کوردستان
سەرۆکایەتیی زانکۆی سلێمانی رایگەیاند، سەبارەت بەو دەنگۆیانەی لەسەر عەبدوللەتیف ئەحمەد بڵاوبوونەتەوە، لیژنەیەکی باڵای لێکۆڵینەوەیان پێکهێناوە و سەرجەم کارەکانیش بە چاودێریی داواکاری گشتی ئەنجام دەدرێن.
بەپێی راگەیەندراوێکی سەرۆکایەتیی زانکۆی سلێمانی تیایدا هاتووە، زانکۆکە وەک دامەزراوەیەکی فەرمی و ئەکادیمی، جەخت لەسەر پاراستنی پرەنسیپەکانی یاسا و شەفافییەت دەکاتەوە لە بەدواداچوون بۆ هەر دەنگۆ یان کەیسێک کە پەیوەندی بە مامۆستایان یان فەرمانبەرانیانەوە هەبێت.
لە راگەیەندراوەکەدا ئاماژە بەوەش کراوە، سەبارەت بەو دەنگۆیانەی لە چەند رۆژی رابردوودا لەسەر عەبدوللەتیف ئەحمەد مستەفا، مامۆستای کۆلێژی زانستە ئیسلامییەکان بڵاوبوونەتەوە، زانکۆکە بەپێی رێکارە یاسایی و کارگێڕییەکان، رۆژی پێنجشەممەی رابردوو، 18ی حوزەیرانی 2026) لیژنەیەکی باڵای لێکۆڵینەوەی بۆ ئەو مەبەستە پێکهێناوە.
سەرۆکایەتیی زانکۆی سلێمانی رونیشیکردووەتەوە، ئەم لیژنەیە بە چاودێریی داواکاری گشتی کارەکانی خۆی ئەنجام دەدات و زانکۆکە بە وردی بەدوای دەرخستنی راستییەکاندا دەچێت، پڕۆسەی لێکۆڵینەوەکەش تا گەیشتن بە ئەنجامی کۆتایی بەردەوام دەبێت و هەر جۆرە کەمتەرخەمییەکیش هەبێت، بەپێی یاسا لێپێچینەوەی بەرامبەر دەکرێت.
لە کۆتایی راگەیەندراوەکەدا، سەرۆکایەتیی زانکۆی سلێمانی دڵنیایی داوەتە هاووڵاتیان کە دەرەنجامی کارەکانی ئەم لیژنەیە هەرچییەک بێت، بە شێوازێکی شەفاف بۆ رای گشتی بڵاودەکرێتەوە.
ئەمڕۆ هەینی، لیژنەیەک بە راسپاردەی سەرۆک وەزیرانی حێرا سەردانی پارێزگای کەرکوکی کرد، بەمەبەستی چارەسەر کردنی کێشەی جوتیارانی کورد و تورکمان و دۆزینەوەی چارەسەر بۆ بەبازاڕکردنی گەنمی ئەو جوتیارانە.
بەڕێوبەرایەتی كشتوكاڵی كەركوك رایدەگەیەنێت، لیژنەیەكی باڵا بە راسپاردەی سەرۆك وەزیرانی عیراق و بە سەرۆكایەتی بەڕێوبەری گشتی كۆمپانیای بازرگانی دانەوێڵە گەیشتونەتە پارێزگاكە، بە مەبەستی دۆزینەوەی چارەسەر بۆ كێشەكانی وەرگرتنی بەرهەمی گەنمی جوتیاران.
ئاماژە بەوەش دەكات، لیژنەكە لەگەڵ نوێنەری پارێزگار و لایەنە پەیوەندیدارەكان كۆبووەتەوە و چەند بڕیارێكی گرنگی دەركردووە، لەوانەش، وەرگرتنی تەواوی گەنمی بەرهەمهێنراوی كەركوك لە ناوەوە یان دەرەوەی پلانی كشتوكاڵی
هەروەها راسپاردنی لیژنەیەك بۆ ئەنجامدانی پشكنینی مەیدانی و ناردنی زانیارییەكان بەشێوەی ئەلیكترۆنی بۆ وەزارەتی بازرگانی.
