کوردستان
وەزارەتی دارایی و ئابووری حکومەتی هەرێمی کوردستان سەبارەت بە خەرجنەکردنی موچەی مانگی شوباتی بەشێک لە خانەنشینانی سەربازی سنووری پارێزگای سلێمانی روونکردنەوەیەکی بڵاوکردووەتەوە.
دەقی پەیامەکەی وەزارەتی دارایی
ڕوونکردنەوەیەک لە بەڕێوەبەرایەتی گشتی ژمێرکاری / وەزارەتی دارایی و ئابوورییەوە.
سەبارەت بەخەرج نەکردنی مووچەی مانگی شوباتی بەشێک لە خانەنشینانی سەربازی لەسنووری پارێزگای سلێمانی بە پێویستمان زانی ئەم ڕوونکردنەوەیە بڵاو بکەینەوە.
وەک بەرچاوڕوونییەک بۆ هەموو لایەک زیادکردنی ناوی فەرمانبەر یان خانەنشین یان هەر مووچەخۆرێک لە لیستی مووچەی مانگانە پەیوەندی بەوەزارەتی دارایی و ئابووری هەرێمەوە نییە، بەڵکوو ئەو ڕێکارە پەیوەستە بەوەزارەت و یەکە ژمێریاریەکانی دەرەوەی وەزارەتی داراییەوە.
١- ئەو خانەنشینانە کە ناویان لە لیستی مووچەی مانگی شوبات نییە ژمارەیان لە ٨٠١ کەسە و کەمئەندامی سەنگەرن کە پێشتر لەسەر هێزەکانی ٧٠ مووچەیان بۆ خەرج کراوە، لەچوارچێوەی بڕیاری گواستنەوەی دۆسیەی خانەنشینانی سەربازی لەوەزارەتی پێشمەرگەوە بۆ وەزارەتی دارایی و ئابووریی، بەهۆی تەواو نەبوون و پەسەند نەکردنی دۆسیەکانیان نەتوانراوە لەمانگی شوباتدا داخڵی لیستی مووچە بکرێنەوە، کاتێک لیستی مووچە و دۆسیەکانیان گەیشتووەتە بەڕێوەبەرایەتی خانەنشینی پێشمەرگە لە وەزارەتی دارایی لیستی مووچەی مانگی شوبات لەبەغداد بووە.
٢- لەکاتی وردبینی لە دۆسیەی ئەو خانەنشینانە دەرکەوتووە بەشێکی زۆریان ( upn ) یان نەبووە و بەشێکیشیان وارسن و مامەڵەی وارسیان بۆ نەکرابوو، دوای ئەنجامدانی وردبینی لەلایەن لیژنەیەکی تایبەتەوە ( ٧٥٠ ) خانەنشینیان دۆسیەکانیان پەسەند کراوە و لەلیستی مووچەی مانگی ئازار لەسیستەمی پەیڕۆڵ داخڵ کراونەتەوە و مووچەیان بۆ بەستراوەتەوە، هەر مووچەخۆرێکیش ( upn ) ی نەبێت ناتوانرێت داخڵی سیستەمی پەیڕۆڵ بکرێت کە لە ئێستادا لیستی مووچە بەو سیستەمە ئامادە دەکرێت.
سەبارەت بە شایستەی مووچەی سەرجەم ئەو خانەنشینانەی کە لە چەند مانگی ڕابردوو مووچەکانیان لەلایەن حکومەتی فیدراڵەوە خەرج نەکراوە، وەزارەتی دارایی فیدراڵ دڵنیایی داوە کە ئەو مووچانە وەک شایستەیەک دەمێنێتەوە تا کاتی پەسەندکردنی بوودجە و دواتر هەمووی بەسەریەکەوە خەرج دەکرێتەوە، لە بەرئەوەی لە ئێستادا بوودجە پەسەند نەکراوە و مانگانە تەنها کار بەخەرج کردنی یەک لەسەر دوازدەی ساڵی ڕابردوو دەکرێت.
