مات گیتز كاندیدی ترەمپ بۆ وەزیری داد كشانەوەی خۆی راگەیاند، ترەمپیش كەسێكی نوێی بۆ وەرگرتنی ئەو پۆستە لە كابینەكەیدا دیاریكرد.

دوای چەند سەعاتێك كشانەوەی مات گیتز وەك كاندیدی وەزیری داد، دۆناڵد ترەمپ سەرۆكی هەڵبژێردراوی ئەمریكا لە پێگەی سۆشیاڵ تروس رایگەیاند، پام بۆند دادوەری گشتی پێشوی ولایەتی فلۆریدا بۆ وەرگرتنی پۆستەكە كاندید دەكات.

بۆند، یەكێكە لە پارێزەرانی ترەمپ و ساڵی ٢٠١٩ لە ئەنجومەنی پیرانی ئەمریكا رێگریكرد لەوەی ترەمپ گۆشەگیر بكرێت، هەروەها لە ساڵی ٢٠٢٠ یەكێك بوو لەو پارێزەرانی بەرگری لە ترەمپ كرد لە دادگا دژی ئەو تۆمەتانەی كە ئاراستەی كرابوو.

ڕۆژی پێنجشەممە، مات گیتز ڕایگەیاند كە كاندیدبوونی خۆی بۆ ئەو پۆستە دەكشێنێتەوە، دوای ئەوەی كاندیدكردنی ڕووبەڕووی دژایەتییەكی بەرفراوان بووەوە، تەنانەت لەناو پارتی كۆمارییەكانی خۆیدا.

سەبارەت بە دەستلەكاركێشانەوەی گیتز، ترەمپ رایگەیاند ئەو كەسێكی بەتوانایەو داهاتویەكی باش چاوەرێی دەكات.

 

ئیسرائیل هەنگاوەكانی تایبەت بە گۆڕینی بڕیاری دەستگیركردنی ناتانیاهۆ تاوتوێ دەكات، بایدنیش دەڵێت بڕیاری دەستگیركردنی ناتانیاهۆ جێگەی شەرمەزارییە.

جۆ بایدن سەرۆكی ئەمریكا رایگەیاند، بڕیارەكەی ئەو دادگایە نازانرێت بە چی پاساوێك بووە، بەڵام ناكرێت هەرگیز ئیسرائیل و حەماس بەراورد بە یەك بكرێت ئەوە بڕیارێكی شەرمەزاركەرانەیە.

ئاماژەی بەوەشكرد، وڵاتەكەی هەمیشە لە پشتی حكومەتی ئیسرائیل دەوەستێت و وەڵامی هەر هێرشێك دەداتەوە كە لە لایەن تیرۆرستانەوە بكرێتە سەر ئەو وڵاتە.

هاوكات، دەستەی پەخشی ئیسرائیل لە زاری بەرپرسانی ئەو وڵاتەوە بڵاویكردەوە، ئیسرائیل هەنگاوەكانی تایبەت بە گۆڕینی بڕیاری دەستگیركردنی نەتانیاهۆ و گالانت تاوتوێ دەكات، لەرێگەی كردنەوەی لێكۆڵینەوەی جددی بۆ پابەندبوون بە یاسا نێودەوڵەتییەكان.

 

بەهۆی ئەگەری هێرشی تۆڵەسەندنەوەی روسیا، ئەمریكا باڵیۆزخانەی خۆی لە كیێڤ داخست.

دوای داخستنی باڵیۆزخانەی ئەمریكا هەریەك لە باڵیۆزخانەی ئیتاڵیا و یۆنان ڕایانگەیاند، دوای ئەو هۆشدارییە نائاساییەی ئەمریكا دەرگای باڵیۆزخانەكانیان داخستووە، هاوكات باڵیۆزخانەی فەرەنساش بە كراوەیی ماوەتەوە، بەڵام هۆشداریداوە بە هاووڵاتیانی وڵاتەكەی.

ئۆكراین لە هەزارەمین رۆژی جەنگەكەی لەگەڵ روسیا، موشەكی ئەتاكمزی ئەمریكی بەكارهێنا بۆ هێرشكردنە سەر كۆگایەكی چەك لە ناوخۆی روسیا، ئەوەش دوای ئەوەی بەڕێوەبەرایەتییەكەی بایدن مۆڵەتیدا بە ئۆكراین چەكەكانی ئەمریكا بۆ هێرشكردنە سەر روسیا بەكاربهێنێت.

