جیهان
بەهۆی كەوتنەخوارەوەی فڕۆكەیەك بەسەر باڵەخانەیەكی بازرگانیدا لە ئەمریكا لانیكەم ٢٠ كەس بوونە قوربانی.
پۆلیسی ویلایەتی كالیفۆرنیا بلاویكردەوە، فڕۆكەیەكی بچوك بەهۆكارێكی نەزانراو لەسەر كارگەیەكی دروستكردنی مۆبیلیات كەوتۆتەخوارەوە، بەهۆیەوە دوو كەس گیانیان لەدەستداوەو نزیكەی ٢٠ كەسی تریش برینداربوون.
٢٠٠ كەس لەو كارگەیە كاریان کردووە
پۆلیس ئاماژەی بەوەشكردووە، لێكۆڵەران هێشتا نازانن ئەو دوو كوژراوە سەرنشینی فڕۆكەكە بوون یان كرێكاری ئەو كارگەیەن كە فڕۆكەكە خۆی پێدا كێشاوە، لە كاتێكدا نزیكەی ٢٠٠ كەس لە نێو كارگەكە كاریان كردووە.
رووداوێكی دیکە لەهەمان شوێن ڕوویداوە
بەپێی دیمەنەكانی دوای رووداوەكە، كونێكی گەورە لەسەر بانی كارگەكە دروستبووەو دوكەڵ و ئاگری لێ بەرز بووەتەوە.
هاوكات مانگی تشرینی دووەمی رابردووش رووداوێكی هاوشێوە لەنزیك هەمان شوێن ڕوویداوە و بەهۆیەوە دوو كەس برینداربوون.
سوپای ئیسرائیل دانی بەوەدا نا كە لەرێگەی تیمێكی ١٠٠ سەربازییەوە، چوار مانگ لەمەوبەر هێرشیان كردووەتە سەر شوێنێكی تایبەت بە بەرهەمهێنانی موشەكی زیرەك لە سوریا.
سوپای ئیسرائیل بڵاویكردەوە، ئۆپەراسیۆنەكە لە هەشتی ئەیلولی ٢٠٢٤ لە ناوچەی مەسیاف لە قوڵایی خاكی سوریا بە پشتیوانی ئاسمانی و فڕۆكەی بێفڕۆكەوان و فڕۆكەی جەنگی و كەشتییە دەریاییەكان ئەنجامدراوە، ئامانجەكەش شوێنێكی ژێرزەمینی بووە، كە بە پرۆژەیەكی تایبەت و پێشكەوتوو دادەنرا بۆ پڕچەككردنی گروپە چەكدارەكانی نزیك لە ئیران لە سنوری نێوان سوریا و ئیسرائیل.
بەپێی دان پێدانانەكەی سوپای ئیسرائیل، ئەو شوێنەی بە ئامانج گیراوە تایبەت بووە بە بەرهەمهێنانی موشەكی دوور هاوێژ و ئەو موشەكە زیرەكانەی كە لە پێكانی ئامانجەكانیاندا ورد و زیرەكن.
روانگەی سوری رایگەیاند، لە شەڕوپێكدادانەكانی رۆژی پێنج شەمممەی نێوان شەڕڤانانی هەسەدە و گروپە چەكدارەكاندا لە دەوروبەری مەنبەج، 23 چەكدار كوژراون.
روانگەی سوری بۆ مافەكانی مرۆڤ لە سوریا لە راگەیەنراوێكدا رایگەیاند، وەك وەڵامدانەوەیەك بۆ تۆپباران و بۆردومانەكانی رۆژی پێنج شەممەی توركیا بۆسەر ناوچەكانی باكور و رۆژهەڵاتی سوریا، هێزەكانی ئەنجومەنی سەربازی مەنبج كە سەر بە هێزەكانی سوریا دیموكرات هەسەدەن چەند دژە هێرشێكیان ئەنجامداوە و لە ئەنجامدا 23 چەكداری گروپە چەكدارەكانی نزیك لە توركیا كوژراون.
روانگەكە راشیگەیاند، هەر لەو شەڕانەدا ئەندامێكی هێزەكانی ئەنجومەنی سەربازی مەنبج كوژراوە.