بەڕێوەبەرایەتی گشتی ژمێرکاری / وەزارەتی دارایی و ئابووری
١٢ ی ئازاری ٢٠٢٦
بەرێوەبەرایەتی پۆلیسی سلێمانی بڵاویکردوەتەوە، کەسیکیان دەستگیرکردوە، کە بەناوی کۆمپانیای پاکەرەوە پارەی لە هاووڵاتییان وەرگرتوە و ئاماژەیان بەوەشکردو دوای دەستگیرکردنی دەستگیراوە بەسەر 150 هەزر دیناریسدا کە لە هاووڵاتییانی وەرگرتوە.
لە راگەەندراویكدا پۆلیسی سلێمانی دەڵێت؛ دوای ئاگادار کردنەوەی مەفرەزەکانی بەشی پۆلیسی فریاکەوتنی بەڕێوەبەرایەتییەکەیان، کە کەسێک لە گەڕەکی زەرگەتەی شاری سلێمانی بەناوی کۆمپانیای پاکەرەوەوە پارەی جەژنانەی لەهاوڵاتیان وەرگرتوو، .دەستبەجێ مەفرەزەکانی بەشی پۆلیسی فریاکەوتن گەیشتنە شوێنەکە.
ئاماژەیان بەوەشکردوە، توانیان تۆمەتبارێک بەناوی (ر، أ، خ) لەدایکبووی (2002)دەستگیربکەن و دەستیشبگرن بەسەر ئەو بڕە پارەیەد، کە لەهاووڵاتیانی وەرگرتبوو، کە بڕەکەی نزیکەی (150) سەدو پەنجا هەزار دینار بووە.
پۆلیسی سلێمانی دەشلێت؛ دوای ئەوەی تۆمەتبار رادەستی بنکەی پۆلیسی بەختیاری کرا، پەڕاوی لێکۆڵینەوەی بۆ روداوەکە کراوەتەوە و لەئێستادا بەبڕیاری بەڕێز دادوەرو بەپێی ماددەی (٢٤٠) لەیاسای سزادانی
بەبۆنەی کۆچی دوایی ساڵح موسلیم سیاسەتمەداری کورد لە رۆژئاوا، شاناز ئیبراهیم ئەحمەد، خانمی یەکەمی عیراق پەیامێکی بڵاوکردەوە و تێیدا هاتووە؛ پرسە و سەرەخۆشی خۆم ئاراستەی گەلی کورد لە رۆژئاڤای کوردستان و سەرجەم کوردستانیان دەکەم بەبۆنەی کۆچی دوایی کەسایەتیەکی مەزنی وەک هەڤاڵ ساڵح موسلیم
شاناز ئیبراهیم ئەحمەد ئاماژەی بەوەشکردوە، برای ئازیزم ساڵح موسلیم شۆڕشگێڕێک بوو کە هیچ کات ماندوو نەدەبوو لە پێناو دۆزی ڕەوای گەلەکەمان و هەموو کات دووبارەی دەکردەوە و دەیوت کورد پێویستە یەک دەنگ و یەکگرتووبن.
دەقی پەیامەکەی شاناز ئیبراهیم ئەحمەد، خانمی یەکەمی عیراق
ساڵح موسلیم شۆڕشگێڕێک لەپێناوی گەلەکەیدا
پرسە و سەرەخۆشی خۆم ئاراستەی گەلی کورد لە ڕۆژئاڤای کوردستان و سەرجەم کوردستانیان دەکەم بەبۆنەی کۆچی دوایی کەسایەتیەکی مەزنی وەک هەڤاڵ ساڵح موسلیم.
