وەزارەتی کارەبای حکومەتی هەرێمی کوردستان رایگەیاند سیستەمی نوێی دیجیتاڵی وەزارەتی کارەبا لە هۆبەی فرۆشیاری وزەی گەرمیان، دەربەندینخان، دوکان، چەمچەماڵ و سەیدسادق کە نزیکەی 280,000 هاوبەش سوودی لێدەبینن دەکەوێتە کار.

وەزارەتی کارەبا دەڵێت؛ سیستەمە نوێیە لە هۆبەکانی فرۆشیاری وزە لە سەرانسەری هەرێمی کوردستان یەکدەخرێت و سوودی دەبێت لە راییکردنی مامەڵەی هاووڵاتیان و پڕۆسەی پسوولەکردن و پارەدان لەڕێگەی سەکۆی پارەدانی دیجتاڵی ئی-پسوولە بەشێوەیەکی خێراتر و ئاسانتر.

ئاماژەی بەوەکردوە،ئەم هەنگاوە دوای ئەوەدێت، کە پێشووتر هەمان سیستم لە هۆبەکانی فرۆشیاری هەولێر، سلێمانی، دهۆک، زاخۆ، هەڵەبجە، راپەڕین، سۆران، کۆیە و خەبات جێبەجێکرا و رەنگدانەوەی چاکسازییەکانی پڕۆژەی روناکییە.

کەشناسی هەرێم بڵاویکردوەتەوە، ئاسمان بەگشتی لەنێوان  ساماڵ و پەڵە هەوردا دەبێت  و ئەمڕۆش  پلەکانی گەرما بەراورد بە دوێنێ  نزمدەبنەوە.

ئەمڕۆ دووشەممە، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، ئەمڕۆ پلەکانی گەرما دوو بۆ سێ پلە نزمدەبنەوە بەراورد بە تۆمارکراوەکانی دوێنێ و ئاسمانیش ساماڵ دەبێت.

کەشناسی ئاماژەی بەوەشکردوە، رۆژی سێ شەممە بە پیچەوانەوە، پلەکانی گەرما روو لە بەرزبونەوە دەکەنو  دوو بۆ سێ پلە بەراورد بە تۆمارکراوەکانی ئەمڕۆ بەرزدەبنەوە.

بەرزترین پلەکانی گەرمای پێشبینیکراو بە پلەی سیلیزی بۆ رۆژی سێشەممە

هەولێر: 38 پلەی سیلیزی

پیرمام: 34 پلەی سیلیزی

سلێمانی: 36 پلەی سیلیزی

چەمچەماڵ: 37پلەی سیلیزی

دهۆک: 37 پلەی سیلیزی

زاخۆ: 38 پلەی سیلیزی

هەڵەبجە : 37 پلەی سیلیزی

حاجی ئۆمەران : 25 پلەی سیلیزی

گەرمیان : 40 پلەی سیلیزی

بەڕێوەبەرایەتی گشتی گەشتوگوزاری هەڵەبجە، شریتی سوری لە 25 شوێن داوە و چەند شوێنێکی دیکەشی سزاداوە.

بەڕێوەبەرایەتی گشتی گەشتوگوزاری هەڵەبجە رایگەیاندووە: ئەمڕۆ بە بڕیاری ئەندازیار چیا قاسم، بەڕێوەبەری گشتی گەشتوگوزاری هەڵەبجە، لیژنەیەکی تایبەتی بەڕێوەبەرایەتی گشتیمان بە هاوکاری بەڕێوەبەرایەتی ئاسایشی پارێزگای هەڵەبجە و یاریدەدەریەتی ئاسایشی خورماڵ، لە هاوینە هەواری ئەحمەدئاوا - سەرچاوەی زەڵم، زیاتر لە 25 شوێن شریتی سوریان لێدرا و چەن شوێنێکیش سزا دران کە مەرج و رێنماییەکانیان جێبەجێ نەکردبوو.

گەشتوگوزاری هەڵەبجە دەشڵێت: ئەم هەڵمەتە سبەینێش بەردەوام دەبێت و چەندین شوێنی دیکە شریتی سوریان لێدەدرێت .