ئاماژەی بەوەشكراوە، شەڕوپێكدادانی توند لە دەوروبەری گوندەكانی عەتشانە و مەستەها، لە باشووری منبج بەردەوامە، هێزەكانی توركیا بە فڕۆكەی بێفڕۆكەوان و تۆپی قورس ناوچەكە بۆردومان دەكەن.
پۆلیسی فیدراڵی ئەمریكا رایگەیاند، هیچ پەیوەندییەك لە نێوان هێرشەكەی نیوئۆرلیانز و تەقینەوەی ئۆتۆمبێلەكەی تێسلا لە لاس ڤێگاس نییە.
سەرۆكی نوسینگەی لێكۆڵینەوەی پۆلیسی فیدراڵی ئەمریكا ناسراو بە ئێف بی ئای رایگەیاند، دوای تەواوكردنی لێكۆڵینەوەكانیان گەیشتوونەتە ئەو ئەنجامەی كە هیچ پەیوەندییەكی یەكلاكەرەوە لە نێوان هێرشەكەی نیوئۆرلیانز و تەقینەوەكەی لاس ڤێگاسدا كە لە یەك رۆژدا روویاندا و بەهۆیانەوە لانیكەم 15 كەس گیانیان لەدەستدا.
كریستۆڤەر ڕیا، سەرۆكی نوسینگەی لێكۆڵینەوەی فیدراڵی ئاماژەی بەوەشكرد، هێرشەكەی نیوئۆرلیانز بە تەواوی تیرۆریستیی بووەو ئەنجامدەرەكەی پشتیوانی خۆی بۆ داعش ڕاگەیاندوە، بە تەنها خۆشی كارەكەی ئەنجامداوە.
هێڵی فڕۆكەوانی قەتەر دوای نزیكەی ١٣ ساڵ گەشتەكانی بۆ دیمەشقی پایتەختی سوریا دەستپێدەكاتەوە و رۆژی سێ شەممەی داهاتووش یەكەم گەشت ئەنجام دەدرێت.
هێڵی ئاسمانی قەتەر بڵاویكردەوە، لە نزیكەوە لەگەڵ لایەنە پەیوەندیدارەكان كاردەكەن بۆ دڵنیابوون لەوەی كە هەموو ستانداردە پێویستەكانی سەلامەتی و ئاسایش و دەستپێكردنەوەی گەشتەكان لە فڕۆكەخانەی دیمەشق جێبەجێ دەكرێن.
قەتەر دوای روخانی حكومەتی ئەسەد، دووهەم وڵات بوو لە دوای توركیا باڵیۆزخانەی خۆی لە سوریا كردەوە، لە كاتێكدا پێشتر و تاكو كاتی روخانی رژێمی ئەسەد یەكێك بوو لەو وڵاتانەی كە وەكو نەیاری ئەسەد مابووەوە.
لەلایەكی ترەوە ئاژانسی هەواڵی فەلەستین بڵاویكردەوە، دەسەڵاتی فەلەستینی لە كەناری رۆژئاوا پەخشی كەناڵی ئەلجەزیرەی قەتەری بەشێوەیەكی كاتیی راگرتووە.
دەسەڵاتدارانی فەلەستین هۆكاری راگرتنی كاری جەزیرەیان بۆ بڵاوكردنەوەی بابەتی نادروست و هاندان بۆ توندوتیژیی گەراندووەتەوە.
رۆژنامەی "زە سەن"ی بەریتانی ، هەوڵی تیرۆركردنی بەشار ئەسەدی سەرۆكی هەڵاتووی سوریای لە رێی ژەهر خواردكردنەوە ئاشكرا كرد .
رۆژنامەی زە سەنی بەریتانی لە زاری لێپرسراوانی ئەمنی روسیاوە بڵاویكردووەتەوە، رۆژی یەكشەممەی رابردوو هەوڵی تیرۆركردنی بەشار ئەسەد سەرۆكی هەڵاتووی سوریا لە روسیا دراوە لە رێی ژەهرخواردكردنییەوە و لەو رۆژەوە رەوشی تەندروستی ئەسەد تێكچووە و داوای یارمەتی پزیشكی كردووە.