هاوكات، هێزەكانی ئاسایشی نیشتمانی لە بازگەكان جێگیر دەكرێن بۆ كۆنترۆڵكردنی گواستنەوەی گەنم لە نێوان پارێزگاكاندا.
ئەمڕۆ هەینی لە چەمی شاخەسور لە سنوری شارباژێڕ، گەنجێکی تەمەن 23 ساڵ خنکا، بە گوێرەی زانیارییەکان تەرمەکەی براوەتە نەخۆشخانە لە قەڵاچوالان و بە مەبەستی گەشت سەردانی ئەو ناوچەیەی کردوە.
حاکم فەرهاد، قائیمقامی چوارتا بە کوردسات نیوزی راگەیاند، گەنجێک بە ناوی ئیسماعیل لە چەمی شاخەسوری کە دەکەوێتە نێوان (قەڵاچوالان - رێگای ماوەت) لە شارباژێر خنکا و دوای گواستنەوەی تەرمەکەی بۆ نەخۆشخانە لە قەڵاچوالان، رەوانەی پزیشکی دادی سلێمانی دەکرێت بە مەبەستی تاوتوێکردنی.
بە گوێرەی زانیاییەکانی کوردسات نیوز، گەنجەکە تەمەنی 23 ساڵە و لەگەڵ هاوڕێیەکی بۆ کات بەسەربردن و مەلەکردن سەردانی ناوچەکەی کردوە.
جێی باسە، سەرەڕای هۆشدارییەکانی لایەنی پەیوەندیدار بە هاووڵاتیان، روداوەکانی خنکان روو لە زیاد بوون و ئەمڕۆش گەنجێکی تر بە ناوی بـەڵێـن کـامیل، کە دانیشتوی بازیان بوو، لە ئاوی باسـەڕەدا لە سەیرانگەی دێلێژەی سنوریی سلێمانی خـنـکـا.
کەشناسی هەرێم رایگەیاند، ئەمڕۆ پلەکانی گەرما بەرزدەبنەوە و زۆربەی ناوچەکانی هەرێم لە سەرو 40 پلەی سیلیزیوە دەبێت، حاجی ئۆمەرانیش بە 29 پلە فێنکترین ناوچەی هەرێمە.
ئەمڕۆ هەینی، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، پلەکانی گەرما بەرزدەبنەوە و زۆربەی ناوچەکانیش لە سەرو 40 پلەی سیلیزیەوە دەبن.
لە بارەی کەشێ سبەینێ شەممەشەوە کەشناسی دەڵێت؛ پلەکانی گرما زیاتر روو لە بەرزبونەوە دەکەن بەراورد بە تۆمارکراوەکانی ئەمڕۆ و یەک بۆ دوو پلە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی
هەولێر: 44 پلەی سیلیزی
پیرمام: 40 پلەی سیلیزی
حاجی ئۆمەران : 30 پلەی سیلیزی
بارزان : 42 پلەی سیلیزی
سلێمانی: 42 پلەی سیلیزی
چەمچەماڵ: 44 پلەی سیلیزی
دهۆک: 41 پلەی سیلیزی
زاخۆ:42 پلەی سیلیزی
ئاکرێ : 42 پلەی سیلیزی
سەرۆکی دەستەی گەشتوگوزاری هەرێم پەیامێکی سوپاسگوزاری ئاراستەی تیمەکانی فریاگوزاری و خەڵکی خۆبەخش دەکات لەپای هەوڵەکانیان بۆ دۆزینەوەی تەرمی روقیەی تەمەن 11 ساڵ...