برای ئازیزم ساڵح موسلیم شۆڕشگێڕێک بوو کە هیچ کات ماندوو نەدەبوو لە پێناو دۆزی ڕەوای گەلەکەمان و هەموو کات دووبارەی دەکردەوە و دەیوت کورد پێویستە یەک دەنگ و یەکگرتووبن، ئەو هەمیشە جەختی لە ئازادیخوازی و خەباتی مەدەنی دەکردەوە، لەدەستدانی هەڤاڵ موسلیم کۆستێکی گەورەیە بۆ گەلەکەمان لە ڕۆژئاوا بە تایبەتی و هەموو گەلی کورد بەگشتی بەڵام دڵنیاین ڕێبازەکەی و بیروفکری شۆڕشگێرانەی بۆ هەمیشە دەمێنێتەوە داواکارم خوای گەورە ڕۆحی پاکی بە بەهەشتی بەرینی شاد بکات.
شاناز ئیبراهیم ئەحمەد
بە بۆنەی کۆچی دوایی ساڵح موسلیم، سیاسەتمەدەری کورد لە رۆژئاوا، قوباد تاڵەبانی پەیامێکی هاوخەمی بڵاوکردوەتەوە و تێیدا هاتووە؛ گەلی کورد هەرگیز خەبات و ماندووبوونی ئەم سەرکردە مەزنەمان لەبیر ناکات.
ئاماژەی بەوەشکردوە، هەواڵی مردنی سەرکردەی مەزن و خەباتکاری ناسراوی کورد ناخۆشترین و دڵتەزێنترین هەواڵە بۆ هەر کوردێک و بۆ هەر دۆست و دڵسۆزێکی کورد.
دەقی پەیامەکەی قوبادد تاڵەبانی
کۆچی دوایی بەڕێز ساڵح موسلیم، سەرکردەی مەزن و خەباتکاری ناسراوی کورد ناخۆشترین و دڵتەزێنترین هەواڵە بۆ هەر کوردێک و بۆ هەر دۆست و دڵسۆزێکی کورد.
گەلەکەمان لە رۆژئاوای کوردستان لەم قۆناغە سەختەدا زۆر پێویستییان بە حیکمەت و شارەزایی و ئەزموونە دەوڵەمەندەکەی لە سەرکردایەتیدا هەبوو، بەڵام دڵنیاین هەڤاڵەکان و قوتابییەکانی بە ژیری و بە دڵسۆزییەوە کاروانی خەبات و تێکۆشانەکەی سەرکەوتووانە بە سەرمەنزڵ دەگەیەنن.
بەم بۆنە خەمناکەوە لە قووڵایی دڵەوە سەرەخۆشی لە خۆمان و گەلەکەمان لە رۆژئاوای کوردستان و خانەوادە کوردپەروەرەکەی و هەموو هەڤاڵە تێکۆشەرەکانی دەکەین. گەلی کورد هەرگیز خەبات و ماندووبوونی ئەم سەرکردە مەزنەمان لەبیر ناکات.
یادی بۆ هەمیشە لە دڵماندا زیندوو دەمێنێتەوە و رێبازەکەشی هەر بەرەو سەرکەوتن هەنگاو دەنێت.
بەبۆنەی کۆچی دوایی سیاسەتمەداری کورد، ساڵح موسلیم، بافڵ جەلال تاڵەبانی پەیامێکی بڵاوکردەوە و رایگەیاند، لە دڵەوە نیگەران بووم بە کۆچی دوایی بەڕێز ساڵح موسلیم، ئەندامی دەستەی سەرۆکایەتیی پارتی یەکێتیی دیموکراتی (پەیەدە).
ئاماژەی بەوەشکردوە، ساڵح موسلیم وەک یەکێک لە سەرکردە دیارەکانی رۆژئاوای کوردستان رۆڵی لە پرسە نەتەوەیی و نیشتمانییەکاندا بەرچاو بوو و پەیوەندی بەهێزی لەگەڵ یەکێتیی نیشتمانیی کوردستان فاکتەرێکی بەهێزی یەکدەنگیمان بوو بۆ داکۆکیکردن لە مافەکانی گەلەکەمان.
دەقی پەیامەکەی بافل جەلال تاڵەبانی
لە دڵەوە نیگەران بووم بە کۆچی دوایی بەڕێز ساڵح موسلیم، ئەندامی دەستەی سەرۆکایەتیی پارتی یەکێتیی دیموکراتی (پەیەدە).