ئاماژەی بەوە شکردووە، لە ئێستادا تەندروستی ئەسەد باش نییە و بە توندی دەكۆكێت تارادەی خنكان.
رۆژنامەکە ئەوەشی خستووەتە روو، هەرچەندە تاوەکو ئێستا پزیشكەكان حاڵەتی ژەهرخواردنەكەی ئەسەدیان یەكلا نەكردووەتەوە، بەڵام نیشانەكانی ئەوە دەردەخەن كە هۆكاری تێكچوونی تەندروستی ئەسەد ژەهرخواردکردنییەتی.
بەشار ئەسەد، سەرۆکی دیکتاتۆری رژێمی پێشووی سوریا، کە لە ٨ی مانگی ١٢ی رابردوودا بەرەو روسیا هەڵات و رژێمەکەی رووخا، بە چەند رۆژێک دوای هەڵاتنەکەی روسیا ئاماژەی بەوەکرد ئەسەد لە وڵاتەکەیان مافی پەنابەری پێدراوە.
بە بەشداری سەرجەم پێكهاتەكان ، لە ناوەراستی ئەم مانگەدا دەسەڵاتی نوێی سوریا كۆنگرەی گفتوگۆی نیشتمانی ساز دەكات.
بەپێی زانیارییەكانی ئاژانسی ئەنادۆڵ، دەسەڵاتی نوێی سووریا پلانی هەیە بە بەشداری هەزار كەس لە سەرجەم پێكهاتەكانی ئەو وڵاتە، كۆنگرەی گفتوگۆی نیشتمانیی لە ناوەڕاستی ئەم مانگەدا ساز بكات.
لەلایەكی تریشەوە ئەمرۆ وەفدێكی باڵای حكومەتی نوێی سوریا بە سەرۆكایەتی وەزیری دەرەوە و بەرگری ئەو وڵاتە گەیشتە سعودیە و ئەم سەردانەش بەیەكەم سەردانی رەسمی بەرپرسانی نوێی ئیدارەی سوریا دادەندرێت لەدوای روخانی بەشار ئەسەد.
ئەمریكا بنكەیەكی سەربازی لە شاری كۆبانێی رۆژئاوای كوردستان دادەمەزرێنێت و شەڕ و پێكدادانی نێوان هێزەكانی سوریای دیموكرات و گروپە چەكدارەكانی هاوپەیمانی توركیاش بەردەوامە.
پەیامنێری كوردسات نیوز رایگەیاند، ئەمریكا بڕیاریداوە بنكەیەكی سەربازی لە شاری كۆبانێ بكاتەوە و چاودێری ئاگربەستی نێوان توركیا و هێزەكانی سوریای دیموكرات ناسراو بە هەسەدە بكات.
دەشڵێت، شەڕ و پێكدادانی نێوان هەسەدە و گروپە چەكدارەكانی نزیك لە توركیا لە بەنداوی تشرین و پرسی قەرەقۆزاق بەردەوامە.
ئەوەش لەكاتێكدایە، دوێنێ ئاژانسی هەواڵی فرانس پرێس لە زاری بەرپرسێكی هێزەكانی سوریای دیموكراتیك هەسەدە بڵاویكردوەتەوە كۆبونەوەی ئەحمەد شەرع سەرۆكی ئۆپەراسیۆنە سەربازییەكانی سوریا، لەگەڵ وەفدی هەسەدە ئەرێنی بوە و تاوتوێی پێگەی كورد و هێزەكانیان لە سوریای داهاتوودا كراوە .
لە روداوێکی دیکەی تەقەکردندا لە ئەمریکا ١٠ کەس برینداربوون، کە ئەوە سێیەم روداوی گوماناوییە لەماوەی کەمتر لە ٢٤ سەعاتدا لە ویلایەتە جیاوازەکانی ئەمریکا روبدات.
میدیاکانی ئەمریکا بڵاویانکردەوە، لە نزیک سەعات ١١ و ٢٠ خولەکی شەودا روداوێکی تەقەکردن لە نزیک یانەیەکی شەوانەدا رویداوە لە نیو یۆرک، کە بەهۆیەوە ١٠ کەس بریندار بوون.
