسیی جیهانیشدا رۆڵی بچووک دەبێتەوە، هەروەها لە شەڕی ئۆکرایندا دووچاری زنجیرەیەک پاشەکشە دەبێت، سووپای ئۆکراینیش هێرشێکی بەرفراوان دەکات و سەرکەوتنی گەورە بەدەست دەهێنێت".
ئەوەش هاتووە، کە ساڵی نوێ بۆ کیەر ستارمەر، سەرۆک وەزیرانی بەریتانیا ساڵێکی سەخت و پڕ لە ئاڵنگاری دەبێت، هەروەها پێشبینیی ئەنجامی باش بۆ هەڵبژاردەی ئینگلتەرا دەکات.
بابا ڤانگا لە ساڵی 1911 لە شاری سترومیکا لە باکووری مەکەدۆنیا لەدایکبووە، دوای ئەوەی لە تەمەنی 12 ساڵیدا بینایی لەدەستدەدات، کۆمەڵێک پێشبینی بۆ رووداوەکانی جیهان دەکات، کە هەندێکیان روویانداوە، ڤانگا لە ساڵی 1989 پێشبینی ئەوەی کرد دوو فڕۆکە هێرش دەکەنە سەر ئەمریکا، ئەمەش وەک ئەوەی لە 11ـی سێپتەمبەری 2001ـدا روویدا، لەدوای ئەمەوە ئەستێرەی ئەم ژنە گەشایەوە و زۆرێک بە خاوەن توانای سەروو سرووشتی ناویان برد.
ئەم پێشبینیکارە لە ساڵی 1996 لە بولگاریا کۆچیدوایی کرد و لە سەرەمەرگدا رایگەیاند، کە 2025 جیهان تووشی زنجیرەیەک بوومەلەرزەی وێرانکەر دەبێت.
سەرۆكی میسر و فەرەنسا لە پەیوەندییەكی تەلەفونیدا جەختیان لەسەر پێویستی دەستپێكردنی پرۆسەیەكی سیاسی هەمەلایەنە لە سوریا كردەوە.
سەرۆكایەتی میسر لە راگەیەنراوێكدا بڵاویكردەوە، عەبدولفەتاح سیسی سەرۆكی میسر و ئیمانوێل ماكرۆن هاوتا فەرەنسییەكەی لە پەیوەندییەكی تەلەفۆنیدا جەختیان لەسەر گرنگی پاراستنی سەروەری و یەكڕیزی سوریا و پێویستی دەستپێكردنی پرۆسەیەكی سیاسی گشتگیر كردووەتەوە.
راشیانگەیاند، هەردوو سەرۆك جەختیان لەسەر گرنگی بەردەوامبوون لەسەر بەرزكردنەوەی ئاستی هاوكارییەكانی نێوان هەردوو وڵات لە بوارە جیا جیاكاندا كردوەتەوە، بەتایبەتی ئابووری و وەبەرهێنان ، لە هەمان كاتدا جەخت لەسەر گرنگی گەیشتن بە ڕێككەوتنی ئاگربەست لە كەرتی غەززە، ئاڵوگۆڕی بارمتەكان و دەستگیركراوان، كۆتایهێنان بە قەیرانی غەززە كردەوە.
لە شەڕ و پێكدادانی نێوان شەڕڤانانی هەسەدە و گروپە چەكدارەكاندا لە دەوروبەری مەنبج، شەش چەكدار كوژران.
ناوەندنی راگەیاندنی هێزەكانی سوریای دیموكرات ناسراو بە هەسەدە رایگەیاند، لە نزیك مەنبج روبەڕوبونەوە لەگەڵ گروپە چەكدارەكانی نزیك لە توركیا روویداوە و لە ئەنجامدا شەش چەكدار كوژراون و دوو ئۆتۆمبێلی سەربازیش تێكشكێنراون.
هەسەدە ئاماژەی بەوەشكردووە، لە ئۆپراسیۆنێكدا لە نزیك رەقە 27 كەس بە تۆمەتی لایەنگری بۆ رێكخراوی تیرۆرستی داعش دەستگیركراون.
هەسەدە وتیشی، ئەو هەڵمەتەیان لە ئەنجامی زیادبوونی چالاكییەكانی داعش لە ناوچەكە و بەپێی زانیاری وردی هەواڵگری ئەنجامداوە، چونكە لە هەوڵدا بوون رەوشی ئەمنی ناوچەكە تێكبدەن.