لای خۆشیەوە سێرگی ناریشكین لێپرسراوی هەواڵگری دەرەوەی روسیا رایگەیاند، مۆسكۆ تۆڵە لەو وڵاتانەی ناتۆ دەكاتەوە، كە ئاسانكاری بۆ هێرشە مووشەكییە دوور مەوداكانی ئۆكراین دەكەن بۆ سەر خاكی روسیا.

كیێڤ دوپاتیكردەوە، مۆسكۆ بۆ یەكەمجار موشەكێكی بالستیكی كیشوەربڕی ئاراستەی ئۆكراین كردووە.

هێزی ئاسمانی ئۆكراین رایگەیاند، هێزەكانی روسیا لە هێرشێكدا بۆ سەر شاری دنیپرۆ موشەكی بالیستیكی كیشوەربڕیان بەكارهێناوە.

سەرچاوەیەك بۆ ئاژانسی فڕانس پرێسی پشتڕاستكردوەتەوە ئەوە یەكەمجارە مۆسكۆ لە دوای ئۆپراسیۆنی سەربازی ساڵی 2022 ئەم چەكە بەكاردەهێنێت.

ئەم هەنگاوەی روسیا هاوكاتە لەگەڵ ئەوەی هەفتەی رابردوو جۆ بایدن سەرۆكی ئەمریكا گڵۆپی سەوزی بۆ ئۆكراین هەڵكرد بۆئەوەی موشەكی دورمەودا كە ئەمریكا دابینیكردووە بۆ هێرشكردنەسەر روسیا بەكاربهێنێت.

لە هێرشێكی چەكداریدا لە پارێزگای خەیبەر لە باكوری رۆژئاوای پاكستان نزیكەی ٤٠ كەس كوژران.

نوسرەت حوسێن لێپرسراوی پۆلیسی خۆجێی ناوچەكە لەسەر روداوەكە رایگەیاند، روداوەكە بەهۆی ناكۆكی مەزهەبی لە نێوان زۆرینەی سوننە و كەمایەتییە شیعەكاندا رویداوە و ٣٨ كەس كوژراون.

ئاماژەی بەوەشكردووە، چەند ئۆتۆمبێلێك كە سەرنشینیان هەڵگرتبوو لە شاری پاراچنارەوە بەرەو پیشاوەری پایتەختی خەیبەر دەڕۆیشتن كاتێك چەكدارەكان تەقەیان لێكردوون.

هاوكات ئاسف عەلی زەرداری سەرۆكی پاكستان، ئیدانەی هێرشەكەی كرد و فەرمانی بە لێپرسراوانی وڵاتەكەی كردووە رێوشوێنی پێویست بگرنەبەر دژی ئەو كەسانەی لە پشت هێرشەكەوە بوون.

ئەنجوومەنی پیرانی ئەمریكا سبەینێ دەنگ لەسەر یاسایەك دەدات كە ئەگەر پەسەند بكرێت، فرۆشتنی چەند جۆرێك چەك بە ئیسرائیل قەدەغە دەكرێت.

سیناتۆر بێرنی ساندەرز ئەندامی سەربەخۆ لە ئەنجومەنی پیران كە هاوپەیمانی دیموكراتەكانە رایگەیاند، ئیسرائیل بە بۆمبی ئەمریكی بۆردومانی گەڕەكە قەرەباڵغەكان دەكات و سەدان هاووڵاتی مەدەنی دەكوژێت بۆ لەناوبردنی ژمارەیەكی كەم لە چەكدارانی حەماس و دەشڵێت، ئەم كارانە نایاساییە.

پرۆژە یاساكە، لەلایەن سیناتۆر بێرنی ساندەرزەوە پێشكەش بە ئەنجومەنی پیران كراوە و یاساكانی ئەمریكاش ئەو مافە بە كۆنگرێس دەدەن فرۆشتنی چەك لە دەرەوەی وڵاتەكە رابگرێت.

میدیاكانی ئەمریكا دەڵێن، دوو لەو بڕیارانە كە لەلایەن ساندەرز و  هەردوو ئەندامی دیموكرات جێف مێركلی و پیتەر وێڵچ پێشكەش كراون و تیایدا فرۆشتنی هاوەنی ١٢٠ ملم و تەقەمەنی هێرشی راستەوخۆ قەدەغە دەكەن، بڕیاری سێیەمیش كە سیناتۆری دیموكرات برایان شاتز پشتیوانی لێدەكات بۆ ئەوەیە رێگری لە فرۆشتنی گولەی تانك بكرێت.