وەزارەتی تەندروستی هەرێم، بڕیارێکی دەرکردووە سەبارەت بە وەرگرتنی نەخۆش و حاڵەتی فریاکەوتن و بریندار لە نەخۆشخانەکانی کەرتی گشتی و تایبەت و تێیداهاتووە، "لەکاتی رەوانەکردنی نەخۆش لە نەخۆشخانەیەک بۆ نەخۆشخانەیەکی دیکە، پێویستە هەموو نەخۆشخانەیەک لە کەرتی گشتی و کەرتی تایبەت بە ئەرکی وەرگرتنی نەخۆش هەڵبستێت و دەستبەجێ کاری پێویستی بۆ ئەنجام بدات".

وەزارەتیتەندروستی هەرێم، رایگەیاندووە: لەکاتی رەوانەکردنی نەخۆش لە نەخۆشخانەیەک بۆ نەخۆشخانەیەکی دیکە، بە تایبەت نەخۆشانی فریاکەوتن و باری ناجێگیر و چاودێری چڕ، وەزارەتی تەندروستی جەخت لە بڕیارێک دەکاتەوە کەوا پێویستە هەموو نەخۆشخانەیەک لە کەرتی گشتی و کەرتی تایبەت بە ئەرکی وەرگرتنی نەخۆش هەڵبستێت و دەستبەجێ کاری پێویستی بۆ ئەنجام بدات.

وەزارەتی تەندروستی دەشڵیت: نابێت نەخۆش رەتبکرێتەوە یان وەرنەگیرێت بەبیانووی نەبوونی شوێن یان نەبوونی چاودێری چڕ یان بەبیانووی ئەوەی کەوا نەخۆش لەباری بێ ئومێدی و بێ هیوایی چارەسەر دایە یان هەر بیانووێکی دیکەی وەک نەبوونی خەرجی پێویست، ئەوا پێویستە نەخۆش وەربگیرێت لەکاتی هەرکێشەیەکدا پێویستە ڕەچاوی مافی نەخۆش بکرێت و چارەسەر بکرێت، بەپێچەوانەوە ڕێکاری یاسای بەرامبەر سەرپێچیکاران وەردەگیرێت.

پۆلیسی گەرمیان، ژنێکی بە تۆمەتی دزینی نزیکەی نۆ ملیۆن دینار لە ماڵێکدا دەستگیرکرد و لە ماوەی دوو سەعاتدا دەستی بەسەر بەشێک لە پارە دزراوەکەدا گرت.

بەڕێوەبەرایەتی پۆلیسی گەرمیان رایگەیاند، مەفرەزەکانی بەشی پۆلیسی نەهێشتنی تاوانی گەرمیان توانیویانە لە ماوەی تەنها دوو سەعاتدا، ژنێک بە تۆمەتی دزینی بڕی هەشت ملیۆن و 500 هەزار دینار دەستگیربکەن.

پۆلیسی گەرمیان ئاماژەی بەوەکردووە، دەستگیرکردنی تۆمەتبارەکە دوای ئەوە هات کە شەوی رابردوو هاووڵاتییەکی دانیشتووی گەڕەکی مامۆستایانی قەزای کەلار سکاڵای یاسایی تۆمارکرد کە ئەو بڕە پارەیەی لە ناو ماڵەکەیدا لێدزراوە.

ئەوەشی خستەڕوو، دوای پشکنینی ماڵی تۆمەتبارەکە، هێزەکانی پۆلیس توانیویانە دەست بەسەر پێنج ملیۆن دینار لەو پارە دزراوەکەدا بگرن، لە ئێستاشدا تۆمەتبارەکە دانی بە تاوانەکەیدا ناوە.

پۆلیسی گەرمیان ئاشکراشیکرد، تۆمەتبارەکە بەپێی مادەی 443 لە یاسای سزادانی عیراقی و بە بڕیاری دادوەر راگیراوە، لێکۆڵینەوەی وردیش لەگەڵیدا بەردەوامە.