پۆلیسی نیو یۆرک باسی لەوەکردووە، هیچ کام لە بریندارەکان دۆخی تەندروستییان ناجێگیر نییە، لەئێستادا گواستراونەتەوە بۆ نەخۆشخانە و چارەسەری پێویست وەردەگرن.
ئەمە سێیەم رووداوی گوماناوییە لەماوەی کەمتر لە ٢٤ کاتژمێردا لە ئەمریکا رووبدات، شەوی رابردووش ئۆتۆمبێلێکی تێسلا لەبەردەم هۆتێل تڕەمپدا تەقییەوە و میدیاکان باس لەوەدەکەن، پێدەچێت شۆفێرەکە گیانی لەدەستدابێت و حەوت کەسی دیکەش بریندارن.
پێش ئەوەش، ئۆتۆمبێلێک خۆی کرد بەناو یەکێک لە ئاهەنگەکانی کە بۆ سەری ساڵ رێکخرابوو و دواتر دابەزیبوو تەقەی کردبوو، بەهۆیەوە ١٠ کەس گیانیان لەدەستدا و زیاتر لە ٣٠ کەسی دیکەش بریندار بوون.
هەریەک لەو دوو روداوە بە کردەوەی تیرۆرستی ناویان هێنرا و ئێستاش گومان دەکرێت، ئەمە لە زنجیرەی ئەو دوو روداوەی پێشوودا بێت و ئەوەش گومانی لای بەرپرسان دروست کردووە.
ئێران رایگەیاند، ئامادەن بۆ ئاسایكردنەوەی پەیوندیەكانیان لەگەڵ سوریا بەڵام ئەوە بەستراوە بە هەڵسوكەتەكانی ئیدارەی نوێ ئەو وڵاتەوە.
عەلی لاریجانی، ڕاوێژكاری ڕێبەری باڵای شۆڕشی ئیسلامیی ئێران لە چاوپێكەوتنێكی تەلەفزیۆنیدا رایگەیاند ، ئەگەر هەڵسوكەوتی پارتی دەسەڵاتدار لە سوریا عەقڵانی بێت، ئەوا ئەوان هیچ كێشەیەكیان نییە و پشتیوانی پارتی دەسەڵاتدار لە سوریا دەكەن، وتیشی دەیانەوێت سوریای نوێ بێتە وڵاتێكی دیمكراسی بۆ هەموو پێكهاتەكانی .
راشیگەیاند،دەسەڵاتدارانی نوێ ئەگەر بیانەوێت حوكمڕانی سوریا بكەن، پێویستە سەرەتا یەكپارچەیی خاكەكانیان بپارێزن.
هاوكات، محەمەد عەلی ناعینی وتەبێژی سوپای پاسدارانی ئێران ڕایگەیاند ، لە ئێستادا ٢٣ گروپی ئۆپۆزسیۆن لە سوریا هەن و ئەمەش وایكردووە كە پێكهێنانی حكومەت لەو وڵاتە ئاسان نەبێت .
وەفدێكی باڵای حكومەتی نوێی سوریا بە سەرۆكایەتی وەزیری دەرەوە و بەرگری ئەو وڵاتە گەیشتە سعودیە و ئەم سەردانەش بەیەكەم سەردانی رەسمی بەرپرسانی نوێی ئیدارەی سوریا دادەندرێت لەدوای روخانی بەشار ئەسەد.
وەفدەكەی سوریا پێكهاتبون لە ئەسعەد شێبانی وەزیری دەرەوە و مەرهەف ئەبو قەسرە وەزیری بەرگری و بەرپرسی دەزگای هەواڵگری سوریا، چونی وەفدەكەی سوریاش بۆ سعودیە لەسەر داوای ریاز بووە.
هاوكات لەسەر سەردانەكە ، وەزیری دەرەوەی سوریا بەمیدیاكانی وتوە، ئەم سەردانە دەبێتە سەرەتای لاپەڕەیەكی نوێ لە پەیوەندییە دوو قۆڵییەكانی نێوان سوریا و سعودیە.