بۆ ئەم خەمە پرسە و سەرەخۆشی لە خەڵکی رۆژئاوای کوردستان، هەڤاڵانی پەیەدە و کەسوکاری سەربەرزی کۆچکردوو دەکەم و هاوبەشی خەمیانم.
بەڕێز ساڵح موسلیم وەک یەکێک لە سەرکردە دیارەکانی رۆژئاوای کوردستان رۆڵی لە پرسە نەتەوەیی و نیشتمانییەکاندا بەرچاو بوو و پەیوەندی بەهێزی لەگەڵ یەکێتیی نیشتمانیی کوردستان فاکتەرێکی بەهێزی یەکدەنگیمان بوو بۆ داکۆکیکردن لە مافەکانی گەلەکەمان.
رۆحی هەڤاڵی کۆچکردوو بۆ هەمیشە شادبێت، خوای گەورە ئارامی و دڵنەوایی بە هەموو لایەک ببەخشێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
بەبۆنەی کۆچی دوایی، سالح موسلیم ئەندامی دەستەی سەرۆکایەتی پارتی یەکێتیی دیموکرات (پەیەدە) مکتەبی سیاسی یەکێتیی نیشتیمانیی کوردستان پەیامێکی بڵاوکردەوە و تێیدا هاتووە؛ لەناخی دڵەوە پرسە و ماتەمی خۆمان ئاراستەی خانەوادە تێکۆشەر و نیشتمانپەروەرەکەیان و گشت هەڤاڵانی پەیەدە و دۆست و لایەنگرانیان دەکەین.
ئاماژەیان بەوەشکردوە، بەڕێز ساڵح موسلیم ، لەسەرەتای شۆڕشی گەلی سوریا و ڕۆژئاوای کوردستانەوە ، لەڕێگەی پارتی یەکێتیی دیموکراتەوە لەگەڵ تێکۆشەرانی تر نمونەیەکی گرنگ و بەرچاویان پێشکەش کرد لە تێکۆشان بۆ بە بەدەستهێنانی مافەکانی گەلی کورد لەڕۆژئاوا
دەقی پەیامەکەی مەکتەبی سیاسی یەکێتی
بۆ کۆچی دوایی تێکۆشەر و سیاسەتمەداری ڕۆژئاوای کوردستان بەڕێز ساڵح موسلیم، ئەندامی دەستەی سەرۆکایەتی پارتی یەکێتیی دیموکرات (پەیەدە) ، لەناخی دڵەوە پرسە و ماتەمی خۆمان ئاراستەی خانەوادە تێکۆشەر و نیشتمانپەروەرەکەیان و گشت هەڤاڵانی پەیەدە و دۆست و لایەنگرانیان دەکەین .
بەڕێز ساڵح موسلیم ، لەسەرەتای شۆڕشی گەلی سوریا و ڕۆژئاوای کوردستانەوە ، لەڕێگەی پارتی یەکێتیی دیموکراتەوە لەگەڵ تێکۆشەرانی تر نمونەیەکی گرنگ و بەرچاویان پێشکەش کرد لە تێکۆشان بۆ بە بەدەستهێنانی مافەکانی گەلی کورد لەڕۆژئاوا و بەرپاکردنی ئەزموونی خۆسەری گەلەکەمان لەو بەشەدا.
موسلم هەروەها باوکی شەهید شەڕڤانە کە گیانی بە ئازادی وڵات بەخشی، کۆچی دوایی ئەم تێکۆشەرەی گەلەکەمان خەسارەتێکە لە کاروانی تێکۆشانی ڕۆژئاوا و دیموکراتیزەکردنی سوریای نوێ .
مەکتەبی سیاسی
ئەمڕۆ 11ی ئازاری 2026، دەرباز کۆسرەت رەسوڵ ئەندامی مەکتەبی سیاسی یەکێتیی نیشتمانیی کوردستان، لە بارەگای مەکتەبی سیاسیی یەکێتی لە شاری هەولێر پێشوازی لە ئەدریان يایسلستین، کونسوڵی گشتیی شانشینی هۆڵەندا لە هەولێر کرد.