دەقی پەیامەکە:
“سوپاس و ستایش بۆ خوای گەورە، دوای هەوڵ و ماندووبوونێکی بێوچان و شەونخونییەکی زۆر، دواجار توانرا تەرمی کچە گەشتیار (ڕوقیەی تەمەن ١١ ساڵ) بدۆزرێتەوە.
لەم سۆنگەیەوە، بە پێویستی دەزانم سوپاس و پێزانینی بێپایانی خۆم ئاڕاستەی بەڕێوەبەری گشتیی و سەرجەم فەرمانبەرانی بەڕێوەبەرایەتیی گشتیی گەشتوگوزاری هەڵەبجە بکەم؛ لێپرسراوێتی و دڵسۆزیتان بەرز دەنرخێنم کە هاوشانی تیمەکانی تری پارێزگای هەڵەبجە، لە یەکەم ساتەوە بێوچان و بە گیانێکی بەرپرسیارانەوە لە مەیداندا بوون، و ئەوەی لە تواناتاندا بوو ئەنجامتاندا لەپێناو دۆزینەوەی تەرمی ئەو کچە گەشتیارە و تا بەڕێکردنی بەرەو زێدی خۆی.
هاوکات، سوپاس و پێزانینی تایبەتمان ئاڕاستەی سەرجەم دامودەزگا و تیمەکانی پارێزگای هەڵەبجە دەکەین، لە (بەرگریی شارستانی، ئاسایش، و پۆلیس)، لەگەڵ هاووڵاتیانی خۆبەخشی سنووری خورماڵ و هەڵەبجە، و گوندەکانی (زەڵم، ئەحمەدئاوا، و هەورامان) کە نموونەیەکی بەرزی هاوکاری و مرۆڤدۆستییان پێشکەش کرد.
لە خوای گەورە داواکارین کۆچکردوو بە بەهەشتی بەرینی خۆی شاد بکات و سەبووری و دڵنەوایی بە بنەماڵەکەی ببەخشێت. لێرەشەوە هیوای سەلامەتی بۆ سەرجەم گەشتیاران دەخوازین و دووپاتی دەکەینەوە کە ژیان و سەلامەتیی گەشتیاران، هەمیشە لە کارە هەرە لەپێشینەکانی ئێمەدا دەمێنێتەوە.”
ژوان سابیر
سەرۆکی دەستەی گەشتوگوزار
١٨ی حوزەیرانی ٢٠٢٦
ئەمڕۆ لە سلێمانی جەلال شێخ ناجی سەرۆکی ئاژانسی پاراستن و زانیاری / زانیاری، هیوای ئەحمەد سەرۆکی دەزگای ئاسایشی هەرێم ، لەگەڵ قاسم ئهعرهجی راوێژكاری ئاسایشی نیشتمانیی عیراق و وەفدێکی باڵای ئەمنی یاوەری کۆبوونەوە .
لە کۆبوونەوەکەدا هەڵسەنگاندن بۆ پێشهاتە ئەمنییەکان کراو و جەخت لە بەهێزکردنی هەماهەنگی و هاوکاری هاوبەش لەپێناو رووبەڕووبوونەوەی ئاڵنگارییەکان کرایەوە .
هەر لەکۆبوونەوەکەدا هەردوولا هاوڕابوو لەسەر پێویستی فراوانکردنی هاریکارییەکان بۆ راپەڕاندنی بەرپرسیارێتییە ئەمنی و نیشتمانییەکان و یەکخستنی هەوڵەکان بۆ پاراستنی ئاسایشی نەتەوەیی و سەقامگیری لەوڵاتدا .
بەڕێوەبەرایەتی پۆلیسی پارێزگای سلێمانی رایگەیاند، توانیویانە دوو تۆمەتبار دەستگیربکەن کە بڕێکی زۆر پارەیان لە ماڵێکدا دزیبوو، لە کاتی دەستگیرکردنیشیاندا دەست بەسەر بەشێکی زۆری پارەکە و قاڵبێک ئاڵتووندا گیراوە.