ئیسرائیل داوا لە ئەنجومەنی ئاسایش دەكات فشاربخاتە سەر حكومەتی عیراق بۆ دانانی سنورێك بۆ ئەو هێرشانەی گروپە چەكدارەكانی سەر بە ئێران لە عیراقەوە  دەیكەنە سەری.

جەدعون ساعر، وەزیری دەرەوەی ئیسرائیل رایگەیاندووە، بەرپرسیارێتی حكومەتی عیراقە كە رێگری بكات لەوەی خاكەكەی بەكاربهێنرێت بۆ ئەنجامدانی هێرش بۆ وڵاتانی دیكە، هەربۆیە نامەیەكی ئاراستەی ئەنجومەنی ئاسایش كردووە و لەڕێیەوە داوایكردووە كە رێكاری بەپەلە بگرنەبەر بۆ راگرتنی هێرشی گروپە چەكدارەكانی سەر بە ئێران لە عیراق كە بۆ هێرشكردنە سەر ئیسرائیل بەكاریدەهێنن.

راشیگەیاندووە، پێویستە حكومەتی عیراق بەپێی یاسای نێودەوڵەتی رێز لە پابەندبوونەكانی خۆی بگرێت و رێگری لەو هێرشانە بكات، تەئكیدیشیكردووەتەوە كە ئیسرائیل مافی بەرگریكردنی لە خۆی هەیە و بەپێی پەیماننامەی نەتەوە یەكگرتووەكان، دەتوانێت هەموو رێكارێكی پێویست دژی گروپە چەكدارەكانی سەر بە ئێران لە عیراق بگرێتەبەر بۆ بەرگریكردن لە خۆی و هاووڵاتییەكانی.

لە دوای دەستپێكردنی جەنگی غەززەوە،  هێرشەكانی مقاوەمەی ئیسلامی بۆ سەر ئیسرائیل دەستیپێكردووە و بەردەوام لە زیادبوندایە، بەپێی راپۆرتێكی رۆژنامەی مەعاریفی ئیسرائیلیش، تەلئەبیب پلانی هەیە بۆ وەڵامدانەوە، ئەگەر بێتو هێرشەكان لە بەرەی عیراقەوە زیاد بكەن.

حزبوڵای لوبنان بە موشەك بۆردومانی تەلئەبیبی كرد و بەهۆیەوە كارەبای بەشێك لە شارەكە پچڕاو فڕۆكەخانەی بن گۆریۆنیش داخرا.

میدیاكانی ئیسرائیل بڵاویانكردەوە، حزبوڵا بە چوار مووشەك ناوەڕاستی تەلئەبیبی بۆردومانكردووە و سیستمی بەرگری نەیتوانیوە بەرپەرچی هێرشەكە بداتەوە.

پۆلیسی ئیسرائیل دەڵێت، بەهۆی بۆردومانەكەوە پێنج كەس برینداربوون و كارەبای زۆربەی شارەكەش پچڕاوە، هەروەها فڕۆكەخانەی بنگۆریۆنیش داخراوە.

ڕۆژنامەی یەدیعوت ئەهرۆنۆتی ئیسرائیلی بڵاویكردەوە، دەسەڵاتداران هۆشدارییان داوەتە هاووڵاتیان كە لە ناوچەكانی تەلئەبیب، ئیلات، كەریات، شەمونە، تانیا، ڕامات، بەنی براك، هۆلۆن و ژمارەیەك ناوچەی نیشتەجێبوون لە جەلیل لە ماڵ و حاڵی خۆیان بمێننەوە.

ئەو بۆردومانەی حزبوڵا لەكاتێكدایە، كەناڵی ١٢ی ئیسرائیلی بڵاویكردۆتەوە، لە ماوەی كەمتر لە ٢٤ سەعاتی رابردوودا سوپای ئیسرائیل ١٧٠ مووشەكی ئاراستەی لوبنان كردووە.

ماڵپەڕی ئەكسیۆسی ئەمریكیش بڵاویكردووەتەوە، چڕكردنەوەی هێرش و بۆردومانەكان بۆ سەر لوبنان، ئامانج لێی فشارخستنە سەر حزبوڵایە بۆ رازیبوون بە مەرجەكانی ئاگربەست.

بنیامین ناتانیاهۆ ئاشكرایدەكات، لە هێرشەكەی ئیسرائیل بۆ سەر ئێران،  بەرنامە ئەتۆمییەكەی تارانیان كردووەتە ئامانج.

