کوردستان
کونسوڵخانەی گشتیی ئەمریکا لە هەرێمی کوردستان، پیرۆزبایی لە هاندەرانی یانەی وەرزشی زاخۆ دەکات بەبۆنەی بەدەستهێنانی خەڵاتی "باشترین هاندەر"ـی رێکخراوی فیفا بۆ ساڵی 2025.
کونسوڵخانەکە لە پەیامەکەیدا ئاماژەی بەوەشکردووە، جامی جیهانیی ساڵی 2026 گەورەترین پاڵەوانێتی دەبێت لە مێژووی فیفادا، کە تێیدا 48 هەڵبژاردە بەشداری دەکەن.
باس لەوەش کراوە، لە جامەکەدا 11 شاری ئەمریکا میوانداریی 78 یاری دەکەن و یاری کۆتایی لە یاریگای "مێت لایف" لە نیویۆرک بەڕێوەدەچێت.
بەپێی راگەیەندراوەکە، ئەو رووداوە مێژووییە هاوکات دەبێت لەگەڵ 250ـەمین ساڵیادی سەربەخۆیی ئەمریکا و دەرفەتێک دەبێت بۆ نیشاندانی توانای میوانداریی ئەو وڵاتە.
بەڕێوەبەرایەتی گشتی کەشناسی و بومەلەرزەزانی هەرێمی کوردستان رایگەیاند، بەهۆی کاریگەری نزمە پەستانێک لە باشوری عیراق، خێرایی با لە چەند ناوچەیەک رووی لە زیادبوون کردووە.
بەپێی راگەیەندراوەکەی کەشناسی، کاریگەری ئەو شەپۆلە بەشێوەیەكی سەرەکی لە ناوچەکانی باشوری عیراق و باشوری هەرێمی کوردستان دەرکەوتووە، بەتایبەت لە ئیدارەی سەربەخۆی گەرمیان، چەمچەماڵ و پارێزگای کەرکوک.
ئاماژە بەوەشکراوە، خێرایی با لەو ناوچانە گەیشتووەتە 40 کیلۆمەتر لە سەعاتێکدا و پێشبینی دەکرێت کاریگەرییەکەی تا درەنگانی ئەمشەو بەردەوام بێت.
مەکتەبی پەیوەندییەکانی یەکێتیی نیشتمانیی کوردستان لە شاری هەولێر، لەگەڵ وەفدێکی باڵای حزبی ئیشتراکی کوردستان (PSK) کۆبووەوە و هەردوولا پشتیوانی خۆیان بۆ پرۆسەی ئاشتی لە باکوری کوردستان دووپاتکردەوە.
سالار لالە سەرحەد، لە مەکتەبی پەیوەندییەکانی یەکێتی رایگەیاند، ئەمڕۆ چوارشەممە 17ی کانونی یەکەم، لە بارەگای مەکتەبی سیاسی لە هەولێر پێشوازییان کردووە لە وەفدێکی PSK بە سەرۆکایەتی بایرم بۆزیل، سەرۆکی ئەو حزبە.
ئاماژەی بەوەشکرد، لە کۆبوونەوەکەدا هەردوولا هاوڕابوون لەسەر گرنگیی هەنگاوەکانی بەرەوپێشبردنی پرۆسەی ئاشتی و یەکێتیی نیشتمانیی کوردستان جەختی کردووەتەوە، کە هەمیشە پشتیوانی کۆتاییهێنان بە شەڕ و دەرەنجامە وێرانکەرەکانی بووە و خوازیاری بەرپاکردنی ئاشتییە لە تورکیا و باکوری کوردستان.
بافڵ جەلال تاڵەبانی، سەرۆکی یەکێتی لە رۆژی ئاڵادا، رایگەیاند ئاڵاکەمان ناسنامەمانە، هێمای مانەوە و قوربانیدان و خۆڕاگریمانە، ئێمە بە رۆحی خۆمان پارێزگاری لێدەکەین، دەشڵێت؛ لەم رۆژەدا دەبێت هەمووان جیاوازییەکان قبوڵ بکەن و کار بۆ بونیادنانی داهاتوویەکی گەشتر بکرێت.