ئەحمەد شەرع رایگەیاند، ئیدارەی ئێستای سوریا لەگەڵ هەسەدە لە دانوستاندایە بۆ چارەسەركردنی كێشەكانی باكوری ڕۆژهەڵاتی سوریا، چونكە كورد بەشێكی دانەبڕاوە لە پێكهاتەكانی سوریا.
ئەحمەد شەرع فەرماندەی ئۆپراسیۆنە سوربازییەكانی سوریا لە چاوپێكەوتنێكی تەلەفزیۆنیدا رایگەیاند، ئەو گەلی سوریای رزگار نەكردووە، بەڵكو گەلی سوریا خۆی بڕیاریداوە خۆی رزگار بكات، وتیشی، سوریا پێویستی بە ساڵێك دەبێت بۆ ئەوەی هاووڵاتی هەست بە گۆڕانكاری ڕیشەیی لە سیستمی حوكمڕانی و خزمەتگوزارییەكاندا بكات.
راشیگەیاند، ئیدارەی ئێستا لەگەڵ هێزەكانی سوریای دیموكرات دانوستان دەكات بۆ چارەسەركردنی كێشەكانی باكوری رۆژهەڵاتی سوریا.
جەختیشیكردەوە، كورد بەشێكی دانەبڕاو لە پێكهاتەكانی سوریا، هیچ دابەشبوونێكی وڵاتیش لە ئارادا نییە. هیواشی خواست؛ ئیدارەی نوێی ئەمریكا بە سەرۆكایەتی دۆناڵد ترەمپ سزاكانی سەر سوریا هەڵبگرێت.
میدیاکانی فەرەنسا رایانگەیاند، بەیانی ئەمڕۆ بەلەمێکی کۆچەران نقومبووە و بەهۆیەوە سێ کۆچەر گیانیان لەدەستداوە و ١٠ی دیکەیان بۆ نەخۆشخانە گواستراونەتەوە.
میادیاکان ئەوەشیان خستووەتە روو، ئەو کۆچەرانە ویستوویانە لە کەناڵی ئینگلیز لە فەرەنساوە بەرەو بەریتانیا بچن، بەڵام لەنزیک کاڵاس بەلەمەکەیان تێکشکاوە و بەهۆیەوە سێ کۆچەر گیانیانلەدەستداوە و ٥٠ کۆچەریش رزگارکراون، کە تەندروستی ١٠یان ناجێگیرە.
لەئێستادا تیمەکان بەردەوامن لە گەڕان بەدوای کۆچەرەکانی دیکەدا.
تەنها لە دوو رۆژی رابردوودا ٦٢٧ کۆچەر کەناڵی ئینگلیزیان بەرەو بەریتانیا بڕیوە
بەپێی دوایین ئامارەکانی بەرپرسانی بەریتانیا، لەمانگی ١٢ی ئەمساڵدا چەندین کۆچەر توانیویانە کەناڵی ئینگلیز ببڕن، کە رێژەی کۆچەکان لە رۆژانی کریسمس ٢٥ی مانگ و بۆکسین دەی و ٢٧ی مانگدا زیاتر بوون، کە لە ساڵی ٢٠١٨وە ئاماری لەو جۆرە تۆمارنەکراوە لەو رۆژانەدا.
باس لەوەش دەکەن، تەنها لەماوەی دوو رۆژی رابردوودا ٦٢٧ کۆچەر بە شەش بەلەمی بچووک گەیشتوونەتە بەریتانیا، لە رۆژی بۆکسین دەی'شدا ٤٠٧ کۆچەر کەناڵەکەیان بڕیوە، بەکۆی گشتی لەو ماوە کەمەدا ١٥٠ هەزار کۆچەر توانیویانە کەناڵەکە ببڕن و بگەنە بەریتانیا.
ئەوەشیان خستووەتە روو، لەماوەی ساڵی ٢٠٢٤دا ٣٦ هەزار و ٢٠٤ کۆچەر توانیویانە بگەنە بەریتانیا، کە ئەوەش بەرێژەی ٢٣٪ بەراورد بە ساڵی رابردوو زیاترە.
وەزیری دەرەوەی روسیا رایگەیاند، ئەگەر ئەمریكا ئارەزووی وەستاندنی شەڕە لە ئۆكراین ، پێویستە ناردنی چەك بۆ كیێڤ رابگرێت.