سەرۆك وەزیرانی ئیسرائیل لەبەردەم كنێستی وڵاتەكەی رایگەیاند، لەگەڵ ترەمپ قسەی كردووە و لەسەر هەڕەشەی ئێران بە تەواوەتی هاوڕان، جەختیشی لەوەكردەوە كە شەڕی ئەوان بە پلەی یەكەم دژی ئێرانە و لە هێرشەكەی ئیسرائیل لە مانگی تشرینی یەكەمی رابردوو بۆ سەر ئێران، بەشێك لە بەرنامە ئەتۆمییەكەی تارانیان كردووەتە ئامانج.

ناتانیاهۆ جەختیشی لەوەشكردەوە، حەماس بەربەستە لەبەردەم ڕێككەوتنی ئاگربەستی غەززە، ئەمریكاش ئەمە پشتڕاستدەكاتەوە، بەوتەی خۆی، هەڕەشەی واشنتۆنیان بۆ چوونە ناو ڕەفەح رەتكردووەتەوە لە رابردوودا.

ناتانیاهۆ باسی پەیوەندی خۆی لەگەڵ بایدن كرد و وتی، راستەوخۆ جۆ بایدن دژایەتی خۆی بۆ چوونە ناو رەفەح دەربڕیوە و جەختی لەوەكردووەتەوە، ئەگەر ئیسرائیل ئەوكارە بكات، ناتانیاهۆ تەنیا دەمێنێتەوە.

حزبوڵای لوبنان كوژرانی چوار كارمەندی فەرمانگەی پەیوەندییەكانی لەگەڵ محەمەد عەفیف راگەیاند.

حزبوڵا لە بەیاننامەیەكدا ماتەمینی بۆ كوژرانی چوار كارمەندی خۆی راگەیاندووە كە لەگەڵ محەمەد عەفیف لێپرسراوی راگەیاندنی حزبەكە كوژران.

حیزبوڵا ئاماژەی بەوەشكردووە، رۆژی یەكشەممە لە بۆردومانێكی ئاسمانی ئیسرائیلدا محەمەد عەفیف و چوار كارمەندی فەرمانگەی پەیوەندییەكان لە بەیروت كوژراون.

عەفیف یەكێك لە رۆژنامەنووسە دیارەكانی حزبوڵا بوو، بە پردێكی میدیایی گرنگ دادەنرا لەنێوان حزبوڵا و جەماوەری لوبنان و جیهان.

هێرشەكەی ئیسرائیل بۆ سەر گەڕەكی رەئس نەبا لە باشوری بەیروت كە تیایدا محەمەد عەفیفی كردە ئامانج، هیچ هۆشدارییەكی پێشووەختەی نەبووە، لەكاتێكدا ژمارەیەكی زۆر ئاوارە لەو گەڕەكەدا نیشتەجێن.

حكومەتی بەریتانیا سزای نوێی بەسەر دوو كۆمپانیای ئێرانیدا سەپاند، بەهۆی هاوكاریكردنی روسیا لە جەنگی ئۆكراین.

وەزارەتی دەرەوەی بەریتانیا ڕۆژی دووشەممە ڕایگەیاند، سزای بەسەر هێڵی ئاسمانی ئێرانی و كۆمپانیای كەشتیوانی ئێران و كەشتییەك سەپاندووە بەتۆمەتی پاڵپشتیكردنی روسیا لە شەڕی دژ بە ئۆكراینادا.

وەزارەتەكە ئاماژەی بەوەشكردووە، سەپاندنی سزاكە لە وەڵامی گواستنەوەی مووشەكی بالیستیكی ئێرانە بۆ روسیا.

هەروەها ئەوەشهاتووە، سامانی ئەو دوو كۆمپانیا ئێرانییە لە دەرەوە بلۆككراوە، بەهۆی ئەوەی ڕۆڵیان بینیوە لە دابینكردنی چەك بۆ روسیا.

هاوكات دەیڤید لامی وەزیری دەرەوەی بەریتانیا وتی، هەوڵەكانی ئێران بۆ تێكدانی ئاسایشی جیهانی مەترسیدارە و قبوڵناكرێت، داواش لە ئێران دەكات  پشتیوانی خۆی لە شەڕی نایاسایی ڕوسیا لە دژی ئۆكراین رابگرێت.