سەرۆکی یەکێتی ئاماژەی بەوەشکردوە، بە رێزەوە یادی هەموو ئەو شەهیدانەمان دەکەینەوە کە لەپێناو سەرفرازی و شەکاوەیی ئاڵاکەماندا شەهیدبوون و جەختیشدەکاتەوە لەوەی پێویستە هەموومان جیاوازییەکان قبوڵ بکەین و کار بۆ بونیادنانی داهاتوویەکی گەشتر بۆ خەڵکە خۆشەویستەکەمان بکەین.
دەقی پەیامەکەی سەرۆکی یەکێتی
ئاڵاکەمان ناسنامەمانە، هێمای مانەوە و قوربانیدان و خۆڕاگریمانە، ئێمە بە رۆحی خۆمان پارێزگاری لێدەکەین.
ئەمڕۆ بە رێزەوە یادی هەموو ئەو شەهیدانەمان دەکەینەوە کە لەپێناو سەرفرازی و شەکاوەیی ئاڵاکەماندا شەهیدبوون.
لە رۆژی ئاڵای کوردستاندا ئەوە بیر دەهێنمەوە پێویستە هەموومان جیاوازییەکان قبوڵ بکەین و کار بۆ بونیادنانی داهاتوویەکی گەشتر بۆ خەڵکە خۆشەویستەکەمان بکەین.
بەرز و پیرۆزبێت رۆژی ئاڵای کوردستان.
بافڵ جەلال تاڵەبانی
سەرۆکی یەکێتیی نیشتمانیی کوردستان
شێخ جەعفەر شێخ مستەفا، بەبۆنەی رۆژی ئاڵاوە پەیامێکی بڵاوکردوەتەوە و تێیدا پیرۆزبایی لە کەسوکاری شەهیدان و پێشمەرگەکانی کوردستان دەکات و ئومێدیشی خواستوە بیری نیشتمانپەروەری بکەن بە قەڵغان بۆ بە شکۆ راگرتنی ئەم ئاڵایەی، کە قەوارەی هەرێمی کوردستانی لە سایەیدا بنیاتنراوە.
دەقی پەیامەکەی جێگری سەرۆکی هەرێم
پەیامی جێگری سەرۆکی هەرێم بە بۆنەی ڕۆژی ئاڵای کوردستانەوە
لەم بۆنە پڕ شکۆیەدا کە ڕۆژی ئاڵای کوردستانە، پیرۆزباییەکی گەرم لە کەسوکار و بنەماڵەی شەهیدان و پێشمەرگە قارەمانەکان و گشت کوردستانیانی ئازیز دەکەم.
ئومێدەوارم بیری نیشتیمانپەروەری بکەین بە قەڵغان بۆ بە شکۆ ڕاگرتنی ئەم ئاڵایەی کە قەوارەی هەرێمی کوردستانی لە سایەدا بنیاتنراوە، با گووتارەکانمان تەنها بۆ ڕازاندنەوەی بۆنەکان نەبێت و ڕەنگبداتەوە لە نێو کایەی سیاسی و بەرەوپێشچوونی حوکمڕانیەکی دیموکراسییانە و خۆشگوزەرانی بۆ کۆمەڵانی خەڵکی کوردستان. لەگەڵ ئەوەشدا ئەمڕۆ لە هەموو کات زیاتر پێویستیمان بە یەکڕیزی و یەکدەنگییە بۆ بەدەستهێنانی مافه دەستوورییەکانمان لە عێراقدا.
درود و سڵاو لە گیانی پاکی ئەو شەهیدانەی، کە لەپێناو ئاڵا و خاکی پیرۆزی کوردستاندا گیانیان بەخشی.