سێرگی لاڤرۆڤ وەزیری دەرەوەی روسیا لە چاوپێكەوتنێكدا لەگەڵ ئاژانسی نۆڤۆستی رایگەیاند ، ئیدارەی ئێستا و داهاتووی ئەمریكا گرنگە هەموو رێگایەك بگرنەبەر ئەگەر ئارەزووی كۆتایی هێنانیان بە شەڕی ئۆكراین هەیە، یەكەم هەنگاویش راگرتنی ناردنی هاوكاری سەربازییە بۆ كیێڤ و ئاگاداركردنەوەی دەسەڵاتدارانی ئەو وڵاتە بۆ راگرتنی شەڕ.
دەشڵێت، روسیا ئامادەی گفتوگۆ و دانوستانە لە بارەی ئۆكراینەوە، بەڵام گرنگە كێشە بنەڕەتیەكان چارەسەر بكرێن و مانەوەی بنكەكانی روسیاش لە سوریا یەكێك دەبێت لە تەوەرەكانی دانوستان.
وتیشی، ئەمریكا و ناتۆ ئەگەر لە سنورەكانی روسیا نزیك ببنەوە باجی قورس دەدەن و بەرپەرچیان دەدەنەوە.
دەم پارتی راگەیەنراوێكی لەبارەی ناوەڕۆكی گفتوگۆكانی دیداری عەبدوڵا ئۆجەلان بڵاوكردەو و رایگەیاندووە، تەندروستی رێبەری زیندانیكراوی پارتی كرێكارانی كوردستان زۆر باشە.
ئاماژەی بەوەشکردووە، ئۆجەلان ئامادەیی خۆی پیشانداوە بۆ پشتیوانیكردن لە دەستپێشخەرییەكەی ئەردۆغان و باخچەلی و داوای لە وەفدەكە كردووە بۆچوونەكانی بگەیەنێتە ناوەندە سیاسییەكانی توركیا.
ئەوەش هاتووە، ئۆجەلان ئامادەیی دەربڕیوە بۆ ئەوەی بۆچوونەكانی لە رێگەی بانگەوازێكەوە بڵاوبكاتەوە و وتوویەتی، "بەهێزكردنی برایەتی نێوان كورد و تورك بەرپرسیارێتییەكی مێژووییە".
دەم پارتی ئەوەشی خستووەتە روو، "ئۆجەلان رایگەیاندووە، بۆ سەرخستنی پڕۆسەی ئاشتی پێویستە سەرجەم لایەنەكان دەستپێشخەری و هەڵوێستی ئەرێنی بخەنەڕوو، رووداوەكانی غەززە و سوریا دەریانخست كە ناكرێت چیتر پڕۆسەی چارەسەریی دوابخرێت، لەرێگەی دەستێوەردانی دەرەكی هەوڵی ئاڵۆزكردنی پڕۆسەی چارەسەر دەدرێت".
ئۆجەلان وتووشییەتی، "سەردەم سەردەمی ئاشتی و دیموكراسی و برایەتییە بۆ توركیا و ناوچەكە".
ئەمەش لە کاتێکدایە، دوای ١٠ ساڵ لە رێگریی دەسەڵاتدارانی توركیا، دوێنێ ٢٨ی ١٢، رێگە درا وەفدێكی پەرلەمانتارانی پارتی یەكسانی و دیموكراسی دەم پارتی بۆ دیدار لەگەڵ عەبدوڵا ئۆجەلان بچنە دوورگەی ئیمڕاڵی و لەگەڵیدا کۆببنەوە، کە کۆبوونەوەکەش سێ سەعاتی خایاند.
كەناڵی ١٢ی ئیسرائیلی وردەكاری كوشتنی ئیسماعیل هەنیە سەرۆكی مەكتەبی سیاسی حەماسی بڵاوكردەوە و رایگەیاند ، هەنیە بەهۆی بۆمبێكەوە لە تاران كوژراوە و ئەو پرۆسەیەش چەند مانگێكی پێویست بووە.