قوباد تاڵەبانی پرسەنامەیەک ئاڕاستەی مامۆستا سەلاحەدین محەمەد بەهائەدین دەکات رایدەگەیەنێت: بە بیستنی هەواڵی کۆچی دوایی (م. حسێن محەمەد بەهائەدین)، برای بەڕێزتان، زۆر دڵگران و خەفەتبار بووین.

دەقی پرسەنامەکەی قوباد تاڵەبانی جێگری سەرۆکی حکومەتی هەرێمی کوردستان......

بەڕێز: مامۆستا سەلاحەدین محەمەد بەهائەدین، ئەمینداری گشتیی یەکگرتووی ئیسلامیی کوردستان

بە بیستنی هەواڵی کۆچی دوایی (م. حسێن محەمەد بەهائەدین)، برای بەڕێزتان، زۆر دڵگران و خەفەتبار بووین. لە قوڵایی دڵەوە هاوخەمیی خۆمان ئاراستەی جەنابتان و هەموو خانەوادە و کەسوکاری بەڕێزتان دەکەین.

لە خوای گەورە داواکارین گیانی کۆچکردوو بخاتە بەر میهرەبانی خۆی و بە بەهەشتی بەرینی شاد بکات، سەبووری و ئارامییش بە جەنابتان و هەموو لایەک ببەخشێت.

ئەمرۆ وردبینكردن لە لیستی موچەی مانگی 6ی فەرمانبەرانی هەرێم لە بەرێوەبەرایەتی گەنجینەكان تەواو دەكرێت و لە ماوەی 72 سەعاتدا رەوانەی بەغداد دەكرێت.

بەپێی دوایین ئەو زانیاریانەی دەست پەیامنێری كوردسات نیوز كەوتوو،  تا بەیانی ئەمرۆ لە بەرێوەبەرایەتی گەنجینەكان وردبینی كردن لە لیستی موچەی مانگی 6 ی فەرمانبەرانی هەرێم كۆتایی نەهاتووە، بەڵام دوانیوەرۆی ئەمرۆ وردبینی تەواو دەبێت و لیستی موچە رەوانەی وەزارەتی دارایی هەرێم دەكرێـت.

بەپێی سەرچاوەكانی كوردسات نیوز، لە ماوەی 72 سەعاتدا لیستەكە رەوانەی وەزارەتی دارایی عیراق دەكرێت كە لەلایەن تیمێكی وەزارەتی دارایی هەرێمەوە دەبرێتە بەغداد بۆ ئەوەی هەر تێبینیەك هەبێـت تیمەكە رونكردنەوە بدەن.

بافڵ جەلال تاڵەبانی، پەیامێکی هاوخەمی ئاڕاستەی مامۆستا سه‌ڵاحه‌دین محەمەد به‌هائه‌دین دەکات و دەڵێت: هەواڵی کۆچی دوایی مامۆستا حسێنی برای بەڕێزتان، دڵگران و غەمباری کردین.

دەقی پەیامەکەی بافڵ جەلال تاڵەبانی سەرۆکی یەکێتیی نیشتمانیی کوردستان...

بەڕێز/ مامۆستا سه‌ڵاحه‌دین محەمەد به‌هائه‌دین، ئەمیندارى گشتیی یه‌كگرتووى ئیسلامى كوردستان

هەواڵی کۆچی دوایی مامۆستا حسێنی برای بەڕێزتان، دڵگران و غەمباری کردین.

بۆ ئەم خەمە پرسە و سەرەخۆشی ئاڕاستەی بەڕێزتان و بنەماڵە سەربەرزەکەتان دەكەین و هاوبەشی خەمتانین.

لە خوای گەورە داواكارین، گیانی كۆچكردوو بە بەهەشتی بەرین شادبكات، ئارامی و سەبووری بە هەموو لایەک ببەخشێت.

بەپێی گۆڕانکارییە نوێیەکانی کەشوهەوا، لە سەعاتەکانی داهاتوودا پلەکانی گەرما لە سەرانسەری هەرێمی کوردستان روو لە نزمبوونەوە و کەشوهەوا فێنک دەبێت.