پۆلیسی سلێمانی لە راگەیەنراوێکدا ئاماژەی بەوەکردووە، دوای ئەوەی هاووڵاتییەک لە نوسینگەی نەهێشتنی تاوانی راپەڕین سکاڵای تۆمارکرد، کە دزی لە ماڵەکەی کراوە و بڕی 60 ملیۆن دینار و 38 هەزار دۆلاری ئەمریکی (سێ دەفتەر و 80 گەڵا)ی لێدزراوە، دەستبەجێ بە بڕیاری دادوەری لێکۆڵینەوە پەڕاوی لێکۆڵینەوە لە روداوەکە دەستپێکرد.
ئەوەشی خستەڕوو،پاش بەدواداچوون و کۆکردنەوەی زانیاریی ورد، مەفرەزەکانی پۆلیس توانیان شوێنی هەردوو تۆمەتبارەکە بدۆزنەوە و دەستگیریان بکەن. لە کاتی دەستگیرکردنیاندا دەست بەسەر ئەم بڕە پارە و کەلوپەلانەدا گیرا:
بڕی 28 ملیۆن و 550 هەزار دیناری عیراقی.
بڕی 27 هەزار و 600 دۆلاری ئەمریکی.
قاڵبێک زێڕ بە کێشی 100 گرام (کە تۆمەتباران بە بەشێک لە پارە دزراوەکە کڕیبوویان).
پۆلیسی سلێمانی راشیگەیاند، هەردوو تۆمەتبارەکە بە ناوەکانی (م، ع، ش) و (س، ئ، م)، لە ئێستادا بە بڕیاری دادوەر و بەپێی مادەی 444 لە یاسای سزادانی عیراقی راگیراون و لێکۆڵینەوەی یاساییان لەگەڵدا بەردەوامە.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە هەڤاڵ مەحموود سەنگاوی، تێکۆشەری دیاری کوردستان و یەکێتی کرد.
لە دیدارێکدا سەرۆک بافڵ مێژووی پڕشانازیی هەڤاڵ مەحموود سەنگاوی لە خەباتی رزگاریخوازیی کوردایەتی و شۆڕشی نوێی گەلەکەمان بە رابەرایەتیی یەکێتیی نیشتمانیی کوردستان بەرز نرخاند کە وەک یەکێک لە فەرماندە دیارەکانی پێشمەرگە هەمیشە لە رێزی پێشەوەی خەباتدا بووە و دڵسۆز بووە بۆ خاک و خەڵکی کوردستان.
لای خۆیەوە، هەڤاڵ مەحموود سەنگاوی پاڵپشتیی خۆی بۆ هەڵوێست و هەنگاوەکانی سەرۆک بافڵ دووپاتکردەوە و وتی، یەکێتی لە دەستێکی ئەمیندایە و دڵخۆشین سازش لەسەر مافی خەڵکە سەربەرزەکەمان ناکات، تاوەکو بە یەکسانی خزمەتی تەواوی خەڵک و ناوچەکانی کوردستان بکرێت.
بافڵ جەلال تاڵەبانی، سەرۆکی یەکێتیی نیشتمانیی کوردستان، بە ئامادەبوونی هەڤاڵ مەحموود سەنگاوی لە دەباشان پێشوازی لە قاسم ئەعرەجی، راوێژكاری ئاسایشی نیشتمانیی عیراق کرد.
دواتر لە کۆبوونەوەیەکدا کە جهلال شێخ ناجی، سەرۆکی ئاژانسی پاراستن و زانیاری / زانیاری و هیوا ئەحمەد، سەرۆکی دەزگای ئاسایشی هەرێم ئامادەیبوون، دوایین گۆڕانکارییە ئەمنییەکان و پێشهاتە سەربازییەکانی عیراق تاوتوێ کرا.