ئەوەش لەكاتێكدایە، پێشتر ئەحمەد شەرع سەرۆكی دەستەی تەحریر شام رایگەیاند، سعودیە رۆڵێكی گەورە دەبینێت لە سوریا و لەبونیادنانەوەی وڵاتەكەدا پشتی پێدەبەستن، وتیشی سەقامگیریی لە سوریا كاریگەریی ئەرێنی لەسەر سعودیە و ناوچەكە دادەنێت.
دوای ئەوەی بەرەبەیانی دوێنێ لە لاس ڤێگاس، ئۆتۆمبێلێکی تێسلا لەبەردەم هۆتێل تڕەمپدا تەقییەوە، میدیاکان زانیاری نوێ لەزاری بەرپرسانی ئەو وڵاتەوە ئاشکرا دەکەن.
سەعات ٨:٤٠ خولەکی بەرەبەیانی دوێنێ بەکاتی ئەمریکا، لەبەردەم هۆتێل تڕەمپ لە لاس ڤێگاس ئۆتۆمبێلێکی جۆری سایبرتراکی تێسلا تەقییەوە و باس لەوەدەکرێت ئەگەری هەیە شۆفێرەکەی گیانی لەدەستدابێت، بەڵام بە رەسمی حەوت کەس برینداربوون.
کیڤن ماکماهێل سەرۆکی پۆلیسی لاس ڤێگاس باسی لەوەکردووە، دوای ئەوەی گەیشتوونەتە سەر روداوەکە راستەوخۆ دەستیان بە لێکۆڵینەوە کردووە، ئۆتۆمبێلەکە نزیکەی سەعات ٧ و ٣٠ خولەکی بەیانی لە کۆلۆرادۆوە بەرەو لاس ڤێگاس هاتووە و دوای نزیکەی یەک سەعات، لەبەردەم هۆتێل تڕەمپدا وەستاوە و پاش ماوەیەکی کەم تەقیوەتەوە.
شۆفێرەکە پێشتر بە بەردەم هۆتێلەکەدا تێپەڕیوە
کامێراکانی چاودێری ئەوە دەردەخەن، شۆفێرەکەی سەعاتێک بەر لە رووداوەکە بە بەردەم هۆتێلەکەدا تێپەڕبووە و دوات گەڕاوەتەوە و لەبەردەم هۆتێلەکەدا وەستاوە.
پۆلیسی لاس ڤێگاس باس لەوەدەکەن، لەکاتی تەقینەوەی ئۆتۆمبێلەکەدا چەند هاوەن و یارییەکی ئاگرین لە ئۆتۆمبێلەکەدا بووە و ئەوانیش تەقیونەتەوە و گڕیان گرتووە.
ماکماهێل ئاماژەی بەوەکردووە، تەقینەوەکە نەبووەتە هۆی شکانی شوشەی دەرگا و پەنجەرەکانی پێشەوەی هۆتێلەکە.
سوپاسی ئیلیەن مەسکی بەڕێوەبەری جێبەجێکاری تێسلاشی کرد بەهۆی ئەوەی زۆر هاوکاریان بووە و زانیاری ورد و زیاتری پێداون لەوەی کە پێویستیان بووە لەسەر ئۆتۆمبێلەکە. هەروەها زانیاری تەواوی داونەتێ لەسەر ئەو وێستگانەی ئۆتۆمبێلە تێسلاکە پاترییەکەی تێدا شەحن کردووەتەوە، بەئامانجی ئەوەی چی زووترە ناسنامەی شۆفێرەکە ئاشکر بکەن.
ئەو روداوەی لاس ڤێگاس لەدوای چەند کاتژمێرێک هات لە روداوەکەی ویلایەتی نیو ئۆرلیانز، کە کەسێک بە ئۆتۆمبێلەوە خۆی کرد بە ئاهەنگێکی سەری ساڵدا و دواتریش دابەزی تەقەی کرد، کە بەهۆیەوە ١٥ کەس گیانیان لەدەستدا و زیاتر لە ٣٠ کەسیش برینداربوون. دواتریش ئەو روداوە بە کردەوەیەکی تیرۆرستی ناوهێنرا.