بەڕێوەبەرایەتی گشتی کەشناسی و بوومەلەرزەزانی هەرێم پێشبینییەکانی کەشوهەوای 48 سەعاتی داهاتووی راگەیاند و ئاماژە بەوەدەکات، بەپێی لە سبەینێوە پلەکانی گەرما روو لە نزمبوونەوە دەکەن.

کەشناسی هەرێم رایگەیاند، ئەمڕۆ ئاسمان بە گشتی ساماڵ و پەڵە هەور دەبێت، لە کاتەکانی دوای نیوەڕۆدا خێرایی با زیاد دەکات، هەروەها پلەکانی گەرما نزیک دەبێت لە تۆمارکراوەکانی دوێنێ، بەڵام لە ناوچە شاخاوییەکان کەمێک نزم دەبێنەوە.

ئەوەشی خستەڕوو، سبەینێ ئاسمان ساماڵ و پەڵە هەور دەبێت، لە هەندێک کات و ناوچەدا دەگۆڕێت بۆ نیمچە هەور.

کەشناسی هەرێم راشیگەیاند، پلەکانی گەرما بە جیاوازی دوو بۆ سێ پلەی سیلیزی بە بەراورد بە ئەمڕۆ نزم دەبنەوە.

بەرزترین پلەکانی گەرمای پێشبینیکراو بە پلەی سیلیزی

هەولێر: 35 پلەی سیلیزی

پیرمام: 31 پلەی سیلیزی

سلێمانی: 31 پلەی سیلیزی

چەمچەماڵ: 34 پلەی سیلیزی

دهۆک: 32 پلەی سیلیزی

زاخۆ: 33 پلەی سیلیزی

حاجی ئۆمەران : 23 پلەی سیلیزی

گەرمیان: 39 پلەی سیلیزی

پۆلیسی سلێمانی دەستگیرکردنی تۆمەتبارێکی لە قەزای شارەزور راگەیاند، کە بڕێکی زۆر گەنمی هاووڵاتییەکی دزیبوو و دەستیش بەسەر ئەو ئۆتۆمبێلەدا گیرا کە تاوانەکەی پێ ئەنجامدرابوو.

بەڕێوەبەرایەتی پۆلیسی پارێزگای سلێمانی رایگەیاند، مەفرەزەکانی بنکەی پۆلیسی شارەزور تۆمەتبارێکیان دەستگیرکردووە کە بڕێکی زۆر گەنمی هاووڵاتییەکی دزیبوو، لە ئێستاشدا دەستبەسەر گەنمە دزراوەکە و ئەو ئۆتۆمبێلەشدا گیراوە کە تاوانەکەی پێ ئەنجامدرابوو.

پۆلیسی سلێمانی ئاماژەی بەوەکردووە، دەستگیرکردنی تۆمەتبارەکە دوای ئەوە هات کە هاووڵاتییەک سکاڵای یاسایی تۆمارکرد، پاش وەرگرتنی بڕیاری دادوەر و دەستپێکردنی لێکۆڵینەوەکان، توانرا تۆمەتبارەکە کە پیاوێکی لەدایکبووی ساڵی 1986ـە بدۆزرێتەوە و دەستگیربکرێت.

پۆلیسی سلێمانی ئەوەشی خستەڕوو، تۆمەتبارەکە لە ئێستادا بەپێی مادەی 446 لە یاسای سزادانی عیراقی و بە بڕیاری دادوەر راگیراوە و لێکۆڵینەوەکان لەگەڵیدا بەردەوامن.

هاوکات لەگەڵ وەرزی دروێنە و کۆکردنەوەی بەرهەمە کشتوکاڵییەکان، پۆلیسی سلێمانی داوا لە هاووڵاتیان و جووتیاران دەکات کە زیاتر ئاگاداری خەرمان و بەرهەمەکانیان بن، لە کاتی بوونی هەر گومانێکیشدا دەستبەجێ پەیوەندی بە بنکەکانی پۆلیس یان هێڵە گەرمەکانی هێزە ئەمنییەکانەوە بکەن.

بە بەشداری زیاتر لە  117 هەزار خوێندكاری قۆنای 12ی ئامادەیی، تاقیكردنەوەكانی كۆتایی لە هەرێم دەستیانپێكرد.