هێما بۆ ئەوەشكراوە، سزای بەسەر كەشتییەكی بارهەڵگری روسیاشدا سەپاندووە كە ناوی پۆرت ئۆلیا-سێیە، بەهۆی ئەوەی پێداویستییە سەربازییەكانی بۆ روسیا گواستووەتەوە.

كۆشكی سەرۆكایەتی روسیا ئەو تۆمەتانە بە بێبنەما ناودەبات كە ئاراستەی ترەمپ دەكرێن بەوەی سیخوڕی هەواڵگری روسیایە.

دیمیتری بیسكۆف وتەبێژی كۆشكی سەرۆكایەتی روسیا كە بە كرملن ناسراوە رایگەیاند: "تووشی سەرسوڕمان و شۆك بوون كە چۆن بەشێك لە میدیاكانی ئەمریكا تۆمەتی بێبنەما دەدەنە پاڵ دۆناڵد ترەمپ كە لە ٢٠١٦ تا ٢٠٢٠ سەرۆكی ئەو وڵاتە بووە و لە ئێستاشدا جارێكی تر بۆ ئەو پۆستە هەڵبژێردراوەتەوە، بەتایبەتی كە باس لەوە دەكرێت ترەمپ سیخوڕی هەواڵگری روسیایە، ئەوەش تۆمەتێكی تری پروپوچ و بێبنەمای میدیاكانی ئەمریكایە كە داویانەتە پاڵ ترەمپ".

وتیشی، ترەمپ لە ماوەی ئەو چوار ساڵەی سەرۆكی ئەمریكی بوو، هەوڵێكی زۆری دا بۆ ئاسایی كردنەوەی پەیوەندییەكانی ئەمریكا لەگەڵ هەموو ئەو وڵاتانانەی نەیاری بوون، بەتایبەتیش كۆریای باكوور و چین و روسیا، ئێستاش هەمان سیاسەتی هەیە، بۆیە بەشێك لەو لایەنانەی ئەمریكا كە بەرژوەندییان لەگەڵ شەڕ و ئاڵۆزیدایە، تۆمەتی بێبنەما دەدەنە پاڵ ترەمپ.

سەرۆكی كۆریای باكور داوای بەهێزتركردنی هێزی ئەتۆمیی وڵاتەكەی و ئامادەكاری بۆ شەڕ دەكات و دەشڵێت هاوكاری سێقۆڵی نێوان ئەمریكا و كۆریای باشوور و ژاپۆن مەترسیدارە.

ئاژانسی یونهاب بڵاویكردووەتەوە، كیم جۆنگ ئون سەرۆكی كۆریای باكوور لە وتارێكدا لە كۆنگرەی فەرماندەكانی كەتیبە و راهێنەرانی سیاسی سوپای میللی وڵاتەكەی كە لە ماوەی 10 ساڵی رابردوودا یەكەم جارە بەڕێوەبچێت، رایگەیاند: "پێویستە فەرماندە سەربازییەكان هەموو سەرنجیان لەسەر بەهێزتكردنی بێسنوری هێزە ئەتۆمییەكان چڕ بكەنەوە ئامادەكارییەكانیش بۆ شەڕ تەواو بكەن، چونكە نەیاران و دوژمنانی كۆریای باكوور بەو ئاراستەیە لە ئامادەكاریدان".

وتیشی، هاوپەیمانی و هاوكاری سێقۆڵی لە نێوان ئەمریكا و كۆریای باشوور و ژاپۆن مەترسیدارە و هەڕەشە لە ئاسایش و سەقامگیری لە نیمچەدورگەی كۆریا و پێویستە بەرەنگاریان ببنەوە.

سەرۆكی ئەمریكا  گڵۆپی سەوزی بۆ ئۆكراین هەڵكرد بۆ بە كارهێنانی موشەكی دوور مەودا و پێكانی ئامانج لە قوڵایی خاكی روسیا، روسیاش دەڵێت ئەو هەنگاوە رێگا خۆشكەردەبێت بۆ هەڵگیرساندنی جەنگی سێیەمی جیهانی.

پێگەی ئەكسیۆس لە زاری بەرپرسانی ئەمریكاوە بڵاویكردووەتەوە، جۆ بایدن سەرۆكی ئەمریكا سێ رۆژ لەمەوبەر سەرۆكی ئۆكراینی ئاگاداركردتەوە، كە وڵاتەكەی رێگایان پێدەدات بۆ بەكارهێنانی موشەكی دوور مەودا لە قوڵای روسیادا ، وتیشی، پاڵنەڕی ئەو بڕیارەی ئەمریكا ئاگاداركردنەوەیە بۆ كۆریای باكور تا هێزی زیاتر رەوانەی روسیا نەكات بۆ بەشداریكردن لە جەنگی ئەو وڵاتە لەگەڵ ئۆكراین.