شێخ جەعفەر شێخ مستەفا
جێگری سەرۆکی هەرێمی کوردستان
ئەمڕۆ چوارشەممە، رێکەوتی 17-12-2025 لە هەرێمی کوردستان رۆژی ئاڵایە، کە بۆنەیەکی نیشتمانییە و ساڵانە چەندین چالاکیی جۆراوجۆر بەو هۆیەوە رێکدەخرێت.
لە هەرێمی کوردستان، بە بڕیاری پەرلەمان، 17ی كانونی یەكەمی ههموو ساڵێك، به رۆژی ئاڵا دیاریكراوه ، کە لەو رۆژەدا، جگە لەوەی لە سەرجەم دام و دەگاکانی حکومەت کاتێک تەرخان دەکرێت بۆ بەرز راگرتنی ئاڵای کوردستان، چەندین چالاکی چۆراوجۆری تریش ئەنجامدەدرێت.
مێژوی ئاڵای کوردستان
ئاڵای کوردستان مێژووەکەی زیاتر لە سەد ساڵە، بۆ یەکەمجار ئاڵاى کوردستان لە ساڵى 1920 و لە کۆنفرانسى ئاشتى لە پاریس ناسێنرا، لەلایەن سەرکردەکانى جوڵانەوەى ناسیۆنالیزمى ئەوکاتە (خۆیبون)، لەوکاتەوە ئاڵاى کوردستان بوەتە رەمز بۆ نەتەوەی کورد و بە درێژایی ئەو ماوەیەش چەندین گۆڕانکاری بەسەردا هاتووە، ئەم ئاڵایەی ئێستای حکومەتی هەرێمی کوردستان، هەمان ئەو ئاڵایەیە کە 79ساڵ پێش ئێستا و کەمێک گۆرانکاری تێدا کراوە، کە لە ڕۆژی 22-1-1946 لە رێوڕەسمی راگەیاندنی کۆماری کوردستان لە گۆڕەپانی چوارچرای مەهاباد بۆ یەکەمجار و بە رەسمی ئاڵای کوردستان بەرزکرایەوە و بوو بە رەمزی کۆماری کوردستانی ئەو کات.لە هەرێمی کوردستانیش بە بڕیاری پەرلەمان و 26 ساڵ پێش ئێستا، لە ساڵی 1999 دا بە بڕیارێکی تایبەت، ئەم ئاڵایەی ئێستای بە ئاڵای رەسمی هەرێمی کوردستان دیاری کرد.
پەیامی ئاڵای کوردستان و ماناکەی
هەموو ئاڵایەک لە جیهاندا، جگە لەوەی بۆ ناسینەوەی وڵات یان هەرێمێک یاخود نەتەوەیەکە، چەند پەیامێکیشی لەپشتەوەیە و ئاڵای کوردستانیش جگە لە جوانییەکەی چەندین پەیامی مرۆڤانە و ژیاندۆستی لەپشتەوەیە.
ئاڵای کوردستان لە چوار رەنگی سەرەکی پێکدێت، کە سور، سپی، سەوز و خۆرێکیش لە ناوەڕاستیدایە، رەنگە سورەکە مانای خوێنی شەهیدانە و سپییەکەش بە مانای ئاشی دێت، رەنگە سەوزەکەش هێمایە بۆ سروشتی جوانی کوردستان.
خۆرەکەش، کە لە ناوەراستیی ئاڵاکەدایە، لە 21 تیشک پێکدێت و قەبارەی هەموویان وەک یەکە و ئەو 21 تیشکەش ئاماژەیە بۆ ڕۆژی 21ی ئازار، کە نەورۆزە و سەرەتای ساڵی کوردییە.