نەژاد عەبدوڵا، بەڕێوەبەری گشتی پەروەردەی سلێمانی، بە كوردسات نیوزی راگەیاند، لە سنوری پەروەردەی سلێمانی زیاتر لە 26 هەزار و 500 خوێندكار مافی بەشداریكردنی تاقیكردنەوەكانیان هەیە.

وتیشی، رێگە بە تیمەكانی راگەیاندن و فۆتۆگرافەران و راگەیاندكاران نادرێت بچنە ناو هۆڵەكانی تاقیكردنەوەكانەوە بۆ ڕوماڵكردن.

وەزارەتی دارایی عیراق، زیاتر لە 41 ملیار دیناری پارەی گەنمی ساڵی رابردووی جوتیارانی هەرێم رەوانە دەكات. 

نەوزاد شێخ كامیل، بەڕێوەبەری گشتیی بازرگانی هەرێم بە كوردسات نیوزی راگەیاند، وەزارەتی دارایی عیراق  بڕی 41 ملیار و 450 ملیۆن دیناری وەك گوژمەی شەشەم خستووەتە سەر هەژماری وەزارەتی بازرگانی هەرێمی كوردستان بۆ دابەشكردنی بەسەر جوتیاراندا، لە سبەینێوە دەستبە رێكارەكان دەكەن و تا كۆتایی ئەم هەفتەیە پارەكە دابەش دەكرێت. 

وتیشی، ئەو بڕە پارەیە بۆ هەریەك لە پارێزگاكانی هەولێر، سلێمانی، دهۆكە و پارێزگای هەولێر بڕی 13 ملیار و 517 ملیۆن دینار، پارێزگای سلێمانی 16 ملیار و 858 ملیۆن دینار، پارێزگای دهۆكیش 10 ملیار و 857 ملیۆن دینار دەبێت.

ئاماژەی بەوەشدا، ئەو بڕە پارەیەی وەزارەتی دارایی عیراق خەرجی كردووە، كۆی پارەی تەواوی گەنمی ساڵی رابردووی جوتیاران نییە و لە داهاتوودا نزیكەی 50 ملیار دیناری تریش بۆ جوتیارانی هەرێمی كوردستان تەرخان دەكرێت.

وەفدێکی یەکێتیی نیشتمانیی کوردستان کە پێکهاتبوون لە بەختیار بەکر و شاخەوان ساڵح میرزا، بەنوێنەرایەتی یەکێتی نیشتیمانی کوردسان، لەسەر بانگهێشتی تایبەتی پارتی کاری هۆڵەندا، لە کۆنگرەی پارتی پێشکەوتوخوازی هۆڵەندا بەشداربوون.

بەختیار بەکر لەبارەی بەشداربوونیان لە کۆنگرەکەدا رایگەیاند، کۆنگرەکە جیاوازترە لە کۆنگرە و کۆڕبەندەکانی دیکە و دەچێتە مێژوو، لەبەر ئەوەی کۆنگرەی یەکگرتنی دوو پارتی سەرەکی و رەسەنی خاوەن پێگەی سیاسی و جەماوەرین.

وتیشی، یەکێتی بەو پێیەی دەستە خوشکی پارتی کار بووە و پارتە نوێیەکەش جێگرەوەی پارتی کار دەبێت، بڕیاریانداوە لە کۆڕبەندە جیهانییەکاندا کە یەکێتیش تیایاندا ئەندامە، درێژە بە خەبات بدەن و وەکو پارتێکی سۆسیال دیموکراتی پێشکەوتوخواز دەمێنەوە.