لە کۆبوونەوەکەدا جەخت لە بەردەوامی هاریکاریی دەزگا ئەمنییەکانی هەرێمی کوردستان و عیراق کرایەوە بۆ رووبەڕووبوونەوەی تەواوی مەترسییەکان.
سەرۆک بافڵ ستایشی کاریگەریی رۆڵی قاسم ئهعرهجی کرد لە پاراستنی سەقامگیریی تەواوی وڵات و وتی، بەڕێزیان بە دڵسۆزی و دیدگایەکی نیشتمانییەوە خزمەتی وڵات دەکەن.
هەردوولا خۆشحاڵی خۆیان دەربڕی بە رێککەوتنی مێژوویی ئەمریکا و ئێران و بەفاکتەری سەقامگیری زیاتریان زانی لە ناوچەکە.
قاسم ئەعرەجی، راوێژکاری ئاسایشی نیشتمانی، لە کاتی بەسەرکردنەوەیەکدا، هاوسۆزی و رێزی قووڵی خۆی بۆ مێژوی خەباتگێڕی سەرۆک کۆماری پێشووتری عیراق، "مام جەلال" دەربڕی و بە یەکێک لە کۆڵەکگرنگەکانی دەوڵەتمەداری و نیشتمانی پێناسە کرد.
ئەعرەجی لە وتەیەکدا کە بە دەستی خۆی لە دەفتەری یاداوەرییەکانی سەردانەکەدا نووسیویەتی، ئاماژەی بەوە کردوە: بەوپەڕی شانازی و سەربەرزییەوە، سەردانی مەزاری کەسایەتی گەورە "مام جەلال"مان کرد، کە خاوەنی مێژویەکی خەباتگێڕانی مەزنە لە رووبەڕووبوونەوەی ستەم و دکتاتۆریەتدا، و یەکێکە لە کۆڵەکەکانی بزووتنەوەی نیشتمانی بوو.
راوێژکاری ئاسایشی نیشتمانی لە نووسینەکەیدا جەختی لە رۆڵی مێژوویی مام جەلال کردوەتەوە لە دوای پرۆسەی ئازادی عیراق و رایگەیاندووە: خوای گەورە لێی خۆش بێت و شاد بکات بەقەد ئەو خزمەتەی لە پێناو بنیاتنانی دەوڵەتدا پێشکەشی کردووە، کاتێک هەوڵێکی گەورەی دا بۆ بەرزڕاگرتنی ناوی عیراق لە کۆڕ و کۆبوونەوە نێودەوڵەتییەکاندا و بەرگریکردن لە دۆزی رەوا و بنەماکانی حەق.
ئەمڕۆ پێنجشەممە، وەزارەتی دارایی هەرێم رایگەیاند، رۆژی یەکشەممە، تا رۆژی پێنجشەممە دەستدەکەن بە دابەشکردنی موچەی مانگی پێنجی مامۆستایانی گرێبەست و بەشێک لەفەرمانبەرانی هەمیشەیی و گرێبەست.
وەزارەتی دارایی ئاماژەی بەوەکردوە، موچەی مانگی ئایاری مامۆستایانی گرێبەستی وەزارەتی پەروەردە و خوێندنی باڵاو توێژینەوەی زانستی و سەرجەم ئەو فەرمانبەرانە دابەش دەکرێت، کە گرێبەستن و تەمویلیان لەسەر داهاتی ناوخۆیە.
دارایی هەرێم دەشڵێت؛ لەهەمان کاتدا موچەی مانگی ئایاری سەرجەم ئەو فەرمانبەرانە دابەش دەکرێت کە لەدوای(1-7-2024)ـوە و بەشێوەی گرێبەست و هەمیشەیی لەسەر میلاکی دامەزراوەکانی حکومەتی هەرێم دامەزراون کەشایستەکانیان لەسەر داهاتی ناوخۆی هەرێمی کوردستان خەرج دەکرێت.
دەزگای ئاسایشی هەرێم ئاماری هێرشە درۆنییەکانی 24 کاتژمێری رابردووی راگەیاند و زیانەکانی خستەڕوو.