بۆچی ئەمڕۆ کراوە بە رۆژی ئاڵا؟
لە هەرێمی کوردستان، لە ساڵی 2004وە، پەرلەمانی کوردستان بە بڕیاری ژمارە 48 رۆژی 17 کانونی یەکەمی هەموو ساڵێکی وەک رۆژی بەرز راگرتن و هەڵکردنی ئاڵا دیاری کردوە.
دیاریکردنى ئەم رۆژەش هاوکاتە لەگەڵ روخانی کۆماری کوردستان لە مەهاباد، کە ئەمڕۆ 79 ساڵی بەسەردا تێدەپەڕێت و لەو رۆژەدا ئاڵای کۆمارەکە داگیرا.
ئاڵای کوردستان؛ شکۆی نەتەوەیەک
ئاڵای کوردستان، کە شکۆی نەتەوەیەکە، هەموو ساڵێک لەم رۆژەدا، کە رۆژی ئاڵای کوردستانە، لە سەرجەم دامودەزگا حکومییەکان کاتێک دیاری دەکرێت بۆ بەرز رگرتنی ئاڵای کوردستان.
هەروەها بە لەبەرکردنی جلی کوردی و ئەنجامدانی چەندین چالاکی هونەری و کلتوری و جۆراوجۆر تر، کە تایبەتن بە ئێستا و مێژویی دێرینی کورد، جارێکی تر میلەتی کورد دووبارە خۆشەویستیی و پەیمانی نەتەوەیی و ئاشتی و ژیانی هاوبەش دەگەیەننە تەواوی جیهان.
لەسەر داوای وەزیری رۆشنبیری و لاوانی حکومەتی هەرێم، ئەنجومەنی وەزیران رەزامەندی دەربڕی بۆ لێخۆشبوونی ٪50ی قەرزی سەر کەناڵەکانی راگەیاندن.
ئەنجومەنی وەزیرانی هەرێم بڵاویکردەوە، لەسەر داوای وەزیری ڕۆشنبیری و لاوان، سەرۆکایەتی دیوانی ئەنجومەنی وەزیرانی هەرێمی کوردستان بە نووسراوێک، رەزامەندی دەربڕی لەسەر لێخۆشبوون بە رێژەی ٪50ـی سەر قەرزی کەناڵەکانی راگەیاندن.
بەپێی داتاکانی وەزارەتی رۆشنبیری و لاوان، لە کۆی 176 کەناڵی بیستراو، 132 کەناڵ قەرزارن و لە کۆی 126 کەناڵی بینراو 94 کەناڵیان قەرزارن، واتە لە کۆی 302 کەناڵ، 226 کەناڵیان قەرزارن.
بەپێی بڕیارەکە، کەناڵەکانی راگەیاندن دەبێت لە ماوەی مانگێکدا قەرزەکەیان بگێڕنەوە بۆ گەنجینەی گشتیی بۆ ئەوەی ئەو بڕیارە بیانگرێتەوە و نیوەی ئەو قەرزە بخرێتە بەر لێخۆشبوونەوە، بە پێچەوانەوە، دواتر سزای دواکەوتن دەکەوێتە سەر قەرزەکانیان.
خانمی یەکەمی عیراق پیرۆزبایی لە یانەی زاخۆ دەکات و دەڵێت: بۆ هەموو جیهانتان سەلماند کە ئەو پشتگیری و پاڵنەرە بەهێزەن کەنهێنی سەرکەوتنی وەرزشیی و هاندەری داهێنان و یەکدەنگیی و تەبایین.
دەقی پەیامی پیرۆزبایی خانمی یەکەمی عیراق بۆ یانە و هاندەرانی زاخۆ....
ئەی جەماوەرە وەفادارەکەی یانەی زاخۆ، پڕ بەدڵ پیرۆزبایی بەدەستهێنانی خەڵاتی باشترین هاندەری جیهانتان لێ دەکەم.
بۆ هەموو جیهانتان سەلماند کە ئەو پشتگیری و پاڵنەرە بەهێزەن کەنهێنی سەرکەوتنی وەرزشیی و هاندەری داهێنان و یەکدەنگیی و تەبایین.