ئەو بەرپرسانی ئەمەریكا ئاماژەیان بەوەشكردوە، ئەگەر هێزەكانی كۆریای باكور لە كورسك بكرێنە ئامانج، ڕەنگە پیۆنگ یانگ پێداچوونەوە بە بڕیارەكەیدا بكات بۆ ناردنی هێزی زیاتر بۆ روسیا و بەم شێوەیەش شكست بە هێرشەكانی روسیا دەهێنرێت بۆ ئۆكراین.

لەبەرانبەردا لیۆنید سلۆتسكی سەرۆكی لیژنەی كاروباری دەرەوە لە دۆمای دەوڵەتی روسیا، ڕایگەیاند، ئەو بڕیارەی ئەمریكا ئاڵوزی زیاتر بەدوای خۆیدا دەهێنێت و رێگا خۆشكەردەبێت بۆ هەڵگیرساندنی جەنگی سێیەمی جیهانی.

كوڕەكەی دۆناڵد ترەمپ كۆمپانیا پیشەسازییە بەگرییەكانی ئەمریكا بەوە تۆمەتبار دەكات كە هەوڵی هەڵگیرساندنی جەنگی جیهانی دەدەن پێش ئەوەی باوكی لە پۆستەكەی دەسبەكارببێت.

دۆناڵد ترەمپ جۆنیۆر كوڕی دۆناڵد ترەمپ سەرۆكی هەڵبژێردراوی ئەمریكا رایگەیاند، كۆمەڵگە پیشەسازییە سەربازییەكان و كۆمپانیا پیشەسازییە بەرگرییەكانی ئەمریكا لەسەر ئاستی جیهان رۆڵێكی خراپ دەگێرن و بوونەتە مەترسی لەسەر ئاسایش و ئارامی جیهان و هەوڵ بۆ ئەوە دەدەن جەنگێكی گەورەی جیهانیی هەڵبگیرسێنن پێش ئەوەی دۆناڵد ترەمپ لە مانگی یەكی ساڵی داهاتوودا بەڕەسمی وەك سەرۆكی ئەمریكا دەستبەكارببێت.

ئەو لێدوانەی كوڕەكەی ترەمپ لە كاتێكدایە بەپێی راپۆرتە رۆژنامەوانییەكان، جۆ بایدن سەرۆكی ئەمریكا رێگەی بە ئۆكراین داوە مووشەكە درێژ مەوداكانی ئەمریكا بۆ لێدان لە قوڵایی روسیا بەكاربهێنێت، ترەمپیش بەڵێنیداوە دوای بەرەسمی دەستبەكاربوونی وەك سەرۆكی ئەمریكا، هاوكارییەكانی وڵاتەكەی بۆ ئۆكراین كەم بكاتەوە و هەوڵی كۆتاییهێنان بە شەڕ بدات.

سەرۆك كۆماری سوریا لەگەڵ وەزیری بەرگری ئێران كۆبووەوە و جەختیكردەوە، لەناوبردنی تیرۆریستان بەرپرسیارێتییەكی هەرێمی و نێودەوڵەتییە.

ئاژانسی سانا بڵاویكردەوە، بەشار ئەسەد سەرۆك كۆماری سوریا لە دیمەشق پێشوازیكردووە لە عەمید عەزیز نەسر زادە وەزیری بەرگری ئێران و لە دیدارەكەدا، تاوتوێی دۆسییەكانی بەرگری و ئەمنی لە ناوچەكە كراوە.

هەر لە دیدارەكەدا، گفتوگۆكرا لەبارەی هەماهەنگییەكانی نێوان هەردوو وڵات بۆ بەرەنگاربوونەوەی تیرۆریستان و هەڵوەشاندنەوەی ژێرخانی، كە خزمەت بە سەقامگیری و ئاسایشی ناوچەكە دەكات.

لە بەشیكی تری دیدارەكەدا، ئەسەد جەختلەوەكردەوە لەناوبردنی تیرۆریستان بەرپرسیارێتییەكی هەرێمی و نێودەوڵەتییە، چونكە مەترسییەكانی هەڕەشەیە بۆ سەر تەواوی گەلانی جیهان.