پلانی كوشتنی هەنییە
كەناڵی ١٢ی ئیسرائیل لە راپۆرتێكدا وردەكاری كوشتنی ئیسماعیل هەنیەی بڵاوكردەوە و تیایدا هاتووە، پلانی كوشتنی هەنییە چەند مانگێكی پێویست بووە، تا دواجار بریاردراوە لە ئێران بكوژرێت، رونیشكراوەتەوە كە لە ژوری مانەوەی هەنیە لە تاران بۆمبێكی بچوك دانراوە ، بەڵام لە كاركەوتنی فێنككەرەوەی ژوورەكە خەریك بووە پلانی كوشتنەكەی تێكبدات ، چونكە هەنیە ژورەكەی بۆ ماوەیەك جێهێشتووە و ئیسرائیل ترسی ئەوەی هەبووە ژورەكەی بگوازێتەوە، دواتر فێنككەرەوەكە چاكبووەتەوە و هەنیە گەڕاوتەوە ژورەكەی و پلانی كوشتنەكەی وەك خۆی جێبەجێكراوە.
بەرپرسیارێتی ئیسرائیل لە كوشتنی هەنیە
ئەوەش لەكاتێكدایە، رۆژی دووشەممەی رابردوو یسرائیل كاتس وەزیری بەرگری ئیسرائیل بۆ یەكەمجار بەرپرسیارێتی وڵاتەكەی لە كوشتنی هەنیە لە شاری تاران لە كاتی رێورەسمی دەستبەكاربوونی مەسعود پزیشكیان وەكو سەرۆك كۆماری ئێران راگەیاند
نیویۆرک تایمز بڵاویکردووەتەوە، فڕۆکەیەکی کۆریای باشوور بە ١٨١ سەرنشینەوە تێکشکا و بەپێی ئامارە سەرەتاییەکان بەشێکی زۆری سەرنشینەکان گیانیان لەدەستداوە.
مالپەڕی رەسمی رۆژنامەی نیویۆرک تایمز بڵاویکردووەتەوە، فڕۆکەکە لە جرۆی بۆینگ ٧٣٧ بووە و سەر بە هێڵی ئاسمانی 'جیجو' بووە و لە بانکوکی کۆریای باشوورەوە بەرەو موان رۆیشتووە.
بەپێی زانیارییە سەرەتاییەکان، ئەوەندەی لە ڤیدیۆکاندا دەردەکەوێت، فڕۆکەکە لەکاتی نیشتنەوەیدا لەسەر رێڕەوی سەرەکیی نیشتنەوەکەی لادەدات و بەهۆیەوە سەرەتا گڕ دەگرێت و لەماوەی چەند چرکەیەکی کەمدا بەیەکجار دەتەقێتەوە.
ئامارە سەرەتاییەکان باس لەوەدەکەن، زۆرینەی سەرنشینەکانی ناو فڕۆکەکە گیانیان لەدەستداوە.
"پێدەچێت هۆکارەکەی جێبەجێنەکردنی میکانیزمەکانی نیشتنەوە بووبێت"
لەوبارەیەوە کێیز تۆنکین بەڕێوەبەری جێبەجێکاری پڕۆژەکانی فڕۆکەوانی لە کۆمپانیای راوێژکاریی فڕۆکەوانی لە ئوسترالیا باسی لەوەکردووە، پێدەچێت هۆکاری لە رێڕەولادانی فڕۆکەکە جێبەجێنەکردنی میکانیزمەکانی نیشتنەوە بووبێت.
لە سەرەتای رووداوەکەدا و لە کۆنفارنسێکی رۆژنامەنووسیدا، سەرۆکی هێڵی فڕۆکەوانی جیجو و ستافەکەی، داوای لێبوردنیان لە کەسوکاری قوربانییەکان کرد و ئاماژەیان بەوەکرد، هۆکاری رووداوەکە هێشتا نادیارە و لە لێکۆڵینەوەکان بەردەوامن.
وتیشی، لە مێژووی ئەو فڕۆکەیەیەدا کە ئەمڕۆ توشی ئەو رووداوە بووە، هیچ رووداوێک و دۆخێکی نەخوازراو تۆمارنەکراوە و لەکاتی پشکنینی پێش فڕینیشدا هیچ گرفتێکی نەبووە.
لە ئێران هێرش دەكرێتە سەر بنكەیەكی پۆلیس و كەسێك كوژرا و ئەفسەرێکی دیکەش برینداربوو.
میدیاكانی ئێران بڵاویانكردەوە، ئەمشەو كەسێكی خۆكوژ لەبەردەم بنكەی پۆلیسی بەندەر لەنگە لە پارێزگای هورموزگان خۆی تەقاندوەتەوە و بەهۆیەوە لێپرسراوێكی پۆلیسی ئەو بنكەیە برینداربووە.