لەبارەی روداوەکەشەوە جۆو بایدنی سەرۆکی ئەمریکا باسی لەوەکرد، لێکچوونێک هەیە لەنێوان هەردوو روداوەکەدا و لێکۆڵینەوەکان دەستیان پێکردووە. وتیشی، "ئەو روداوانە کردەوەیەکی قێزەونن".
ئێستا گومانەکان لەسەر ئەوەن تەقینەوەی تێسلاکەش روداوێکی تیرۆرستی بێت و پەیوەندی بە هەمان روداوی ویلایەتی نیو ئۆرلیانزەوە هەبێت.
لەبارەی روداوەکەوە ئیلۆن مەسک ئاماژەی بەوەکرد، پێدەچێت کردەوەیەکی تیرۆرستی بووبێت، تەقینەوەی ئۆتۆمبێلەکەی تێسلا پەیوەندی بە خودی ئۆتۆمبێلەکەوە نەبووە، بەڵکو دڵنیاین لەوەی کە چەندین یاری ئاگرین و تەقەمەنی و هاوەن لە سندوقی ئۆتۆمبێلەکەدا هەڵگیراون و ئەوانە هۆکارەکەی بوون.
هۆتێڵ تڕەمپ یەکێکە لەو شوێنانەی سەر بە 'دامەزراوەی تڕەمپ'ـە، کە خاوەندارێتییەکەی دەگەڕێتەوە بۆ دۆناڵد تڕەمپی سەرۆکی هەڵبژێردراوی ئەمریکا، ئیلۆن مەسکیش یەکێکە لەو کەسانەی زۆرترین پشتیوانی تڕەمپی کردووە لە بوونەوە بە سەرۆکی ئەمریکا.
توركیا گرێ سپی و گوندێكی لە دەوروبەری بەنداوی تشرین تۆپبارانكرد و لە هەرێمی تەبقەش كارگەیەكی شەكری كردە ئامانج.
توركیا بەردەوامە لە بۆردومانكردنی رۆژئاوای كوردستان لەو چوارچێوەیەشدا، سوپای توركیا و گروپە چەكدارەكان گوندێكی لە رۆژئاوای گرێ سپی و گوندی بیرحەسۆی لە دەوروبەری بەنداوی تشرین_یان تۆپباران كرد، بە فڕۆكەی بێفڕۆكەوانیش لە شاری دێر حافر سەر بە كانتۆنی تەبقە كارگەیەكی شەكری بۆردوومانكرا و بەهۆیەوە زیانی زۆری ماددی بە كارگەكە گەیشت.
لەلایەكی تریشەوە لە بەرانبەر هێرشەكانی توركیا و گروپە چەكدارەكان بۆ سەر بەنداوی تشرین و پردی قەرەقۆزاخ، ژنانی ئەنجومەنی سەربازیی سەرێكانی، لە چالاكییەكدا سیستمی راداری لە بنكەی سەربازیی توركیا لە گوندی مێناكس لە سەرێكانی تێكشكاند.
لە ویلایەتی نیو ئۆرلینز لە ئەمریکا ئۆتۆمبێلێک خۆی کردووە بەناو ئاهەنگێکدا، بەهۆیەوە ١٠ کەس گیانیان لەدەستدا و ٣٠ کەسی دیکەش برینداربوون.
بەپێی هەواڵی میدیاکان، روداوەکە لە سەعات ٣ و ١٥ خولەکی بەرەبەیان بە کاتی ناوخۆی ئەمریکا رویداوە، کە ئاهەنگەکە بۆ سەری ساڵ رێکخرابوو و هێشتا هۆکاری روداوەکە نەزانراوە.
میدیاکان باس لەوەش دەکەن، دوای روداوەکە شۆفێری ئۆتۆمبێلەکە دابەزیوە و دەستیکردووە بە تەقەکردن بەناو خەڵکدا.
لە ئێستادا ئەو کەسانەی برینداربوون بۆ نەخۆشخانە گواستراونەتەوە و چارەسەری پزیشکی وەردەگرن.