بەپێی راگەیەندراوێکی نووسینگەی رۆژنامەوانی دەرباز کۆسرەت رەسوڵ، لە کۆبوونەوەکەدا گفتوگۆ لەبارەی رەوشی ناوچەکە و پێشهات و گرژیی و نیگەرانییەکان کراوە، هەردوولا هاوڕابوون کە بژاردەی گفتوگۆو دوور لە توندوتیژی باشترە بۆ چارەسەری کێشە ناوچەییەکان.
لە راگەیەندراوەکەشدا هاتووە: جەخت لە هاوهەڵوێستی و یەکڕێزی لایەنە سیاسییەکان لەم رەوشە دژوارەدا کراوەتەوە، هەروەها دووپات لە پاراستنی قەوارەی هەرێمی کوردستان کراوەتەوە وەک ئەرکی لەپێشینە.
ئەمڕۆ لە شاری بەغداد، هەڵبژاردنی سەرۆکایەتی یەکێتی ژوورە بازرگانییەکانی عیراق بەڕێوەچوو، کە تێیدا نەوزاد غەفور، سەرۆکی ژووری بازرگانی و پیشەسازی سلێمانی، وەک جێگری سەرۆکی یەکێتی ژوورە بازرگانییەکانی عیراق هەڵبژێر درا.
ئەم هەڵبژاردنە لە پرۆسەیەکی روون و ئاشکرادا بەڕێوەچوو، بە ئامادەبوونی بەڕێوەبەری گشتی وەزارەتی بازرگانی، ئەمینداری ژوورە بازرگانییەکانی عیراق و هەرێمی کوردستان، هەروەها د. محمد شهاب لە سەرۆکایەتی ئەنجوومەنی هەرێمی کوردستان.
لە سەرەتای کۆبوونەوەکەدا، سەرۆکی پێشووی یەکێتی ژوورە بازرگانییەکانی عیراق وتارێکی پێشکەش کرد و تیشکی خستە سەر کار و چالاکییەکانی ماوەی رابردوو، هەروەها هیوای سەرکەوتنی بۆ دەستەی نوێی هەڵبژاردراو خستەڕوو.
پاشان پرۆسەی خۆ کاندیدکردن بۆ پۆستی سەرۆک کرایەوە، کە تێیدا عامر خلف الفهداوی، سەرۆکی ژووری بازرگانی ئەنبار، کاندید بوونی خۆی راگەیاند و دوای دەنگدان، متمانەی ئەندامان بەدەستهێنا و وەک سەرۆکی یەکێتی ژوورە بازرگانییەکانی عیراق هەڵبژێردرا.
دوای وەرگرتنی سەرۆکایەتی کۆبوونەوەکە، دەرگای خۆ پاڵاوتن بۆ پۆستی جێگر کرایەوە، کە لە یەکەم خولی هەڵبژاردنەکەدا نەوزاد غەفور دەنگی تەواوی بەدەستهێنا و بە رەسمی وەک جێگری سەرۆکی یەکێتی ژوورە بازرگانییەکانی عیراق هەڵبژێردرا.
جێگەی ئاماژەیە، پرۆسەی هەڵبژاردنی سەرۆکایەتی یەکێتی ژوورە بازرگانییەکانی عیراق بە شێوەیەکی رێک و پێک و سەرکەوتوانە بەڕێوەچوو.
قوباد تاڵەبانی، لێپرسراویی مەكتەبی سكرتارییەتی سەرۆك مام جەلال، بە جیا سەردانی سێ سەركردە و تێكۆشەری دێرینی یەكێتی، بەڕێزان مولازم عومەر و عومەر فەتاح و عوسمانی حاجی مەحمودی كرد.