بەپێی راگەیەندراوی دەزگاکە، کاتژمێر (10:05)ی شەوی سێشەممە (16ی حوزەیرانی 2026)، لە رێگەی یەک فڕۆکەی بێفڕۆکەوانەوە (درۆن) هێرش کراوەتە سەر کەمپی پەنابەران لە شاری کۆیە.
دەزگای ئاسایشی هەرێم دڵنیایی داوە کە هێرشەکە هیچ زیانێکی گیانی لێنەکەوتووەتەوە.
گەنجێک کە بەمەبەستی راوەماسی روی لە روباری سیروان کردبوو، خنکا و لەئێستادا گەڕان بەدوای تەرمەکەیدا بەردەوامە.
ئیبراهیم محەمەد، وتەبێژی بەڕێوەبەرایەتی بەرگریی شارستانی گەرمیان بە کوردسات نیوزی راگەیاند: گەنجەکە ناوی (ئەحمەد لوقمان)ـە و تەمەنی 26 ساڵە، هەوڵەکانمان چڕ کردووەتەوە بۆ دۆزینەوەی تەرمەکە.
ئیبراهیم محەمەد وتیشی: لە شەش مانگی سەرەتای ئەمساڵدا سێ هاووڵاتی لە روباری سیروان دا خنکاون.
بۆ یەکەمین جار لەمساڵدا، وەزارەتی تەندروستی هەرێم تۆمارکردنی دوو حاڵەتی تووشبوون بە تای خوێنبەربوون لە هەولێر راگەیاند.
بەپێی راگەیەندراوێکی وەزارەتی تەندروستی هەرێم، تووشبووەکان باوک و کوڕێکن (تەمەن 71 و 29 ساڵ) و دانیشتووی گەڕەکێکی شاری هەولێرن، هۆکاری تووشبوونەکەشیان بۆ سەربڕینی ئاژەڵ لەناو ماڵەکەیاندا لە دوو هەفتەی رابردوودا دەگەڕێتەوە، کە بەهۆیەوە بەرکەوتنیان لەگەڵ دەرهاویشتە و پێکهاتەکانی ئاژەڵە تووشبووەکەدا هەبووە.
ئاماژەی بەوەشکرد، دوای دەرکەوتنی نیشانەکان و سەردانیکردنی نەخۆشخانە، گومانیان لێکراوە و سەرجەم رێکارە پزیشکییەکان و پشکنینی پشتڕاستکردنەوەیان بۆ کراوە، لە ئێستاشدا هەردووکیان لە نەخۆشخانە لەژێر چاودێریی چڕی پزیشکیدان، رەوشی تەندروستی یەکێکیان تا رادەیەک جێگیرە، بەڵام تووشبووەکەی دیکە تەندروستیی ناجێگیرە.
راشیگەیاند، لە ماوەی رابردوودا چەندین حاڵەتی گومانلێکراو لە هەرێمی کوردستان سەردانی نەخۆشخانەکانیان کردووە، بەڵام دوای بەدواداچوون و پشکنین تەنها ئەم دوو حاڵەتە بە رەسمی پشتڕاستکراونەتەوە، هاوکات دوو حاڵەتی دیکەش کە دانیشتووی شارەکانی دەرەوەی هەرێمن، بۆ وەرگرتنی چارەسەر روویان لە نەخۆشخانەکانی هەرێمی کوردستان کردووە.
لە کۆتایی راگەیەنراوەکەیدا، وەزارەتی تەندروستی هەرێم داوا لە هاووڵاتیان دەکات، لەکاتی تێبینیکردنی هەر نیشانەیەکی نەخۆشی لەسەر ئاژەڵ، پێویستە تیمەکانی ڤێترنەری ئاگاداربکەنەوە و بەخێرایی سەردانی نەخۆشخانەکان بکەن.