هیوادارم ئەم دەستکەوتە وەرزشییە ببێتە مایەی بەهێزکردنی برایەتی و خۆشەویستی و ناوی گەلەکەمان لەجیهاندا بدرەوشێنێتەوە.
ئەمڕۆ وەزیری خوێندنی باڵای هەرێم بە بڕی نزیکەی 400 ملیۆن دینار هاوکاری گەیاندە چەمچەماڵ و زانکۆی چەرموو، دڵنیایش دەدات هاوکارییەکان بەردەوام دەبێت.
ئەمڕۆ سێشەممە د. ئارام محەمەد وەزیری خوێندنی باڵاو توێژینەوەی زانستی هەرێم بە شێوەیەکی مەیدانی سەردانی قەزای چەمچەماڵی کردو لە کۆبونەوەیەکدا بەئامادەبونی سەرۆکی زانکۆی چەرموو و سەرۆک و راگری سەرجەم زانکۆ و پەیمانگە تایبەتەکانی هەرێمی کوردستان جەختی کردەوە؛ هاتنیان بۆ چەمچەماڵ دڵنیایی دانە بە خەڵکی چەمچەماڵ ئەوان تەنیا نین و هەمومان لە زاخۆوە تا خانەقین بە دڵ و گیان لەگەڵیاندان.
وەزیری خوێندنی باڵا لە کۆبونەوەکەدا کە لە زانکۆى چەرموو بەڕێوەچوو رایگەیاند، بەخۆشحاڵییەوە ئەمرۆ زانکۆ و پەیمانگە تایبەتەکانی هەرێمی کوردستان بڕیاریانداوە هاوکاری دارایی پێشکەش بە خەڵکی چەمچەماڵ و زیانلێکەوتووان بکەن، ئەمەش لای ئەوان جێگەی رێز و پێزانینە بۆ زانکۆ و پەیمانگە تایبەتەکان و وەبەرهێنەرەکانیان، هەروەها لەلایەکی دیکەشەوە وەزارەتی خوێندنی باڵا کەلوپەل و پێداویستی زانستی بۆ زانکۆی چەرموو و پەیمانگەی تەکنیکی چەمچەماڵ دابینکردوەو پێشکەشیان کردوون.
د. ئارام محەمەد جەتیشی کردەووە، زانکۆ و پەیمانگە تایبەتەکان و وەزارەت بە بڕی نزیکەی 400 ملیۆن دینار هاوکاری دارایی و کۆمەک پێشکەش بە زیان لێکەوتووانی چەمچەماڵ و دەوروبەرى و زانکۆی چەرموو دەکەن، بۆ ئەوەی ئەوانیش بەشداربن لەگەڵیان و کەمێک لە ئازار و مەینەتیەکانی زیانلێکەوتووان کەم بکەنەوە.
لەمیانى سەردانە مەیدانییەکەیدا بۆ چەمچەماڵ، د. ئارام محەمەد وەزیرى خوێندنى باڵا و توێژینەوەى زانستى و سەرۆک و راگرى زانکۆ و پەیمانگە تایبەتەکان، لەگەڵ عەتا محەمەد کۆمسیۆنى فریاگوزارى و بوژانەوەى مرۆیی چەمچەماڵ کۆبۆوە، لە کۆبونەوەکەدا وەزیرى خوێندنى باڵا ئاشکرایکرد؛ ئامانج لەم سەردانە گەیاندنى هاوکارى دارایی و کۆمەکى وەزارەتە بە زیان لێکەوتووان و زانکۆى چەرمو و پەیمانگەى تەکنیکى چەمچەماڵ، بۆ ئەمەش بەڵێنى دوپاتکردەوە؛ هاوکارییەکان بۆ چەمچەماڵ و زانکۆى چەرموو بەردەوام دەبێت.