لە دوای سەردانەكە، قوباد تاڵەبانی لە پەیامێكدا بڵاوی كردەوە كە ئەوان هەمێشە شانازی بە سەركردەو تێكۆشەرە دێرینەكانەوە دەكەن، ئەو سەركردە و تێكۆشەرانەی كە پاڵەوانی رۆژانی سەخت و پڕمەترسی بوون و مێژووی نیوسەدەی رابردوو گەلەكەمان بەبێ باسكردنی رۆڵ و كاریگەری هەر یەكێكیان مێژوویەكی ناتەواوە.
قوباد تاڵەبانی لە بەشێكی دیكەی پەیامەكەیدا ئاماژەی بەوەکرد، كە ئەو سێ سەركردەیەی یەكێتی هاوسەنگەر و هاوڕێی بە وەفای سەرۆك مام جەلال بوون و بۆچوون و ئامۆژگارییەكانیان هەمیشە پڕبایەخن و رێنیشاندەرن بۆ گرتنەبەری رێگەی دروست بۆ پاراستنی دەستكەوتەكانی گەلەكەمان، ئەو دەستكەوتانەی كە بەرهەمی خوێنی شەهیدان و رەنج و ماندووبوونی تێكۆشەرە دێرینەكانن.
بەهۆی هێرشێکەی ئەم بەیانییە بۆ سەر گوندی زڕگوێزەڵە کەسێک شەهید بوو، دەزگای ئاسایشی هەرێمیش دەڵێت؛ موشەک و درۆن لە هێرشەکەدا بە کارهاتووە.
دەزگای ئاسایشی هەرێم رایدەگەیەنێت، بەیانی ئەمڕۆ سەعات 8:15 خولەک، بە شەش درۆن و یەک موشەک هێرش کرایەسەرگوندی زڕگوێزەڵە.
ئاماژەی بەوەشکرد، لەهێرشەکەدا یەک شەهید و یەک برینداری هەیە و لێکۆڵێنەوە لەڕووداوەکە بەردەوامە.
بە مەبەستی رێگریگرتن لە بەرزبوونەوەی نرخی سوتەمەنی و کەمکردنەوەی بارگرانی سەر شانی هاووڵاتییان، وەزارەتی سامانە سروشتییەکان بڕیارێکی نوێی لەبارەی دابەشکردنی غازی ماڵان دەرکرد.
بەپێی راگەیەندراوێکی رەسمی وەزارەتی سامانە سروشتییەکان، ئەمڕۆ وەک هەنگاوی یەکەم لە پارێزگای هەولێر، پرۆسەی دابەشکردنی غازی ماڵان لە رێگەی کارتی ئەلکترۆنییەوە دەستیپێکرد، لەم سیستمە نوێیەدا، هەر هاووڵاتییەک مافی ئەوەی هەیە لە ماوەی مانگێکدا، دوو بوتڵ غاز بە نرخی رەسمی هەشت هەزار و500 دینار لە رێگەی بریکارە گەڕۆکەکانەوە وەربگرێت.
ئاماژەی بەوەشکرد، کە ئەمڕۆ لە چەند گەڕەکێکی هەولێر کار بەو سیستمە کراوە و لە رۆژانی داهاتووشدا، بەڕێوەبەرایەتییەکانی نەوت و کانزا لە پارێزگاکانی دیکەی هەرێمی کوردستان، رێکاری گونجاو دەگرنەبەر بۆ پەیڕەوکردنی هەمان سیستم، بە ئامانجی کۆنتڕۆڵکردنی نرخ و دابینکردنی غاز بۆ هەموو ماڵان بە یەکسانی.
کۆسرەت رەسوڵ عەلی لە ساڵیادی راپەڕین و رزگارکردنی هەولێر پەیامێکی بڵاوکردەوە و رایگەیاند، یەکێک لە گەورەترین شانازییەکانی ژیانم ئەوەیە 35 ساڵ لەمەوبەر لەلایەن بەرەی کوردستانییەوە سەرپەرشتی راستەوخۆی ئازادکردنی هەولێرمان پێ سپێردرا و توانیمانلە کەمترین کاتدا هەولێر پاک بکەینەوە و سەرجەم دام و دەزگاکانی بەعس کۆنتڕۆڵ بکەین.