دوای ١٣ ساڵ، شەوی رابردوو بولگاریا و رۆمانیا پەیوەستبوونیان بە ناوچەی شنگنەوە راگەیاند و ئەوەش رێگە بە هاوڵاتیانی نێوان ئەو دوو وڵاتە دەدات، بە ئازادی هاتوچۆ بکەن.
لە مانگی ئازاری ئەمساڵدا، ئەو دوو وڵاتە بەشێک لە پابەندبوونی خۆیان بە ناوچەی شنگنەوە ئاشکراکرد، کە بەوهۆیەشەوە پشکنینی سنوورییان لە فڕۆکەخانە و بەندەرەکانیاندا هەڵوەشاندەوە، ئەوەش بەر لەوەی رێککەوتن بکەن لەگەڵ وڵاتانی دیکەدا بۆ سنوورە وشکانییەکانیان.
لەدوای رێککەوتنی بولگاریا و رۆمانیاوە وڵاتانی ناوچەی شنگن بۆ ٢٩ وڵات زیاد دەکەن، کە دانیشتووانەکانیان دەتوانن بە ئازادی لەنێوان ئەو وڵاتانەدا هاتوچۆ بکەن.
هەریەک لە بولگاریا و رۆمانیا لە ریزی وڵاتە هەژارەکانی یەکێتی ئەوروپا دادەنرێن و ئێستاش چاوەڕوانیان لەبارەی ئەو پرسە کۆتایی پێهات و هەردوولایان پەیوەستبوونیان بە ناوچەی شنگنەوە بەدەستهێنا.
ناوچەی شنگن گەورەترین ناوچەی بێ ڤیزایە لە جیهاندا، وڵاتانی ناوچەی شنگن سنوورەکانی نێوانیان لابردووە و ئەو کەسانەی خەڵکی وڵاتانی دەرەوەی ناوچەی شنگنن پێویستە بە ڤیزا و رێگەپێدانی ئاسایش(ETIAS) وەربگرن بۆ ئەوەی بتوانن سەردانی ناوچەی شنگن بکەن.
ئەو کەسەشی داواکاری ڤیزای شنگن پێشکەش دەکات، پێویستە داواکژاری ئاڕاستەی باڵیۆزخانە یان کونسوڵخانەی ئەو وڵاتە بکات کە دەیەوێت گەستی بۆ بکات و بە بەڵگە بیسەلمێنێت، مەبەستی سەردانەکەی چییە، بڕی تێچووی گەشتەکەی ئامادەکردووە و بەڵێننامە پڕ بکاتەوە کە بەر لە بەسەرچوونی ماوەی ڤیزاکەی ناوچەی شنگن جێدە‌هێڵێت.
بۆ یەكەمجار ئەحمەد شەرع لەگەڵ وەفدێكی هەسەدە لە دیمەشق كۆبووەوە، هەسەدەش دەڵێت كۆبونەوەكە ئەرێنی بووە.
ئاژانسی هەواڵی فرانس پرێس لە زاری بەرپرسێكی هێزەكانی سوریای دیموكراتیك هەسەدە بڵاویكردوەتەوە كۆبونەوەی ئەحمەد شەرع سەرۆكی ئۆپراسیۆنە سەربازییەكانی سوریا، لەگەڵ وەفدی هەسەدە ئەرێنی بوە و تاوتوێی پێگەی كورد و هێزەكانیان لە سوریای داهاتوودا كراوە .
ئەو بەرپرسەی هەسەدە كە ناوەكەی ئاشكرا نەكراوە، ئاماژەی بەوەشكردوە كە كۆبونەوەكە رۆژی دووشەممە لە دیمەشقی پایتەخت كراوە، ئەوەش هەنگاوێكە بۆ بەردەوامبونی كۆبونەوەكانی نێوان كورد و دەسەڵات لە دیمەشق.
كۆبونەوەكەی شەرع و هەسەدە یەكەم كۆبونەوەیە لەدوای روخانی رژێمی بەشار ئەسەد لە سوریا ئەنجام بدرێت، پێشتریش ئەحمەد شەرع جەختی لەسەر ئەوە كردبوەوە كە كورد پێكهاتەیەكی سەرەكی دەبن لە سوریای نوێ.