د. لەتیف رەشید سەرۆک کۆماری عیراق پیرۆزبایی لە یانەی زاخۆ و هاندەرانی دەکات بەبۆنەی دەستنیشانکردنی هاندەرانی زاخۆ لەلایەن فیفاوە وەک باشترین هاندەر لەسەر ئاستی جیهان.
دەقی پەیامەکەی سەرۆک کۆمار...........
بەڕێزان سەرۆک و دەستەی کارگێڕی و هاندەرانی یانەی وەرزشیی زاخۆ
پیرۆزباییی گەرمتان لێدەکەین بە بۆنەی دەستنیشانکردنی هاندهرانی دڵسۆزی یانەی زاخۆ لهلایهن فیفاوه وەک باشترین و کاریگەرترین هاندهر لەسەر ئاستی جیهان.
ئەم دەسکەوتە، تەنها سەرکەوتنێک نییە بۆ یانەی زاخۆ، بەڵکوو شانازییە بۆ تەواوی بزووتنەوەی وەرزشی لە هەرێمی کوردستان و عیراق.
هیوای سەرکەوتن بۆ یانەی زاخۆ و سەرجەم یانەکانی کوردستان و عیراق و هاندەرانیان ئەخوازم لە پێناو پێشخستنی وەرزش و چەسپاندنی گیانی ئاشتی و برایەتی لە نێو کۆمەڵانی خەڵکدا.
شاد و سەرکەوتو بن
بافڵ جەلال تاڵەبانی، سەرۆکی یەکێتیی نیشتمانیی کوردستان، لە پەیامێکدا پیرۆزبایی لە هاندەرانی یانەی زاخۆ دەکات بەبۆنەی بەدەستهێنانی خەڵاتی "باشترین هاندەری جیهان" و بە دەستکەوتێکی گرنگ و مێژوویی وەسفی دەکات.
لە پەیامەکەیدا سەرۆکی یەکێتیی نیشتمانیی کوردستان رایگەیاندووە: "لە دڵەوە پیرۆزبایی گەرم لە هاندەرانی یانەی زاخۆ دەکەم بەبۆنەی بەدەستهێنانی خەڵاتی باشترین هاندەرانی جیهان."
بافڵ جەلال تاڵەبانی ئاماژەی بەوە کردووە، ئەم سەرکەوتنە بەرهەمی کۆدەنگی و یەکڕیزیی خەڵکی کوردستان بوو بۆ ئەم یانە ئازیزە، ئەمەش "دەرخەری ئەوەیە بە یەکگرتوویی و پێکەوەییمان دەتوانین سەرکەوتنی گەورە بەدەستبهێنین."
قوباد تاڵەبانی پیرۆزبایی بردنەوەی خەڵاتی "باشترین هاندەری جیهان" لە یانەی زاخۆ دەکات و رایدەگەیەنێت، ئەم دەستکەوتە بەرهەمی هاوسۆزی و یەکدڵیی خەڵکی کوردستانە، هیواش دەخوازێت ئەو یەکدەنگییە بۆ ناو کایەی سیاسیش بگوازرێتەوە.
لە پەیامێکدا قوباد تاڵەبانی رایگەیاند، بردنەوەی خەڵاتی باشترین هاندەر لەسەر ئاستی جیهان، شانازییەکی گەورەیە بۆ یانەی زاخۆ، وەرزشی کوردستان و تەواوی خەڵکی کوردستان، بۆیە لە دڵەوە پیرۆزبایی لە زاخۆی دەلال و هەمووان دەکات.
قوباد تاڵەبانی ئاماژەی بەوە کردووە، شیرینی و خۆشی بردنەوەی ئەم خەڵاتە لەوەدایە کە بەرهەمی هاوسۆزی و پاڵپشتی هەموو خەڵکی کوردستان بوو. دەشڵێت: "گەلی کورد کە بەو هەموو ستەم و سەرکوت و ئازارەی بەسەریدا هاتووە، هەر زیندووە و هەر بەرەوپێش دەچێت، بەرهەمی ئەو هاوسۆزی و یەکدڵییەی خەڵکە."