دەقی پەیامەکەی کۆسرەت رەسوڵ عەلی...
پەیامی کۆسرەت رەسول عەلی لە ساڵیادی راپەڕین و رزگارکردنی هەولێر
(٣٥)ەمین ساڵیادی راپەڕین و ئازادکردنی هەولێر لە تەواوی کوردستانیان بەگشتی و خەڵکی تێکۆشەرو قارەمانی هەولێر پیرۆز دەکەم و هیواخوازم ئەم یادە پیرۆزە ببێتە مایەی خۆشی و شادی بۆ گەلەکەمان و بیکەینە دەرفەتێک بۆ یەکڕیزی نێوان هێزو لایەنە سیاسییەکان.
یەکێک لە گەورەترین شانازییەکانی ژیانمە، (٣٥) ساڵ لەمەوبەر لەلایەن بەرەی کوردستانییەوە سەرپەرشتی راستەوخۆی ئازادکردنی هەولێرمان پێ سپێردرا، هەر ئەوسا لە قاسمەڕەشەوە بەپلانێکی ورد، بە بەشداری رێکخستنە نهێنییەکان و شانەچەکدارەکان و هێزو لایەنە سیاسییەکان و خەڵکی راپەڕیوی هەولێر بە بەشداری راستەوخۆی هێزی پێشمەرگەی کوردستان و گەیشتینە هەولێرو شانبەشانی خەڵکەکەی خۆمان لە هەولێر توانیمان لە کەمترین کاتدا هەولێر پاک بکەینەوەو سەرجەم دام و دەزگاکانی بەعس کۆنتڕۆڵ بکەین، سەرکەوتووانە و سەربەرزانە پلانەکەمان جێبەجێ کردو لەبەردەم قەڵای دێرین و سەرکەشی هەولێر ئاهەنگی سەرکەوتنمان گێڕا.
ئەمڕۆ کە یادی ئەو رۆژە مێژووییە دەکەینەوە، ناوچەکە بەدۆخێکی دژوار تێپەڕدەبێت، ئەرکە لەسەر هێزو لایەنە سیاسییەکان بەرامبەر خوێنی شەهیدان و قوربانیدانی تێکۆشەران و پاراستنی ئەزموونەکەمان یەکدەنگ بن و بەرۆحی ئەوێ رۆژێی بەرەی کوردستانی کاربکەن بۆ پاراستنی ئەزموونەکەمان و درێژەدان بەخەبات تا گەیشتن بە ئاواتە لەمێژینەکانمان.
دووبارە یادی راپەڕین و ئازادکردنی هەولێر لە هەمووان پیرۆز دەکەم و سەری رێز و نەوازش بۆ شەهیدانی رێگای رزگاری کوردستان دادەنوێنین.
کۆسرەت رەسول عەلی
١١ی ئازاری ٢٠٢٦
بەپێی پێشبینییەکانی کەشناسی، رەوشی ئاسمانی هەرێم گۆڕانکاری بەسەردا دێت و ئەگەری بارینی پروشکە باران لەگەڵ بەرزبوونەوەی پلەکانی گەرما لە ئارادایە.
بەڕێوەبەرایەتی گشتی کەشناسی و بوومەلەرزەزانی هەرێم رایگەیاند، ئەمڕۆ چوارشەممە ئاسمانی ناوچە جیاجیاکان لە نێوان پەڵەهەور بۆ نیمچە هەور دەبێت و هەندێک کات دەگۆڕێت بۆ هەوری تەواو لەگەڵ ئەگەری نمە باران.
کەشناسی ئاماژەی بەوەکرد، سبەینێ پێنجشەممە پلەکانی گەرما یەک بۆ دوو پلەی تر بەرز دەبنەوە و لە ناوچەکانی کەرکوک و باشوری هەرێمیش ئەگەری تۆزێکی سووک هەیە.