سبەینێ لە سەرتاسەری هەرێمی كوردستان تاقیكردنەوەكانی پۆلی 12ی ئامادەیی بە بەشداری زیاتر لە  117 هەزار خوێندكار لە بەشەكانی وێژەیی، زانستی و پیشەیی دەستپێدەكەن و هێڵەكانی ئینتەرنێتیش بۆ ماوەی سەعاتێك رادەگیرێن.
نەژاد عەبدوڵا، بەڕێوەبەری گشتی پەروەردەی سلێمانی، بە كوردسات نیوزی راگەیاند، لە سنوری پەروەردەی سلێمانی زیاتر لە 26 هەزار و 563 خوێندكار مافی بەشداریكردنی تاقیكردنەوەكانیان هەیە.
هاوشێوەی ساڵانی رابردوو، لەسەر بڕیاری وەزارەتی پەروەردە، هێڵەكانی ئینتەرنێت بۆ ماوەی سەعاتێك دەبڕێن، هاوكات بەكارهێنانی مۆبایل لە خوێندكاران، سەرپەرشتیارانی هۆڵەكانی تاقیكردنەوە قەدەغەدەكرێت.
هاوكات پەروەردەی سلێمانی دەڵێت، رێگە بە تیمەكانی راگەیاندن و فۆتۆگرافەران و راگەیاندكاران نادرێت بچنە ناو هۆڵەكانی تاقیكردنەوەكانەوە بۆ ڕوماڵكردن.
بۆ ئەمساڵ 117 هەزار و 142 خوێندكار و 19 هەزار و 403 مامۆستا و فەرمانبەر بەشداری پرۆسەكە دەكەن، رۆژی 8ی تەمووزیش كۆتایی بە تاقیكردنەوەكان دێت.

پەروەردەی سلێمانی لەبارەی روماڵکردنی ساتی ئەنجامدانی تاقیکردنەوەکانی پۆلی 12 راگەیەنراوێکی بڵاوکردووەتەوە و تێیدا ئاماژەی بەوەداوە کە بۆ لەمەودوا، روماڵکردنی تاقیکردنەوەکان قەدەغە دەبێت. 

نەژاد عەبدوڵا، بەڕێوەبەری گشتیی پەروەردەی سلێمانی رایگەیاند، بە هیچ شێوەیەک رێگە بە تیمی کەناڵەکان، فۆتۆگرافەران و راگەیاندکاران نادرێت بچنە ناو هۆڵەکانی تاقیکردنەوەکانەوە بۆ روماڵکردن.

ئاماژەی بەوەشداوە، ئەم بڕیارە لەپێناو پاراستنی ئارامی و سەقامگیری پرۆسەی تاقیکردنەوە گشتییەکانی پۆلی 12ـی ئامادەیی و بە مەبەستی فەراهەمکردنی کەشێکی لەبارە بۆ خوێندکاران.

وتیشی، ​"داوا لە سەرجەم دەزگاکانی راگەیاندن دەکەین هاوکارمان بن لە سەرکەوتنی ئەم پرۆسە نیشتمانییە و رێز لە تایبەتمەندی و ئارامی هۆڵەکان بگرن، هەر کەمتەرخەمییەک لە جێبەجێکردنی ئەم رێنماییانەدا، لێپرسینەوەی یاسایی بەدوای خۆیدا دەهێنێت".

عیراق بڕی 400 هەزار تۆن گەنم لە هەرێم وەردەگرێت و لەو بڕەش 292 هەزار تۆنی دەچێتە چوارچێوەی پلان و هەرتۆنێكیش بە 700 هەزار دینار وەردەگیرێت.

نەوزاد كامیل بەڕێوەبەری گشتیی بازرگانیی لە وەزارەتی بازرگانی هەرێم لە كۆنفرانسێكی رۆژنامەوانیدا رایگەیاند، بۆ ئەمساڵ حكومەتی عیراق بڕی 400 هەزار تۆن گەنم لە جوتیارانی هەرێمی كوردستان وەردەگرێت.

وتیشی، لەو بڕە 292 هەزار تۆنی دەچێتە چوارچێوەی پلان و هەرتۆنێكیش بە 700 هەزار دینار وەردەگیرێت، بڕی 108 هەزار تۆنیش بە 500 هەزار دینار لە جوتیاران وەردەگیرێت.

نەوزاد كامیل ئاماژەی بەوەکرد، دەبێت جوتیاران پێش هێنانی گەنمەكەی نۆرەی ئەلیكترۆنی تۆمار بكات و ناوی خۆی و شۆفێری بارهەڵگرەكەشی تۆمار بكات، بۆئەوەی هەر جوتیارێك لە كات و وادەی خۆیدا گەنمەكەی لێوەربگیرێت.