لە بەشێکی دیکەی پەیامەکەیدا، قوباد تاڵەبانی بەراوردێک لە نێوان خۆشییەکانی زاخۆ و کارەساتە سروشتییەکەی ئەم دواییە دەکات و دەڵێت: "لەم ماوەیەدا هەمووان یەکدڵ و یەکدەنگ پشتیوانیی زاخۆ بوون و ئەمڕۆش لە جەژن و خۆشیی زاخۆییەکاندا بەشدارن، هەروەکچۆن لە ماوەی هەفتەی رابردوودا لە ناخۆشیشدا هەمووان هاوسۆز و پشتیوانیی خەڵکی چەمچەماڵ و گەرمیان بوون."
لە کۆتاییدا قوباد تاڵەبانی هیوا دەخوازێت ئەو هەستە پیرۆزەی هاوسۆزی و هاوچارەنووسی و یەکدەنگییەی لەناو خەڵکی کوردستاندا هەیە، بگوازرێتەوە بۆ ناو سیاسەتیش، چونکە بە وتەی ئەو "ئەمە رێگە دروستەکەیە بۆ ئەوەی گەلەکەمان بەرەو دەستکەوتی گەورەتر هەنگاو بنێت."
بەڕێوەبەرایەتی گشتیی شارەوانییەکانی سلێمانی، فەرمانی دەستبەکاربوونی بۆ هەریەک لە سەرۆکی شارەوانی چەمچەماڵ و ناحیەی شۆڕش دەرکرد، ئەوەش دوای ئەوەی سەرۆکەکانی پێشوو لە پۆستەکانیان بەخشران.
بەپێی فەرمانەکە، عەلی رەئوف وەک سەرۆکی نوێی شارەوانی چەمچەماڵ و هاوکار فازڵ وەک سەرۆکی شارەوانی شۆڕش دەستنیشانکراون و ئەمڕۆ بە رەسمی فەرمانی دەستبەکاربوونیان ئاڕاستە کراوە.
گۆڕانکارییەکان دوای رووداوی لافاوەکەی چەمچەماڵ و شۆڕش دێن، کە بەهۆیەوە بڕیاری بەخشینی هەریەک لە ئارام نەجات، سەرۆکی پێشووی شارەوانی چەمچەماڵ و بورهان ئەمین، سەرۆکی پێشووی شارەوانی شۆڕش لە پۆستەکانیان درا.
وەزارەتی دارایی و ئابووریی حکومەتی هەرێمی کوردستان رایگەیاند، لیستی موچەی مانگی کانوونی یەکەمی فەرمانبەران و موچەخۆرانی هەرێم رەوانەی بەغداد کراوە.
بەپێی راگەیەندراوەکەی وەزارەتی دارایی، ئەمڕۆ سێشەممە (16ی کانوونی یەکەمی 2025)، تیمی تەکنیکی وەزارەت لیستی موچەی مانگی 12ی ئامادەکردووە و رەوانەی بەغدادی کردووە.
بڕیارە سبەی چوارشەممە، لیستەکە بە رەسمی رادەستی فەرمانگەی ژمێریاریی وەزارەتی دارایی حکومەتی فیدراڵ بکرێت، تاوەکو دوای وردبینیکردن دەست بە ناردنی شایستە داراییەکان بکرێت.
هاندەرانی یانەی وەرزشی زاخۆ خەڵاتی "باشترین هاندەری فیفا"یان بۆ ساڵی 2025 بەدەستهێنا، ئەوەش وەک رێزلێنانێک بۆ ئەو دەستپێشخەرییە مرۆییەی کە بۆ پشتیوانی لە منداڵانی نەخۆش ئەنجامیاندا و دەنگدانەوەی جیهانی بەدوای خۆیدا هێنا.