پەیامنێری كوردسات نیوز لە تاران رایگەیاند، سەرچاوەكانی هەواڵی وڵاتەكە ئاشكرایانكردووە، كەسێكی خۆكوژ بە "پشتوێنی بۆمبڕێژكراو" خۆی بە ئۆتۆمبێلی لێپرسراوی هەواڵگریی پۆلیسی بەندەری لەنگە تەقاندووەتەوە و بووەتە هۆی كوژرانی لێپرسراوەكە و بریندراوبوونی ئەفسەرێكی دیكەش.
بە پێی زانیارییەكان لێپرسراوەكەی پۆلیس لە ئۆتۆمبێلەكەی دابەزیوە و دواتر خۆكوژەكە خۆی پێدا تەقاندووەتەوە و بەهۆی سەختی برینەكانیەوە لە نەخۆشخانە گیانیلەدەستداوە.
دوای ١٠ ساڵ لە رێگری دەسەڵاتدارانی توركیا، دواجار ئەمڕۆ رێگە درا دوو پەرلەمانتاری دەم پارتی سەردانی ئیمراڵی بكەن و لەگەڵ عەبدوڵا ئۆجالان كۆببنەوە.
وەفدێكی پەرلەمانتارانی پارتی یەكسانی و دیموكراسی دەم پارتی بۆ دیدار لەگەڵ ئۆجەلان گەیشتنە دورگەی ئیمڕاڵی و بڕیارە لە كۆنفڕاسێكی رۆژنامەوانیدا وردەكارییەكانی كۆبونەكەیان ئاشكرا بكەن.
پەیامنێری كوردسات نیوز لە ئامەد رایگەیاند، ئەو كۆبونەوەیە نزیكەی سێ سەعاتی خایاندووە.
كۆشكی سەرۆكایەتی روسیا رایگەیاند، ڤلادیمێر پوتن سەرۆكی وڵات، داوای لێبوردنی لە هاوتا ئازەرییەكەی كردوە، كە رۆژی چوارشەممەی رابردوو فڕۆكەیەكی ئازەربایجانی لە ئاسمانی روسیادا تووشی روداوێكی كارەساتبار بوو.
كرێملین، لە پێگەی تایبەتی خۆی بڵاویكردەوە، ڤلادیمێر پوتن سەرۆكی روسیا، پەیوەندییەكی تەلەفۆنی لەگەڵ ئیلهام عەلیێڤ سەرۆكی ئازەربایجان ئەنجامداوە، پەیوەندییەكەش لەبارەی كەوتنەخوارەوەی فڕۆكەیەكی نەفەرهەڵگری هێڵی ئاسمانی ئازەربایجان بووە، كە لە رۆژی ٢٥ـی ئەم مانگە لە نزیك شاری ئاكتاو لە كازاخستان كەوتەخوارەوە و بەهۆیەوە زیاتر لە ٣٠ كەس گیانیانلەدەستدا.
ئەوەش هاتووە، سەرۆكی روسیا داوای لێبوردنی كردوە بۆ ئەو روداوە دڵتەزێنەی كە لە ئاسمانی وڵاتەكەی رویداوە، سەرەخۆشی و دڵسۆزی خۆی بۆ كەسوكاری قوربانییەكان دەربڕیوە.
ئەمەش لەكاتێكدایە جۆن كێربی وتەبێژی كۆشكی سپی ئەمریكا دەڵێت، بەپێی زانیارییە سەرەتاییەكان بۆیان دەركەوتووە سیستمی بەرگری ئاسمانی روسیا بە هەڵە فڕۆكەكەی ئازربایجانی خستوەتە خوارەوە.
رێكخراوی یونیسێف رایگەیاند، ساڵی ٢٠٢٤ یەكێك بووە لە خراپترین ساڵەكان بۆ منداڵانی ئەو ناوچانەی شەڕ و ململانێی سەربازییان تێدابووە.
كاسرین راسڵ بەڕێوبەری جێبەجێكاری یونیسێف ئەوەیخستەڕوو، ساڵی ٢٠٢٤ یەكێك بووە لە خراپترین ساڵەكان بۆ منداڵانی ناوچەكانی شەڕ لە مێژووی رێكخراوەكەدا، هەم لەڕووی ژمارەی ئەو منداڵانەی زیانیان لێكەوتووە و هەم لە ڕووی ئاستی كاریگەریی لەسەر ژیانیان.