سبەینێ چەکی شایستە داراییەکانی بەشێک لە جوتیارانی سایلۆی سلێمانی دابەش دەکرێت
بەڕێوەبەرایەتی سایلۆی سلێمانی ئاگادارییەک ئاڕاستەی ئەو جوتیارانە دەکات کە بۆ ساڵی 2025 گەنمیان رادەست بە سایلۆکە کردووە.
لە ئاگادارییەکەدا هاتووە، ئەو جوتیارانەی کە ژمارەی پسوڵەی سەرەوەی کێشەکەیان تا ژمارە (1214) هەیە، پێویستە سبەی پێنجشەممە، رێکەوتی 19ی حوزەیرانی 2026، سەردانی هۆبەی ژمێریاری لە بەڕێوەبەرایەتی سایلۆی سلێمانی بکەن.
ئەم سەردانیکردنە بە مەبەستی وەرگرتنی چەکی شایستە داراییەکانی کڕینەوەی گەنمەکەیانە لەلایەن حکومەتەوە.
ئەنجومەنی وەزیرانی هەرێمی کوردستان کۆبوەوە و لە کۆبوونەوەکەدا جەخت لە پەیوەندی و هاوئاهەنگیکردن لەگەڵ لایەنە پەیوەندیدارەکانی حکومەتی فیدڕاڵ کرایەوە بۆ چارەسەرکردنی کێشەکان و نەهێشتنی ئاستەنگەکانی بەردەم وەرگرتنەوە و بەبازاڕکردنی بەرهەمی جوتیارانی هەرێمی کوردستان.
لە سەرەتای کۆبوونەوەکەدا، پرسی ئەو فەرمانبەرانە تاوتوێ کرا کە خانەنشین بوون و هێشتا موچەیان وەرنەگرتووە؛ ئەنجومەن وەزارەتە پێوەندیدارەکانی راسپارد بە هاوئاهەنگی لەگەڵ بەغداد، کێشەکانیان بە شێوەیەکی خێرا و یاسایی چارەسەر بکەن بۆ ئەوەی لە رۆژی شایستەبونیانەوە موچەکانیان بۆ دابین بکرێت.
لە تەوەرێکی دیکەدا، بابەتەکانی پەیوەست بە وەرگرتنی بەرهەمی گەنمی جوتیارانی هەرێم و ئاستەنگەکانی بەبازاڕکردنی تاوتوێ کران.
ئەنجومەنی وەزیران بڕیاریدا لیژنەیەکی هاوبەش لە وەزارەتەکانی کشتوکاڵ، بازرگانی و دەستەی وەبەرهێنان پێکبهێنرێت بۆ دۆزینەوەی میکانیزمێکی گونجاو بۆ ساخکردنەوەی گەنمەکە، هاوکات داوای لە حکومەتی فیدڕاڵ کرد کە پلانی وەرگرتنی گەنم بە شێوەیەکی دادپەروەرانە و بە رەچاوکردنی تایبەتمەندییەکانی هەرێم جێبەجێ بکات.
سەبارەت بە مافی خانەنشینی ئەندامانی ئەنجومەنی پارێزگاکان، ئەنجومەنی وەزیران جەختی لە پاراستنی مافی ئەو ئەندامانە کردەوە کە مەرجە یاساییەکانیان تێدایە و بڕیاری دا لیژنەیەکی تایبەت لە دیوان، سکرتاریەتی ئەنجومەن و وەزارەتەکانی ناوخۆ و دارایی بۆ رێکخستنی رێکارەکان پێکبهێنرێت.
لە کۆتاییدا، ئەنجومەنی وەزیران باسی لە خەرجییەکانی بودجەی حاکیمە وەک (پسووڵەی خۆراک، دەرمان و پشتیوانی وزە) کرد و پێداگیری لەسەر مافی یاسایی و دەستوری هاووڵاتیانی هەرێم کردەوە بۆ وەرگرتنی بەشە شایستەی خۆیان.