لە پاش ئەو هەوڵو بەشدارییە کارایەی کوردانی ناوە و دەرەوەی وڵات بۆ دەنگدان بە یانەی وەرزشی زاخۆ بۆ بەدەستهێنانی نازناوی باشترین هاندەری جیهان، یانەی زاخۆ توانی ئەو نازناوە بەدەستبهێنێت.
سایتی رەسمی فیفا نووسیوێتی: روداوەکە دەگەڕێتەوە بۆ 13ی ئایاری رابردوو، کاتێک پێش دەستپێکردنی یاری نێوان زاخۆ و یانەی حدود لە خولی ئەستێرەکانی عیراق، هاندەرانی زاخۆ هەزاران بوکەڵە و یاری منداڵانیان هەڵدایە ناو یاریگاوە. ئەو یارییانە دواتر لەلایەن یانەکەوە کۆکرانەوە و بەخشرانە ئەو منداڵانەی کە بەدەست نەخۆشییەوە دەناڵێنن.
یانەی زاخۆ لە راگەیەندراوێکدا ئاماژەی بەوە کردووە: "هەڵدانی یاری منداڵان بۆ ناو یاریگا، گیانێکی مرۆیی نموونەیی نیشاندا کە لەلایەن کۆمەڵگەی وەرزشی کوردستان، عیراق و ئاسیاوە ستایش کرا."
یانەکە جەختی لەوەش کردووەتەوە کە هاندەرانیان بڕبڕەی پشتی تیمەکەن و بەردەوام بە چالاکییە داهێنەرانەکانیان سەرنجی هەمووان رادەکێشن، هیوای خواستووە ئەو پشتیوانییە بەردەوام بێت بۆ بەدەستهێنانی سەرکەوتنی زیاتر.
هاندەرانی زاخۆ دوای کێبڕکێ لەگەڵ دوو کاندیدی دیکە، توانیان خەڵاتەکە بەدەستبهێنن. خەڵاتی هاندەری فیفا لە ساڵی 2016وە دابەش دەکرێت و تایبەتە بەو هاندەر یان گرووپانەی کە پابەندبوونێکی ناوازە یان هەڵوێستێکی کاریگەر لە جیهانی تۆپی پێدا تۆمار دەکەن، بەبێ رەچاوکردنی خول، رەگەز، یان نەتەوە.
کەمێک لەمەوبەر لە پیرمام، کۆبوونەوەی باڵای نێوان وەفدی یەکێتیی نیشتمانیی کوردستان و پارتی دیموکراتی کوردستان دەستیپێکرد، کە ئامانج لێی گەیشتنە بە لێکتێگەیشتنی هاوبەش بۆ قۆناغی داهاتوو.
بەپێی زانیارییەکان، وەفدی یەکێتی پێکهاتوون لە قوباد تاڵەبانی، رێواز فایەق و دەرباز کۆسرەت رەسوڵ، ئەندامانی مەکتەبی سیاسی و ئامانج رەحیم، سکرتێری ئەنجومەنی وەزیران. لە بەرامبەردا وەفدی پارتی لەلایەن هۆشیار زێباری و پشتیوان سادق، ئەندامانی مەکتەبی سیاسی و دڵشاد شەهاب، ئەندامی کۆمیتەی ناوەندییەوە نوێنەرایەتی دەکرێن.
تەوەرەی سەرەکی کۆبوونەوەکە تایبەتە بە گفتوگۆکردن لەسەر هەنگاوە کردەییەکانی پێکهێنانی کابینەی نوێی حکومەتی هەرێم و داڕشتنەوەی بەرنامەی حکومەت، هاوکات پرسی یەکخستنی هەڵوێستی کورد لە بەغداد و پرسە هەنووکەییەکانی دیکە بەشێکی گرنگی گفتوگۆکانی نێوان هەردوولا دەبن.