پێشبینی دەکرێت خێرایی با لەسەرخۆ بێت و مەودای بینین لە نێوان هەشت بۆ 10 کیلۆمەتردا جێگیر بێت و رەوشی ئاسمان بە هەوری بمێنێتەوە.
بەرزترین پلەکانی گەرمای پێشبینیکراو بۆ ئەمرۆ:
هەولێر 17 پلەی سیلیزی
پیرمام 14 پلەی سیلیزی
سۆران 14 پلەی سیلیزی
حاجی ئۆمەران سفر پلەی سیلیزی
سلێمانی 14 پلەی سیلیزی
چەمچەماڵ 16 پلەی سیلیزی
دهۆک 17 پلەی سیلیزی
زاخۆ 16 پلەی سیلیزی
هەڵەبجە : 17 پلەی سیلیزی
گەرمیان : 20 پلەی سیلیزی
سەر لە بەیانی ئەمڕۆ بە فڕۆكەی بێفڕۆكەوان هێرشكرایە سەر گوندی زڕگوێزەڵە لە سنوری سلێمانی و شەوی رابردووش زیاتر لە 13 هێرشی درۆنی بۆسەر پارێزگای هەولێر تێكشكێنران.
سەرچاوەیەك بە كوردسات نیوزی راگەیاند، سەرلەبەیانی ئەمڕۆ بە فڕۆكەی بێفڕۆكەوان هێرشكراوەتە سەر بارەگاكانی پێشووی كۆمەڵەی زەحمەتكێشانی شۆڕگێر لە گوندی زڕگوێزەڵەی سنوری شاری سلێمانی و بەپێی زانیارییە سەرەتاییەكان هێرشەكە برینداری لێكەوتووەتەوە.
هاوكات، پەیامنێری كوردسات نیوز لە هەولێر باسی لەوەكرد، لە سەعات 10ی شەوی رابردووەوە تا بەرەبەیانی ئەمڕۆ، زیاتر لە 13 هێرشی درۆنی بۆسەر پارێزگای هەولێر ئەنجامدراوە، كە زۆرینەیان لە ئاسماندا تەقێنراونەتەوە و هێرشەكان هیچ زیانێكی گیانیان لێ نەكەوتووەتەوە.
لەلایەكی ترەوە بەپێی زانیارییەكانی پەیامنێری كوردسات نیوز لە بەغداد، لە شەوی رابردووەوە تا بەرەبەیانی ئەمڕۆ چوارشەممە، نۆ جار هێرشی درۆنی كراوەتە سەر بنكەی سەربازی ڤیكتۆریای هێزەكانی ئەمریكا لە بەغداد.
میدیاكانی عیراقیش باس لەوەدەكەن، لە سنوری پارێزگاكانی نەینەوا و ئەنبار بارەگاكانی حەشدی شەعبی بۆردومان كراون، سەرچاوەیەكیش بە میدیاكانی راگەیاندووە، تەنها لە هێرشەكەی ئەنباردا كەسێك گیانی لەدەستداوە و پێنجی تر بریندار بوون.
بافڵ جەلال تاڵەبانی سەرۆکی یەکێتیی نیشتمانیی کوردستان، بەبۆنەی دەستنیشانکردنی رابەری نوێی کۆماری ئیسلامی ئێران، پەیامێکی پیرۆزبایی بڵاوکردووەتەوە.
دەقی پەیامەکە
پیرۆزبایی خۆمان ئاڕاستەی کۆماری ئیسلامیی ئێران دەکەین بەبۆنەی دەستنیشانکردنی ئایەتوڵڵا موجتەبا خامنەیی وەک ڕابەری باڵای نوێ.
هیوادارین ئەم هەنگاوە ببێتە هۆی کەمکردنەوەی گرژییەکان و بەرقەرارکردنی سەقامگیری و ئاشتییەکی بەردەوام بۆ ناوچەکە.
بافڵ جەلال تاڵەبانی
سەرۆکی یەکێتیی نیشتمانیی کوردستان