رێكخراوەكە لە راپۆرتێكدا ئاماژەی بەوەداوە، نزیكەی ٤٧٣ ملیۆن منداڵ لە ناوچە نا ئارامەكاندا دەژین بەجۆرك زیاتر لە یەك لەسەر شەشی منداڵانی جیهان دەكات.
دەشڵێت، رێژەی ئەو منداڵانەی لە ناوچە نا ئارامەكاندا دەژین، لەئێستادا لە ١٩٪ـی منداڵانی جیهان دەگرێتەوە و بەراورد بە نەوەدەكانی سەدەی رابردوو ئامارەكە دوو هێندە بووە.
ئەوەش لەكاتێكدایە، شەڕ و ململانێكان لە هەریەك لە وڵاتانی فەلەستین، لوبنان، ئۆكراین و روسیا و سوریا و بەشێكی دیكەی جیهان بەردەوامە و تیایدا منداڵان زەرەرمەندی یەكەمن.
وەفدێكی بەحرەین گەیشتە سوریا و لەگەڵ ئەحمەد شەرع كۆبوەوە
میدیای سوریا رایگەیاند، وەفدێكی بەحرەین بە سەرۆكایەتی ئەحمەد بن عەزیز ئال خەلیفە سەرۆكی دەزگای ئاسایشی ستراتیژی بەحرەین گەیشتە دیمەشق و چاوی بە ئەحمەد شەرع فەرماندەی ئیدارەی سوریا كەوت.
وەزارەتی دەرەوەی بەحرەینیش لە راگەیەنراوێكدا ئاماژەی بەوەكردووە، پاڵپشتی سوریا و هاووڵاتیانی ئەو وڵاتە دەكەن و هاوكاری گەڕانەوەی پەنابەر و ئاوارەكانی سوریاشن بۆ وڵاتی خۆیان.
لە سەرەتای روخانی دەسەڵاتەكەی ئەسەدەوە بەحرەین رایگەیاندبوو، بە وردی چاودێری رەوشی سوریا دەكەن و سورن لەسەر ئاسایش و سەقامگیری سوریا.
وەفدێكی پەرلەمانتارانی دەم پارتی بۆ دیدار لەگەڵ ئۆجەلان گەیشتنە ئیمڕاڵی و ئێستا لە كۆبونەوەدان.
ئەمڕۆ وەفدێكی پارتی یەكسانی و دیموكراسیی گەلان "دەم پارتی" كە پێكهاتوون لە پەروین بوڵدان و سری سوورەیا ئۆندەر بە مەبەستی چاوپێكەوتن لەگەڵ عەبدوڵا ئۆجەلان رێبەری زیندانیكراوی پەكەكە، گەیشنتە ئیمڕاڵی و لە كۆبونەوەدان.
ئەوەش لەكاتێكدایە، رۆژی هەینی وەزارەتی دادی توركی ئەنجامدانی دیداری دەم پارتی لەگەڵ ئۆجەلان لە ئیمراڵی پەسەند كرد.
دۆناڵد ترەمپ، داوای لە دادگای باڵای وڵاتەكەی كرد كاركردن بە یاسای قەدەغەكردنی بەكارهێنانی تیكتۆك رابگرێت.
دۆناڵد ترەمپ، سەرۆكی هەڵبژێردراوی ئەمریكا داوای لە دادگای باڵای وڵاتەكەی كردووە، لە سەروبەندی دەستبەكاربوونیدا لە ٢٠ی مانگی داهاتووەوە یاسای قەدەغەكردنی بەكارهێنلانی تۆڕی كۆمەڵایەتی تیكتۆك رابگرێت.
لەبەرانبەردا دادگای باڵا رەزامەندیی دەربڕیوە لەسەر گوێگرتن لە دۆسیەكە، بەڵام ئەگەر بڕیارەكە لە بەرژەوەندیی كۆمپانیا چینییەكە نەبێت، ئەوا لە ١٩ ی مانگی داهاتووەوە، واتە یەك رۆژ پیش دەستبەكاربوونی ترەمپ، یاسای قەدەغەكردنی تیكتۆك لە ئەمریكا دەچێتە بواری جێبەجێكردن.
كۆنگرێسی ئەمریكا لە مانگی نیسانی رابردوو دەنگیدا لەسەر قەدەغەكردنی تیكتۆك و داوایكرد یاساكە لە ١٩ی ١ی ٢٠٢٥ ەوە جێبەجێ بكرێت.